1. NAFARROAKO FORU KOMUNITATEA
1.7. BESTELAKOAK
256E/2013 EBAZPENA, ekainaren 17koa, Ingurumen Kalitatearen Zerbitzuko zuzendariak emana, Ingurumen ukipenetarako baimena ematen duena, zenbait baldintzarekin, Leitzan, 2. poligonoko hainbat lurzatitan, edateko uren araztegia egiteko proiekturako. Sustatzailea Leitzako Udala da.
Xedea: Ebazpena.
Erreferentzia: Espediente kodea: 0001-0015-2013-000046.
Unitate kudeatzailea: Ingurumenaren eta Uraren Zuzendaritza Nagusia. Ingurumen Kalitatearen Zerbitzua. Ingurumenaren gaineko Eragina Aztertzeko Atala. González Tablas kalea, 9. 31005 Iruña. Telefonoa: 848 427625. Posta elektronikoa: secevamb@cfnavarra.es.
Espedientea: Ingurumen ukipenetarako baimena.
Jarduera: Edateko uren araztegia Leitzan.
Ingurumena Babesteko Esku-hartzeari buruzko Foru Legearen Erregelamenduaren eranskina: 2C-Ingurumen ukipenetarako baimenaren mende dauden jarduerak eta proiektuak.
Herria: Leitza Udalerria: Leitza.
Poligonoa: 2. Lurzatiak: 210, 712, 242 eta 499.
Sustatzailea: Leitzako Udala.
Eskaeraren data: 2013/03/08.
Ingurumen Kalitatearen Zerbitzuko zuzendariaren maiatzaren 23ko 217/E2013 Ebazpenaren bidez, Ingurumen ukipenetarako baimena eman zen, zenbait baldintzarekin, Leitzan, 2. poligonoko hainbat lurzatitan, edateko uren araztegia egiteko proiekturako. Sustatzailea Leitzako Udala da.
Gero, Lurraldearen Antolamendu eta Hirigintza Zerbitzuaren 2013ko ekainaren 5eko txostena jaso da. Txosten hori proiektuaren aldekoa da, eta hura ezartzeko beharrezko baimen guztiak eskuratzeko baldintza jartzen dio sustatzaileari.
Proiektatutako jarduketan, edateko uren araztegi bat eginen da Leitzako ur biltontzian (Leitzako 2. poligonoko 499. lurzatian dago). Horretarako, hainbat jarduketa gauzatu behar dira, hura eraberritu eta handitzeko, eta biltontziraino iristen diren hodien sistema egokitzeko. Obra horien artean, beharrezkoa da biltontzira hodi orokor batean iristen diren bost hodi batzea, eta Otemotz iturburutik datorren hodia ordeztea, egungo hodiaren trazadurari jarraikiz ezarriko baita. 180 metro bat luze den azken tarte horretan, diametroa 150 mm-koa izanen da. Larreak zeharkatzen ditu tarte horrek. Hartara, ingurumeneko ukipenak oso txikiak izanen dira, landare lurra lehengoratu eginen baita.
Edateko uren araztegia eta hodia egin zein egokitzeko obrek sortzen dituzten hondakinen azterketa sartuta dago aurkeztutako dokumentazioan.
Abenduaren 28ko 93/2006 Foru Dekretuaren 36. artikuluak ezartzen du Ingurumen, Lurraldearen Antolamendu eta Etxebizitzako kontseilariak arrazoituz ebatziko duela Ingurumen ukipenetarako baimena ematea edo ukatzea.
Foru dekretu horren 31.2 artikuluak ezartzen du Ingurumen ukipenetarako baimenak lurzoru urbanizaezinean baimentzen ahal diren jardueretarakoa ere bilduko duela, eta horrek Lurraldearen Antolamenduari eta Hirigintzari buruzko abenduaren 20ko 35/2002 Foru Legearen 117. artikuluan ezarritako ondorioak izanen ditu.
Espedientean dauden txostenak ikusirik eta Ingurumenaren eta Uraren zuzendari nagusiaren irailaren 13ko 1436/2011 Ebazpenaren bidez eskuordetutako eskumenak erabiliz.
EBATZI DUT:
1. Ingurumen ukipenetarako baimena ematea, zenbait baldintzarekin, Leitzako ur biltontziaren inguruan, herri horretan edateko uren araztegia egiteko proiekturako. Sustatzailea Leitzako Udala da.
2. Baimena neurri zuzentzaile hauek betetzearen baldintzapean egonen da:
–Egin nahi den jarduerak uki ditzakeen edo obren trabagarri izan daitezkeen azpiegitura eta zortasunei dagokienez (errepideak, bide publikoak, ibilgu publikoak, zerbitzu sareak edo bestelakoak), sustatzaileak, obrak gauzatzen hasi baino lehen, behar diren baimen guztiak eskuratuko ditu, kasuan kasuko gaian eskudun diren organoei eskatu eta gero.
–Sortzen diren eraispen eta eraikuntza hondakinak kudeatzaile baimendu batek kudeatu beharko ditu.
–Irekitako zangak betetzeko erabiliko da hondeaketa lanetik lortutako lurra, edo ur biltontziaren ingurunean zabaldu beharko da, halako eran non landare estaldura modu naturalean berreskuratuko den, edo landare belarkarak ereinda, obrak egin ondoren.
–Lur hori egokia ez bada landareztatzeko eta ur biltontziaren inguruan zabaldu behar den kasuan, aldez aurretik, lur emankorraren geruza kenduko da bertatik, hondakinak botatzen diren eremua lehengoratzeko.
3. Baimen honek, gainera, Lurraldearen Antolamenduari eta Hirigintzari buruzko abenduaren 20ko 35/2002 Foru Legearen 117. artikuluan ezartzen diren ondorioak izanen ditu, izan ere, artikulu horretan, lurzoru urbanizaezinean egin behar diren jarduerak baimentzeko prozedura ezartzen da.
4. Ebazpen honek ez du administrazio bidea amaitzen, eta espedientean interesa dutenek, administrazio publikoek izan ezik, ebazpen horren gora jotzeko errekurtsoa jar dezakete, Landa Garapeneko, Ingurumeneko eta Toki Administrazioko Departamentuko kontseilariari zuzendua, hilabeteko epean.
Administrazio publikoek zilegi dute administrazioarekiko auzi-errekurtsoa jartzea, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean. Horrek ez du galarazten Nafarroako Gobernuan aldez aurreko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean.
Epeak ebazpen hau jakinarazi eta biharamunetik hasita kontatuko dira.
5. Ebazpen hau Nafarroako Aldizkari Ofizialean argitaratzea.
6. Ebazpen hau Lurraldearen Antolamendu eta Hirigintza Zerbitzuari, Leitzako Udalari eta 1. barrutiko Basozaintzari (Bidasoa) igortzea, behar diren ondorioak izan ditzan.
Iruñean, 2013ko ekainaren 17an.–Ingurumen Kalitatearen Zerbitzuko zuzendaria, Pedro Zuazo Onagoitia.
Iragarkiaren kodea: F1310583
