Iragarkia

141. ALDIZKARIA - 2014ko uztailaren 21a

1. NAFARROAKO FORU KOMUNITATEA

1.5. ESTATUTUAK ETA LAN HITZARMEN KOLEKTIBOAK

EBAZPENA, 2014ko ekainaren 17koa, Arriskuen Prebentziorako eta Lanaren zuzendari nagusiak emana, Zubiriko “Magnesitas Navarras, S.A.” entitatearen hitzarmen kolektiboa erregistratu, gorde eta Nafarroako Aldizkari Ofizialean argitaratzea erabakitzen duena.

Zubiriko Magnesitas Navarra, S.A. entitatearen hitzarmen kolektiboaren testua (kode zenbakia: 31004832011998) aztertu da, Erregistro honetan 2014ko otsailaren 17an sartu zena eta enpresaren ordezkariek eta sindikatuen ordezkariek 2013ko abenduaren 18an izenpetu eta 2014ko ekainaren 16an zuzendu zutena, Langileen Estatutuari buruzko Legearen testu bategina onetsi zuen martxoaren 24ko 1/1995 Legegintzako Errege Dekretuaren 90. artikuluaren 2. eta 3. idatz-zatietan eta Hitzarmen Kolektiboen eta Akordioen Erregistro eta Gordailuei buruzko maiatzaren 28ko 713/2010 Errege Dekretuan ezarritakoaren arabera. Horrenbestez,

EBATZI DUT:

1. Nafarroako Lan Hitzarmen eta Akordio Kolektiboen Erregistroan inskribatzeko agintzea.

2. Ebazpen hau Negoziazio Batzordeari jakinaraztea, eta adieraztea ebazpenak ez duela administrazio bidea amaitzen eta haren aurka gora jotzeko errekurtsoa jartzen ahal dela, Ekonomia, Ogasun, Industria eta Enpleguko kontseilariari zuzendua, jakinarazi eta biharamunetik hilabeteko epean.

3. Nafarroako Aldizkari Ofizialean argitaratzeko agintzea, denek jakin dezaten.

Iruñean, 2014ko ekainaren 17an.–Arriskuen Prebentziorako eta Lanaren zuzendari nagusia, Imelda Lorea Echavarren.

MAGNESITAS NAVARRAS, S.A. ENPRESAREN HITZARMENA
2013., 2014. ETA 2015. URTEETARAKO

XEDAPEN OROKORRAK

Lurralde eremua eta langile-eremua

Lan hitzarmen hau enpresaren lantokietan lan egiten duten langile guztiei aplikatuko zaie, eranskineko ordainsarien tauletan ageri diren kategorietako batean badaude.

Indarraldia

Hitzarmena hiru urterako izanen da: 2013, 2014 eta 2015.

Hitzarmena salatzea eta indarraldia luzatzea

Hitzarmen hau bere indarraldia bukatzean salatuko da, hau da, 2015eko abenduaren 31n. Hala ere, eta beste hitzarmen kolektibo bat sinatzen ez den arte, haren baldintza eta klausulak luzatzea erabaki dute alderdiek.

Hitzarmena ez aplikatzeko prozedurari uko egitea

Enpresak ezin izanen dio heldu hitzarmen hau ez aplikatzeari Langileen Estatutuaren 82.3 artikuluko prozeduraren bidez. Mugaegunera iritsi baino lehen, hura berriz negoziatzen saiatu beharko du beste bat lortzeko edo, Langileen Estatutuaren 86.1 artikuluak hura berrikusteko aurreikusten duen aukera baliatu beharko du.

Bi alderdiek espresuki erabaki dute Nafarroako Lan Auzitegiko lanbide arteko akordioaren adiskidetze eta bitartekotzakoak izatea beti desadostasunak konpontzeko prozesuak. Erakunde horretan adiskidetze eta bitartekotza bideak agortutakoan bakarrik aplikatuko da arbitraje prozedura.

Konpentsazioa eta irenspena

Hitzarmen honen baldintzak, oro har, legeak ezarritako gutxienekoak baino hobeak dira. Beraz, irentsi eta konpentsatuko dituzte hitzarmenaren indarraldian aginduzko xedapenen bidez ezar daitezkeen bestelako baldintzak, zeinek eraginkortasun praktikoa izan baitezakete baldin eta orokorrean, urteko konputuan, hitzarmenaren maila osoa baino hobeak badira.

Hitzarmen honetan itundutako baldintzak, denak batera hartuta, gaur egun edo lehenagotik indarrean dauden hobekuntza itunduekin konpentsatzen ahal dira, horiek alde bakarrak eman dituelako, edo legearen nahiz epailearen aginduz, administrazioarekiko prozeduraz, edozein motatako itun, barne araubideko erregelamendu edo beste edozein arrazoiren ondorioz.

“Ad personam” bermea

Bakoitzari errespetatuko zaizkio orain arte izandako baldintzak, orokorrean eta urteko konputuan, hitzarmen honetan finkatutakoak baino hobeak direnean, eta horiek “ad personam” mantenduko dira.

Osotasunarekiko lotura

Hitzarmen honetan itundutako baldintzek multzo organiko eta zatiezina osatzen dute eta, praktikan aplikatzerakoan, osotasunean eta urteko konputuan hartuko dira. Hitzarmen honetako alderdiren bat erabaki judizialaren edo administratiboaren ondorioz aldatu edo indargabetzen bada edo onesten ez bada, oso-osoan deuseztatu eta indargabetuko da, eta bi aldeek berriro negoziatu beharko dute hitzarmena.

Ordezko arauak

Hitzarmen honek arautzen ez duen orotan, Langileen Estatutuan, Laneko Arriskuen Prebentzioari buruzko Legean eta indarra duten lan arloko arauetan xedatutakoa aplikatuko da.

Lanaldia, atsedenaldi, opor eta lizentzien araubidea

Lanaldia.

Hitzarmenaren indarraldiko urte guztietan, benetan lan egin beharreko orduak 1.708 izanen dira, ezartzen diren ordutegien eta egutegien arabera. Urteko ordu kopuru horretan lanaldiko ogitartekorako denbora eta lizentziei buruzko artikuluan aipatzen den baimen eguna sartuta daude. Eguneko lanaldiaren bukaeran, 10 minutuko tarte ordaindua izanen da garbiketarako, betiere lanpostuko txandaren aldaketa bermatzen bada zuzendaritzak estrategikotzat jotzen dituen lanpostu eta tokietan. Ikus Zuzendaritzaren eranskina.

Aurrekoa galarazi gabe, ogitartekorako atsedenaldia hartzen ez den ataletan, zerbitzuak ematen jarraitzen delako, urte osoan metatzen da ogitartekorako denbora (ordu laurdena egunean), eta guztira 56 ordu sortzen dira; horiek urteko 1.708 orduko lanaldiari kenduta (horietan bai bada ogitartekorako atsedenaldia) urtean 1.652 orduko lanaldi berezia ateratzen da, ogitartekorako atsedenaldirik gabe.

Alde horretatik, urtean 40 ordu arteko poltsa bat sortzeko ahalmena aitortzen zaio enpresari, hitzarmenaren indarraldiko urte bakoitzeko, lanaldia luzatuz edo lanaldi osoen bidez erabiltzeko.

Enpresak konpromisoa hartzen du atal bakoitzeko egutegiak argitaratzeko ekitaldi bakoitzeko urtarrilaren 1ean.

Horrela, urteko lan egutegia prestatzean, enpresak benetako lanordu finkoen kopurua zehaztuko du, baita atal bakoitzeko ordu-poltsan guztira sartu beharreko orduen kopurua ere; betiere, urtean 40 orduko muga gainditu gabe.

