77. ALDIZKARIA - 2014ko apirilaren 22a

1. NAFARROAKO FORU KOMUNITATEA

1.4. DIRU-LAGUNTZAK, LAGUNTZAK ETA BEKAK

169/2014 EBAZPENA, martxoaren 21ekoa, Nekazaritza eta Abeltzaintzako zuzendari nagusiak emana, eskaera bakarraren aurkezpena arautzen duena 2014ko kanpainarako, honako hauetarako: Nekazaritza Bermatzeko Europako Funtsak (NBEUF) finantzatutako nekazaritza eta abeltzaintzako ordainketa zuzenak, Nafarroako Landa Garapenaren Programako zenbait laguntza, Nafarroako Aurrekontu Orokorren kargura finantzatutako nekazaritzaren eta ingurumenaren arloko laguntzak, ordainketa bakarrerako eskubideak lagatzearen jakinarazpenak, erreserba nazionaleko eskubide eskaerak eta Nafarroako Nekazaritzako Ustiategien Erregistroaren inskripzioa eta erregistro horretarako datuen urteko deklarazioa.

Kontseiluaren 2009ko urtarrilaren 19ko 73/2009 (EE) Erregelamenduak nekazarientzako laguntza zuzeneko araubideei aplikatzen ahal zaizkien xedapen komunak ezartzen ditu, Nekazaritzako Politika Bateratuaren esparruan, zenbait laguntza araubide ezartzen ditu nekazarientzat, 1290/2005 (EE), 247/2006 (EE) eta 378/2007 (EE) Erregelamenduak aldatzen ditu eta 1782/2007 (EE) Erregelamendua indargabetzen du.

Kontseiluak, 2005eko irailaren 20ko 1698/2005 (EE) Erregelamenduaren bidez, Europar Batasunak landa garapenerako nekazaritzarako LGENFaren bidez finantzaturiko laguntzari buruzko arauak ezarri zituen.

2013ko abenduaren 20an Nekazaritzako Politika Bateratuaren erregelamendu berriak argitaratu dira Europar Batasunaren Aldizkari Ofizialean:

Europako Parlamentuaren eta Kontseiluaren 2013ko abenduaren 17ko 1305/2013 (EB) Erregelamendua, Landa Garapenerako Europako Nekazaritza Funtsaren bidezko landa garapeneko laguntzei buruzkoa, Kontseiluaren irailaren 20ko 1698/2005 (EE) Erregelamendua indargabetzen duena.

Europako Parlamentuaren eta Kontseiluaren 2013ko abenduaren 17ko 1307/2013 (EB) Erregelamendua, Nekazaritzako Politika Bateratuaren esparruko laguntza araubideen ondorioz nekazariei egiten zaizkien zuzeneko ordainketan aplikatzeko xedapenak ezartzen dituena eta 637/2008 (EE) eta 73/2009 (EE) Erregelamenduak indargabetzen dituena.

NPBaren esparru berria ez da osorik aplikatuko 2014ko urtarrilaren 1etik aurrera. Hala ere, Europako Parlamentuaren eta Kontseiluaren 2013ko abenduaren 17ko 1310/2013 (EB) Erregelamendua onetsi da, xedapen iragankorrak ezartzen dituena Landa Garapenerako Europako Nekazaritza Funtsaren bidezko (LGENF) landa garapenerako laguntzari buruz, Europako Parlamentuaren eta Kontseiluaren 1305/2013 (EB) Erregelamendua aldatzen duena 2014ko ekitaldiko baliabideei eta horien banaketari dagokienez, eta Kontseiluaren 73/2009 (EE) Erregelamendua eta Europako Parlamentuaren eta Kontseiluaren 1307/2013 (EB), 1306/2013 (EB) eta 1308/2013 Erregelamenduak aldatzen dituena, 2014ko ekitaldiko aplikazioari dagokionez.

Azaroaren 13ko 1680/2009 Errege Dekretuak, ordainketa bakarraren araubidea nekazaritzan aplikatzeari buruzkoak, martxoaren 25eko 420/2011 Errege Dekretuak aldatuak, ordainketa bakarrerako eskubide lagapenen jakinarazpenei buruzkoa eta erreserba nazionaleko eskubide eskaerak arautzen ditu.

2014ko kanpaina trantsizioko urtea da. Egungo araudia oraindik indarrean badago ere, hura aldatu behar da, kontuan harturik, gainera, Urte Anitzeko Finantza Esparru berriak ezartzen duen aurrekontua dagoeneko 2014an aplikatu behar dela.

Nekazaritza Bermatzeko Espainiako Funtsaren ebazpen baten bidez, Nekazaritzako Politika Bateratuaren esparruan nekazariei egiten zaizkien zuzeneko laguntzen araubideetarako zuzkidura finantzarioak ezarri dira 2014rako. Alde horretatik, ordainketa bakarrerako esleitutako eskubideen balioari eta 73/2009 Erregelamenduaren 68. artikuluaren arabera ezarritako laguntza berariazkoen osoko aurrekontuari murrizketa lineala aplikatu zaie, %8,64koa. Halaber, behi ume-hazle bakoitzeko primaren kasuan, gehieneko muga nazionalen murrizketa lineala %8,87koa izanen da.

Hori dela eta, urriaren 1eko AAA/1787/2013 Aginduak laguntzarako eskubide lagapenak jakinarazteko epea (azaroaren 13ko 1680/2009 Errege Dekretuaren 29.2 artikuluan ezarritakoa) aldatu zuen, ordainketa bakarrerako eskubideak lagatzeko jakinarazpenen egutegiak eta eskaera bakarra aurkezteko egutegia sinkronizatzeko eta aurreko lerroaldean aipatutako aurrekontu-aldaketaren aurretik aurkeztu eta ordainketa bakarrerako eskubideak ukitzen ahal dituzten lagapenen ondorioz sortzen ahal diren segurtasun-gabezia juridikoko egoerak saihesteko.

Urtarrilaren 23ko 202/2012 Errege Dekretuak nekazaritzarako eta abeltzaintzarako zuzeneko ordainketen aplikazioa arautzen du 2012tik aurrera, eta urtarrilaren 11ko 2/2013 Errege Dekretuak aldatu du.

Abenduaren 20ko 1013/2013 Errege Dekretuak berariazko xedapenak ezartzen ditu Nekazaritzarako eta abeltzaintzarako zuzeneko ordainketen aplikazioa arautzen duen 202/2012 Errege Dekretua 2014. urtean aplikatzeko. Errege dekretu horrek ezarritako aldaketa teknikoetako bat da eskaerak aurkezteko epearen hasiera martxoaren 1ean ezartzea. Hala ere, 1310/2013 Erregelamendua (xedapen iragankorrak ezartzen dituena) aurreikusitakoa baino lehen argitaratu denez eta 2014ko urtarrilaren 1etik aurrera aplikatu behar denez, Nekazaritza, Elikadura eta Ingurumeneko Ministerioak AAA/69/2014 Agindua onetsi du 2014an eskaera bakarra aurkezteko epea aldatzeko, honela xedatuz: epea 2014ko otsailaren 17an hasiko da eta 2014ko maiatzaren 15ean bukatuko da.

Apirilaren 3ko 486/2009 Errege Dekretuak kudeaketako legezko betekizunak eta nekazaritzako zein ingurumeneko baldintza egokiak ezarri dizkie Nekazaritzako Politika Bateratuaren esparruan zuzeneko ordainketak eta landa garapenerako zenbait laguntza jasotzen dituzten nekazariei, eta mahastiak berregituratu eta moldatzeko laguntzarako eta mahastia erauzteko primarako programen arabera laguntzak jasotzen dituztenei.

Landa Garapeneko, Ingurumeneko eta Toki Administrazioko kontseilariaren foru agindu baten bidez, kudeaketako legezko betekizunak eta nekazaritzako zein ingurumeneko baldintza egokiak ezarriko dira 2014ko kanpainarako, Nekazaritzako Politika Bateratuaren esparruan zuzeneko laguntzak, Landa Garapenerako 2007-2013 Programaren 2. ardatzaren esparruan laguntza jakin batzuk eta mahastiak berregituratu eta moldatzeko eta erauzteagatiko prima laguntzeko programen arabera laguntzak jasotzen dituzten nekazariek bete ditzaten.

Landa Garapeneko eta Ingurumeneko kontseilariaren otsailaren 1eko 41/2011 Foru Aginduak Nekazaritzako Lurzatien Informazio Geografikorako Sistema (NELIGS) arautzen du eta hura Nafarroan kudeatzeko arauak ezartzen ditu.

Nekazaritza, Abeltzaintza eta Elikadurako kontseilariaren otsailaren 12ko 32/2007 Foru Aginduaren bidez, Nafarroako eskualde menditsu eta behartsuetarako konpentsazio-ordainak eman, kudeatu eta kontrolatzeko araubide orokorra erregulatu zen.

Landa Garapeneko eta Ingurumeneko kontseilariaren ekainaren 15eko 283/2010 Foru Aginduaren bidez, ardiak Errege Bardean larratzeko “Natura 2000” laguntzak emateko arauak eta deialdia onetsi ziren.

Nafarroako Gobernuak 2010eko martxoaren 22an eta 2011ko maiatzaren 2an hartutako Erabakien bitartez, baimena eman zitzaion Landa Garapen, Industria, Enplegu eta Ingurumeneko Departamentuari urte anitzeko gastu-konpromiso bat hartzeko 2010etik 2015era bitarteko ekitaldietarako, ardiak Errege Bardean larratzeko “Natura 2000” laguntzak tramita daitezen.

