Iragarkia
39. ALDIZKARIA - 2014ko otsailaren 26a
1. NAFARROAKO FORU KOMUNITATEA
1.4. DIRU-LAGUNTZAK, LAGUNTZAK ETA BEKAK
416/2014 EBAZPENA, otsailaren 19koa, Nafarroako Enplegu Zerbitzuko zuzendari kudeatzaileak emana, diru-laguntzak emateko arauak ezartzen dituena Nafarroako lan elkartuko kooperatibetan eta lan-sozietateetan enplegua sustatzeko, ekonomia sozialeko enpresa berriak sortzeko jarduketengatik, laguntza teknikoa, sustapena eta zabalkunde lanak egiteagatik eta proiektu pilotuak prestatzeagatik.
Azaroaren 7ko 3501/2005 TAS Aginduak lan elkartuko kooperatibetan eta lan-sozietateetan enplegua sustatu eta lehiakortasuna hobetzeko diru-laguntzetarako oinarri arautzaileak ezarri zituen. Agindu horren xedapen gehigarri bakarraren arabera, lan elkartuko kooperatibetan eta lan-sozietateetan sustapen programen kudeaketaren arloan eginkizunak eta zerbitzuak eskualdatu ondoren haiek beren gain hartu dituzten autonomia erkidegoek, eta Nafarroako Foru Komunitatea horien parekoa da ondorio horietarako, aginduan ezarritakoa egokituko dute beren antolaketaren berezitasunetara eta beren lurraldean aplikatzen ahal den araudira.
Deialdi honek, alde batetik, azaroaren 7ko TAS 3501/2005 Agindu horretan jasotako jarduketak, laguntza teknikoari, sustapenari eta zabalkundeari buruzkoak eta, bestetik, ekonomia sozialeko enpresa berriak sortzera bideratutako jarduketak eta agindu horretan jaso gabeko proiektu pilotuak babesten ditu, Espainiako Enplegu Estrategian eta Nafarroaren eskumenetan xedatutakoa aplikatuz.
Diru-laguntzei buruzko azaroaren 9ko 11/2005 Foru Legeak diru-laguntzak emateko prozedura arrunta ezartzen du. Horren arabera, besteak beste, beharrezkoa da deialdia eta oinarri arautzaileak ezartzea, eta horregatik onetsi behar da deialdi hau.
Nafarroako Enplegu Zerbitzuko zuzendari kudeatzaileak ekainaren 18an eman zuen 1080/2013 Ebazpenaren bidez, diru-laguntzak emateko modua arautzen zuen deialdia onetsi zen Nafarroako lan elkartuko kooperatibetan eta lan-sozietateetan enplegua sustatzeko, ekonomia sozialeko enpresa berriak sortzeko jarduketengatik, laguntza teknikoa, sustapena eta zabalkunde lanak egiteagatik eta proiektu pilotuak prestatzeagatik. Deialdi hori 2013. urtean aplikatu zen.
Aldi honetan lortutako esperientzia dela-eta, gomendagarria da aldaketa batzuk egitea hainbat alderdi argitzeko (diru-laguntzaren xedeko jarduketak, balorazio irizpideak, onuradunen betebeharrak, etab.), eta proiektu pilotuetan diru-laguntza modalitate berri bat sartzea mota horretako proiektuei laguntza ematen zaiela ziurtatzeko. Horregatik, beharrezkoa da oinarri arautzaile berriak onestea.
Azaldutakoarekin bat eta martxoaren 14ko 15/2012 Foru Dekretuaren bidez onetsitako Nafarroako Enplegu Zerbitzuaren Estatutuen 13. artikuluak ematen dizkidan eskudantziak erabiliz,
EBATZI DUT:
1. Diru-laguntzetarako deialdia eta ebazpen honen eranskinean jasotako oinarri arautzaileak onestea, ekonomia sozialeko enpresa berriak sortzeko jarduketak egiteagatik, baita laguntza teknikoa, sustapena eta zabalkundea egiteagatik eta proiektu pilotuak prestatzeagatik ere.
2. 241.945 euroko gastua baimentzea “Enplegu Plana. Giza talde jakin batzuetan enplegua sustatzeko eta prestakuntzarako programak” izeneko 15000 170000 4819 241115 kontu-sailaren kargura (biltegi zentraleko zenbakia: 4548), 2014ko gastuen aurrekontutik, honela banatuta:
–Ekonomia sozialeko enpresak sortzea eta proiektu pilotuak (A eta B modalitateak): 141.945 euro.
–Laguntza teknikoa. 85.000 euro.
–Sustapena eta zabalkundea: 15.000 euro.
3. 2014ko ekitaldirako aurkezten diren eskaeretarako, hilabeteko epea izanen da deialdi hau argitaratzen denetik aurrera.
4. Ebazpen hau eta eranskina Nafarroako Aldizkari Ofizialean argitaratzea.
5. Ebazpen honen kontra, administrazio bidea amaitzen ez baitu, gora jotzeko errekurtsoa aurkez daiteke, Nafarroako Gobernuko Ekonomia, Ogasun, Industria eta Enpleguko kontseilariari zuzendua, hilabeteko epean, argitaratu eta biharamunetik hasita, Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 115. artikuluari eta Nafarroako Foru Komunitateko Administrazioari buruzko abenduaren 3ko 15/2004 Foru Legearen 57. artikuluari jarraikiz.
Iruñean, 2014ko otsailaren 19an.–Nafarroako Enplegu Zerbitzuko zuzendari kudeatzailea, M.ª Isabel García Malo.
ERANSKINA
1.–Xedea.
Diru-laguntzak emateko baldintza eta betekizunak arautzea dute xede oinarri hauek, ekonomia sozialeko enpresak sortu eta modernizatzeko proiektuen garapena bultzatzeko, ekonomia sozialeko enpresa berrien sorrera bultzatzen duten jarduketen bidez; orobat, laguntza tekniko, sustapen eta zabalkunde arloko lanetarako eta proiektu pilotuak egiteko.
2.–Entitate onuradunak.
1. Deialdi honetan ezartzen diren diru-laguntzak honako hauek hartzen ahalko dituzte:
a) Lan elkartuko kooperatibak eta lan-sozietateak eta oinarri hauen arabera diru-laguntza jasotzen duten proiektu pilotuetatik sortzen diren kooperatibak, 3. oinarriko 1. puntuan jasotako jarduketetarako, non ez zaion laguntza teknikoa sozietate jakin batzuen multzoari eman behar, orduan kooperatibetatik eta lan-sozietateetatik sortutako elkarteak izan baitaitezke onuradunak.
