64. ALDIZKARIA - 2011ko apirilaren 1a

1. NAFARROAKO FORU KOMUNITATEA

1.4. DIRU-LAGUNTZAK, LAGUNTZAK ETA BEKAK

418/2011 EBAZPENA, martxoaren 15ekoa, Osasuneko zuzendari nagusiak emana, Osasun Departamentuak 2011. urtean sustatuko dituen ikerketa-proiektuak arautuko dituzten baldintzak ezartzen dituena.

Osasun Departamentuak beharrezkotzat jotzen du Osasun Zientzien arloko ikerketa sustatzea Nafarroan, Ikerketa Zientifiko eta Teknikoa Sustatu eta Koordinatzeari buruzko apirilaren 14ko 13/1986 Legeak, Osasun Sistema Nazionalaren Kohesio eta Kalitateari buruzko maiatzaren 28ko 16/2003 Legeak eta Ikerketa Biomedikoari buruzko uztailaren 3ko 14/2007 Legeak ezarritako esparruan, eta Osasunari buruzko azaroaren 23ko 10/1990 Foru Legearen Hamargarren Tituluan, "Osasunaren irakaskuntza eta ikerketa" izenekoan, aurreikusitakoa betetzeko.

Otsailaren 24ko 45/2005 Foru Dekretuaren bidez, Osasunaren Irakaskuntza eta Garapen Zerbitzuaren esku utzi zen Osasun Departamentuak emandako finantzaketaren bidez gauzatzen den ikerketa biomedikoaren deialdiaren kudeaketa. Foru dekretu horren bidez, Osasun Departamentuaren egitura organikoa ezarri zen.

Ebazpen honen helburua da 2011. urtean ikerketa-proiektuak sustatzea diziplina biomediko oinarrizkoetan, klinikoetan, epidemiologikoetan eta osasun publikoaren eta osasun zerbitzuen arloetan, osasunean eta Nafarroako Osasun Sisteman eraginik handiena duten arloetan, zentro eta ezagutza-arlo ezberdinetako profesionalen arteko lankidetza sustatzeko.

Osasunaren Irakaskuntza eta Garapen Zerbitzuko zuzendariak igorritako txostena aztertuta, eta Ogasuneko kontu-hartzaile delegatuak aurreikusitako gastua (528.001,00 euro) egotziko zaion aurrekontu-aplikazioa onetsita, bidezko da Osasun Departamentuak 2011. urtean sustatuko dituen ikerketa-proiektuak arautuko dituzten baldintzak onestea.

Proiektu horiei dagokien gastua urte anitzekoa denez, eta Nafarroako Ogasun Publikoari buruzko apirilaren 4ko 13/2007 Foru Legearen 40. artikuluan xedaturikoa betetzeko, Nafarroako Gobernuak, 2011ko otsailaren 28an egindako bilkuran, urte anitzeko finantzaketa baimendu zuen.

Adierazitakoarekin bat, eta Nafarroako Foru Komunitateko Administrazioari buruzko abenduaren 3ko 15/2004 Foru Legearen 22.1 artikuluak ematen dizkidan eskudantziak erabiliz,

EBATZI DUT:

1. Osasun Departamentuak 2011. urtean sustatuko dituen ikerketa-proiektuak arautuko dituzten baldintzak onestea, ebazpen honen I. eta II. eranskinetan xedatutakoari jarraikiz.

2. Guztira 528.001,00 euroko gastua baimentzea, proiektuen deialdia finantzatzeko, honela banatuta:

-284.001,00 euro, 2011ko ekitaldiko Nafarroako Aurrekontu Orokorren "Osasun Zientzietako ikerketa-proiektuak" izeneko 512002 51340 6092 465102 kontu-sailaren kargura.

-163.000,00 euro, 2012. urteko aurrekontu ekitaldiari dagokion kontu-sailaren kargura, aurrekontuan behar adinakoa eta egokia den krediturik baldin badago.

-81.000,00 euro, 2013. urteko aurrekontu ekitaldiari dagokion kontu-sailaren kargura, aurrekontuan behar adinakoa eta egokia den krediturik baldin badago.

Halaber, 2011, 2012 edo 2013ko ekitaldietan kontu-sail horretan diru erabilgarri gehiago izanez gero, deialdian hasieran aurreikusitakoari gehitzen ahalko zaio.

3. Ebazpen hau igortzea Osasun Departamentuko Idazkaritza Tekniko Nagusira, Osasunaren Irakaskuntza eta Garapen Zerbitzura, Laguntzak eta Diru-Laguntzak Kudeatzeko Atalera eta Kontabilitate Bulegora.

