181. ALDIZKARIA - 2014ko irailaren 16a

1. NAFARROAKO FORU KOMUNITATEA

1.7. BESTELAKOAK

1139/2014 EBAZPENA, 2014ko abuztuaren 18koa, Nafarroako Unibertsitate Publikoko jarduneko errektoreak emana, Nafarroako Unibertsitate Publikoaren “Batxilergoko V. Eztabaida Lehiaketa”rako deialdia onetsi eta dagokion gastua baimentzen duena.

Nafarroako Unibertsitate Publikoak kultura sustatzeko eta bultzatzeko garatutako politikaren barnean, eta Nafarroako Unibertsitate Publikoak eta Nafarroako Parlamentuak sinatutako lankidetza-hitzarmenaren emaitza gisa, Unibertsitate Proiekzioko Errektoreordetzak Nafarroako Unibertsitate Publikoaren “Batxilergoko V. Eztabaida Lehiaketa”rako deialdia egitea proposatu du. Lehiaketan Nafarroako Foru Erkidegoan batxilergo ikasketak ematen dituzten ikastetxeek hartuko dute parte.

Unibertsitatearen Aholkularitza Juridikoak egindako txostena ikusirik.

Ekonomia Gaietarako Zerbitzuak egindako txostena ikusirik.

Kontu-hartzailetzak aldeko fiskalizazioa eginda.

Unibertsitate Proiekziorako errektoreordeak proposaturik.

Nafarroako Unibertsitate Publikoko Estatutuetako 40. artikuluak ezartzen dizkidan eskumenak erabiliz,

EBATZI DUT:

Lehenengoa.–Ebazpen honek sortzen duen gastua baimentzea. Gastua, gehienez ere, 13.945,63 eurokoa izango da, eta horietatik 1.445,63 euro 2014ko gastu aurrekontutik hartuko dira, sarientzako, “Beste transferentzia batzuk” 51/51.00/3065/480.05 kontusailetik, eta 12.500 euro 2014ko gastu aurrekontutik hartuko dira, “Kultura jarduerak eta beste batzuk” 51/51.00/3065/228.10 kontu-sailetik, gastu orokorrak egiteko eta epaimahaikideei ordaintzeko.

Bigarrena.–“Batxilergoko V. Eztabaida Lehiaketa”rako deialdia, I. Eranskinean biltzen diren oinarriak eta II. Eranskinean biltzen den lehiaketaren arautegia onestea.

Hirugarrena.–Ebazpen hau Unibertsitate Proiekziorako errektoreordeari, kontu-hartzaileari eta Kontabilitate Atalari igortzea.

Laugarrena.–Deialdia Nafarroako Unibertsitate Publikoaren baliabide elektronikoetan eta Nafarroako Aldizkari Ofizialean argitaratzea.

Bosgarrena.–Ebazpen honen aurka zilegi da aukerako berraztertzeko errekurtsoa jartzea Nafarroako Unibertsitate Publikoko Errektorearen aurrean, hilabeteko epean, edo, bestela, administrazioarekiko auzi-errekurtsoa arlo bereko Nafarroako Auzitegietan, bi hilabeteko epean, ebazpen hau argitarazten den egunaren biharamunetik kontatzen hasita.

Iruñea, 2014ko abuztuaren 18a.–Manuel Rapún Gárate, Jarduneko errektorea.

I. ERANSKINA

Batxilergoko V. Eztabaida Lehiaketaren
deialdiaren oinarriak (2014/15 ikasturtea)

Lehena.–Deialdiaren xedea.

Deialdi honen helburua da Batxilergoko Eztabaida Lehiaketaren V. Edizioko sariak emateko prozedura arautzea, publizitate, objektibitate eta lehiakortasun printzipioen arabera, eta, halaber, Lehiaketaren Arautegia finkatzea. (II. Eranskina)

Bigarrena.–Noiz egingo den eta sariak.

