Iragarkia

93. ALDIZKARIA - 2014ko maiatzaren 15a

1. NAFARROAKO FORU KOMUNITATEA

1.4. DIRU-LAGUNTZAK, LAGUNTZAK ETA BEKAK

174/2014 EBAZPENA, apirilaren 28koa, Hezkuntzaren, Lanbide Heziketaren eta Unibertsitateen zuzendari nagusiak emana, 2014-2015 ikasturtean Nafarroako Foru Komunitatean Curriculum Egokituko Programak emateko baimena duten ikastetxe itunduetan eta entitateetan egoera sozioekonomiko ahulean dauden ikasleei diru-baliabideak esleitzeko deialdi publikoaren oinarriak onesten dituena.

Hezkuntzari buruzko maiatzaren 3ko 2/2006 Lege Organikoaren 80. eta 81. artikuluetan administrazio publikoei eskatzen zaie konpentsazio neurriak hartzeko, egoera ahulean dauden pertsonei, giza taldeei eta lurralde eremuei laguntzeko, horrela hezkuntza sistemaren lana sendotuko baita, faktore sozialek, ekonomikoek, kulturalek, geografikoek, etnikoek edo bestelakoek eragindako desberdintasunak saihesteko.

Hezkuntzako kontseilariak ekainaren 13an emandako 93/2008 Foru Aginduaren 36. artikuluak ezartzen du, berdintasuna bermatzeko eta desberdintasunak orekatzeko asmoz, jantokirako, eskolako materialerako, jarduera osagarrietarako eta prestakuntza jardueretarako laguntzak eta deialdiak ezarriko direla urtero.

2012rako Nafarroako Aurrekontuei buruzko abenduaren 28ko 29/2011 Foru Legearen 31.5 artikuluaren arabera, Hezkuntza Departamentuak, hurrengo ekitaldiko aurrekontuaren kargura gastu konpromisoak hartuta, bekak eta laguntzak eman eta eskola garraioa eta eskola jantokien zerbitzua kontratatu ahalko ditu, betiere konpromiso horiek aurrekontuko ekitaldia ez den urteko aldi bati badagozkio, ikasturtearen beharrei erantzunez.

Hortaz, Antolamenduaren eta Aukera Berdintasunaren Zerbitzuko zuzendariak emandako txostena ikusirik, non proposatzen baita 2014-2015 ikasturtean Nafarroako Foru Komunitatean Curriculum Egokituko Programak emateko baimena duten ikastetxe itunduetan eta entitateetan egoera sozioekonomiko ahulean dauden ikasleei arreta emateko beharrezkoak diren diru baliabideak esleitzeko deialdi publikoaren oinarriak onestea.

Nafarroako Foru Komunitateko Administrazioari buruzko abenduaren 3ko 15/2004 Foru Legearen 22.1d) artikuluak emandako ahalmenak erabiliz,

EBATZI DUT:

1. Nafarroako Foru Komunitatean Curriculum Egokituko Programak emateko baimena duten ikastetxe itunduei eta entitateei diru baliabideak esleitzeko deialdi publikoaren oinarriak onestea 2014-2015 ikasturterako, egoera sozioekonomiko ahulean dauden ikasleei arreta eman diezaieten.

2. Deialdi honen xede diren diru baliabideetarako diru-laguntzak banatzeko kreditua 413.000 eurokoa izanen da osotara. Horietarik 115.800 euro 2012ko aurrekontuetako –2014.rako luzatu baitziren– “Ikastetxe itunduei laguntzak ematea immigraziorako eta kultur gutxiengoetarako” izeneko 425009-42190-4811-322402 kontu-sailetik hartuko dira. Gainerakoa, 297.200 euro, 2015erako gastu aurrekontuan izen berarekin sortuko den kontu-sailetik.

3. Ebazpen hau eta I. eta II. eranskinak Nafarroako Aldizkari Ofizialean argitaratzea.

4. Ebazpen hau eta eranskinak igortzea Hezkuntza Departamentuan dagoen kontu-hartzaile delegatuari, Antolamenduaren eta Aukera Berdintasunaren Zerbitzuari, Baliabide Ekonomikoen Zerbitzuari, Ikastetxeen, Finantzaketaren eta Ikasketetarako Laguntzen Atalari, Aniztasunarekiko Arretaren eta Hezkuntza Premia Berezien Atalari eta Kudeaketa Ekonomikoaren Bulegoari, behar diren ondorioak izan ditzaten.

