Iragarkia
181. ALDIZKARIA - 2014ko irailaren 16a
1. NAFARROAKO FORU KOMUNITATEA
1.5. ESTATUTUAK ETA LAN HITZARMEN KOLEKTIBOAK
EBAZPENA, 2014ko irailaren 2koa, Arriskuen Prebentziorako eta Lanaren zuzendari nagusiak emana, Leitzako “Leitza, Goizueta, Areso eta Aranoko Oinarrizko Gizarte Zerbitzuetako Mankomunitatea-Mancomunidad de Servicios Sociales de Base de Leitza, Goizueta, Areso y Arano” entitatearen hitzarmen kolektiboa erregistratu, gorde eta Nafarroako Aldizkari Ofizialean argitaratzea erabakitzen duena.
Leitzako “Leitza, Goizueta, Areso eta Aranoko Oinarrizko Gizarte Zerbitzuetako Mankomunitatea-Mancomunidad de Servicios Sociales de Base de Leitza, Goizueta, Areso y Arano” entitatearen hitzarmen kolektiboaren testua (kode zenbakia: 31100702012014) aztertu da, erregistro honetan 2014ko ekainaren 3an sartu zena, enpresaren ordezkariek eta sindikatuen ordezkariek 2014ko maiatzaren 13an izenpetu eta 2014ko abuztuaren 1ean zuzenduta, Langileen Estatutuari buruzko Legearen Testu Bategina onetsi zuen martxoaren 24ko 1/1995 Legegintzako Errege Dekretuaren 90. artikuluaren 2. eta 3. idatz-zatietan eta Hitzarmen Kolektiboen Erregistro eta Gordailuei buruzko maiatzaren 28ko 713/2010 Errege Dekretuan ezarritakoaren arabera. Horrenbestez,
EBATZI DUT:
1. Nafarroako Lan Hitzarmen eta Akordio Kolektiboen Erregistroan inskribatzeko agintzea.
2. Ebazpen hau Negoziazio Batzordeari jakinaraztea, eta adieraztea ebazpenak ez duela administrazio bidea amaitzen eta haren aurka gora jotzeko errekurtsoa jartzen ahal dela, Ekonomia, Ogasun, Industria eta Enpleguko kontseilariari zuzendua, jakinarazi eta biharamunetik hilabeteko epean.
3. Nafarroako Aldizkari Ofizialean argitaratzeko agintzea, denek jakin dezaten.
Iruñean, 2014ko irailaren 2an.–Arriskuen Prebentziorako eta Lanaren zuzendari nagusia, Imelda Lorea Echavarren.
Leitza, Goizueta, Areso eta Aranoko Oinarrizko Gizarte Zerbitzuen Mankomunitateko lan-kontratadunen lan baldintzei buruzko hitzarmena
2014. eta 2015. urteetarako
Hizkera. Gizonen eta emakumeen arteko izatezko berdintasuna lortzeko asmoz, oso urrats garrantzitsua da emakumeak gizarteko subjektu aktiboak direla ulertzea. Horretarako, gizartearen partaide gisa onartu behar dira, eta gure eguneroko hizkerak ez ditu alde batera utziko edo gutxietsiko. Gaur egun gune askotan ahalegina egiten ari da onarpen hori lortzeko, nahiz eta oraindik beharbada nahikoa ez den.
Hori oinarri harturik eta erabili beharreko idazkerari dagokionez, hitzarmen honek eta Leitza, Goizueta, Areso eta Aranoko Gizarte Zerbitzuen Mankomunitatearen eta ordezkari sindikalen arteko lan harreman guztiek hori onetsi beharko dute, horrela adierazten duen hizkera ezarriz. Nekeza dela jakinda ere, asmo hori ahozko hizkeran ere islatzen saiatu beharko da.
Inguruabar horiek kontuan harturik, bi aldeek sinatu dute hitzarmen hau:
1. artikulua. Aplikazio esparrua.
Hitzarmen honen xedea da harreman juridiko laboralen arabera Leitza, Goizueta, Areso eta Aranoko Gizarte Zerbitzuen Mankomunitatean ari diren lan-kontratu finkoa edo aldi baterako langileen lan baldintzak arautzea.
2014ko urtarrilaren 1etik 2015eko abenduaren 31ra bitarte izanen du indarra. Indarraldia bukatu aurreko hiru hilabeteetan espresuki haren bukaera iragarri ezik, hurrengo urteetarako luzatu eginen da. Betiere, hurrengo hitzarmena izenpetu arte indarrean iraunen du. Baita langileen Estatutuaren 86.3 artikuluko 4. paragrafoak ezartzen duen urtebeteko epea gainditu bada ere.
Hitzarmen honek jasotzen ez duen guztian, honako hauetan ezarritakoak aginduko du: Nafarroako Gobernuaren eta bere lan-kontratudunen artean sinatutako hitzarmena, 2006ko lan baldintzei buruzko berariazko akordioa, Opor, lizentzia eta baimenen erregelamenduari buruzko 11/2009 Foru Dekretuko opor eta lizentziaren erregelamendua, langile funtzionarioen lanaldiaren murrizketa arautzen duen 27/2011 Foru Dekretua, Nafarroako Administrazio Publikoen Zerbitzuko Langileen Estatutuaren Testu Bategina, Nafarroako Gobernuaren eta haren langileen artean sinatutako akordioa, Langileen Estatutua eta oro har aplikatzekoa den gainerako araudia. Hori da arauketarako erabili izan dugun esparrua (lanaldia, oporrak, ordainsariak, baimenak ...).
Izenpeturiko baldintzen edozein aldaketa ordezkari sindikalen adostasunez egin beharko da.
Aurrekoa gorabehera, hitzarmen honetan jasotako alderdi partzial eta zehatzak berariaz negoziatzen ahalko dira alde batek hala eskatzen duenean eta udalez gaindiko arauak aplikatu behar diren guztietan, aldaketek hobekuntzarik badakarte langileentzat.
2. artikulua. Lanaren antolaketa.
Leitza, Goizueta, Areso eta Aranoko Oinarrizko Gizarte Zerbitzuen Mankomunitaterari dagokio lana antolatzeko eta zuzentzeko ahalmena.
Aurrekoa deusetan galarazi gabe, ordezkari sindikalek eskubidea dute lan baldintzak ezartzeko erabiltzen diren prozeduretan parte hartzeko, indarra duten xedapenen arabera eta laneko araudiak enpresa batzordeei, langile batzordeei eta langileen ordezkariei gai honetan aitortzen dizkien eskumenei dagokionez.
3. artikulua. Lanaldia.
a) Nafarroako Gobernuak finkatuko du lanaldia. Arau gisa, 1.592 ordukoa izanen da urtean.
Nafarroako Gobernuak hitzarmen honetan adierazten den urteko lanordu kopurua baino txikiagoa ezarriko balu Nafarroako Administrazio Publikoetako langileentzat, automatikoki aplikatuko litzaieke kopuru bera Leitza, Goizueta, Areso eta Aranoko Gizarte Zerbitzuko Mankomunitateko funtzionarioei, administrazio-kontratudunei eta lan-kontratudunei.
b) Astelehenetik ostiralera bitarteko eguneroko lanaldia, oro har, 7 ordu eta 20 minutukoa izanen da. Nahitaezkoa izanen da 8:00etatik 15:00ak bitarte aritzea, eta gainerako 20 minutuak betetzeko aukera malgua utziko da (zerbitzu bakoitzean modu bateratuan), enplegatuaren esku, 7:40etik 8:00etara bitarte eta 15:00etatik 15:20ra bitarte.