Batxilergoko V. Eztabaida Lehiaketa Nafarroako Unibertsitate Publikoan izango da, 2014ko urriaren 24 eta 25ean. Unibertsitate Proiekziorako errektoreordearen esku dago eztabaidetarako beste toki batzuk izendatzea.

Sariak:

Lehenengo Saria: Tableta elektroniko bat taldeko kide bakoitzarentzat.

Bigarren Saria: Liburu elektronikoen irakurgailu bat taldeko kide bakoitzarentzat.

Deialdi honetako sariak jarduera profesionalaren errendimendutzat hartzen dira; beraz, Pertsona Fisikoen Errentaren gaineko Zergari buruzko Erregelamenduko 87. artikuluak ezartzen duenaren arabera, merkatuko balioaren %15eko konturako sarrera egin behar da.

Hirugarrena.–Eskatzaileek bete beharrekoak.

“Batxilergoko V. Eztabaida Lehiaketa”rako deialdian parte hartu ahalko dute batxilergoko ikasketak ematen dituzten eta Nafarroan dauden hezkuntza-ikastetxeek.

Ikastetxe bakoitzak talde bakar batekin parte hartu ahalko du. Ikastetxean 2014-15 ikasturtean batxilergoko 2. maila egiten ari diren ikasleek osatuko dituzte taldeak.

Laugarrena.–Izen ematea.

1. Parte hartu nahi duten ikastetxeek izen emateko orria bete eta aurkeztu behar dute (III. Eranskina) Nafarroako Unibertsitate Publikoko Kultura Jardueren Bulegoan, jendearentzako orduetan, astelehenetik ostiralera, 2014ko irailaren 26an arratsaldeko 14:30ak baino lehenago. Bestela, posta elektronikoaren bidez bidaliko dute, helbide honetara: actividades.culturales@unavarra.es

2. NUPek 16 ikastetxe onartuko ditu, gehienez ere. Ikastetxeak izen-ematearen ordenaren arabera aukeratuko dira.

3. Izen-ematearen bidez, parte-hartzaileek onartzen dute berariaz NUPeko V. BELak iraun bitartean, antolatzaileek egingo dituzten bideo eta argazkien irudi-eskubideak lagatzen dituztela.

Urriaren 17 eta 18an aldez aurretiko prestakuntza-saio bat edo batzuk egingo dira, parte hartuko duten taldeei lehiaketari buruz dauzkaten zalantza guztiak argitzeko.

Bosgarrena.–Antolamendua.

Lehiaketarako batzordea.

Honako hauek izango dira batzordekideak:

–Iñigo Virto Quecedo jauna, Nafarroako Unibertsitate Publikoko Natura Ingurunearen Zientzien Saileko irakaslea.

–Beatriz Rodríguez andrea, Nafarroako Unibertsitate Publikoko Zuzenbide Pribatuko Saileko irakaslea.

–Óscar Orzaiz Resano jauna. Verba Comunicacióneko zuzendaria eta Oratoriako irakaslea.

Lehiaketarako Zuzendaritza.

–Óscar Orzaiz Resano jauna.

Epaimahaiko kideak.

Eztabaidak balioetsiko dituzten epaimahaikideak Kultura Proiekziorako errektoreordeak izendatuko ditu. Errektoreorde andreak izendatuko ditu epaimahai bakoitzeko kideak.

Seigarrena.–Sariak ematea.

Aktan jasoko den epaimahaiaren balioespenarekin bat etorririk, Unibertsitate Proiekziorako errektoreordeak sariak emateari buruzko behin betiko ebazpena onetsi eta sariak eman egingo ditu, 2014ko urriaren 25ean, eztabaidak bukatu eta gero.

Zazpigarrena.–Konfidentzialtasuna.

Parte-hartzaileen datuak fitxategi automatizatu batean sartuko dira. Deialdia kudeatzea da fitxategi horren helburu bakarra.

Bederatzigarrena.–Oinarriak onartzea.

