96. ALDIZKARIA - 2013ko maiatzaren 22a

1. NAFARROAKO FORU KOMUNITATEA

1.3. LURRALDEAREN ANTOLAMENDUA ETA HIRIGINTZA

ERABAKIA, Nafarroako Gobernuak 2013ko maiatzaren 8an hartua, Nafarroako Ubidearen 1. fasea eta haren eremu ureztagarria handitzeko proiektua Udalez gaindiko Proiektu Sektoriala dela deklaratzen duena. Sustatzailea Landa Garapeneko, Ingurumeneko eta Toki Administrazioko Departamentuko Landa Garapeneko Zuzendaritza Nagusia da.

I.–Aurrekariak.

–Zenbait obra hidrauliko onetsi eta interes orokorrekoak direla deklaratzen duen uztailaren 8ko 22/1997 Legeak Itoizko urtegia eta Nafarroako Ubidea onetsi eta interes orokorreko obra hidrauliko gisa deklaratu zituen.

–Ingurumen Ministerioaren eta Nafarroako Gobernuaren artean 1998ko urriaren 19an sinatutako lankidetza hitzarmena, aurreko obra hidraulikoa gauzatzeko.

–Nafarroako Ubidearen eta haren eremu ureztagarrien eraldaketaren udalez gaindiko proiektu sektoriala, Nafarroako Gobernuaren 1999ko ekainaren 7ko Erabakiaren bidez onetsia.

–Nafarroako Ubidea egiteko, Nekazaritza, Elikadura eta Ingurumeneko Ministerioaren eta Nafarroako Foru Komunitatearen arteko lankidetza hitzarmenaren Jarraipen Batzordea. Zortzigarren bileran, 2012ko uztailaren 31n, erabaki zuen bi administrazioei eta “Canal de Navarra, S.A.” elkarteari proposatzea, besteak beste, ondoko alderdi hauek aintzat hartzeko eta garatzeko jarduketak egitea:

  • Nafarroako Ubidearen 1. fasearen handitzea Nafarroako Ubidearen zati gisa ezartzea ondorio guztietarako, alde batera utzi gabe Ebroko Ur Konfederazioan eremu ureztagarria handitzeko espedientea tramitatu beharra, betiere gaur egungo kontzesioarekin alderatuta eta emaria handitu gabe.
  • Nafarroako Ubideari eta haren eremu ureztagarriari buruzko Udalez gaindiko plan sektoriala eta Ingurumen eraginaren adierazpena egunera daitezela sustatzea, Nafarroako Ubidearen 1. fasea handitzearekin lotzeko.
  • Beharrezkoak diren tramiteak eta ekimenak ahalik eta gehien arintzea, Nafarroako Ubidearen 1. fasea handitzeko lanen eraikuntza 2013. urtean hasi eta 2015. urtean amaitu dadin.

Azalera ureztagarria handitzea onetsi zen ureztatzeko teknika berriek ekartzen duten aurrezpena ikusi ondoren. Izan ere, haiekin ur gutxiago kontsumitzen da hektarea bakoitzeko, hasieran aurreikusi zenaren aldean. Horretaz gain, antzeman da interes soziala dagoela Ega eta Arga ibaietako beheko tarteetan Nafarroako Ubidetik ureztatzeko presio naturalaren bidez.

–Ebro Arroako 2010-2015 Plan Hidrologikoaren proposamena, jendaurrean paratu zena arro horretako Ur Kontseiluak 2012ko apirilaren 25ean egin bilkuran hartutako erabakiaren bidez. Bertan, 59.160 ha jasotzen dira Nafarroako Ubidearen eremu ureztagarri gisa, eta batik bat Arga-Ega adarraren 1. fasea handitzeko eremuko 15.275 hektareak (araudiaren 53. artikulua, “Baliabideak esleitzea 16. Ustiapen Batzordean: Iratiko, Argako eta Egako arroak”).

–102/2012 Foru Dekretua, irailaren 5ekoa, “Nafarroako Ubidearen 1. fasea handitzea” proiektuko eremu ureztagarria Nafarroako Foru Komunitateko Ureztatze Planeko jarduketen zerrendan sartzea onesten duena.

II–Proposamenaren deskripzioa. Alderdi orokorrak.