4. Ebazpen hau eta eranskinak Nafarroako Aldizkari Ofizialean argitaratzeko agintzea, behar diren ondorioak izan ditzaten.

5. Ebazpen honen aurka gora jotzeko errekurtsoa jartzen ahalko da, Osasuneko kontseilariari zuzendua, argitaratu eta biharamunetik hilabeteko epean.

Iruñean, 2011ko martxoaren 15ean.-Osasuneko zuzendari nagusia, Isabel Martín Montaner.

I. ERANSKINA

Oinarri arautzaileak

1. Modalitateak eta xedea.

Osasun Departamentuak Osasun Zientzietako ikerketa-proiektuak sustatuko ditu 2011. urterako, modalitate hauen arabera:

-A) modalitatea. Oinarrizko ikerketa. Halakotzat joko da gizakiaren eritasunei buruzkoa, ebazpen honen II. eranskinean jasotako zehaztapenekin.

Modalitate honetan, gehienez ere bi proiektu sustatuko dira. Hoberenari, kalitateagatik hala merezi badu, "Ortiz de Landázuri Beka" izena emanen zaio, eta bigarrenari "akzesit" kalifikazioa emanen zaio.

-B) modalitatea. Ikerketa klinikoa. Halakotzat joko da pazienteari zuzendutakoa, ikerketa klinikoa, epidemiologikoa, osasun publikoan eta osasun zerbitzuetan egindakoa, Foru Komunitatearentzat interesekoak diren arloetan eta, bereziki, ebazpen honen II. eranskinean lehentasunezko arlo gisa agertzen direnetan.

Horretaz gainera, lehentasuna emanen zaie masa kritiko ikertzaile gutxi duten eta osasun sisteman garrantzitsuak diren programei, hala nola, oinarrizko osasun laguntzako ikerketari.

Aipatutako II. eranskineko B) modalitateko "Osasun Sistemaren garapena"ri buruzko ikerketa-proiekturik hoberenari, haren kalitatearengatik hala merezi badu, "Mikel Larumbe Zazu Beka" izena emanen zaio.

2. Prozedura antolatu, instruitu eta ebazteko ahalmena duten organoak.

Oinarri hauetan ezarritako ondorioetarako, Osasun Departamentuko Osasunaren Irakaskuntza eta Garapen Zerbitzuko Laguntzak eta Diru-laguntzak Kudeatzeko Atalari esleituko zaizkio proiektuak onartzeko prozedura antolatu eta instruitzeko eginkizunak. Instrukzio organoak batzorde teknikoaren irizpenari jarraikiz ebazpen proposamena eginen du, zazpigarren oinarriarekin bat. Oinarri arautzaile hauetan "instrukzio organoa" aipatzen denean, ulertzen da Laguntzak eta Diru-laguntzak Kudatzeko Atalaz ari direla.

Diru-laguntzak emateko prozedura ebazteko eskumena Osasuneko zuzendari nagusiari dagokio.

3. Eskatzaileak.

Ikerketa-proiektuak proposatzen ahalko dituzte, ikertzaile nagusi gisa, erabilera publikoko sareko osasun zentroei eta Nafarroako unibertsitateei atxikitako pertsonek. Halaber, Nafarroan kokatutako irabazi-asmorik gabeko beste erakunde publiko edo pribatu batzuetako ikertzaileek ere proposatzen ahalko dituzte.

Ikertzaile nagusia ezin izanen da Osasun Departamentuak finantzatutako proiektu batean baino gehiagotan agertu. Taldekide guztiek, baita ikertzaile nagusiak ere, debekatua izanen dute abian diren bi proiektutan baino gehiagotan aldi berean aritzea.

Prestakuntza espezializatua hartzen ari diren profesionalak ez dira proiektuko ikertzaile nagusi izaten ahalko, baina bai, ordea, ikerketa taldeko kide.

4. Eskaerak.

4.1. Eskaerak agiri hauek bilduko ditu:

1. agiria. Ikertzaile nagusiak eta, proiektua zein zentrotan edo erakundetan egiten den, bertako legezko arduradunak sinatutako eskabidea. Proiektua hainbat zentrotan gauzatzen bada, zentro parte-hartzaile bakoitzak bete beharko du eskabidea eta bakoitzaren legezko arduradunak sinatu. Erreferentziako zentroa ikertzaile nagusiarena izanen da.