Landa Garapeneko eta Ingurumeneko kontseilariak ekainaren 15ean emandako 322/2009 Foru Aginduaren bidez, hazitarako patataren laborantzan nekazaritza eta ingurumen arloko neurriak sustatzen dituzten laguntzak emateko arauak onetsi ziren.

Nafarroako Gobernuak 2009ko ekainaren 1ean eta 2011ko apirilaren 11n hartutako Erabakien bitartez, baimena eman zitzaion Landa Garapen, Industria, Enplegu eta Ingurumeneko kontseilariari urte anitzeko gastu-konpromisoak hartzeko 2009tik 2015era bitarteko ekitaldietarako, hazitarako patataren laborantzan nekazaritza eta ingurumen arloko neurriak sustatzen dituzten laguntzak tramitatzeko.

Landa Garapeneko eta Ingurumeneko kontseilariak otsailaren 19an emandako 76/2010 Foru Aginduaren bidez, mahastietan nekazaritza eta ingurumen arloko neurriak aplikatzeko laguntzak eman, kudeatu eta kontrolatzeko arauak onetsi ziren.

Nafarroako Gobernuak 2010eko otsailaren 1ean hartutako Erabakiaren bidez, baimena eman zitzaion Landa Garapeneko eta Ingurumeneko Departamentuari urte anitzeko gastu-konpromisoak hartzeko 2010etik 2014ra bitarteko ekitaldietarako, mahastietan nekazaritza eta ingurumen arloko neurriak aplikatzeko laguntzak tramita daitezen.

Abeltzaintza, Nekazaritza eta Elikadurako kontseilariak, otsailaren 8ko 29/2007 Foru Aginduaren bidez, NBEUFek finantzaturiko laguntzak kudeatzeko prozedura ezarri zuen, eta Nekazaritza, Abeltzaintza eta Elikadurako kontseilariak, otsailaren 8ko 30/2007 Foru Aginduaren bidez, LGENFarekin batera landa garapenerako finantzaturiko laguntzak tramitatzeko prozedura ezarri zuen.

Landa Garapeneko, Ingurumeneko eta Toki Administrazioko kontseilariak otsailaren 11n emandako 34/2014 Foru Aginduak Nafarroako Nekazaritzako Ustiategien Erregistroan inskribatutako nekazaritza ustiategiak kalifikatzeko irizpideak ezartzen ditu. Haren 4. eta. 5 artikuluetan ustiategiek erregistroan inskribatzeko eta inskribatutako ustiategiek urtero datuak deklaratzeko beharkizunak arautzen dira.

Ebazpen honek, aipatutako arauek ezarritako esparruan, 2014ko kanpainako eskaera bakarra egiteko baldintzak ezartzen ditu, ordainketa bakarrerako araubiderako, azaleraren arabera ordaindu beharreko gainerako NBEUF laguntzetarako eta abeltzaintzako primetarako, eskualde menditsu eta behartsuetako konpentsazio-ordainerako eta Estatuko laguntza hauetarako: hazitarako patatarako, nekazaritza eta ingurumen arloetako mahastirako, eta Errege Bardean larratzeko. Azkenik, erreserba nazionaleko eskaerak eta eskubide lagapenak arautzen ditu ordainketa bakarrerako araubidearen barrenean.

Horrenbestez, Nafarroako Foru Komunitateko Administrazioari buruzko abenduaren 3ko 15/2004 Foru Legearen 22. artikuluak ematen dizkidan eskumenak erabiliz,

EBATZI DUT:

1. 1. artikuluan aurreikusitako laguntzetarako, 2014ko kanpainan eskaera bakarra aurkezteko deialdia eta oinarriak onestea; orobat, eskubide lagapenen jakinarazpenak eta erreserba nazionaleko eskubide eskaerak aurkezteko.

2. 3.200.000 euroko gastua baimentzea, “Konpentsazio-ordaina. LGP LGENF” izeneko 710001 71230 4700 414200 kontu-sailaren kargura, 2015ko gastuen aurrekontutik, edo gaitzen den balio bereko kontu-sailaren kargura (E-07/000022-01 PEP elementua), baldin eta behar adinako kreditu egokia bada 2014ko deialdiari aurre egiteko Nafarroako eskualde menditsu edo behartsuetarako konpentsazio-ordainaren eskaeran. 2014an guztira eskatutako zenbatekoak kreditu baimendu hori gainditzen badu, laguntza ematerakoan kontu-sailean erabilgarri dagoen kreditua deialdi honi erantsiko zaio, ahalik eta eskaera gehienei erantzun ahal izateko. Laguntza honen eskaerak ez du inolako eskubiderik sortzen laguntza jasotzeko. Laguntza eman ahal izateko, 2015ean behar adinako kreditu egokia egon beharko du. Halakorik ezean, nahikoa arrazoia izanen da laguntza eskaerak ukatzeko.

3. Ebazpen hau Nafarroako Aldizkari Ofizialean argitaratzea.

4. Ebazpen honen aurka gora jotzeko errekurtsoa jar daiteke, Landa Garapeneko, Ingurumeneko eta Toki Administrazioko kontseilariari zuzendua, argitalpen egunaren biharamunetik hasi eta hilabeteko epean.

Iruñean, 2014ko martxoaren 21ean.–Nekazaritza eta Abeltzaintzako zuzendari nagusia, Ignacio Guembe Cervera.

2014KO KANPAINARAKO ESKAERA BAKARRA AURKEZTEKO OINARRIAK

I. TITULUA

Xedapen orokorrak

1. oinarria. Xedea eta aplikazio eremua.

Nafarroako Foru Komunitatearen eremuan 2014ko kanpainako laguntzen eskaera bakarrerako dei egitea du xede ebazpen honek; orobat, eskaera horretan sartutako diru-laguntzen Estatuko eta Europar Batasuneko araudiaren arau osagarriak ezartzea.

Eskaera bakarrean sartutako zuzeneko laguntzak:

1. 73/2009 (EE) Erregelamenduaren III. tituluan ezarritako ordainketa bakarrerako araubiderako laguntza.

2. Behi ume-hazle bakoitzeko prima, 73/2009 (EE) Erregelamenduaren IV. tituluko 111. artikuluko 11. atalean ezarria.

3. Berariazko laguntzak, 73/2009 (EE) Erregelamenduaren 68. artikulua aplikatzearen ondoriozkoak.

3.1. Nekazarientzako laguntzak, 202/2012 Errege Dekretuaren V. tituluko I. kapituluan ezarritakoak:

a) Lehorreko lurretan txandakako laborantza sustatzeko programa nazionala, 1. atalean ezarria.

b) Lekaleen kalitatea sustatzeko programa nazionala, 2. atalean ezarria.

c) Fruitu oskoldunen sektoreko zenbait espezietan nekazaritza eta ingurumen onura handiagoak ematen dituzten berariazko nekazaritza jarduerak sustatzeko programa nazionala, 3. atalean ezarria.

d) Tabakoaren kalitatea sustatzeko programa nazionala, 4. atalean ezarria.

e) Azukre-erremolatxaren kalitatea sustatzeko programa nazionala, 6. atalean ezarria.

3.2. Nekazarientzako laguntzak, 202/2012 Errege Dekretuaren V. tituluko II. kapituluan ezarritakoak:

a) Behi haragiaren kalitatea hobetzeko laguntza, 1. atalean ezarria.

b) Behi ume-hazleak dituzten nekazariei berariazko alde txarrak konpentsatzeko laguntza, 2. atalean ezarria.

c) Ardi eta ahuntz produkzioen kalitatea hobetzeko laguntza, 3. atalean ezarria.

d) Ardien sektoreko nekazariei berariazko alde txarrak konpentsatzeko laguntza, 4. atalean ezarria.

e) Ahuntzen sektoreko nekazariei berariazko alde txarrak konpentsatzeko laguntza, 5. atalean ezarria.

f) Esnetarako behien sektoreko nekazariei berariazko alde txarrak konpentsatzeko laguntza, 6. atalean ezarria.

g) Esnearen eta esnekien kalitatea hobetzeko laguntza, 7. atalean ezarria.

4. Kontseiluaren 1698/2005 (EE) Erregelamenduan landa garapenerako ezarritako laguntzak.

4.1. 2007-2013 aldirako Nafarroako Landa Garapeneko Programaren esparruan ageri diren laguntzak:

a) Nafarroako eskualde menditsu eta behartsuetarako konpentsazio-ordaina, otsailaren 12ko 32/2007 Foru Aginduan arautua.

4.2. Landa garapenerako laguntzak lortzeko eskaera, beste autonomia erkidego batzuetan onetsitako programen esparruan.

5. Soilik Nafarroako Gobernuaren aurrekontu orokorren kargurako laguntzak.

a) Hazitarako patataren laborantzan nekazaritza eta ingurumen arloko neurriak sustatzeko laguntza, ekainaren 15eko 322/2009 Foru Aginduan arautua.

b) Mahastietan nekazaritza eta ingurumen arloko neurriak aplikatzeko laguntzak, otsailaren 19ko 76/2010 Foru Aginduan arautuak.

c) Errege Bardean ardiak larratzeko “Natura 2000” laguntza, ekainaren 15eko 283/2010 Foru Aginduan arautua.

6. Halaber, ordainketa bakarrari dagokionez, eskubideak lagatzeko jakinarazpenak eta erreserba nazionaleko eskubide eskaerak arautzen dira, 1680/2009 Errege Dekretuan xedatutakoarekin bat.

7. Azkenik, bazka-azalera kontuan hartzea eskatuko da, azienda-dentsitatea kalkulatzeko, 202/2012 Errege Dekretuaren 65.2. artikuluan ezarritakoaren arabera.