Ondoko agiri hauek osatzen dute proiektu sektoriala:

–Nafarroako Ubidearen 1. fasea (Arga-Ega adarra) eta haren eremu ureztagarria handitzeko Udalez gaindiko Proiektu Sektoriala. 2013ko maiatza.

–Ingurumen eraginaren azterlana. 2013ko maiatza.

–Nafarroako Ubidearen 1. fasea handitzeko Udalez gaindiko Proiektu Sektoriala onetsi aurreko eta onetsi ondoko jarduketetan parte-hartze publikoaren prozesua deskribatzen duen memoria.

Gainera, honako agiriak aurkeztu dira:

–Eraikuntzako aurreproiektua (oinarrizko proiektua), Nafarroako Ubidearen 1. fasea handitzeko eremu ureztagarriarena. 2011ko abendua.

–Arga-Ega adarraren aurreproiektua, Nafarroako Ubidearen 1. fasea handitzeko. 2011ko abendua.

UPrSak aintzat hartzen du 15.275 Ha ureztalur bihurtzea eta berrantolatzea azalera horretako lurzatiak, perimetroko zenbait lehorreko lur gehituta, non lurrak ureztalur bihurtzeari muzin egiten dioten titularren jabetzak biltzen ahal baitira.

Jarduketak ukitutako azaleran, Andosillako, Azagrako, Berbintzanako, Carcarko, Faltzesko, Funesko, Larragako, Leringo, Lodosako, Mendigorriko, Miranda Argako, Oteitzako, Azkoiengo, San Adriango eta Sesmako udal mugapetako lurzoruak sartzen dira.

Eremu ureztagarriak ureztatzeko bost sektore dauzka, Nafarroako Ubidetik aurreikusitako Arga-Ega adarraren bidez edo handitzeko hodiaren bidez hornituko direnak. Honako hauek dira sektorearen izenak, Ubidearen egungo sektoreen izenei jarraikiz: XXII, XXIII, XXIV, XXV eta XXVI. Bere aldetik, XXII. sektoreak 6 eremu dauzka, eta XXVI.ak, berriz, 9 eremu.

Sektore horiek, ureztalur bihurtu eta gisa horretan finkatu beharrekoek, 15.275 Ha ukitzen dituzte, zuzkidurarako 5.747 m³/Ha dauzkatela. Presioaren bidez ureztatzeko taxutu dira (aspertsioa, piboteak, mikroaspertsioa eta tantaka), ura erabiltzeko efizientzia handiak dituztela (%75-%90 bitartekoa) eta %85eko bermea.

Ureztatzeko behar adinako presiorik ez duten eremuetan, ponpaketaren bidez lagunduko zaio ureztaketari. Egun, eremu gehienak ponpaketaren bidez ureztatzen dira. Ponpaketaren altuera murriztuko da, eta, horrenbestez, energiaren kontsumoa ere bai.

Ubidearen ureztaketa berriek ekartzen dituzten obrekin batera, proiektu honetan ureztalur bihurtuko diren eta/edo modernizatuko diren lurzatiak berrantolatuko dira (Nekazaritzako Azpiegiturei buruzko martxoaren 7ko 1/2002 Foru Legea). Obretan, funtsean, lurzatietarako zerbitzu bideen sare bat eginen eta lurzatien saneamendua gauzatuko, ibilgu irekiko azaleko drainatze sare baten bidez.

Honako hauek dira UPrSean aurreikusi diren azpiegiturak:

–Harguneko obra, Nafarroako Ubidearen VI. tartetik, eta iragazpen estazioa.

–Garraio eroanbidea Nafarroako Ubidetik: Arga-Ega adarra.

–Arga-Ega adarreko zerbitzu bidea.

–Sektoreko harguneak.

–Sektoreko hodi nagusiak 15.275 hektareatarako.

–Ureztatzeko sarea 11.436 hektareatarako (gainerako azalak, 15.275 ha bitarte, ureztatzeko hornidurak dauzka proiektu hau gauzatu aurretik, eta, hortaz, uraren jatorria aldatuko da soilik).

–Lurzati berrantolamenduaren berezko bideen eta saneamenduaren sarea, ureztalurreko 11.436 hektareatarako eta lehorreko lurreko 3.632 hektareatarako.