II. eranskineko sailkapenaren arabera, eskabide guztietan Ebaluazio eta Prospektiba Agentzia Nazionalean dagokien arloa azalduko da, ebaluazioari begira. Orobat, kasu guztietan, A modalitateari (Oinarrizko ikerketa) edo B modalitateari (Ikerketa klinikoa, epidemiologikoa, osasun publikokoa eta osasun zerbitzuetan) dagokion atala beteko da.

B modalitateko eskabideen kasuan, gainera, proiektuari dagokion lehentasunezko arloa adieraziko da, II. eranskinarekin bat.

2. agiria. Ikerketa-proiektuaren memoria.

3. agiria. Ikertzaile nagusiaren curriculum vitaea eta gainerako taldekideen curriculumen laburpena, proiekturako interes handieneko alderdiak zein diren adierazita. Horretarako, eskura dagoen eredu normalizatua erabiliko da bakarrik, 4.2 atalean xedatutakoari jarraikiz.

4. agiria. Txosten bat, zentroko edo erakundeko zuzendariak sinatua. Horren bidez, talde ikertzaileari proiektua gauzatzeko baimena emanen zaio, eta zehaztuko da zenbat ordu kontatuko diren horretarako ikertzaileen lanaldian, eskatzen diren ordu guztien artetik. Proiektuak hainbat zentrotan gauzatzen badira, zentro parte-hartzaile bakoitzeko zuzendariak bete eta sinatutako txostena beharko da.

5. agiria. Ikerketa zein zentrotan egiten den, zentro horretako Ikerketa Batzordeak emandako txostena, bertan proiektuaren bideragarritasuna adierazita. Ikerketa batzorderik ez badago, txostena zentroko edo erakundeko zuzendaritzak eginen du. Proiektuak hainbat zentrotan gauzatzen badira, zentro parte-hartzaile bakoitzeko batzordeak egindako txostena beharko da.

6. agiria. Ikertzaile nagusia zein zentrotan ari den, bertako Ikerketarako Etika Batzordeak egindako txostena. Zentroan Ikerketarako Etika Batzorderik ez badago, Nafarroako Foru Komunitateko Ikerketa Klinikorako Etika Batzordeak eginen du ebaluazioa. Saio kliniko bat izanez gero, Nafarroako Foru Komunitateko Ikerketa Klinikorako Etika Batzordeak eta Osasun, Berdintasun eta Politika Sozialeko Ministerioko Botiken eta Osasun Produktuen Agentzia Espainiarrak txosten bana egin beharko dute. Azken txosten hori eskabidearen ondoren aurkezten ahalko da, baina 2011ko azaroaren 15a baino lehen, ezinbesteko betebeharra baita da onarpenaren agiria formalizatzeko.

7. agiria. Erantzukizuneko aitorpena, zerga betebeharrak eta Gizarte Segurantzarekikoak egunean izatearena.

4.2. Agiri normalizatuak Osasunaren Irakaskuntza eta Garapenaren Zerbitzuko Laguntzak eta Diru-laguntzak Kudeatzeko Atalean egonen dira eskuragarri, bai eta Interneteko www.docenciasalud.navarra.es orrian ere.

5. Eskaerak non eta noiz aurkeztu.

5.1. Eskaerak hilabeteko epean aurkeztuko dira, ebazpen hau Nafarroako Aldizkari Ofizialean argitaratu eta biharamunetik hasita, dagokion eguneko 14:30 arte.

5.2. Eskabideak, ahal dela, Osasun Departamentuko Osasunaren Irakaskuntza eta Garapen Zerbitzuan (Nafarroako Ospitaleko Irakaskuntza Pabiloian) aurkeztuko dira edo Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 38. artikuluko 4. idatz-zatian aurreikusitako erregistro edo bulegoetako edozeinetan.

Posta bulegoen bidez aurkezten diren eskaeretan gutun-azala zabalik egon beharko da, lehenbiziko orrialdeko goiko aldean onarpen data eta abenduaren 3ko 1829/1999 Errege Dekretuan, posta zerbitzuak arautzen dituen horretan, aipatzen diren gainerako zehaztapenak agerraraz daitezen. Gainera, interesdunak, egokitzat jotzen badu, eskabidea igortzen duen egun berean igorpenaren berri emanen dio Osasun Departamentuko Osasunaren Irakaskuntza eta Garapen Zerbitzuari, telefax bidez edo bestelako bitarteko telematikoen bidez.

5.3. Eskabideak aipatutako baldintzak betetzen ez baditu, instrukzio organoak interesdunari eskatuko dio gehienez ere 10 egun naturaleko epean akatsak zuzen ditzala eta jakinaraziko dio, zuzentzen ez baditu, bere eskaera ezetsi eta artxibatu eginen dela, beste tramiterik gabe.

