1. NAFARROAKO FORU KOMUNITATEA
1.7. BESTELAKOAK
56E/2012 EBAZPENA, maiatzaren 17koa, Ingurumen Kalitatearen Zerbitzuko zuzendariak emana, Ingurumen ukipenetarako baimena ematen duena, zenbait baldintzarekin, Zangozako Bocarral alderdian betetze eta egokitze lana egiteko proiekturako. Sustatzailea Excavaciones y Nivelaciones Aibar, S.L. da.
Xedea: ebazpena.
Erreferentzia: Espediente kodea: 0001-0015-2011-000099.
Unitate kudeatzailea: Ingurumenaren eta Uraren Zuzendaritza Nagusia.
Ingurumen Kalitatearen Zerbitzua.
Ingurumenaren gaineko Eragina Aztertzeko Atala.
González Tablas, 9-31005 Iruña.
Telefonoa: 848 427625.
Posta elektronikoa: secevamb@cfnavarra.es.
-Espedientea:
Ingurumen ukipenetarako baimena.
Jarduera: Zangozako Bocarral alderdian betetze eta egokitze lana egitea.
IBEHFL Erregelamenduaren eranskina: 2C-Ingurumen ukipenen baimenaren mende dauden jarduerak eta proiektuak.
Herria: Zangoza. Udalerria: Zangoza.
Sustatzailea: Excavaciones y Nivelaciones Aibar, S.L.
Eskaeraren data: 2011ko urriaren 25a.
2011ko urriaren 25ean Ingurumen Kalitatearen Zerbitzuan sartu zen goian aipatutako espedienteari dagokion Ingurumen ukipenetarako baimena lortzeko eskaera, Excavaciones y Nivelaciones Aibar, S.L.k sustaturik. Espedientea abenduaren 28ko 93/2006 Foru Dekretuaren 2C eranskineko O atalean sartuta dago. Beraz, Ingurumen ukipenetarako baimena behar du. Foru dekretu horrek Ingurumena Babesteko Esku-hartzeari buruzko martxoaren 22ko 4/2005 Foru Legea garatzeko Erregelamendua onetsi zuen.
Jarduera horren bidez, obra-hondakindegi batean betelana eginen da eta bukaeran larre gisa erabiltzeko egokituko da. Zangozako 4. poligonoko 999., 997. eta 40. lurzatietan izanen da.
Dokumentazioa azterturik, 2011ko azaroaren 2an errekerimendua egin zen informazio osagarria emateko; haren bidez adierazi zen hasiera batean egin nahi zen jarduera (inerteen zabortegia, lehengoratzeko) martxoaren 28ko 23/2011 Foru Dekretuaren bidez araututa dagoela. Dekretu horren bidez, Nafarroako Foru Komunitateko lurraldean eraikuntza eta eraispenetako hondakinen sorrera eta kudeaketa arautzen dira, eta halako isurketa batek bete behar dituen baldintzak azaltzen dira.
Errekerimendua 2012ko urtarrilaren 10ean zuzendu zen, izan ere, sustatzaileak uko egin zion eraispenetako eta eraikuntzako hondakinak erabiltzeari. Gai arriskutsuez kutsatuta ez dauden lur eta harriak erabiliko dira lehengoratze topografikoa egiteko.
Betelanak 21.874 m²-ko azalera hartuko du, eta 4.913,9 m³ lur erabiliko da horretan. Eremua egokitu, hondakinak bota eta amaierako lehengoratzea egiteko kalkulatu den epea 2 urte baino gutxiagokoa da.
Abenduaren 28ko 93/2006 Foru Dekretuaren 36. artikuluak ezartzen du Ingurumen, Lurraldearen Antolamendu eta Etxebizitzako kontseilariak arrazoituz ebatziko duela Ingurumen ukipenetarako baimena eman edo ukatzeari buruz.
Foru dekretu horren 31.2 artikuluak ezartzen du Ingurumen ukipenetarako baimenak lurzoru urbanizaezinean baimentzen ahal diren jardueretarakoa ere bilduko duela, eta horrek Lurraldearen Antolamenduari eta Hirigintzari buruzko abenduaren 20ko 35/2002 Foru Legearen 117. artikuluan ezarritako ondorioak izanen ditu.