“Batxilergoko V. Eztabaida Lehiaketa” izenekoan parte hartzeak berarekin dakar oinarriak ezagutu eta onartzea.

Bederatzigarrena.–Argitalpena.

Oinarri hauek Nafarroako Aldizkari Ofizialean eta Nafarroako Unibertsitate Publikoaren bitarteko elektronikoetan argitaratuko dira.

Hamargarrena.–Errekurtsoak.

Deialdi honen eta deialdi honetako oinarrien aurka, eta deialdi honen ondorioz sariak behin betikoz emateari buruzko ebazpenaren aurka zilegi da aukerako berraztertzeko errekurtsoa, Nafarroako Unibertsitate Publikoko errektorearen aurrean, hilabeteko epean, edo administrazioarekiko auzi-errekurtsoa arlo bereko Nafarroako Auzitegietan, bi hilabeteko epean; epeok idazki hau argitaratzen den egunaren hurrengotik aurrera kontatuko dira.

II. ERANSKINA

Lehiaketaren Arautegia

1. Taldeak.

Lehiaketan 16 talde hartuko du parte, gehienez ere. Talde bakoitza hiru edo lau eztabaida-egilek eta kapitain batek osatuko dute. Denak izango dira ordezkatzen duten ikastetxeko ikasleak. Taldeak kapitaina aldatzeko aukera edukiko du, lehiaketak iraun bitartean, eta epaimahaikideei jakinarazi eta gero, eztabaida bakoitzaren hasiera baino lehen. Kapitainak bere taldea ordezkatuko du epaileen eta lehiaketako gainerako organoen aurrean.

Parte hartzaileek ezin dute parte hartu talde bat baino gehiagotan Lehiaketaren edizio honetan. Talde batek aldaketaren bat behar badu, egiten ahalko du, baldin eta lehiaketa hasi baino astebete lehenago, gutxienez, jakinarazten badie antolatzaileei. Hauek aldaketa onetsi egin beharko dute. Hala ez bada, antolatzaileek eskubidea daukate aldaketa onesteko, edo ez.

Kapitaina, eztabaida bitartean, bere taldekoen mahaian eseriko da. Ezin izango du, ordea, ahoz komunikatu bere taldekoekin, oharren bidez ez bada, eta ezin izango die galderarik egin beste taldekoei.

2. Egunak.

Lehiaketa 2014ko urriaren 24 eta 25ean egingo da.

3. Antolaketa.

Lehiaketarako Batzordea:

Eginkizunak: taldeek lehiaketari buruz aurkezten dizkioten erreklamazioak ebaztea, arautegi hau interpretatzea, eta arautegi honetan aurreikusi ez den edozein konturi irtenbidea bilatzea.

Funtzionamenduaren araubidea: erabakiak gehiengoz hartuko dira, bozketak argitaratu gabe, eta hiru kideek izenpetuko duten akta batean bilduko dira.

Lehiaketarako Zuzendaritza:

Eginkizunak: arautegi hau ongi betetzeaz arduratzea, arauak ez betetzeak edo jarrera desegokia izateak eduki ditzaketen zehapenen berri parte-hartzaileei ematea, arautegian aurreikusten diren zehapenak aplikatzea, aretoko arbitroak zehapenak aplikatzean sortzen diren gorabeherak ebaztea, eta lehiaketari buruzko erreklamazioak ebaztea.

Funtzionamendu araubidea: erabakiak hartzeko ez da beharrezkoa izango kontsulta egitea. Hala ere, honek ez du esan nahi informazioa jaso ezin dezakeela bere eskumeneko auziei buruz, edo edozein antolatzaileri orientazioa eskatu ezin dionik. Taldeek errekurtsoak jarri ahalko dituzte bere erabakien aurka, Lehiaketa Batzordearen aurrean.