6. Proiektuen onarpena.

Batzorde tekniko batek eskaerak baloratu, eta proiektuak onartzeko proposamena eginen du. Batzorde hori Osasuneko zuzendari nagusiak izendatuko du eta kide hauek izanen ditu:

-Deialdiko kudeaketarekin lotutako bi pertsona.

-Nafarroako Osasun Sistemako ikerketa batzordeetako bi kide.

-Ikerketan adituak diren lau pertsona.

7. Eskaeren balorazioa.

Batzorde teknikoak baloratuko du proiektuak eskatutako modalitatera egokitzen ote diren. Eskaerak ezetsiko ditu, edo proiektuaren gaira hobeki egokitzen den modalitatean sartuko.

Osasunaren Irakaskuntza eta Garapen Zerbitzuko Laguntzak eta Diru-laguntzak Kudeatzeko Atalak Ebaluazio eta Prospektiba Agentzia Nazionalera igorriko ditu onarturiko proiektuak, balora ditzaten. Ebaluazio hori Batzorde Teknikoaren esku utziko da, eta batzorde horrek proiektuak onartzeko proposamena eginen du, irizpide hauek baloratu ondoren:

1) Proiektuaren kalitatea, interes zientifikoa eta bideragarritasuna, Ebaluazio eta Prospektiba Agentzia Nazionalak emandako balorazio txostenaren arabera.

2) Proiektua deialdi honen xedeetara egokitzen den, alderdi hauek era positiboan baloratuz:

-Lehentasunezkotzat jotako arloekin bat datorren ebaluatzea, B modalitatearen kasuan, eta Nafarroako Osasun Sisteman aplikatzeko aukerak.

-Proiektua egokitzen ote zaion ikertzaile taldeak finkaturik duen ikerketa ildoari. Hori baloratzeko, ikertzaileen argitalpenek izan duten garrantzi zientifikoa aztertuko da. Ikertzaile talde berriek egindako proposamenak ere aintzat hartuko dira, ikerketarako metodologiari buruzko prestakuntza dutela frogatzen badute, proposaturiko helburuak beteko direla bermatzea badago eta deialdiko gainerako irizpideak betetzen badituzte. Ondorio horietarako, talde berritzat joko da ikertzaile nagusitzat aurretik beste ikerketa-proiektu batean ikertzaile nagusi gisa parte hartu ez duen ikertzailea duen taldea.

-Osasun Departamentuaren deialdietan ikertzaile nagusiari lehenago onarturiko proiektuetan helburuak lortu izana.

-Proiektuan zentro eta laguntza maila desberdinak lankidetzan aritzea eta diziplina anitzeko ikerketa taldeak izatea.

-Osasun Zientzietan ikerketa sustatzeko beste agentzia batzuek, ofizialki aitortuek, egiaztatutako kofinantzaketa.

-Ezarritako finantza baliabideak proiektuan proposatutako helburuetara egokitzea.

8. Ikerketa-proiektuen onarpena eta formalizazioa.

Osasuneko zuzendari nagusiak, ebazpen bidez, eta Batzorde Teknikoak eginiko proposamen arrazoituari jarraikiz, Osasun Departamentuak sustatuko dituen ikerketa-proiektuak zehaztuko ditu, berari eskatzen zaizkionen artean; zenbatekoa, gastu kontzeptuak eta urte bakoitzeko diru-kopurua adierazi beharko ditu.

Ebazpena eskatzaile guztiei jakinaraziko zaie, bai ikertzaile nagusiari bai, ikerketa zein zentrotan gauzatzen den, bertako zuzendariari, eta jendaurrean paratuko da, Osasunaren Irakaskuntza eta Garapen Zerbitzuko iragarki oholean, bai eta Interneteko www.docenciasalud.navarra.es web orrian ere.

Ikertzaile nagusiarentzako jakinarazpenari onarpen agiria, finantzaketaren aurretik formalizatu beharrekoa, erantsiko zaio. Hori behar bezala beteko da eta aipatutako Osasunaren Irakaskuntza eta Garapen Zerbitzuko Laguntzak eta Diru-Laguntzak Kudeatzeko Atalera igorriko da.

Proiektua onartzen ez bada, eskabidearekin batera aurkeztutako dokumentazioa berreskuratzeko epea hilabete batekoa izanen da, jakinarazpena jasotzen denetik aurrera.

