Iragarkia

59. ALDIZKARIA - 2011ko martxoaren 25a

1. NAFARROAKO FORU KOMUNITATEA

1.4. DIRU-LAGUNTZAK, LAGUNTZAK ETA BEKAK

90DEP/2011 FORU AGINDUA, martxoaren 10ekoa, Berrikuntza, Enpresa eta Enpleguko kontseilariak emana, 2011rako zailtasunak dituzten enpresendako laguntzen araubidea ezartzen duena.

ZIOEN AZALPENA

Irailaren 10eko 185/2007 Foru Aginduaren bidez, krisian dauden enpresak salbatu eta berregituratzeko laguntzei buruzko ekainaren 22ko 3/2000 Foru Legea arlo horren gainean indarra duten Europar Batasuneko jarraibideetara egokitzeko arauak eman ziren (2004ko 244. Egunkari Ofiziala, urriaren 1ekoa).

Gero, foru dekretu horren bigarren xedapen gehigarria garatzeko, zailtasunak dituzten enpresendako laguntzen araubideak onetsi ziren, 2009. eta 2010. urteetarako, Berrikuntza, Enpresa eta Enpleguko kontseilariaren ekainaren 8ko 268/2009 Foru Aginduaren eta otsailaren 9ko 39/2010 Foru Aginduaren bidez, hurrenez hurren.

2011rako Nafarroako Aurrekontu Orokorrei buruzko abenduaren 28ko 22/2010 Foru Legeak Berrikuntza, Enpresa eta Enplegu Departamentuari baimena eman dio abalak emateko enpresen bideragarritasun teknikoa eta ekonomikoa berreskuratzeko helburua duten proiektuei, gehienez ere 1.500.000 euro proiektuko, betiere enpresa horiek betetzen badituzte Berrikuntza, Enpresa eta Enpleguko kontseilariaren otsailaren 9ko 39/2010 Foru Aginduan edo horren ordezko arauan araututako laguntzak, zailtasunak dituzten enpresendako direnak, jasotzeko baldintzak.

Gaur egungo krisi ekonomikoaren eraginez, laguntza hauen eskari handia dago, eta horregatik zailtasunak dituzten enpresendako laguntzak aurten berrikuntza bat dute, 2009. eta 2010. urteetako araubideekin alderatuta. Hain zuzen ere, Nafarroako ekonomiari zuzenean nahiz zeharka balio-ekarpen handiagoa ematen dioten sektore ekonomikoetan ardazten dira.

Orobat, laguntza hauek "de minimis" izaera izanen dute, Batzordeak abenduaren 15ean emandako 1998/2006 EE Erregelamenduarekin bat. Izan ere, 2010eko araubideko zailtasunak dituzten enpresendako laguntzak sartuta zeuden "Estatuko laguntza neurriei gaur egungo krisi ekonomiko eta finantzarioaren unean finantziazioa lortzen laguntzeko aplikatzen ahal zaien aldi baterako esparruan " (2009/C 83/01) aurreikusten zen zenbateko mugatuko laguntza bateragarria ezin da aplikatu 2010eko abenduaren 31 ondoren, egun hori baino lehen aurkeztu ziren eta tramitatzeko dauden eskaerak alde batera utzita.

Azkenik, Nafarroako Gobernuak, 2009ko ekainaren 1eko Erabakiaren bidez, laguntza horiek banakako ebaluazio araubidean emateko baimena eman zuen, Diru-laguntzei buruzko Foru Legearen 17. artikuluan xedatutakoarekin bat.

Azaldutakoarekin bat, eta Nafarroako Gobernuari eta Lehendakariari buruzko abenduaren 3ko 14/2004 Foru Legearen 41.1 artikuluak ematen dizkidan eskudantziak erabiliz,

AGINDU DUT:

1. artikulua. Xedea.

2011rako laguntzen araubide honen helburua da zailtasunak dituen enpresatzat joak izateko baldintzak bete, jarduera ekonomikoa egiten jarraitzeko beharrezkoak diren finantza baliabideak bide arruntetatik lortzeko zailtasunak izan eta enpresaren etorkizuneko lehiakortasunerako neurrien programa aurkezten duten Nafarroako enpresei bideragarritasun tekniko eta ekonomikora itzultzeko sostengua ematea.

2. artikulua. Onuradunak.

1. Onuradun izan ahal izateko, enpresa eskatzaileek betekizun eta baldintza hauek bete beharko dituzte:

a) Jarduera ekonomikoa Nafarroan egiten duen enpresa izatea.

Baldintza hori Jarduera Ekonomikoen gaineko Zergaren Erregistroko altaren bidez frogatuko da.

b) Jarduera honako sektore hauetako batean egitea:

-Erauzketa industriak, manufaktura industriak eta informaziokoak eta komunikazioetakoak, Ekonomia Jardueren Sailkapen Nazionaleko (EJSN) B, C eta J sailetan sartuak, nekazaritzako elikagaien industriak izan ezik.

-Berrikuntza, Enpresa eta Enpleguko kontseilariak apirilaren 29an emandako 140/2010 Foru Aginduan ezarri diren energia berriztagarriko iturriak aprobetxatzea. Agindu hori 2010eko 65. Nafarroako Aldizkari Ofizialean argitaratu zen, maiatzaren 28an.

