Iragarkia

202. ALDIZKARIA - 2013ko urriaren 18a

1. NAFARROAKO FORU KOMUNITATEA

1.7. BESTELAKOAK

119/2013 FORU AGINDUA, irailaren 20koa, Sustapeneko kontseilariak emana, jendaurreko aldia eta ukitutako toki-entitateen entzunaldia ebatzi eta “Iruñerriko Ingurabidearen itxiera Olatz-Olloki tartean eta irtenbide baten irekiera Iruñerriko iparralderantz” izeneko proiektuaren eguneratzea behin betiko onesten duena.

Sustapen eta Etxebizitzako kontseilariak ekainaren 11n emandako 105/2012 Foru Aginduaren bidez (127. Nafarroako Aldizkari Ofizialean argitaratua, uztailaren 2an), behin-behinekoz onetsi zen “Iruñerriko Ingurabidearen itxiera Olatz-Olloki tartean eta irtenbide baten irekiera Iruñerriko iparralderantz” izeneko proiektuaren eguneratzea, hura jendaurrean jarri zen eta ukitutako udalei entzunaldia eman zitzaien, ukitutako ondasun eta eskubideen eta Ingurumenaren gaineko eraginaren ebaluazioaren ondorioetarako.

Proiektuak badu Ebroko Ur Konfederazioak 2011ko abuztuaren 1ean haren alde emandako txostena.

Ingurumenaren eta Uraren zuzendari nagusiaren azaroaren 22ko 169E/2012 Ebazpenaren bidez, “Iruñerriko Ingurabidearen itxiera Olatz-Olloki tartean eta irtenbide baten irekiera Iruñerriko iparralderantz” izeneko trazaduraren proiektuari buruzko Ingurumen eraginaren adierazpena egin zen.

Azterlan eta Proiektuen Zerbitzuak txosten batean aditzera eman du, ezen jendaurreko aldia eta ukitutako toki entitateei emandako entzunaldia bukaturik, hurrengo alegazioak jaso direla. Hona hemen haien edukia eta erantzuna:

1. alegazioa.–Iñaki Crespo San José jaunak, Uharteko Udala ordezkatuz, aurkeztua.

1.–Bide berria eginez gero, Itaroa bizitegitik Itaroa merkataritza zentrorainoko tartea oinez egiteko, oso luzea izanen dela adierazi du, eta gerta daitekeela auzoek bide berria oinez zeharkatzea, horrek duen arriskuarekin; hortaz, oinezkoendako pasabide bat egiteko eskatu du, lehendik oinezkoek duten bideetako baten jarraipen moduan.

2.–Hesi akustikoaren bistarako eragina nabaria dela adierazi du eta, beraz, material gardenez eraikitzeko eskatu.

3.–Gaur egun, Uhartek hiru sarbide dituela adierazi du, Aretako industrialdetik, Atarrabiatik eta Zokorenako biribilgunetik, eta lehen biak ez dituztela nahi sarbide nagusi gisa; izan ere, trafikoa goraino dago eta, Zokorenako biribilgunea dagoen tokian egonda, trafikoaren zati handi batek hasierako hirigunearen zati bat zeharkatzen du. Horrenbestez, proiektuak beste konexio bat, bidez eta oinezkoentzat, izateko eskatu du Zokorenako biribilgunearen eta Ugarrandiko eremuaren artean.

Erantzuna:

1.–Proiektuan oinezkoentzako pasabide bat sartu da Itaroa bizitegiaren eta Itaroa merkataritza zentroaren artean.

2.–2,00 metroko altueratik gorako hesi akustikoak metakrilatoz eginen dira.

3.–Proiektuak ez du beste konexio bat, bidez eta oinezkoentzat, jasotzen Zokorenako biribilgunearen eta Ugarrandiko eremuaren artean. Jarduketa hori proiektuaren eremutik kanpo dago eta beste proiektu baten xede izan beharko luke udal ekimeneko edo ekimen pribatuko beste hirigintza garapen batzuk izanen balira, Lurraldearen Antolamenduari eta Hirigintzari buruzko abenduaren 20ko 35/2002 Foru Legearen 100. artikuluan oinarrituta, zeinaren arabera, “sustatzaileak ordaindu eta, hala behar denean, exekutatu beharko ditu jarduketaz kanpoko sistema orokorrekiko loturako azpiegiturak eta, hala denean, sistema horiek handitu edo indartzeko behar diren obrak, jarduketaren tamaina edo dentsitatea dela medio edo ondorioz ekarriko dituen intentsitateengatik egin beharko direnak”.

2. alegazioa.–José Luis Larrainzar Eugui jaunak, Esteribarko Udaleko alkate udalburuak, aurkeztua.