Eskaera Zangozako Udalari igorri zaio, abenduaren 28ko 93/2006 Foru Dekretuaren 35. artikuluan xedatutakoarekin bat.
Espedientean dauden txostenak ikusirik eta Ingurumenaren eta Uraren zuzendari nagusiaren irailaren 13ko 1436/2011 Ebazpenaren bidez eskuordetutako eskumenak erabiliz,
EBATZI DUT:
1. Ingurumen ukipenetarako baimena ematea, zenbait baldintzarekin, Zangozako Bocarral alderdian betetze eta egokitze lana egiteko proiekturako. Sustatzailea Excavaciones y Nivelaciones Aibar, S.L. da.
2. Baimena neurri zuzentzaile hauek betetzearen baldintzapean egonen da:
-Hondeaketako lur eta harri garbiak soilik onartuko dira betelanerako.
-Lurrak botatzen hasi aurretik azalerak modu argian seinalizatu eta mugatuko dira. Hondakinak botatzeko eremurako sarbidea itxita egonen da hondakindegian lanean aritzen diren ordutegitik kanpo.
-Proiektuan proposatutako betetze-kotak errespetatuko dira, inola ere gainditu gabe 434 m s.n.m. kota, NA-127 errepidearena alegia.
-3 m-ko zerrenda errespetatuko da Zangozako Camino Viejo eta errepide aldera, botatzen diren lurrekin okupatu gabe.
-Botatzen diren materialak 1-2 m-ko geruzen bidez zabalduko dira, egokitutako azalera guztia okupatu arte, eta ongi trinkotuta utzi beharko dira.
-Malda homogeneoko azalera bakarra lortu beharko da. Horrenbestez, ez da ukitze ertzik sortuko malda ezberdineko gainazalen artean. Halakorik sortuz gero, biribildu egin beharko dira erliebe berria naturalizatzeko, batez ere lurzati mugakideak ukitzen diren tokietan.
-Goialdeko gainazalean dauden landare lurreko pilaketak azken geruza gisa hedatuko dira lur isurketak zigilatzeko xedez, ondoren lurra lantzeko, harriak kentzeko eta lurrak larre erabilerarako prestatzeko.
-Jarduketa egiteko 24 hilabeteko epea izanen da gehienez, baimena emateko ebazpena Nafarroako Aldizkari Ofizialean argitaratzen denetik hasita.
-Kamioiek hondatutako sarbideak konpondu eginen dira.
-Obra hondakinik gabe utzi beharko da eremu guztia.
3. Proiektuaren Ingurumen ukipenetarako baimena eskuratzeko ezinbestekoa da 32.866 euroko fidantza jartzea, baimendutako jarduerak kalterik sortzen badu haiek lehengoratu edo gutxituko direla bermatzeko.
4. Baimen honek, gainera, Lurraldearen Antolamenduari eta Hirigintzari buruzko abenduaren 20ko 35/2002 Foru Legearen 117. artikuluan ezartzen diren ondorioak izanen ditu. Artikulu horretan, lurzoru urbanizaezinean egin behar diren jarduerak baimentzeko prozedura ezartzen da.
5. Ebazpen honek ez du administrazio bidea amaitzen, eta espedientean interesa dutenek, administrazio publikoek izan ezik, horren kontra gora jotzeko errekurtsoa jar dezakete, Nafarroako Gobernuari zuzendua, hilabeteko epean.
Administrazio publikoek zilegi dute administrazioarekiko auzi-errekurtsoa jartzea, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean. Horrek ez du galarazten Nafarroako Gobernuan aldez aurreko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean.
Epeak ebazpen hau jakinarazi eta biharamunetik hasita kontatuko dira.
6. Ebazpen hau Nafarroako Aldizkari Ofizialean argitaratzea.
7. Ebazpen hau Lurraldearen Antolamendu eta Hirigintza Zerbitzuari, Zangozako Udalari, Tafalla-Zangoza aldeko Basozaintzari eta interesdunari igortzea, behar diren ondorioak izan ditzan.
Iruñean, 2012ko maiatzaren 17an.-Ingurumen Kalitatearen Zerbitzuko zuzendaria, Pedro Zuazo Onagoitia.
Iragarkiaren kodea: F1207845
