87. ALDIZKARIA - 2012ko maiatzaren 9a

2. NAFARROAKO TOKI ADMINISTRAZIOA

2.2. XEDAPEN ETA IRAGARKIAK, HERRIEN ARABERA ANTOLATUAK

OLTZA ZENDEA

Udal Planeko egiturazko aldaketaren hirigintza arauak, Izkueko UE-2 unitateari dagokionez

Lurraldearen Antolamendu eta Etxebizitza kontseilariak martxoaren 2an eman 9E/2012 Foru Aginduaren bidez, behin betikoz onetsi da Oltza Zendeako Udal Planean Izkueko UE-2 unitateari dagokionez aldaketa egiteko espedientea, José Javier del Castillo Pérez de Muniainek sustatua. 2012ko 71. Nafarroako Aldizkari Ofizialean argitaratu zen, apirilaren 16an.

Haren testu arautzailea argitaratzen da, Lurraldearen Antolamenduari eta Hirigintzari buruzko abenduaren 20ko 35/2002 Foru Legearen 81. artikuluan xedatuari jarraikiz.

HIRIGINTZA ARAUAK

5.-Proposatzen den aldaketa.

Proposatzen da unitatearen mugapena aldatzea, 127 C lurzatiko 948,99 m² gehiturik, eta gibeleko punta, 155,58 m²-koa, kendurik; familia bakarreko bi etxebizitza eraiki ahal izateko, baten ordez.

Unitatearen garapena determinazio hauen arabera eginen da:

Etxebizitza kopurua: 2.

Unitatearen azalera: 1.851 m².

Arauketa: 7. kalifikazioa:

  • Gutieneko lurzatia: 600 m².
  • Eraikigarritasuna: 0,45 m²s/m²l.
  • Gehieneko okupazioa: %40.
  • Lurzatiaren gutieneko fatxada: 16 metro.
  • Jabetzako mugetarainoko tartea: 3 metro edo 5 metro (non eta horrela).
  • Solairu kopurua: BS+S 1+T.
  • Beheko solairuaren gehieneko garaiera librea: 3,50 m.
  • Goiko solairuen gehieneko garaiera librea: 2,75 m.
  • Gehieneko garaiera teilatu-hegaleraino: 7 m.
  • Lerrokadurak: 18 metro, NA-7004 errepidearen ertzetik.
  • Lagapenak: 6 metro, errepidean zehar.
  • Sarbideak: ibilgailuendako sarbide bakarra, bi lurzatietarako, NA-7004tik; haren ezaugarriak urbanizazio proiektuan finkatuko dira.
  • Urbanizatzeko lanak:
  • Lagatzeko espazioaren urbanizazioa eta lurzatietarako harguneak jasoko dituzte.
  • Horien barnean dago, Egillortik heldu den goiko horniduraren linea handitzea eta erregulazio biltontzi bat eta arazteko sistema bat eraikitzea. Partez horien erantzule den aldetik, sustatzaileak parte hartuko du lanak gauzatzeko kostuan, kontsumoaren emari zenbatetsiaren heineko ehunekoan. Horiek Iruñerriko Ur Mankomunitatearen aurreikuspenen arabera gauzatuko dira; hala izatera, hitzarmena sinatuko da ukituriko alderdien artean.
  • Jarduketa sistema: konpentsazioa. Borondatezko birzatiketa.

Jatorrizko UE-2 unitatearen azaleran 155,58 m²-ko zatia gelditu da unitate berriaren mugapenetik kanpora; puska horren sailkapena izanen da lurzoru urbanizaezina, nekazaritzako produktibitate ertaineko azpikategorian, etorkiko lurzatiaren gainerakoan bezala (127. lurzatia), Udal Planari jarraikiz; hura gorde beharreko lurzoru urbanizaezinarekin parekatzen ahal da, natura aldetik ustiatzeko balioa duen lurzoruaren azpikategorian, Lurraldearen Antolamenduari eta Hirigintzari buruzko abenduaren 20ko 35/2002 Foru Legeari jarraikiz.

6.-Ekipamenduko espazio eta zerbitzukoetarako erreserbak.