Enpresak ordu-poltsa hori erabiltzen ahalko du baldintza hauei jarraituz:

–Ondoren aipatzen diren arrazoiak gertatzen direnean erabiltzen ahalko da ordu-poltsa, eta enpresak kasu bakoitzerako ezarritako gutxieneko epean eman beharko dio ordu-poltsa horren erabilerari buruzko abisua langileari:

• Eskaerak metatzeagatik produkzioa handitu delako. Kasu horretan, 48 ordu lehenago, gutxienez ere, emanen zaio abisua langileari, zerbitzuak ematen hasi aurretik.
• Produkzio geldialdia programatu delako. Kasu horretan, 7 egun lehenago, gutxienez ere, emanen zaio abisua langileari, zerbitzuak ematen hasi aurretik.
• Aldi baterako ezintasunagatik, istripuengatik edo baimen ordaindua hartzeagatik langileak ordezteko. Kasu horretan, 48 ordu lehenago, gutxienez ere, emanen zaio abisua langileari, zerbitzuak ematen hasi aurretik.

–Lanaldia luzatuz edo lanaldi osoak eginez erabiltzen ahalko da ordu-poltsa.

• Ordu-poltsa lanaldia luzatuz aplikatuz gero, gutxienez ere 2 ordu luzatuko da, eta 4 gehienez ere.
• Kasu horietan, langileak bere kontura eginen ditu bere ohiko bizilekuaren eta lantokiaren arteko joan-etorriak, eta enpresak konpentsatuko du kilometrajea ordainduta, enpresaren politikan horretarako ezarritakoaren arabera; orobat, bazkarien gastua, lanaldi zatituan arituz gero.
• Ordu-poltsa lanaldi osoetan aplikatzeko, 8 ordu sartuko dira egunean astelehenetik igandera arte, jaiegunak kanpo, muga hauekin:
• Ordu-poltsaren aplikazioa larunbateko edo igandeko lanaldi osoetan eginez gero, langile bakoitzak era horretako lanaldi bat, gehienez ere, egiten ahalko du sei hilean behin.
• Ordu-poltsaren aplikazioa gaueko lanaldi osoetan eginez gero, langile bakoitzak era horretako hiru lanaldi, gehienez ere, egiten ahalko du hiru hilean behin.

Ordu-poltsaren sistema hau ahalik eta gardenena izan dadin, jendaurreko koadrante bat ezarriko da eta, bertan, langile bakoitzeko, (i) poltsatik guztira egindako ordu kopurua, (ii) poltsan egiteko gelditzen diren ordu kopurua eta (iii) plantillan ordu-poltsa hori erabiltzeko ezartzen den txandakako sistemaren ordena agertuko dira.

Ekonomia ekitaldi bakoitzaren bukaeran, langile bakoitzaren ordu-kreditua (poltsatik egin gabeko orduak) zeroan jarriko da.

Artikulu honetan araututako ordu-poltsa aplikatuz egiten diren lanorduak konpentsatu eginen zaizkie haiek sartzen dituzten langileei haien orduko oinarrizko soldataren %15eko “malgutasun-osagarri” batekin.

Alde horretatik, sartzen diren lanorduak ordu-poltsakoak badira eta gauaz egindakoak, espres aurreikusi da malgutasun-osagarria ordaintzeak ez duela berez gaueko plusaren ordainketa galaraziko, hala badagokio hitzarmen kolektiboan aurreikusitakoari jarraituz.

Modu berean, ordu-poltsa larunbateko edo igandeko lanaldi osoetan aplikatzen denean, malgutasun-osagarria ordaintzeak ez du berez galaraziko igandeko plusaren edo larunbateko plusaren ordainketa, hala badagokio hitzarmen kolektiboan aurreikusitakoari jarraituz.

Egutegiak.

Atal bakoitzerako ezarriko dira egutegiak, aurreikusitako lanen programazioaren arabera, eta hitzarmenaren indarraldiko urte bakoitzerako lanaldiak honako hauek izanen dira, gehienez ere:

–Sink-float: 220 egun.

–Mantentze-lana: 220 egun.

–Ibilgailuen parkea: 218 egun.

–Labeak-briketak: 218 egun.

–Harrobia: 218 egun.

–Espedizioak: 220 egun.

–Laborategia: 220 egun.

–Masa-planta: 220 egun.

Teknikari eta administrariak, behin betiko epai judizialaren arabera.

Kopia bat bidaliko zaio Enpresa Batzordeari.

Ordutegia eta lan txandak.

–Zuzendaritzako, Administrazio departamentuko eta Merkataritza departamentuko langileria: 08:00etatik 17:00ak arteko lanaldia (ordubeteko geldialdia bazkaltzeko). Ordutegia 07:00 – 15:00 dutenei “Ad Personam” baldintzak errespetatuko zaizkie. Ogitarterako denbora (ordu laurden eguneko) urtero metatuko da. Hitzarmenaren indarraldi osoan, benetan lan egin beharreko orduak 1.652 izanen dira urtean. Administrazioko langileentzat etengabeko lanaldia ezartzen da, 08:00etatik 17:00ak arte, egutegian udako lanaldi murriztuko egunetarako. Bazkaltzeko orduan ez dute geldialdirik eginen, eta haien ordutegia 08:00etatik 15:00ak arte izanen da.

–Teknikariak eta administrariak: 07:00etatik 15:00ak arte, astelehenetik ostiralera. Ogitarterako denbora (ordu laurden bat eguneko) urtero metatuko da. Hitzarmenaren indarraldi osoan, benetan lan egin beharreko orduak 1.652 izanen dira urtean.

–Harrobiko langileak: astelehenetik ostiralera, txandaka, 06:00etatik 14:00ak arte, 14:00etatik 22:00ak arte eta 22:00etatik 06:00ak arte. Ogitarterako denbora (ordu laurden bat eguneko) urtero metatuko da. Egutegian ez dira lanegun izanen abenduaren 24ko eta 31ko arratsaldeak. Hitzarmenaren indarraldi osoan, benetan lan egin beharreko orduak 1.652 izanen dira urtean.

–Mantentze-laneko langileak: astelehenetik ostiralera, txandaka, 06:00etatik 14:00ak arte, 14:00etatik 22:00ak arte eta 22:00etatik 06:00ak arte. 9:00etan ordu laurden geldituko dira ogitartekoa jateko. Arratsaldez edo gauez lan egiten dutenean, 14:00etatik 22:00ak arte edo 22:00etatik 6:00ak arte, ordu erdi dute ogitartekoa jateko. Hiru txandatan lan egiten duten atal honetako langileek ordu erdia izanen dute ogitartekorako. Hitzarmenaren indarraldi osoan, benetan lan egin beharreko orduak 1.708 izanen dira urtean.

–Espedizioetako eta masa-plantako langileak: astelehenetik ostiralera, txandaka, 06:00etatik 14:00ak arte, 14:00etatik 22:00ak arte eta 22:00etatik 06:00ak arte. Ordu erdi dute ogitartekoa jateko. Hitzarmenaren indarraldi osoan, benetan lan egin beharreko orduak 1.708 izanen dira urtean.

–Sink-Floateko langileak: astelehenetik larunbatera 06:00etatik 14:00arte, 14:00etatik 22:00ak arte eta 22:00etatik 06:00ak arte. Ordu erdi dute ogitartekoa jateko. Hitzarmenaren indarraldi osoan, benetan lan egin beharreko orduak 1.708 izanen dira urtean.

–Txanda jarraituko langileak: labeak, briketak, ibilgailuen parkea, tailer elektrikoa. Hiru txanda: 06:00etatik 14:00ak arte, 14:00etatik 22:00ak arte eta 22:00etatik 06:00ak arte. Ordu erdi dute ogitartekoa jateko. Hitzarmenaren indarraldi osoan, benetan lan egin beharreko orduak 1.708 izanen dira urtean.

–Analistak: (laborategia), astelehenetik ostiralera, txandaka, 07:00etatik 14:00ak arte, 14:00etatik 22:00ak arte eta 22:00etatik 6:00ak arte. 35 ordu astean. Urtean benetan lan egin beharreko 1.708 orduko ohiko lanaldia larunbat eta igandeetan osatuko dute hitzarmenaren indarraldi osoan. Ogitarterako denbora (ordu laurden bat egunero) urtero metatuko da. Horrekin, urteko lanaldia murriztuko da, benetan lan egin beharreko orduak 1.652 izanen baitira, hitzarmenaren indarraldi osoan.