Epaimahaiko kideak:

Osaera: epaimahai bakoitzean 3 kide egongo dira, gutxienez, eta 7 gehienez. Horietako bat epaimahaikide nagusia izango da. Antolatzaileek gonbidatutako unibertsitate komunitateko kideak izan daitezke. Beren identitatea eta zer areto esleitzen zaien, lehiaketa-koadroan jakinaraziko da. Areto bakoitzean epaimahai bat egongo da. Epaimahaiak elkarren artean independenteak izango dira.

Eginkizunak: beren eginkizun nagusia da eztabaidak balioestea, orokorrean, eta parte-hartzeak eta interpelazioak, bereziki, baita puntualtasuna, janzkera eta arautegi honetan jasotzen diren gainerakoak ere. Epaimahaikide nagusiak, gainera, aretoko arbitroari jakinaraziko dio talderen batek edo talderen bateko kideak ez baditu eztabaida gauzatzeko arauak betetzen, baita aretoan gertatu den eta arbitroak ezagutu ez duen edozein oker.

Funtzionamendu araubidea: erabakiak gehiengoz hartuko dira, bozketak argitaratu gabe. Epaimahaikide bakoitzak bere erabakiaren berri emango du Epaimahaikidearen Aktan (V. Eranskina), eta organoaren erabakia Eztabaidaren Aktan jasoko da (VI. Eranskina). Epaimahaikide bakoitzak bere epaimahaikidearen akta izenpetuko du. Epaimahaikide nagusiak eta aretoko arbitroak izenpetuko dute Eztabaidaren Akta. Arautegi honek ezarritako balioespen araubidea bete beharko dute biek.

Aretoko arbitrajea:

Osaera: lehiaketa zuzendariak eztabaida gauzatzen den areto bakoitzeko arbitroak izendatuko ditu. Areto bakoitzean arbitro bat egongo da.

Eginkizunak: eztabaidaren alderdi teknikoak kontrolatzea, txanda bakoitzaren bukaeran gaztiguak eta falta arinen berri ematen, eta epaimahaikideei egindako hauste guztien berri ematen, haiek jakinaraz ditzaten, hala badagokio.

Funtzionamendu araubidea: arbitroak hauste arinak eta gaztiguak ozenki jakinaraziko ditu, izan den txanda bukatu eta berehala, behar den publizitatea izan dezan. Berehala ezin bada jakinarazi, eztabaida bukatu eta ondorengo 10 minututan. Taldeek zilegi dute errekurtsoak jartzea bere erabakien aurka, Lehiaketarako Zuzendaritzaren aurrean.

4. Eztabaidaren gaia.

Antolatzaileek jakinaraziko dute zein izango den lehiaketako eztabaidarako gaia, 2014ko urriaren 3an, honako web-orrialde honetan: www.unavarra.es/cultura/debate-universitario/torneo-bachillerato.

5. Partze hartzeko prozedura.

Segitu beharreko prozedura, norgehiagoka bakoitzean aurkezteko, honako hau da:

5.1. Taldeak aretoan aurkeztea: eztabaidatu behar duten taldeak ordutegi jakinean.

Egon beharko dute kasuan kasuko aretoan, eta hor daudela jakinarazi behar diote arbitroari. Norgehiagoka bakoitza hasteko ordutegia lehiaketa-koadroan argitaratzen direnak izango dira. Eztabaida hasteko orduan, bi taldeak aurkeztu direla eta puntual iritsi direla baieztatuko da. Taldeetako kideen janzkera formala izango da, ekitaldi akademiko bati dagokion moduan.

5.2. Eztabaidaren aurkezpena: aretoko arbitroak gaiaren, epaimahaikideen, taldeen eta taldeetako kideen aurkezpen laburra egingo du, eta taldeko bakoitzeko kapitainari deituko dio, jarrerak zozketatzeko.

5.3. Jarrera zozketa: talde bakoitzaren eledunek jarrera aukeratuko dute jarrera ausaz esleituko dela bermatuko duen euskarri bat erabilita. Baliteke taldeek aretoan edukiko duten tokia zozketa horren emaitzaren araberakoa izatea.