Nolanahi ere, langileek, lanaldi-partziala izateagatik, zerbitzuarengatik, hainbat programetan lanean aritzeagatik, edo zereginak betetzeagatik, beste ordutegi batzuk ere izan ditzakete.
c) Bestalde, ahal dela, lan ordutegiei buruzko akordioak eginen dira, bizitza pertsonala eta lanekoa bateragarri izateko eta horretarako erraztasuna emateko. Gai hori kontuan hartuko da bereziki seme-alaba adingabeak daudenean, edo desgaitasuna duten seme-alabak, edo odol bidezko nahiz ezkontza bidezko ahaide eriak, menpekoak, eta abar, eta justifikaturik egonen da.
d) Hitzarmen kolektibo honetan aipatzen den jaiegunen egutegia urtero zehaztuko da, Nafarroako Gobernuak Foru Komunitateko langileentzat finkatzen duenarekin bat. Jaiegunen egutegia eta lanaldi orokorraren egokitzapena ezarriko dira, batzarra egiten duten langileen eskaerak kontuan hartuta.
e) Larunbatak ez dira laneguntzat jasoko oporrak, lizentziak eta abar zenbatzeko, eta laneguntzat joko dira baldin ohiko lanaldiaren barnean horietan lan egiten bada. Kasu horretan, bidezko ordainak aplikatzeko zenbatuko da.
f) Orain ezarririk dauden ordutegi, egutegi eta oporrak betiere langileen ordezkariei entzun ondoren aldatuko dira. Arrazoiak eman beharko dira horretarako.
4. artikulua. Oporrak.
Oporrak Nafarroako Gobernuak erregelamendu bidez ezarri dituenak izanen dira. Langileek urteko 27 lanegun hartzeko eskubidea izango dute, edo kopuru horri proportzionalki dagokiona urtean lan egindako egun kopurua txikiagoa baldin bada.
Langileek oporrak hartuko dituzte kontuan izanik zer programatan dauden eta zer eginkizun eta zeregin dituzten, eta horretarako ados jarriko dira langileen artean, halako moduan non konbinatuko baitira norberaren beharrak eta zerbitzuaren lan beharrak.
Orokorki, langile guztiek eskubidea izanen dute gutxienez arauzko opor egunen erdiak udan hartzeko, ekainaren 15etik irailaren 15era bitarte, alegia.
Hurrengo urteko urtarrilaren 31 izanen da oporrak hartzeko azken eguna.
Langile batek baja hartzen badu oporraldian dagoenean, opor egun horiek ez dira galduko; alta medikoa hartu eta berehalakoan erabiliko dira, ekainaren 21eko 2012 C-78/11 (Europako Batasuneko Justizia Auzitegia) epaiarekin bat.
Oporraldia eta langile baten haurdunaldiaren, erditzearen edo bularra ematearen ondoriozko aldi baterako ezintasun egoera aldi berean gertatuz gero, baita amatasun/aitatasun baimena nahiz bularra emateko luzapenaren kasuan ere, langileak eskubidea izanen du oporrak beste egun batzuetan hartzeko, urte naturala bukatu bada ere.
Langileak baja hartzen badu oporrak hartu baino lehen, edo norberaren aferetarako baimen egunak nahiz aparteko orduak egiteagatiko denbora konpentsazioak hartu aurretik, edo data nahiz epe zehatz batean gauzatzekoak ez diren baimen ordainduak edo lizentziak hasi baino lehen, eta horiek aurretik eskatu badira, egun horiek medikuaren alta hartu eta berehalakoan erabiliko dira.
Urteko lehenbiziko lau hilabeteak bukatu aurretik, administrazioak oporretarako plana prestatuko du, Mankomunitateko langileekin bat. Oporren planen ezohiko aldaketa baimentzen ahalko da, behar bezala arrazoitzen eta zerbitzua berdin betetzen bada, betiere.
Ordezkatu behar diren langileek gutxienez bost lanegun jarraian hartu beharko dituzte.
Aukera emanen da, ez arau orokor gisa baizik eta salbuespenez, ahaideen eritasunagatik, opor egun gutxiago hartzeko.
5. artikulua. Lizentzia eta baimen ordainduak.
Langileek, aldez aurretik abisatuta eta justifikatuta, kasua bada, baimena dute lanera ez agertzeko, ondorengo artikuluetan aurreikusitako denboretan eta kasuetan. Artikulu honek aipatzen dituen baimenak eskuratu nahi dituzten langileek haiek eskuratzeko eskatzen diren baldintzak betetzeari buruzko egiaztagiriak aurkeztu beharko dizkiote organo eskudunari.
a) Baimen ordaindua, aitatasunagatik.
Aitak erabiliko du. Hamabost egun naturaleko baimen ordaindua emanen da, haur baten jaiotza, harrera edo adopzioa dela eta. Jaiotzen denetik, administrazioak edo epaileak harrera erabakitzen duenetik edo epaileak adopzioa ebazten duenetik hasi eta amaren amatasun baimena bukatu eta gehienez ere 13 egunera hartuko du aitak.
Baimen horrek hogei egun natural iraunen du baldin familia ugari batean gertatzen bada jaiotza, adopzioa edo harrera, edo familia ugari bihurtzen bada jaiotza, adopzio edo harrera horrekin, edo familian desgaitasuna duen pertsona bat badago.
Haur batez baino gehiagoz erdituz gero edo haur bat baino gehiago adoptatu edo hartuz gero, aurreko ataletan aipatzen den baimenaren iraupena beste bi egun naturalez luzatuko da haur bakoitzeko, bigarrenetik aurrera, baita haietariko batek desgaitasun bat badu ere.
Hitzarmen honen beste artikulu batzuetan jaiotza, adopzioa edo harrera direla-eta ezartzen diren lizentziak elkarrekin hartzeko araubidetik aparte dago baimen hau.
b) Baimen ordaindua, hamabi hilabetetik beherako seme-alabei bularra emateagatik.
1. Hamabi hilabete baino gutxiagoko haurra duten langileek eskubidea izanen dute egunean ordubetez lantokitik lekutzeko. Denbora horren ordez zilegi izanen dute, funtzionarioak nahi duen moduan, 3 ordu laurdeneko bi aldi hartzea edo lanaldia ordu batez murriztea. Kasu horretan, lanaldiaren hasieran edo bukaeran hartu beharko da. Murrizketa edo lanaldi partziala izanez gero, dagokion proportzioa hartzeko eskubideak izanen dute langileek. Aukera hori salbuespenez bakarrik ukatu daiteke, arrazoituta, emateak zerbitzuaren funtzionamenduari traba handia egiten dion kasuetan.
2. Haur batez baino gehiagoz erdituz gero, baimen hori hein berean handituko da.
3. Aitak edo amak bereizketarik gabe hartzen ahalko dute baimen hori, biek lan egiten badute.
4. Bularra emateko baimena bateraezina izanen da aitak edo amak erditze, adopzio edo harreraren ondorioz hartzen dituzten lizentziekin edo lanaldia murrizteko erregelamendu bidez ezarri diren kasuekin.