Arga-Ega adarrari dagokionez UPrS honetan guztira aurreikusitako inbertsioa, agiriaren arabera, 48.0513.387,81 eurokoa da (kontrata bidez gauzatzeko aurrekontua). Hura finantzatuko da Ingurumen Ministerioaren eta Nafarroako Foru Komunitatearen artean izenpetutako lankidetza hitzarmenaren arabera.

Eremu ureztagarria eraldatzeko kostua, guztira, 185.280.124,65 eurokoa da (kontrata bidez gauzatzeko aurrekontua).

Aurreikusten da UPrS honetan kontuan hartzen diren eremu guztiak ureztatzen ahalko direla 2019ko bigarren hiruhilekoan.

III.–Lurraldeari eta hirigintzari buruz kontuan hartu beharrekoak.

III.1. Lurraldearen antolamendurako tresnak.

UPrSak aztertu du haren koherentzia Erdialdeko Eremuetako Lurraldearen Antolamenduko Planarekin (POT4) eta “Ebroko ardatza” Lurraldearen Antolamenduko Planarekin (POT5). Horiek maiatzaren 16ko 46/2011 Foru Dekretuaren bidez eta maiatzaren 16ko 47/2011 Foru Dekretuaren bidez onetsi ziren hurrenez hurren (2011ko uztailaren 21eko Nafarroako Aldizkari Ofiziala).

Nolanahi ere, Uraren Zerbitzuak 2013ko maiatzaren 3an egindako txostenaren edukia kontuan hartuz (erabaki honen VI. atalean aipatzen da), bai eta plan horietan jasotzen diren irizpideak ere UPrSean aurreikusitako jarduketek ukitzen dituzten babes bereziko eremuetarako, UPSeko eremutik kanpo gelditu behar dira interes bereziko landareria eremuak.

III.2. Udal planeamendua.

Proposatutako jarduketek lurzoru urbanizaezinak ukitzen dituzte soilik. UPrSak biltzen ditu, udalerri bakoitzean, lurzoru urbanizaezinaren kategoriak, eremu ureztagarriek, ureztatzeko azpiegiturek edo lurzati berrantolamenduak ukitzen dituztenak. Orobat, kategoria horiek babesteko araubideak aztertzen ditu eta argudiatzen du bateragarriak diren proposatutako jarduketekin.

III.3. Proposatutako babes araubideak.

UPrSak atal bat du erantsita (azpiegitura ezartzeko erregulazioa), non ezartzen baita zein diren lurzoru urbanizaezinaren kategoria eta azpikategoriak, baita berariazko babes araubideak ere ureztatzeko azpiegiturek edo ureztatzeko eremuek okupatu beharreko lurzoruetarako (ez soilik lurzatiak berrantolatzeko prozesuak ukituko dituen lurzoruetarako).

Proposatutako araubideak baloratzen hasi aurretik, beharrezkoa da adieraztea ezen, agiria hobeki ulertzeko, babes araubide horiek berariazko atal batera (proposatutako araudia izenekoa) sartu behar direla, UPrSeko memoria kontuan izan gabe. Halaber, proposatutako jarduketa zein den aintzat hartuta, beharrezkotzat jotzen da UPrSa osatzea, LAHFLaren 44. artikuluak ahalbidetzen duen moduan eta indarreko UPSean jasotzen den bezala, bere edukia egokitzea baimentzen duten prozedurekin. Egokitze horiek obrak gauzatzearen ondorioz eskatzen ahal dira, eta, horrelakoetan, saihestuko da UPrSeko aldaketak tramitatzea.

Eremu ureztagarriak.

Nekazaritzako Azpiegiturei buruzko martxoaren 7ko 1/2002 Foru Legeak, eremu ureztagarriak babesteko, igortzen du indarrik gabeko 10/1994 LAHFLean produktibitate handiko lurzoruetarako ezarritako araubidera. Testuinguru horretan, UPrSak adierazi du lurzoru kategoria hori babesteko espiritua edo esanahia biltzen dela babes bereziko eremuetarako POTetan jasotzen den araubidean (natura aldetik ustiatzeko balioa duen babestu beharreko lurzoru urbanizaezina, nekazaritzarako emankortasun handiko lurzoruak). Horrenbestez, UPrSak ezarri du bertan jasotako eremu ureztagarriek okupatuko dituzten lurzoruek hartuko dituztela babestu beharreko lurzoru urbanizaezinaren kategoria, natura aldetik ustiatzeko balioa duen lurzoruaren azpikategoria eta ureztalurren azpikategoria. Halaber, lurzoru horretarako proposatu du nekazaritzarako emankortasun handiko lurzoruetarako POTetan jasotzen den araubidea.