2. oinarria. Nafarroako Nekazaritzako Ustiategien Erregistroan inskribatzea eta inskribatutako ustiategiek urtero datuak deklaratzea.

1. Nafarroako Nekazaritzako Ustiategien Erregistroan inskribatzeko eta inskribatutako ustiategiek urtero datuak deklaratzeko, otsailaren 11ko 34/2014 Foru Aginduaren 4. eta 5. artikuluetan ezarritakoari jarraituko zaio. Eskaera bakarraren bidez eginen dira, hura aurkezteko epeetan, aldaketak egiteko 12. oinarrian adierazten den aldia barne.

2. Lurzatietan laguntzen eskaera bakarra aurkezteko epea bukatu ondoren egiten diren aldaketak eta eskaera horretan deklaratu ezin diren bigarren laboreak Nafarroako Nekazaritzako Ustiategien Erregistroan aurkeztuko dira zuzenean.

3. Otsailaren 11ko 34/2014 Foru Aginduaren 4. eta 5. artikuluen 3. idatz-zatian aipatzen den nahitaezko dokumentazioa (d) puntukoa izan ezik) Landa Garapeneko, Ingurumeneko eta Toki Administrazioko Departamentuan aurkeztuko da, edo 30/1992 Legearen 38.4 artikuluak aipatzen dituen lekuetako edozeinetan.

4. Laguntzak kudeatzen dituen organoak Nafarroako Nekazaritzako Ustiategien Erregistroan begiratuko ditu bazkideen eta haiek sozietateetan dituzten portzentajeen gaineko datuak, baita ogibide nagusia nekazaritza izatearen frogagiria, lehentasunezko ustiategiarena, nekazari profesionalarena, nekazaritzako profesionalarena eta titulartasun partekatuarena ere, foru agindu honetan aipatzen diren laguntzak tramitatu ahal izateko.

3. oinarria. Laguntzen onuradunak.

1. artikuluan aipatzen diren laguntzak osorik edo gehienbat Nafarroako Foru Komunitatean kokaturik dauden ustiategien titularrek hartzen ahalko dituzte, baita eremurik gabeko ustiategien titularrek ere, abere gehienak Nafarroako Foru Komunitatean badituzte.

4. oinarria. Laguntzak eskatzea.

Laguntza bakoitza espres eskatu behar da. Laboreetarako laguntzen kasuan, haietako bakoitza zer esparrutarako eskatzen den adierazi behar da, baita azalera ere, hektareatan, bi dezimalekin.

5. oinarria. Ustiategiko nekazaritzako lurzati guztiak eta abeltzaintzako unitate guztiak deklaratzea.

1. Eskaera bakarrean ustiategiko nekazaritzako lurzati guztiak deklaratuko dira, laguntza araubide bakar batean sartzen ez direnak barne. Ustiategiko lurzati batzuk deklaratu ez direla atzemanez gero, 1122/2009 (EE) Erregelamenduaren 55. artikuluan aurreikusitako zehapenak aplikatuko dira.

2. Abeltzaintzarako laguntzak eskatzen dituzten titularrek ekoizpen unitate guztiak deklaratu beharko dituzte eskaeran, Nafarroatik kanpo daudenak barne direla.

6. oinarria. Larreen azalera eta onargarritasun koefizientea deklaratzea.

1. Elementu elkorrak, malda handiegiak edo agintari eskudunak erabakitzen dituen beste ezaugarri batzuk direla eta, erabateko aprobetxamendua galarazten duten ezaugarriak dituzten larre azalerei, Nekazaritzako Lurzatien Informazio Geografikorako Sistemak (NELIGS) koefiziente bat esleitzen die, NELIGS esparruaren onargarritasun portzentajea islatzen duena.

2. Deklaratzen den azalera gordina, esparruari buruz deklaratutako onargarritasun koefizientearekin biderkatuta, izanen da larre-esparruetarako laguntza eskaeraren xedeko azalera garbia.

3. Kontuan hartu behar da NELIGSk esleitutako koefizienteari dagokiona baino azalera onargarri handiagoa eskatzeko, eskaera bakarra aurkezteko epea bukatu baino lehen, NELIGSri egindako alegazioa aurkeztu behar dela, onargarritasun koefizientea igotzeko eskatuz, eta eskaera hori onartu behar zaiola.

7. oinarria. Nekazaritzako lurzatien identifikazioa.

1. Titular berak deklaratutako eta labore mota bereko esparru mugakide guztiek nekazaritzako lurzati bat osatzen dute, eta denak lurzatiaren ordenako zenbaki berarekin deklaratu behar dira eskaera bakarrean.

2. 2014ko otsailaren 1ean indarra duen lurzati eta esparruaren NELIGS erreferentziaren bidez identifikatuko dira nekazaritzako lurzatiak, egoera hauetan daudenak izan ezik:

a) Lurzatiak berrantolatzeko prozesuen menpe dauden lurzatiak, lurretan mugaturik badaude eta 2014ko otsailaren 1ean NELIGSean ageri ez badira, kasuan kasuko lurzati berrantolamenduaren poligonoaren zenbakiari 70 gehituz adieraziko dira. Lurzatiaren zenbakia lurzati berrantolamenduarena bera izanen da.

b) Aprobetxamendu erkideko bazka-azalerek 99. poligono zenbakia eramanen dute deklarazioan eta toki entitatearen esleipen ziurtagirian zein zenbaki eta azalera dituzten, haiexek adierazita.

c) Bazkatokiak eta uztondoetako bazka aprobetxamenduak, haien esleipena udalei, kontzejuei eta Errege Bardeako Batzordeari badagokie, konpentsazio-ordainetarako laguntzen esparruan, udalaren edo lurralde entitatearen kodearekin eta 1.000 poligono zenbakiarekin deklaratuko dira. Lurzati zenbakian, toki entitateak ezarritako bazkatokiaren zenbakia edo Errege Bardean ezarritako esparruaren zenbakia adieraziko da.

d) Partikular bati dagozkion lurren uztondoetako bazka aprobetxamendua, baldin eta katastroko lurzati asko ukitzen baditu eta bazka-azalera gisa deklaratzen badira konpentsazio-ordainetarako laguntzen esparruan, kasuan kasuko udalaren edo lurralde entitatearen kodearekin eta 2.000 poligono zenbakiarekin deklaratuko da. Lurzatiak errentatzaile bakoitzarendako zenbaki korrelatibo banarekin deklaratuko dira.

Bai 1.000 zenbakiko poligonoetan deklaratutako lurzatiak bai 2.000 zenbakiko poligonoetan deklaratuak ez dira onargarriak ordainketa bakarrerako eskubide normalak aplikatzeko. Lurzati horietako laboreak 400 izanen du labore kodea, uztondoei dagokiena, eta azaleren %15 joko da bazka-azaleratzat.

8. oinarria. Alegazioak NELIGSi.

1. Nekazariek egiaztatu beharko dute NELIGSen datorren informazioa, beren nekazaritzako lurzatiak osatzen dituzten esparruei buruzkoa, zuzena dela eta, zehazki, esparru horiei esleitu zaizkien mugaketa grafikoa eta erabilera eta larreen onargarritasun koefizientea zuzenak direla. Orobat, beren esparruetan ez dagoela hautatu ezin den elementurik; bereziki, bideak eta eraikinak.

2. NELIGSen jasotako informazioa bat heldu ez bada ustiategiaren errealitatearekin, eskatzaileak, otsailaren 1eko 41/2011 Foru Aginduari jarraituz, eskaera bakarra egiteko epea bukatu baino lehen, beranduenez, aurkeztu beharko ditu erabilerari, mugaketari, larreen onargarritasun koefizienteari edo NELIGSeko edukiaren beste edozein informaziori dagozkien alegazioak edo haiek aldatzeko eskaerak, ukituta dauden esparru bakoitzerako.

9. oinarria. Aprobetxamendu erkideko bazka-azalerak deklaratzea.

1. Bazka aprobetxamendu erkideko herrilurretako toki entitate titularrek, herriko bazkalurren lurzatiko (udalaren 99. poligonoa) larre azalerak esleitzen ahalko dizkiete artzaintzan aritzen diren abeltzainei. Esleipenak azalera erabilgarriari buruzkoak izanen dira, larreen onargarritasun koefizientea aplikatu baino lehen.

2. Azienda batera larratzen duten abeltzainak gutxienez bi direnean eta zein eremu erabiltzen duten bereizten ez denean bakarrik esleituko dute toki entitateek herriko bazkalurretako lurzatia, hau da, 99. poligonoa. Erabiltzen duten artzaintza eremua bereizten denean, edo abeltzain bakar batek erabiltzen badu herrilurra, katastroko identifikazioa erabiliko da bazka-azalera esleitzeko; hau da, esleipen hartzaileek, eskaera bakarrean, azienda bazkatzeko erabiltzen dituzten herrilurretako NELIGS esparru guztiak deklaratu beharko dituzte.

3. Herriko bazkalurretako lurzatien azalerak kudeatzen dituzten toki entitateek behar dizkiote Landa Garapeneko, Ingurumeneko eta Toki Administrazioko Departamentuko Etekinetarako Laguntzen Atalari jakinarazi herriko bazkalurra osatzen duten NELIGS esparruak, mugak eta guztirako azalera zehaztearren. Jakinarazpen horretarako, IV. eranskineko eredua erabiltzen ahal da.

4. Herriko bazkalurretako lurzatien (99. poligonoa) onargarritasun koefizientea azaleran oinarritutako batez besteko ponderatu bat izanen da, entitate kudeatzaileak jakinarazitako herrilur bakoitza osatzen duten NELIGS esparruen onargarritasun koefizienteena, aurreko atalean arautu bezala.

