Iragarkia

87. ALDIZKARIA - 2012ko maiatzaren 9a

1. NAFARROAKO FORU KOMUNITATEA

1.3. LURRALDEAREN ANTOLAMENDUA ETA HIRIGINTZA

ERABAKIA, Nafarroako Gobernuak 2012ko apirilaren 18an hartua, "Cavar-1, Cavar-2, Cavar-3, Cavar-4 eta Cavar-5 izeneko parke eolikoak" proiektua Udalez gaindiko Proiektu Sektorial deklaratzen duena. Renovables de la Ribera, S.L. merkataritzako sozietateak sustatu du.

Proiektuaren xedea da bost parke eolikoren eta hari lotutako instalazioen ezarpena deskribatzea. Honako hauek dira potentzia eta udal mugapeen gaineko ukipenak:

Parke eoliko guztietan aerosorgailuek ezaugarri hauek izanen dituzte: Gamesa Eólica, 4.500 kW/un., hiru palako errotorea, 128 metroko diametrokoa, eta abatza 120 metroko altueran.

Aurreikusten da parke horietan 694.782 MWh/urteko guztirako produkzioa izanen dela; hau da, tramitatutako dokumentuaren arabera, Nafarroako elektrizitate kontsumoaren %13,36; 5.198 GWh, 2010. urtean.

Era berean, aurreikusi da azpiestazio bat ezartzea oraingo Iberdrola Desauren Valtierra TAtik hurbil, eta goi tentsioko linea bat, airekoa/lurpekoa, energia La Serna azpiestaziora aterako duena.

Energia ateratzeko linea elektriko horrek bost tarte izatea proiektatu da: hiru lurpeko eta bi aireko. Lurpetik aterako da, Valtierra TAtik, eta lurzatien berrantolamenduko bide berrietan barna joanen da, eta SSW ibilbidea izanen du (1. tartea). Prestazio handiko trenaren trazadura -A-15 autobidearen paralelo, eta handik oso hurbil- aurreikusi den eremura iristean, 220 kV-eko linearekin batean kokaturik, aldaketa eginen da, lurpekotik airekora, eta, 2 kilometrotik beherako linea motz baten bidez (2. tartea), Ebro ibaia gurutzatzen da, eta berriz ere lurpera igaroko da (3. tartea), haren eskuineko bazterretik, eta A-15 autobidea gurutzatuko da, baita prestazio handiko trenerako aurreikusitako trazadura eta 220 kV-eko linea bat ere. Gero, trazadura berriz ere airekoa izanen da, eta laborantza lurretan joanen da (4. tartea), N-232 errepidea gurutzatu arte, La Serna azpiestazioaren inguruetan. Gurutzatu ondoren, berriz ere lurpera pasatuko da azkeneko tartean (5. tartea). Linea, guztira, 15.100 m luze da, eta, horietarik, 10.586 m airean dira.

Hona hemen tarteen luzerak:

-1. tartearen (lurpekoa) luzera: 2.770 m.

-2. tartearen (airekoa) luzera: 1.942 m.

-3. tartearen (lurpekoa) luzera: 430 m.

-4. tartearen (airekoa) luzera: 8.644 m.

-5. tartearen (lurpekoa) luzera: 1.314 m.

N-121 errepidean egonen dira parkerako sarbideak (71,1 k.p.), eta El Yugo ermitarako errepidean. Horretarako, errepide horietatik ateratzen diren pisten hasierak asfaltatu eginen dira, eta behar diren bihurgune-erradio eta zabalera egokiak emanen zaizkie. Halaber, segurtasuna hobetzeko, proiektuan aurreikusten da sarbide berri bat egitea N-121 errepidean, aipatutako kilometro puntuan, orain dagoen sarbidean.

Barneko zerbitzu-bideei dagokienez, aurreikusten da oraingo bideak egokitzea, makinak igaro daitezen, eta bide berriak egitea, oraingo bideetatik hurbil egonen ez diren aerosorgailuetarako sarrera errazteko.

Bestalde, El Yugo ermitatik hurbil samar, proposatzen da parke eolikorako kontrol-eraikin bat eraikitzea, solairu bakarrekoa, 30 x 10 metrokoa.

