Iragarkia

118. ALDIZKARIA - 2013ko ekainaren 21a

1. NAFARROAKO FORU KOMUNITATEA

1.7. BESTELAKOAK

303/2013 EBAZPENA, ekainaren 10ekoa, Hezkuntzaren, Lanbide Heziketaren eta Unibertsitateen zuzendari nagusiak emana, Nafarroako Unibertsitate Publikoan, titulu ofizialak eskuratzeko zerbitzu akademikoengatik eta gainerako eskubideengatik 2013-2014 ikasturtean ordaindu beharreko prezio publikoak finkatzen dituena.

Unibertsitateei buruzko abenduaren 21eko 6/2001 Lege Organikoak ezartzen du “Espainia osoan balio duten titulu ofizialak eskuratzeko ikasketen prezio publikoak eta eskubideak autonomia erkidegoak ezarriko ditu, Unibertsitate Politikarako Konferentzia Nagusiak zerbitzua emateko kostuetan oinarrituta ezartzen dituen mugen barruan”.

Hezkuntzaren esparruan gastu publikoa arrazionalizatzeko presako neurriei buruzko apirilaren 20ko 14/2012 Errege Lege Dekretua eta 2012-2013 ikasturterako errentaren eta familia ondarearen tarteak eta beken eta ikasketetarako laguntzen zenbatekoak ezartzen dituen ekainaren 29ko 1000/2013 Errege Dekretua (abenduaren 21eko 1721/2007 Errege Dekretua hein batean aldatzen duena) aplikatuz, Nafarroako Unibertsitate Publikoarekin batera, 2013-2014 ikasturtean aplikatu beharreko prezio akademikoak proposatzen dira. 1721/2007 Errege Dekretuak beka eta ikasketetarako laguntza pertsonalizatuen araubidea ezarri zuen, eta 1000/2012 Errege Dekretuak bigarren xedapen iragankorra gehitu zion, iraungitzear dauden unibertsitateko ikasketen prezio publikoei buruzkoa.

Testuinguru horretan, Unibertsitateen, Kalitatearen eta Prestakuntzaren Zerbitzuak txosten bat aurkeztu du, Nafarroako Unibertsitate Publikoan 2013-2014 ikasturtean, bai iraungi beharreko lehen eta bigarren zikloko titulazioetarako bai dagoeneko ezarrita dauden graduetarako, graduondoko ikasketetarako eta gainerako zerbitzuetarako, aplikatu beharreko prezioen proposamena arrazoituz.

Nafarroako Foru Komunitateko Administrazioari buruzko abenduaren 3ko 15/2004 Foru Legearen 22.1 d) artikuluak ematen dizkidan ahalmenak erabiliz,

EBATZI DUT:

1. Titulu ofizialak eskuratzeko zerbitzu akademikoen eta gainerako eskubideen truke 2013-2014 ikasturtean ordaindu beharreko prezio publikoak onestea, irizpide hauei jarraituz:

Lehenbizikoa.–Igoerak.

1.1. Gastu publikoa arrazionalizatzeko presako neurriei buruzko apirilaren 20ko 14/2012 Errege Lege Dekretuan xedatutakoa aplikatuz, eta Unibertsitate Politikarako Konferentzia Nagusiak erabakita, 2013-2014 ikasturtean Nafarroako Unibertsitate Publikoan unibertsitate titulu ofizialak eskuratzeko irakaskuntzen prezioak ebazpen honen eranskinetan jasotakoak izanen dira.

1.2. Iraungi beharreko titulazioen kasuan, lehen matrikulan nahiz hurrengoetan kreditu bakoitzeko aplikatu beharreko prezioa izanen da Lanbide Heziketaren eta Unibertsitateen zuzendari nagusiaren uztailaren 13ko 442/2012 Ebazpenaren bidez onetsitako prezioa gehi %1,3ko igoera. Esandako guztia apirilaren 20ko 14/2012 Errege Lege Dekretua eta ekainaren 29ko 1000/2012 Errege Dekretua aplikatuta. Prezio horiek I. eranskinean ageri dira.