10. oinarria. Urbasa eta Andia mendietako aprobetxamendu erkideko bazka-lurzatiak esleitzea.

Urbasa eta Andia mendietako bazka-azalerak aprobetxatzeko, lur horietan zein egonaldi egiten dituzten deklaratuko dute eskatzaileek, Landa Garapeneko, Ingurumeneko eta Toki Administrazioko Departamentuak eskatzaileari dagozkion bazka azaleren hektareak zehatz ditzan, erregistratuta dauden azienda sarrera guztiei dagozkien AzLUak ikusita eta eskatzaile bakoitzaren AzLUen proportzioan.

11. oinarria. Eskaera bakarra aurkeztea eta haren aldaketak.

1. Eskaera bakarra eta aldaketak telematika bidez aurkeztuko dira, Landa Garapeneko, Ingurumeneko eta Toki Administrazioko Departamentuarekin lankidetza hitzarmena izenpetua duten entitate laguntzaileen bitartez, edo, bestela, Nafarroako Gobernuaren web orriaren bitartez.

2. Eskatzaileek entitate laguntzailearen kudeatzaileari baimena emanen diote eskaera bakarra eta aldaketak sinatzeko, beren izenean, digitalki. Entitate laguntzaileak eskatzaileak sinatutako deklarazioaren kopia bat gorde beharko du, hau da, aipatu den baimen hori jasoko duena.

3. Eskaera bakarraren edukiaren eta aurkezpen dataren ondorioetarako, azken igorpen telematikoa soilik hartuko da kontuan.

4. Eskaera bakarra aurkezteko epea 2014ko otsailaren 17an hasiko da eta 2014ko maiatzaren 15ean bukatuko, urtarrilaren 27ko AAA/69/2014 Aginduarekin bat.

5. Eskaerei eta haren aldaketei ebazpen honen eranskinetan adierazten den “aurkeztu beharreko dokumentazioa” gehituko zaie. Eskaera egiterakoan, eskatzaileek ebazpen honen I. eranskinean egiaztatu beharreko dokumentazio gisa ageri den dokumentazioa aurkeztu beharko dute, entitate laguntzailearen kudeatzaileak egiazta dezan. Eskatzaileek dokumentazio hori gorde eta Landa Garapeneko, Ingurumeneko eta Toki Administrazioko Departamentuaren esku utzi beharko dute, azken horrek hala eskatzen badu.

12. oinarria. Eskaeraren aldaketa.

1. Azalerengatiko laguntzako araubideei dagokienez, Batzordearen 1122/2009 (EE) Erregelamenduaren 14. artikuluan xedatutakoaren arabera, titularrek eskaera maiatzaren 31 arte aldatzen ahalko dute, zehapenik gabe, baina orduz geroztik ez da aldaketarik onartuko.

2. Titularrari bere eskaera bakarrean akatsak daudela jakinaraziz gero edo tokian berean kontrol bat burutzeko asmoa adierazirik, kontrol horrek akatsak agerian utzi baditu, ez dira aurreko atalean aipatu aldaketak baimenduko, akatsak dituzten nekazaritza lurzatiei dagokienez.

13. oinarria. Epez kanpo aurkeztea.

1. Epea bukatu eta hurrengo 25 egun naturaletan onartuko dira laguntza eskaerak. Kasu horretan, epe-muga gainditzen duen egun baliodun bakoitzeko, %1 gutxituko dira zenbatekoak.

2. Atzerapena 25 egun naturaletik gorakoa bada, eskaera ez da onartuko.

3. Ezinbesteko kasuetan eta salbuespenezko gorabeheretan ez da murrizketarik aplikatuko.

14. oinarria. Laguntza eskaerak kentzea.

1. Laguntza eskaerak noiznahi ere egiten ahalko dira atzera, osorik edo hein batean.

2. Hala ere, titularrari bere eskaeran akatsak daudela jakinaraziz gero edo tokian berean kontrol bat egiteko asmoa adierazirik, kontrol horrek akatsak agerian utzi baditu, ez da baimenik emanen akatsak dituzten zatiei dagokien laguntza eskaera atzera egiteko.

15. oinarria. Azalerekin zerikusia duten gorabeherak jakinaraztea.

1. Eskatzaileak behartuta daude Landa Garapeneko, Ingurumeneko eta Toki Administrazioko Departamentuari idatzita jakinaraztera ustiategian gertatzen zaizkien gorabeherak, haien berri izan bezain laster, haien ondorioz laguntzak eskuratzeko baldintzak bete gabe gelditzen ahal badira eta, bereziki, laboreei dagokienez, deklaratutako laboreak jaio ez izana, basa faunak, abeltzaintzak, gertakari klimatologikoek, belar gaiztoek eta abarrek laboreetan eragindako kalteak.

2. Eskatzaileek gorabehera horiek jakinaraztean laguntzaren eskaera benetako egoerara egokituko da. Batzordearen 1122/2009 (EE) Erregelamenduaren II. zatiko IV. tituluan aipatzen diren murrizketa eta salbuespenak laguntzaren eskaeren zati batzuei ez zaizkie aplikatuko, baldin eta ekoizleek idatziz jakinarazten badiote Landa Garapeneko, Ingurumeneko eta Toki Administrazioko Departamentuari laguntzaren eskaera ez dela zuzena edo okertu dela, betiere ekoizleei aldez aurretik Landa Garapeneko, Ingurumeneko eta Toki Administrazioko Departamentuak bertan kontrolatzeko asmoaren edo beren eskaeraren akatsen berri eman ez badie.

16. oinarria. Onuradunen betebeharrak.

Laguntzei buruzko araudian ezarritakoez gain, onuradunek betebehar hauek izanen dituzte:

a) Eman eta hartutako diru-laguntzak direla eta, Landa Garapeneko, Ingurumeneko eta Toki Administrazioko Departamentuak egiten dituen egiaztapen ekintzak oro onartzea.

b) Eskatzen zaion dokumentazio guztia ematea Landa Garapeneko, Ingurumeneko eta Toki Administrazioko Departamentuari bere eginbeharrak betetzen dituela frogatzeko.

c) Helburu bereko beste diru-laguntza publiko batzuk eskatu izanaren berri ematea Landa Garapeneko, Ingurumeneko eta Toki Administrazioko Departamentuari.

d) Behi aziendaren ustiategiko liburua eguneratua izatea (SIMOGAN), eta behi azienda identifikatu eta erregistratzeari buruzko araudi indardunean ezarritako jakinarazpen epeak betetzea.

e) Ardi eta ahuntz aziendaren ustiategiko liburua eguneratua izatea.

f) Laborea edo bere hondarrak lurzatietan izatea irailaren 10a arte, ekilorea, soja, artoa, erremolatxa, tabakoa, arroza eta patata denean, eta ekainaren 30a arte gainerako laboreen kasuan, baldin eta bazka-azalera frogatzeko eskatzen bada abere dentsitatearen faktorea kalkulatzeko, edo laguntza hauen kasuan: labore txandaketak lehorreko lurretan, lekaleen kalitatea, fruitu oskoldunen sektoreko nekazaritza eta ingurumen arloko neurriak, tabakoaren kalitatea, azukre-erremolatxaren kalitatea, eskualde menditsu eta behartsuetarako konpentsazio-ordaina eta hazitarako patatarako laguntza.

17. oinarria. Kontrolak.

1. Ebazpen honetan aipatzen diren laguntzen eskatzaileek onartuak izateko kontrolak onartu beharko dituzte, bai administratiboak bai tokian tokikoak, laguntzei buruzko araudian ezartzen direnak.

2. Zuzeneko laguntzak eta LGPko laguntzak (ebazpen honen 1. oinarriko 1-4 atalak) eskatzen dituztenek baldintzen kontrolak onartu beharko dituzte. Orobat, Nafarroako aurrekontu orokorren kargura diren laguntzak, hala adieraziz gero laguntza bakoitzerako araudian.

18. oinarria. Gutxieneko ordainketa.

Ez da zuzeneko ordainketarik emanen ebazpen honen 1. artikuluko 1. ataletik 4.era bitartekoetan aipatzen diren laguntzen batura 100 eurotik beherakoa bada, 202/2012 Errege Dekretuaren 89.2 artikuluari jarraikiz.

19. oinarria. Itzulketak, arau-hausteak eta zehapenak.

1. Ebazpen honetan aipatzen diren laguntzei buruzko itzulketei, arau-hausteei eta administrazio zehapenei dagokienez, Europako Batasunaren araudian eta Diru-laguntzei buruzko azaroaren 9ko 11/2005 Foru Legean ezarritako araudiarekin bat jokatuko da.

2. Arau-hausteak zehazteko eta zehapenak ezartzeko zehapen prozedura administratiboa abenduaren 9ko 369/1997 Foru Dekretuan ezarrita dagoena izanen da, haren bidez onetsi baitzen nekazaritza, abeltzaintza eta elikadura arloetako zehapenak jartzeko administrazio prozedura.

II. TITULUA

Ordainketa bakarrerako araubidearen eskubideak

20. oinarria. Eskubide lagapenak.

1. Ordainketa bakarrerako eskubideak nekazarien artean lagatzen ahalko dira, azaroaren 13ko 1680/2009 Errege Dekretuaren 27. artikuluan ezarritakoaren arabera.

2. Lagatzaileak ordainketa bakarrerako bere azken eskaera Nafarroan egin bazuen soilik aurkeztu daitezke eskubideak lagatzeko jakinarazpenak Nafarroan.