Amaierako memoria, Osasun Departamentuak aurretik finantzatutako proiektuen gastuen justifikazioa barne, aurkezten ez duten ikertzaile nagusiek ezin izanen dute proiektu gehiago formalizatu.

9. Finantzaketa.

9.1. Ikerketa-proiektuetarako finantzaketa ez da 30.000,00 eurotik gorakoa izanen proiektu bakoitzeko eta urteko, eta proiektuak sortutako gastuak finantzatzeko izanen da, osorik edo hein batean.

Kontzeptu hauek finantzatzen ahalko dira:

9.1.1. Proiektua gauzatzeko behar diren langile teknikoak (parte hartzen duten erakundeetako funtzionarioak, estatutupekoak eta lan-kontratudunak izan ezik), aurreikusten den denbora osoan edo zati batean proiektuan aritzen ahalko direnak, kontratatzeko gastuak. Kontzeptu horregatik 18.920,00 euro finantzatuko dira urtean gehienez, 37.840,00 euroko gehieneko zenbatekoa proiektu bakoitzeko. Zenbateko horien barnean sartuta daude Gizarte Segurantzaren kuotak.

9.1.2. Proiektua gauzatzeko gastuak, honakoak barne: proiektua gauzatzeko ezinbesteko material inbentariagarria, eskura ez dagoena; material suntsigarria; eta zerbitzu profesionalak. Komeni da orduen edo eginiko lan unitateen arabera zenbatzea (inkestak, aholkularitzak, eta abar). Gainera, gastu osagarriak ere eska daitezke, horien ezagaurriak direla-eta, aurreko ataletan sar ez daitezkeenak. Kasu guztietan, gastuak behar bezala justifikatuko dira eta beharrezkoak izanen dira, proiektuaren helburua lortzearren.

Proiektuari emaniko zenbatekoa %15 gehituko da, kudeaketa gastuengatik. Zenbateko hori justifikatu egin beharko da.

9.2. Proiektuen iraupena, gehienez, Nafarroako Ogasun Publikoari buruzko apirilaren 4ko 13/2007 Foru Legearen 40. artikuluan inbertsioetarako ezarritakoa izaten ahalko da, bertan ezarritako baldintzak zehatz-mehatz beteta.

9.3. Ez zaie ikertzaile taldeko kideei ordainduko.

10. Proiektuaren kudeaketa.

10.1. Proiektuaren kudeaketa ikertzaile nagusiaren ardura da. Nolanahi ere, ikertzaile nagusiak komenigarritzat jotzen badu, entitate kudeatzaile batekin lankidetza-hitzarmen bat sinatzen ahalko du.

10.2. Ikertzaile nagusiak lankidetza-hitzarmena sinatu nahi badu entitate kudeatzaile batekin, Nafarroako Gobernuaren eta haren erakunde autonomoen mendeko zentroetako ikertzaileen kasuan, entitate kudeatzailea Miguel Servet fundazioa izanen da. Baldintza hori betetzen ez duten proiektuen kasuan, entitate kudeatzaileak, ikertzaile nagusia zein zentrotakoa den, horretara lotuta egon beharko du.

10.3. Beharrezkoak diren langile teknikoak, Nafarroako Gobernuko eta haren erakunde autonomoetako ikertzaileen proiektuetarako kontratatuko direnak, Miguel Servet fundazioaren bidez kontratatuko dira.

Kasu guztietan, langile teknikoak kontratatzen dituen entitate kudeatzaileak, proiektua zein zentrotan edo erakundetan gauzatzen ari den, bertako zuzendaritzari jakinaraziko dio.

11. Pagatzeko prozedura.

11.1. Proiektuari esleitzen zaion zenbatekoa ikertzaile nagusiari ordainduko zaio bankuko kontuan. Kontu horretan titular gisa agertu behar du, eta dirua zein proiektutarako den adieraziko da.

Proiektuaren kudeaketarako lankidetza-hitzarmenik bada ikertzaile nagusiaren eta entitate kudeatzaile baten artean, entitate horri eginen zaio ordainketa.

11.2. 2011. urteko ekitaldiari dagokion zatia osorik ordainduko da onarpen agiria eta, kasua bada, ikertzaile nagusiaren eta entitate kudeatzailearen arteko lankidetza-hitzarmena (10.1), formalizatu ondoren.

11.3. Hurrengo aurrekontu ekitaldietarako onetsitako finantzaketa urteko ordainketa baten bidez gauzatuko da, Laguntzak eta Diru-laguntzak Kudeatzeko Atalak urteko memoria (12.3) aztertu ondoren. Atal horrek ordaintzeko proposamena igorriko du, bertan egiaztatuta finantzaketaren xedeak bete direla.