Lana goizeko, arratsaldeko eta gaueko txandetan antolatuko da, oro har, produkzioan eta produkzioari lotutako eginkizunetan ari diren langileentzat. Gaur egungo lan txandetako edozeinetan daudenak beste erregimen batera pasatzen badira, ez dute lortuko aurreko erregimenera itzuli ezina dakarren baldintza onuragarriagorik (adib. hiru txandatako erregimenetik bi txandatako erregimenera pasatzen direnek ez dute lortuko baldintza onuragarriagorik, alegia, hiru txandatako erregimenera itzultzeko ezintasunik).

Oporrak.

Plantillako langile guztiek, hitzarmenaren indarraldian, 27 laneguneko oporrak izanen dituzte.

Oporrak gehienez ere 4 alditan hartuko dira, eta nolanahi ere urteko ordu kopurua kontuan hartuko da.

Oporrak abenduan, urtarrilean eta otsailean hartzen dituzten harrobiko langileek egun bat gehiago izanen dute aipatutako garaian opor hartutako bederatzi laneguneko.

Urteko oporren ordainketa kalkulatzeko oinarri izanen dira langileek kobratzen dituzten lansari ez arrunt guztiak, izaera berezikoak salbu, adibidez aparteko orduak eta urteko eskersariak. Kontzeptu horiei 0,10 faktorea aplikatuko zaie, ezarritako formularen arabera.

Ordainketa urtero eginen da, otsaileko nominan. Finikitoa dela eta, oporrak ordaindu behar direnean, kalkulu-oinarrirako hartzen diren kontzeptuak bider 1,22 eginen da Zubiriko fabrikarako, eta bider 1,23 harrobiko langileentzat.

Lizentziak.

Langile orok, aurretik abisatu eta justifikatuta, baimena izanen du lanera ez agertzeko, ordaindua izateko eskubidearekin, arrazoi hauetako bat dela medio eta honenbeste denborarako:

–Ezkontzagatik, hamabost egun natural.

–Ezkontidearen, izatezko bikotekidearen, seme-alabaren heriotza: lau egun.

–Seme-alaben jaiotza, 2. gradura arteko odol bereko nahiz ezkontza bidezko gainerako ahaideen istripua edo eritasun larria edo heriotza: bi egun baliodun. Eritasun larria da ospitalizazioa eskatzen duena edo ospitalizaziorik behar ez izan arren etxean atseden hartzea eskatzen duen ebakuntza kirurgikoa. Aipatu arrazoiengatik langilea Nafarroatik kanpora joan beharra badu, bi egun gehiago izanen ditu.

–Gidabaimena berritzeko, enpresan gidabaimena izatea derrigorrezkoa duten langileentzat: egun bat.

–Titulu profesional edo akademiko bat erdiesteko azterketetan parte hartzeko, justifikatu ondotik (matrikula): behar den denbora.

–Ohiko bizilekuz aldatzeko: egun bat.

–NANa berritzeko: egun bat.

–Behar-beharrezkoa den denbora, erditu aurreko azterketa medikoak egiteko eta erditzea prestatzeko tekniketan trebatzeko, lanorduetan egin behar badira.

–Medikuarengana joateko: langile batek lantokitik kanpora joan behar duenean mediku kontsultara, ataleko buruak emanen dio horretarako baimena, eta kontsultan izan dela frogatzeko agiria aurkeztu beharko du lanera itzultzen denean. Aurkezten ez badu, kanpoan egondako denbora hutsegitetzat joko da (lanera agertu ez izana) eta soldatatik dagokiona kenduko zaio, non ez dagoen denbora hori errekuperatzeko akordiorik, nahiz eta gertaera hori hutsegitetzat hartzen ahalko den medikuaren kontsultara ez zela joan frogatzen bada.

Langilea gaueko edo arratsaldeko txandan ari bada lanean, garaiz jakinaraziko dio arduradunari, ahal bada langileak alde egin beharreko eguna baino lehen.

Edonola ere, langileak justifikatu egin beharko du alde egin izana, eta hori gabe ez zaio ordainduko galdutako denbora.

–Seme-alabaren ezkontza: egun bat, baldin eta langilearentzat egun hori laneguna bada.

–Lehen graduko ahaideen operazio kirurgikoa, ospitalizaziorik gabeko Kirurgia Anbulatorioko Unitateetan: egun bat.

–Baimenen araubidea hedatzea ezkondu gabeko bikoteetako kideentzat: baimenen eta lizentzien arloan, hemen ezarritako araubide juridikoa ezkondu gabeko bikoteentzat hedatuko da ondorio guztietarako, bikotekideen sexua edozein dela ere, betiere behar bezala frogatzen bada haien bizilekuko udalaren ezkondu gabeko bikoteen erregistroan izena eman dutela. Lehenengo puntuan adierazitako ezkontzagatiko lizentzien kasuan, behin baino ez da emanen.

Bizilekuan horrelako erregistrorik ez badago, frogatu beharko da eskaera egiten den egunerako gutxienez bi urte daramatela elkarrekin bizitzen etenik gabe, bizilekuko udalaren ziurtagiria aurkeztuz.

–Egun bateko baimen ordaindua norberaren aferetarako, nahieran hartzeko 48 ordu lehenago abisu emanez gero. Egun hori ezin zaio oporraldiei gehitu, ezta asteburutan edo jaiegunetan hartu ere.

Langile sartu berriak.

Plantillak ahal duena baino lan gehiago metatzen dela eta, produkzio beharrak handitzen direnean, enpresak behin-behineko langileak kontratatuko ditu behar den aldirako, betiere arlo horretan indarra duen Laneko Legerian aurreikusten diren kontratu moten barnean.

Baldintza berdinetan, ondorengoak lehenetsiko dira kontratazioan:

1. Kontratazioa egitean jardunean diren langileen seme-alabak

2. Esteribarko biztanleak.

3. Magnesitas Navarras enpresako langile-ohiak, 1992ko urriaren 1eko espedienteak ukituak.

Langile sartu berria zein lanpostutarako kontratatzen den, haren kategoriari dagokion soldataren %90 jasoko du lehenbiziko sei hilabeteetan, eta handik aurrera %100.

Lanarekin loturiko arrazoiengatik segitzerik ez bada, kategoriarako denboraren barnean sartuko da aurreko kontratuetan izandako presentzia denbora.

Mugigarritasuna

Langileen Estatutuko aurreikuspenen arabera arautuko da langileen mugigarritasun funtzionala.

Mugigarritasun geografikoari dagokionez, alderdiek erabaki dute langile guztiek onartu beharko dituztela enpresaren beste lantegi batzuetara aldi batez joateko ematen dizkien aginduak, lantegi horiek enpresarenak berarenak, kanpokoak edo esternalizatuak izan.

Langileak eskubidea izanen du joan-etorri horietan sortzen zaizkion zentzuzko bidaia gastu eta dietak jasotzeko, baita enpresak arlo horretan indarrean dituen politika eta praktikekin bat heldu diren gastuak ere; betiere, ordainketa agiriak eta erreziboak aurkeztu beharko ditu

Aldi baterako joan-etorrietan laneko denbora kontatzeko, langileak destinoko lanpostuan egon beharko du, lanean aritzeko baldintzak betetzen dituela, bai eguneko lanaldi hasieran bai bukaeran.

Soldatak eta ordainsariak

Soldatak.

Eranskineko tauletan azaltzen dira.

–Soldata igoera hauxe izanen da:

• 2013. urtean: + %1,50.
• 2014. urtean: + %1,50.
• 2015. urtean: + %1,50.

Lanbide kategoriak.

Magnesitas Navarras, S.A. enpresak duen plantilla eta kategorien banaketa erakundearen bilakaera historikoaren ondorioa da.

Bi aldeek adostu dutenez, kontuan hartuta konpainia osoa modernizatzeko aukerak eta teknologiaren ekarpena instalazio eta prozesuetan, beharrezkoa da formulak ezartzea langileriak bere kalifikazio profesionala hobetzeko egiten dituen eskaerei erantzuteko. Helburu horretan saiatuko da Batzorde Paritarioa.

Aparteko pagak.

Aparteko pagak sei hilean behin sorraraziko dira:

–Udako paga: urtarrilaren 1etik ekainaren 30era sorrarazia. Kobrantza: ekaineko bigarren hamabostaldian.