5. Bularra emateko denboraren ordez, horri dagokion denbora lanaldi osoetan metatzen duen baimen ordaindu bat eskatzen ahalko da.
c) Ernalketa lagunduko tekniketan parte hartzeko baimen ordaindua.
Emakumezko langileek eskubidea izanen dute ernalketa lagunduko tekniketarako behar-beharrezkoa den denboraz lanetik ateratzeko, betiere aldez aurretik lanaldian egin beharra frogatuz gero.
d) Jaio aurreko azterketetarako eta erditzea prestatzeko tekniketarako baimen ordaindua.
Zilegi izanen da baimen ordainduak ematea emakumezko langileei erditu aurreko azterketak egiteko eta erditzea prestatzeko tekniketan trebatzeko, lanaldian egitekoak direnean.
e) Genero indarkeriagatiko baimen ordaindua.
Genero indarkeriaren biktimak diren langileak egun osoz edo ordu batzuetan lanera joaten ez badira, justifikatutzat joko da, laguntzarako edo osasunerako gizarte zerbitzuek kasuan-kasuan ezartzen dituzten denbora eta baldintzetan.
f) Hezkuntza bereziko ikastetxeetara doazen seme-alabei kasu emateko baimen ordaindua.
Legez onartutako desgaitasun fisiko, psikiko edo zentzumenetakoa duten seme-alabak dituzten langileek zilegi dute lanetik ateratzea, tratamendua ematen zaien hezkuntza bereziko ikastetxeetako koordinazio bileretan parte hartzeko edo, osasun esparruan laguntza gehigarria jaso behar izanez gero, hara laguntzeko.
g) Baimen ordaindua, ahaideen heriotzagatik.
1. Lau lan eguneko baimen ordaindua emanen da ezkontidea edo bikotekide egonkorra eta odol bidezko lehen mailako ahaideak hiltzen direnean, hiltzea Nafarroako Foru Komunitatean gertatzen bada, eta bost egunekoa handik kanpora gertatzen bada.
2. Hiru egun naturaleko baimen ordaindua emanen da ezkontza bidezko lehen mailako ahaideak edo anai-arrebak hiltzen direnean, hiltzea Nafarroako Foru Komunitatean gertatzen bada, eta lau egunekoa handik kanpora gertatzen bada.
h) Baimen ordaindua, ahaideak gaizkitzeagatik.
1. Lau eguneko baimen ordaindua emanen da ezkontidea edo bikotekide egonkorra eta odol bidezko lehen mailako ahaideak bost egunez baino gehiagoz ospitaleratzen direnean edo irizpen medikoa (ospitalean egon edo ez) eritasun larria edo oso larria denean, gertaera Nafarroako Foru Komunitatean izaten bada, eta bost egunekoa handik kanpora bada.
2. Hiru eguneko baimen ordaindua emanen da lehen mailako ahaideak edo anai-arrebak bost egun baino gehiagoz ospitaleratzen direnean edo irizpen medikoa (ospitalean egon edo ez) eritasun larria edo oso larria denean, gertaera Nafarroako Foru Komunitatean izaten bada, eta lau egunekoa handik kanpora bada.
3. Iraupen laburragoko ospitaleratzearen kasuan, edo irizpen medikoa pronostiko erreserbatua edo ez horren larria baldin bada, ordaindutako baimena egun batekoa izanen da, Foru Komunitatean gertatzen denean, eta bi egunekoa, Nafarroatik kanpo gertatuz gero.
4. Aurreko idatz-zatietan aurreikusitako gaixotasun edo ospitaleratzeen kasuan, ospitaleratzea edo eritasuna gertatu zen egunetik aurrera kontatuko dira ordaindutako baimeneko kasuan kasuko lanegunak, edo, langilearentzat laneguna ez bada, haren ondoko egun naturaletik hasita. Baimen egunak lanegunak izanen dira, eta ospitaleratzearen iraupen guztian zehar erabiltzen ahal dira.
5. Aukera emanen da, ez arau orokor gisa baizik eta salbuespenez, ahaideen eritasunagatiko edo ospitaleratzeagatiko baimen ordaindua pertsona gaixoaren altaren ondoren ondoren hartzeko, gehienez ere alta hori hartu ondoko 7 egunetan, gaixoak horrela behar badu.
i) Bestelako baimen ordainduak, ahaideen heriotza edo eritasunagatik.
1. Egun natural bateko baimen ordaindua emanen da 5.g, 5. h.1 eta 5. h.2 artikuluetan esan diren arrazoi berengatik, artikulu horietan aipatzen ez diren odol bidezko edo ezkontza bidezko bigarren mailara arteko ahaideen kasuan, baldin eta gertaera Nafarroako Foru Komunitatean izaten bada, eta bi egunekoa handik kanpora bada.
j) Baimen ordainduen mugak, ahaideen eritasunengatik.
5.h eta 5.i artikuluetan ezarritako baimen ordaindurik ezin izanen da berriz eman harik eta subjektu eragile berarengatik hartutako baimena bukatzen denetik gutxienez ere hilabete iragan arte.
k) Baimen ordaindua, ahaideen ospitaleratu gabeko kirurgia handiagatik.
1. Bi egun naturaleko baimen ordaindua emanen da ezkontide edo bikotekide egonkorrari, seme-alabei edo gurasoei ospitaleratu gabeko kirurgia handia egin behar zaien kasuetan.
2. Kasu horietan, ospitaleratu gabeko kirurgia handitzat hartuko dira eriak ebakuntzaren egun berean, ebakuntza egin eta denbora batera, etxera itzultzen diren prozedura kirurgikoak, zein anestesia mota aplikatu zaien kontuan hartu gabe.
l) Baimen ordaindua, etxe aldairagatik.
Egun natural bateko baimen ordaindua emanen da etxe aldairagatik.
m) Baimen ordaindua, ezinbesteko eginbehar bat, publikoa nahiz pertsonala, egiteko.
Zilegi izanen da ezinbesteko eginbehar bat egiteko, publikoa nahiz pertsonala, behar den denborarako baimen ordainduak ematea, lanaldian egin behar dela frogatu ondoren.
n) Baimen ordaindua, eginkizun partikularrengatik.
Urte batean langileek eskubidea izanen dute gehienez hiru laneguneko baimen soldataduna hartzeko (edo, zerbitzualdia laburragoa izan bada, proportzioan dagozkien egunetakoa), aurreko artikuluetan sartzen ez diren eginkizun partikularretarako. Baimen hori zerbitzuaren beharren arabera emanen da.
Oro har ezarritako lanaldiaren banaketa ez dutenei, kasuan-kasuan duten lanaldiaren iraupenaren arabera egokituko zaizkie baimen egunak.
6. artikulua. Lizentzia ordainduak.
a) Lizentzia ordainduak, azterketa ofizialak egiteko.
Baimen ordaindua izateko eskubidea izanen da dagokion deialdiko azken azterketak eta proba partzial liberatzaileak egiteko. Zentro ofizialetako behin betiko gaitasun probak eta ebaluazioak egiteko ere izanen dute lizentzia ordainduetarako eskubidea.
Langileek eskaera aldez aurretik eta behar den denboraz eginen dute, eta behar bezala frogatu beharko dute matrikula egina dutela eta probetara joan direla.
b) Lizentzia ordaindua, ezkontzeagatik edo bikote egonkorra osatzeagatik.