Laguntza teknikoa diruz laguntzea eskatzen duten lan elkartuko kooperatiba eta lan-sozietateen kasuan, sortuta dauden enpresak izatea eskatuko da. Sortutako enpresatzat joko da urtebete baino gehiago abian dagoena diru-laguntzaren eskaera egiteko unean. Oinarri hauen arabera diru-laguntza jasotzen duten proiektu pilotuetatik sortzen diren kooperatiben kasuan, hiru hilabete baino gehiago abian egon behar dute. Betebehar hori ez da eskatuko 3. oinarriko 1. atalaren e) letrako diruz laguntzen ahal diren jarduketen kasuan (Zuzendari eta kudeatzaileen kontratazio mugagabea).
b) Kooperatibetatik eta lan-sozietateetatik sortutako elkarteak, ekonomia soziala sustatzea xede sozial duten irabazi asmorik gabeko entitateak eta unibertsitateak, 3. oinarriko 2. eta 3. puntuetan jasotako jarduketetarako.
c) Proiektu pilotuak.
c.1.) Kooperatibetatik eta lan-sozietateetatik sortutako elkarteak, ekonomia soziala sustatzea xede sozial duten irabazi asmorik gabeko entitateak eta unibertsitateak, 3. oinarriko 4.a) puntuan jasotako jarduketetarako.
c.2.) Diru-laguntza jasotzen duten proiektu pilotuetatik sortzen diren kooperatibak, 3. oinarriko 4.b) puntuan jasotako jarduketetarako.
2. Eskuarki, entitate onuradunek betebehar hauek izanen dituzte:
–Legez eratuak egotea.
–Tributu betebeharrak eta Gizarte Segurantzakoak eguneratuak izatea.
–Diru-laguntzak jasotzeko aukera galtzea dakarren ebazpen irmo baten bidez zehatua ez izatea.
–Helbide fiskala eta laneko tokia Nafarroan izatea.
3. Deialdi hau ez zaie aplikatuko Batzordearen abenduaren 18ko 1407/2013 (EB) Erregelamenduan (Europar Batasunaren Funtzionamenduari buruzko Tratatuaren 107. eta 108. artikuluak “de minimis” laguntzei aplikatzeari buruzkoa) ezarritakoaren arabera laguntza hauetatik, haien jarduera dela eta, baztertuta dauden enpresek egindako eskaerei, ezta enplegu programen aplikazioaren ondoriozko onuretatik arau-hauste oso larriak egiteagatik baztertuta izan diren eskaerei ere, Lan Arloko Arau-hauste eta Zehapenei buruzko Legearen Testu Bateginean (abuztuaren 4ko 5/2000 Legegintzako Errege Dekretuak onetsia) aurreikusitakoari jarraituz.
Produkzioarekin, lehen eraldaketarekin edo/eta Europar Batasunaren Funtzionamenduari buruzko Tratatuaren I. eranskinean (Tratatuaren 38. artikulua) ageri diren produktuen handizkako merkaturatzearekin zerikusia duten jarduerak egiten dituzten enpresak ere diru-laguntzatik kanpo daude.
3.–Diruz lagun daitezkeen programa eta jarduketak.
Proiektu eta jarduera hauek izan dezakete diru-laguntza:
1. Laguntza teknikoa.
Hauek dira laguntza teknikoaren programaren barrenean diruz laguntzen ahal diren jarduketak:
a) Bideragarritasun, antolaketa, merkaturatze eta diagnosiari buruzko azterlanak eta horien antzekoak.
b) Aholkularitza enpresa kudeaketaren hainbat arlotan: diru-laguntza jasoko duten aholkularitza lanak ez dira enpresaren jardueran ohikoak eta etengabeak diren zereginei buruzkoak; kontuan hartuko dira, bakar-bakarrik, haren bideragarritasuna ukitzen duten ohiz kanpokoak edo kudeatze eta antolatze prozesuetan berrikuntzak sartzera bideratutako proiektuak abian jartzekoak, baita informazio eta komunikazioaren gizartearen esparruko teknologia berriak ezartzekoak ere, lehiakortasuna hobetzen laguntzen badute.
c) Aholkularitza enpresa lankidetzarako: produktu berriak garatzea, haiek merkaturatzea, enpresaren jarduera dibertsifikatzea, enpresa plataformak sortzea eta enpresak batzea.
d) Zuzendari eta kudeatzaileen kontratazio mugagabea: urtebetez emanen da diru-laguntza, ekonomia sozialeko enpresetako zuzendari eta kudeatzaileen kontratazioko soldaten kosturako, 4. oinarriko 1. puntuan aurreikusitakoari jarraituz. Kontratatzen diren pertsonak ezin izanen dira entitateko kideak izan, behintzat diru-laguntzak irauten duen denboran. Jarduketa horietarako, ez da eskatuko sortutako enpresak izatea.
Atal honetako a), b) eta c) letretan jasotako zerbitzuetan, ez dute diru-laguntzarik jasoko baimenak edo diru-laguntzak lortzeko administrazio espedienteak tramitatzeko behar diren azterlan, txosten edo aholkularitza lanek, edo hala eskatzen duen xedapenen bat betetzeko egiten direnek.
Kaudimen profesionalaren bermea duten enpresa espezializatuek eman beharko dituzte atal honetako a), b) eta c) letretan jasotako zerbitzuak.
Kooperatibetatik eta lan-sozietateetatik sortutako elkarteek laguntza teknikorako diru-laguntza eskatzen ahalko dute, baldin eta haren helburua kooperatiba eta lan-sozietate jakin batzuen multzoari zerbitzuak ematea bada. Zerbitzu horiek elkarteak berak, bere baliabideak erabiliz, egiten ahalko ditu, edo kaudimen profesionalaren bermea duten enpresa espezializatu batzuekin zerbitzuak, osorik edo parte bat, azpikontratatuz. Kasu horretan, Diru-laguntzei buruzko azaroaren 9ko 11/2005 Foru Legearen 26. artikuluan xedatutakoari jarraituko zaio.
Eskaera aurreko urteko azaroaren 1a baino lehen egin beharko dira d) atalean aurreikusitako jarduketak.
Gainerako jarduketak eskaera aurkezteko epe ondotik egin beharko dira, baina urte bakoitzeko abenduaren 15a baino lehen.
