2. NAFARROAKO TOKI ADMINISTRAZIOA
2.2. XEDAPEN ETA IRAGARKIAK, HERRIEN ARABERA ANTOLATUAK
LARRAGA
Aldaketa xehakatua Larragako Hirigintzako Udal Planean.
Behin betiko onespena
2014ko apirilaren 30eko osoko bilkuran hartutako erabakiaren bidez, behin betiko onetsi da Larragako Hirigintzako Udal Planeko aldaketa (hirigintzako antolamendu xehakatuko determinazioak), hirigintza araudiko 68, 70, 71, 73, 74, 76 eta 77. artikuluei dagokienez, eta Udalak berak sustatua. 2014ko 53. Nafarroako Aldizkari Ofizialean, martxoaren 18an, eta Foru Komunitatean argitaratzen diren egunkarietan iragarkia jarriz hasi zen jendaurreko epea, eta epe horretan ez da alegaziorik jaso. Beraz, argitara ematen da orain haren eduki arauemailea, Toki Araubidearen Oinarriak arautzen dituen apirilaren 2ko 7/1985 Legearen 70. artikuluari eta Lurraldearen Antolamenduari eta Hirigintzari buruzko abenduaren 20ko 35/2002 Foru Legearen 8. artikuluari jarraikiz.
Larragan, 2014ko ekainaren 10ean.–Alkatea, Antonio Lamberto Urquijo.
LARRAGAKO UDAL PLANEKO ALDAKETA XEHAKATUA
Hirigintza araudiko 68, 70, 71, 73, 74, 76 eta 77. artikuluak
68. artikulua. Okupazioaren baldintza orokorrak.
1. Eremu eraikigarriak: haien barnean eta bakarrik haien barnean zutitzen ahalko da lurzati bakoitzeko eraikin nagusia.
2. Aitzinaldeko lorategi pribatuetan: ez da deus eraikitzen ahal, finkako itxiturak baizik ez dira zutitzen ahal, baita lur zerrenda pribatu hau akabera duin batez hornitzen ahal ere (soropila, zoladurak, landaredia...).
3. Gibelaldeko patio pribatuan: eraikuntza tikiak baizik ez dira zutitzen ahal, kasuan kasuko araudiari jarraikiz.
4. Mehelinak: debekaturik daude bukatu gabeak, paramentu bukatuaren itxura ez dutenak, gainerako fatxaden moduan. Ezin da mehelin bukatu gabea agerian uzten duen eraikinik egin, aldi baterako baizik ez bada ere. Gainerako fatxaden kolore eta material berarekin bukatu beharko dira.
Eraikin guztiak gutienez ere 3 m atzera eraman beharko dira aldameneko lurzatietako mugetatik, salbu eta eraikuntza haien aldi berekoa bada, orduan eraikinak elkarri atxikitzen ahalko baitzaizkio, atzera eraman behar izan gabe.
Zilegi izanen da atzeraemangunea saihestea bi lurzatiak titular berarenak direnean edo aldez aurretik xehetasun azterlan bat tramitatzen denean.
Lurzati eraikigarri batek mehelin batekin egiten badu muga, zerrenda eraikigarriaren barnean, lurzati horretan zutitzen den eraikina mehelinari atxikiko zaio, salbu eta hura eraikuntza tiki bati badagokio.
Eraikin bat hainbat fasetan egiten bada, onartuko da mehelin bat modu iragankorrean egotea, betiere inguruabar hauek gertatzen badira:
–Eraikin osoaren proiektua aurkeztu beharko da, eta Udalak osotasun horretarako obra lizentzia emanen du, eta fasez fasez egiteko baimena.
Ez da beharrezkoa izanen proiektu orokorra aurkeztea inguruabar hauek daudenean:
- Bi lurzatiak titular berarenak direnean.
- Mehelinak ukitzen dituen mugakideen baimen espresa aurkezten denean.
–Mehelinak erakinaren gainerako atalen material berak eta fatxadako akabera berak izanen ditu.
–Mehelinaren gainean erlaitza izanen da.
5. Garajea: eremu eraikigarrian kokatzen ahalko da, eraikin nagusiko atal izanik edo hari atxikirik; bestela, eraikin txikitzat har daiteke, dagokion araudia beterik.
Orokorrean, etxebizitzen sotoak beheko solairuetako eraikuntza-lerrokaduren barnean kokatuko dira. Salbuespenez, hiri lurzoru finkatuan, gehieneko eraikuntza-lerrokadura gainditzen ahalko dute, baina ofiziala ez, baldin eta sotoa aparkalekurako gutxieneko erreserba betetzeko bada soilik.