5.4. Eztabaidaren prestaketa: zozketa eta gero, taldeek 4 minutu edukiko dituzte, nahitaez, eztabaida prestatzeko.

5.5. Parte-hartzeen jakinarazpena: talde bakoitzak idatziz jakinaraziko dio aretoko arbitroari, horretarako ematen den euskarrian, taldekideen esleipena, eta zehaztu zein izango diren: kapitaina, hizlariak eta ikertzaileak. Halaber, parte hartzeko ordena ere jakinaraziko du.

5.6. Kronometrajea eztabaida bitartean: txanda bakoitzak aldez aurretik eduki duen etengabeko iraupen jakin bat edukiko du, 5.8 atalean ezartzen den moduan. Aretoko arbitroa kronometratzen hasiko da hizlariak bere hitzaldiari hasiera ematen dion unean, eta ez du kronometroa geratuko hitzaldia bukatzen den arte.

5.7. Materialak eta zerbitzuak: taldeek beharrezkoa jotzen duten materiala erabiltzen ahalko dute, beren jarrera defendatzeko, lehiaketaren funtzionamendu egokiari traba egiten ez dionean, eta dauden instalazioekin bateragarria denean.

Esplizituki debekatua dago aretotik kanpo daudenekin harremanetan jartzeko sistemak erabiltzea (telefonoak, tabletak edo Interneteko konexioa duten ordenagailuak, etab.), bai eta aretoko ikus-entzuleekin ere.

5.8. Hitz egiteko txandak Hitz egiteko txandak itxiak izango dira, eta honako eskema honen araberakoak: Eztabaida bakoitzaren gehieneko iraupena: 26 minutu.

–Sarrera (Aldeko taldea) 3 minutu.

–Sarrera (Aurkako taldea) 3 minutu.

–1. erantzuna (AlTaldea) 4 minutu.

–1. erantzuna (AuTaldea) 4 minutu.

–2. erantzuna (AlTaldea) 4 minutu.

–2. erantzuna (AuTaldea) 4 minutu.

–Ondorioak (AuTaldea) 2 minutu.

–Ondorioak (AlTaldea) 2 minutu.

Talde bakoitzak erabakiko du bere hizlariak nola arituko diren eztabaida bakoitzean, eta derrigorrezkoa izango da taldeko bi kide aritzea, gutxienez, eztabaida bakoitzean. Txanda bakoitzean hizlari bakarra arituko da. Parte-hartze guztiak zutik egingo dira.

Interpelazioak: Une horretan hizketan ari ez den edozein taldetako kideak, kapitaina izan ezik, eskua altxatu eta galdera edo interpelazio bat egiten ahalko dio aurkako taldearen hizlariari, bere erantzuteko txandetan. Hizketan ari den hizlariak onartu beharko du galdera, zeinak ez baitu 125 segundo baino gehiago iraungo.

Hizlariak askatasuna edukiko du hitza emateko galdera egin duenari. Galderak erantzuna edukiko du, eta biek erabilitako denbora beren parte-hartzeen denborari gehituko zaie.

Ebidentziak eskatzea: epaimahaiak, zuzenean, edo taldeko kapitainak, eskua altxatuz hitza eskatzeko aretoko arbitroari, eskatzen ahalko diete parte-hartzaileei beren hitz-txandetan eman dituzten datuak egiaztatzeko. Erreklamazio hori aurkeztuko da dagokion datua aipatu den txanda amaitu eta gero, edo bestela eztabaida bukatu eta ondorengo 10 minutuetan. Erreklamazioa egin eta gero, erantzun behar duen taldeak 10 minutu edukiko ditu frogak aurkezteko epaimahaiaren aurrean.

5.9. Epaimahaiaren deliberazioa: epaimahaiak deliberazioa egingo du, ateak itxita, eztabaida bukatu eta gero, horretarako ezartzen den denboran.