Ezkontzeagatik edo bikote egonkorra osatzeagatik, langileek 15 egun naturaleko lizentzia ordaindua hartzeko eskubidea dute, eta opor egunekin eta norberaren kontuetarako egunekin bateratzen ahal da. Ezkontza egin dela justifikatzeko, Familia Liburua edo Erregistro Zibileko ziurtagiria edo bateratze zibilen udal erregistroaren egiaztagiria aurkeztu beharko da. Zuzenbidean frogatzat onartzen den edozein baliabideren bidez frogatzen ahalko da bikote egonkor direla.
Pertsona berberen ezkontzak nahiz bikote egonkorrak ez du behin ere eskubiderik emanen artikulu honetan arautzen diren lizentzietarik bat baino gehiago hartzeko.
c) Lizentzia ordaindua, erditzeagatik.
Emakumezko langileek, erditzen direnean, eskubidea izanen dute amatasun lizentzia hartzeko, etengabeko hamazazpi astekoa. Lizentzia hori bi astez luzatuko da, haurrak desgaitasunen bat badu eta aldi berean ume bat baino gehiagoz erditzean, bigarrenetik aurrera, seme edo alaba bakoitzeko. Interesdunak erabakiko du lizentzia hori nola banatu. Sei aste betiere erditu ondoan hartu beharko ditu. Ama hiltzen bada, aitak eskubidea izanen du lizentzia osoa edo hartzeke dagoen zatia hartzeko. Haurra hiltzen bada, lizentzialdia ez da murriztuko, salbu eta erditu eta gero nahitaez hartu beharreko sei asteko atsedenaren ondoren, amak lanpostura itzultzea eskatzen badu.
Aurreko atalak gorabehera, eta erditu eta gero amak nahitaez hartu beharreko sei asteko atsedena deusetan galarazi gabe, bi gurasoek lan egiten badute, amak, erditu ondorengo atsedenaldia hastean, erabakitzen ahalko du aitak har dezala erditu ondorengo atsedenaldiaren zati zehatz eta etengabe bat, amarenarekin batera edo amarenaren ondoren. Aitak hasiera batean onartutako lizentzialdia hartzen segitzen ahalko du, baita ama, lantokira itzultzeko aurreikusitako unean, aldi baterako ezintasun egoeran badago ere.
Garaia baino lehen erdituz gero edo jaio ondoren jaioberriak ospitalean egon behar badu, jaioberria ospitalean dagoen bitartean luzatuko da lizentzia, betiere beste hamahiru astez gehienez ere.
Bi gurasoek aldi berean hartzen badituzte atsedenaldiak, ez da zilegi izanen aldi horien batuketak aurreko lerroaldeetan xedatzen diren hamazazpi asteak baino gehiago izatea, edo haurraren desgaitasun kasuan edo aldi berean haur bat baino gehiago izatearen kasuan agindu dena baino gehiago.
Jaioteguna frogatzeko, Familia Liburua edo Erregistro Zibileko ziurtagiria aurkeztu beharko du funtzionarioak bere administrazio publikoko organo eskudunean.
d) Lizentzia ordaindua, adopzioagatik edo harreragatik.
Adopzioaren kasuan edo harrera bakun, iraunkor eta adoptatu aurrekoaren kasuan, lizentziak hamazazpi aste iraunen du, etenik gabe. Lizentzia hori bi astez luzatuko da, adoptaturiko edo harreran harturiko haurrak desgaitasunen bat badu, eta, ume baten baino gehiagoren adopzioan edo harreran, bigarrenetik aurrera ere bai.
Interesdunek erabakiko dute noiztik hasita kontatu epe hori, administrazioak edo epaileak harrera erabakitzen duenetik edo epaileak adopzioa ebazten duenetik. Adingabe berak ez du behin ere sortuko artikulu honetan arautzen diren lizentzietariko bat baino gehiago hartzeko eskubiderik.
Bai aitak eta bai amak lan egiten dutenean, lizentzia berek nahi duten bezala partituko da, aldi berean edo hurrenez hurren, betiere zati etengabeetan.
Nazioarteko adopzio edo harrera kasuetan, gurasoek adopzioan hartuko duten haurraren jatorrizko herrialdera joan beharra dutenean, aurreko lerroaldeetako kasu bakoitzerako aurreikusitako lizentzia lehenago hasten ahalko da, hain zuzen ere epaileak adopzioari buruzko ebazpena eman edo administrazioak edo epaileak harrerari buruz harturiko erabakia baino lau aste lehenagotik. Halaber, kasu horietan bi hilabete bitarteko baimenaz gozatzeko eskubidea izanen da, epe horretan oinarrizko lansariak bakarrik jasoz.
Bi gurasoek aldi berean hartzen badituzte atsedenaldiak, ez da zilegi izanen aldi horien batuketak aurreko lerroaldeetan xedatzen diren hamazazpi asteak baino gehiago izatea, edo haur baten baino gehiagoren adopzio edo harrera kasuan eta adoptaturiko edo harreran harturiko adingabearen desgaitasun kasuan agindu dena baino gehiago.
Adopzio edo harrera bakuna, iraunkorra eta adoptatu aurreko aldia, artikulu honetan aurreikusi direnak, aplikatzekoa den araudiaren araberakoak izanen dira. Harrera bakunak gutxienez ere urtebete iraunen du.
e) Erditze, adopzio eta harreraren ondoriozko lizentzia ordaindua lanaldi partzialean hartzea.
Erditze, adopzio edo harreraren ondoriozko lizentzia soldataduna, aurreko artikuluetan ezarri dena, lanaldi partzialez hartzen ahalko da, arau hauei jarraituz:
a.–Lizentzia lanaldi partzialez hartzeko, interesdunek aldez aurretik eskatu beharko dute eta organo eskudunak ebatzi. Ebazpen hori emateko, beharrezkoa izanen da, kasua bada, haien ordezkoak izatea.
b.–Lanaldi partziala hartzen bada, lanaldiaren herena edo erdia emanen da.
c.–Lizentzia hau, oro har, egunero hartuko da langileak ezarririk daukan lanaldiaren lehen eta/edo azken orduetan, zerbitzuaren beharren arabera.
d.–Txandaka ari diren langileen kasuan, lanaldi partziala lanaldi osoetan metatzen ahalko dute, zerbitzuaren beharren arabera.
Lizentzia lanaldi partzialez hartzeko aldia hura onartzeko ebazpenean zehaztuko da eta, etenik gabe, bukatu arte luzatuko da, deusetan galarazi gabe erditze kasuetarako hurrengo atalean xedatutakoa.
Bai amak bai aitak izanen dute lizentzia hau lanaldi partzialez hartzeko eskubidea eta atsedenaldia batera edo bata bestearen ondoren hartzeko edozein kasutan.
Erditze kasuan, amak ezin izanen du lizentzia modalitate hau erabili erditu ondoko sei asteko epean, horiek nahitaez atsedena hartzekoak baitira.
Lizentzia lanaldi partzialez hartzeko aldian, interesdunek behin ere ezin izanen dute aparteko ordurik edo bestelako zerbitzurik egin modalitate horretan bete behar duten lanalditik aparte.