70. artikulua. Konposizioko baldintza orokorrak.
1. Eremu publiko, plaza edo kaleko unitate bakoitzean, jarduketa unitate bati baino gehiagori badagokio ere, materialen unitate bat izanen da eremu publiko horretan egokitzen diren eraikuntzetan. Arrazoizko zalantzarik bada, Udalak zehaztuko ditu erabiliko diren materialak.
2. Fatxadak. Konposizioko ardatzei segituko zaie eraikin guztietan, beheko baoak goikoekin bat datozela.
Bi kaletara edo gehiagotara ematen duten eraikinek lerrokadura guztiak errespetatu beharko dituzte, eta fatxada nagusia izanen da eremu publiko nagusienera jotzen duena, hurrenkera honetan: plaza, kalea aurrealdeko lorategiarekin, kale arrunta (Udalaren irizpidearen arabera).
Arreta berezia eskainiko zaio etxebizitzaren sarrera nagusiari.
Etxebizitza eraikinetan, garajeko sarrera bao bat izanen da, eta gehienez ere 3 metroko zabalera edukiko du eta 3 metroko garaiera. Udalak salbuespenak baimentzen ahalko ditu neurri horietan, arrazoiturik berreskatu eta erabilera zehatza azaltzen bada.
Beheko solairuen tratamendua goikoenarekin bat etorriko da, horien konposizio ardatzei segituz, eta, hala, behin betiko alde trinkoak gutxienez ere %30 izanen dira baoekin alderatuta.
Fatxadetan onartutako material bakarrak: bistako adreilu gorria, okre argia, horia eta zuria; kolore argiz margotutako zarpiatua; hormigoia, hormigoizko bistako bloke zuria edo kolore errekoa, baina ez grisa; bistako harria; aurreko akaberen itxura ematen duten materialak (harlanduzko lana, harlangaitz-horma etab.), eta izkinetan 12 cm-ko lodiera beharko da gutxienez.
Berariaz debekatuta dago bistako instalazioak jartzea eremu publikora ematen duen fatxadan.
3. Planteatzen diren ataripeak eraikinaren konposizio ardatz orokorren arabera kokatu behar dira beti eta, hala, euskarri bertikalen arteko tarteak ez dira hiru metrotik gorakoak izanen, ataripe tradizionalen moduan. Ataripeko bao guztiak berdinak izanen dira eremu publikoko unitate bakoitzean (plaza edo kalea), eta sekzioa beti berdina izanen da luzera osoan.
4. Galeriak eta terraza estaliak fatxadaren konposizio ardatzen arabera kokatuko dira.
5. Karelak gardenak edo itsuak izanen dira beren osotasunean.
6. Zokaloak. Eraikinek bistako harri edo hormigoizko zokaloa izanen dute, 0,50 metrokoa lehen kasuan eta 0,20 metrokoa bigarrenean.
7. Teilatuek %40tik beherako malda izanen dute, eta kale aldera teilatu-hegala beti.
Teilatu-hegala honela aterako da: 30 cm 45 metrotik beherako zabalera duten kaleetan, 31-60 cm kaleen zabalera 4,01 metrotik 6 metrora bitartekoa denean, eta 60-80 cm kale eta eremu publiko zabalagoetan.
Etxebizitzetako teilatuen akaberak teila gorrixkaz eginen dira, kolore horren tonu guztietan. Urbanizazio berrietan eta hiri lurzoru finkatuko eraikin berrietan (Alde Zaharra izan ezik), baldin eta eraikin bakartuak edo etxebizitzen multzo homogeneoak ukitzen badira, baimena emanen da kolore ilunak (grisa, beltza, marroia) edo argiak (zuria, beixa) erabiltzeko, betiere multzoaren homogeneotasuna ziurtatzen bada. Barrakoietan, biltegietan eta industria nabeetan, tipologia librekoetan, zuntz-zementu gorrikoak edo metalezkoak izaten ahalko dira, hainbat motatakoak eta kolore beretan, akabera matearekin.
8. Finken itxiturak. Eremu publikoko unitate bakoitzaren aldera (plaza edo kale tartea) ematen dutenak beti berdinak izanen dira.
Orokorrean, honela osatuko dira:
–Bistako hormigoizko edo harrizko zokaloa, 20 cm-ko garaiera duena.