1.–Ollokiko auzoberriko “lehen lerroko” etxebizitzek bistarako eta zarata aldetik izan dezaketen ondorioaren azterlan sakonagoa egiteko eskatu du, eta hesi artifizialek ibilbide osoan jarraitzea proposatu, baita altuera berriro aztertzea ere.

2.–Bide berriaren “lehen lerroko” etxebizitzak banatzen dituen muinoan, zuhaitz autoktonoz landarezko pantaila bat sortzeko eskatu du, bihurgunearen abiapuntutik Ollokiko haurtzaindegiraino, bistarako eragina leundu eta hobekuntza ekologikoa lortzearren.

3.–Ollokiko auzoberriaren iparraldetik Argako pasealekura, Ollokilandako industrialdera eta Uharteko herrira joateko oinezkoentzako sarbideak behar dituen jarduketak egiteko eskatu du (azken sarbidean, pasabide bat errepide gainetik).

4.–Auzoberriaren hegoaldeari dagokionez, dagoen bidea, Urbiko bidea, birmoldatzeko eskatu du; alegia, gurpil-aulkientzako eta haur silletentzako malda egokiak egiteko eta hormigoizko, asfaltozko edo antzeko zorua emateko.

Erantzuna:

1.–Nafarroako Unibertsitate Publikoko Fisika Departamentuko Akustika Laborategiak prestatu du eragin akustikoaren gaineko azterlana, baita Iruñerriko zarata mapak ere. Bertan, azpiegiturak Itaroa bizitegian eta Ollokin duen eragina aztertu da eta guztiz baliozkotzat jo du. Proiektatu diren hesiak azterlan horren emaitzen araberakoak dira; izan ere, mapetan zerrenda bakoitzak ingurabidera duen tartearen arabera zenbaterainoko zarata jasaten duen islatzen da. Bistarako eraginari dagokionez, 2,00 metroko altueratik gorako hesi akustikoak metakrilatoz eginen dira.

2.–Eraikuntza proiektuan sartuta dagoen landareztatze proiektuak kabailoiak bertako espeziekin landatzea jasotzen du.

3 eta 4.–Ollokiko auzoberriaren eta Urbiko bidearen arteko sarbidea egokitzea aurreikusi da, Ollokiko auzoberriaren eta Ollokilandako industrialdearen, Uharteko herriaren eta Arga ibaiko paseabidearen arteko oinezkoen konexioak segi dezan.

3. alegazioa.–Arantxa Hernández Palomino andreak eta Eduardo Martínez Alonso jaunak aurkeztua.

1.–Zonifikazio akustikoaren hasierako mapari dagokionez, 1328/2010 Ebazpenaren bidez onetsita baitago, Ollokiko auzoberriaren aurreko aldea dago eraginpean, baita hezkuntza eta kultura erabilerako eremuak ere, baina auzoberri hori Iruñeko Ingurabidea ixteko UPSa 2004an onetsi aurrekoa denez gero, ez dira bertan ebazpen horrek aipatzen dituen hirigintza garapen berrietan aplikatzekoak diren mugapen akustikoak aplikatuko. Orobat, adierazi dute ezen proiektuan Ld eta Ln indizeak aipatzen direnean, fatxadetako immisio balioak ere aipatu beharko liratekeela, zaratak auzoberriko eraikinetan duen eragina hobeki ulertzeko.

2.–Neurri zuzentzaileen eraginkortasuna zaintzeko planari eta azpiegiturako ondorioen gaineko geroko zuzenketei, batez ere kutsadura akustikoarekin zerikusia dutenei dagokienez, Ollokiko auzoberria haietan sartzeko eskatu dute Itaroako auzoberrian egin behar den modu eta tratamendu berekin.

3.–Ollokiko neurri zuzentzaileei dagokienez, ez dute ulertzen zergatik eten den babes akustikoa eta azpiegiturak ukitutako lur osoan jarraitu beharko lukeela adierazi dute, eta auzoberriaren aurreko aldea babesteko eskatu, baita hezkuntzako eta kulturako zentroak ere. Orobat, hartutako neurrien eraginkortasuna eta hesien altueraren zergatikoa ezagutzearren, horren gaineko dokumentazioa eskatu dute. Zein den ere hesien kokaera, tarte horretako zirkulazio abiadura gutxitzeko eskatu dute eta abiadura kontrolatuko duen radar bat ezartzeko.

4.–Pantailen bistarako eragina saihesteko, guztien partez lurrezko kabailoiak jartzeko eskatu dute eta haietan batez ere zuhaitzak landatzeko, bistarako eta belarrietarako eragina gutxitzeko adinako kopuruan eta altuerarekin.