–Eguberrietako paga: uztailaren 1etik abenduaren 31ra sorrarazia. Kobrantza: abenduko bigarren hamabostaldian.

Antzinatasuna.

Antzinatasunagatiko igoerak oinarrizko soldataren gainean kalkulatuko dira, eta urtez urteko igoerekin errebalorizatuko.

Enpresan sartu berri guztientzat, antzinatasuna bost urte lan egin ondoren aplikatuko da, lehenbiziko bosturtekoarekin.

Hitzarmenaren plus berezia.

Plus hori eranskineko taulan adierazten diren langileek jasoko dute eta urtez urteko igoerekin errebalorizatuko da. “Ad Personam” izaera dute. Behialako utilitateen gaineko zergari dagokio eta bertan biltzen dira kontzeptu hauek: Selco eta Ekonomatoa, Harrobiko produkzio prima, Lanpostuaren prima (arduradunak) eta “Ad Personam” motako bestelako primak.

Urruntasun plusa.

Enpresak garraio zerbitzua ematen du, aurrez ezarritako ibilbideen arabera, lantokietara joan-etorria egiteko. Hitzarmen honetan, erabaki da zerbitzu horren egungo ibilbideak eguneratu eta berraztertzea.

Ondoren aipatzen diren langileek 0,17 euro kilometroko kobratuko dute, elkartzeko tokira joan-etorria egiteko. Prezio horiek igoko dira hitzarmenaren indarraldi osorako itundutako soldata igoeren arabera.

Kilometrajea.

Langileak bere ibilgailua erabiltzen badu enpresaren zerbitzura -horrek, jakina, aldez aurretik baimendua egon behar du-, egindako kilometrajea 0,21 euro kilometroko ordainduko da. Prezio horiek igoko dira hitzarmenaren indarraldi osorako itundutako soldata igoeren arabera.

Gaueko lana.

Gaueko 10etatik goizeko 6ak arte lan egiten duen txanda jarraituko langile orok gaueko lanaren plusa jasoko du, oinarrizko soldataren %45ekoa 2013., 2014. eta 2015. urteetan, urtez urteko igoerekin errebalorizatuko dena.

Igandeak eta jaiegunak.

Lana igandean edo jaiegunean egiten duten langileek horrela lan egindako egun bakoitzeko ezarrita dagoen plusa jasoko dute, eta 2013., 2014. eta 2015. urteei dagozkien igoerekin errebalorizatuko da.

Era berean, Gabon gauean edo/eta Gabon Zaharrean lan egiten dutenek lehendik ezarrita dagoen plusa jasoko dute, eta 2013., 2014. eta 2015. urteei dagozkien igoerekin errebalorizatuko da.

Larunbat goizeko, arratsaldeko eta gaueko lana.

Larunbatean goizeko txandan lan egiten dutenek lehendik ezarrita dagoen plusa jasoko dute, eta 2013., 2014. eta 2015. urteei dagozkien igoerekin errebalorizatuko da.

Larunbatean arratsaldeko txandan lan egiten dutenek lehendik ezarrita dagoen plusa jasoko dute, eta 2013., 2014. eta 2015. urteei dagozkien igoerekin errebalorizatuko da.

Larunbatean gaueko txandan lan egiten dutenek lehendik ezarrita dagoen plusa jasoko dute, eta 2013., 2014. eta 2015. urteei dagozkien igoerekin errebalorizatuko da.

Ibilgailuen parkeko prima.

2013., 2014. eta 2015. urteei dagozkien igoerekin errebalorizatuko da.

Guardiak

1. Guardia lokalizatua Mantentze-lanetan

Guardia lokalizatuko zerbitzua egiten duten mantentze-lanetako langileek aurrez ezarritako plusa jasoko dute, aipatu guardiako 8 orduko aldi bakoitzeko, eta 2013., 2014. eta 2015. urteei dagozkien igoerekin errebalorizatuko da.

Ordainsari horretaz gainera, lan jakin bat egin behar dutenean, aparteko ordu bezala ordainduko zaie fabrikan lanean emandako denbora, bai eta kilometrajea eta deiaren prima ere, urte bakoitzerako ezarritako igoerarekin bat helduko dena.

2. Ikuskaritzako guardia pertsonalak

Gainbegiraleek guardien txanda bat izanen dute jaiegun eta asteburuetan, gerta daitezkeen ustekabekoetarako. Guardia horiengatik ezarritako prima kobratuko dute, urtez urteko igoerekin errebalorizatuko dena.

Prestasun plusa.

Ogitartekoa jateko ematen zaien ordu erdiko atsedenaldian, hiru txandatan edo bi txandatan diharduten langileek, beren lan motagatik lanlekutik jangelara joaterik ez badute, eskubidea izanen dute plus berezi bat, prestasun plusa deitzen dena, kobratzeko. Hori dela eta, enpresak langile talde horren zerbitzuak erabiltzen ahal ditu haien atsedenaldietan eta langileek ahal dutenean janen dute ogitartekoa. Denbora horri dagokion zenbatekoa taularen eta kategoriaren arabera ezarri da.

Mantentze-lanen beharrak eta produkzioaren gorabeherak direla eta, mantentze-lanetako langileek, goizeko txandan dihardutela, lanean jarraitu beharra izan dezakete ogitarterako aurreikusitako denboran, eta ondoren izanen dute jateko parada. Horren ordainetan hiru txandakoentzat ezarritako prestasun plusaren %50 kobratuko dute.

Horren zenbatekoa tauletan kategoria bakoitzerako ezarritakoa da.

Plus erabilgarria.

Plus hori aplikatzen ahal zaie goizeko txandakoak izan eta hiru txandatan lan egitera pasatzen ahal diren langileei. Goizeko ordutegian diharduten denboran ordainduko zaie. Txandaka ari direnean, prestasun plusa baizik ez dute kobratuko.

Plus horren balioa prestasunaren %75 da, kategoriaren eta taularen arabera.

Ordainsariak taulen araberakoak izanen dira (ikus eranskina).

Harrobiko primak.

Harrobiko prima guztiak urtez urte egiten diren igoerekin errebalorizatuko dira. (Ikus eranskineko taulak).

Fabrikako primak.

Fabrikako prima guztiak urtez urteko igoerekin errebalorizatuko dira. (Ikus eranskineko taulak).

Beste prima batzuk:

Inguruabar bereziengatik itun honetan bildutakoez gainera beste prima batzuk ezarri beharra suertatuz gero, ondokoak hartuko dira kontuan:

a) Arrisku eta nekagarritasun primak.

Zenbatekoa ezarria dago jadanik. Enpresako Zuzendaritzak edo propio horretarako izendatutako ordezkaritzak zehaztuko ditu ustez eta nekagarriak edo arriskutsuak diren lan berriak.

Enpresa batzordea ados ez badago, lan arloko agintaritzak erabakitzen duenari jarraituko zaio.

b) Prima bereziak.

Badakigu badirela lan batzuk prima berezia aplikatu beharra eskatzen dutenak. Enpresako Zuzendaritzak edo eskuordetutako ordezkaritzak Segurtasun eta Osasun Batzordeak emandako informazio teknikoa jasoko du baloratu beharreko faktore desberdinen gainean, primaren zenbatekoa doitze aldera.

Aurrekoaz aparte, aurreikusten ahal diren lanak egin behar direnean, iraupen luzekoak eta prima dutenak, nekagarritasuna ahalik eta modu arrazionalenean banatzeko moduan antolatuko dira lanok.

Osagarriak kopuruarengatik

Produkzio, produktibitate eta kalitate primak.

1. Fabrikako produkzio prima: urte bakoitzeko urtarrilaren 3. asteko asteartean kobratuko da, ondoren adierazten diren irizpideetan oinarrituta, eta urtez urteko igoerekin errebalorizatuko da.

1.1. Bi batugai ditu: lehenbizikoa lortzen diren tonen araberakoa da eta bigarrena, berriz, urtean lortutako eguneroko batez besteko produkzioaren araberakoa.