2. Ekonomia sozialaren sustapena eta zabalkundea.
Hauek izaten ahal dira ekonomia soziala sustatu eta zabaltzeko programaren barrenean diruz laguntzen ahal diren jarduketak:
a) Biltzarrak, jardunaldiak, mintegiak, hitzaldiak, topaketak eta bisita teknikoak.
b) Ekonomia sozialeko programa espezializatuak edozein ikus-entzunezko motatan editatzea.
c) Merkataritzako feria, erakustaldi eta lehiaketetan parte hartzea.
d) Ekonomia sozialari aplikatutako komunikazioaren teknologia berrien erabilera bultzatu eta garatzen duten jarduerak.
e) Zabalkunde kanpainak komunikabideetan.
f) Argitalpenak egitea.
g) Ekonomia soziala aztertu, zabaldu eta garatzeko jarduerak.
h) Ekonomia sozialak enpresaren erantzukizun sozialarekin duen konpromisoa zabaltzeko jarduerak.
Jarduketak eskaera aurkezteko epe ondotik egin beharko dira, baina urte bakoitzeko abenduaren 15a baino lehen.
3. Enpresak sortzeko programa.
Ekonomia sozialeko enpresa berriak sortzeko programaren barrenean, diru-laguntza ematen ahalko zaie hurrengo jarduketetakoren bat edo gehiago jasotzen duten proiektuei, enpresa berriak eta lanpostu berriak sortzera zuzenean bideratuta badaude:
a) Autoenplegu kolektiboaren aldeko dinamizazio ekintzak.
b) Ekonomia sozialeko enpresa ereduari buruzko prestakuntza eta aholkularitza, enpresaren sorrerari, enpresa eredua ekintzaileei egokitzeari eta barne funtzionamenduaren eredua definitzeari buruz.
c) Negoziorako ideiak bilatzea.
d) Negozio ereduak definitzea.
e) Bideragarritasun planak.
f) Aholkularitza langileei, kapitaleko sozietateak edo bestelako erakundeak lan-sozietate edo lan elkartuko kooperatiba bihurtu edo/birmoldatzeko prozesuetan.
g) Tramiteei buruzko aholkularitza, enpresak sortzeko edo/eta kapitaleko sozietateak edo bestelako erakundeak lan-sozietate edo lan elkartuko kooperatiba bihurtzeko.
h) Enpresaren xede sozialari lotutako berariazko prestakuntza.
Aurreko urteko azaroaren 1etik aurtengo urriaren 31 arte garatu beharko da programa.
4. Ekonomia sozialeko enpresa berriak sortzera bideratutako proiektu pilotuak.
a) Ekonomia sozialeko enpresa berriak abiatu eta sendotzeko prozesuetan laguntza ematen duten kooperatiba berritzaileak abian jartzeko aholkularitza, laguntza, baimen, informazio, eta abarreko proiektuek jasotzen ahalko dute diru-laguntza (A modalitatea).
Aurreko urteko azaroaren 1etik aurtengo urriaren 31 arte garatu beharko dira proiektuak.
b) Halaber, 4. atal honetako a) letrari jarraikiz diru-laguntza jaso duten kooperatiba berritzaileei beste diru-laguntza bat eman ahalko zaie, ekonomia sozialeko enpresa berriak abiatu eta sendotzeko prozesuetan laguntza jarduerarako, lanpostuak sortuz eta mantenduz kooperatiba berritzailean berean.
Aurreko urteko azaroaren 1etik aurtengo urriaren 31 arte egindako gastuak lagunduko dira diruz.
4.–Diru-laguntzaren zenbatekoa eta diruz laguntzen ahal diren gastuak.
1. Laguntza teknikoaren programetan, diru-laguntza hauek emanen dira:
10 langile finko arteko enpresetan aurreikusitako jarduketen kostuaren %60, eta gehienez 15.000 euro urtean enpresa eskatzaile bakoitzeko.
10 langile finko baino gehiagoko enpresetan aurreikusitako jarduketen kostuaren %50, eta gehienez 15.000 euro urtean enpresa eskatzaile bakoitzeko.
Laguntza teknikorako diru-laguntza kooperatibetatik eta lan-sozietateetatik sortutako elkarte bati emanez gero, diru-laguntzaren zenbatekoa zehazteko, proiektuaren xedeko enpresa bakoitzari egozten zaion zenbatekoa ebaluatu beharko da, ez daitezen “de minimis” arauan ezarritako mugak gainditu. Kasu horretan, emandako zerbitzuen kostuaren %75ekoa izanen da diru-laguntzaren zenbatekoa, eta gehienez 30.000 euro, baterako jarduketa proiektu bakoitzeko. Kooperatiba edo lan-sozietate bakoitzak gehienez 5.000 euro jasotzen ahalko ditu.
2. Ekonomia soziala sustatu eta zabaltzeko programetan, diruz laguntzen ahal den jardueraren kostuaren %80koa izanen da diru-laguntzaren zenbatekoa. Diru-laguntza 15.000 eurokoa izanen da gehienez jarduera eta eskaera bakoitzeko.
3. Enpresak sortzeko programetan, proiektuaren kostuaren %50erainokoa izaten ahalko da diru-laguntzaren zenbatekoa, eta ez da 30.000 eurotik gorakoa izanen, proiektu bakoitzeko. Gehieneko kopuru horri 1.500 euro gehituko zaizkio sortu gogo den lanpostu mugagabe bakoitzeko, eta diru-laguntza ez da 15.000 eurotik gorakoa izanen kontzeptu horrengatik. Gehieneko bi kopuruen batuketa ez da inoiz proiektuaren kostuaren %75 baino handiagoa izanen.
4. A modalitateko proiektu pilotuetan, proiektuen kostuaren %75koa izanen da diru-laguntzaren zenbatekoa, baina ez 50.000 eurotik gorakoa proiektu bakoitzeko.
B modalitateko proiektu pilotuetan, soldata kostuak (langile bazkideen edo kooperatibak kontratatutako pertsonen nominak eta gizarte aseguruak) lagunduko dira diruz, bi pertsonarenak eta 25.000 euro gehienez ere, betiere pertsona horien soldata kostuen %50 gainditu gabe.
5.–Aurrekontuko zuzkidura.
Deialdi honetan aurreikusitako diru-laguntzak, urtero, Nafarroako Aurrekontu Orokorretan lehen aipatu programak kudeatzeko onesten den kontu-sailaren kargura finantzatuko dira.
6.–Eskabideak eta dokumentazioa aurkeztea.
