Iragarkia

53. ALDIZKARIA - 2014ko martxoaren 18a

1. NAFARROAKO FORU KOMUNITATEA

1.4. DIRU-LAGUNTZAK, LAGUNTZAK ETA BEKAK

93/2014 EBAZPENA, martxoaren 4koa, Hezkuntzaren, Lanbide Heziketaren eta Unibertsitateen zuzendari nagusiak emana, 2013-2014 ikasturterako nazioarteko mugikortasunerako unibertsitate programen laguntza osagarrien deialdia egiten duena.

Unibertsitateen, Kalitatearen eta Prestakuntzaren Zerbitzuko zuzendariak txosten bat aurkeztu du eta bertan proposatu du 2013-2014 ikasturteko nazioarteko mugikortasunerako laguntza osagarrien deialdia onetsi eta argitaratzea. Deialdia ikasturte honetan Espainiako unibertsitateek sustatzen dituzten nazioarteko mugikortasuneko programa ezberdinen onuradunak diren ikasleei zuzentzen zaie.

Diru-laguntzei buruzko azaroaren 9ko 11/2005 Foru Legean ezarritakoa kontuan harturik.

Nafarroako Foru Komunitateko Administrazioari buruzko abenduaren 3ko 15/2004 Foru Legearen 22.1 d) artikuluak ematen dizkidan ahalmenak erabiliz,

EBATZI DUT:

1. 2013-2014 ikasturteko nazioarteko mugikortasunerako unibertsitate programen laguntza osagarrien deialdia onestea. Ebazpen honen eranskinean ageri da.

2. Gehienez, 230.000 euroko gastua onestea, 2014ko aurrekontuko “Atzerriko Unibertsitateekin trukeak egitea: Erasmus eta beste batzuk” izeneko 427000-42740-4800-322300 kontu-sailaren kargura.

3. Ebazpen hau eta eranskina Nafarroako Aldizkari Ofizialean argitara daitezela agintzea.

4. Ebazpen hau eta eranskina igortzea Hezkuntzaren, Lanbide Heziketaren eta Unibertsitateen Zuzendaritza Nagusiari, Unibertsitateen, Kalitatearen eta Prestakuntzaren Zerbitzuari, Nafarroako Unibertsitate Publikoari, Nafarroako Unibertsitateari, Ekonomia, Ogasun, Industria eta Enplegu Departamentuak Hezkuntzakoan duen kontu-hartzaile delegatuari, Aurrekontu eta Kudeaketa Ekonomikoaren Atalari, Araubide Administratiboaren Atalari, Kudeaketa Ekonomikoaren Bulegoari, Argibide Bulegoari eta Goi Mailako Irakaskuntzaren Bulegoari, behar diren ondorioak izan ditzan.

5. Ebazpen honen aurka gora jotzeko errekurtsoa jar daiteke, Hezkuntza Departamentuko kontseilariari zuzendua, argitaratu eta biharamunetik hilabeteko epean.

Iruñean, 2014ko martxoaren 4an.–Hezkuntzaren, Lanbide Heziketaren eta Unibertsitateen zuzendari nagusia, David Herreros Sota.

ERANSKINA

2013-2014 ikasturteko nazioarteko mugikortasunerako unibertsitate programen laguntza osagarrien deialdia

Oinarriak

1. Xedea.

Nazioarteko dimentsioaren garapena gakoetako bat da unibertsitateko ikasketetan gaur egun. Asmo horrekin, Espainiako unibertsitateek mugikortasunerako hainbat programa sustatzen dituzte, Europar Batasunetik, Espainiako Gobernutik edo beste erakunde publiko edo pribatu batzuetatik datozen funtsei eta baliabide propioei esker finantzatzen direnak. Deialdi honetan proposatzen diren laguntza osagarriak Nafarroako Gobernuak egiten duen ekarpen zuzena dira, Nafarroako unibertsitateetako ikasleen eta beste unibertsitateetako ikasle nafarren nazioarteko proiekzioa sustatzeko.