3. Landa Garapeneko, Ingurumeneko eta Toki Administrazioko Departamentuaren bulegoetan aurkeztuko dira eskubideak lagatzeko jakinarazpenak, II. eranskinean agertzen den dokumentazioarekin batera, aukeratutako lagapen motaren arabera.

4. Lagapenen jakinarazpenak aurkezteko epea azaroaren 13ko 1680/2009 Errege Dekretuan araututakoa da.

5. Ulertuko da lagapena onartu dela baldin eta, eskaera egiten denetik sei astera, Landa Garapeneko, Ingurumeneko eta Toki Administrazioko Departamentuak ez badu kontrakorik jakinarazi arrazoiturik.

21. oinarria. Erreserba nazionala.

1. Nekazariek erreserba nazionaleko eskubideak eskatzen ahalko dituzte, azaroaren 13ko 1680/2009 Errege Dekretuaren 23. artikuluan ezarritako baldintzak betetzen badituzte.

2. Eskatzaileak ordainketa bakarrerako eskaera Nafarroako Foru Komunitatean egin bazuen soilik aurkeztu daitezke erreserba nazionaleko eskaerak komunitate honetan.

3. Erreserba nazionaleko eskubide eskaerak Landa Garapeneko, Ingurumeneko eta Toki Administrazioko Departamentuan aurkeztuko dira, edo 30/1992 Legearen 38.4 artikuluak aipatzen dituen lekuetako edozeinetan. Eskaerarekin batera, III. eranskinean aipatzen den dokumentazioa aurkeztu behar da.

4. Aurkezteko epea 11. oinarriaren 4. puntuan eskaera bakarretarako ezartzen den epe bera da, kontuan harturik 1680/2009 Errege Dekretuaren 23.1 artikuluan xedatutakoa epai irmoen edo egintza administratibo irmoen kasuetan.

5. Erreserba nazionaleko eskubideak eskatzen direnean, udalerri bateko herrilurraren esleipen-hartzaileen kasuan, herrilur hori lehorreko alor izatetik ureztalur izatera pasatzen bada esku-hartze publikoaren ondorioz, honako hau hartuko da kontuan:

a) Herrilur bakoitza ekoizpen-unitate bakartzat hartuko da.

b) Herrilurraren esleipena hartzen duen eskatzaile bakoitzari gehieneko gisa onartuko zaio herrilur eraldatuan ureztalur moduan esleitua duen azalera.

c) Kanpaina bakoitzerako, aurreko kanpainetan erreserba nazionaleko ordainketa bakarrerako eskubiderik sortu ez duen herrilur eraldatuaren azalera soilik hartuko da kontuan.

d) Zenbait kanpainatan erreserba nazionaleko onartutako herrilur baten guztirako azalera ez da izanen herrilur horretan ureztalur bihurtutako azalera baino handiagoa. Beharrezkoa izanez gero, Landa Garapeneko, Ingurumeneko eta Toki Administrazioko Departamentuak koefiziente zuzentzaile bat ezarriko du eskatutako azaleraren gainean, aurreko atalean ezarritakoa bete ahal izateko.

22. oinarria. Ordainketarako eskubide erabili gabeak.

2014. urtean, 2012. eta 2013. urteetan erabili ez den laguntza eskubide oro erreserba nazionalari gehituko zaio, ezinbesteko kasuetan edo salbuespenezko egoeretan izan ezik.

III. TITULUA

Laguntzei buruzko xedapenak

I. KAPITULUA

Ordainketa bakarrerako araubidea

23. oinarria. Laguntzarako eskubideak, ordainketa bakarreko araubiderako laguntza lortzeko.

202/2012 Errege Dekretuaren 7. artikulutik 13.era bitarte ezarritakoari jarraituz, 1680/2009 Errege Dekretuaren 3. artikuluan ezarritakoaren araberako ordainketa bakarrerako eskubideak, jabetzan edo errentamenduan, dituzten nekazariek eskatzen ahalko dute ordainketa bakarreko araubiderako laguntza.

Honako hau hartu behar da kontuan:

1. Ordainketa bakarraren eskaeraren xede den laguntzarako eskaera oro hektarea onargarri batekin justifikatu beharko da.

2. Titularrak kanpainan dituen eskubide guztiak eskatzen dituela adierazi beharko du; bestela, zein eskubidetarako eskatzen duen laguntza, haien zerrenda egin beharko du. Eskatzaileak ordainketa bakarrerako bere eskubide guztiak aplikatzeko eskatzen duenean, unitateko balio handiena duten laguntzarako eskubide arruntak aplikatuko dira lehendabizi.

3. Eskubide bereziengatik ordainketa bakarra eskatzen duten nekazariak 1. atalean aipatzen den eginbeharretik salbuetsiko dira, eta ordainketa bakarreko araubiderako laguntza egokituko zaie erreferentziako aldian jardueraren %50ari gutxienez eusten diotenean, azienda larriko unitateetan (AzLU) adierazita.

Ustiategietako abeltzaintza jarduera 202/2012 Errege Dekretuaren 12. artikuluan ezarritakoaren arabera kalkulatzen da eta, behi ume-hazleen prima edo behi ume-hazleak dituzten nekazarien berariazko alde txarrak konpentsatzeko laguntza eskatu ez duten ustiategien kasuan, 2014. urte naturalean zeuden animalien batez besteko ponderatua hartuko da kontuan.

4. Eskubide bereziak dituzten eskatzaileek, azalerari aplikatu nahi badizkiote, berariaz adierazi beharko dute eta haiek laguntzarako eskubide normaltzat joko dira.

24. oinarria. Azalera onargarriak eta ordainketa eskubide arruntak aplikatzen diren lurren nekazaritza erabilera.

1. Ordainketa bakarrerako eskubide arruntak aplikatzearen ondorioetarako, azalera onargarritzat joko dira 202/2012 Errege Dekretuaren 8. artikuluan ezarritakoak, nagusiki nekazaritzarako erabiltzen baldin badira.

2. Basoek eta bazter utzitako lurrek okupatutako azalerak ez dira hektarea onargarritzat joko.

3. Larreen kasuan, ordainketa bakarrerako ondorioekin, azalera onargarritzat joko da NELIGSen esparru bakoitzerako zehaztutako onargarritasun koefizienteak aplikatuz kalkulatzen dena.

25. oinarria. Deklaratutako azalerak mantentzea.

1. Landu gabe dauden lurzatietan lur goldagarriak mantentzea.

a) Landu gabe dauden lur goldagarriak laborantzarako baldintzetan mantenduko dira eta belar gaiztoak agertzea saihestuko da, metodo hauetako bat erabiliz:

–Laborantzako ohiko praktikak.

–Gutxieneko lur-lantzea.

–Landare-estaldura egokia mantentzea.

–Belar gaiztoak eta zuhaixka eta zuhaitz inbaditzaileak kentzeko beharrezkoak diren bestelako lan batzuk.

b) Bi kanpainatan segidan edo gehiagotan erein gabe uzten diren lurzatien kasuan, haiek mantentzeko lan mekanikoa egin beharko da bigarren urtetik aitzina, 2 urtean behin gutxienez ere.

c) Mantentze-lan horiek, ohiko laborantzako praktikak badira, ezin izanen dira egin apirilaren 1etik ekainaren 30era bitarte, salbu eta hurrengo kanpainako ereintza prestatzeko lanak direnean.

2. Zurezko laboreak mantentzea.

Zurezko laboreak egoera begetatibo onean mantenduko dira eta, horretarako, inausketak eskualde bakoitzean ohikoa den maiztasunez eginen dira.

3. Larreak mantentzea.

Larre iraunkorrak dituzten lurrak egoera onean mantendu beharko dira, lurra hondatu ez dadin eta sastrakek har ez dezaten. Hori helburu, azienda-karga eraginkor egokia jarriko da, edo mantentze-lan mekanikoak eginen dira, edo bien arteko konbinazio bat.

II. KAPITULUA

Azaleraren araberako laguntzak

26. oinarria. Bazka-azalera eta bazka-azalera baliokidea.

1. Ebazpen honetan aipatzen diren laguntzak kalkulatzeko, 202/2012 Errege Dekretuaren 65.2 artikuluan ezarri dena joko da bazka-azaleratzat. Gainera, konpentsazio-ordainerako laguntzaren kasuan bakarrik izanen da bazka-azalera uztondoak aprobetxatzeko deklaratu den azaleraren %15a.

2. Ez dira bazka-azaleratzat joko udalen edo beste edozein erakunde eskudunen murriztapenak dituztenak sartzeko edo erabiltzeko, edo aprobetxamendua antolamendu proiektuetan, kudeaketarako plan teknikoetan edo horien berrikuspenetan ezarritakoarekin bat ez datorrenean.

3. Larreetako lurzatien azalera onargarria bazka azaleratzat joko da, Errege Bardean ardiak larratzeko Natura 2000 laguntzaren kasuan izan ezik.

27. oinarria. Ureztalurrak.

1. Dirua hartu ahal izateko, ureztalurtzat joko dira foru agindu honen 11. artikuluan eskaerak aurkezteko ezarritako epearen azken egunaren aurretik NELIGSen ureztalurtzat hartutako esparruetan dauden lurzatiak.

2. Bestetik, ureztalurtzat hartuko dira lurzatien berrantolamenduko administrazio prozeduretan edo ureztaketa hobetzeko prozeduretan sarturiko nekazaritzako lurzatiak, Lurralde Aberastasunaren Erregistro Fiskalean ureztalur gisa agertzen direnak eta baita, lehen aipatutako data baino lehen, ureztatzen hasteko adierazpena edo egiaztapen partzialen akta jaso duten lurzatiak ere, baldin eta INTIA, S.A.k azpiegiturak erabiltzeko aukera teknikoaren aldeko txostena ematen badu.