1. Eskaerak, urtero, otsailaren 15etik 28ra bitarte aurkeztuko dira. Eskaerak, ahal delarik, Nafarroako Enplegu Zerbitzuaren erregistroan aurkeztuko dira, edo Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 38.4 artikuluan ezarritako lekuetatik edozeinetan, baita Nafarroako Gobernuaren Erregistro Elektronikoaren bidez ere, www.navarra.es web-gunetik abiatuta (sinadura elektronikoa behar da).
Postetxean aurkezten diren eskaerak gutun-azal ireki batean aurkeztu beharko dira, lehen orrialdearen idazpuruan bulegoaren izena, harrera data eta tokia agerrarazteko. Argibide horiek eskaera aurkeztu dela frogatzen duen gordekinean ere agertu beharko dira.
Eskaerak adierazitako epeaz kanpo aurkeztuz gero, ez dira onartuko.
Diru-laguntza eskatzeak berarekin dakar deialdi honetako oinarriak onartzea.
2. Oinarri hauetan ezarritako diru-laguntzen onuradun izan nahi duten entitateek dokumentazio hau aurkeztu beharko dute:
a) Diru-laguntzarako eskabidea, behar bezala betea, eredu ofizialaren araberakoa, Nafarroako Enplegu Zerbitzuan edo Nafarroako Gobernuaren web-gune ofizialean (www.navarra.es) eskura daitekeena.
b) Identifikazio fiskaleko txartela.
c) Entitatea eratzeko eskritura edo akta, estatutuekin batera.
d) Diru-laguntzak emateko prozeduretan pertsona juridiko baten izenean eta hura ordezkatuz diharduen pertsona fisikoaren nortasun agiri nazionala eta, horrekin batera, Administrazio Publikoaren aurrean jarduteko eman zaion ahalorde aski eta iraunkorraren eskritura, salbu eta ordezkatzeko ahalmena estatutuetan ageri bada.
e) Eskatzaileak zerga betebeharrak eta Gizarte Segurantzakoak egunean dituela frogatzen duten agiriak.
Gizarte Segurantzan alta emanda egon beharra duten langilerik ez duen entitatearen kasuan, kontu horren gaineko aitorpena aurkeztuko du haren legezko ordezkariak.
Zergaren batetik salbuetsiak dauden entitateek salbuespen hori egiazki onartu zaiela frogatzen duten agiriak aurkeztuko dituzte.
f) Helburu bererako beste administrazio publiko batzuei eskaturiko edo horiek emaniko diru-laguntzak azalduko dituen aitorpena, eskaeraren inprimakian berean agertzen ahalko dena, edo horrelakorik eskatu ez duela dioen adierazpen espresa, hala bada; orobat, helburu bererako diru-laguntza edo laguntza eskaera berriak eta lortzen diren laguntzak hamabost eguneko epean Nafarroako Enplegu Zerbitzuaren aurrean idatziz jakinarazteko konpromisoa ere. Aitorpen horretan “de minimis” araubideari lotutako laguntza guztiak ere aipatuko dira, indarrean den zergaldian eta aurreko bietan jasoak, baita eskatu bai baina oraindik ebazteke daudenak ere.
g) Diru-laguntzei buruzko azaroaren 9ko 11/2005 Foru Legearen 13. artikuluko 2. eta 3. idatz-zatietako debekurik urratzen ez dela frogatzen duen agiria, artikulu horretako 7. idatz-zatian xedatutakoaren arabera egina.
h) Aurretik Nafarroako Gobernuaren diru-laguntzarik jaso ez bada, “Transferentzia bidez ordaintzeko eskaera” izeneko inprimakia aurkeztu beharko da.
3. Laguntza teknikorako programetarako, honako hauek gehitu beharko dira:
a) Aholkularitza, azterlan, txosten ekonomiko edo auditoretza zerbitzuetarako honakoak aurkeztuko dira: egin behar den lanaren edukiaren aurkibidea, aurrekontu zehatza, kontratuaren kopia, entitatearen memoria edo azterlana edo aholkularitza egiten duen pertsonaren curriculum vitaea.
b) Zuzendaritzako langileak edo kudeatzaileak kontratatzeko diru-laguntzetan, lan kontratua, nomina eta gizarte aseguruak.
c) Enpresaren ziurtagiria, eskaeraren unean laneko bazkideen edo langile bazkideen eta lan kontratu mugagabea dutenen kopuruari buruzkoa.
d) Onuradunak kooperatibetatik eta lan-sozietateetatik sortutako elkarteak izanez gero, aurrekoaz gain honakoa ere aurkeztu beharko dute:
d.1.) Jarduketa planaren memoria, gutxienez eduki honekin:
–Zerbitzuan parte hartuko duten enpresen izena, IFZa eta sozietatearen helbidea.
–Zein sektoretakoak diren.
–Jarduketa planaren eremu geografikoa.
–Jarduketaren aurrekontu zehaztua.
–Zerbitzua jasotzen duten sozietateetako bakoitzari esleitu zaion diru-laguntzaren zenbatekoa erabakitzeko irizpideak.
–Laguntza teknikoaren zerbitzua jasoko duen enpresa bakoitzak plana finantzatzeko ordaindu beharrekoaren gaineko aurreikuspena.
d.2.) Zerbitzua jasoko duten eskatzaileak eta enpresek zerga betebeharrak eta Gizarte Segurantzakoak bete dituztela frogatzen duten agiriak.
d.3.) Zerbitzua jasoko duten enpresek hartutako laguntzei buruzko aitorpena, oinarri honetako 2. ataleko f) letran zehaztutako informazio beraz hornitua.
4. Zabalkunde eta sustapen programetarako, 2. atalean ezarritakoaz gain, egin beharreko jardueraren aurrekontu zehaztua gehitu beharko da, non, edozein kontzeptu dela eta, jarduerari lotzen ahal zaizkion diru-sarrerak gehituko baitira.
5. Enpresak sortzeko programetarako eta A modalitateko proiektu pilotuetarako, 2. atalean adierazitakoaz gain, proiektuak berak aurkeztu beharko dira; horiek, gutxienez ere, memoria bat izanen dute, hurrengo alderdiak jasoko dituena:
a) Proiektuaren izena, haren deskripzio zehaztua eta lanpostuak sortzeko aurreikuspena.
b) Zein gizatalde edo interes talderentzat den.
c) Jarduketaren lurralde esparrua.
d) Proiektua gauzatzeaz arduratuko direnei buruzko xehetasunak, haien eginkizunak eta zer lanaldi ematen duten hartan.
e) Proiektuak prestakuntza ekintzak baditu, prestakuntza plana eta zeri zer dagokion proiektuan.
f) Proiektua hasteko eta bukatzeko aurreikusitako data.
g) Proiektuaren aurrekontua.
