1. NAFARROAKO FORU KOMUNITATEA
1.7. BESTELAKOAK
342/2013 EBAZPENA, urriaren 29koa, Vianako Printzea Erakundea-Kulturako zuzendari nagusiak emana, XVI., XVII. eta XVIII. mendeetako lakazko 13 lanen multzoa, Japoniatik eta Espainia Berriko erregeordetzatik inportatuta datorrena, kultur intereseko ondasun deklaratzeko espedientea irekitzen duena.
Ondasun Higigarrien eta Ondarearen Erregistroaren Atalak txosten bat aurkeztu du, eta bertan proposatu hurrengo ondasunak kultur intereseko ondasun deklaratzeko espedientea irekitzea: Miranda Argako Jasokundearen parrokiako Namban kutxatila (Nafarroako IKH zenbakia: 131), Ondasun Higigarrien Inbentario Orokorrean sartua I-M-04-0001176-00000 idatzohar kodearekin; Morentingo San Andres parrokiako Namban kutxatila (Nafarroako IKH zenbakia: 854), Ondasun Higigarrien Inbentario Orokorrean sartua I-M-04-0001203-00000 idatzohar kodearekin; Tuterako San Jorge parrokiako Namban kutxa (Nafarroako IKH zenbakia: 1.873), Ondasun Higigarrien Inbentario Orokorrean sartua I-M-04-0001371-00000 idatzohar kodearekin; Olkozko San Migel parrokiako Namban atrila (Nafarroako IKH zenbakia: 2.888), Ondasun Higigarrien Inbentario Orokorrean sartua I-M-04-0001439-00000 idatzohar kodearekin; Tuterako Udaletxeko Namban atrila (TUD. 157); Tuterako katedraleko Namban kutxa (Nafarroako IKH zenbakia: 3.598); Cortesko Donibane Bataiatzailearen parrokiako bi Namban kutxa (Nafarroako IKH zenbakiak: 3.599 eta 3.600); Iruñeko Agustindar Errekoletoen komentuko Namban kutxa eta kutxatila (Nafarroako IKH zenbakiak: 3.601 eta 3.602); Iruñeko Agustindar Errekoletoen komentuko Japoniako lakazko idazmahaia (Nafarroako IKH zenbakia: 3.603); Mendigorriko San Pedro parrokiako kutxatila, Espainia Berriko erregeordetzako estilokoa (Nafarroako IKH zenbakia: 3.604); eta Iruñeko katedraleko kutxatila, Espainia Berriko erregeordetzako estilokoa (Nafarroako IKH zenbakia: 3.605).
Japoniako Namban lakazko lanak Japoniatik Espainiara etortzen ziren luxuzko salgaiak izan ziren XVI. eta XVII. mendeetan, lehen josulagunak herrialde hartara iritsita Iberiar Penintsularen eta Japoniaren arteko topaketaren fruitu, horrexek bi herrialdeen arteko artelanen trukea ekarri baitzuen. Namban estiloaren ezaugarria urushi laka erabiltzea da eta apaingarri asko ditu –landare eta lore xumeak, hegazti eta animaliez lagunduta–, partikula finak edo urrezko eta zilarrezko hautsak trinko hautseztatuta makie lauaren teknikan, zilar hautsa pikartatuta (nashiji-e) eta nakarezko inkrustazio askorekin (raden). Jatorri bera du eta Namban lakazko lanetako makie eta raden teknika berak erabiltzen ditu, baina estilo horretakoa izan gabe, eta zerbait geroagokoa da Iruñeko Errekoletoen idazmahaia.
Japoniako artearen aztarnak Amerikara ere iritsi ziren Filipinetatik irekitako bide berri baten bitartez. Espainia Berriko erregeordetzan miresmen handia izan zuten Japoniatik eramandako Namban lakazko lanak, han bazelako zurezko objektuak bernizatzeko ohitura. XVII. eta XVIII. mendeetako Mexikoko lakazko lanak (Maque) enbutitu eta marradura teknikaz eginak dira, eta ikonografiak manierismoaren eragina du, baina bertako kutsu handiarekin. Piezen urreztadurak, zipriztin itxurakoak, Japoniako makie lakaren teknikak gogoratzen ditu; gainera, geometriazko markoen erabilerak Japoniako mundura lotzen ditu, hango tradiziozko motiboak gogorarazten baititu.