Orobat, lurzoru horietarako, UPrSak ondoko araubide iragankorra ezarri du: “UPrS honetatik eratortzen diren instalazio edo jarduketak non kokatzen diren zehazki ezartzen edo finkatzen duten exekuzio proiektuekin bateraezinak diren eraikuntzarako jarduerak gauzatu ez daitezen, INTIAko Ureztapenen eta Azpiegituren Atalaren edo Landa Garapeneko, Ingurumeneko eta Toki Administrazioko Departamentuaren aldez aurreko txosten bat eskatuko da”.

Adierazitakoaren harira, komeni da gogoraraztea Nafarroako Ubidearen eta haren eremu ureztagarrien eraldaketaren udalez gaindiko proiektu sektorialak, Nafarroako Gobernuak 1999ko ekainaren 7an hartutako Erabakiaren bidez onetsiak, eta Nekazaritzako Azpiegiturei buruzko martxoaren 7ko 1/2002 Foru Legeak, bertan jasotako eremu ureztagarriek ukitutako lurzoruak babesteko araubiderako indarrik gabeko 10/1994 LAHFLan produktibitate handiko lurzoruetarako ezarritakora igortzen dutela.

Agerikoa da berdin-berdinak direla egun indarra duen UPrSeko eremu ureztagarrian babestu beharreko baloreak eta orain tramitatzen ari den UPrSekoak. Alde horretatik, ezin da justifikatu izaera bereko eremu ureztagarri horiek babes araubide desberdina izatea, eta, hortaz, proposatu da orain esku artean dugun UPrSak, halaber, helburu izan dezan Nafarroako Ubidearen eta haren eremu ureztagarrien UPrSeko eremu ureztagarrien araubidea aldatzea, Ubideko eremu ureztagarri berrietarako proposatutakoarekin parekatzeko. Gisa horretan saihestuko da indarrik gabeko lurzoruaren kategoria batera eta araubide batera igortzea.

Araubide iragankorrari dagokionez, ulertu da modu berean jokatu behar dela, araubide hori berdina izan dadin Nafarroako Ubideko eremu ureztagarri guztietarako (indarreko UPrSean oraindik ureztatzen hasi ez direnak eta orain proposatutakoak).

Orain, zehaztu beharko da noiz den aplikagarria araubide iragankorra, eta erantsiko da, Ubideko egungo eremu ureztagarrietarako ezartzen den bezala, iragankortasuna aplikatuko dela haietan ureztapena abiatzeko deklarazioa egin arte.

Azpiegitura hidraulikoak.

UPrSak ezartzen du ezen Nafarroako Ubideko adarreko azpiegitura hidraulikoek eta Argako eta Egako sektoreetako hodi handiek ukitutako lurzoruak babestu beharreko lurzoru urbanizaezinaren kategorian sailkatzen direla (azpiegituretarako lurzorua), eta proposatu da, lurzoru horietarako, ondoko babes araubidea:

“Azpiegiturek okupatutako lurzoruetan eta haien babes zerrendetan baimentzen ahal dira azpiegiturarekin bateragarriak diren jarduerak eta erabilerak, eraikuntzakoak nahiz eraikuntzaz kanpokoak, betiere azpiegitura kontserbatzeko, mantentzeko edo zerbitzuz hornitzeko besterik ez badira. Kontserbatzeko, mantentzeko edo zerbitzuz hornitzeko azken jarduera horiek baimenduko dira.

a) Nafarroako Ubideko Arga-Ega adarrari eta Argako eta Egako sektoreetako bi hodi nagusiei dagozkien obra guztiak gauzatzen ez diren bitartean, 25 metro ezartzen dira albo bakoitzean babes zerrenda gisa, hura garatzeko aurreikusitako igarotze guneko kanpoko ertzetik neurtuta.

b) Obrak gauzatu ondoren, eraikuntzako tartea 25 metrokoa izanen da, hodietako igarotze guneko kanpoko ertzetatik neurtuta.