6. B modalitateko proiektu pilotuetarako, 2. atalean adierazitakoaz gain, agiri hauek ere aurkeztu beharko dira:
a) Kooperatibaren funtzionamenduari buruzko memoria, oinarri arautzaile hauei jarraikiz emandako diru-laguntza aipatuko duena.
b) Deialdiaren diru-laguntza norengatik eskatu den, haren/haien zerrenda izenduna eta kontratuak.
7.–Prozeduraren instrukzioa.
Prozedura instruitzeko organo eskuduna Nafarroako Enplegu Zerbitzuko Enplegua Sustatzeko eta Aukera Berdintasunerako Zerbitzua izanen da.
Instrukzio organo horrek, espedienteak ikusita eta aurrekontuan dagoen diruaren arabera, txostena egin dezala eskatuko dio Balorazio Batzordeari, egindako ebaluazioaren emaitza azaltzeko.
Balorazio Batzordea kide anitzeko organoa da, eta haren irizpena lotzailea izanen da. Kide hauek izanen ditu:
–Mahaiburua: Enplegua Sustatzeko eta Aukera Berdintasunerako Zerbitzuko zuzendaria.
–Epaimahaiko kidea: Enplegua Sustatzeko Ataleko burua.
–Idazkaria: Enplegua Sustatzeko Ataleko teknikari bat.
Enplegua Sustatzeko eta Aukera Berdintasunerako Zerbitzuak, Balorazio Batzordearen ebaluazioa eta txostena ikusirik, ebazpen proposamen bat eginen du, Nafarroako Enplegu Zerbitzuko zuzendari kudeatzaileari igorriko diona.
8.–Diru-laguntzak emateko prozedura.
1. Laguntza hauek emateko prozedura norgehiagokako araubideari jarraikiz tramitatuko da, aurkezten diren eskaerak konparatuz, guztiekin lehentasun-zerrenda bat prestatzeko asmoz, hurrengo oinarri arautzailean ezarritako balorazio-irizpideen arabera.
Sustapen eta zabalkunde programen kasuan, behar izanez gero, gutxieneko puntuazioa gainditzen duten onuradun guztien artean hainbanatuko da proposatzen den diru-zenbatekoa, Diru-laguntzei buruzko Foru legearen 17.1 artikuluan ezarritakoari jarraikiz.
2. Programak banan-banan baloratuko dira; lehendabizi, 3. oinarriko 2. ataleko proiektuak; bigarrenik, oinarri bereko 1. atalekoak; hirugarrenik, 3. oinarriko 4. ataleko B modalitatekoak; eta azkenik eta batera, oinarri bereko 3. eta 4. ataletakoak (A modalitatea).
1. edo/eta 2. ataletako proiektuak baloratzean saldorik erabilgarri geldituz gero, 3. oinarriko 4. ataleko B modalitaterako egindako eskaeretarako erabiliko da. Ondoren, saldo erabilgarririk bada oraindik, 3. eta 4. ataletan (A modalitatea) aurkeztutako eskaeretarako.
9.–Balorazio irizpideak.
Proiektuak baloratzeko irizpide hauek aplikatuko dira:
1. Laguntza teknikorako programetan.
a) Diru-laguntzaren xedeko urtean lanpostu mugagabeak sortzea aurreikusteagatik: 20 puntu arte.
–5 bazkide edo enplegu, gehienez ere: 10 puntu.
–5 bazkide edo enplegu baino gehiago: 20 puntu.
Kontratazio horiek baloratzeko, eskaera egiten den unean entitatearen arduraduna den pertsonaren idatzizko konpromisoa eskatuko da.
b) Laguntza eskatzen duen enpresaren kokapen geografikoagatik: 10 puntu arte.
–Iruñetik eta Iruñerritik kanpo: 7 puntu, 10eraino igoko direnak enpresa azken bost urteotan desenplegu tasaren aldaketa negatibo handiena izan duten bi eskualdeetako batean kokatuz gero.
–Iruña eta Iruñerria: 5 puntu.
Enpresa multzo bati zuzendutako laguntza teknikoak direnean, atal hau baloratzeko, haien %50 gutxienez non dauden kokatuta hartuko da kontuan.
c) Negozio linea berri bat sortzeko laguntza teknikoa izateagatik: 10 puntu arte, eta 5 puntu gehiago negozio linea berria Moderna planaren esparruetako batean badago.
Azken ezaugarri hori Moderna zigilua aurkeztuz frogatuko da.
d) Zuzendaritzako langileak eta kudeatzaileak kontratatzeko izan ezik, laguntza teknikoa egiteko kontratatzen den enpresak helbide fiskala Nafarroan izateagatik: 5 puntu.
Diru-laguntza lortu ahal izateko, gutxienez 10 puntu lortu beharko dira.
2. Sustapen eta zabalkunde programetarako.
a) Aurkeztutako proiektuaren kalitate teknikogatik: 5 puntu arte.
b) Proiektua ekintzen hartzaileen beharrei egokitzeagatik: 5 puntu arte.
c) Programa antolatzen duen entitateak 5 urtetik gorako esperientzia izateagatik horrelako programak antolatzen: 10 puntu.
Diru-laguntza lortu ahal izateko, gutxienez 8 puntu lortu beharko dira.
3. Enpresak sortzeko programetarako eta A modalitateko proiektu pilotuetarako.
a) Enplegua sortzea aurreikustegatik edo hurrengo gizataldeetako pertsonak kontratatzeagatik lanpostu berrien %50erako, gutxienez ere: 5 puntu:
–30 urtetik beherako langabeak.
–45 urtetik gorako langabeak.
–Luzaroko langabeak, azkeneko 18 hilabetetik gutxienez 12 hilabetez lanik gabe eta enplegu agentzia batean inskribaturik egon baldin badira.
–Desgaitasuna duten pertsonak, %33ko edo hortik gorako desgaitasuna dutenak.
–Familia karga izan eta langabeziaren sorospena jasotzen duten pertsonak.
b) Enplegua sortzea aurreikustegatik edo hurrengo gizataldeetako pertsonak kontratatzeagatik lanpostu berrien %30erako, gutxienez ere: 10 puntu.