Orobat, gizarte arloko konpentsazio neurri gisa, proiektuan honako hau jaso da: El Yugo ermitako aparkalekutik hurbil, eta aparkalekutik sarbidea izanik, energiari buruzko zabalkunderako gune tematiko bat -hala deitu dio sustatzaileak-, eskualdeko ikasleen prestakuntzarako izan daitekeena, eta Senda Viva-ko bezeroentzako bisita osagarri bat. Horretarako eraikin txiki bat aurreikusi da, 10 x 15 metrokoa. Proiekzio areto txiki bat bakarrik egonen da han, eta bertan aurkeztuko dira, talde antolatuentzat -ikastetxeetarako, esaterako-, proiektatutako instalazioaren ezaugarriak edo energien ingurukoak, eta, bidezko bada, Bardeako natur balio garrantzitsuenak.

Zerbitzu sareei dagokienez, edo horiekiko loturei dagokienez, honako hau proiektatu da:

-Uren hargunea: ahal bada, uren hargune bat planteatzen da El Yugo ermitatik gune tematikoko eraikineraino, eta, parkearen kontrol-eraikinerako eta azpiestazioko eraikinerako -ur beharrak txikiak direnez eta hurbileko sarerik ez dagoenez-, zisternatik biltontzirako hornidura.

-Saneamendua eta ur beltzak: aurreikusi da komun bat ezartzea azpiestazioan eta beste bat kontrol-eraikinean, mantentze-lanetako langileek erabil dezaten. Biltontzi batetik hartuko du ura, eta hondakin-urak hobi septiko itxi batera isuriko dira.

-Energia elektrikoa: instalazio horiek energiaz hornitzeko, aurreikusitako azpiestazioko linea elektrikoaren hargunea erabiliko da. Azpiestazioaren ingurua, kontrol-eraikina eta eremu tematikoko eraikina argiztatuko dira bakarrik.

Dokumentuak, halaber, honako hau jasotzen du: "Bukatzeko, parkearen erabilgarritasun-aldia bukatutakoan ingurua lehengoratu eginen da: zimenduak eta bideak landare lurrez estaliko dira, aerosorgailuak desmuntatu eginen dira (eta birziklatu, funtsean altzairuzkoak baitira), eta linea elektrikoa eta azpiestazioa ere bai". Orobat, hauxe dio: landaretzari egiten zaion ukipen orokorra murrizteko, obretan egiten diren ezpondak eta lubetak landareztatuko dira, bertako zuhaixka eta belar espezieekin, ereite hidraulikoaren bidez".

259.069.113 euroko aurrekontua dute instalazioek, eta honela xehakatzen da:

-Cavar 1 parkea, kontrol-eraikina barne: 47.457.091 euro.

-Cavar 2 parkea: 46.946.695 euro.

-Cavar 3 parkea: 68.756.615 euro.

-Cavar 4 parkea: 38.970.805 euro.

-Cavar 5 parkea: 46.903.240 euro.

-Valtierrako BTA: 5.111.800 euro.

-Goi tentsioko linea, Valtierra ATtik La Serna ATra: 4.922.867 euro.

II.
Hirigintzari eta lurraldeari buruz kontuan hartu beharrekoak

Aurrekariak

Behin Ingurumenaren gaineko eraginaren ebaluazioaren prozedura bukaturik (Cavar-1, Cavar-2, Cavar-3, Cavar-4 Eta Cavar-5 parkeena, Cadreita, Valtierra eta Arguedas herrietako udal mugapeetan daudenak), Ingurumen Kalitatearen Zerbitzuko zuzendariak, 2011ko ekainaren 15eko txosten batean, honako hau adierazi zuen:

"... zerbitzu honetan dagoen informazioa azterturik, kontuan harturik aerosorgailuek hartzen duten eremu zabala, eta hurbil dagoela estepako hegaztien kontserbaziorako interesekoa den Eguaras-Peñarroya eremutik eta Errege Bardea intereseko eremutik, eta kontuan harturik, orobat, multzo guztian paisaian egiten den ukipen garrantzitsua, uste da ingurumeneko eragin nabarmenak dituela proposamenak, gutxienez ere larritzat hartzeko modukoak.