Hiriguneak edo eremu urbanizagarriak, edo tokian tokiko hirigintzako planeamenduaren bidez zenbait eraikuntza aurreikusita dituzten eremuak zeharkatzen dituzten tarteen kasuetan, tarte hori murrizten ahal da, organo eskudunak aldeko txostena egin ondoan.”

Araubide horri dagokionez, proposatzen da ondotik ematen den aldaketa kontuan izatea: honela dioen tokian: “Hiriguneak edo eremu urbanizagarriak, edo tokian tokiko hirigintzako planeamenduaren bidez zenbait eraikuntza aurreikusita dituzten eremuak zeharkatzen dituzten tarteen kasuetan, tarte hori murrizten ahal da, organo eskudunak aldeko txostena egin ondoan” honako hau ezartzea: “hiri lurzoruan edo lurzoru urbanizagarrian, zerrenda edo tartea murrizten ahal da, organo eskudunak aldeko txostena egin ondoan.”

III.4. Parte hartzeko prozesua.

2012ko 213. Nafarroako Aldizkari Ofizialean argitaratu zen, urriaren 30ean, Lurraldearen Antolamenduari eta Hirigintzari buruzko abenduaren 20ko 35/2002 Foru Legearen 42. artikulua aldatzeko urriaren 19ko 16/2012 Foru Legea.

Artikulu horretako idazketa berria kontuan hartuz, 2013ko abenduaren 11n, sustatzaileak espedientea osatu du UPrSak izan dituen edo izanen dituen parte-hartze publikoko prozesuak biltzen dituen agiri batekin, baita egindako prozesuetan jaso diren iradokizunak eta/edo ekarpenak eta parte-hartze horren emaitza ere (balorazioa eta, kasuaren arabera haiek sartu diren ala ez).

IV.–Txosten sektorialak.

UPrSean erantsi dira ondoko erakundeen txostenak, ingurumenaren arloko aldez aurreko kontsulten fasean igorriak:

–2011ko ekainaren 8ko txostena. Kulturako, Turismoko eta Erakunde Harremanetako Departamentua. Kultura Zuzendaritza Nagusia. Vianako Printzea Erakundea. Arkeologia Atala.

–2010eko irailaren 1eko txostena. Landa Garapen, Industria, Enplegu eta Ingurumen Departamentua. Ingurumenaren eta Uraren Zuzendaritza Nagusia. Ingurumen Kalitatearen Zerbitzua.

–2011ko ekainaren 8ko txostena. Sustapen eta Etxebizitza Departamentua. Herri Lan Zuzendaritza Nagusia.

Txosten horiek guztiak aldekoak dira eta exekuzio proiektuetarako eta obrak egiteko determinazioak dituzte.

Orobat, UPrSean ondoko txostena jaso da:

–Ebroko Ur Konfederazioa.

2007ko ekainaren 6ko ebazpena, Nafarroako Ubidetik ateratako ur publikoen aprobetxamenduaren transferentzia Nafarroako Ubideko ureztatzaileen elkartearen alde onetsi zuena.

UPrSa tramitatzeko aurkeztu ondoren, sektoreko txosten hauek eskatu eta jaso dira:

–Ebroko Ur Konfederazioa.

2013ko martxoaren 11n jasotako txostenean ondokoa adierazi zuten:

“Aurkeztutako dokumentazioa aztertu ondoren, ez da argi gelditu kontzesioaren emaria edo handik ateratako gehieneko bolumena handitzeko eskatuko den, bertan soilik zehazten baitira proiektatutako Arga-Ega adar berritik joanen diren emariak, obren neurrien kalkuluak justifikatzeko ureztatu beharreko azaleraren arabera.

