1. NAFARROAKO FORU KOMUNITATEA
1.7. BESTELAKOAK
ERABAKIA, Nafarroako Gobernuak 2013ko otsailaren 20an hartua, “Arrabal kaleko obrak eta zoladura berritzea” izeneko proiektuaren lanek ukitutako ondasun eta eskubideen okupazioa presakoa dela adierazten duena, nahitaez desjabetzeko; sustatzailea Barillasko Udala da.
Barillasko Udalak 2012ko irailaren 18ko Osoko Bilkuran hartutako erabakiari jarraikiz, jendaurrean jarri ziren, hamabost egunez, aipatutako proiektua eta ukitutako ondasun eta eskubideen zerrenda.
Jendaurrean egoteko epea alegaziorik aurkeztu gabe bukatuta, Barillasko Udalak, 2012ko abenduaren 27ko Osoko Bilkuran hartutako erabakiaren bidez, behin betiko onetsi zuen aipatutako proiektua.
Barillasko Udalak proiektua gauzatzean ukituko diren ondasun eta eskubideen okupazioa presakoa dela adierazteko eskatu du, obrak azkar egitea ezinbestekoa dela alegatuta, ibilgailu astunak hiri bide horretan barna segurtasunez iragan daitezen arrisku egoerarik gabe; izan ere, obren helburua, besteak beste, Barillasko Arrabal kalearen tarte bat zabaltzea da.
Nafarroako Gobernuak, Barillasko Udalak eman dituen arrazoiak ikusita, bidezkotzat jo du desjabetze horrek ukitutako ondasun eta eskubideen okupazioa presakoa dela adieraztea.
Horrenbestez, dagokion txosten juridikoa ikusita, balio justua pagatzeko behar adina kreditu atxiki dagoela egiaztatuta, Nafarroako Foru Eraentza Berrezarri eta Hobetzeari buruzko Lege Organikoaren 57 b) artikuluaren bidez aitortu zaizkion eskumenen arabera, Nafarroako Gobernuak, Landa Garapeneko, Ingurumeneko eta Toki Administrazioko kontseilariak proposatuta,
ERABAKI DU:
1. “Arrabal kaleko obrak eta zoladura berritzea” izeneko proiektua gauzatzean ukituko diren ondasun eta eskubideen okupazioa presakoa dela adieraztea, nahitaez desjabetzeko, Nahitaezko Desjabetzapenari buruzko Legearen 52. artikuluan xedatutakoari jarraituz. Proiektua Barillasko Udalak sustatu du.
2. Erabaki hau Nafarroako Aldizkari Ofizialean argitaratzea, egun horretatik beretik ondorioak izateko, eta aditzera ematea erabaki honek administrazio bidea amaitzen duela, eta horren aurka, aukeran, berraztertzeko errekurtsoa jartzen ahal dela, Nafarroako Gobernuari zuzendua, Nafarroako Aldizkari Ofizialean argitaratu eta biharamunetik hasita hilabeteko epean edo, bestela, zuzenean, Nafarroako Justizia Auzitegi Nagusiko Administrazioarekiko Auzien Salan aurkaratzen ahal dela, argitaratu eta biharamunetik hasita bi hilabeteko epean.
Administrazio publikoek, berraztertzeko errekurtsoaren ordez, aldez aurretik errekerimendua egin dezakete, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean.
3. Erabaki hau Barillasko Udalari jakinaraztea.
Iruñean, 2013ko otsailaren 20an.–Nafarroako Gobernuko kontseilari eta idazkaria, Javier Morrás Iturmendi.
Iragarkiaren kodea: F1302789