Beste alde batetik, oraingo datuen arabera hegaztiek eremu hau nola erabiltzen duten ikusirik, baloratzen da proposatzen diren dimentsioak dituen parke eoliko batek arrisku handia ekarriko duela hegaztientzat, nahiz eta multzoaren barneko eremu batzuetan eraginak askoz txikiagoak izan. 4. eta 5. parkeak ez dira bideragarriak ingurumenaren aldetik, aintzat harturik eremuko jardueren eragin metakorrak, paisaiaren aldetik dauden balioak -lurraldea planifikatzeko dokumentuetan aitorturik daudenak- eta balio ekologikoak -jadanik azterturik daude, El Yugoko mendilerroa barnean hartzen duen eremu horri dagozkion espedienteetan-.

Jarduera eolikoan zentratu beharko litzatekeen esparrua 1., 2. eta 3. parkeei dagokien poligonoan dago, eta haren barnean eragin txikieneko kokapenak zehaztu beharko dira. 3. parkeko eremu batzuetan ez da egokia aerosorgailuak ezartzea, topografiarengatik, landaretzagatik eta abeltzaintza guneak hurbil izateagatik. Abeltzaintza guneei dagokienez, horietan maiz hegaztiak izaten dira, eta aerosorgailuekin talka egin dezakete...".

Orain tramitatzen ari den proiektuan (memoria) sustatzaileak hauxe erantzuten dio txosten horri: "Nahiz eta Ingurumen Kalitatearen Zerbitzuaren txostenean adierazten den CAVAR-4 eta CAVAR-5 gisa tramitatutako parkeek oso ukipen larria ekarriko diotela inguruneari, sustatzaile honek erabaki du nolanahi ere horiei eustea, Administrazioak erabaki dezan, UPSaren azterketa orokorraren barnean, osoki edo partez ukatzea, balantzea eginda ukipen larri horien eta tokiko energia sorkuntzaren artean".

Ildo horretan, parke eolikoen ezarpena arautzen duen otsailaren 26ko 125/1996 Foru Dekretuaren 7.2 artikuluak honako hau dio: "proiektu sektoriala onesteko unean, Nafarroako Gobernuak baloratuko ditu, legezkotasun eta egokitasun irizpideez gain, parke eolikoaren kokapena eta ingurumenean izanen duen ukipena, eta onespena ukatzen ahalko du, osoki edo partez, baldin eta ikusten badu ukipen larriak izanen direla mehatxatutako faunan edo garrantzi bereziko ezaugarriak dituzten paisaietan".

Eskatzen den dokumentazioa

Aipatutako 125/1996 Foru Dekretuak ezartzen du Udalez gaindiko Proiektu Sektoriala (hemendik aurrera, UPS) tramitatu behar dela udalerri bateko baino gehiagoko lurrak ukitzen dituen parke eolikoa ezartzeko.

Alde horretatik, foru dekretu horren 7. eta 5. artikuluetan ezarpen horiek baimentzeko eskabideei erantsi beharreko agiri teknikoak eta administratiboak zehazten dira.

2011ko abuztuaren 26an, sustatzaileak Sustapen eta Etxebizitza Departamentuan honako agiri hauek osatzen duten proiektua aurkeztu zuen:

1. Memoria.

2. Aurreproiektuak eta planoak.

2.1. Cavar 1.

2.2. Cavar 2.

2.3. Cavar 3.

2.4. Cavar 4.

2.5. Cavar 5.

2.6. Valtierrako azpiestazio elektrikoa eta 66 kV-eko goi tentsioko linea.

3. Ingurumen eraginaren azterlana eta hegaztiei egiten zaien jarraipena.

3.1. PEen Ingurumen eraginaren azterlana.

3.2. Valtierra-La Serna goi tentsioko linearen Ingurumen eraginaren azterlana.

3.3. Hegaztien jarraipena.

4. Natur balioak eta hiri-balioak babesteko arauak.

5. Energia produkzioaren justifikazio teknikoa.

6. Gauzatzeko egutegia eta finantza plana.

7. Gaitasun ekonomikoaren frogak.

8. Aurrekontua.

9. Orain arteko tramitazioa.

Eduki horren bidez biltzen da legearen arabera eskatzen den dokumentazio guztia, ondoren aipatzen dena izan ezik; hori, nolanahi ere, espedientea ebatzi baino lehen aurkeztu beharko da:

-UPSaren eremuko eraikuntzako erabilera eta jarduerak arautzeko ezarri diren hirigintzako determinazioen justifikazioa.