Iruñean, 2014ko apirilaren 28an.–Hezkuntzaren, Lanbide Heziketaren eta Unibertsitateen zuzendari nagusia, David Herreros Sota.

I. ERANSKINA

2014-2015 ikasturtean Nafarroako Foru Komunitatean Curriculum Egokituko Programak emateko baimena duten ikastetxe itunduetan eta entitateetan egoera sozioekonomiko ahulean dauden ikasleei diru baliabideak esleitzeko deialdi publikoaren oinarriak

1. Deialdiaren xedea.

Deialdi honen xedea da diru baliabideak esleitzea diru beharra duten ikasleak eskolatzen lagundu eta Curriculum Egokituko Programak emateko baimena duten ikastetxe itunduei eta entitateei, Hezkuntzari buruzko maiatzaren 3ko 2/2006 Lege Organikoaren 80. artikuluari jarraikiz.

2. Baliabide ekonomikoak.

Ematen diren diru baliabideak egoera sozioekonomiko ahulean dauden ikasleak eskolatzen sortzen diren oztopoak gainditzeko erabiliko dira. Diru baliabide horiek ikastetxe itunduek jasotzen duten modulu ekonomikoaren “beste gastu batzuk” sailari erantsiko zaizkio. Horien aplikazioa ikasturte bakoitzaren amaieran justifikatuko da, hezkuntza ituneko “beste gastu batzuk” sailarekin egiten den prozedura bera erabiliz, hau da, zenbateko horien aplikazioari buruz Eskola Kontseiluak hartutako erabakiaren ziurtagiria aurkeztu beharko du ikastetxeko titularrak. Curriculum Egokituko Programak emateko baimena duten entitateek baliabide ekonomiko horiek justifikatuko dituzte beren emaitzen kontuan, ikasturtea bukatzen denean.

2014-2015 ikasturterako baliabide hauek ematen ahalko dira, xedeen arabera:

a) 90.000 euro, egoera sozioekonomiko ahulean dauden ikasleen ekipamendu pertsonalerako.

Diru baliabideen azken hartzailea ikaslea bera izanen da, eta horiekin ordainduko dira ikasle bakoitzaren ekipamendua, eskolako lan-ateraldietan parte hartzea eta ikasleentzako beste jarduera osagarri batzuk. Xede horrekin 150 euro arte ordainduko dira, Haur Hezkuntzako, Lehen Hezkuntzako eta Derrigorrezko Bigarren Hezkuntzako ikasle bakoitzeko.

b) 300.000 euro, eskola jantokiko zerbitzurako. Ikastetxeei 400 euro ordainduko zaizkie, gehienez, ikasturtean, zerbitzu hori behar duen Haur Hezkuntzako, Lehen Hezkuntzako eta Derrigorrezko Bigarren Hezkuntzako ikasle bakoitzeko.

c) 23.000 euro, eskolatutako ikasle guztien %25 etorkinak edo egoera ahulean dauden ikasleak dituzten ikastetxeentzat. Diru-kopuru osagarri hori ikasle horiei arreta emateak sortzen dituen funtzionamendu gastuak finantzatzeko izanen da.

Ikastetxeei ordaintzeko kopuruak kalkulatzeko, bai ekipamendurako bai jantokirako, kontuan hartuko da zer kopuru ezarri den deialdi honetan eta zenbat ikasle onartu diren deialdian.

Ikastetxe bakoitzaren hezkuntza ituna formalizatzeko dokumentuan, non jasotzen baitira Hezkuntza Administrazioak eta Curriculum Egokituko Programak emateko baimena duten ikastetxe itunduen eta entitateen titularrak elkarrekin dituzten eskubide eta eginbeharrak, klausula gehigarri batean, deialdi honen ebazpenean ikastetxe itundu bakoitzerako onesten diren baliabideak agertuko dira.