1.2. Lehenbizikoaren balio osoa hau izanen da: VT = V1 + V2.

1.3. V1-aren kalkulua. (2012an adostutako taula berrien arabera).

1.4. V2-aren kalkulua.

1.4.1. Lehenbizi –Produkzio baliokidea– deituko dena kalkulatuko da. Horretarako, material bakoitza bere koefizienteaz biderkatzetik ateratzen diren zifrak batuko dira, ondorengo taularen arabera:

1.4.2. Labe bakoitzeko produkzio baliokideak kalkulatu ondotik, horiek labe bakoitzean lan egindako egunez zatitzen dira, eta eragiketa horrek emanen digu labe bakoitzaren eguneroko produkzio baliokidea. Bi horiek batuz aterako zaigu “Eguneroko Produkzio Baliokide Osoa”. (Dezimal bateko zifrak erabiliko dira).

1.4.3. –Eguneroko Produkzio Baliokide Osoari– dagokion zifraren zuzenketa. Sartzen diren aldaketa teknologikoek eta egiten diren inbertsioek labeetan ohiko baldintzetan lortzen den produkzioa alda dezakete; hortaz, urtero, bi alderdiek haren kopurua erabakiko dute. Hitzarmen honen indarraldian, 454 t eguneko izanen da zifra hori (193 t egunean 2. laberako eta 261 t egunean 3. laberako), non ez diren aldaketa teknologiko edo inbertsio berriak gertatzen eta ez den aldatu behar.

1.4.4. Gero 1.4.2. ken 1.4.3 eginda ateratzen den emaitza kenduko da. Emaitza hori bider 1.000 eginda aterako da 1.3an kalkulatutako balioari gehitu edo kendu beharreko kopurua.

1.4.5. Zikloi-hautsaren zuzeneko salmentaren zuzenketa. Labean tratatu gabeko zikloi-hautsa saldu ahal izatea kontuan hartuko da produkzio primari dagokion aldetik, saldutako 1.000 tonako hainbateko bat, baina urteko soldata igoeren indize berberarekin errebalorizatua 2013an, 2014n eta 2015ean. Hidratoa ez da sartzen saldutako tona kopuruaren barrenean.

2. Harrobiko kalitate prima: hiru hilabetean behin kobratuko da, eranskineko taulan finkatutako irizpideei jarraikiz, eta 2013an, 2014an eta 2015ean urtez urteko igoerekin errebalorizatuko da. Harrobiko kalitate primaren kalkulua berriz egitea erabaki da, mearen kalitatearen gaur egungo eskakizunetara doituz, kopuruaren kontzeptua kontuan hartuta.

Oharra: Fabrikako produkzio prima kobratzeko eskubidea izateko, nahitaezkoa da Magnesitas Navarras enpresako plantillan urtean hiru hilabete bederen egotea.

Harrobiko kalitate primaren kasuan, gutxieneko hori hogeita bi egunekoa izanen da.

Aparteko orduak.

Ikusirik dagoen langabezia, eta enplegua sortzeko asmoz, bi alderdiek erabaki dute komeni dela ahalik eta aparteko ordu gutxien sartzea. Aparteko orduak, halakorik denean, eranskineko taulen arabera ordainduko dira.

a) Egiturazko orduak labeen produkzioari erantzuteko behar diren langileek sartzen dituztenak dira, lan administrazioko agintaritzak ezarritako 14 jaiegunetan. Aurreko baldintzekin ikustekorik ez dutenak, abaguneko orduak dira.

b) Magnesitas Navarras enpresako langileek beren borondatez egiten dituzten aparteko orduak ez dira inola ere martxoaren 24ko 1/1995 Lege Dekretuaren 35. artikuluan ezarritako legezko mugak baino gehiago izanen.

c) Ezarritako mugetara iritsiz gero, hortik goragoko aparteko orduak atsedenaldiekin konpentsatuko dira, enpresaren eta langilearen artean ados jarrita.

d) Langileek beren esku dute abaguneko orduen zenbatekoa ez kobratzea, haiek atsedenaldi bihurtuta, 2 faktorea aplikatuz, hau da, lan egindako ordu bakoitzeko 2 orduko atsedenaldia.

e) Ez dira zenbatuko ezinbesteko kasuetan, hondamendietan edo enpresaren azpiegitura arriskuan dagoenean sartzen diren orduak, ez eta ezbeharren eta ohiz kanpoko eta presako bestelako kalteen prebentzioan edo konponketan sartutakoak ere.

Aparteko orduen gaineko informazioa.

a) Fabrikako ataletan aparteko orduak egin behar direla aurrez jakiterik izanez gero, Giza Baliabidekoei jakinaraziko zaie egitekoa den aparteko orduen programa, eta handik Enpresa Batzordeari bidaliko zaio informazioa.

b) Aldez aurreko informazio horretaz gainera, atalek aurreko egunean lan egindako aparteko orduen berri emanen diete, egunero, idatziz, Giza Baliabidekoei.

Idazki horretan honako hauek sartuko dira, gutxienez ere: langileen izenak, lan egindako orduak eta aparteko orduen kontzeptua edo haiek egiteko arrazoia. Gainera, atalek interesgarritzat jotzen duten edozein argibide ere paratuko da.

c) Aurreko baldintzak bete gabe egiten diren aparteko orduak, lan egutegian aurreikusitako lanorduetatik kanpo egiten badira ere, ez dira aparteko ordutzat joko, eta langile bakoitzak egin beharreko urteko lanaldiaren barnean kontatuko dira.

Hutsegiteak

Hutsegite arinak.

Ondokoak joko dira hutsegite arintzat:

1. Batetik hirura arteko puntualtasun faltak, hilabetean guztira hogeita hamar minutu egiten dutenak, bidezko arrazoirik izan gabe.

2. Bidezko arrazoia izanik lanera ez joatearen berri ez ematea behar den epean, non ez duen frogatzen ezinezkoa izan zaiola.

3. Lanlekutik alde egitea bidezko arrazoirik gabe, denbora laburrean, alde egin izana kaltegarria izan ez bada enpresarentzat eta gainerako langileei beren lanean oztoporik egin ez bazaie, bestela hutsegite larritzat edo oso larritzat joko baita.

4. Arreta gabezia txikiak materiala, instalazioak, tresneria, makineria, eta abar zaintzeko orduan.

5. Noizbehinka norberaren garbitasun eta txukuntasunik eza.

6. Jendea behar den adeitasunez eta arretaz ez hartzea eta gogogabe ibiltzea goi karguek adierazitakoa betetzerakoan.

Hutsegite horiek larritzat har daitezke berriro egiten badira eta haien ondorioak ikusita kalifikazio hori merezi badute.

7. Ohiko bizilekuz aldatzearen berri ez ematea enpresari.

8. Lanaldian lanarekin zerikusirik ez duten gaietaz eztabaidatzea. Lana galarazten bada, hutsegite larritzat edo oso larritzat jo daiteke.

9. Noizbehinka mozkortzea, beste hutsegite larririk berarekin ez badakar.

10. Baimendu gabeko orduetan eta tokietan jatea, berrerortzerik gabe.

11. Jazarpen sexualak, hitzen bidezkoak, fisikoak edo psikologikoak, lantokian eginak, langilearentzat -gizonezko zein emakumezko- tratu iraingarria izanik, hutsegite arin, larri edo oso larritzat hartuko dira, hutsegiteak mailakatzeko prozedurari jarraikiz. Egintza horiek egin badira harreman hierarkikoaz baliatuz eta/edo aldi baterako lan kontratua duten pertsonekin, hutsegitea oso larritzat joko da

12. Antzeko beste edozein.

Hutsegite larriak.

Ondokoak joko dira hutsegite larritzat:

1. Bidezko arrazoirik eman gabe puntuala ez izatea hirutan baino gehiagotan, hilabeteko epean.

2. Aldi baterako ezintasun kasuan, alta, baja edo berrespen parteen igorpena arrazoirik eman gabe atzeratzea.

3. Bi egunetan lanera ez agertzea bidezko arrazoirik gabe.

4. Familian izandako aldaketak, Gizarte Segurantzan ondorioak izan ditzaketenak, ez jakinaraztea behar den garaian. Maltzurkeriarik izanez gero, hutsegite oso larritzat joko litzateke.