-Banku abala edo zuzenbidean onartzen den beste edozein berme mota, Planaren behar bezalako exekuzioari erantzuten diona eta proiektaturiko obra zibilaren aurrekontu balioetsiaren %6ko zenbatekoa duena. Hala ere, sustatzaileak banku abalaren edo zuzenbidean onartzen den beste edozein berme motaren zenbatekoa ezartzen ahalko du, Proiektu Sektorialaren exekuzioari behar den denboran eta moduan erantzuten diona. Zenbateko hori "ehun milioi pezeta"koa (600.000 euro) izanen da, baldin eta proiektaturiko obra zibilaren aurrekontu balioetsiaren %6 handiagoa bada. Abala Ekonomia eta Ogasun Departamentuan aurkeztuko da.

Orobat, zein mankomunitatekoa den udala, haren txosten batekin osatu beharko du espedientea sustatzaileak, planeamenduak ukitutako zerbitzu elkartuei buruz.

Instalazioaren kokalekuaren deskripzioa

Arguedasko antiklinala deitutakoaren hego-ekialdeko muturrean daude parke eolikoak, eremu apal samarrean, bi malkarren artean: batetik, aurreko aldea Valtierra eta Arguedasa jaisten dena (eta, neurri apalagoan, Cadreita aldera) eta, bestetik, atzeko aldea Errege Bardearantz jaisten dena. Erliebe positibo bat da, berrehun metro baino gehixeagoko aldea duena Valtierrako hirigunearekiko, eta gutxixeago Bardearekiko. Egiturazko plataforma zabal horretan, badira ibai jatorriko terrazak, zerrenda formakoak, eta aldeetan badituzte magaletako kolubioiak dituzten zerrenda meharrak. Bestalde, bada terraza handi bat ere, eta glazis azalera bat.

Plataforma handi horrek, pixkanaka, behera egiten du topografikoki, hego-ekialdetik ipar-mendebaldera. Tarteko zatian, igeltsuek bi muino handi sortzen dituzte, espazioa bi eremu handitan banatzen dutenak: ipar-ekialdekoa, El Yugo ermitarantz begira dagoena, eta Cavar 4 eta Cavar 5 parkeak hartzen dituena, eta ipar-mendebaldekoa, Cavar 1 eta Cavar 2 parkeak hartzen dituena (azkeneko hori gune garaietan dago, eta El Yugo eremuan proiektatzen da, begi-lerroan).

Geomorfologiaren aldetik, nabarmentzekoa da Errege Bardeako natur parkeari begira dagoen malkar monoklinala. Egiturazko elementu horrek -desitxuratuxea, baina hala ere nabarmena da ipar-mendebalderantz- topografiaren aldetik eremuko lerrorik garaiena markatzen du, eta ingurumen unitate baliotsuenak hartzen ditu.

"Ebroko ardatza" Lurraldearen Antolamenduko Planeko determinazioak (LAP 5)

Proiektuen dokumentazio teknikoak behar bezala jasotzen ditu LAPeko determinazio guztiak, xedearekin eta kokapenarekin lotutakoak, eta erantzuna ematen die.

Nolanahi ere, kontuan hartu behar da LAPek, jarduketaren eremuan, gehien babesten duten elementua paisaia dela, izan ere identifikatutako ingurumen unitateek ez dute ekarri mugatzea beste ingurumen edo ekoizpen balio batzuengatik babes berezia behar duen eremurik. Paisaiaren aldetik, Arguedasko plataforma antiklinaleko ertzek dute balioa, El Yugo mendilerroko itxiera periklinaleko topografian, eta El Yugo ermitan eta inguruan. "Nortasun-adierazle gisa berebiziko balioa duten parajeak dira, ondarearen osagai eta eszenatoki apartak, merezimendu historiko-kultural eta sinboliko handiak dituztenak": Bardearako ataria dira, eta zinez behatoki aparta, handik ikusten ahal baita Nafarroako geografia, Piriniotik Moncayoraino. Geografia esparru honetan inbertsioak egin dira eskualdez gaindiko irismena duten proiektuetan; proiektu horiek, hain zuzen, eremuak duen paisaiaren aldeko balioan oinarritu dira (Senda Viva parkea).