28. oinarria. Izakinen deklarazioak eta arroz ekoizpena.

Arroza landatzen duten nekazariek deklarazio hauek egin beharko dituzte:

a) 2014ko urriaren 15a baino lehen, joan den urteko abuztuaren 31n beren esku zituzten izakinen deklarazioa.

b) 2014ko azaroaren 15a baino lehen, lortutako ekoizpenaren edo erabilitako azaleraren deklarazioa. Egun horretan uzta bildu gabe badute, aurreikusitako uztaren deklarazioa eginen dute, eta bildutakoan, uztaren deklarazioa.

29. oinarria. Lehorreko lurretan laboreen txandaketa sustatzeko laguntza.

1. 202/2012 Errege Dekretuaren 28S34. artikuluetan ezarritakoari jarraituz, lehorreko lurretan belarki-labore hautagarriak ekoizten dituzten nekazariek eskatzen ahalko dute lehorreko lurretan labore txandaketak sustatzeko laguntza, baldin eta beren eskualdean, Espainiako produkzioa eskualdekatzeko Planaren arabera, lehorreko zereal alorren batez besteko errendimenduaren indizea (ZEI) hektarea bakoitzeko 2 tonakoa edo txikiagoa bada.

2. 202/2012 Errege Dekretuaren 28.2 artikuluko 2. atalaren arabera, ordainketarako eskubidea duen azaleratzat joko da belarki-labore hautagarrietarako azalera hautagarria, lugorri indize erraztua bete arte doitua (2,0 t/h-ko ZEI indizea duten eskualdeetarako, 10 hektarea lugorri, laguntza jasotzen duten 100 hektareako; eta 1,8 t/h-ko ZEI indizea duten eskualdeetarako, 15 hektarea lugorri, laguntza jasotzen duten 100 hektareako).

3. 1120/2009 Erregelamenduaren 38. artikulua eta 202/2012 Errege Dekretuaren 35. artikulua aplikatuz, Nafarroako Foru Komunitateak aukeratu du ez aldatzea lehorreko zereal estentsiboen neurria, 2007-2013 aldirako LGPan jasotakoa, eta, ondorioz, Nafarroako Foru Komunitateko lurretan laboreen txandaketa sustatzeko laguntza eskatzen duten nekazariek baldintza hauek bete beharko dituzte:

a) Laguntzaren oinarrizko zenbatekoa jaso ahal izateko, laguntzaren xede diren hektareen %25ean, gutxienez, olio landare, proteinadun eta/edo lekale hautagarriak ekoiztea.

b) 202/2012 Errege Dekretuaren 32. artikuluan ezarritako 1. osagarria jaso ahal izateko, a) atal horretan ezarritako konpromisoa handitu behar dute, ehuneko 5 puntu gehituz.

c) 202/2012 Errege Dekretuaren 33. artikuluan ezarritako 2. osagarria jaso ahal izateko, azaleraren %30 erabili behar dute, gutxienez, errege dekretu horren III. eranskineko 4. zutabean ageri diren lekale hautagarrietako bat edo gehiago ekoizteko.

30. oinarria. Lekaleen kalitatea sustatzeko laguntza.

Giza kontsumorako garbantzuak, dilistak edo babarrunak ekoizten dituzten nekazariek laguntza hau eskatzen ahalko dute, kalitatea ziurtatzen duten erakundeetan (artikulu horretan aipatutakoetan) erregistraturiko azalerengatik, 202/2012 Errege Dekretuaren 36. artikulutik 40.era bitartekoetan ezarritakoaren arabera.

31. oinarria. Fruitu oskoldunen sektoreko zenbait espezietan nekazaritza eta ingurumen onura handiagoak ematen dituzten berariazko nekazaritza jarduerak sustatzeko programa nazionala.

202/2012 Errege Dekretuaren 41. artikulutik 45.era bitartekoetan ezarritakoaren arabera, almendrondo, hurritz, intxaurrondo eta algarrobondoak kimatu ondoko hondarrak erabiltzen dituzten nekazariek eskatzen ahalko dute laguntza hau, bai biomasarako izan (hondar horiek lagatu izana frogatzen duen dokumentua erantsiko diote eskaerari), bai lurzatian bertan uzteko izan. Kasu horretan, hondarrak txikitu eta lurzatian zabalduz aprobetxatzen dituela adieraziko du eskatzaileak eskaeran.

32. oinarria. Tabakoaren kalitatea sustatzeko laguntza.

Tabakoaren kalitatea sustatzeko laguntza 202/2012 Errege Dekretuaren 46. artikulutik 53.era bitartekoetan araututa dago. Laguntza hori eskatzen ahalko dute NC 2401 kodeko tabako gordina ekoizten duten nekazariek, baldin eta lehen eraldaketarako enpresa bati ematen badiote tabakoa, kontratu bidez, eta 1782/2003 (EE) Erregelamenduan tabako ekoizpenerako ezarritako laguntza jaso badute 2006an, 2007an, 2008an eta/edo 2009an.

III. KAPITULUA

Abeltzaintzarako laguntzak

33. oinarria. Abereen erregistroa.

Abeltzaintzako laguntzak jaso ahal izateko, abereek irailaren 18ko 1980/1998 Errege Dekretuaren xedapenen arabera identifikatuta eta erregistratuta egon beharko dute behi espezieko animalien kasuan, edo uztailaren 29ko 947/2005 Errege Dekretuaren xedapenen arabera, ardi eta ahuntz espezietako animalien kasuan.

34. oinarria. Abeltzaintzako laguntzetako salbuespenak.

Honako hau betetzen ez duten abeltzain guztiak laguntzetatik kanpo geldituko dira:

a) Martxoaren 26ko 479/2004 Errege Dekretuan ezarritakoa, horren bidez abeltzaintzako ustiategien erregistro orokorra ezartzen baita. Honela egiaztatuko da baldintza hau: behi ume-hazleen priman eta behi ume-hazleak dituzten abeltzainei berariazko alde txarrak konpentsatzeko laguntzan, atxikipen aldian; eta gainerakoan eskaera egunean.

b) Uztailaren 31ko 1749/1998 Errege Dekretuan ezarritakoa, bizirik dauden abereengan eta haien produktuetan halako substantzia batzuei aplikatzen zaizkien kontrol neurriak ezartzen baititu.

c) Esnetarako behi sektorearentzat ezarritako laguntzen kasuan, esne gordinaren kalitateagatik azken hiru urtean zehatu direnak, produkzio ahalmenaren eta deklaratutako entregen arteko koherentzia faltagatik aurreko urtean zehatu direnak, esleitutako esne kuota ez duten ustiategiak edo esnerik entregatzen ez dutenak, eta inor behi esnez hornitzeko kontraturik ez dutenak 460/2011 Errege Dekretuan ezarritako moduan eta baldintzetan.

35. oinarria. Behi ume-hazleen prima.

1. 202/2012 Errege Dekretuaren 23. artikulutik 27.era bitarteko artikuluetan ezarritakoari jarraituz, primarako eskubideen gehieneko bat, nork berea, esleitua duten abeltzainek eskatzen ahalko dituzte behi ume-hazleen prima eta behi ume-hazleen prima osagarria, 1839/1997 Errege Dekretuan ezarritakoaren arabera, beren ustiategiko esnerik edo esnekirik saldu ez badute eskaera aurkeztu eta hamabi hilabetean edo, salduz gero, 120.000 kilogramotik beherako kuota badute.

2. Laguntzarako eskubidea izateko, ekoizlea, eskaera aurkeztu eta biharamunetik aurrera sei hilabeteko atxikitze aldian, guztira zenbat abererengatik eskatzen duen prima, gutxienez haietako %60 behi ume-hazleak izatera behartua dago, eta guztirako horretatik %40 txahalak izatera, gehienez ere.

3. Laguntzaren ondorioetarako, ondoko hauek hartuko dira agintaritza eskudunari jakinarazitako bajatzat:

a) Bajaren berri izan ondoko 10 egun balioduneko epean Nekazaritza Zerbitzuari idatziz jakinarazitakoak. Bajaren arrazoiak zehaztuko dira: abere taldeari dagozkion arrazoi naturalak, ezinbesteko arrazoiak edo eskatutako primari uko egin izana.

b) Ustiategian izandako heriotzak, epearen barrenean jakinaraziak behi aziendaren identifikazio eta erregistro sistemaren datu baseari.

c) Nafarroan kokaturiko ustiategietan, abereak ustiategia uzten duenean, idatziz ez ezik behi aziendaren identifikazio eta erregistro sistemako datu baseari jakinaraziz ere uko egiten ahalko zaio eskaerari hein batean.

Primarako deklaratzen den behi edo txahal baten ordez, atxikitze aldian hiltzen bada, beste behi edo txahal bat sartzen ahalko da, baldin eta aldaketa horrekin ere behi ume-hazleen kopuruari eusten bazaio. Abereari baja eman eta ondoko 20 egunean eginen dira atxikitze aldiko ordezpen horiek.

36. oinarria. Behi haragiaren kalitatea hobetzeko laguntza.

1. 202/2012 Errege Dekretuaren 61.etik 63.era bitarteko artikuluetan arautzen da behi haragiaren kalitatea hobetzeko laguntza. Behi haragiaren abeltzainek eskatzen ahalko dute laguntza hori, ofizialki baimenduta dauden kalitate sistema hauetako batean hildako abereengatik:

–Europar Batasunaren esparruan: jatorri deitura babestuak, adierazpen geografiko babestuak edo nekazaritza ekologikoa.