11.4. Proiektuari egotz dakizkiokeen gastuak erregularizatuko dira proiektua bukatzean eta amaierako memoria aurkeztean.

12. Proiektua gauzatzea.

12.1. Proiektua deialdi honetan eta ikertzaile nagusiak eta Osasuneko zuzendari nagusiak sinatzen duten onarpen agirian aurreikusitako terminoetan garatuko da.

12.2. Aurreikusitako garapen horretan gertatzen den aldaketa oro jakinarazi egin beharko zaio Osasunaren Irakaskuntza eta Garapen Zerbitzuko Laguntzak eta Diru-laguntzak Kudeatzeko Atalari.

Proiektua garatzean, beharrezkotzat jotzen bada gastu mota ezberdinei esleitutako zenbateko partzialetan aldaketak egitea, proiektuari emandako zenbateko osoa gainditu gabe, proiektuaren ikertzaile nagusiak eskatu beharko du, idatziz eta behar bezala arrazoituz. Eskaera hori Osasunaren Irakaskuntza eta Garapenaren Zerbitzuko Laguntzak eta Diru-laguntzak Kudeatzeko Atalean aurkeztuko da, eta horrek, kasua bada, eskatutako aldaketa baimenduko du.

Egindako lana aurreikusitako garapenari ez zaiola egokitzen frogatzen bada, Osasuneko zuzendari nagusiak, Osasunaren Irakaskuntza eta Garapen Zerbitzuko Laguntzak eta Diru-laguntzak Kudeatzeko Atalak egindako txosten arrazoitua ikusita, bertan behera uzten ahalko du proiektuaren finantzaketa, izan daitezkeen erantzukizunak ezertan galarazi gabe.

12.3. Urte bakoitzeko azaroaren 15a baino lehen, ikertzaile nagusiak emaitza teknikoei eta aurrekontuaren gauzatzeari buruzko urteko memoria eguneratua eta laburbildua aurkeztu beharko du, Osasunaren Irakaskuntza eta Garapen Zerbitzuko Laguntzak eta Diru-laguntzak Kudeatzeko Atalean. Gastu guztiak justifikatuko dira jatorrizko agirien bidez (gero itzultzen ahalko dira, interesdunak eskatuta, behar diren egiaztapenak egin ondoren), edo ikertzaile nagusiak eta entitate kudeatzaileko zuzendariak sinatutako fakturak aurkeztuz (halakoetan, bidezkoa bada, jatorrizko fakturak eskatzen ahalko dira).

Kudeaketa ekonomikorako lankidetza-hitzarmenik bada ikertzaile nagusiaren eta entitate kudeatzailearen artean, aurrekontua gauzatzeko memoria entitateak aurkezten ahalko du.

13. Proiektuaren amaiera.

13.1. Proiektuaren onarpen agirian ageri den ikerketa amaitzeko dataren ondoko hilabetean, ikertzaile nagusiak amaierako memoria igorriko du Osasunaren Irakaskuntza eta Garapen Zerbitzuko Laguntzak eta Diru-laguntzak Kudeatzeko Atalera, xehetasun hauekin:

a) Memoria tekniko xehatua. Egokitzat jotzen denean, argibide osagarriak eskatzen ahalko dira.

b) Proiektuaren laburpena, 2 orrikoa gehienez (ez da beharrezkoa bibliografia aurkeztea). Laburpen hori Osasun Departamentuaren "Anales del Sistema Sanitario de Navarra" izeneko aldizkarian argitaratzen ahalko da, Osasun Departamentuak baimendutako proiektuen sailean.

c) Memoria ekonomikoa, non izandako gastuak justifikatuko baitira emandako finantzaketari dagokionez. Gastu guztiak justifikatuko dira jatorrizko agirien bidez (gero itzultzen ahalko dira, interesdunak eskatuta, behar diren egiaztapenak egin ondoren), edo ikertzaile nagusiak eta, kasua bada, entitate kudeatzaileko zuzendariak sinatutako fakturen eta gastuen zerrenda aurkeztuz (halakoetan, bidezkoa bada, jatorrizko fakturak eskatzen ahalko dira).

Kudeaketa ekonomikorako lankidetza-hitzarmenik bada ikertzaile nagusiaren eta entitate kudeatzailearen artean, aurrekontua gauzatzeko memoria entitateak aurkezten ahalko du.