2. Laguntzen hartzaileak.

Laguntza horiek eskatzen ahalko dituzte Espainiako unibertsitateek nazioarteko mugikortasunerako sustatzen dituzten programetan parte hartzen duten eta deialdiaren baldintzak betetzen dituzten ikasleek.

Laguntzak onuradunei ordainduko zaizkie zuzenean.

3. Laguntzen bateragarritasuna.

Onuradun bakoitzari emandako zenbateko osoa 90 euroko modulua aplikatzetik datorrena izanen da egonaldiko hilabete bakoitzeko, behar bezala frogaturik, gehienez ere bederatzi hilabete. Ez da laguntzarik emanen hiru hilabetetik beherako egonaldietarako.

4. Eskatzaileek bete beharreko baldintzak.

a) Espainiako unibertsitate batean lehen edo bigarren zikloko edo graduko unibertsitate ikasketetan matrikulaturik egotea. Goi mailako arte eta musikako ikasketak ez daude sarturik.

b) Unibertsitateen arteko nazioarteko mugikortasunerako programa batean parte hartzea.

c) Aurreko deialdietan halako laguntzarik jaso ez izana.

d) Egoera hauetako batean izatea:

–Nafarroan jaioa izatea.

–Nafarroan erroldaturik egon izana eskaera egunaren aurreko azken bi urteetan, gutxienez.

–Frogatzea azkeneko bi urteotan Nafarroan bizi izan direla. Baldintza hori eskatuko zaie soilik Nafarroan ezarritako unibertsitateetan matrikulatutako ikasleei.

e) Diru-laguntzei buruzko 11/2005 Foru Legearen 13. artikuluan onuradun izateko eskatzen diren betebehar orokorrak betetzea.

5. Eskaerak aurkezteko epea eta tokia.

Eskaerak aurkezteko epea 30 egun naturalekoa izanen da, deialdi hau Nafarroako Aldizkari Ofizialean argitaratu eta biharamunetik hasita.

Laguntzaren eskabidea eta eskaturiko agiriak Nafarroako Gobernuko Hezkuntza Departamentuko Erregistro Orokorrean aurkeztuko dira, edo Nafarroako Gobernuko Erregistroko edozein bulegotan, Herri Administrazioen Araubide Juridikoari eta Administrazio Prozedura Erkideari buruzko 30/1992 Legearen 38.4 artikuluan ezarritako bulegoetako edozeinetan edo ekainaren 23ko 70/2008 Foru Dekretuan aipatutako Nafarroako Foru Komunitateko Erregistro Orokor Elektronikoan.

Herri Administrazioen Araubide Juridikoari eta Administrazio Prozedura Erkideari buruzko 1992ko azaroaren 26ko Legearen 76. artikuluan xedatutakoaren arabera, eskabidea behar bezala aurkezten ez bada, dela eskabidea gaizki bete delako, dela erantsi beharreko dokumentazioa osorik ez dagoelako, akatsen berri emanen zaio eskatzaileari, jakinarazi eta 10 eguneko epean zuzen ditzan. Horrela egin ezean, artxibatu eginen da espedientea, horretarako ebazpena eman ondoren betiere.

6. Dokumentazioa.

1. Laguntza eskabidea, deialdiaren I. eranskinean jasota dagoena.

2. Laguntza ordainduko den banku edo aurrezki kutxako libretaren lehenengo orrialdearen fotokopia. Laguntzaren onuradunak kontuaren titularra izan behar du.

3. Nortasun Agiri Nazionalaren fotokopia, bi aldeetatik.

4. Nafarroan jaio ez diren eskatzaileek erroldatze-agiri bat aurkeztu beharko dute, edo azkeneko bi urteotan Nafarroan bizi izan direla frogatzeko behar diren agiriak, kasuan kasukoa.

5. Betebeharren a) eta b) atalak frogatzeko agiria:

Nafarroako unibertsitate batean matrikulatuta dauden eskatzaileen kasuan, unibertsitateak berak ofizioz aurkeztuko du ziurtagiria.