LAPak adierazten duenez, paisaia berezi horietarako, "elementu berezia eratzen duen paisaia-ingurunea babestu egin beharko da, eta ez dira ezarriko paisaiaren berezitasunarekin bat ez datozen osagaiak, eta paisaia bereziaren funtsezko osagaiak kentzea saihestuko da, hau da, saihestuko da babestutako eremuaren identitateari kaltea ekartzea".

Uste da Cavar-4 eta Cavar-5 parke eolikoak kentzearekin (hala izanen dela aurreikusten da) saihestu eginen direla bateraezintzat jo behar diren paisaia-inpaktuak. Gainera, ikusi da Cavar 3-A eta Cavar 3-B parkeetako paisaia-inpaktuen azterlanak bata bestearekin nahasirik daudela dokumentazio teknikoan, dirudienez, eta, nolanahi ere, horietako batek (baita Cavar 3-C-k ere) eragin handiegia du El Yugoko eremuan. Hortaz, azterlanaren edukia eta ondorioak berrikusi egin beharko dira, eta eragina murriztuko duten alternatibak proposatu beharko dira.

Azkenik, Bardeako natur parkeko eremutik begi-inpaktua murrizteko, aurreko epigrafean deskribatutako malkar monoklinala gainditzen dituzten errotak kendu eginen dira: Cavar-1 A.04, Cavar-1 A.05, Cavar-1 A.11, Cavar-2 B.09, Cavar-2 B.10, Cavar-2 B.11, Cavar-3 CB.04, Cavar-3 CC.01, Cavar-3 CC.02.

Hirigintza planeamenduaren aipamena

Cadreitako Udal Planaren arabera (1997ko apirilean onetsia), Cavar 1 izeneko parkeak nekazaritza edo abeltzaintza produkzio ertaineko lurzoru urbanizaezin gisa sailkatutako lurrak hartzen ditu, eta, azalera txiki batean, lurzoru urbanizaezin generiko gisa sailkatutakoak.

Valtierrako Udal Planaren arabera (indarrean 1999. urtetik), bost parkeek okupatutako lurrak batez ere nekazaritza edo abeltzaintzako produktibitate ertaineko lurzoruak dira, "orokorrak", eta irla txiki batzuk oihan lurzoru urbanizaezinak ("baso eta sasi autoktonoak" eta "koniferoekin birpopulatutako sailak") eta ukipen bereziko lurzoruak ("oraingo azpiegiturak" eta "intereseko ibilbideak: altxonbideak").

Bestalde, udal mugape horren barnean, aerosorgailu guztiak nekazaritza edo abeltzaintzako produktibitate ertaineko lurzoruetan daude, "orokorretan".

Arguedasko 1991. urteko arau subsidiarioen arabera, Cavar 5 parkeak ukitutako lurrak honelakoak dira: oihan lurzoru urbanizaezina, generikoa (batez ere) eta altxonbideak. Aerosorgailuak proiektatutako lurzoruak lurzoru urbanizaezin generikoak dira.

Aipatutako udal planeamenduek, ukitutako lurzoruen kategorien hirigintza araubideek zehazki, ez dute berariaz jasotzen debekaturik dagoenik aurreikusitako jarduera (parke eolikoa) eta, parke eolikoen ezarpena arautzen duen otsailaren 26ko 125/1996 Foru Dekretuaren 6. artikuluari jarraikiz, kokaleku egokitzat jo daitezke lurzoru urbanizaezin horiek non aurreikusi baita aerosorgailuak ezartzea.

Beste alde batetik, aurreikusitako azpiestazioa produktibitate handiko lurzoru urbanizaezinean kokatuko da, Valtierrako Udal Planaren arabera, eta energia ateratzeko linea elektrikoak ondokoak gurutzatzen ditu: lurzoru urbaenizazinak, nekazaritza edo abeltzaintzako produktibitate ertaineko lurzoru "orokorrak" direnak, produktibitate handikoak, oihan lurzoruak ("ibarbaso naturalak" eta "koniferoekin birpopulatutako sailak") eta ukipen berezikoak ("oraingo azpiegiturak", "ur babestuak" eta "intereseko ibilbideak: altxonbideak").