–Estatuaren esparruan: abeltzaintza integratua edo haragiaren aukerako etiketatzea, aplikatzen den araudian eskatzen dena baino baldintza zorrotzagoak betetzera behartzen duena.

2. Gehienez ere 200 abelburu ordainduko dira ustiategi bakoitzeko, gizendegi komunitarioetan izan ezik, horientzat 202/2012 Errege Dekretuaren 63.2 artikuluak ezartzen baitu gehieneko muga.

37. oinarria. Behi ume-hazleak dituzten abeltzainen berariazko alde txarrak konpentsatzeko laguntza.

1. 202/2012 Errege Dekretuaren 64.etik 66.era bitarteko artikuluei jarraituz, behi ume-hazleak dituzten nekazarien berariazko alde txarrak konpentsatzeko laguntza eskatzen ahalko dute haiek sei hilabeteko atxikitze aldian dituzten abeltzainek, ordainketa bakarrerako eskaera aurkezten denetik aurrera. Ez da onartuko diru-laguntzaren xedeko abere guztien %40 baino txahal gehiago.

2. Laguntza hau ustiategiko azienda-zamari lotuko zaio, izan ere, ezin izanen du gainditu 1,5 AzLU/h, guztira 15 AzLU edo gutxiago duten ekoizleak izan ezik.

3. Gehienez ere, 100 abelburu ordainduko dira ustiategi bakoitzeko, haiek 202/2012 Errege Dekretuaren 66.1 artikuluan modulatuta direla, titulartasun partekatuko edo elkarte gisako ustiategien kasuan edo eskaera epea bukatzean, 1. mailako ahaideren bat dutela, nekazaritzako profesionalak diren pertsona fisikoen kasuan izan ezik artikulu bereko 3., 4. eta 5. puntuetan jasotakoaren arabera.

38. oinarria. Ardi eta ahuntz produkzioen kalitatea hobetzeko laguntza.

Ardi eta ahuntz azienda duten abeltzainek laguntza hau eskatzen ahalko dute, ustiategiko emeen %35ek, gutxienez, kalitateko deituraren baten babesean merkaturatuko den esnea eta/edo haragia ematen badute, espeziaren eta ekoizpen orientazioaren arabera bereizita; hori guztia, 202/2012 Errege Dekretuaren 67.etik 69.era bitarteko artikuluetan xedatutakoari jarraituz.

39. oinarria. Ardi sektoreko abeltzainen berariazko alde txarrak konpentsatzeko laguntza.

Ardi azienda duten abeltzainek eskatzen ahalko dute laguntza hau, ustiategiak haragitarako edo esnetarako gaitasuna izan, eta ustiategi elkarte bati atxikia badago, 202/2012 Errege Dekretuaren 70. etik 72.era bitarteko artikuluetan xedatutakoari jarraikiz.

40. oinarria. Ahuntz sektoreko abeltzainen berariazko alde txarrak konpentsatzeko laguntza.

Ahuntz ustiategietako titularrek eskatzen ahalko dute laguntza hau, haragitarako nahiz esnetarako izan, eta eskualde behartsuetan diren 10 ahuntz hautagarri edo gehiago badituzte, 202/2012 Errege Dekretuaren 73.etik 75.era bitarteko artikuluetan xedatutakoari jarraituz.

41. oinarria. Esnetarako behien sektoreko abeltzainen berariazko alde txarrak konpentsatzeko laguntza.

1. Esnetarako ustiategiak dituzten abeltzainek eskatzen ahalko dute laguntza hau, haiek eskualde behartsuetan nahi gainerakoetan egon, 202/2012 Errege Dekretuaren 76. etik 78.era bitarteko artikuluetan xedatutakoari jarraikiz.

2. Eskualde behartsuetan diren ustiategiek, udal mugapean edo ondoko udalerrietan 0,4 h-tik gorako bazka-azalera badute behi hautagarri bakoitzeko, laguntza osagarri bat hartzen ahalko dute.

42. oinarria. Behi esnearen eta esnekien kalitatea hobetzeko laguntza.

Esne ustiategiak dituzten abeltzainek eskatzen ahalko dute laguntza hau, ustiategian esnetarako gaitasuna duten behien %25ek, gutxienez, kalitateko deitura baten edo “Q letra” logotipoaren aukerako etiketaren babesean, merkaturatuko den esnea ematen badute, 202/2012 Errege Dekretuaren 79. artikulutik 83.era bitartekoetan xedatutakoaren arabera.

IV. KAPITULUA

Landa garapenerako LGENF laguntzak

43. oinarria. Konpentsazio-ordainaren laguntza.

1. Nekazaritza, Abeltzaintza eta Elikadurako kontseilariak otsailaren 12an emandako 32/2007 Foru Aginduak arautzen duen konpentsazio-ordaina eskatzen ahalko dute ogibide nagusia nekazaritza duten pertsona fisikoek, ustiategia non duten, udalerri horretan bizi badira, edo, bestela, inguruko udalerri batean (betiere menditsu edo behartsu gisara katalogatuta badaude), eta gutxienez azken bost urtean badaude udal erroldan.

2. Ustiategiko titularraren errenta osoa ebaluatzeko, zilegi izanen da azken bost urteetako hirutan pertsona fisikoen errentaren gaineko zergaren aitorpenetan izandako errenta osoen batez bestekoa hartzea. Azken ekitaldia sartuko da bost urteko multzo horretan.

3. Azalerengatik edo sozietate baten abereengatik konpentsazio-ordaina eskatzen duten eskatzaileek kasuan kasuko sozietatearen identifikazio fiskaleko kodea eta bertan zer proportziotan hartzen duten parte adierazi beharko dute, sozietateak deklaratutako azaleretan eskatzaileari dagokion portzentajea kontuan hartzeko.

V. KAPITULUA

Nafarroako aurrekontu orokorren kargura soilik ematen diren laguntzak

44. oinarria. Hazitarako patataren laborantzan nekazaritza eta ingurumen arloko neurriak sustatzeko laguntza.

1. 2014ko kanpainan hazitarako patataren laborantzan nekazaritza eta ingurumen arloko neurriak sustatzeko laguntza duten eskatzaileek, laguntza hauek jaso nahi badituzte, 2014ko ekitaldiko eskaera bakarrean egin beharko dute ordaintzeko eskaria.

45. oinarria. Mahastizaintzan nekazaritza eta ingurumen arloko neurriak sustatzeko laguntza.

1. 2014ko kanpainan mahastizaintzan nekazaritza eta ingurumen arloko neurriak sustatzeko laguntza duten eskatzaileek, laguntza hauek jaso nahi badituzte, 2014ko ekitaldiko eskaera bakarrean egin beharko dute ordaintzeko eskaria.

46. oinarria. Natura 2000 laguntza Errege Bardean ardiak larratzeko.

1. 2014ko kanpainan Errege Bardean ardiak larratzeko laguntza duten eskatzaileek, laguntza hauek jaso nahi badituzte, 2014ko ekitaldiko eskaera bakarrean egin beharko dute ordaintzeko eskaria.

I. ERANSKINA

Eskaera bakarraren dokumentazio gehigarria

1. Orokorrak. Entitate laguntzailean egiaztatu beharreko dokumentazioa.

a) Pertsona fisikoak izanez gero, NANaren fotokopia, eta pertsona juridikoak izanez gero, IFKrena.

b) Banku-ziurtagiria, jatorrizkoa, eskaeran aipatzen den kontu korrontea edo libreta eskatzailearena dela frogatzen duena.

c) Eskaera titularrak ez bestek izenpetzen duenean, haren baimen berariazkoa. Eskatzailea adingabea bada, haren legezko ordezkariak edo tutoreak espresuki eman beharko du baimena.

2. Azaleretarako laguntzak eskatzeko eta bazka-azaleren deklarazioaren dokumentazio gehigarria.

2.1. Aurkeztu beharreko dokumentazioa:

a) Krokis akotatuak, konpentsazio-ordainketen xede diren edo bazka-azaleratzat deklaratzen diren nekazaritzako lurzatiak non dauden adierazten dutenak, kontrolak “in situ” egiteko.

b) Bazka-azalerak ekoizle batek baino gehiagok batera aprobetxatzen dituztenean, azalera horren jabeak edo legezko administratzaileak luzatzen duen ziurtagiria edo, herrilurrak izanez gero, toki entitateek luzatua, non lurzati esleituak agertuko diren.

c) Uztondoetako bazka aprobetxamenduaren kasuan, entitate kudeatzaile publiko edo pribatuak emandako ziurtagiria.

d) Fruitu oskolduneko landaketak kimatu ondoko hondarrak biomasa industriari entregatzeko kontratua.

3. Abeltzaintzako primen eskaeraren dokumentazio gehigarria.

3.1. Aurkeztu beharreko dokumentazioa:

a) Behi edo ardi aziendaren ustiategia Nafarroatik kanpoan badago, ustiategiko liburua.

b) Ezkontideak edo lehen mailako ahaideak ustiategiko titularrarekin duen harremanaren frogagiriak (familia liburuaren kopia eta ezkontidearen edo ahaidearen IFZren kopia), behi ume-hazleak dituzten nekazarien berariazko alde txarrak konpentsatzeko laguntzaren modulazioa aplikatzearren.

3.2. Entitate laguntzailean egiaztatu beharreko dokumentazioa:

Ardi aziendaren ustiategiko liburua, eskaeraren egunean gaurkotua; urtarrilaren 1eko balantze orria ere erantsiko da.