–Gizarteratze-errenta edo lan munduan eta gizartean txertatzeko laguntza eta enplegagarritasunaren hobekuntza jasotzen duten langabeak.
–Abuztuaren 24ko 23/2012 Errege Lege Dekretuan ezarritako lanbide birkualifikazio programaren (PREPARA) onuradun diren langabeak.
–Gizartean eta lan munduan txertatzeko prozesua gizartean eta lan munduan txertatzeko zentroen bitartez bukatu duten langabeak.
c) Moderna planeko jarduera eremuetako batean sailkatutako proiektuak izateagatik: 15 puntu arte.
d) Ezkutuko ekonomiak garrantzi handiagoa duen eremuetan sailkatuta diren proiektuak izateagatik: 20 puntu arte.
Deialdi honen ondorioetarako, honako eremu hauetan du ezkutuko ekonomiak garrantzi handiagoa: eraikuntza, ostalaritza, nekazaritza, pertsonekiko zerbitzuak eta merkataritza.
e) Aurkeztutako proiektuaren kalitate teknikogatik: 17 puntu arte.
f) Abian jarri beharreko tresnak berritzeagatik: 10 puntu arte.
g) Entitate sustatzaile berak aurretik egindako eta diruz lagundutako proiektuen emaitza kualitatibo eta kuantitatiboengatik: 13 puntu arte.
–Sortutako lanpostuen portzentajea, arreta jaso duten pertsonen kopuruarekiko:
- %50 baino gehiago: 8 puntu.
- %21etik %50era: 5 puntu.
- %15etik %20ra: 3 puntu.
–Nafarroako Enplegu Zerbitzuak aurreko proiektuei buruz egindako ebaluazioaren emaitzak: 5 puntu arte.
Diru-laguntza lortu ahal izateko, gutxienez 40 puntu lortu beharko dira.
4. –B modalitateko proiektu pilotuetarako:
a) Enplegua sortzeagatik edo hurrengo gizataldeetako pertsonak kontratatzeagatik lanpostu berrien %30erako edo gehiagorako eta lanpostu batean, gutxienez ere: 10 puntu:
–30 urtetik beherako langabeak.
–45 urtetik gorako langabeak.
–Luzaroko langabeak, azkeneko 18 hilabetetik gutxienez 12 hilabetez lanik gabe eta enplegu agentzia batean inskribaturik egon baldin badira.
–Desgaitasuna duten pertsonak, %33ko edo hortik gorako desgaitasuna dutenak.
–Familia karga izan eta langabeziaren sorospena jasotzen duten pertsonak.
b) Enplegua sortzeagatik edo hurrengo gizataldeetako pertsonak kontratatzeagatik lanpostu berrien %30erako edo gehiagorako eta lanpostu batean, gutxienez ere: 15 puntu.
–Gizarteratze-errenta edo lan munduan eta gizartean txertatzeko laguntza eta enplegagarritasunaren hobekuntza jasotzen duten langabeak.
–Abuztuaren 24ko 23/2012 Errege Lege Dekretuan ezarritako lanbide birkualifikazio programaren (PREPARA) onuradun diren langabeak.
–Gizartean eta lan munduan txertatzeko prozesua gizartean eta lan munduan txertatzeko zentroen bitartez bukatu duten langabeak.
c) Entitateak proiektua kofinantzatzea: 10 puntu arte.
–%51 eta %70 arteko kofinantzaketa: 5 puntu.
–%70etik gorako kofinantzaketa: 10 puntu.
c) Zenbat laguntza emanen diren (aurreikuspena). 15 puntu arte.
Ekonomia sozialeko 5-7 enpresa abiatu eta sendotzeko laguntzaren aurreikuspena, edo 15-21 lanpostu sortzearena ekonomia sozialeko enpresa batean edo gehiagotan: 7 puntu.
Ekonomia sozialeko 12 enpresa baino gehiago abiatu eta sendotzeko laguntzaren aurreikuspena, edo 24-26 lanpostu sortzearena ekonomia sozialeko enpresa batean edo gehiagotan: 10 puntu.
Ekonomia sozialeko 12 enpresa baino gehiago abiatu eta sendotzeko laguntzaren aurreikuspena, edo 36 lanpostu baino gehiago sortzearena ekonomia sozialeko enpresa batean edo gehiagotan: 15 puntu.
Diru-laguntza lortu ahal izateko, gutxienez 20 puntu lortu beharko dira.
10.–Prozeduraren ebazpena.
Nafarroako Enplegu Zerbitzuko zuzendari kudeatzaileak, Enplegua Sustatzeko eta Aukera Berdintasunerako Zerbitzuaren proposamen txostena ikusita, behar den ebazpena eman eta jakinaraziko du, eskaerak aurkezteko epea bukatu eta hiru hilabeteko epean gehienez. Epea ebazpena jakinarazi gabe iraganik, diru-laguntzaren eskaera ezetsi egin dela ulertuko da.
Administrazio ebazpenak alderdi hauek jasoko ditu gutxienez:
–Entitate onuradunen zerrenda.
–Onetsi, ukatu eta onartu ez diren proiektuen zerrenda eta ukatzeko edo ez onartzeko arrazoiak, aurrekontuko diru-izendapen eskasiagatik ukatu direnak espres adierazita.
–Aurkeztutako proiektu bakoitzak lortutako puntuazioa.
–Onartu den proiektu bakoitzari eman beharreko diru-laguntza.
–Guztira emandako diru kopurua.
11.–Onuradunen betebeharrak.
Diru-laguntzen entitate onuradunek betebehar hauek izanen dituzte:
a) Diru-laguntzaren xedeko jarduera deialdian ezarritako moduan eta epeetan egitea. Horregatik, laguntza emateko ebazpenean kontuan harturiko baldintzak nola edo hala aldatuz gero, horren berri eman beharko dute. Zehazki, proiektuan ezarritako lanpostuak sortuz hura bukatzera behartuta izanen dira, 6 hilabeteko epean proiektua bukatzen denetik. Lanpostu gutxiago edo epez kanpo sortuz gero, 15. oinarriko 5. atalean adierazitakoaren arabera egokituko da diru-laguntza.
b) Nafarroako Enplegu Zerbitzuari jakinaraztea, erantzukizuneko aitorpen baten bidez, diruz lagundutako jarduera finantzatzeko beste laguntza, diru-sarrera edo baliabiderik lortu duen. Horren berri jakin bezain laster jakinaraziko du, eta, betiere, jasotako funtsak zertan erabili diren justifikatu baino lehen.
c) Nafarroako Ogasun Publikoarekiko eta Gizarte Segurantzarekiko ordainketak egunean izatea.