Beste unibertsitate batzuetan matrikulatuta dauden eskatzaileen kasuan, eskatzailea partaide duen truke programaren edo hitzarmenaren ondoko datuen ziurtagiria aurkeztuko dute: destinoko unibertsitatea, egonaldiaren hasiera eta bukaera egunak, etab.

6. 2012-2013 ikasturteko notak frogatzen dituen agiria, ondoko datu hauekin: egindako irakasgai guztiak, irakasgai bakoitzaren kreditu balioa eta ikasturte horretan erabilitako deialdi guztietan eskuraturiko kalifikazioa.

7. Diru-laguntzei buruzko azaroaren 9ko 11/2005 Foru Legearen 13. artikuluan ezarritako baldintza orokorrak betetzen dituela azaltzen duen erantzukizuneko aitorpena. Eskabide-orria sinatuz egiaztatuko da aitorpen hori.

7. Balorazio batzordea:

a) Osaera: deialdia baloratzeko batzordea kide hauek osatuko dute:

–Unibertsitateen, Kalitatearen eta Prestakuntzaren Zerbitzuko zuzendaria, batzordeburu lanetan arituko dena.

–Unibertsitateko Irakaskuntzaren Ataleko burua.

–Goi Mailako Irakaskuntzaren Bulegoko burua, idazkari lanetan arituko dena.

b) Eginkizunak: batzordeak laguntzak emateko proposamena eginen du eta deialdiaren gainean sorturiko gorabeherak konponduko ditu.

c) Irizpena: batzordeak loteslea den irizpena emanen du, eta bertan laguntzak jasotzeko izangaien zerrenda proposatuko du, puntuazioaren arabera ordenaturik.

8. Laguntzak emateko irizpideak.

Izangaien lehentasun ordena ikasketa espedienteen batez besteko notaren arabera ezarriko da. Batez besteko nota hori Europako kreditu sistema eta unibertsitate tituluen kalifikazio sistema ezartzen duen irailaren 5eko 1125/2003 Errege Dekretuan xedatutakoarekin bat kalkulatuko da, kontuan hartu beharreko ohar hauekin:

1. Zenbakizko kalifikazioa egon ezik, eskuraturiko kalifikazioa zenbatuko da honako baremo honi jarraikiz:

a) Ohorezko matrikula = 10 puntu.

b) Bikain = 9 puntu.

c) Oso ongi = 7,5 puntu.

d) Ongi edo gai = 5,5 puntu.

“Gai” kalifikazioa duten irakasgaiak eta konpentsatutakoak ongi batekin baloratuko dira.

2. Irakasgaien arabera antolatutako ikasketa planak izanez gero, batez besteko nota kalkulatuko da guztira lortutako puntuak irakasgai guztien artean zatituz. Lauhileko irakasgaiak irakasgai erdiak izanen dira.

3. Kredituen arabera antolatutako ikasketa planak baldin badira, irakasgai bakoitza osatzen duten kreditu kopuruaren arabera emanen da puntuazioa. Batez besteko nota honela kalkulatuko da: kalifikaturiko kredituen batura, horietako bakoitza kasuko kalifikazioen balioarekin biderkatuta, zati kalifikatutako kredituen kopuru osoa.

4. Titulu teknikoen batez besteko nota 1,17 koefizientearekin biderkatuko da.

Ikasleen espedienteei baremoa aplikatu ondoren berdinketaren bat badago, ebazpen proposamena eman behar duen balorazio batzordeak kalifikazio hoberenen alde ebatziko du.

Laguntzak emanen dira aurrekontuko kontu-sailean eskuragarri dagoen zenbatekoa agortu arte. Baldintzak bete arren laguntza jaso ez duten eskatzaileek erreserba zerrenda osatuko dute, ezarritako lehentasun ordenaren arabera.

9. Ebazpena.

Hezkuntzaren, Lanbide Heziketaren eta Unibertsitateen zuzendari nagusiaren ebazpen bidez eman edo ukatuko dira laguntzak.

Ebazpena Nafarroako Aldizkari Ofizialean eta “navarra.es” atarian argitaratuko da, eta Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 58. artikuluan ezarritako moduan jakinaraziko zaie interesdunei.