Castejóngo udal mugapean, energia ateratzeko linea elektrikoak ondokoak gurutzatzen ditu: lurzoru urbanizaezinak, ukipen berezikoak (ur ibilguak, errepideak eta trenbideak) eta produktibitate handikoak. Tuterako udal mugapean, ondokoak: lurzoru urbanizaezinak, oihanekoak, nekazaritza edo abeltzaintzako produktibitate handikoak, generikoak, ukipen berezikoak (errepideak) eta lurzoru urbanizagarri ez programatuak.

Azpiegitura elektrikoen (energia ateratzeko linea eta azpiestazio elektrikoa) araubideek ez dute berariaz jasotzen azpiegitura horiek debekaturik daudenik.

Lurren gaineko ukipenak eta lurralde eremuen mugaketa

Proiektuan ez dira ageri aldi baterako edo behin betiko okupazioak, ezarriko diren zortasunak, ezta proposatutako jarduketek, abian jarri eta gero, izanen duten babes araubidea ere. Alderdi horiek guztiak jaso behar dira proiektuan, eta proposamenetan bereizi egin behar dira lerrokadurak, sarbideak, parkearen ezarpen eremua eta energia ateratzeko instalazioak.

Orobat, dokumentuan argi eta zehatz mugatu behar dira lurralde eremu hauek:

-Azterlan edo analisiaren eremua: lurralde eremua, behar bezain zabala, aukeratzen ahal diren kokaleku guztiak ebaluatzeko eta aztertzeko, azterketa hori beharrezkoa baita, arrazoietan oinarrituta, zein kokagunetan ezarri behar diren erabakitzeko, bertan dutelako, oro har, eragin txikiena lurralde eta ingurumen aldetik.

-Ezarpen eremua: parkea ezartzeko aukeratzen den kokalekua, lurraldean, oro har, eragin txikiena duelako. Mugapen hori beharrezkoa da aerosorgailuak kokatzeko modua (ilarakoa edo bestelakoa) justifikatzeko eta eremu horretako erabilera eta jarduera onartuei, baimengarriei eta debekatuei buruzko araudia aplikatzeko. Lurralde Antolamenduari eta Hirigintzari buruzko Foru Legean ezarritakoarekin bat, proiektu honetako jarduketek ukitzen dituzten lurrak edo haien ezarpen eremua babestu beharreko lurzoru urbanizaezintzat joko da, eta azpiegituretarako lurzoruaren azpikategoria izanen du.

Parkeen araudiari, egokitzat jotzen den atalean, determinazio hauek erantsiko zaizkio:

-Erabilera eta jarduera onartuak honako hauek izanen dira: parke eolikoaren kontserbaziorako, mantentze lanetarako eta zerbitzurako behar direnak, baita Ingurumena Zaintzeko Plana betetzeko behar direnak ere.

-Delta hegala, parapentea eta horrelako aireko nabigazioa debekatzeari buruz bidezkoak diren determinazioak.

-Parke eolikoa garatzeko egiten den edozein eraikuntza-proiektutan, baita parke eolikoaren edozein osagairi dagozkion obren exekuzioan ere, kontuan hartuko dira lehendik dauden eta egitekoak diren azpiegitura guztiak, azpiegitura horiekin burutu beharreko jarduketak koordinatzeko, baita balizko beste zortasun batzuk ere; adibidez, ondare historiko eta arkeologikoari dagozkionak, aeronautikoak, halakorik balitz, eta bestelakoak. Horretarako, obrak hasi baino lehen, arloaren arabera eskumena duten organoei behar diren baimen guztiak eskatu beharko zaizkie.

-UPSa aldatzeko espedientea tramitatu beharko da, kasuan kasuko parkerako, baldin eta funtsezko aldaketak egin nahi badira lerroen antolaeran eta/edo aerosorgailuen kopuruan, proposatutako sarbide eta argindar lineen trazaduran edo parkerako ezarritako araudian.

Bestelako trazadurekiko bat-egiteak

Tramitutako proiektuan jaso bezala, gurutzaketak izanen dira energia ateratzeko lurpeko linean, eta parke barneko zirkuituetan, beste azpiegitura batzuekin: Ebro ibaia, A-15 Nafarroako Autobidea, oraingo trenbidea, etorkizuneko Castejón-Iruña AHTa eta Iberdrola eta REEren linea elektrikoak.

Behar diren erakunde eskudunen baimenak beharko dira gurutzaketa guztietarako.