5.10. Emaitzen jakinarazpena: Epaimahaiaren emaitza orokorra baizik ez da argitaratuko.

Antolatzaileek berentzat gordetzen dute ahozko balioespen-saio bat egiteko aukera, epaimahaikideen edo antolamenduko kideen kontura, eztabaida balioetsi eta gero, eta emaitzak jakinarazi baino lehenago.

6. Puntuazio sistema.

a) Puntuazio sistema oinarrituko da jarraian dagoen “Itemen zerrendan” ezarritako itemen balioespenean. Item bakoitzak bere haztapena edukiko du, eztabaidan balioesten duenaren garrantziaren arabera.

1. Sarrerarik onena: 3 puntu.

2. Lehen errefusatze onena: 3 puntu.

3. Bigarren errefusatze onena: 3 puntu.

4. Ondoriorik onena: 3 puntu.

5. Taldearen jarrera: 3 puntu.

6. Adierazitakoaren ordena, argitasuna eta erraztasuna: 2 puntu.

7. Segurtasuna eta gaiaren menderatzea: 2 puntu.

8. Argudio-ildoaren kalitatea: 2 puntu.

9. Inprobisatzeko gaitasuna: 2 puntu.

10. Frogen barietatea: 2 puntu.

11. Frogen zorroztasuna: 2 puntu.

12. Naturaltasuna, adierazkortasuna eta ikusizko kontaktua: puntu 1.

13. Espazioa menderatzea: puntu 1.

14. Kanpoko baliabideak hobekien erabiltzea: puntu 1.

15. Aurkarien baliabideak aprobetxatzen jakitea: puntu 1.

16. Diskurtsoari egoki zaion hizkera: puntu 1.

17. Galderak egiten uzteko irizpiderik onena: puntu 1.

18. Bizkortasuna erantzutean: puntu 1.

19. Zuzentasuna erantzutean: puntu 1.

Epaimahaikideak ematen duen puntuazio orokorra lortuko da taldeak item bakoitzean lortzen dituen puntuak batuz. Epaimahaikideak, balioespenaren ondoren, puntuaziorik altuena daukan taldea irabazle aldarrikatuko du.

Ondoren adierazten den kalkulua egin eta gero, puntuaziorik gehien lortzen duen taldea irabazlea izango da:

Lehenik, epaimahaiak talde bakoitzari eman dizkion puntuak batu behar dira. Emaitza zati epaimahaiak dituen kideen kopurua egingo da gero, eta lortzen den zenbakiari kenduko zaizkio taldeei ezarri zaizkien zehapenei zegozkien puntuak.

–Berdinketa badago, norgehiagokan epaimahaikiderik gehien bere alde daukan taldeak irabaziko du.

–Talderen bat aurkezten ez bada, edo talderen bat kanporatzen badute, eta ondorioz, beste taldea aurkaririk gabe geratzen bada, norgehiagoka kalifikatu gabe geratuko da.

Aukeran, epaimahaikide bakoitzak bozka bat eman ahalko du eztabaidako, eztabaida hartako hizlaririk onenari. Lehiaketa bukatzen denean botorik gehien bildu duen hizlaria, hizlaririk onena izango da. Berdinketa badago, Lehiaketa Batzordeak, epaimahaiarekin batera, ebatziko du auzia, arrazoiak emanez.

b) Sailkapena honako irizpide hauen arabera, eta ezartzen den ordenan, zehaztuko da.

1. Irabazitako eztabaida-kopururik handiena.

2. Irabazitako puntu-kopuru erlatiborik handiena.

3. Aldeko epaimahaikide kopururik handiena.

4. Galdutako puntu-kopuru erlatiborik txikiena (gaztiguak + arinak + larriak).

5. Aurrez-aurreko norgehiagokaren irabazlea.

6. Lehiaketa Batzordearen erabaki arrazoitua.

Balio erlatiboak honela lortuko dira: kopuru osoak zati egin den eztabaida-kopurua (1., 2. eta 4. kasuak); eta zati taldea lehiaketan zehar balioetsi duen epaimahaikide-kopuru osoa (3. kasua).