4. Nekazaritza eta ingurumen arloko laguntzak ordaintzeko eskaeren dokumentazio gehigarria.

4.1. Aurkeztu beharreko dokumentazioa:

a) Kontzesioaren erabateko transferentziaren nahiz partzialaren kasuan, eskualdaketari buruzko dokumentua, behar bezala betea, aurkeztu beharko da, honako hauek adierazita: lagatzailearen izena eta NANa edo IFK, lagapen-hartzailearen izena eta NANa edo IFK eta horrek zer labore azalera hartzeko konpromisoa duen epealdian.

b) Konpentsazio-ordainaren eskatzaileen kasuan, haien kargura hemezortzi urtetik beherako bi seme-alaba edo gehiago badituzte, familia liburua aurkeztu beharko da, edo egoera hori frogatzen duen ordezko dokumentua.

II. ERANSKINA

Eskubide lagapenaren dokumentazio gehigarria

1. Orokorra:

Transferentzia eskaera aurkeztuko da, bi aldeek edo haien legezko ordezkariek sinatua. Bertan transferentziaren xedea eta eskualdatzen diren eskubideen zerrenda zehaztuko dira.

Sinaduraren eskuordetza honela frogatuko da:

–Lagatzailearena: notario-ahalorde baten bidez.

–Lagapen-hartzailearena: sinatzeko baimen baten bidez, agiri pribatuan egindakoa.

Sozietateen kasuan, estatutuak aurkeztu beharko dira, haren ordezkariak nortzuk diren egiaztatzeko.

2. Agiri berariazkoak:

–Nekazaritzako profesional bati edo lehentasunezko ustiategi bati egindako lurrik gabeko ordainketa bakarrerako eskubideen salerosketa, edo behin betiko lagapena:

  • Eskubideen hartzailea lehentasunezko ustiategia dela frogatzen duen dokumentazioa edo, abenduaren 13ko 45/2007 Legearen 16. artikuluaren definizioarekin bat, nekazaritzako profesionala izateko baldintzak betetzen dituela frogatzen duena.

–Lurra daukaten eskubideen salerosketa edo behin betiko lagapena:

  • Lurren salerosketaren kontratua, publikoa edo pribatua, zerga guztiak kitaturik.

–Lur errentamendu baten bukaerari lotutako eskubideen salerosketa edo behin betiko lagapena:

  • Errentamenduaren amaieraren dokumentua.
  • Titular hartzailea lurzatien jabe dela frogatzen duen dokumentua.

Ustiategi osoarekin eskubideen salerosketa edo behin betiko lagapena.

  • Salerosketaren kontratu publikoa edo pribatua, zerga guztiak kitaturik.
  • Abeltzaintza kasuetan, ekoizpen eskubideen transferentziaren dokumentua.

–Nekazaritza jarduera hasi duen nekazariari egindako salerosketa:

  • Eroslearen lan bizitzaren ziurtagiria, Gizarte Segurantzak duela gutxi emandakoa.
  • Lagapen-hartzailearen deklarazioa, adierazteko ez duela konpartitzen ordainketa bakarrerako eskubideak ekarri dituzten ekoizpen-unitaterik nekazaritzako jardueran aritzen diren lehen mailako ahaideekin.

–Lurra daukaten eskubideen errentamendua:

  • Lurren errentamenduaren kontratua, zerga guztiak kitaturik edo Nafarroako Gobernuaren landa errentamenduen erregistroan inskribatua.
  • Hartzailearen konpromisoa, lurzatiak eskaera bakarrean sartzeko errentamendua amaitu arte.

–Eskubideen errentamenduaren aldez aurreko amaiera:

  • Lurzatien errentamenduaren amaiera frogatzen duen agiria.

–Jaraunspena:

  • Jaraunspena onartzeko eskritura, Ogasunean zergak kitaturik.
  • Jaraunsle bat baino gehiago badaude, horiek guztiek sinatutako akordio bat, ordainketa bakarrerako eskubideen banaketa ezartzeko.

–Nekazariaren erretiroa, uzte aurreraturako onetsitako programengatik edo lanerako ezintasun iraunkorragatik:

  • Egoera horiek frogatzeko agiri publikoa.
  • Familia liburua.

–Nortasun juridikoaren aldaketa:

  • Nortasun juridikoaren aldaketa frogatzen duen agiri publikoa.
  • Bikote ezkonduaren edo ezkondu gabeko bikote egonkorraren araubide ekonomikoa frogatzen duen agiri publikoa.
  • Familia liburua.

–Pertsona fisiko edo juridikoen bat-egite edo elkartzeak:

  • Lagatzailea edo bateratua ordainketa bakarrerako eskubideak jasotzen dituen sozietateko kide dela eta noiztik den kide frogatzen duen dokumentu publikoa.

–Pertsona juridikoen edo pertsona fisikoen batasunen banaketak:

  • Onuraduna edo banandua sozietatearen kide zela eta egun horko kide ez dela eta noiz hartu zuen baja frogatzen duen dokumentu publikoa.
  • Bazkide guztiek sinatutako akordioa, titular banandu bakoitzak jasotzen dituen eskubideak adierazteko.

III. ERANSKINA

Erreserba nazionaleko eskubideak eskatzeko dokumentazio gehigarria

1. Berariazko dokumentazioa, beren lehen instalazioa landa garapeneko programa baten esparruan egin duten nekazari berrien kasuan.

–Eskatzailearen lan-bizitza.

–Zein ekoizpen unitatetarako den eskaera, haien titulartasuna edo titularkidetza frogatzen duten dokumentuak.

  • Lurzatien gaineko zedulak.
  • Salerosketaren edo dohaintzaren eskritura publiko edo pribatuak, zergak kitaturik.
  • Errentamenduaren kontratuak, zerga guztiak kitaturik, edo Nafarroako Gobernuaren landa errentamenduen erregistroan inskribatuak.
  • Behi ume-hazleen primetarako eskubideak, esne kuotak, etab. esleitu izana frogatzen duten dokumentuak.
  • Herrilurrak esleitzen dituen Udalaren ziurtagiria.
  • Bestelako frogagiriak.

–Senar-emazteen edo izatezko bikoteen araubide ekonomikoa frogatzen duen agiria.

–Eskatzailea sozietate bat baldin bada, eraketa eskrituren kopia.

2. Berariazko dokumentazioa, esku-hartze publikoren bati buruzko berregituratze edo garatze programen menpe dauden eremuetan ustiategiak dituzten nekazarien kasuan.

–Ustiategia berregituratze edo garatze programan sartzea justifikatzen duen dokumentua, baita esku-hartze publikoa egin izanarena ere.

–Eraldatutako herrilurren esleipen-hartzaileen kasuan, udalaren dokumentua, ureztalurra esleitu dela ziurtatzen duena.

–Abeltzaintza programen erreserba nazionaleko eskubideen onuradunak: esleipen hori justifikatzen duen dokumentu publikoa.

3. Epai irmo baten edo egintza administratibo irmo baten ondorioz eskubideak hartzeko edo zenbatekoa gehitzeko legitimaturiko nekazarien kasuan, berariazko dokumentazioa.

–Ordainketa bakarrerako eskubideen zenbatekoaren esleipena edo gehitzea dakarren epai irmo edo egintza administratibo irmoaren kopia.

IV. ERANSKINA

Toki entitateen herrilurretako bazkalurretan sartutako esparruaren eredua

Izena: ................., adinez nagusia; NAN zenbakia: ........; nongo alkatea/idazkaria:............................; zein udalen/kontzejuren ordezkari: ....................................................... ; bizilekua: .........................., kalea: ..........................., zenbakia: ....................., posta kodea: ........, telefonoa: ..........., posta elektronikoa: .............................

ADIERAZTEN DU:

Bi abeltzainek edo gehiagok batera aprobetxatzen dituztela udalaren/kontzejuaren mugapeko bazka-azalerak, bertan larratzen direla haien aziendak eta ezin direla bereizi batek eta besteak erabiltzen dituzten katastroko lurzatiak.

Eskaera bakarrerako 2014ko deialdiari buruzko ebazpenaren 9. oinarriak zehazten duela erabilera erkideko bazka-azalerak kudeatzen dituzten entitateek azalerak esleitzen ahal dizkietela larreaz baliatzen diren abeltzainei, eta esleitzen den azalera erabilgarria izanen dela NELIGSeko larreen onargarritasun koefizientea, hau da, esparru bakoitzaren azalera fisikoa, aplikatu aurretik. Gainera, behartzen dituela entitate kudeatzaileak Landa Garapeneko, Ingurumeneko eta Toki Administrazioko Departamentuko Etekinetarako Laguntzen Atalari jakinaraztera zein NELIGS esparruk osatzen dituzten herrilurretako bazkalurrak, mugak eta guztirako azalera zehaztearren.

Hori helburu, udalak/kontzejuak adierazten du, beherago aipatzen diren esparruak kenduta, erabilera erkideko bazka-azaleran sartzen direla herrilurretako titulartasuna duten gainerako esparruak, larretarako erabiltzen direnak, belardiak izan edo zuhaixkak edo zuhaitzak izan.

Hauek dira kanpoan gelditzen diren esparruak, abeltzainei banan-banan esleituta daudelako edo artzaintzan aprobetxatzen ez direlako:

UDALERRIA

POLIGONOA

LURZATIA

ESPARRUA

AZALERA (*)

(*) Esparru baten zati bat kanpoan uzten denean bakarrik betetzen da eremu hori.

(Udala/Kontzejua ..................) 2014ko ...............aren .....(e)an.

(Sinadura)

NORENTZAT: ETEKINETARAKO LAGUNTZEN ATALA. LANDA GARAPENEKO, INGURUMENEKO ETA TOKI ADMINISTRAZIOKO DEPARTAMENTUA.

GONZÁLEZ TABLAS, 9, 31005 IRUÑA.

Iragarkiaren kodea: F1404450