Iragarkia

130. ALDIZKARIA - 2013ko uztailaren 9a

1. NAFARROAKO FORU KOMUNITATEA

1.7. BESTELAKOAK

ERABAKIA, Nafarroako Gobernuak 2013ko ekainaren 26an hartua, Burlatako “Burlada” behin-behineko izena izanen duen Bigarren Hezkuntzako Institutua sortzen duena, Lanbide Heziketako irakaskuntzak “Ibaialde-Burlada” Bigarren Hezkuntzako Institututik bereiztearen ondorioz.

Berariazko Lanbide Heziketaren etengabeko ezarpenak, antolakuntza eta pedagogiaren arloan, gero eta premia zehatzagoak sortu ditu irakaskuntza hori ematen duten bigarren hezkuntzako ikastetxeetan.

Premia horiek argiago azaldu dira Hezkuntza Sistemaren Lege Organiko Orokorraren aurreko Lanbide Heziketa ematen zuten ikastetxeetan, Bigarren Hezkuntzako beste ikastetxe batzuekin bat egin zutenak Foru Komunitateko Hezkuntza Sistemaren berrantolamenduaren ondorioz, Foru Komunitateko ikastetxeen sarea berrantolatzeko arauak eman zituen martxoaren 13ko 69/1995 Foru Dekretuari jarraikiz (1995eko apirilaren 7ko Nafarroako Aldizkari Ofiziala). Martxoaren 13ko 150/1996 Foru Dekretuak (1996ko apirilaren 8ko Nafarroako Aldizkari Ofiziala) aldatu zuen aipatu foru dekretua.

Hezkuntza Departamentuak, prestakuntza zikloen ezarpena ikastetxe horietan finkatuta dagoela ikusirik, erabaki du Berariazko Lanbide Heziketako irakaskuntzak Derrigorrezko Bigarren Hezkuntzako eta Batxilergoko irakaskuntzetatik bereiztea.

Neurri horren helburua da Berariazko Lanbide Heziketako ikastetxeek lan mundura duten orientazioa indartzea, kudeaketa autonomoa eta malgua erraztuz, lan sektorearen eskakizun eta aldaketei erantzuteko gauza izateko.

“Ibaialde-Burlada” Bigarren Hezkuntzako Institutua sortu zen “Ibaialde” Institutuak eta Burlatako Lanbide Heziketako Institutuak bat egin ondoren. Deskribatu den egoeran dago gaur egun eta, horren ondorioz, bidezkoa da institutu horretatik Berariazko Lanbide Heziketako irakaskuntzak bereiztea, Hezkuntza Sistemaren helburuak hobeki lortzeko.

Nafarroako Foru Komunitateko Bigarren Hezkuntzako Institutuen Erregelamendu Organikoa onetsi zuen otsailaren 10eko 25/1997 Foru Dekretuaren 2. artikuluan ezartzen da Bigarren Hezkuntzako Institutuak sortu edo kentzea Nafarroako Gobernuari dagokiola, Hezkuntza Departamentuak hala proposaturik. Aipatu foru dekretua 1997ko martxoaren 14ko Nafarroako Aldizkari Ofizialean argitaratu zen.

Nafarroako Hezkuntza Batzorde Nagusiak edo Eskola Kontseiluak espedienteari buruzko txostena egin du eta irakasleen ordezkaritza sindikalari haren berri eman zaio.

Horrenbestez, Nafarroako Gobernuak, Hezkuntzako kontseilariak proposaturik.

ERABAKI DU:

1. 2013ko uztailaren 1eko ondorioekin, honako datu hauek dituen Bigarren Hezkuntzako institutu hau sortzea:

Ikastetxearen kodea: 31013859.

Izen orokorra: Bigarren Hezkuntzako Institutua.

Berariazko behin-behineko izena: “Burlada”.

Helbidea: Ermitako kalea, 19.

Herria: Burlata.

Probintzia: Nafarroa.

Titularra: Hezkuntza Departamentua.

Hezkuntza eskaintza:

–Erdi mailako heziketa zikloak: Sukaldaritza eta Gastronomia: 4 unitate eta 80 ikaspostu; Jatetxeko Zerbitzuak: 2 unitate eta 40 ikaspostu; Estetika eta Edergintza: 2 unitate eta 40 ikaspostu; eta Ile-apainketa: 4 unitate eta 80 ikaspostu.

–Goi mailako heziketa zikloak: Sukalde Zuzendaritza: 2 unitate eta 40 ikaspostu; Bidaia Agentziak eta Ekitaldien Kudeaketa: 2 unitate eta 40 ikaspostu; eta Estetika Integrala eta Ongizatea: 2 unitate eta 40 ikaspostu.

–Hasierako Lanbide Kualifikazioko programak:

a) Oinarrizkoak: Ile-apainketa eta Estetikako laguntzailea. Oinarrizkoa: 2 unitate eta 24 ikaspostu.

b) Lanbide lantegiak: Ile-apainketa eta Estetikako laguntzailea. Lanbide lantegia 2: 4 unitate eta 48 ikaspostu.