5. Lanorduetan edozein motatako jolasetan ibiltzea.

6. Goragokoen esanak ez betetzea laneko edozein arlotan, pertsonentzako arriskurik edo tratu iraingarririk ez badakar. Diziplina hautsi dela nabarmen ikusten denean edota jokabide horrek enpresari kalte nabaria sortzen dionean, hutsegite oso larritzat jotzen ahal da.

7. Zabarkeriaz edo utzikeriaz aritzea lanean, zerbitzuaren kaltetan.

8. Lanean zuhurtziarik gabe jokatzea, langilea bera edota lankideak arrisku larrian jartzen ez badira edota instalazioak, tresneria, makineria, etab. hondatzeko moduan jartzen ez badira.

9. Lan partikularrak egitea obran edo lantokian, behar den baimenik gabe, bai eta lanlekutik kanpora ere, beharrezko idatzizko baimenik gabe.

10. Hutsegite arinak berriz egitea (puntualtasun faltak salbuetsita), mota desberdinetakoak izan arren, hiru hilabeteko epean.

11. Laneko errendimendua nahita gutxitzea.

12. Nahitaezko erreserbaren sekretua haustea edo bortxatzea, enpresari kalterik egiten ez dionean.

13. Zuzendaritzari edo goragokoei zerbitzuaren edo lanaren gaineko informazio faltsua ematea, zabarkeriaz.

14. Ordezkari sindikalaren aurrean edo, hura ez badago, beste langile baten aurrean eta langilearen intimitatea ahal den gehien errespetatuz, paketeetan edo bildukietan zer daukan ez esatea, eginbehar horren ardura duen langileari.

15. Langileak ikusitako egintzak edo hutsegiteak isiltzea, enpresarentzat kalte larriak sor baditzakete.

16. Lanordutik kanpo enpresako lokaletan egotea, edo bertan sartzea enpresakoak ez diren pertsonak, idatzizko baimena izan gabe.

17. Arreta gabezia handiak, langileak bere esku dituen materiala, makinak, tresneria eta abar zaintzeko orduan, lankideak arriskuan jartzen badira edo aipatu makinak edo instalazioak hondatzeko moduan.

18. Enpresaren edo langileen gauzak aldatzea edo nahastea.

19. Beste langile bat lanean agertu dela simulatzea, haren sinadura, fitxa edo kontrol-txartela erabiliz.

20. Telefonoa gai partikularretarako erabiltzea, baimenik izan gabe.

21. Enpresak emandako segurtasun eta higieneko babesgaiak ez erabiltzea, berregilea izan gabe.

Hutsegite oso larriak.

Hutsegite oso larriak honako hauek dira:

1. Bidezko arrazoirik gabe sei hilabeteko aldian hamar aldiz edo gehiagotan berandu iristea edo hogei aldiz baino gehiagotan urtebeteko epean.

2. Hiru egunetan edo gehiagotan lanera ez agertzea hilabete batean, bidezko arrazoirik gabe.

3. Iruzurra, leialtasun eza eta konfiantza abusua agindu zaizkion eginkizunetan.

4. Enpresaren nahiz gainerako langileen jabetzaren kontrako egintzak, bai eta enpresako lokaletan nahiz kanpoan, lanean egon daitekeen edozein pertsonaren jabetzaren kontrakoak ere.

Atal honetan sartzen da enpresaren eta Gizarte Segurantzaren laguntza lanetarako datuak faltsutzea ere.

5. Enpresaren lehengaiak, landutako piezak, obrak, tresneria, makineria, aparatuak, instalazioak, eraikinak, altzariak eta departamentuak hondatzea, suntsitzea edo haustea.

6. Enpresatik kanpo egindako jabetzaren kontrako delituengatik Justizia Auzitegi eskudunek langileari epai irmoa jarri izana.

7. Norberaren garbitasun eta txukuntasunik eza, etengabea eta ohiturazkoa, lankideen arrazoizko kexa sorrarazten duena.

8. Normalean mozkortuta edo toxikatuta egotea, bai eta enpresan drogak banatu edo lanorduetan kontsumitzea ere.

9. Enpresaren korrespondentzia edo isilpeko dokumentuen sekretua haustea edo enpresakoa ez den bati nahitaez isilpean eduki beharreko datuak ezagutaraztea.

10. Enpresak egiten dituen lan berberetan aritzea enpresari bidegabeko lehia eginez eta Zuzendaritzaren baimen idatzia izan gabe.

11. Hitzezko eta egitezko tratu txarrak ematea edo errespetu falta larria, goragokoei, lankideei, mendekoei edo haien ahaideei.

12. Istripu larriak sorraraztea, zabarkeria edo zuhurtziagabekeria desenkusaezinagatik.

13. Lanlekutik alde egitea, erantzukizuneko postuak direnean.

14. Hutsegite larria berriz egitea, ezberdina izan arren, sei hilabetean, horregatik zigortua izan bada, betiere.

15. Ohiko edota itundutako errendimendua luzaroan eta nahita gutxitzea.

16. Obedientzia ukatzea.

17. Txosten okerrak igortzea, maltzurkeriaz edo aitzakiarik gabeko utzikeriaz, sabotajea, erantzukizun penalaz aparte.

18. Enpresari buruzko albiste faltsuak edo asmo txarrekoak zabaltzea, enpresari kalte eginez.

19. Nork bere burua lesionatzea lanean.

20. Lanlekutik arrazoirik gabe alde egitea, enpresarentzat kalte larria sortzen denean edo beste langileei istripua eragiten zaienean.

21. Lanean zuhurtziarik gabe jokatzea, horrek istripurako arriskua edo enpresako ondasunetan matxura izateko arrisku larria sortzen zaienean.

22. Goragokoen esanei uko egitea, diziplinaren haustura ekar dezakeena, ondorioz enpresari nahiz gainerako langileei kalte nabaria sortzen zaienean.

23. Eritasun edo istripu itxurak egitea. Hutsegitea dela ulertuko da langilea, bajan egonik, bere zein besteren kontura edozein lanetan aritzen denean. Orobat, atal honetan sartzen da zauriak ukitzen ibiltzea aldi baterako ezintasunagatiko baja luzatzeko asmoz.

24. Enpresak emandako segurtasun eta higieneko babesgaiak ez erabiltzea, berrerorlea izanik.

25. Aipatutakoen antzeko beste hutsegite larriak eta lan arloko legerian eta jurisprudentzian horrelakotzat jotzen direnak.

Zehapenak

Aplikazioa.

Enpresak, egindako hutsegiteen larria eta inguruabarrak kontuan hartuta, zehapen hauek jartzen ahal ditu:

a) Hutsegite arinak

a.1) Hitzezko kargu-hartzea.

a.2) Idatzizko kargu-hartzea.

a.3) Egun bateko enplegu-soldaten etenaldia.

b) Hutsegite larriak

b.1) Enplegu-soldaten etenaldia, bi egunetik hamarrera bitarte.

b.2) Goragoko kategoria batera pasatzeko gaitasuna kentzea, sei hilabetetik beherako eperako.

c) Hutsegite oso larriak

c.1) Lanbide kategoria aldi baterako galtzea.

c.2) Enplegu-soldaten etenaldia, hamaika egunetik bi hilabetera bitarte.

c.3) Diziplinako kaleratzea, Langileen Estatutuaren 54. artikuluarekin bat.

Aipatu diren zehapenak aplikatzeko, kontuan hartuko da hutsegilearen erantzukizuna handia edo txikia den, haren lanbide kategoria, eta egintzak gainerako langileengan eta enpresan duen eragina.

Zehapenen araubidea.

Enpresak du zehapenak jartzeko ahalmena, hitzarmen honetan ezarritakoari jarraikiz.

Hutsegite arin eta larriengatik zehapena jartzeko, langileari idatziz jakinarazi behar zaio eta idazki horretan adieraziko dira data eta hura jartzeko arrazoiak. Hutsegite oso larrietan beharrezkoa izanen da espedientearen tramitazioa edo prozedura sumarioa, zeinetan ukitutako langileari entzunaldia emanen baitzaio.

Zehapenak jarri aitzin, indarra duen legeriaren arabera, atal sindikalei eta/edo enpresa batzordeari entzunen zaie.

Ezarritako zehapenen aurka jotzeko 20 egun baliodun izanen dira, jakinarazten den egunetik hasita.