Langileak, lizentzia hau lanaldi partzialez hartzen duen bitartean, ezin izanen ditu aldi berean eskubide hauek erabili:
a.–Baimen ordaindua gozatzea, hamabi hilabetetik beherako seme-alabei bularra emateko.
b.–Lanaldia murrizteko erregelamendu bidez ezarririko edozein kasu erabiltzea.
f) Lizentzia ordaindua, haurdunaldian edo berezko bularra emateko aldian arriskuak izateagatik.
Lanpostu baten baldintzek haurdun baten edo haren haurraren osasunari kalte egin diezaiokeenean, lizentzia ordaindua ematen ahalko zaio, haurdunaldian arriskuan egoteagatik, laneko arriskuei aurrea hartzeko araudian ezarririko baldintzetan.
Aurreko lerroaldean xedatzen dena berezko edoskitze aldian ere aplikatuko da.
7. artikulua. Norberaren aferetarako lizentzia ordaindugabeak.
Norberaren aferetarako ordaindu gabeko lizentziak ematen ahal zaizkie langileei. Horien iraupen metatua gehienez ere 6 hilabetekoa izanen da, bi urtetik.
Urritu fisikoak nahiz psikikoak beren kargura dituzten langileek eskubidea izanen dute urrituak adingabeak diren bitartean edo beste kasu berezi batzuetan behar duten denborarako kontratu etenaldia nahiz baimen ordaindugabeko bat izateko. Etenaldia edo lizentziaren denbora ez da kontuan hartuko ez antzinatasunerako, ezta beste edozein ondoriotarako ere. Etenaldia edo lizentzia amaituta, jatorrizko Administraziora itzultzeko eskubidea izanen dute eszedentzia berezietarako ezarritako baldintza beretan. Araudi horrek erregulatuko ditu atal honek aipatzen ez dituen egoerak.
8. artikulua. Eszedentziak.
a) Borondatezko eszedentzia.
Borondatezko eszedentzia deklaratzea, langile finko batek eskatuta, bidezkoa izanen da ondoko kasuetan:
a.–Administrazio publikoetako kidego edo maila bateko jardun egoerara pasatzeko edo, eskatzailea zein administraziotan ari den, hori ez beste administrazio baten menpekoak diren erakunde autonomo edota nortasun juridiko berezia duten entitateetara joateko. Gutxienez ere urte bateko iraupena izanen du.
Gainera, aurreko lanpostuan borondatezko eszedentzia eman dakieke Administrazio Publiko berean, talde berean edo beste batean, beste lanpostu batera aldatutako langile finkoei.
b.–Alderdi politikoetan, sindikatuetan edo erakunde profesionaletan zuzendaritza karguak betetzeko, baldin eta funtzio publikoan aritzearekin edo norbere Administrazioaren zerbitzuko lan-kontratudun finko gisa aritzearekin bateraezina bada.
c.–Langilearen interes partikularrengatik, jatorrizko lanpostua lehenbiziko urte eta erdiaz gordeta, zerbitzuaren beharrek horretarako bidea ematen badute eta interesdunak egiaztatzen baldin badu eskaera egin aurreko bi urtetan, gutxienez, jardunean edo horren antzeko lan egoera batean aritu dela.
Eszedentzia eskaeretan baloratuko da horiek eragin sakonik ba ote duten lan arloren batean; horiek ematea gehienez ere hilabetez atzeratuko da.
d.–Borondatezko eszedentzia denbora mugarik gabe ematen dela ulertuko da. Behar bezala justifikaturiko kasuetan izan ezik, borondatezko eszedentzian dauden langileek ezin izanen dute jardunera itzultzeko eskatu egoera horretan urtebete egin arte. Itzultzea erabaki ondoren, hilabeteko epean itzuli behar da. Hala egiten ez bada, langileak galdu eginen du langile izaera. Borondatezko eszedentzian dauden langileek lortutako gradua eta antzinatasuna gordeko dituzte, baina ez dute eskubide ekonomikorik sortuko eta ez zaie kontatuko, inongo ondorioetarako, egoera horretan eman duten denbora.
b) Eszedentzia berezia.
Langileek eskubidea dute hiru urteko eszedentzia hartzeko, gehienez, seme/alaba bakoitza zaintzeko, norberak izandakoa edo adoptatua izan, edo etxean hartua, bai modu iraunkorrean bai adoptatu aurreko harrera-fasean. Urte horiek haurra jaiotzen denetik edo, bestela, epaileen edo administrazioaren ebazpenaren egunetik aurrera kontatuko dira.
Eszedentziarako eskubidea izanen dute, halaber, adinagatik edo istripu edo eritasun baten ondorioz bere kasa bizitzeko gauza ez den eta lan ordaindurik egiten ez duen (hau da, jardunean ez dagoen) familiartekoren bat –bigarren mailara arteko odol edo ezkontza bidezko ahaidea– zaindu behar duten langileek. Gehienez ere hiru urtekoa izanen da.
Idatz-zati honetan ezartzen den eszedentzia langile bakoitzaren eskubidea da, norberarena, gizonezkoa izan edo emakumezkoa izan. Hala ere, pertsona bera zaintzeko eskubidea bi langilek edo gehiagok badute, Mankomunitateak aukera izanen du aldi berean erabili nahi den eskubidea mugatzeko, funtzionamenduarekin lotutako bidezko arrazoirik baldin badago.
Beste subjektu eragile batek beste eszedentzialdi bat izateko eskubidea sortzen duenean, hori hastearekin bukatuko da ordura artekoa, halakorik izanez gero.
Kasu guztietan, eszedentzia berezia emateko, langileak deklaratu beharko du bitartean ez duela beste jarduera profesionalik edo lanik eginen.
Eszedentzia berezian dauden langileek jatorrizko lanpostua gordetzeko eskubidea izanen dute, baina ez dute eskubide ekonomikorik sortuko. Dena den, antzinatasunaren ondorioetarako, egoera horretan ematen duten aldi osoa aintzat hartuko zaie. Halaber, langileak eskubidea izanen du lanbide prestakuntzako ikastaroetara joateko, Mankomunitateko buruak deituta, batez ere lanera itzultzekotan denean. Eskubide pasiboen ondorioetarako, Gizarte Segurantzaren Lege Orokorrean eta xedapen osagarrietan ezarritakoari jarraituko zaio.
9. artikulua. Lanaldiaren eta soldataren murrizketa.
1. Lanaldia murrizteko baimena emateko (lanaldiaren seiren bat, heren bat nahiz erdia, ordainsarietan dagokien murrizketa proportzionalarekin), ondoko arauei lotuko zaie:
a) Legezko zaintza dela-eta, langileek beren ardurapean 12 urtetik beherako haur bat badute edo legez onartutako desgaitasun fisiko, psikiko edo zentzumenetakoa duen pertsona bat, ordaindutako lanik egiten ez duena.
b) Enplegatuaren ezkontideak edo izatezko bikotekideak edo lehen mailako odol edo ezkontza bidezko ahaideren batek ezgaitasunen bat badu.
c) Langilea pertsona adinduekin edo eritasun kronikoren edo ezgaitasunen bat duen ahaideren batekin bizi bada (bigarren mailara arteko odol edo ezkontza bidezko ahaideak).