Eremu ureztagarriak

Departamentu honetan dagoen informazio geografikoaren arabera, proiektuan parkea kokatzeko mugatzen den esparrua "Nafarroako Ubidearen 2. faseko eremu ureztagarrien" barrenean dago. Halaber, energia ateratzeko proposaturiko linearen trazadurak ureztalur tradizionalak gurutzatzen ditu.

Horrenbestez, ureztaketari egiten zaion ukipenari dagokionez, txostena eskatu zaio Landa Garapen, Industria, Enplegu eta Ingurumen Departamentuko Nekazaritzako Azpiegituren Zerbitzuari. Txosten horren ondorioak, bidezko bada, espedientearen ebazpenean kontuan hartuko dira.

Ondare arkeologikoaren gaineko ukipena

Ondare arkeologikoari egin dakiokeen ukipenari dagokionez, txostena eskatu zaio Vianako Printzea Erakundea-Kultura eta Turismo Departamentuko Ondare Historikoaren Zerbitzuari.

Sarbideak

Tramitatutako proiektuan ez dira grafikoki zehaztu parkerako sarbideak, N-121 errepidetik (71, 1 k.p.), eta El Yugo ermitarako errepidetik. N-121 errepideko k.p.an orain dagoen sarbidean eginen den aldaketa ere ez da zehazten. Aipatutako alderdiak osatu beharko dira.

Nafarroako Errepide Sareak izan ditzakeen ukipenei dagokienez, txostena eskatu zaio Herri Lan Zuzendaritza Nagusiari. Nolanahi ere, N-121 errepidetik planteatu den sarbideak dagokion baimena beharko du.

Beste ukipen batzuk

Cavar 5 parkerako mugatutako esparruko lurretan, Ingurumen Kalitatearen Zerbitzuko zuzendariaren irailaren 26ko 476/2008 Ebazpenaren bidez Ingurumen ukipenetarako baimena eman zen Arguedasko (Nafarroa) 5. poligonoko 5087.-5091., 5105.-5112., 5123.-5125., 5159. eta 5160. lurzatietan "Huerta Solar El Jugatillo" proiektua instalatzeko, Acciona Solar, S.A.k sustaturik. 41,03 Ha okupatu ziren.

Bestalde, 5. parkeko E.08 aerosorgailua Senda Viva parkera sartzeko errepidetik 40 metro baino gutxiagora dago.

Ukipen horiek ez dira jaso aurkeztutako proiektuan, eta argitu egin behar dira.

Bestelako xehetasunak

Grafikoki agertu beharko da zer kokapen duten kontrol-eraikinak eta energiaren interpretazioko eraikinak. Halaber, ukitutako katastroko lurzatien zerrenda egin behar da. Alde horretatik, oroitarazi behar da ezen, 125/1996 Foru Dekretuan xedatutakoa eta Valtierrako Udal Planean (Hirigintzako Araudi Partikularraren 45. artikulua) xedatutakoa kontuan hartuta, eraikin horiek ezin direla kokatu El Yugo ermitatik berrogeita hamar metrora baino hurbilago.

UPSean parkearen inguratzailearen koordenadak jaso dira; horretaz gain, parkeen eremuen koordenada guztiak jaso behar dira dokumentuan. Bestalde, argitu behar da ea ondoko eguzki baratzea UPSean txertatzen den edo ez.

Azkenik, aerosorgailuetatik, linea elektrikoen euskarrietatik eta azpiestazio elektrikoen inguruko itxitura edo hesietatik bide publikoen eta abelbideen kanpoko ertzeraino 3 metroko tartea, gutxienez, egonen da.

III.
BEHAR ADINAKO EDUKIERA ETA GARRAIO SARE ELEKTRIKOAREKIKO LOTURA IZATEA

Horri buruz, sustatzaileak espedientea osatu beharko du Enpresaren eta Berrikuntzaren Zuzendaritza Nagusiaren txosten batekin.

IV.
INGURUMENAREN ARLOKO GOGOETAK

2011ko azaroaren 4ko txostenean, Ingurumen Kalitatearen Zerbitzuak honakoa adierazi du: "Aurkeztutako dokumentazioa aztertu da eta Ingurumen eraginaren azterlanaren edukia bat dator Ingurumena Babesteko Esku-hartzeari buruzko 4/2005 Foru Legea garatzen duen 93/2006 Foru Dekretuan ezarritakoarekin. Horrenbestez, hura jendaurrean jar daiteke, UPSeko gainerako agiriekin batera, ingurumen eragina ebaluatzeko prozeduraren tramitazioan aurrera egiteko".