–Finkaren fatxada nagusiaren material berarekin egindako hormatxoa, gehienez ere metro bateko garaierakoa. Fatxadako materialen ordez beste material batzuk erabiltzen ahalko dira itxituretan, baina material nobleekin konbinatuta, hala nola bistako hormigoia, zarpiatu pintatua, harria edo antzekoa, baldin eta homogeneotasuna badago kokatzen direneko frontean.
–Metalezko hesia, gehienez ere 2 metroko garaierakoa (ez sarea), fabrikako zutabeak jarriz hiru edo lau metroko tarteetan, edo heskaia, garaiera berekoa.
Eremu publikoaren aldera ematen ez duten barneko itxiturek 2 metroko garaiera izanen dute gehienez, fatxada irekian antolatutako bi finka bereizten dituztenak izan ezik, eremu publikoaren aldera ematen dutenen tratamendu bera izanen baitute.
Binakako etxeen edo ilaran eginen kasuan, barneko itxitura goiko solairuetan ere egiten ahalko da, gehienez ere 2 metroko garaiera duten terrazak egiten direnean.
Ukitutako eremu publiko guztia hartuko duen xehetasun azterlan baten bidez, formalki doituko dira materialen antolaera eta diseinu zehatza, itxituren izaera bateratua mantenduz beti. Xehetasun azterlan hori Udaletxean aurkeztuko da, itxiturarako lehen lizentzia eman aurretik, eremu publiko bakoitzari dagokionez, eta etxesail baten itxitura ukituko du gutxienez.
Orokorrean ezarritako garaierak baino handiagoak dituzten itxiturak baimen ditzake Udalak, kasu zehatz batzuetan, lehendik daudenen, finka mugakideetako ukipen berezien edo kota desberdintasunen ondorioz. Udalak baloratuko du ea beharrezkoa den xehetasun azterlan bat tramitatzea.
9. Ingurumen intereseko eraikinak. Bolumetria, materialak eta konposizio lerro orokorrak mantenduko dira.
Multzoaren interes hori aldatuko ez duten esku-hartzeak baimenduko dira (baoak irekitzea, berriztatzea...).
Eraikin horiek ezin izanen dira eraitsi ageriko aurri egoera izan ezik; halakoetan, lehengoen lerro orokorrak mantenduko dira berreraikitzean. Kasu horietan eraikinaren azterlana eginen da, eta xehetasun azterlan gisa tramitatuko, eraisteko eta obra berria egiteko lizentziak eman aurretik.
10. Ingurumen intereseko fatxada. Konposizio lerroak, materialak eta baoen antolaera orokorra mantenduko dira.
Fatxadaren konposizioan hobekuntza ekarriko duten esku-hartzeak baimenduko dira (baoen berrantolamendua, gehitutakoak kentzea etab.), fatxadaren ildo estetiko orokorrei segituz beti.
Eraikinaren gainerakoa eraisten ahalko da, baina fatxada ez, ageriko aurri egoera izan ezik. Eraitsiz gero, lehengo fatxadaren ildo eta elementuak mantenduko dira. Kasu horretan fatxadaren azterlana eginen da, eta xehetasun azterlan gisa tramitatuko, eraisteko eta obra berria egiteko lizentziak eman aurretik.
11. Intereseko elementu bereziak. Fatxadari dagokionez gaur egun duten antolaera bera izaten segituko dute.
Eraikina eraisten bada, lehengo elementu bereziak lehengo tokiaren antzekoan jarriko dira berriz.
71. artikulua. Eraikuntza motak.
Eraikinen eredu edo mota batzuk zehaztu dira eta, horietan oinarriturik, eraikuntzako rea homogeneo batzuk planteatu dira, Larragako eraikuntzari aldi berean batasun eta aukera aski ematen diotenak.
–Etxebizitza kolektiboak. Berariaz seinalatutako eremuetan soilik egin daitezke.
–Familia bakarreko etxebizitzak. Edozein bizitegi eremutan egin daitezke, betiere honako irizpide hauei jarraikiz:
Beheko solairuko eta lehen solairuko lerrokadurak bat etorriko dira lau fatxadetan. Salbuespen gisa, baimena emanen da terraza egiteko atzealdeko fatxada osoan, gehienez ere 3 metroko sakonerarekin, edo, bestela, alboko fatxada osoetan estalki maldadunarekin, gehieneko luzera fatxada nagusiaren luzeraren erdia baino txikiagoa dela.