Aldi bakoitzeko sailkapenak, aldi bakoitzean lortutako balioespenen arabera ezarriko dira. Kalkulu hau egiteko ez dira kontuan hartuko dagokion fasea baino lehenagoko faseetan lortutako emaitzak.

7. Dokumentazio ofiziala.

a) Epaimahaikidearen akta: Dokumentu honek epaimahaikide bakoitzak elkarren aurka ari diren talde bakoitzari ematen dizkion kalifikazioak bilduko ditu, baita hizlaririk onenaren proposamena ere. Egileak, eta akta itxi behar duen antolatzaileen ordezkariak izenpetu behar dute.

Epaimahaikideen aktaren eredua V. Eranskinean dago.

b) Eztabaidaren akta. Hauek biltzen dituen dokumentua da: epaimahaiaren azken erabakia, talde bakoitzari, norgehiagokan, aplikatu zaizkion zehapenak eta gehitu beharreko gainerako ohar guztiak. Aretoko arbitroak egin behar du. Arbitroak eta epaimahaikide nagusiak izenpetu behar dute. Eztabaidaren aktaren eredua VI. Eranskinean dago.

c) Lehiaketaren akta: Sailkapena eta hizlaririk onenaren aipua jasotzen dituen dokumentua da. Lehiaketa Zuzendaritzak egin behar du, eta organo horren zein NUPeko zuzendaritza akademikoaren izenpeak bilduko ditu. Lehiaketaren aktaren eredua VII. Eranskinean dago.

d) Lehiaketa koadroa. Dokumentu honek hauek bilduko ditu: lehiaketa bideratzeko egingo den zozketaren eguna, ordua, tokia, epaimahaia eta taldeen arteko norgehiagokak, baita sailkapen-aldiak eta finalak ere. Antolatzaileek koadroa aldatzeko eskumena berentzat gordetzen dute, izena eman duten taldeen parte-hartzearen gauzatze-mailaren arabera. Koadroa hemen argitaratuko da: www.unavarra.es/cultura/debate-universitario/torneo-bachillerato.

8. Zehapen-araubidea.

Arbitroak jaso beharko ditu, dagokion eztabaida-aktan, edozein gaztigu, edo ezartzen den edozein zehapen, eta horren jatorrian izan den gertaera.

Aretoko arbitroari dagokio arau-hausteak edo gaztiguak sorrarazten dituen edozein ekintzaren edo egoeraren berri epaimahaiari ematea, honek erabaki dezan zer zehapen ezarri behar den.

Taldeei ezartzen zaizkien zehapenak dagokion eztabaida aktan jasoko dira.

a) Gaztiguak.

Ondorioak: gaztigu bat jasotzeak puntu 1 kentzea ekarriko du.

Gaztigua ahoz egiten den oharra da, eta arrazoi hauengatik emango da:

–Txanda bukatu eta gero azalpenarekin jarraitzea, bost segundo baino luzeago.

–15 segundo baino gehiago irauten duen interpelazioa egitea.

–Txanda lehenago bukatzea: ezarri den denbora-mugara iristeko 15etik 30era bitarteko segundo tartea falta denean.

–Kapitainak bere taldearekin ahoz komunikatzea.

b) Arau-hauste arinak.

Ondorioak: arau-hauste arin batek 3 puntu kentzea ekarriko du.

Hauek ekarriko dute arau-hauste baten zehapena:

–Talde osoak, edo ezartzen den gutxieneko kiden kopuruak, 5 minutuko puntualtasun falta izatea.

–Hizlariaren etorria etetea. Hau izango da hizlariari interpelazioa egitea, hitz egiteko txandarik eduki gabe.