1.3. Graduko ikasketen kasuan, lehen matrikulan nahiz hurrengoetan kreditu bakoitzeko aplikatu beharreko prezioa izanen da Lanbide Heziketaren eta Unibertsitateen zuzendari nagusiaren uztailaren 13ko 442/2012 Ebazpenaren bidez onetsitako prezioa gehi %1,3ko igoera. Esandako guztia apirilaren 20ko 14/2012 Errege Lege Dekretua aplikatuta. Prezio horiek II. eranskinean ageri dira.

1.4. Lanbidean aritzeko masterretako ikasketen kasuan, lehen matrikulan nahiz hurrengoetan, kredituetarako prezio baimendua, jakintza arlo guztietan, Lanbide Heziketaren eta Unibertsitateen zuzendari nagusiaren uztailaren 13ko 442/2012 Ebazpenaren bidez onetsitako prezioa izanen da, gehi %1,3ko igoera. Esandako guztia apirilaren 20ko 14/2012 Errege Lege Dekretua aplikatuta. Prezio horiek III. eranskinean ageri dira.

1.5. Lanbidean aritzeko ez diren masterretako ikasketen kasuan, lehen matrikulan nahiz hurrengoetan, kredituetarako prezio baimendua, jakintza arlo guztietan, Lanbide Heziketaren eta Unibertsitateen zuzendari nagusiaren uztailaren 13ko 442/2012 Ebazpenaren bidez onetsitako prezioa izanen da, %1,3 gehituta. Esandako guztia apirilaren 20ko 14/2012 Errege Lege Dekretua aplikatuta. Prezio horiek III. eranskinean ageri dira.

1.6. Lanbide Heziketaren eta Unibertsitateen zuzendari nagusiaren uztailaren 13ko 442/2013 Ebazpenaren bidez onetsitako prezioak %1,3 gehituta ateratzen dira administrazio kudeaketen eta programa ofizialen prezioak. Prezio horiek IV. eranskinean ageri dira.

1.7. Nafarroako Unibertsitate Publikoak, Gizarte Kontseiluaren bidez, edozein ikasketa mailatan kredituen prezioa igotzen ahalko zaie atzerriko ikasle ez-egoiliarrei, Europar Batasuneko estatuetako herritarrak ez badira, eta Europar Batasuneko araubidea aplikatu behar zaienei, elkarrekikotasun printzipioa galarazi gabe, kasuan kasuko ikasketaren kostuen %100eraino.

1.8. Ikasle bisitariek ebazpen honetan kredituetarako ezarritako prezioak ordainduko dituzte. Nafarroako Unibertsitate Publikoak, Gizarte Kontseiluaren bidez, kredituen prezioa gehitu ahal izanen du ikasle hauentzat, edozein ikasketa mailatan, kasuan kasuko irakaskuntzaren kostuen %100 gehienez ere.

Bigarrena.–Prezioen araubidea.

2.1. Matrikula egin edo tituluak edo ziurtagiriak luzatu edo beste edozein administrazio kudeaketa egin baino lehen, unibertsitateak aurreko ikasturteetako matrikulengatik edo beste edozein kontzepturengatik kobratzeke dauden kopuruak pagatu daitezela eskatuko du.

2.2. Matrikularen prezioa edo haren zatikiren batena unibertsitateak ezartzen dituen baldintzetan pagatu ezik, ikasleen eskubideak bertan behera utzi ahalko dira aldi baterako eta, hala bada, matrikula eta horrek sorturiko ondorioak baliogabetu ahalko dira, dirurik itzultzeko eskubiderik gabe. Horren gainean behar diren neurriak hartzea unibertsitateari berari dagokio.

Hirugarrena.–Matrikulatzeko eta ordaintzeko moduak.