Edonola ere, Osasunaren Irakaskuntza eta Garapen Zerbitzuko Laguntzak eta Diru-laguntzak Kudeatzeko Atalari dagokio behar diren ikuskapenak egitea eta bidezko erregulazioak proposatzea.

13.2. Proiektuaren garapenak eskatzen badu, ikertzaile nagusiak Laguntzak eta Diru-laguntzak Kudeatzeko Atalean amaierako memoria aurkezteko epea luzatzeko eskatzen ahalko du, behar bezala arrazoituta.

13.3. Proiektuaren amaieran, finantzatutako material inbentariagarria Osasun Departamentuak bere beharren arabera erabiliko du.

13.4. Material bibliografikoa proiektua egin duen zentro edo erakundearen esku geratuko da, proiektuaren amaieran.

14. Konpromiso osagarriak.

14.1. Finantzaketa onartzeak ebazpen honetan ezarritako baldintzak onartzea dakar ikertzaile taldearentzat.

14.2. Deialdi honetan eta aplikatzekoak diren beste arauetan ezarririko betebeharrak edo proiektua onartzeko agirian ezarririko baldintzak erabat edo hein batean bete ezik, proiektua bertan behera utzi eta kobraturiko dirua itzuli beharko da, izan litekeen erantzukizuna deusetan ukatu gabe.

14.3. Proiektua gauzatzeko tokia izanen den zentroak edo erakundeak hirugarrenek eta zentroak berak proiektua gauzatzearen ondorioz izan ditzaketen arriskuetarako estaldura izan behar du, proiektuari lotuta sortzen ahal diren egoerei begira.

14.4. Ikerketa-proiektu horretarako beste edozein motatako laguntzarik edo diru-laguntzarik eman baldin bada, horren berri eman beharko zaio Osasunaren Irakaskuntza eta Garapen Zerbitzuko Laguntzak eta Diru-laguntzak Kudeatzeko Atalari, Osasun Zuzendaritza Nagusiari jakinaraz diezaion. Azken horrek ikerketa proiektuari diru-laguntza emateko baldintzak aldatzen ahalko ditu.

14.5. Ikerketa-proiektuek honako hauek bete beharko dituzte: Helsinkiko Adierazpenean, giza eskubideei eta biomedikuntzari buruzko Europako Kontseiluaren Hitzarmenean eta giza genomari eta giza eskubideei buruzko UNESCOren Adierazpen Unibertsalean ezarritako oinarrizko printzipioak, bai eta Ikerketa Biomedikoari buruzko uztailaren 3ko 14/2007 Legean, Datuak Babesteari buruzko abenduaren 13ko 15/1999 Lege Organikoan eta ikerketa biomedikoaren arloan aplika daitezkeen gainerako arauetan ezarritako baldintzak ere.

14.6. Animaliekin saiakuntzak egiten dituzten proiektuek indarra duen araudian ezarritakoa bete beharko dute eta, bereziki, Saiakuntzak egiteko eta beste helburu zientifiko batzuetarako erabiltzen diren animalien babesari buruzko urriaren 10eko 1201/2005 Errege Dekretuan xedatutakoa.

14.7. Saiakuntza klinikoak diren proiektuek indarra duen araudian ezarritakoa bete beharko dute, Saiakuntza klinikoak egiteko arauei buruzko otsailaren 6ko 223/2004 Errege Dekretuaren arabera.

15. Gastuaren muga.

Deialdi honetan aipatzen den proiektuen finantzaketa, 528.001,00 euro bitarte, honela banatuko da:

-284.001,00 euro, 2011ko ekitaldiko Nafarroako Aurrekontu Orokorren "Osasun Zientzietako ikerketa-proiektuak" izeneko 512002 51340 6092 465102 kontu-sailaren kargura.

-163.000,00 euro, 2012. urteko aurrekontu ekitaldiari dagokion kontu-sailaren kargura, aurrekontuan behar adinakoa eta egokia den krediturik baldin badago.

-81.000,00 euro, 2013. urteko aurrekontu ekitaldiari dagokion kontu-sailaren kargura, aurrekontuan behar adinakoa eta egokia den krediturik baldin badago.

Deialdi honen xede diren proiektuak onetsi baino lehen aurreko deialdietan hitzartutako zenbatekoren bat deuseztatzen bada, zenbateko hori dagokion aurrekontuko kontu-sailari gehituko zaio, eta erabilgarri dagoen kopuru osoa proiektuak emateko beharren arabera esleitzen ahalko da.

Halaber, 2011, 2012 edo 2013ko ekitaldietan kontu-sail horretan diru erabilgarri gehiago izanez gero, deialdian hasieran aurreikusitakoari gehitzen ahalko zaio.