Hizkuntza eredua: G.

Ondorio akademikoetarako, atxikitako ikastetxe pribatuak: Iruñeko “Cuatrovientos, I.T.C.” eta “Ramiro Mata”.

2. 2013ko uztailaren 1eko ondorioekin, gaur egungo “Ibaialde-Burlada” Bigarren Hezkuntzako Institutuak behin-behinekoz “Ibaialde” Bigarren Hezkuntzako Institutua izena izanen du. Ikastetxearen datuak honako hauek dira:

Ikastetxearen kodea: 31008530.

Izen orokorra: Bigarren Hezkuntzako Institutua.

Berariazko behin-behineko izena: “Ibaialde”.

Helbidea: Ermitako kalea, 28.

Herria: Burlata.

Probintzia: Nafarroa.

Titularra: Hezkuntza Departamentua.

Hezkuntza eskaintza:

–Derrigorrezko Bigarren Hezkuntza: 8 edo 9 unitate eta 288 ikaspostu, gehienez ere, eta 2 curriculum-aniztasun eta 24 ikaspostu.

–Zientziak eta Teknologia Batxilergoa, eta Giza eta Gizarte Zientziak Batxilergoa: 6 unitate eta 210 ikaspostu.

–Goi mailako heziketarako prestakuntza ikastaroa: 30 ikaspostu.

Hizkuntza eredua: A-G.

3. Bereizketak 2013ko uztailaren 1ean izanen ditu ondorioak, eta “Burlada” Bigarren Hezkuntzako Institutuko izendatuko den zuzendaritza taldea egun horretan hasiko da lanean. Hori guztia, aurreko ikasturteko alderdi akademikoen gainean aurreko ikastetxeko zuzendaritza taldeak egun horren ondoren hartuko dituen erabakiak galarazi gabe.

4. 1.– “Ibaialde-Burlada” Bigarren Hezkuntzako Institutuaren bereizketak ukitzen dituen langileak, bertan behin betiko destinoa bazuten, “Burlada” ikastetxe berriari atxikitzen zaizkio. Ukitutako langileen zerrenda erabaki honen I. eranskinean dago.

2.–Langile horiek “Burlada” Bigarren Hezkuntzako Institutu berriari atxikitzeak 2013ko irailaren 1ean izanen ditu ondorioak. Langile horiek egun horretan hasiko dira irakaslanean institutuan. Atxikipen horren ondorioz ukitutako langileek ez dute galduko “Ibaialde” Bigarren Hezkuntzako Institutuan duten antzinatasuna.

5. Nafarroako Foru Komunitatearen ikastetxeen sarea berrantolatzeko arauak ematen dituen martxoaren 13ko 69/1995 Foru Dekretuak (martxoaren 13ko 150/1996 Foru Dekretuak aldatua eta martxoaren 30eko 109/1998 Foru Dekretuak gaurkotua) ezarritako Nafarroako Foru Komunitatearen titulartasuneko ikastetxeen sarearen barnean geldituko da “Burlada” Bigarren Hezkuntzako Institutua, “Burlata-Atarrabia-Uharte” izeneko 12. barrutian. Eta “Ibaialde” Bigarren Hezkuntzako Institutuak 12. barruti horretan jarraituko du, bereizi aurretik “Ibaialde-Burlada” Bigarren Hezkuntzako Institutuak zituen baldintza berberetan.

6. Halaber, “Burlada” Bigarren Hezkuntzako Institutu berria, Hezkuntzako kontseilariaren otsailaren 11ko 12/2009 Foru Aginduan ezarritakoaren ondorioetarako, G hizkuntza-ereduko ikasleentzat, 1. eragin eremuan kokatuko da, hots, “Iruña eta Iruñerria” eragin eremuan, Iruñeko eta Iruñerriko udalerriak barnean hartzen dituen eremu bakarrean (horien artean dago Burlata). Aipatutako foru aginduaren bidez ezarri ziren ikastetxe publikoen eta pribatu itunduen eragin eremuak, Ikasleak onartzeko arauak ematen dituen apirilaren 2ko 31/2007 Foru Dekretuaren 7. artikuluan ezartzen direnak.

7. Hezkuntzako kontseilariari ahalmena ematea gobernu erabaki honetan xedatzen dena betearazi eta garatzeko behar diren xedapen guztiak eman ditzan.

8. Erabaki hau Burlatako Udalari jakinaraztea, eta Hezkuntza Baliabideen Zuzendaritza Nagusiari, Hezkuntzaren, Lanbide Heziketaren eta Unibertsitateen Zuzendaritza Nagusiari, zuzendaritza nagusi horietako zerbitzuei eta Hezkuntza Departamentuko Idazkaritza Tekniko Nagusiari igortzea.

9. Gobernu erabaki honek Nafarroako Aldizkari Ofizialean argitaratu eta biharamunean izanen ditu ondorioak.

Iruñean, 2013ko ekainaren 26an.–Nafarroako Gobernuko kontseilari eta idazkaria, F. Javier Morrás Iturmendi.

Iragarkiaren kodea: F1309601