Zerga arloko eta Gizarte Segurantzarekiko betebeharren ordainketan egunean dagoela egiaztatzeko, entitate eskatzaileari jakinarazten zaio eskabidea aurkeztearekin batera baimena ematen diola Nafarroako Enplegu Zerbitzuari behar diren datuak kontsulta ditzan, laguntza emateko edo ordaintzeko ebazpenaren proposamena onesten den unean onuradunak betebehar horiek egunean dituela egiaztatzeko.
d) Nafarroako Enplegu Zerbitzuak diru-laguntzaren gainean eskatzen dion informazio guztia ematea.
e) Onuradunek, orobat, Diru-laguntzei buruzko azaroaren 9ko 11/2005 Foru Legearen 9. artikuluan ezarritako betebehar orokorrak bete behar dituzte.
f) Nafarroako Enplegu Zerbitzuak egindako finantzaketaren publizitateari dagokionez, entitate onuradunak dokumentuetan, prentsako iragarkietan eta zabalkunderako edo informaziorako materialean beti adierazi beharko ditu programaren izena, jarduera edo/eta funtzionamendua eta Nafarroako Enplegu Zerbitzuaren/Nafarroako Gobernuaren ikur ofiziala, “Nafarroako Enplegu Zerbitzuak/Nafarroako Gobernuak finantzatutako programa/jarduera/funtzionamendua” testuarekin batera.
g) Gardentasunerako betebeharrak:
g.1) Entitate eta pertsona juridiko onuradunek gardentasunez aritzeko betebeharra izanen dute, Gardentasunari eta Gobernu Irekiari buruzko ekainaren 21eko 11/2012 Foru Legearen bederatzigarren xedapen gehigarrian ezarritakoa hain justu, betiere Nafarroako Aurrekontu Orokorren kargurako diru-laguntzak jasotzen badituzte eta honako bi inguruabar hauek ematen badira:
1) Emandako diru-laguntza 20.000 eurotik gorakoa izatea urtean.
2) Emandako diru-laguntza entitate onuradunaren negozio-zifraren edo urteko aurrekontuaren %20tik gorakoa izatea.
Horretarako, bi inguruabarrak betetzen dituzten entitate eta pertsona juridiko onuradunek, telematika bidez Nafarroako Gobernuko Erregistro Orokor Elektronikoa baliatuz, ondotik aipatzen den informazioa, Nafarroako Enplegu Zerbitzuari zuzendua eta entitatearen legezko ordezkariak sinatua, aurkeztu beharko dute, diru-laguntza ematen zaiela dioen ebazpena jakinarazi eta hilabeteko epean:
–Entitatearen gobernu, administrazio eta zuzendaritza organoen osaera.
–Organo horiek osatzen dituzten kideen zerrenda.
–Entitateak aurreko urtean kargudun bakoitzari emandako ordainsari gordinak eta gainerako diru konpentsazioak, kontzeptutan banatuta. Sortu berriak diren entitateen kasuan, informazioa haien aurrekontuetan edo plan ekonomiko-finantzarioan bildutakoa izanen da.
–Kargudun bakoitzaren dedikazio araubidea gobernuko, administrazioko eta zuzendaritzako eginkizunetarako.
–Entitate onuradunaren urteko azken kontuen kopia bat.
Aurreko atalean ezarritako mugak gainditzen diren zehaztearen ondorioetarako, Nafarroako Foru Komunitateko Administrazioak edo haren erakunde publikoek urte naturalean emandako diru-laguntza guztien kopuruak batuko dira.
Urte batean baino gehiagotan ordaintzen diren diru-laguntzen kasuan, aurrekontuko ekitaldi bakoitzean emandako kopurua konputatuko da ondorio horietarako, ez guztizko batura.
g.2) Entitateak gardentasunerako betebeharra bete behar ez badu, aurreko ataleko inguruabarrak ematen ez direlako, horren gaineko aitorpen bat aurkeztu beharko du.
12.–Diru-laguntzaren ordainketa.
1. Ordainketa modu hauetako edozeinetan eginen da:
a) Entitate onuradunak diruz lagundutako jarduera aldez aurretik justifikatuta, jarduera osorik gauzatu ondoren.
Kasu horretan, onuradunak aurtengo abenduaren 31 baino lehen aurkeztu beharko du espedientearen likidazioa egiteko behar den dokumentazio osoa.
b) Emandako diru-laguntzaren %50eko konturako ordainketa bat egitea, onuradunak hala eskatuta. Memoria tekniko edo gastuen ordainagirien bidez justifikatutako zenbatekoa ordainduko da.
Gainerako ordainketa egiteko, abenduaren 31 baino lehen onuradunak egindako jardueren exekuzio-memoria aurkeztu beharko du, 3. oinarrian xedatutakoaren arabera, bai eta diru-laguntzaren xedeko gastuei buruzko fakturen zerrenda ere, data, zenbakia, hornitzailea eta zenbatekoa zehazturik.
11. oinarriko a) letran aipatzen den 6 hilabeteko epea igarota, onuradunak azken exekuzio-memoria teknikoa aurkeztu beharko du, sortutako lanpostuak justifikatzeko, bai eta ordainketen egiaztagiriak ere, arlo hauetan: fakturak eta kontratutako pertsonen nominak, gizarte aseguruak eta PFEZ.
Aurreko bi lerroaldeetan xedatutakoa ez da aplikatuko sustapen eta zabalkunde proiektuetan. Halakoetan, abenduaren 31 baino lehen aurkeztu beharko dira exekuzio-memoria teknikoa, fakturak eta ordainagiriak.
Aipatu dokumentazioa berrikusi ondoren, espedientea itxiko da likidazio ebazpen egokiaren bidez.
2. Entitateak gardentasunerako betebeharra bete behar badu, 11. oinarriko g) letran aipatu dokumentazioa diru-laguntza ematen zaiola jakinarazi eta hilabetean telematika bidez aurkeztu izana frogatu beharko du, edo Foru Komunitateko Administrazioaren zein organori aurkeztu dion adierazi, organo horrek emandako diru-laguntzaren onuradun izateagatik. Informazio hori eman izana ez da frogatu beharrik izanen, hura Nafarroako Foru Komunitateko Administrazioaren Gobernu Irekiaren Atariko webgunean argitaratuta bada.