2. Lanaldi murriztua onar daiteke, halaber, zerbitzuaren beharrek bide ematen badute, ondoko kasu hauetan:
a) 50 urte edo gehiagoko langileak.
b) Lanerako aldi baterako ezintasuna edo ezintasun iraunkorra sor ez dezakeen eritasuna duten langileak, Lan Arriskuen Prebentziorako Zerbitzuak hari buruz emandako txostenarekin bat.
c) Legezko zaintza dela-eta, 12 eta 16 urte bitarteko adingabe bat beren kargura duten langileak.
d) Langilearen beraren interesagatik, betiere ez badu zailtasunik sortzen zerbitzuen jardunean. Lanaldia murrizteko kasu horretan eta izaten ahal diren luzapenetan ez da inolaz ere baimenduko emandako epea baino lehenago bukatzea, non ez duen langileak amatasunagatik ordaindutako baimena hasten edo ez zaion jardunaz besteko administrazio egoera bat onartzen.
3. Lanaldi murrizketa ematen zaien langileak denbora tarte horretan ezin izanen dira bestelako lanbide edo jarduera ordainduetan aritu.
4. Organo eskudunak ebatziko du lanaldi murrizketa, interesdunak eskatuta, eta harekin batera Familia Liburuaren edo eskaera arrazoitzen duen ziurtagiri ofizialen fotokopia konpultsatua aurkeztu beharko da.
5. Lanaldi murrizketa lau hilabeterako izanen da gutxienez, eskaera eragin duen arrazoia epe laburragoan bukatzen ez bada.
6. Oro har, lanaldi murrizketa egunerokoa izan beharko da eta langileak duen ordutegiaren hasierako edo bukaerako orduetan, zerbitzuaren beharrizanekin bat etorriz (legezko zaintza-dela eta, ordutegi hori aldatzen ahalko da). 7. Lanaldi murrizketak berekin dakar langilearen ordainsari guztien murrizketa proportzionala egitea, familia-laguntzarena salbu.
8. Era berean, kotizazio sozialak eta dagozkien deskontuak lanaldi murriztuari dagozkion ordainsarien arabera kalkulatuko dira.
9. Lanaldia murrizteko epea bukatu baino hilabete lehenago luzapena eskatzen ahal da, betiere, murrizketa emateko inguruabarrek badiraute.
Lanaldiaren gainerako denbora beste kontratazio batez ordeztuko da, egoerak dirauen bitartean.
10. artikulua. Genero indarkeriako biktimak.
Genero indarkeriako biktima den langileak eskubidea izanen du bere lanaldia murrizteko edo berrantolatzeko, lanpostua gorderik lan harremana eteteko eta lan kontratua amaitzeko, Langileen Estatutuan ezarri bezala.
Genero indarkeriatik ondorioztatutako egoera fisikoak edo psikologikoak direla-eta lanera ez joatea edo berandu heltzea justifikatutzat joko dira, laguntzarako gizarte zerbitzuek edo osasun zerbitzuek (egokia denaren arabera) hori zehazten dutenean, nahiz eta langileak horien berri eman beharko dion enpresari, ahal bezain laster.
Eskubide horiek onartzea dakarren indarkeria egoera biktimaren aldeko babes aginduaren bidez egiaztatuko da.
Genero indarkeriako biktimek eszedentzia berezia izanen dute, gehienez ere 18 hilabetez. Lehendabizko sei hilabeteetan eskubidea izanen dute betetzen zuten lanpostura erreserbatzeko, eta lehen bi hilabeteetako ordainsari osoak jasotzeko eskubidearekin.
11. artikulua. Aseguruak.
1. Leitza, Goizueta, Areso eta Aranoko Gizarte Zerbitzuen Mankomunitateko funtzionarioentzat, administrazio-kontratudunentzat, lan-kontratudun finkoentzat eta aldi baterako lan-kontratudunentzat istripu aseguruko poliza kolektibo bat hitzartuko da lanorduetan edo “in itinere” gerta daitezkeen istripuetarako, heriotza kasurako 30.000 euroko estaldura izanen duena eta 60.000 eurokoa, aldiz, erabateko ezintasun iraunkor, oso edo partzialerako, baremoaren arabera. Polizaren baldintzen eta estalduraren kopia gaurkotua emanen zaie ordezkari sindikalei. Langile finkoak zein aldi baterakoak barne hartuko ditu.
2. Leitza, Goizueta, Areso eta Aranoko Gizarte Zerbitzuen Mankomunitateak erantzukizun zibileko aseguru gaurkotua kontratatuko du, funtzionarioek, administrazio-kontratudunek, lan-kontratudun finkoek eta aldi baterako lan-kontratudunek beren eginkizunen jardunean egin ditzaketen kalteetarako, are delitu nahiz edozein modutako hutsegite deklaratutako egintzen ondoriozkoak badira.
12. artikulua. Osasun azterketa eta osasun prestazioak.
Osasun azterketa eginen da urtero, norberaren borondatez, langile guztientzat. Azterketa horrek honako hauek hartuko ditu barnean: ergonomia, arazo psikosozialak, hezur eta muskuluetako arazoak eta betetzen diren lanpostuekin zerikusia duten beste batzuk, baita tetanosaren, gripearen eta hepatitisaren aurkako txertoak ere. Batzorde Paritarioak erabakiko du norekin kontratatu osasuna zaintzeko zerbitzua eta prebentziorako zerbitzua.
13. artikulua. Prestakuntza ikastaroak.
Prestakuntza ikastaroak egiteko proposamenak idatziz aurkeztuko dira, eta Mankomunitateko buruak eman beharko du horietara joateko baimena. Lan taldearekin adostuko da prestakuntza ikastarora joateko proposamena.
Lanaldi oso duen Langile bakoitzak, urteko 30 ordu izango ditu ikastaroak egiteko. Lanaldi partziala edo murrizketa duten langileek dagozkien ordu proportzionalak izanen dituzte. Beti ere, entitate ofizilek antolatutako eta lanpostuarekin harreman zuzena dituzten ikastaroak izanen dira.
Ordezkatu behar diren langileei lan orduetan ikastaroak egiteko baimena emanen zaie, baina, urtero gehienez bi langilek izanen dute eskubide hori.
Mankomunitateak ikastaroak egiteko 1000 euroko partida bermatuko du aurrekontuetan, beti ere, mankomunitatearen ahalmenaren arabera.
14. artikulua. Baja istripuagatik edo eritasunagatik.
Edozein gertakizunek ekarritako aldi baterako ezintasun egoeran dauden langileek jaso behar dituzten sariak osatuko ditu Mankomunitateak, jaso beharreko benetako soldataren %100 kobratu arte.
15. artikulua. Lan osasuna.
1. Laneko arriskuak galarazteko araudia benetan aplikatzea bultzatuko da, arreta honako alderdi hauetan jarriz bereziki:
a) Arriskuen ebaluazioa.
Arriskuen hasierako ebaluazioa eginen da, lanpostuz lanpostu, onetsitako prozeduren eta finkatutako lehentasun hurrenkeraren arabera. Arriskuak ebaluatu eta emaitzak ikusirik, prebentzio jardueraren plangintza eginen da, neurri zuzentzaileak hartuz, baita prestakuntzakoak eta jarraipen edo kontrolekoak ere, detektatzen diren arrisku egoeren aurrean, Administrazio bakoitzeko arduradunek beren gain hartu beharreko planaren edo programaren barnean.