3.1. Lehen eta bigarren zikloetako ikasketa planetan, matrikula urtero egiten bada, ikasleak eskubidea izanen du, matrikula-aldi arruntean, I. eranskinean ezarririko prezioak pagatzeko modua aukeratzeko:

a) Ordainketa bakar batean, matrikulako ordainketa gutunean adierazitako epean pagatuta.

b) Zatika, lau ordainketa eginez, epe eta zenbateko hauekin: Lehenbizikoa, zenbateko osoaren %40, matrikularen ordainketa gutunean adierazitako epean; bigarrena, zenbateko osoaren %20, 2013ko urriaren 21etik azaroaren 10era; hirugarrena, zenbateko osoaren %20, 2014ko urtarrilaren 21etik otsailaren 10era, eta laugarrena, zenbateko osoaren %20, 2014ko apirilaren 1etik 20ra.

3.2. Masterretako ikasketa planetan, matrikula urtero egiten bada, ikasleak eskubidea izanen du, matrikula-aldi arruntean, III. eranskinean ezarririko prezioak pagatzeko modua aukeratzeko:

a) Ordainketa bakar batean, matrikulako ordainketa gutunean adierazitako epean pagatuta.

b) Zatika, lau ordainketa eginez, epe eta zenbateko hauekin: Lehenbizikoa, zenbateko osoaren %40, matrikularen ordainketa gutunean adierazitako epean; bigarrena, zenbateko osoaren %20, 2013ko urriaren 21etik azaroaren 10era; hirugarrena, zenbateko osoaren %20, 2014ko urtarrilaren 21etik otsailaren 10era, eta laugarrena, zenbateko osoaren %20, 2014ko apirilaren 1etik 20ra.

3.3. Matrikula seihilean behin egiten den ikasketa planen kasuan, ikasleak eskubidea izanen du II. eranskinean ezarririko prezioak pagatzeko modua aukeratzeko, matrikula-aldi arruntean:

a) Ordainketa bakar batean, matrikulako ordainketa gutunean adierazitako epean pagatuta.

b) Zatika, bi ordainketa eginez, epe eta zenbateko hauekin: Lehenbizikoa, zenbateko osoaren %50, matrikularen ordainketa gutunean adierazitako epean; bigarrena, zenbateko osoaren %50, 2013ko urriaren 21etik azaroaren 10era, udazkeneko seihilekoan eta 2014ko apirilaren 1etik 20ra udaberriko seihilekoan.

3.4. Zatikako ordainketaren kasuan, ikasketen arloko zerbitzu administratiboen ordaineko prezio publikoak eta eskola asegurua osorik sartu beharko dira lehenbiziko ordainketaren kalkuluan.

Ordainketa zatitua ez da aplikatzekoa izanen ordaindu beharreko prezioen zenbatekoa 350 eurotik beherakoa denean.

Aparteko matrikula-aldietan, matrikula zabaltzekoetan edo beken ebazpenaren ondorioz egindako kalkulu berria egitean, kasuan kasuko zenbatekoa ordainketa bakarrean pagatuko da, matrikularen ordainketa-gutunean adierazitako epean.

Laugarrena.–Zenbatekoak.

4.1. Lehen, bigarren edo lehen eta bigarren zikloko unibertsitate-titulu ofizialak eskuratzeko irakasgaietan, matrikularen zenbatekoa arlo, ikasgai edo diziplina bakoitzerako ezarririko kreditu matrikulatuen batura izanen da, ikasketa planeko esperimentaltasun mailaren arabera, lehen, bigarren, hirugarren edo hurrengo matrikulak izan eta horrela, I. eranskineko prezioekin eta ebazpen honetako gainerako arauekin bat.

4.2. Eskuratu nahi den titulazioko kredituetarako ezarririko prezioaren arabera pagatu beharko dira aukera libreko irakasgaien kredituak edo ikasleari jarduera akademikoengatik aitortu zaizkion kredituak, kreditu horiek zer departamentu edo zentrotan egiten edo aitortzen diren kontuan hartu gabe.

4.3. Graduko eta masterreko unibertsitate-titulu ofizialak eskuratzeko irakaskuntzetan, matrikularen zenbatekoa arlo, ikasgai edo diziplina bakoitzerako ezarririko kreditu matrikulatuen batura izanen da, kasuko ikasketa planeko jakintza arloaren arabera, lehen, bigarren, hirugarren, laugarren edo hurrengo matrikulak izan eta horrela, II. eta III. eranskinetako prezioekin eta ebazpen honetako gainerako arauekin bat.