5.–Bibrazioen eraginari lotutako Law bibrazio indizearen datuak ez dituztela ezagutzen adierazi dute, eta datu horiek emateko eskatu.

6.–Ollokiko auzoberrian eta Ollokilandako industrialdean ukitutako zerbitzuen sareak berritzeari dagokionez, argibideak eskatu dituzte izan daitezkeen mozketei, sareak berriz noizko ezarriko diren eta ukituekiko komunikazio estrategiari buruz.

Erantzuna:

1.–Proiektua eguneratzeko Ingurumen eraginaren azterlanean bada eragin akustikoari buruzko azterlan berri bat, Nafarroako Unibertsitate Publikoko Fisika Departamentuko Akustika Laborategiak prestatua, azpiegituraren eragina aztertzen duena, bai Itaroako bizitegian, bai Ollokin. Proiektatu diren hesiak azterlan horren emaitzen araberakoak dira; izan ere, mapetan zerrenda bakoitzak ingurabidera duen tartearen arabera zenbaterainoko zarata jasaten duen islatzen da.

2.–Ingurumena zaintzeko planak proiektuaren eremu osoaren gainekoa da; beraz, Ollokiko auzoberria sartuta dago.

3.–Hesien etenak haiek optimizatzeko emaitza dira, bai kostua bai bistarako eragina murrizteko, eta uneoro betetzen dira kalitate akustikoaren helburuak, aipatu azterlanean lortutako emaitzen arabera. Eskatu den informazioa proiektuaren beraren barrenean dago. Radarrak jartzea ez da proiektuaren xedea, ezta departamentu honen eskumena ere.

4.–Pantaila guztiak kentzea ezinezkoa da espazio arrazoiengatik. Kendu ahal izan den tokietan landatutako lur kabailoiak proiektatu dira.

5.–1367/2007 E.D.k, 14. artikuluaz gain (Kalitate akustikoaren helburuak, eremu akustikoei aplikagarriak, eragin akustikoaz egindako azterlanaren xede nagusia), 16. artikuluan (Kalitate akustikoaren helburuak, barreneko espazioari aplikagarriak) II. eranskineko B eta C tauletan, zarataren immisio indizeen balioetarako eta bibraziokoetarako, hurrenez hurren, ezarritakoak ez gainditzea jasotzen du etxebizitzarako, bizitegi, ospitale, hezkuntza edo kultura erabilerak dituzten eraikinen barrenean. Zehazki, II. eranskineko C taulak bizitza egiten den barreneko espazioari bibrazioen gainean aplikatzen ahal zaizkion kalitate akustikoaren helburuak ezartzen ditu. Bide azpiegitura honek ez du bizitza egiten den barne espazioetan lehen aipatu C taulan zehaztutakoetara hurbildu ere egiten ez diren bibrazio mailarik sortzen, ezta 135/1989 F.D.n gehienez baimenduta daudenei ere (8.2 artikuluko LA55 parametroa). Bibrazioetarako ezarritako mugak betetzeko aurreikusitako azterlanak makina bibrazio sortzaileak instalatzen diren “jardueren” kasuetan jaso izaten dira.

6.–Proiektua eraikitzeko obrak esleitu ondoren ematen ahalko da eskatu den informazioa, eraikitzaileak eman dezakeen lanen programan oinarrituta.

4. alegazioa.–Ramón Picabea Tellechea jaunak aurkeztua.

1.–Bere ohiko bizilekua proiektua gauzatuko den tokiaren ondoan dagoela adierazi du, eta hura gauzatzeak ederki gogaituko duela, zaratagatik batez ere, eta proiektatuta dagoen hesi akustikoa ez dela nahikoa, bere lurzatiraino iristen ez baita; hortaz, hesi akustiko edo kabailoi bat 1+700 eta 1+800 k.p.en artean jartzeko eskatu du.

2.–Proiektatu den hesiak bistarako eragin nabarmena izanen duela adierazi du.

Erantzuna:

1.–Proiektua eguneratzeko Ingurumen eraginaren azterlanean bada eragin akustikoari buruzko azterlan berri bat, Nafarroako Unibertsitate Publikoko Fisika Departamentuko Akustika Laborategiak prestatua, azpiegituraren eragina aztertzen duena, bai Itaroako bizitegian, bai Ollokin. Proiektatu diren hesiak azterlan horren emaitzen araberakoak dira; izan ere, mapetan zerrenda bakoitzak ingurabidera duen tartearen arabera zenbaterainoko zarata jasaten duen islatzen da. Emaitza horiek ez dute 1+700 eta 1+800 k.p. artean babes akustikoak jartzeko beharrik ikusten.

2.–2,00 metroko altueratik gorako hesi akustikoak metakrilatoz eginen dira, bistarako eragina gutxitzearren.