Prebentzio jardueren plangintza behar bezala egite aldera, Administrazioak behar diren giza baliabideak eta baliabide materialak jarri eta diru baliabideak esleituko ditu.
b) Laneko arriskuen prebentziorako lan prozedurak.
Laneko arriskuen prebentzioaren arloan, lan prozedurak ezarri eta eguneratuko dira, arreta honako hauetan jarriz bereziki:
–Kontratak eta azpikontratak.
–Ondasunak eskuratu edo erostea.
–Osasuna zaintzea.
–Laneko istripuak eta lanbide eritasunak.
–Larrialdietarako neurriak eta planak.
–Prestakuntza eta informazioa.
–Haurdunaldiak.
–Laneko jazarpena eta sexu jazarpena.
–Arrisku psikosozialak eta ergonomikoak.
c) Langileen osasuna zaintzea eta kontrolatzea.
Langileei aldian-aldian mediku azterketa eginen zaie, lanpostu bakoitzean izaten ahal diren arriskuen arabera.
d) Larrialdietarako planak edo neurriak.
Administrazioko lantoki guztietan larrialdietarako planak edo neurriak idatzi eta betearaziko dira, eta behar den tokietan simulazioak eginen dira aldian-aldian.
e) Langileentzako prestakuntza eta informazioa.
Langileentzako prestakuntza eta informazioa bultzatuko dira, prestakuntza teoriko eta praktikoa jaso dezaten, nahikoa eta egokia, beren lanpostuan atzemandako arrisku faktoreak kontrolatzeko hartu beharreko babes eta prebentzioko neurriei buruz.
Prestakuntza emanen da, administrazioan sartzean lehenbizikoz eta aldian-aldian lan baldintzak aldatzen badira ekipo berriak erosi edo teknologia berriak ezarri direlako, eta lanpostuarekin zerikusia duten alderdi guztiak ukituko dira.
f) Segurtasun eta osasun batzordeak.
Laneko segurtasun eta osasun batzordea sortuko da, eta urtean behin eta beharren arabera, makomunitateko ordezkariek edo langileek eskatuta bilduko da.
Segurtasun arroparen edo norbera babesteko ekipamendu besterenezinen (NBE) burtsa bat sortuko da, Mankomunitateko langile guztiei bermatuko diena esleitzen zaizkien lanak egiteko behar dituzten babes elementuak izanen direla. Elementu horiek nahitaez erabili beharko dira.
g) Xedeko langile guztiek nahitaez egin beharko dituzte Mankomunitateak prebentzio zerbitzuarekin kontratatutako ikastaroak.
16. artikulua. Aparteko orduak.
Langileen ordezkariek eta Leitza, Goizueta, Areso eta Aranoko Gizarte Zerbitzuen Mankomunitateak konpromisoa hartzen dute aparteko orduak gutxitzeko. Helburua aparteko ordurik ez egitea da.
Aparteko orduak salbuespenez eginen dira, kasu hauetakoren batean:
a) Ezinbesteko kasua, hau da, hondamenei edo beste kalte ez ohiko eta presako batzuei aurrea hartu behar zaienean edo konpondu behar direnean.
b) Aurrez behar den denboraz ikusi ezin diren arrazoiak direla medio ezinbestekoa denean lanaldi arrunta luzatzea Administrazioaren ohiko jarduera segurtatzeko. Frogatu beharko da, nolanahi ere, ezin dela lan soberakina langile berrien bidez burutu, honako arrazoietako batengatik:
–Lanaldiaren laburrak berak eragozten duelako kontratazio berria egitea.
–Berez ezin delako kontratazio berririk egin, behar den denboran.
–Enplegu zerbitzu publikoen laguntza eskatuta, Administrazioari kasuko lanposturako behar den kualifikazioa duten langilerik bidali ez diotelako.
–Aipatu diren salbuespenezko egoeretan egiten diren aparteko orduak atseden denborarekin konpentsatuko dira, gaur egun erregelamenduz ezarritako iraupenarekin bat, edo diruarekin, gaur egun horretarako dauden ordainsariak kontuan harturik.
–Aparteko orduen konpentsazioa hau izanen da: 1,45 ordu lanegunean egindako aparteko ordu bakoitzeko, eta 2 ordu jaiegunean egindako aparteko ordu bakoitzeko.
17. artikulua. Ordainsariak.
1. Maila, lanpostu eta bestelako osagarriak:
LANPOSTU ZENBAKIA | LANPOSTUA | OSAGARRIAK | ||
Lanpostu | Maila osagarria | Bestelakoak | ||
1 | Gizarte-Langilea | %34.73 +% 8.62 | ||
2 | Famili-langilea | %9.35 + %2.21 | %12 | |
3 | Drogamenpeko Prebentzio Teknikaria | %8.52 + % 4.71 | %12 | |
4 | Administrari laguntzailea | %8.35 + %2.20 | %12 | |
5 | Famili-langilea | %8.35 + %2.41 | %12 | |
6 | Famili-langilea | %8.35 + %2.41 | %12 | |
7 | Famili-langilea | %8.35 + %1.12 | %12 | |
8 | Gizarte-langilea | %34.73 +% 7.47 | ||
9 | Famili-langilea | %8.35 + %4.07 | %12 | %15 (garbiketa) |
10 | Famili-langilea | %8.35 + %1.07 | %12 | |
11 | Familiekin eskuhartze programako Teknikaria | %8.52 + %4.86 | %12 | |
12 | Gizarteratzeko Programako Teknikaria | %8.52 + %4.71 | %12 | |
Familia-laguntza, Administrazio Publiko langileentzat finkatutako bera izanen da. 2013rako urteko 405,44 euro izanen da seme edo alaba bakoitzeko, eta 2.027,48 euro desgaitasuna duen seme edo alaba bakoitzeko.
2. Antzinatasuna.
Langileek eta aldi baterako langileek osagarri bat kobratuko dute antzinatasunagatik, Administrazio Publiko bakoitzean eman duten denbora osoagatik, bai kontratudun finko gisa, bai aldi baterako langile gisa. Hirurteko, bosturteko edo gradu bakoitzeko saria Nafarroako Gobernuak bere langileentzat ezartzen duen bera izanen da.
Administrazio bakoitzean sartuz geroztik egindako zerbitzuen arabera kontatuko da antzinatasuna.
Langileen antzinatasun denbora gisa zenbatuko da, aurreko atalean xedatutakoarekin bat etorriz, dagokion Administrazioan sartu aurretik beste edozein administrazio publikotan emandako denbora.
Alde batek eskaturik, antzinatasuna betetzen den egunetik ordainduko da atzeraeraginezko izaerarekin.
18. artikulua. Jantzi eta ekipamendu pertsonalak.
1. Etxez etxeko laguntza zerbitzuko langile finkoek eta aldi baterakoek beren eginkizunetarako egoki diren jantziak eta materiala izanen dituzte.
Arropa eta oinetako guztiak berdinak izango dira, norberaren jantzi pertsonala izan arren etxez etxeko profesionalek jantziko dituztelako.
Urtero honako materiala jasoko dute famili langileek:
–2 bata.
–Poltsa bat behar den materiala eramateko: eskularruak, pedikura eta manikurarako materiala, etab.
–Faja (medikuaren txostenarekin).
–Oinetako pare bat.
19. artikulua. Kilometrajea.
Nafarroako Gobernuak onartzen duena ordainduko da.