4.4. Urtarrilaren 28ko 99/2011 Errege Dekretuak edo urriaren 29ko 1393/2007 Errege Dekretuak araututako doktoretzako unibertsitate titulu ofizialak lortzeko irakaskuntzetan, matrikularen zenbatekoa izanen da tutoretza akademikoari dagokiona, IV. eranskineko prezioen eta ebazpen honetako gainerako arauen arabera. Urtarrilaren 28ko 99/2011 Errege Dekretuak doktoretzako irakaskuntza ofizialak arautu zituen eta urriaren 29ko 1393/2007 Errege Dekretuak, berriz, unibertsitateko irakaskuntza ofizialen antolamendua ezarri zuen.

Doktoretza programa batean matrikulatutako ikasleen prestakuntzaren osagarri bezala egin beharreko kredituei aplikatuko zaizkien prezioak osagarria zein titulu ofizialekoa den, harenak izanen dira.

Aurreko lerroaldean aipatzen diren arauak baino lehenagokoek antolatutako doktoretza programen kasuan, matrikularen zenbatekoa arlo, ikasgai edo diziplina bakoitzerako ezarririko kreditu matrikulatuen batura izanen da, kasuko ikasketa planeko jakintza arloen arabera, III. eranskinetako prezioekin eta ebazpen honetako gainerako arauekin bat.

Bosgarrena.–Salbuespenak eta hobariak.

5.1. Prezioetan salbuespenak eta hobarietarako eskubidea ematen duten baldintzak matrikula eskatzen den egunean bete behar dira.

5.2. Ikasleei behin ere ezin izanen zaie salbuespenik edo hobaririk aplikatu, ebazpen honetan ezarririk ez badaude edo indarra duen araudiak ezartzen ez badu.

a) Bekak.

Indarra duen legeriarekin bat beka eskatzen duten ikasleak, baldin eta beka deialdian ezarrita baldin badago ikasleak eskubidea duela irakaskuntza zerbitzuaren prezioak beka eskaera ebatzi arte ez ordaintzeko, eskubide horretaz baliatzen ahalko dira, baina beka ukatuz gero, matrikularen zenbatekoa batera ordaindu beharko dute.

Ikasketetarako beka eta laguntzen banakako osagaiaren kostua, matrikularen gastuak finantzatzeko erabiltzen dena, Estatuko Administrazioak eta autonomia erkidegoek finantzatuko dute, Hezkuntzaren esparruan gastu publikoa arrazionalizatzeko presako neurriei buruzko apirilaren 20ko 14/2012 Errege Lege Dekretuan ezarritakoarekin bat.

b) Familia ugariak.

Familia ugariak babesteko azaroaren 18ko 40/2003 Legearen 12. artikuluan eta abenduaren 30eko 1621/2005 Errege Dekretuaren bidez onetsiriko Erregelamenduan xedaturikoarekin bat:

Kategoria bereziko familia ugarietako kide diren ikasleek eskubidea izanen dute araudi honetan finkaturiko prezio publikoetan salbuespen osoa izateko.

Kategoria orokorreko familia ugarietako kide diren ikasleek eskubidea izanen dute araudi honetan finkaturiko prezio publikoetan %50eko salbuespena izateko.

Familia ugariko titulu indarduna aurkeztuz frogatuko da familia ugarietako kidetza edo, matrikula eskatzen den egunean tramitatzen ari baldin bada, indarra duen araudiak baimentzen dituen agiriak.

c) Ohorezko matrikulak.

“Ohorezko Matrikula” aipamena lortzen duten ikasleek, Nafarroako Unibertsitate Publikoko ikasketa plana bera bada, salbuespenerako eskubidea izanen dute matrikularen prezio publikoetan, aurre-aurreko ikastaldian kalifikazio akademiko hori zein kreditutan lortu duten, haien lehen matrikularen adinako kostua.

Batxilergoko kalifikazio globalean Ohorezko Matrikula lortzen duten ikasleak salbuetsirik daude matrikularen prezio publikoak pagatzetik unibertsitate ikasketetako lehen urtean.

d) Desgaitasuna dutenak.