35/2002 Foru Legearen 53. artikuluak, Hirigintza eta Etxebizitzaren arloan Urgentziazko Neurriak Hartzeko 6/2009 Foru Legeak aldatu baitzuen, erreserba hauek ezartzen ditu ekipamenduko espazio eta zerbitzukoetarako:

-Espazio libre publikoak, sistema orokorrekoak:

  • Izkue sistema orokorreko espazio libre publikoen erreserbatik aparte geldituko da, 500 biztanle baino gutiagoko jendegunea izateagatik.

-Espazio libre publikoak, tokikoak:

  • Unitateak, hasiera batean, ekipamendu publikoetarako lurren erreserba aurreikusi behar du; gutienez ere 50 m² izanen dira bizitegitarako 115 m² eraikitik. Hala ere, lagapen hauek murrizten ahal dira, arrazoiak emanez gero, 500 biztanle baino gutiagoko jendeguneetan.
  • Indarra duen Udal Planak ez zuen espazio erreserbarik jaso ekipamendu eta dotazio komunitarioetarako, unitate tikia zelako; 6 metroko zabalera duen lagapena baizik ez zuen kontuan hartu, bere aitzinalde osoan, espazio libre, aparkaleku eta abarretarako.
  • Proposatzen den aldaketak bere horretan uzten du aitzineko irizpidea, lagapena luzatuz hirilurzoruko aitzinalde handituan, etxebizitza bat gehiago jasotzen baita. Lurraldearen Antolamenduko Departamentuak ere bere gain hartzen du irizpide hori, bere txostenean deus ez baita erraten horren kontra.
  • Hala ere, unitatearen lagapena 366,43 m² da eta haietatik aparkalekutako azalera kenduta (60 m², nonbait hor) unitatearen %12,01 gelditzen da espazio libreetarako, 20 m² baino gehiago baita 100 m² eraikitik (229,59 m²).

-Aparkalekuak:

  • Legeak aparkalekuetarako egiten duen aurreikuspenaren arabera, bi plaza jarriko dira sestra gaineko edozein erabileratarako 100 m² eraikitik, garajeetarako tokia kenduta; erabilera publikoko espazioetan gutienez 0,7 plaza jarriko da etxebizitza bakoitzeko.
  • Eraikinaren barnean aurreikusia dago garaje plaza bat egitea; horretarako 40 bat m² izanen dira. Lurzatiaren aitzinaldean lagatzeko espazioan, etxebizitza bakoitzeko gutienez ere aparkatzeko plaza bat erreserbatzeko bezainbat leku dago; hori urbanizazio proiektuan definituko da. Etxebizitzaren luze-zabalen kariaz aparkatzeko plaza gehiago behar badira, lurzatiaren barnean aparkatzeko plaza gehiago paratzeko bezainbat leku dago.
  • Unitatearen luze-zabalen eta lurzoru motaren kariaz, ez da beharrezkoa espaziorik erreserbatzea hezkuntza edo osasun arloko ekipamenduetarako.

7.-Etxebizitza babesturako erreserba.

35/2002 Foru Legearen 52. artikuluak (etxebizitzaren gaineko determinazioak) behartzen du bizitegitarako ahalmen berriaren %50 babes publikoaren araubideren baterako izatera; gutienez ere aurreikuspen horren erdiak babes ofizialeko etxebizitzetarako izanen dira.

Aldaketaren ondorioz, etxebizitza bat gehiago izanen da, eta erabilera propiorako; beraz, ez da posible erreserba hori aplikatzea.

8.-Oztopo Fisikoei buruzko 4/1988 Foru Legearen Erregelamenduaren justifikazioa.

Sektorearen diseinua egin da kontuan harturik lurzatien topografia eta Oztopo fisiko eta zentzumenezkoei buruzko uztailaren 11ko 4/1988 Foru Legea garatzeko Erregelamendua (154/1989 Foru Dekretua).

Antolamenduaren oinarria da lagatzen den lurzatiaren aitzinaldearen urbanizazioa, Udal Planak aurreikusten duena luzaturik; hura eginen da gutxitu fisiko eta sentsorialen joan-etorria oztopatzen ahal duen elementurik gabe.

Oltza Zendean, 2012ko apirilaren 16an.-Alkatea, Pedro Mª Azparren Ocaña.

Iragarkiaren kodea: L1205913