Hutsegiteen preskripzioa.

Hutsegite arinak hamar egunen buruan preskribatzen dira, larriak hogei egunen buruan eta oso larriak hirurogeiren buruan, enpresak hutsegitearen berri izaten duenetik aitzina eta, nolanahi ere, hutsegitea egin eta sei hilabeteren buruan.

Agintekeria.

Agintekeria da enpresaburuak, atalburuak edo arduradunak beren menpeko langile bati agindu bat ematea legezko edo itundutako lan baldintzen aurka edo pertsona den aldetik dagokion duintasunaren aurka.

Langileek agintekeriaren aurkako erreklamazioa egin dezakete, lan arloko agintaritzari edo enpresako Zuzendaritzari bideratua.

Gizarte ekintza

Aseguruen poliza.

Honela izanen da aseguru kolektiboaren poliza:

–Edozein arrazoiren ondoriozko heriotza: 30.000 euro.

–Baliaezintasun iraunkor osoa edo erabatekoa: 30.000 euro.

–Istripuaren ondoriozko heriotza (eguneko 24 orduak): 36.000 euro.

Eritasuna.

Lanerako aldi baterako ezintasunean diren langileentzat haien soldataren %100en gaineko klausulak mantentzen dira (oinarrizko soldata, antzinatasuna eta hitzarmenaren plus berezia), eta absentismo baldintza guztiak kentzen dira.

Adostu denez, baja eta alta medikoak, eritasun arruntean eta lanetik kanpoko istripuetan, Gizarte Segurantzako Institutu Nazionalari atxikitako medikuek (Osasunbidea) emanen dituzte, eta laneko istripuetan eta eritasun profesionaletan, Istripuen Mutualitateak.

Absentismo eza saritzea.

Era berean, bi alderdiak ohartzen dira absentismoak, maila batzuk gainditzen direlarik, kalte larriak dakarzkiola ekonomiari, eta hura murriztu beharra dagoela, produktibitatean eragin negatiboa duelako.

Bi aldeak, funtsean, absentismoa sorrarazten duten arrazoiak murrizten ahaleginduko dira, eta horretarako, jarduketa errealista eta negoziatzaile baten bidez, epe laburrean eta ertainean absentismoa murriztea ekar dezaketen kausei ekiten saiatuko dira.

Osagarri gisa, absentismo eza dela-eta, prima batzuk ezarri dira, ondoren adierazten den moduan:

Langile bakoitzaren absentismo ezari dagokion sari bat ezarri da, 60,10 eurokoa (edo urte naturalean enpresan emandako denborari dagokion zati proportzionala), urte osoan lizentzia medikorik edo eritasunaren ondoriozko bajarik ez duten langile guztientzat.

Halaber, taldekako absentismo ezari ere saria emanen zaio, 125,00 eurokoa pertsona bakoitzeko (edo urte naturalean enpresan emandako denborari dagokion zati proportzionala).

2013., 2014. eta 2015. urteetan, sari hori kobratuko da baldin eta urteko absentismo orokorra aurreko urtekoa baino txikiagoa bada; horri begira, absentismo orokortzat jotzen da benetan egindako lanorduak lanean egin beharreko ordu teoriko guztiez zatituta ateratzen den kopurua (absentismo orokorra halaxe kalkulatu da Magnesitas Navarras, S.A.n orain arte, amatasunaren eta aitatasunaren ondoriozko absentismoa kenduta). Prima hau, kobratuz gero, “Absentismo ezaren prima finkatu” gisa finkatzen ahalko da.

Lan-osasuna.

Arriskuen Prebentzioa Lan Osasuna eta Segurtasuna Kudeatzeko Sistema gisa egituratuko da, horrela hurrengo ISO 18001 arauaren edo antzeko baten ziurtagiria lortzeko aukera izan dezagun.

Prebentzioko delegatuek ordu sindikalak hartuko dituzte bakoitzak bere atal sindikalak duen ordu kopuruaren kontura, Laneko Arriskuen Prebentzioko Legean bildu ez diren eginkizunetarako, enpresa batzordeko kideek duten araubide berean.

Osasun eta segurtasun batzordeari ahalmena ematen zaio Zuzendaritzari urtero proposa diezaion Lan Osasunaren eta Lan Baldintzen arloan egin beharreko inbertsioen lehentasunen hurrenkera.

Prestakuntza.

Enpresa ados dago langileen prestakuntzaz arduratzeko, bere ustez interes berezia duten prestakuntza, ikasketa edo birziklatze ikastaroak egin ditzaten, betiere lanorduetan eta laneko beharrak kontuan hartuta.

Eskubide sindikalak

Enpresak 2003an 1.807,05 euroko funtsa jarri zuen enpresa batzordearen esku, urtez urteko soldata igoeraren arabera errebalorizatuko dena. Diru hori batzordeak erabiliko du langileen batzarraren baimenarekin, eta hartutako erabakiaren berri enpresari emanez.

Atal sindikal bakoitzak bere sindikatukoak diren enpresa batzordekideen ordu-kredituko orduak kideetako bati edo batzuei lagatzen ahal dizkie, hilero. Erabaki hori hartuz gero, Langileria Departamentuari jakinaraziko diote idatziz.

Batzordeko buruak eta idazkariak 10 ordu gehiago izanen dituzte hilean.

Prebentzio zerbitzuko delegatuek enpresa batzordeko kideek duten ordu-kreditu berbera izanen dute.

Batzorde paritarioa

Hitzarmeneko Batzorde Paritarioa eratzen da. Langileek ordezkatzen dituzten hiru pertsonak eta enpresa ordezkatzen duten hiru pertsonak osatuko dute.

1.–Batzorde Paritarioaren eginkizunak:

a) Akordio guztien interpretazio lanak egitea.

b) Akordio guztien jarraipen lanak egitea.

c) Langileen Estatutuak edo beste arau batzuek ezartzen dizkiotenak.

2.–Funtzionamenduko erregelamendua:

a) Bilerak: Batzorde Paritarioa bilduko da esku hartzeko eskatzen zaionean.

b) Deialdiak: Batzorde Paritarioa biltzeko deia alderdi sinatzaileetako edozeinek eginen du, eta horretarako aski izanen da idatzizko komunikazio bat, eguneko gai zerrenda azalduko duena.

Batzorde paritarioa bilduko da gaiaren garrantziaren arabera komeni den epearen barnean, baina deialdia egin eta hamabost eguneko epean gehienez.

Epe horretan batzordea biltzen ez bada, batzorde paritarioaren esku-hartzea amaitu dela ulertuko da eta interesatuak bidezko iruditzen zaizkion ekintzak baliatu ahal izanen ditu.

Batzordea bildurik, erabakiak hartuko ditu gai-zerrendako gaien inguruan, eta bidezko akordioak hartuko. Egokitzat hartzen bada, bilkura bertan behera geldi edo eten daiteke eta hurrengo hiru egun naturaleko epean jarraituko du. Gehieneko epe horretan gai-zerrendako gai guztiak jorratu ez badira eta haien gainean erabakirik hartu ez bada, ulertuko da Batzorde Paritarioaren esku-hartzea agorturik dagoela, eta interesdunak bidezko jotzen dituen ekintzak balia ditzake.

Aurrekoa galarazi gabe, Batzorde Paritarioaren esku-hartzea Langileen Estatutuak esleitzen dizkion eginkizunen ondorioa bada eta esku hartzeko epe jakin batzuk bete behar baditu, epe horiek beharko ditu bete.

c) Quoruma: Batzordea baliozki eratutzat joko da ordezkaritza bakoitzaren bi kide bertaratzen direnean.

Alderdiak bileretara joaten ahal dira bina aholkulari hartuta, gehienez.

d) Akordioen balioa: Batzordeak akordioak adosteko, edonola ere bi ordezkaritzetako bakoitzaren bi kideren aldeko botoa beharko da.

Bilera bakoitzaren akta eginen da eta bertaratzen diren kide guztiek sinatuko dute.

e) Helbidea: Batzorde Paritarioak enpresaren lokaletan izanen du jakinarazpen eta deialdietarako helbidea, Zubiriko (Nafarroa) Orreagako etorbidean, z.g.”