10. Onuradunen betebeharrak.

Egonaldia amaituta, laguntzen onuradunek “Egonaldiaren amaiera” izeneko agiria aurkeztu behar dute, deialdiaren II. eranskina alegia, behar bezala beteta eta destinoko unibertsitateak zigilatuta.

Dokumentua, laguntzak ordaintzeko ezinbesteko baldintza, Unibertsitateen, Kalitatearen eta Prestakuntzaren Zerbitzuari zuzenduko zaio eta Nafarroako Gobernuaren Hezkuntza Departamentuko Erregistroan edo Herri Administrazioen Araubide Juridikoari eta Administrazio Prozedura Erkideari buruzko Legearen 38.4 artikuluan aipatzen diren bulegoetako batean aurkeztuko da. Posta elektronikoaren bidez ere igor daiteke.

11. Uko egiteak.

Laguntzari uko eginez gero, Unibertsitateen, Kalitatearen eta Prestakuntzaren Zerbitzuari jakinarazi beharko zaio. Uko egiteak jasotako dirua itzuli beharra ekarriko du berarekin.

12. Ez-betetzeak.

Arrazoi hauetako bat gertatzen denean galduko da laguntza:

a) Egonaldia ez egitea edo egin dela egiaztatzen duen “Egonaldiaren amaiera” dokumentua ez aurkeztea. Kasu horretan, ez da ordainduko laguntzaren zenbatekoa.

b) Eskatu eta emandako egonaldia baino laburragoa egitea, egindako egonalditzat hartuta “Egonaldiaren amaiera” agirian agertzen dena. Laguntzaren onuradunak agirian justifikatzen diren hilabeteei dagokien zenbatekoa jasoko du soilik.

Nolanahi ere, itzuli beharreko diruari dagozkion berandutza interesak gehituko zaizkio.

13. Diru-laguntza ordaintzea.

Laguntzen onuradunek zenbateko osoa jasoko dute egonaldia bukatu ondoren.

Laguntzak bi datatan ordainduko dira: 2014ko ekainean eta abuztuan. Data bakoitzean laguntza ordainduko zaie kasuan kasuko hilabete aurretik egonaldia amaitu eta bera gauzatu dela frogatzen duen agiria aurkeztu duten onuradunei.

Hezkuntzaren, Lanbide Heziketaren eta Unibertsitateen zuzendari nagusiaren ebazpen bidez eginen da ordainketa.

14. Erreserba zerrenda.

Onuradunen batek uko egiteagatik edo ez-betetzeren bat gertatzeagatik aurrekontuan dirua gelditzen bada, erreserba zerrendako izangairen bat laguntzen onuradun bihur liteke. Kasu horretan, laguntza emateko, zerrendaren lehentasun ordenari jarraituko zaio eta Hezkuntzaren, Lanbide Heziketaren eta Unibertsitateen zuzendari nagusiak ebazpen bat emanen du.

15. Laguntzen araubide juridikoa.

Oinarri hauetan xedatuta ez dagoen orotan, arau-hausteen eta zehapenen araubidea barne, Diru-laguntzei buruzko azaroaren 9ko 11/2005 Foru Legean xedatutakoari jarraituko zaio.

Zehapen prozedura Nafarroako Foru Komunitateko Administrazioari buruzko abenduaren 3ko 15/2004 Foru Legean ezarritakoa izanen da.

16. Errekurtsoak.

Oinarrien eta horiek aplikatzeko egintzen kontra gora jotzeko errekurtsoa paratzen ahalko da, Hezkuntzako kontseilariari zuzendua, honako hau argitaratu eta biharamunetik hasita hilabeteko epean.

17. Argibideak eta harremanak.

Eskabide orria, onarpen agiria eta “Egonaldiaren amaiera” ziurtagiria Hezkuntza Departamentuko Argibide Bulegoan eta Unibertsitateen, Kalitatearen eta Prestakuntzaren Zerbitzuan eskuratzen ahal dira. Era berean, oinarriak eta aipatu agiriak “navarra.es” web orrian argitaratuko dira, “Zerbitzuak: laguntzak eta bekak” atalean, hain zuzen.