Horrenbestez, Lurraldearen Antolamenduko Batzordearen 2012ko martxoaren 30eko txostenarekin bat, eta Lurraldearen Antolamenduari eta Hirigintzari buruzko abenduaren 20ko 35/2002 Foru Legeari eta aplikatu beharreko gainerako arauei jarraikiz, Nafarroako Gobernuak, Sustapen eta Etxebizitzako kontseilariak proposaturik,

ERABAKI DU:

1. "Cavar-1, Cavar-2, Cavar-3, Cavar-4 eta Cavar-5 izeneko parke eolikoak", Renovables de la Ribera S.L.k sustatua, Udalez gaindiko Plan Sektoriala dela adieraztea, aipatutako foru legean aurreikusitako ondorioetarako.

2. Enpresa sustatzaileari adieraztea, espedientea ebatzi baino lehen, erabaki honen "II, Hirigintzari eta lurraldeari buruz kontuan hartu beharrekoak" atalean aipatutako alderdiak erantsi beharko dizkiola proiektuari, zehaztasun maila egokiarekin.

3. Espedientea ebatzi baino lehen, sustatzaileak osatu egin beharko du hurrengo txostenekin:

-Enpresaren eta Berrikuntzaren Zuzendaritza Nagusiaren txostena, behar adinako ahalmena eta garraio sare elektrikoarekin konexioa izateari buruz.

-Udalerriari dagokion mankomunitatearena, planeamenduan ukitzen diren mankomunitateko zerbitzuei dagokienez.

4. Nafarroako Errepideei buruzko martxoaren 23ko 5/2007 Foru Legean xedatutakoaren arabera, errepideen jabari publikoaren eta zortasunaren eremuan eragina duten obrak egin baino lehen, sustatzaileak Herri Lan Zuzendaritza Nagusiaren baimena eskuratuko du.

5. Adierazpen honek ez ditu deusetan galaraziko proiektua gauzatzeko behar diren baimen guztiak.

6. Espedientea jendaurrean jartzea eta, aldi berean, entzunaldia ematea proiektuak ukitutako mugapeetako toki entitateei, hogeita hamar egun baliodunez.

Orobat, espedientea jendaurrean jartzea, epe berean, Ingurumenaren gaineko eraginaren ebaluazioaren prozeduraren ondorioetarako, Ingurumena Babesteko Esku-hartzeari buruzko 4/2005 Foru Legean ezarritakoarekin bat.

Ondorio horietarako, espedientea interesdunen eskura egonen da Sustapen eta Etxebizitza Departamentuaren bulegoetan (Alondegi kalea, 1-1. solairua; 31002 Iruña), eta epe horretan zilegi izanen da idatziz nahi adina alegazio aurkeztea.

Halaber, Ingurumen eraginaren azterlana interesdunen eskura egonen da Landa Garapen, Industria, Enplegu eta Ingurumen Departamentuaren bulegoetan (González Tablas kalea, 7; 31005 Iruña).

7. Akordio hau Nafarroako Aldizkari Ofizialean argitaratzea, eta igortzea Herri Lan Zuzendaritza Nagusira, Vianako Printzea Erakundea-Kultura Zuzendaritza Nagusira, Enpresaren eta Berrikuntzaren Zuzendaritza Nagusira, Ingurumenaren eta Uraren Zuzendaritza Nagusira, Nekazaritzako Azpiegituren Zerbitzura, Sustapen Ministerioko Trenbide Azpiegituren Zuzendaritza Nagusiko Plangintza eta Proiektuen Zerbitzura, eta jakinaraztea Ebroko Ur Konfederazioari, Iberdrola, S.A.ri, Red Eléctrica de España, S.A.ri, Acciona Energía, S.A.ri, Parque de la Naturaleza de Navarra, S.A. enpresari, Cadreitako, Valtierrako, Castejóngo eta Tuterako udalei, eta sustatzaileari, behar diren ondorioak izan ditzan.

Iruñean, 2012ko apirilaren 18an.-Nafarroako Gobernuko kontseilari eta idazkaria, Roberto Jiménez Alli.

Iragarkiaren kodea: F1206053