20. artikulua. Eskubide sindikalak.
1. Indarrean den hitzarmen honen aplikazio eremuko langileek eskubidea dute euren enplegu baldintzak zehazten parte hartzeko, legean finkatu bezala, euren ordezkaritza organoen bitartez.
2. Langileen ordezkariek, akordio honen aplikazio eremuan sartuta badaude, hogei orduko kreditua dute hilabetean. Ordu kreditu hori bi hilabetean kontabilizatuko da.
3. Langileen legezko ordezkariek Legean aurreikusitako bermeak izanen dituzte.
4. Ordu sindikalak: Langileen batzordeko kideek euren sindikatu orduak erabiltzen ahal dituzte lantokitik alde eginez, euren sindikatu jarduerengatik egoki jotzen dutenean, eta beti ere zerbitzuaren beharrak bermatuta.
5. Langileen Batzordeak gutxienez ere kide bat izanen du langileak eta funtzionarioak hautatzeko prozesuetan, lekualdatze lehiaketetan, mailaz igotzekoetan eta aldi baterako hautatzeko probetan. Lan-kontratudun eta funtzionarioentzako lanpostuak betetzeko epaimahaia osatuko du.
21. artikulua. Biltzeko eskubidea.
1. Leitza, Goizueta, Areso eta Aranoko Gizarte Zerbitzuen Mankomunitateko langileek Batzarrean biltzeko eskubidea dute, Mankomunitatearen beraren lokaletan eta euren lanarekin loturiko gaietarako. Horretarako, hilabetean gehienez ere lau ordu ordainduak eta metatu ezin direnak izanen dituzte.
2. Batzarrak lanaldiaren hasieran edo bukaeran egin beharko dira. Salbuespenez, batzarrak lanaldiaren beste tarte batean egiten ahal dira, horrela kalte gutxiago egiten bazaio zerbitzuen ohiko funtzionamenduari.
Deialdia langileen ordezkariek edo langileen %33k baino gehiagok eskatuta egin beharko da. Deialdian eguneko aztergaiak eta batzarrerako eguna eta ordua jarri beharko dira.
Langileen ordezkariek deialdiarekin batera jakinaraziko dute enpresa kanpotik joanen direnen kopurua eta enpresak deialdia jaso izana adierazi beharko du.
Langileen ordezkariek batzarra bukatu bezain laster, Leitza, Goizueta, Areso eta Aranoko Gizarte Zerbitzuen Mankomunitateari buruz hartutako erabakiak jakinaraziko dizkiote Mankomunitateko Batzarrari.
3. Mankomunitateko Lehendakariak eman beharko du baimena batzarrak egiteko.
4. Nahitaez emanen da baimena, aipatu diren baldintzak betetzen badira. Salbuespenezko kasuetan izan ezik, batzarra egiteko baimena gutxienez ere berrogeita zortzi ordu lehenago eskatu beharko da. Kontrakorik esaten ez bada, baimena emantzat joko da. Baimena, beranduenez, batzarra egin baino hogeita lau ordu lehenago jakinarazi beharko da.
22. artikulua. Aurrerakinak.
1. Leitza, Goizueta, Areso eta Aranoko Gizarte Zerbitzuen Mankomunitateko langile guztiek aurrerakin arruntak eskuratzen ahalko dituzte.
Aurrerakin arruntak: lansariaren aurrerakinak izanen dira eta hilabetean behin emanen dira, eskatzeko unera arte sorrarazitako egunen kargura. Aurrerakina dagokion hilabeteko nominatik deskontatuko da.
23. artikulua. Batzorde Misto Paritarioa.
Hitzarmen hau eta haren xedapen gehigarriak aplikatzean sortzen ahal diren zalantzak eta klausulak interpretatzeko asmoz, deusetan galarazi gabe lan agintaritzari aitortutako ahalmenak, hitzarmena interpretatu eta jarraipena egiteko batzorde misto paritario bat sortzen da, hitzarmena aplikatu eta interpretatzeari buruz sortzen diren auzi guztiez arduratzeko.
Erreklamazioa edo eskea aurkeztu eta hilabeteko epean batzorde misto paritarioan ez bada akordiorik lortzen edo proposatzen zaizkion gaiei buruz erantzuten ez badu, alderdiek lan arloko epaitegira jotzen ahalko dute beren auziak auzibidetik kanpo ebazteko. Nolanahi ere, bazter uzten da, oro har, nahitaezko arbitrajea.
Batzorde misto paritarioa honako hauek osatuko dute: enpresaburuen elkarteko kide batek eta langileen aldetik beste kide batek, hitzarmena negoziatu duten sindikatuen ordezkari gisa. Bi alderdiek aholkulariak eramaten ahal dituzte.
Batzordearen irizpenak bi ordezkaritzaren baterako erabaki bidez hartuko dira, alde bakoitzean gehiengoak erabakita, eta erabaki horiek hitzarmen honetako eta haren xedapen gehigarrietako estipulazioen ondorio berberak izanen dituzte.
Batzorde misto paritarioen helbidea hau da: Elbarren 1, 31880 Leitza (Nafarroa). Batzorde misto paritarioak, halaber, hitzarmen kolektibo honetan eta haren xedapen gehigarrietan ematen zaizkion ahalmenak izanen ditu.
24. artikulua. Euskara batzordea.
1. Jarraipen batzorde bat eratuko da mankomunitateak onartutako euskararen erabileraren inguruko irizpideak betetzen direla zaintzeko. Batzorde hori lehendakariak, Mankomunitateko langileen ordezkari batek eta euskara teknikariak osatuko dute.
25. artikulua. Hitzarmen honetan hitzartutako lan baldintzak ez aplikatzeko klausula.
Hitzarmena aldatzeko edo ez aplikatzeko, sindikatuen ordezkariekin akordio bat lortu beharko da. Beraz, enpresak hitzarmen honen ez-aplikatzea erabili nahi badu Langileen Estatutuen 82.3 artikuluko prozedurari jarraikiz, lehenik kontsultaldi bati hasiera emanen dio, langileen ordezkariekin akordio bat lortzen saiatzeko. Akordio bat lortu ezean, hitzarmenaren batzorde paritarioaren irizpenari jarraituko zaio. Batzordeak zazpi eguneko epean hartu beharko du erabakia. Horretan ere akordiorik ez badago, Nafarroako Lan Auzitegiak berezkoak dituen prozeduren menpe jarriko dira, ondoko lerroaldeetan ezartzen den moduan.
Bi alderdiek espresuki erabaki dute desadostasunak konpontzeko aginduko duten prozesuak Nafarroako Lan Auzitegiko akordioaren adiskidetze eta bitartekotzakoak izanen direla, betiere. Arbitraje prozedura aplikatuko da soilik berari men egiteko bi alderdien arteko akordioa badago.
Orobat, gaia Aholku Batzorde Nazionalaren edo Autonomikoaren menpe jartzeko, alderdiek horixe erabaki beharko dute.
Junkal Otxotorena | Edurne Lamuedra |
Juana Mari Saizar | Ur Alguero |
Josune Marzol | Irati Barandiaran |
Iragarkiaren kodea: F1412049
Sarbidea
Nafarroako Aldizkari Ofiziala
Paseo Pablo Sarasate, 38, 2.º izda.
31001 - Iruña
848 42 12 50