%33ko edo hortik gorako desgaitasuna duten ikasleek eskubidea izanen dute araudi honetan finkaturiko prezio publikoetan salbuespen osoa izateko, Unibertsitateei buruzko abenduaren 21eko 6/2001 Lege Organikoaren hogeita laugarren xedapenean xedaturikoarekin bat.

Desgaitasuna duen pertsona dela edozein agiri aurkeztuz frogatuko da, indarra duen legeriak aurreikusten duena.

e) Terrorismoaren biktimak.

Terrorismoaren biktimekiko elkartasunari buruzko urriaren 8ko 32/1999 Legearen 7. artikuluan ezarritakoari jarraikiz, egintza terroristen biktimek, baita haien ezkontide eta seme-alabek ere, irakaskuntzako prezio publikoetan salbuespen osoa izanen dute. Beraz, zerbitzu administratiboen prezio publikoak bakarrik pagatu beharko dituzte.

Ondorio horietarako, ekintza terroristen biktimek izaera hori aitortzen dien ebazpen administratiboa aurkeztu beharko dute eta, ezkontideak edo seme-alabak izanez gero, familia liburua.

f) Genero indarkeriaren biktimak.

Genero bortizkeriaren biktimek eta haien seme-alabek, Genero Bortizkeriaren kontrako Babes Integralerako Neurriei buruzko abenduaren 28ko 1/2004 Lege Organikoan xedaturikoarekin bat, eskubidea izanen dute zerbitzu akademikoen prezio publikoetan salbuespena izateko. Beraz, zerbitzu administratiboen prezio publikoak bakarrik pagatu beharko dituzte.

Indarra duen araudiak aurreikusten duen edozein agiri eta, haien seme-alaben kasuan, familia liburua aurkeztuz frogatuko da genero biktima dela.

Seigarrena.–Ikasketak baliokidetu eta aitortzeko prezioak.

6.1. Ikasketak baliokidetu eta aitortzeko prozesuek IV. eranskinean aipatzen den prezio administratiboaren abonua ekarriko dute beraiekin.

6.2. Edozein unibertsitate-zentrotan eginiko lehen, bigarren edo lehen eta bigarren zikloko ikasketetako ikasgai edo kredituak baliozkotzeko, ikasleek Nafarroako Unibertsitate Publikoari I. eranskinean aipatzen diren prezioen %25 pagatuko diote.

6.3. Graduko edo gradu ondoko ikasketetan (masterrean edo doktoretzan) matrikulaturiko kredituak onartzeko, 1393/2007 Errege Dekretuan xedaturikoarekin bat, ikasleek II. eta III. eranskinetan aipatzen diren prezioen %25 pagatuko diote Nafarroako Unibertsitate Publikoari.

Zazpigarrena.–Irakaskuntzarik gabeko arloak.

Iraungitzeko dauden ikasketa planetako kredituetan matrikulatzeko, Nafarroako Unibertsitate Publikoak irakaskuntza alternatiboa eskaintzen badu, ikasleak kredituak osorik pagatuko ditu. Unibertsitateak aukera alternatiboa eskaintzen ez badu, unibertsitateari prezioaren %25 pagatuko zaio.

2. Ebazpen hau eta eranskinak Nafarroako Aldizkari Ofizialean argitara daitezela agintzea.

3. Ebazpen hau igortzea Hezkuntzaren, Lanbide Heziketaren eta Unibertsitateen Zuzendaritza Nagusiari, Nafarroako Unibertsitate Publikoko Irakaskuntza Errektoreordetzari, Nafarroako Unibertsitate Publikoko kudeatzaileari, Unibertsitateen, Kalitatearen eta Prestakuntzaren Zerbitzuari eta Goi mailako Irakaskuntzaren Bulegoari.

Iruñean, 2013ko ekainaren 10ean.–Hezkuntzaren, Lanbide Heziketaren eta Unibertsitateen zuzendari nagusia, David Herreros Sota.

Iragarkiaren kodea: F1308694