Jarduketek kontuan hartzen dutenez ureztapena abiaraztea Nafarroako Ubideko ureztatzaileen elkarte orokorraren egungo kontzesio tituluak babesten ez duen azalera batean eta obrak soilik ez direnez eginen jabari publikoaren barruan eta jabari publikoaren gainean, ulertu da ezen, kasu guztietan, ureztatzaileen elkarte orokor horrek eskaera aurkeztu beharko duela Ebroko Ur Konfederazioaren 2004ko apirilaren 14ko Ebazpenak emandako kontzesioaren ezaugarriak aldatzeko (Uren Erregistroaren A ataleko 39. liburukia 82. orrian inskribatua), Ur Jabari Publikoaren Erregelamenduaren 143. artikuluan eta hurrengoetan ezarri bezala.

Horregatik, proiektatutako edo eskatutako jarduketek aldaketa bat ekartzen badute uraren erabilera berriak ezartzeko emandako emaria handitzearen bidez, edo atera beharreko urteko edo hileko gehieneko bolumenak aldatzen badira, ezaugarriak aldatzeko ebazpen irmo bat eduki beharko da, obrak egiten hasi baino lehenago.

Aurkeztutako dokumentazioak ez du zehazten zein diren uraren jabari publikoaren gaineko balizko ukipenak ezta zein diren egin beharreko lanak edo haietan erabili beharreko makineria ere, baina erantsi du proiektatutako ubideak ibilgua zein tokitan, seguru aski, zeharkatuko duen tokien zerrenda. Aurretik aipatutako edozein kasutan, uraren jabari publikoa ur jabari publikoko lanei dagokienez ukitzen ahal dela aurreikusita, ondoko irizpide tekniko hauek aurreratzen dira kontuan har ditzaten obrak gauzatzeko proiektua prestatzeko orduan: ...”.

–Landa Garapen, Industria, Enplegu eta Ingurumen Departamentua. Uraren Zerbitzua.

2013ko martxoaren 15ean, Uraren Zerbitzuko zuzendariak txosten bat egin zuen, non berretsi baitzen, Ur Baliabideen Atalak 2012ko urriaren 5ean ingurumen arloko aurretiko kontsulten fasean egindako txostenean bezala, ureztapena transformatzeko eta modernizatzeko jarduketatik kanpo gelditu behar zirela “Ibaia aldeko eremua. Ibilgu eta ibaiertzetako sistema” delakoan sartutako ureztapen eremuak, POTetan ezarritakoarekin bat, eremu horretan soilik baimentzen ahal baitira uholdeekin bateragarriak diren jarduketak.

–Sustapen Departamentua. Herri Lan Zuzendaritza Nagusia.

2013ko martxoaren 19an, Zuzendaritza Nagusi horri eskatu zaio txostena. Txosten horren ondorioak kontuan hartuko dira espedienteari buruzko ebazpenean.

V.–Ingurumen arloan kontuan hartu beharrekoak.

Landa Garapen, Industria, Enplegu eta Ingurumen Departamentuko Ingurumenaren gaineko Eragina Aztertzeko Atalak, 2013ko martxoaren 11n, txostena egin zuen non adierazi baitzen ingurumen eraginaren azterlana onartzeari buruzko dokumentazioa osaturik dagoela eta jendaurrean para daitekeela gainerako dokumentazio teknikoarekin eta UPrSarekin batera.

Bestalde, Nekazaritza, Elikadura eta Ingurumeneko Ministerioak ingurumenaren gaineko eraginaren ebaluazioaren prozedura abian jarri zuen Nafarroako Ubidearen 1. fasea (Arga-Ega adarra) eta haren eremu ureztagarria (Nafarroa) handitzeko proiektuan. Prozedura hasita, ministerio horrek jakinarazi die 2013ko martxoaren 6an Ingurumenaren eta Uraren Zuzendaritza Nagusiari eta Nekazaritza eta Abeltzaintza Zuzendaritza Nagusiari kontsultatzeko garai bat zabalduko dela proiektu horren ingurumenaren gaineko eraginaren ebaluazioan. Ondorio horietarako, eskura jarri ditu bere web orrian hasierako agiria eta proiektu horren planoak.

UPrS hau ebazteko, ingurumen arloko tramiteak ebatzi beharko dira.

VI.–Lurraldearen Antolamenduko Batzordea.

Lurraldearen Antolamenduko Batzordeak 2013ko martxoaren 26an egin bilkuran erabakitakoarekin bat, sustatzaileak txosten bat aurkeztu zuen 2013ko maiatzaren 3an, Uraren Zerbitzuak 2013ko martxoaren 15ean egindako txostenari erantzuteko, eta, halaber, proiektu sektorialaren eta ingurumen ondorioen azterlanaren beste agiri bat aurkeztu zuen, haien edukiak koordinatuta.