Betebehar hori betetzen ez bada, emandako diru-laguntza ez da ordainduko, konturako ordainketak barne.
3. Ebazpena onetsita eginen dira ordainketak, organo kudeatzaileak proposamen txostena egin ondoren.
13.–Jarraipena eta kontrola.
Entitate onuradunek honako egiaztatze lan hauek onartu beharko dituzte: Nafarroako Enplegu Zerbitzuak eta Laneko eta Gizarte Segurantzako Ikuskatzailetzak egin beharrekoak, bidezko diren finantza kontrolekoak, hala badagokio, Nafarroako Gobernuko Ekonomia, Ogasun, Industria eta Enplegu Departamentuko kontu-hartzailetzarenak, Kontuen Ganberaren legedian ezarritakoak eta legez bidezko diren gainerako egiaztatzeak.
14.–Diru-laguntzaren bateragarritasuna.
Deialdi honetako diru-laguntzak bateragarriak dira helburu bererako ematen ahal diren bestelako laguntza edo diru-laguntzekin. Edozein kasutan, haien zenbatekoak ez du egindako jarduketaren %100 gaindituko, ezta “de minimis” laguntzetarako erregelamenduak ezarritako gehieneko muga ere.
15.–Ez-betetzeak eta diru-laguntzaren itzulketa.
1. Programa burutu ezik edo diru-laguntza emateko ezarritako baldintzak bete ezik, eta Diru-laguntzei buruzko azaroaren 9ko 11/2005 Foru Legearen 35. artikuluan aipatzen diren zergatikoak gertatuz gero, edo deialdian berariaz aipatzen diren betebeharrak bete ezik, hartutako zenbatekoa itzuli egin beharko da, osorik edo hein batean. Legez ezarritako kasuetan, gainera, bidezkoa izanen da diru-laguntza ordaindu zenetik itzuli beharraren gaineko ebazpena ematen den arte sorrarazitako berandutza-interesak ordaintzeko eskatzea.
2. Laguntza ematen duen ebazpenean ezarritako epean justifikatu ezik, onartutako diru-laguntza kobratzeko eskubidea galduko da eta aurreratutako zenbatekoak itzuli beharko dira, berandutza interesak barne.
3. Diru-laguntza erabiltzen baldin bada eman zen helburuetarako ez beste batzuetarako, eta aldaketa hori Nafarroako Enplegu Zerbitzuari jakinarazten ez bazaio, zerbitzu horrek ebazpena emanen du diru-laguntza osoa itzuli behar dela erabakiz, berandutza interesak barne.
4. Halaber, emandako diru-laguntza osoa itzuli beharko da Nafarroako Aurrekontu Orokorren kargurako diru-laguntzen onuradunen gardentasun betebeharrak arautzen dituen irailaren 11ko 59/2013 Foru Dekretuak ezartzen dituen betebeharrak betetzen ez badira.
5. Entitateak diru-laguntzaren baldintzen aldaketa jakinarazi eta Nafarroako Enplegu Zerbitzuak onartzen badu, azken horrek aldaketa baino lehen jasotako diru guztia edo parte bat itzultzeko eskatzen ahalko du, baina berandutza interesik gabe.
6. 3. oinarriko 3. ataleko diru-laguntzen kasuan, proiektuan ezarritako lanpostuak ez badira sortzen edo oinarriotan ezarritako epeaz kanpo sortzen badira 1.500 euro itzultzeko eskatuko da aurreikusitako eta ez sortutako lanpostu bakoitzeko.
Horrez gain, eta kasu guztietan, sortutako lanpostuen kopurua eta/edo ekonomia sozialeko enpresa berriak abiatu eta sendotzeko prozesuetan emandako laguntzen kopurua proiektuan adierazitakoen %25 baino baxuagoa bada, emandako diru-laguntza osoa itzultzeko eskatuko da.
16.–Arau-hausteak eta zehapen araubidea.
Deialdi honetan aipatzen diren diru-laguntzen entitate onuradunak Diru-laguntzei buruzko azaroaren 9ko 11/2005 Foru Legearen 42. artikuluan eta hurrengoetan ezarrita dagoen diru-laguntzen arloko arau-hauste administratiboentzako zehapen araubidearen mende egonen dira eta hartan ezarritako erantzukizunak izanen dituzte.
Diru-laguntzen arloko zehapenak Nafarroako Foru Komunitateko Administrazioari buruzko abenduaren 3ko 15/2004 Foru Legearen V. tituluan xedaturikoari jarraikiz ezarriko dira.
17.–Publizitatea.
Nafarroako Enplegu Zerbitzuak diru-laguntzak argitara emanen ditu Nafarroako Enpleguaren Atarian, Diru-laguntzei buruzko azaroaren 9ko 11/2005 Foru Legearen 15.1 artikuluan ezarritako baldintzekin bat.
18.–”De minimis” araubidea.
Deialdi honetako diru-laguntzak, haien onuradunak, zuzenean edo zeharka, enpresak badira, “de minimis” araubidearen menpe daude, Batzordeak 2006ko abenduaren 15ean emandako 1998/2006 EE Erregelamenduan zehaztu bezala, hartan ezarrita baitago nola aplikatu Tratatuaren 87. eta 88. artikuluak “de minimis” laguntzei.
19.–Arau osagarriak.
Oinarri arautzaile hauetan xedaturik ez dagoen guztian, Diru-laguntzei buruzko azaroaren 9ko 11/2005 Foru Legeari lotuko zaio.
Gardentasunari eta Gobernu Irekiari buruzko ekainaren 21eko 11/2012 Foru Legea eta hura garatzen duen araudia ere aplikagarriak dira.
20.–Oinarri arautzaileen aurkako administrazio errekurtsoak.
Oinarri arautzaile hauen eta garapenerako egintzen kontra, gora jotzeko errekurtsoa jar daiteke, Nafarroako Gobernuko Ekonomia, Ogasun, Industria eta Enpleguko kontseilariari zuzendua, hilabeteko epean, jakinarazi edo argitaratu eta biharamunetik hasita, Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 115. artikuluari eta Nafarroako Foru Komunitateko Administrazioari buruzko abenduaren 3ko 15/2004 Foru Legearen 57. artikuluari jarraikiz.
Iragarkiaren kodea: F1402679
Sarbidea
Nafarroako Aldizkari Ofiziala
Paseo Pablo Sarasate, 38, 2.º izda.
31001 - Iruña
848 42 12 50
