1. NAFARROAKO FORU KOMUNITATEA
1.4. DIRU-LAGUNTZAK, LAGUNTZAK ETA BEKAK
393/2013 EBAZPENA, ekainaren 28koa, Nekazaritza eta Abeltzaintzako zuzendari nagusiak emana, Nafarroako Foru Komunitatean 2013an polinizaziorako emanen diren nekazaritza eta ingurumen arloko diru-laguntzen deialdia onesten duena.
Landa Garapeneko, Ingurumeneko eta Toki Administrazioko kontseilariak otsailaren 23an emandako 84/2010 Foru Aginduaren bidez –Landa Garapeneko, Ingurumeneko eta Toki Administrazioko kontseilariaren ekainaren 7ko 192/2013 Foru Aginduaren bidez aldatua–, Nafarroako Foru Komunitatean polinizaziorako emanen diren nekazaritza eta ingurumen arloko laguntzetarako arauak ezarri ziren.
Foru agindu horretan araututako laguntzak “de minimis” araubidearen menpean daude (Batzordeak 2007ko abenduaren 20an emandako 1535/2007 EE Erregelamendua, Europar Batasunaren Itunaren 87. eta 88. artikuluak nekazaritza produktuen ekoizpenaren sektorean “de minimis” laguntzei aplikatzeari buruzkoa).
Bestalde, Diru-laguntzei buruzko azaroaren 9ko 11/2005 Foru Legearen 18. eta 19. artikuluek ezartzen dutenez, diru-laguntzak emateko prozedura ofizioz hasiko da, organo eskudunak aldez aurretik diru-laguntzari buruzko araua edo deialdia eta oinarri arautzaileak ezarri dituenean, salbu eta lehenagotik ezarrita badaude.
Foru lege horretan ezarritako baldintzak betetzen direnez, eta Europar Batasuneko araudiak aurreikusirik duenez laguntza araubide hauek 2013ko abenduaren 31ra arte izanen dutela indarra, bidezkoa da Nafarroako Foru Komunitatean polinizazioari laguntzak emateko deialdia onestea 2013ko ekitaldirako, ebazpen honen bidez.
Kontuan hartu behar da gastu proposamen honek betetzen duela Ekonomia, Ogasun, Industria eta Enpleguko kontseilariaren urriaren 18ko 701/2012 Foru Aginduaren 1.d) puntuko baldintza, zeren, jardueraren garrantzi berezia dela eta, ezin baita atzeratu hura gauzatzea.
Ikusirik Nafarroako Gobernuak 2013ko apirilaren 24an hartutako erabakia, Nekazaritza eta Abeltzaintzako zuzendari nagusiari baimena eman ziona 2013ko ekitaldiari egozteko gastu konpromiso berriak hartzeko, 21.964,77 eurokoak, polinizaziorako nekazaritza eta ingurumen arloko laguntzak emateko, Ekonomia, Ogasun, Industria eta Enpleguko kontseilariaren urtarrilaren 9ko 2/2013 Foru Aginduaren 3. artikuluan eta urriaren 18ko 701/2012 Foru Aginduaren 1.d) atalean xedatutakoari jarraituz.
Horrenbestez, Nafarroako Foru Komunitateko Administrazioari buruzko abenduaren 3ko 15/2004 Foru Legearen 22. artikuluak ematen dizkidan eskumenak erabiliz,
EBATZI DUT:
1. Nafarroako Foru Komunitatean 2013an polinizaziorako emanen diren nekazaritza eta ingurumen arloko laguntzak emateko deialdia onestea.
2. Hilabeteko epea dago eskaerak aurkezteko, ebazpen hau Nafarroako Aldizkari Ofizialean argitaratzen denetik hasita.
3. 21.964,77 euroko gastua baimentzea, 2013ra luzatutako 2012rako Nafarroako Aurrekontu Orokorretako “Polinizaziorako laguntza, nekazaritza eta ingurumen arloetakoak” izeneko 71310 710004 4700 412206 kontu-sailaren kargura. Diru hori ebazpen honen ondoriozko gastu konpromisoei erantzuteko izanen da.
4. Deialdi honetan aplikatzekoak izanen dira Landa Garapeneko, Ingurumeneko eta Toki Administrazioko kontseilariak otsailaren 23an emandako 84/2010 Foru Aginduan –Landa Garapeneko, Ingurumeneko eta Toki Administrazioko kontseilariaren ekainaren 7ko 192/2013 Foru Aginduaren bidez aldatua– aurreikusitako arauak. Foru agindu horren bidez Nafarroako Foru Komunitatean polinizaziorako emanen diren nekazaritza eta ingurumen arloko laguntzetarako arauak ezarri ziren.
5. Ebazpen honen aurka gora jotzeko errekurtsoa jar daiteke, Landa Garapeneko, Ingurumeneko eta Toki Administrazioko kontseilariari zuzendua, argitalpen egunaren biharamunetik hasi eta hilabeteko epean.
6. Ebazpen hau Nafarroako Aldizkari Ofizialean argitaratzea.
Iruñean, 2013ko ekainaren 28an.–Nekazaritza eta Abeltzaintzako zuzendari nagusia, Ignacio Guembe Cervera.
Iragarkiaren kodea: F1310409
