207. ALDIZKARIA - 2013ko urriaren 25a

1. NAFARROAKO FORU KOMUNITATEA

1.7. BESTELAKOAK

ERABAKIA, Nafarroako Gobernuak 2013ko urriaren 9an hartua, Zizurko udal mugapean (Nafarroa) den Gendulaingo jauregia izeneko higiezinaren babes ingurunearen behin betiko mugaketa onesten duena.

Zizurko udal mugapean dagoen Gendulaingo jauregia (Nafarroa) interes kulturaleko ondasuna da Espainiako Ondare Historikoari buruzko ekainaren 25eko 16/1985 Legearen bigarren xedapen gehigarriaren arabera, halaxeko babesa ematen baitio Hezkuntza Nazionaleko Ministerioaren 1949ko apirilaren 22ko Dekretuak, Espainiako gazteluak babesteari buruzkoak (Estatuko Aldizkari Ofiziala, 1949ko maiatzaren 5ekoa).

Nafarroako Kultur Ondareari buruzko azaroaren 22ko 14/2005 Foru Legearen 19.1 artikuluan ezarritakoarekin bat, beharrezkoa da monumentu horren babes ingurunea finkatu eta zehatz-mehatz mugatzea.

Aipatutako foru lege horren arabera, espedienteak beharrezkoa du ondasuna behin-behinekoz finkatu eta mugatzea, jendaurreko fasea ezartzea eta espedientea behin betiko onestea Nafarroako Gobernuaren erabaki baten bidez.

Vianako Printzea Erakundea-Kulturako zuzendari nagusiaren martxoaren 26ko 89/2013 Ebazpenaren bidez, behin-behinekoz mugatu zen Zizurko udal mugapean dagoen Gendulaingo jauregia izeneko ondasun higiezinaren babes eremua, eta interes kulturaleko ondasunaren espedientea jendaurrean egoteko epea ireki zen.

Ebazpena 2013ko 77. Nafarroako Aldizkari Ofizialean argitaratu zen, apirilaren 24an.

Vianako Printzea Erakundea-Kulturako zuzendari nagusiaren ekainaren 20ko 224/2013 Ebazpenaren bidez, Fuencisla Londáiz Mencos andreak aurkeztutako alegazioari erantzun zitzaion, alegazioa zati batean onetsiz.

2013ko abuztuaren 26an, Nafarroako Kulturaren Kontseilura igorri zen espedientea. Nafarroako Kulturaren Kontseiluak aldeko txostena eman zuen 2013ko irailaren 18an.

Horrenbestez, Nafarroako Gobernuak, Kulturako, Turismoko eta Erakunde Harremanetako kontseilariak proposaturik,

ERABAKI DU:

1. Zizurko udal mugapean (Nafarroa) dagoen Gendulaingo jauregia izeneko higiezinaren babes ingurunearen mugaketa onestea.

2. Gendulaingo jauregiaren babes eremuak lur hauek hartzen ditu: Zizurko udalerriko 9. poligonoko 1. lurzatiaren puska bat, zehazki, Asteraingo bidearen, alboetako bi bideen eta jauregiko erdigunetik 200 metro hegoaldera jo eta puntu horretatik, ekialdetik mendebalderantz hartuko lukeen lerro zuzen baten artekoa; udalerri horretako 9. poligonoko 90. lurzatiaren puska bat, zehazki, 1. lurzatiaren, Asteraingo bidearen, lehen aipatutako lerroaren jarraipenaren eta jauregiko erdigunetik 280 metro mendebaldera dagoen puntutik iparretik hegoalderantz joanen litzatekeen beste lerro zuzen baten artekoa; udalerri horretako 9. poligonoko 90. lurzatiaren D, G eta J azpilurzatien puska bat, bi lerro hauen artekoa: jauregitik 280 metro hegoaldera dagoen iparraldetik hegoalderanzko lerroa, eta beste lerro bat, jauregiko erdigunetik 300 metro ekialdera, iparretik hegoalderanzko norabidea duena.

Monumentuaren inguruan lurzoru urbanizaezinaren sailkapena mantenduko da, Zizurko udalerriko hirigintza planeamenduan ezarritakoa, nekazaritzako eta abeltzaintzako produktibitate ertaineko lurzoruaren kategorian, baina ez da baimenik emanen lurzoru kategoria horretarako araudiak ahalbidetzen duen eraikuntzako lanik egiteko, salbu eta 9. poligonoko 9. lurzatiko D azpilurzatian, jauregitik ekialderantz, 238 metrora, iparraldetik hegoalderantz egindako lerro batetik ekialdera dagoen horretan, hegoaldeko adarrari dagokion eremuan, batetik, eta, bestetik, 9. poligonoko 1. lurzatiko F azpilurzatiaren eremuan, jauregitik hegoalderantz, 2 metrora, ekialdetik mendebalderantz egindako lerro batetik hegoaldera dagoen horretan, azpilurzati horren ondotik doan Done Jakue bidea babesteko zerrenda alde batera utzita.

3. Erabaki hau Nafarroako Aldizkari Ofizialean argitaratzea.

4. Erabaki honek administrazio bidea amaitzen du, eta haren aurka, aukeran, berraztertzeko errekurtsoa jartzen ahal da, Nafarroako Gobernuari zuzendua, Nafarroako Aldizkari Ofizialean argitaratu eta biharamunetik hasita hilabeteko epean edo, bestela, zuzenean, Nafarroako Justizia Auzitegi Nagusiko Administrazioarekiko Auzien Salan aurkaratzen ahal da, argitaratu eta biharamunetik hasita bi hilabeteko epean.

Administrazio publikoek, berraztertzeko errekurtsoaren ordez, aldez aurretik errekerimendua egin dezakete, Administrazioarekiko Auzien Jurisdikzioa arautzen duen uztailaren 13ko 29/1988 Legearen 44. artikuluan ezarritako moduan eta epean.

Iruñean, 2013ko urriaren 9an.–Nafarroako Gobernuko kontseilari eta idazkaria, F. Javier Morrás Iturmendi.

Iragarkiaren kodea: F1314132