5. alegazioa.–Aitziber Juaniz Moriones andreak aurkeztua, Uharteko Udala ordezkatuz.

Alegatzaileak adierazi du Uharteko Udalak bat egiten duela Esteribarko Udalak aukeztutako alegazioekin.

Erantzuna:

2. alegazioari emandako erantzun bera du.

Jendaurrean jarritako dokumentazioari dagokionez eta zer alegazio jaso diren ikusita, zenbait aldaketa egin dira, behin betiko okupazioak eragindako hiru lurzatitan azalera gehiago hartzea ekarri dutenak:

1.–Zertxobait aldatu da Itaroara lotzeko biribilgunean irteera, merkataritza zentrorako sarbideak independente izaten jarrai dezan. Aldaketa horrek 47 m²-tan handitu du Uharteko udal mugapeko 2. poligonoko 1188. lurzatiaren okupazioa (HU-083 finka).

2.–Oinezkoentzako pasabide bat proiektatu da Itaroako bizitegiaren eta merkataritza zentroaren artean. Aldaketa horrek 153 m²-tan handitu du 2. poligonoko 1188. lurzatiaren okupazioa (HU-08.3 finka) eta 10 m²-tan 2. poligonoko 1033. lurzatia (HU-06 finka), biak Uharteko udal mugapean.

3.–Ekialdeko super ingurabidearen lotuneko biribilgunetik Uharte aldera ateratzeko bidearekiko konexioa optimizatu da. Aldaketa horrek 39 m²-tan handitu du Esteribarko udal mugapeko 1. poligonoko 1057. lurzatiaren okupazioa (ES-01.2 finka).

Nafarroako Errepideei buruzko martxoaren 23ko 5/2007 Foru Legearen 20.4 artikuluan ezarritakoarekin bat, bidezkoa da proiektua behin betiko onestea.

Horiek horrela, Azterlan eta Proiektuen Zerbitzuak txostenean adierazi eta proposatu duenarekin bat, Sustapen Departamentuaren egitura organikoa ezartzen duen martxoaren 20ko 21/2013 Foru Dekretuaren 2.2 artikuluaren bidez eskuratu ditudan eskudantziak erabiliz, eta Nahitaezko Desjabetzeari buruzko Legearen 52. artikuluan xedatutakoari jarraikiz,

AGINDU DUT:

1. “Iruñerriko Ingurabidearen itxiera Olatz-Olloki tartean eta irtenbide baten irekiera Iruñerriko iparralderantz” izeneko proiektuaren eguneratzeak ukitutako toki entitateei entzunaldia emateko fasea eta jendaurreko aldia ebaztea, azalpen zatian adierazi den moduan.

2. “Iruñerriko Ingurabidearen itxiera Olatz-Olloki tartean eta irtenbide baten irekiera Iruñerriko iparralderantz” izeneko proiektuaren eguneratzea, 21.569.224,48 euroko aurrekontua duena, BEZa kanpo, behin betiko onestea, baita eranskin gisa ageri den ukitutako ondasun eta eskubideen ondoko zerrenda ere bai.

3. Foru agindu hau Nafarroako Aldizkari Ofizialean eta departamentuaren web orrian argitaratzea, eta dagokion iragarkia Nafarroako Foru Komunitatean gehien zabaltzen diren egunkarietako batera bidaltzea.

4. Foru agindu hau Azterlan eta Proiektuen Zerbitzuari eta Desjabetze Atalari jakinaraztea, baita Uharteko, Esteribarko, Eguesibarko eta Arangurengo udalei ere, eta horiek premiatzea beren iragarki oholetan argitara dezaten.

5. Adieraztea foru agindu honek ez duela administrazio bidea amaitzen, eta partikularrek gora jotzeko errekurtsoa aurkezten ahal dutela haren aurka, Nafarroako Gobernuari zuzenduta, hilabeteko epean, foru agindua jakinarazi edo Nafarroako Aldizkari Ofizialean argitaratu eta biharamunetik aitzina.

Aurreko lerroaldean xedatutakoa deusetan ukatu gabe, foru agindu honek amaitzen du administrazio publikoentzako administrazio bidea. Dena dela, administrazio publikoek administrazioarekiko auzi-errekurtsoa aurkez dezakete, Nafarroako Justizia Auzitegi Nagusiko Administrazioarekiko Auzien Salari zuzendua, hura jakinarazi edo argitaratu eta biharamunetik bi hilabeteko epean. Horrek ez du galarazten Nafarroako Gobernuan aldez aurreko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean.

Iruñean, 2013ko irailaren 20an.–Sustapeneko kontseilaria, Luis Zarraluqui Ortigosa.

Iragarkiaren kodea: F1313149