–Hizlariari interpelazioa egitea 25 segundo baino gehiagoko eta 45 segundo baino gutxiagoko denboraz.

–Hitz egiteko txanda ezarritako denbora baino 31tik minutu batera lehenago bukatzea.

c) Arau-hauste larriak.

Ondorioak: arau-hauste larri batek 8 puntu kentzea ekarriko du.

Hauek ekarriko dute arau-hauste larri baten zehapena:

–Talde osoak, edo ezartzen den gutxieneko kiden kopuruak, 5 eta 15 minutu tarteko puntualtasun falta izatea.

–Eztabaida osoan, taldeko hizlari bakar bat aritzea.

–Hitz egiteko txanda ezarritako denbora baino minutu bat lehenago bukatzea.

–45 segundo baino gehiagoko interpelazioa egitea.

–Eztabaida garaian jokaera desegokia aurkako taldearekin, epaimahaiarekin, ikus-entzuleekin edo antolakuntzako kideekin.

–Argudioak ematean datu faltsuak ematea, nahita.

–Interneteko konexioa erabiltzea informazioa jasotzeko, edo eztabaidako taldekoak ez diren publikoko entzuleekin hitz egitea, eztabaida egiten ari den bitartean.

d) Kanporatzeak.

Epaimahaiak eta Lehiaketa batzordeak ahalmena dute taldeko edo entzuleen arteko edonor kanporatzeko, eztabaidan zehar portaera desegokia izaten badute.

Ondorioak: talde bat kanporatzeak taldea eztabaidatik edo lehiaketatik behin betiko kanpo geratzea ekarriko du. Publikoko entzule bat kanporatzeak ekarriko du entzule hori ezingo dela eztabaida aretoetara sartu kanporaketa gertatu den egun osoan.

Hauek ekarriko dute beren egileen kanporaketa:

–Talde osoak, edo ezartzen den gutxieneko kiden kopuruak, 15 minutu baino gehiagoko puntualtasun falta izatea. Atzerapen honek, justifikatzen bada, eztabaidatik kanporatzea ekarriko du, eta ez bada justifikatzen, taldea lehiaketatik kanporatzea.

–Bertan daudenetako edonork jarrera desegokia edukitzea.

–Arautegian gaztigu, hauste arin edo hauste larri bezala bildu ez den beste edozein, Lehiaketa Batzordeak hala zehazten duenean.

9. Erreklamazioak.

Taldeek zilegi dute beren erreklamazioak egitea, idatziz edo ahoz, eta idatzizko berrespenarekin, beharrezkoa bada, erabakia hartu duen organoaren nagusi hierarkikoari.

Lehiaketa Batzordeari aurkezten zaizkion erreklamazioak idatziz egin beharko dira, arautegi honetako IV. Eranskinean ezartzen den ereduaren arabera aurkezteko.

Erreklamazioaren edukia lehiaketako alderdi orokorraren bat denean, Lehiaketa Zuzendaritzari bidaliko zaizkio. Honek Lehiaketa Batzordeko bilerarako deialdia egingo du, beharrezkoa bada.

Ordena hierarkikoa, goitik behera, honako hau da:

–Lehiaketarako Batzordea.

–Lehiaketarako Zuzendaritza.

–Epaimahaikide nagusia.

–Aretoko arbitroa.

Eztabaida bakoitzari buruzko erreklamazioak eztabaida bukatu eta gero egingo dira, eta hurrengo eztabaida hasi baino lehen.

10. Onartzea.

V. BELean parte hartzeak arautegi hau onartzea eta betetzeko konpromisoa dakar.

III. ERANSKINA

F1412065_0.pdf

IV. ERANSKINA

F1412065_1.pdf

V. ERANSKINA

F1412065_2.pdf

VI. ERANSKINA

F1412065_3.pdf

VII. ERANSKINA

F1412065_4.pdf

Iragarkiaren kodea: F1412065