Horrenbestez, eta Nafarroako Kultur Ondareari buruzko azaroaren 22ko 14/2005 Legeak eta Interes Kulturaleko Ondasunen Deklarazioa arautzen duen urriaren 3ko 217/1986 Foru Dekretuak (abenduaren 30eko 572/1991 Foru Dekretuaren bidez aldatua) ematen dizkidaten ahalmenak erabiliz, eta Kulturako, Turismoko eta Erakunde Harremanetako Departamentuaren egitura organikoa ezarri zuen uztailaren 25eko 67/2012 Foru Dekretuak delegatutako eskudantziak erabiliz,
EBATZI DUT:
1. Kultur intereseko ondasun deklaratzeko espedientea irekitzea ondasun hauentzat: Miranda Argako Jasokundearen parrokiako Namban kutxatila (Nafarroako IKH zenbakia: 131), Ondasun Higigarrien Inbentario Orokorrean sartua I-M-04-0001176-00000 idatzohar kodearekin; Morentingo San Andres parrokiako Namban kutxatila (Nafarroako IKH zenbakia: 854), Ondasun Higigarrien Inbentario Orokorrean sartua I-M-04-0001203-00000 idatzohar kodearekin; Tuterako San Jorge parrokiako Namban kutxa (Nafarroako IKH zenbakia: 1.873), Ondasun Higigarrien Inbentario Orokorrean sartua I-M-04-0001371-00000 idatzohar kodearekin; Olkozko San Migel parrokiako Namban atrila (Nafarroako IKH zenbakia: 2.888), Ondasun Higigarrien Inbentario Orokorrean sartua I-M-04-0001439-00000 idatzohar kodearekin; Tuterako Udaletxeko Namban atrila (TUD. 157); Tuterako katedraleko Namban kutxa (Nafarroako IKH zenbakia: 3.598); Cortesko Donibane Bataiatzailearen parrokiako bi Namban kutxa (Nafarroako IKH zenbakiak: 3.599 eta 3.600); Iruñeko Agustindar Errekoletoen komentuko Namban kutxa eta kutxatila (Nafarroako IKH zenbakiak: 3.601 eta 3.602); Iruñeko Agustindar Errekoletoen komentuko Japoniako lakazko idazmahaia (Nafarroako IKH zenbakia: 3.603); Mendigorriko San Pedro parrokiako kutxatila, Espainia Berriko erregeordetzako estilokoa (Nafarroako IKH zenbakia: 3.604); eta Iruñeko katedraleko kutxatila, Espainia Berriko erregeordetzako estilokoa (Nafarroako IKH zenbakia: 3.605). Horien deskripzioak eta ezaugarriak ebazpen honi erantsitako dokumentazioan zehaztu dira.
2. Espedientea tramitatzen jarraitzea, indarrean dauden xedapenek ezarritako moduan.
3. Ebazpen hau interesdunei, Iruñeko Artzapezpikutzako Arte Ordezkaritzari, Vianako Printzea Erakundea-Kultura Zuzendaritza Nagusiko Kultur Ondasunen eta Ondarearen Erregistroaren Atalari, Vianako Printzea Erakundea-Kultura Zuzendaritza Nagusiko Ondare Historikoaren Zerbitzuari, Kulturako, Turismoko eta Erakunde Harremanetako Departamentuko Idazkaritza Tekniko Nagusiari eta Kultura Ministerioko Arte Ederren Zuzendaritza Nagusiari atxikitako Interes Kulturaleko Ondasunen Erregistroari jakinaraztea, aurreneurrizko idatzoharra egiteko.
4. Ebazpen hau Nafarroako Aldizkari Ofizialean argitaratzea, eta argitaratzen den egunaren biharamunetik 30 eguneko epea ematea jendaurrean egon dadin, interesdunek egoki iruditzen zaizkien alegazioak aurkeztu ahal izateko.
Iruñean, 2013ko urriaren 29an.–Vianako Printzea Erakundea-Kulturako zuzendari nagusia, Ana Zabalegui Reclusa.
Iragarkiaren kodea: F1315286