Edozein zalantza argitzeko, interesdunek honetara jotzen ahalko dute:

Unibertsitateen, Kalitatearen eta Prestakuntzaren Zerbitzua.

Hezkuntza Departamentua.

Santo Domingo kalea, zk.g. - 31001 Iruña (Nafarroa).

Telefonoak: 848 426078 848 426064.

e-mail: ensenanzas.universitarias@cfnavarra.es.

I. ERANSKINA

Eskabidea
Nazioarteko mugikortasunerako laguntza osagarriak

Honako agiri hauek erantsi dira:

Denak.

–NANaren fotokopia (bi aldeetatik) edo pasaportearena.

–Laguntza kobratzeko erabiliko den banku edo aurrezki kutxako libretaren lehen orriaren fotokopia.

–2012-2013 ikasturteko notak frogatzen dituen agiria, ondoko datu hauekin: egindako irakasgai guztiak, irakasgai bakoitzaren kreditu balioa eta erabiliriko deialdi guztietan eskuraturiko kalifikazioa.

–Nafarroan jaio eta Nafarroakoa ez den unibertsitate batean matrikulaturiko ikasleak: Nazioarteko mugikortasuneko programa batean parte hartzen ari dela frogatzen duen ziurtagiria.

–Nafarrak ez diren eta Nafarroako unibertsitate batean matrikulatuta dauden ikasleak: Nafarroan azken bi urteetan bizi dela frogatzen duen agiria.

Gogoratzen da laguntzaren onuradunak egonaldiaren iraupena justifikatzen duen “Egonaldiaren amaiera” agiria aurkeztu behar duela bi hilabeteko gehieneko epean, laguntzaren aldia amaitzen denetik hasirik.

Behean sinatzen duenak:

–Aitortzen du, bere erantzukizunpean, Diru-laguntzei buruzko 11/2005 Foru Legearen 13. artikuluan ezarritako betebeharrak betetzen dituela, eta zergei buruzko betebeharrak, Gizarte Segurantzakoak edo Nafarroako Foru Komunitateko Administrazioaren eta haren erakunde autonomoen aldeko zorrak ordaintzeari buruzkoak egunean dituela edo, bestela, entitate horiekin ordainketa geroratu edo zatikatzeko akordioa lortu duela.

–Deialdi honen arauak ezagutu eta onartzen ditu, aurreko datuak egiazkoak direla adierazten du eta laguntza eman dakiola eskatzen du.

Iruñean, 2014..... (e)ko ................... aren ....................(e)an

Eskatzailearen sinadura

II. ERANSKINA

“Egonaldiaren bukaera” agiria

Certificate of attendance-Egonaldiaren ziurtagiria

Name of the host Institution: ...............................................................

IT IS HEREBY CERTIFIED THAT:

Mr./Ms. ............... from the ............................................. (name of the home Institution) has been an student at our Institution between:

........, .............................., ........ and ........, .............................., ........

day month year day(2) month   year

(see notes below)

in the Department(s)/ Faculty of: .......................................................

Issuing Date (1) Stamp and Signature

Name of the signatory: .......................................................................

Function: .............................................................................................

–The issuing date (1) of this certificate should not be previous to the end of the student’s studying period (2) in any case.

–Ziurtagiriaren data (1) ezin da inola ere epea (2) baino lehenagokoa izan.

Hard copy to be sent at the end of your stay to:

Egonaldiaren bukaeran, jatorrizko agiria hauetako batean aurkeztuko da:

Hizkuntzen eta Arte Ikasketen Zerbitzua.

Nafarroako Gobernuko Hezkuntza Departamentua.

–Nafarroako Gobernuko Hezkuntza Departamentuko Erregistro Orokorrean edo, bestela, Herri Administrazioen Araubide Juridikoari eta Administrazio Prozedura Erkideari buruzko Legearen 38.4 artikuluan aipatzen diren bulegoetako batean.

–Pdf formatuan, hurrengo helbide elektronikoan: ensearti@cfnavarra.es

Iragarkiaren kodea: F1403387