Bestelakoak

Babeserako jantziak.

Enpresak babeserako jantzi hauek emanen ditu:

–2 buzo edo jaka eta galtzak (lanpostuen arabera) urtean.

–Uretako janzki bat, hondatzen denean beste bat eman beharko du.

–Uretako segurtasuneko bota pare bat. Hondatzen direnean beste bat eman beharko du.

–Segurtasuneko bota pare bat; hondatzen direnean beste bat eman beharko du.

(segurtasuneko gainerako jantziak lanpostuaren arabera).

–2 eskuoihal bainukoak urtean.

–4 gel bainukoak gutxienez.

Langile guztiak beharturik daude babeseko jantziak erabiltzera. Jantziak zaintzea eta garbitzea langileen ardura da.

Hitzarmen honetan erabaki da laneko jantzi eta arropak moldatu eta modernizatzea.

Segurtasuneko jantzi guztiak berrikusiko ditu Segurtasun eta Osasun Batzordeak.

Kanpoko kontratuak.

Kanpoko kontratuek segurtasunari buruzko barneko xedapenetan bildutakoa aitortu eta beteko dute, eta antolaketa eta barne araubideko xedapenak errespetatuko dituzte.

Horiek kontratatzeko arrazoiak dira inbertsio lanak, labeen estaldurak, garbiketak eta enpresak egin ezin ditzakeenak bere giza baliabide nola baliabide tekniko eta materialekin (makineria, erremintak, eta abar), betiere kontratazio horrek atal baten suntsipena ez badakar. Batzorde Paritarioak informazioa izan eta jarraipena eginen du.

1. mailako gidabaimena.

Magnesitas Navarras, S.A. enpresak ordainduko ditu langileen gidabaimena berritzeko tramitazioen gastuak. Enpresak berak izendatuko ditu produkzioko eta mantentze-lanetako beharrak beteko dituzten langile horiek.

Enpleguaren aldeko konpromisoa.

Magnesitas Navarras, S.A.k konpromisoa hartzen du 2013ko maiatzaren 30eko plantilla mantentzeko Magnaren jarduera errepikarietan.

Magnesitas Navarras, S.A.k konpromisoa hartzen du hitzarmen honek indarra duen bitartean (2013-2015) bukatzen diren errelebo-kontratu guztiak kontratu finko bihurtzeko.

Erretiroak

1.1. Baldintza orokorrak.

1.1.1. Akordioaren indarraldia Magnesitas Navarras S.A. enpresako hitzarmen kolektiboak 2013, 2014 eta 2015. urteetarako duena da.

1.1.2. Legeak ezarritako baldintzak betetzen dituen langile bakoitzari egokituko zaion erretiro eredua enpresaren eta langilearen artean adostuko da eta kasu bakoitzean hartutako erabakiaren berri emanen zaio enpresa batzordeari.

1.2. Erretiro partziala.

Langileak, legez indarra duen gutxieneko adinetik aurrera, erretiro partziala hartzeko eskubidea izanen du, baldin eta legez ezarritako eskakizunak betetzen baditu. Horretarako, enpresak errelebo-kontratua egin beharko du langile egokiarekin. Dena dela, honako hauek ere kontuan hartuko dira:

1.2.1. Langileak hiru hilabete aurretik egin beharko du eskaera.

1.2.2. Hemen onartzen den aukerak gehieneko murriztapenetan bakarrik izanen du balioa, indarra duen legeriari jarraituz. Murriztapen txikiagoetan, enpresaren adostasuna beharko da erretiro partziala eskuratzeko.

Zubirin, 2013ko abenduaren 18an.

ANTZINATASUNEKO OINARRIA 2013. URTEA

ZUBIRIKO LANTOKIA 2013. URTEA

Eguneko oinarrizko soldata, gaueko lanaren prima ateratzeko.

Lizentzietarako deskontuak egiteko, lanpostua: 1924 ordu urtean.

2013. URTEKO PRIMA BEREZIAK

1 Lan bereziki nekagarriak edo arriskutsuak

Lantegian bereziki nekagarriak edo arriskutsuak diren lanak hauek dira:

–Konpresorearekin lan egitea

–Labe eta hozkailuetan, 30º C baino tenperatura handiagoan lan egitea

–Eraikinen kanpoaldean konponketa lanak egitea, 12 m-ko altueran

–Hozte eremuetan lan egitea gai kaustikoa fabrikatzen denean

–Sinter siloetan lan egitea

–Kamioien solteko kargarako instalazioetan konponketa lanak egitea, funtzionamenduan dagoenean

–Gai kaustikoa palarekin edo kamioiarekin manipulatzea

–Zikloi-hautsa eta iragazkiak manipulatzea

–Hautsa eta briketak bahetu ondokoa nahastea hauts prentsarako

–Pistak makinaz garbitzea hautsa dagoenean

–Super suker kamioia

Lan horiek orduko 0,74 euro ordainduko dira.

2 Prima bereziak.

1. prima.

Goi tentsioko zutoinetan lan egitea

a) Ohiko lanaldia eguraldi onarekin: 4,37 euro orduko.

b) Ohiko lanaldia eguraldi txarrarekin: 8,81 euro orduko.

c) Ohiko lanalditik kanpo eguraldi onarekin: 5,82 euro orduko.

d) Ohiko lanalditik kanpo eguraldi txarrarekin: 11,65 euro orduko.

e) Jaiegunetan, eguraldi onarekin: 8,81 euro orduko.

f) Jaiegunetan, eguraldi txarrarekin: 17,59 euro orduko.

2. prima.

Sareak aldatzea sinter siloetan.

A.–Mailak aldatzea sinter siloen gainean: 5,82 euro orduko.

B.–Aparteko kasuetan, instalazioetako bat abian denena: 11,65 euro orduko.

3. prima.

Amaigabeen garbiketa lanak: 3,90 euro/eguna.

4. prima.

Idortegiko iragazkien ganberan, Petrocok eta labeko teilan lan egitea.

a) 2 ordu bitarte egunean: 13,88 euro.

b) 3 ordu bitarte egunean: 21,86 euro.

c) 4 ordu bitarte egunean: 21,86 euro.

d) 5 ordu bitarte egunean: 26,84 euro.

e) 6 ordu bitarte egunean: 26,84 euro.

f) 7/8 ordu bitarte egunean: 32,07 euro.

5. prima.

–Presako deiak.

• Lanegunak.
• 06:00etatik 22:00etara bitarteko deiak: 11,65 euro/eguna.
• 22:00etatik 06:00etara bitarteko deiak: 17,59 euro/eguna.
• Jaiegunak.
• 06:00etatik 22:00etara bitarteko deiak: 17,59 euro/eguna.
• 22:00etatik 06:00etara bitarteko deiak: 23,33 euro/eguna.

6. prima.

Wedag U.S.L. baheak.

–Sareak baldintza nekagarrietan aldatzea, 1,49 euro orduko.

7. prima.

Garbiketa lanak sinter siloen gainean, 2,93 euro orduko.

9. prima

a) Petrocok errotako eraztuneko penduluak aldatzea: 2,12 euro orduko.

b) Maukak aldatzea Petrocok-eko dosifikagailuko hauts iragazkian; 2,12 euro orduko.

• Jaieguneko prima: 66,91 euro.
• Gabon Gaueko prima, gaueko txandan: 222,18 euro.
• Gabon Zaharreko prima, gaueko txandan: 222,18 euro.
• Ibilgailuen Parkeko prima: 5,09 euro egunean.
• Moduluetako guardiako prima: 43,37 euro.
• Larunbateko guardiak: 71,53 euro.
• Igandeko guardiak: 143,05 euro.
• Larunbat goiza: 24,02 euro.
• Larunbat arratsaldea: 38,60 euro.
• Larunbat gaua: 66,91 euro.

MEATEGIA

Eguneko oinarrizko soldata, gaueko lanaren prima kalkulatzeko.

Urteko lanorduak: 1868.

2013. urteko prima bereziak

Harrobiko kalitate prima

ZUBIRIKO LANTOKIA 2013. URTEA

EUGIKO LANTOKIA

Iragarkiaren kodea: F1408942