3. Eskaerak egiteko epea eta aurkeztu beharreko agiriak.

3.1. Deialdi honen 1. puntuan adierazitako ezaugarriak dituzten ikasleak eskolatu eta Curriculum Egokituko Programak emateko baimena duten ikastetxe itunduek eta entitateek deialdian parte hartzeko eskabidea aurkeztu beharko dute, departamentu honetako Aniztasunarekiko Arretaren eta Hezkuntza Premia Berezien Atalari zuzendua, deialdia Nafarroako Aldizkari Ofizialean argitara eman eta biharamunetik hasita hogei egun naturaleko epean.

3.2. Eskaera ikastetxeen erregistro berezian agertzen den titularrak aurkeztu beharko du.

Horrez gain, laguntzak kudeatzen dituen pertsonaren izen-deiturak agertuko dira, ardura duen atalarekin harremanak izateko.

Hezkuntza Departamentuak emanen dituen ekipamendurako eta jantokietarako laguntzen eskaerak ikastetxeen bitartez baizik ez dira eginen. Ikastetxeek, berriz, kasuan kasuko udaletako gizarte zerbitzuei txostenak eskatuko dizkiete laguntza eskatzen duen ikaslearen familiaren behar ekonomikoari buruz, ikasleen legezko ordezkariek datuak lagatzeko baimena emanda aldez aurretik, Datu Pertsonalak Babesteari buruzko abenduaren 13ko 15/1999 Lege Organikoan ezarritakoarekin bat.

Eskabidearekin batera honako hauek aurkeztuko dira:

1) 2. eranskina, behar bezala betea ikasleen datuekin (deiturak, izena, ikasmaila, ekipamendurako diru-laguntza, jantokirako diru-laguntza eta dagokion gizarte zerbitzua).

2) Laguntza eskatzen duen ikasleari dagokion gizarte zerbitzuaren txostena.

Udalek ematen dituzten jantokiko laguntzak, horrelakorik badago, Hezkuntza Departamentuak ematen dituen laguntzak osatzeko izanen dira.

3) Ikastetxearen aitorpena, laguntzen hartzaileek irakaskuntzaren kuota ordaintzeko inolako diru-ekarpenik egiten ez dutela adierazteko.

3.3. Laguntza eskabidea eta eskatutako dokumentazioa, 2. eranskinaren arabera, 3.1 atalean adierazten den epean aurkeztu beharko dira Hezkuntza Departamentuko Erregistroan, azaroaren 26ko 30/1992 Legearen 38.4 artikuluan adierazitako tokietan edo Nafarroako Foru Komunitateko Administrazioaren Erregistro Orokor Elektronikoaren bidez (erregistro elektroniko hori ekainaren 23ko 70/2008 Foru Dekretuak arautu zuen).

Aniztasunarekiko Arretaren eta Hezkuntza Premia Berezien Atalak bi zerrendak alderatuko ditu, ikastetxeek bidalitakoak eta gizarte zerbitzuek egindakoak, non adieraziko baita zer ikaslek egoera ahulean egonik, betetzen dituzten laguntza hau hartzeko baldintzak.

Eskaerak aurkezteko epea bukatuta, ikastetxeek zazpi egun naturaleko epea izanen dute dokumentazioan egindako akatsak zuzentzeko.

4. Egoera sozioekonomiko ahulean egon eta deialdi honetan ezarritako epearen ondotik eskolatzen diren ikasleentzako laguntza eskaerak.

4.1. Eskolan egoki integratzeko, 2. atalean zehazten den eskola ekipamendurako eta/edo jantoki zerbitzurako diru-laguntza behar duten egoera sozioekonomiko ahuleko ikasleei diru-laguntza emanen zaie, nahiz eta behar horiek atal hartan ezarritako epea bukatu ondoren sortu. Laguntza horien zenbatekoa ikasturtea bukatzeko gelditzen den denboraren heinekoa izanen da, ikasturtea hamar hilabetekoa dela kontuan hartuta, baldin eta behar beste diru badago 2012ko aurrekontuetako –2014rako luzatuak baitaude– “Ikastetxe itunduei laguntzak ematea immigraziorako eta kultur gutxiengoetarako” izeneko kontu-sailean edo 2015eko gastuen aurrekontuan izen horrekin gaitzen den kontu-sailean.

Halaber, ikastetxeek Aniztasunarekiko Arretaren eta Hezkuntza Premia Berezien Atalari adieraziko diote ikasleen artean zer baja diren jantokian, laguntza hauek behar bezala arautzeko eta bideratzeko.