II. ERANSKINA

I. Osasun Departamentuaren arloak.

A modalitatea. Oinarrizko ikerketa

Oinarrizko Zientziak (Klinikaurrekoak): giza patologiari buruzko oinarrizko ikerketa gisa definitzen ahal da, baina ez ezinbestean giza materialarekin egiten dena. Funtsezko eta/edo oinarrizko fenomenoen azterketarekin zerikusia duten proiektuak hartzen ditu, baldintza edo entitate kliniko bati modu espezifikoan edo orokorrean lotzen ahal zaizkionak. Gai-arlo zabal honi dagozkio oraindik klinikoki aplikatu ez diren prozesu zelularrekin, mekanismo fisiopatologiko oinarrizkoekin eta mekanismo immunologiko eta genetikoekin lotutako prozesu gehienak.

B modalitatea. Ikerketa klinikoa, epidemiologikoa, osasun publikokoa eta osasun zerbitzuetan.

Honako hauek sartzen dira:

-Bereziki eta lehentasunez jarduera klinikoarekin zerikusia duten proiektuak, edozein direla ere horien ikuspuntua edo aztertu beharreko alderdi espezifikoak, eta erizaintzako prozedura eta zainketa bereziak barne direla. Bertan sartzen da, halaber, faktore klinikometrikoei eta eritasunen pronostikoari buruzko Epidemiologia Klinikoko ikerketa. Hemen kokatzen dira, beraz, patologia jakin batzuei edo entitate nosologiko klinikoei dagozkienak, salbu eta, oinarrizkoak direlako, A atalean biltzen direnak.

-Espezifikoki edo orokorrean, alderdi edo tresna metodologikoak ukitzen dituzten proiektuak, bai epidemiologian, osasun publikoan eta osasun zerbitzuetan, bai jende multzo handia ukitzen duten patologien eta/edo arriskuen azterlan epidemiologikoak, bai kolektibitatearen osasun programen ebaluazioa.

Lehentasunezko arloak (''B'' modalitateko proiektuak)

a) Patologia garrantzitsuak.

1. Neoplasiak.

2. Bihotz-hodietako eritasunak.

3. Eritasun neurologikoak eta adimenekoak.

4. Arnas eritasun kronikoak.

5. Eritasun immunologikoak.

6. Digestio aparatuko eritasunak.

7. Diabetesa eta loditasuna.

8. Eritasun infekziosoak.

b) Osasuna eta eritasuna baldintzatzen dituzten faktoreak eta osasunaren sustapena

1. Desberdintasunak osasunaren arloan.

2. Bizimodu osasungarriak. Osasunerako hezkuntza.

3. Desgaitasuna eta errehabilitazioa.

4. Zainketa alternatiboak eta baliabide ez-formalak osasun arazoetan. Komunitatearen parte hartzea.

c) Osasun sistemaren garapena.

1. Osasun baliabideak eta teknologia.

2. Osasun laguntzaren prozesuen ebaluazioa eta kontrola. Praktika klinikoaren aldakortasuna.

3. Informazio sistemak.

II. Ebaluazio eta Prospektiba Agentzia Nazionalaren arloak.

Nekazaritza (AGR).

Funtsezko eta Sistemetako Biologia (BFC).

Biomedikuntza (BMED).

Landareen eta Animalien Biologia, Ekologia (BVAE).

Elikagaien Zientzia eta Teknologia (TA).

Materialen Zientzia eta Teknologia (TM).

Konputazioaren eta Teknologia Informatikoaren Zientziak (INF).

Lurraren Zientziak (CT).

Gizarte Zientziak (CS).

Zuzenbidea (DER).

Ekonomia (ECO).

Hezkuntza Zientziak (EDUC).

Filologia eta Filosofia (FFI).

Fisika eta Espazioaren Zientziak (FI).

Abeltzaintza eta Arrantza (GAN).

Historia eta Artea (HA).

Ingeniaritza Zibila eta Arkitektura (ICI).

Ingeniaritza Elektrikoa, Elektronikoa eta Automatikoa (IEL).

Ingeniaritza Mekanikoa, Itsasontzietakoa eta Aeronautikoa (IME).

Matematika (MTM).

Medikuntza Klinikoa eta Epidemiologia (MCLI).

Psikologia (PS).

Kimika (QMC).

Teknologia Elektronikoa eta Komunikazioetakoa (COM).

Teknologia Kimikoa (TQ).

Iragarkiaren kodea: F1105238