Patioak etxesail baten barnealdera ematen duen lurzatietan, baimena emanen da, lurzatiaren hondoan, itxiturari atxikitako eranskin bat egiteko, gehienez ere 4 metroko sakonerakoa (etxebizitzatik hurbilen dauden fatxadetatik hiru behintzat libre uzten badira); gehieneko garaiera 3 metrokoa izanen da eta gutxienekoa 2,50 metrokoa, eta estalkiak isurialde 1 edo 2 izanen du, itxitura dagoen ala ez, horren arabera.
Bizitegi erabilerako planeamenduan aurreikusitako jarduketa unitateetan, atzealdeko fatxadako terrazek gehieneko 3 metroko sakonera gainditzen ahal dute, baita zerrenda eraikigarria ere, baldin eta azalera horren soberakinak gainerako eraikigarritasun osoa edo zati bat ordezten badu (1eko baliokidetasuna), aurreko lerroaldean aipatu den eraikuntza osagarria barne. Udalak baloratuko du ea beharrezkoa den xehetasun azterlan bat tramitatzea.
Atzealdeko lorategi pribatua eremu publiko baten edo lurzoru urbanizaezinaren aldera badago, eremu eraikigarriaren barnean soilik eraikitzen ahalko dira eranskinak, betiere eraikin nagusiarekin konposizio unitate bat osatuz. Ondoko eraikinekiko erlazioaren arabera, bizitegi eraikinak honela sailkatzen dira:
–Etxebizitza bakartua.
–Binakako etxebizitza.
–Etxebizitza ilaran.
73. artikulua. Binakako etxebizitzak.
Eraikuntza proiektu bakar batean sartuko dira bi etxebizitzak.
Diseinatuko dira eraikin bakar, bakartu eta simetriko baten moduan, ondoko eraikinekin mehelinik izan gabe goiko solairuetan, eta 4 fatxadak material berberekin tratatuz.
Lurzatiko aurrealde eraiki gabea, fatxadan, eremu publikoetarako eredu-itxiturarekin mugatuko da, bi lurzatien aurrealde osoan.
Etxabearen fatxadak etxebizitzaren zabalera gainditzen badu, horren lerrokadura mantendu beharko du. Eraikin nagusiarekin konposizio unitate bat eratuko du, eta estalki maldaduna izanen du, eraikin nagusiko material berarekin egina.
74. artikulua. Etxebizitzak ilaran.
Eraikuntza zenbait fasetan egin daiteke.
Multzoa eraikin bakarraren kontzeptuari jarraikiz diseinatuko da, homogeneotasunari eutsiz fatxadaren eta estalkiaren koloreetan eta/edo materialetan.
4 fatxadak material berberez eginen dira, bai beheko solairuan bai lehen solairuan; fatxada luzatuak multzoko konposizioa izanen du.
Lurzatiko aurrealde eraiki gabea, beheko solairuan, eremu publikoetarako eredu-itxiturarekin mugatuko da, lurzatian eraiki gabeko aurrealde osoa hartuz.
Fatxada jarraituak gehienez ere 50 metroko aurrealdea izanen du.
Etxabea, alboetan, goiko solairua baino zabalagoa bada, horren lerrokadura mantendu beharko du, eraikin nagusiarekin konposizio unitate bat eratuko du eta estalki maldaduna izanen du, eraikin nagusiko material berekoa.
76. artikulua. Alde Zaharra.
Alde Zaharreko eraikuntzaren baldintza bereziak.
1. atala.–Araudi komuna.
77. artikulua. Erabilerak.
Alde Zaharreko eremuan, erabileren gaineko arauak jarraian azaltzen denaren arabera ezarriko dira, hemen aipatzen diren erabilerak baimenduz eta gainerakoak debekatuz:
A.–Sotoko solairuan: Honako erabilera hauek baimentzen dira: aparkalekuak, trastelekuak, upategiak, biltegiak eta eraikin berean dauden saltokien zerbitzuak eta eraikinaren beraren zerbitzu instalazioak.
B.–Beheko solairuan: Honako erabilera hauek baimentzen dira: saltokiak, bulegoak, jarduera profesionalak, etxebizitzak, kotxetegiak eta artisautzako lantegi txikiak eta biltegiak.
C.–Goiko solairuetan: Honako erabilera hauek baimentzen dira: etxebizitzak, jarduera profesionalak, ostalaritza zerbitzuak.
Alde Zaharreko etxebizitzak bai familia bakarrekoak bai kolektiboak izan daitezke. Etxebizitza berrien kasuan, etxebizitza bakoitzeko aparkatzeko toki bat gutxienez erreserbatu behar da lurzatiaren/eraikinaren barnean. Aparkatzeko toki horiek beheko solairuan edo sotoan egon daitezke.
Iragarkiaren kodea: L1408411