1. NAFARROAKO FORU KOMUNITATEA
1.3. LURRALDEAREN ANTOLAMENDUA ETA HIRIGINTZA
21E/2013 FORU AGINDUA, apirilaren 2koa, Sustapeneko kontseilariak emana, Igantziko "Irisarri Jauregia" turismo eta aisialdirako gunearen plan berezi independentearen espedientea behin betiko onesten duena. Sustatzailea Canteras Yanci, S.A. da.
Igantziko Udalak idazpuruan deskribatutako hirigintzako plana aurkeztu du Sustapen Departamentuan, behin betiko onesteko. Hirigintzako espedienteak nekazaritzako, turismoko eta aisialdiko erabilerak dauzka, horiek 72 hektareako ingurune natural batean garatzeko, antzinako Irisarri Jauregia dagoen tokian.
Ikusita aurkeztu den dokumentazioa, baita Lurraldearen Antolamendu eta Hirigintza Zerbitzuaren txostena ere, bidezkotzat jotzen da hura behin betiko onestea.
Sustapen eta Etxebizitza Departamentuaren (gaur egun Sustapen Departamentua da, ekainaren 22ko 11/2012 Nafarroako Foru Komunitateko Lehendakariaren Foru Dekretuan eta ekainaren 27ko 30/2012 Foru Dekretuan ezarritakoaren arabera) egitura organikoa ezartzen duen abuztuaren 24ko 143/2011 Foru Dekretuak emandako ahalmenak erabiliz,
AGINDU DUT:
1. Behin betiko onestea Igantziko "Irisarri Jauregia" turismo eta aisialdirako gunearen plan berezi independentearen espedientea, Canteras Yanci, S.A.k sustatua.
2. Adieraztea foru agindu honek ez duela administrazio bidea amaitzen. Interesdunek, administrazio publikoek izan ezik, gora jotzeko errekurtsoa jartzen ahalko dute legezkotasuna kontrolatzea helburu duen egintza honen kontra, Nafarroako Gobernuari zuzendua, foru agindu hau jakinarazi eta biharamunetik edo, hala denean, Nafarroako Aldizkari Ofizialean argitaratu eta biharamunetik hilabeteko epean.
Halaber, onetsitako hirigintza araudiaren kontra administrazioarekiko auzi-errekurtsoa jar daiteke, Nafarroako Justizia Auzitegi Nagusiko Administrazioarekiko Auzien Salari zuzendua, edukia Nafarroako Aldizkari Ofizialean argitaratu eta bi hilabeteko epean, dagokion udalak eskaturik.
Administrazio publikoek zilegi dute administrazioarekiko auzi-errekurtsoa jartzea, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean. Horrek ez du galarazten Nafarroako Gobernuan aldez aurreko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean.
3. Foru agindu hau Canteras Yanci, S.A.ri eta Igantziko Udalari jakinaraztea, dagokion hirigintzako araudia Nafarroako Aldizkari Ofizialean argitaratzeko ondorioetarako, ohartarazita sustatzaileak men egin beharko diela espedientean dauden txosten sektorialetako determinazioei. Horiek obren gauzatzeari edo jardueraren funtzionamenduari ezarri zaizkie, eta tramitazioan zehar igorri dira.
4. Foru agindu hau Nafarroako Aldizkari Ofizialean argitaratzea, behar diren ondorioak izan ditzan.
Iruñean, 2013ko apirilaren 2an.–Sustapeneko kontseilaria, Luis Zarraluqui Ortigosa.
Iragarkiaren kodea: F1304902