Aurkeztutako txostenari dagokionez, Uraren Zerbitzuak, 2013ko maiatzaren 3an, aldeko txostena egin zuen uholde eremuen tratamenduari dagokionez Nafarroako Ubidearen 1. fasearen handitzean. Txostenak, obra publikoaren kontzesiorako kontratuan, eraikuntzako proiektuak prestatzeko, aurreikuspen bat jaso zuen uholde-arriskuari buruz, nahitaez bete beharreko kapitulu batean. Alde horretatik, txostenak ezarri zuen zerbitzu horrek egin behar dituela txostenak eraikuntzako proiektuen inguruan.

Horrenbestez, Lurraldearen Antolamenduko Batzordearen 2013ko martxoaren 26ko txostenarekin bat, eta Lurraldearen Antolamenduari eta Hirigintzari buruzko abenduaren 20ko 35/2002 Foru Legeari eta aplikatu beharreko gainerako arauei jarraikiz, Nafarroako Gobernuak, Sustapeneko kontseilariak proposaturik,

ERABAKI DU:

1. Nafarroako Ubidearen 1. fasea handitzeko proiektua Udalez gaindiko Proiektu Sektoriala dela deklaratzea. Sustatzailea Landa Garapeneko, Ingurumeneko eta Toki Administrazioko Departamentuko Landa Garapeneko Zuzendaritza Nagusia da.

2. Sustatzaileari adieraztea ezen, proiektu hau ebatzi aurretik, bertan sartu beharko dituela erabaki honen III. atalean (Lurraldeari eta hirigintzari buruz kontuan hartu beharrekoak) eta VI.ean (Lurraldearen Antolamenduko Batzordea) ezarritakoa.

3. Proiektuari buruzko txosten sektorialetan xedatutakoa beteko du sustatzaileak.

4. Sustatzaileari adieraztea UPrS hau ebazteko, ingurumen arloko tramiteak ebatzi beharko direla.

5. Adierazpen honek ez ditu deusetan galaraziko obrak egiteko behar diren baimen guztiak.

6. Espedientea jendaurrean jartzea hogeita hamar eguneko epean erabakia Nafarroako Aldizkari Ofizialean argitaratuz eta, aldi berean, entzutea ematea bertan kontuan hartzen diren jarduketek udal mugapea ukituta duten udalerriei.

Ondorio horietarako, espedientea interesdunen eskura egonen da Sustapen Departamentuaren bulegoetan (Alondegi kalea, 1-1. solairua, 31002 Iruña), eta epe horretan zilegi izanen da idatziz nahi adina alegazio aurkeztea.

7. Era berean, espedientea jendaurrean jartzea epe berean, ingurumenaren gaineko eraginaren ebaluazioaren prozeduraren ondorioetarako, indarra duten legezko zehaztapenekin bat.

Ondorio horietarako, Ingurumen eraginaren azterlana interesdunen eskura egonen da Landa Garapeneko, Ingurumeneko eta Toki Administrazioko Departamentuaren bulegoetan (González Tablas kalea, 7, 31005 Iruña).

8. Erabaki hau Nafarroako Aldizkari Ofizialean argitaratzea eta igortzea Kultura Zuzendaritza Nagusiari, Herri Lan Zuzendaritza Nagusiari, Ingurumen Kalitatearen Zerbitzuari eta Uraren Zerbitzuari, Lurraldearen Antolamendu eta Hirigintza Zerbitzuari, Ebroko Ur Konfederazioari, Andosillako, Azagrako, Berbintzanako, Carcarko, Faltzesko, Funesko, Larragako, Leringo, Lodosako, Mendigorriko, Miranda Argako, Oteitzako, Azkoiengo, San Adriango eta Sesmako udalei, sustatzaileari eta INTIAri, behar diren ondorioak izan ditzan.

Iruñean, 2013ko maiatzaren 8an.–Nafarroako Gobernuko kontseilari eta idazkaria, Javier Morrás Iturmendi.

Iragarkiaren kodea: F1306823