5. Deialdiaren prozedura eta ebazpena.

5.1. Antolamenduaren eta Aukera Berdintasunaren Zerbitzuak izendatzen dituen teknikariek eskaera egiten duten ikastetxe guztien gaineko txosten bakarra prestatuko dute. Txosten horrek honako hauek bilduko ditu:

a) Ikastetxearen identifikazio datuak.

b) Egoera sozial ahulean dauden ikasleengan atzemandako behar ekonomikoen azterketa eta balorazioa.

Txosten horretan ikasleak eskolatzen laguntzeko behar diren diru baliabideen proposamena eginen da.

5.2. Balorazio prozesua bukatuta, Antolamenduaren eta Aukera Berdintasuneko zuzendariak, Batzorde Teknikoak aurrez balorazioa eginda, behin-behineko proposamena eginen du, ikastetxeei jakinaraziko zaiena, bost eguneko epean egoki iruditzen zaizkien alegazioak edo erreklamazioak aurkez ditzaten.

Organo instruktoreak erreklamazioak ebatzi ondoren, behin betiko ebazpen proposamena igorriko zaio Hezkuntzaren, Lanbide Heziketaren eta Unibertsitateen zuzendari nagusiari. Gero, ebazpena ikastetxeei jakinaraziko zaie, diru-laguntzarik eman ote zaien adieraziz. Jakinarazpen hori telematika bidez igortzen ahalko da, gaitutako helbide elektronikoa baldin badu (Posta Zerbitzuari eskatua) eta eskabidean erantzuna telematika bidez jaso nahi duela adierazten badu berariaz.

5.3. Laguntzetarako baliabide ekonomikoak, 2. atalean jasotzen direnak eta 5.2 atalean ezarritako epea amaitu ondoren sortzen direnak, Hezkuntzaren, Lanbide Heziketaren eta Unibertsitateen zuzendari nagusiak emanen ditu, ebazpen bidez, Antolamenduaren eta Aukera Berdintasunaren Zerbitzu Teknikoak txostena eman ondoren, eta aurkeztutako eskaeren hautapena egin behar duen batzordeak proposaturik.

5.4. Antolamenduaren eta Aukera Berdintasunaren Zerbitzuak, ikastetxeetan laginketa eginez, deialdiaren xedeko laguntzak haren helburuetarako erabiltzen direla egiaztatuko du, gastuak justifikatzeko eskatuko baitu.

5.5. Curriculum Egokituko Programak emateko baimena duten ikastetxe itunduek eta entitateek laguntzen onuradun diren ikasleen familiei adieraziko dizkiete laguntzen zenbatekoak eta haien kontzeptuak; eta, urteko ordainketa egin ondoren, laguntza ekonomikoaren hartu-agiri bat sinatuko dute, eta, hartan, datu hauek bilduko dira: izena, deiturak –bai familiaren ardura duenarena bai ikaslearena–, nortasun agiri nazionala eta ikastetxeak jantokiagatik edo ekipamenduagatik osotara jasotako diru-kopurua.

6. Organo eskudunak.

Laguntzak emateko prozedura instruituko duen organoa Antolamenduaren eta Aukera Berdintasunaren Zerbitzua izanen da.

Eskaerak hautatzeko batzorde teknikoak kide hauek izanen ditu:

Batzordeburua:

–Antolamenduaren eta Aukera Berdintasunaren Zerbitzuko zuzendaria.

Batzordekideak:

–Baliabide Ekonomikoen Zerbitzuko zuzendaria.

–Ikastetxeen, Finantzaketaren eta Ikasketetarako Laguntzen Ataleko burua.

–Aniztasunari Arreta Emateko eta Hezkuntza Premia Berezien Ataleko burua.

–Aurreko ataleko langile bat.

Idazkaria:

–Hezkuntza Departamentuko Idazkaritza Tekniko Nagusiko legelari bat.

7. Errekurtsoak.

7.1. Deialdi honen aurka, eta bere oinarrien eta aplikazio egintzen aurka ere, gora jotzeko errekurtsoa jar daiteke, Hezkuntza Departamentuko kontseilariari zuzendua, deialdia argitara eman edo dagokien ikastetxeei jakinarazi eta biharamunetik hilabeteko epean.

Iragarkiaren kodea: F1406368