-Hondakinak tratatu eta deuseztatzea; balorizazioa eta kutsadura kentzeko jarduerak eta hondakinak kudeatzeko beste zerbitzu batzuk (EJSN: E saileko 38.2, 38.3 eta 39).

-Ingeniaritzako zerbitzu teknikoak eta aholkularitza teknikoarekin lotuta dauden beste jarduera batzuk (EJSN: M saileko 71.12 eta 71.20).

-Ikerketa eta garapena (EJSN: M saileko 72).

-EJSNan sartutako Industria diseinuko jarduerak: M saileko 74.10.

c) "Zailtasunak dituen enpresatzat" jotzea.

Halakoa izanen da bere finantza egoera kritikoa dela-eta bere funtzionamendu normalerako beharrezkoak diren eragiketak egin ezin dituen enpresa. Egoera horren adierazgarri dira negozio zifraren zenbateko garbiaren beherakada nabarmena, ordaindugabe ugariak, zorpetze handia edo guxienez azken bi ekitaldietako galerak. Bestetik, horrelakotzat hartuko dira jardueran hiru urte baino gutxiago eman dituzten ekonomia sozialeko enpresak, betiere enpresen berregituraketaren prozesu baten ondorioz sortuak badira.

"Zailtasunak dituen enpresa" izatea frogatzeko, eskaera orrian agertzen diren datu ekonomikoak aurkeztuko dira.

d) Enpresa krisian ez egotea, laguntza ematen zaion unean.

Ondorio horietarako, tamaina edozein delarik, enpresa bat krisian dagoela jotzeko Krisian dauden enpresak salbatu eta berregituratzeko Estatuko laguntzei buruzko Europar Batasuneko jarraibideei jarraituko zaie (C 244 AO, 2004ko urriaren 1ekoa), egoera hauetan:

-Erantzukizun mugatuko sozietate baterako, izenpetutako kapitalaren erdia baino gehiago desagertu denean eta azken 12 hilabeteetan haren laurdena baino gehiago galdu denean.

-Sozietate baterako, gutxienez sozietateko kideetako batek enpresaren zergarekiko erantzukizun mugagabea duenean, haren berezko funtsen erdia baino gehiago desagertu denean, haren liburuetan adierazi bezala, eta azken 12 hilabeteetan funts haien laurdena baino gehiago galdu denean.

-Enpresa mota guztietarako, porroteko edo kaudimengabeziako prozedura baten mende gelditzeko zuzenbide nazionalean ezarritako baldintzak biltzen dituenean.

e) Enpresaren egoera gainditzeko neurri zehatzen programa bat hartzea. Neurri horiek enpresaren lehiakortasuna -gaur egungoa zein etorkizunekoa- modu nabarmenean hobetzea izanen dute helburu, eta laguntzen eskabidearekin batera aurkeztu beharreko memorian txertatu beharko dira.

f) Mailegu gisa edo mailegua bermatzeko abal gisa ematen den zenbatekoa estaltzen duten bermeak ematea.

g) Diru-laguntzei buruzko azaroaren 9ko 11/2005 Foru Legearen 13. artikuluan ezartzen diren baldintza orokorrak betetzea, artikulu horren 2. idatz-zatiko b) eta e) letretan aipatzen direnak izan ezik, onuradunen ezaugarri bereziengatik salbuesten baitira. Baldintza orokorrak betetzen direla eskabide orriko "erantzukizuneko aitorpen" baten bidez frogatuko da.

2. Aurreko paragrafoko f) letran ezarritako baldintza ez zaie eskatuko Enpresako zuzendari nagusiak, ebazpenaren bidez, interes berezikotzat jotzen dituen enpresei, inguruabar hauek kontuan hartuta:

-Enpresa berritzaileak, balio berritzailea erakutsi dutenak, bai egindako jardueran, bai etorkizunerako aurreikusitakoan.

-Ekonomia sozialeko enpresak, enpresen berregituraketaren prozesu baten ondorioz sortuak badira eta hiru urte edo gutxiago badituzte.

Interes berezikotzat jotako enpresak ez dira egonen emandako edo abalatutako maileguaren gehieneko zenbatekoen mendean (foru agindu honen 3.2 artikuluan adierazten direnak), baina zenbateko hori ez da inola ere izanen 600.000,00 eurotatik gorakoa.

3. artikulua. Laguntza mota eta zenbatekoa.

1. Enpresa Sustapenaren Zerbitzuak, enpresaren arrisku mailaren arabera, eman beharreko laguntza mota baloratuko du, hauen artetik:

a) Mailegua bermatzeko abal gisa ematen diren laguntzak.

Laguntza, orokorrean, mailegua bermatzeko abal gisa emanen da.

Laguntza mota honetarako, Berrikuntza, Enpresa eta Enplegu Departamentuak lankidetza hitzarmena sinatuko du (eredua Nafarroako Gobernuaren atarian -navarra.es- eskuratzen ahal da) laguntzaile aritu nahi duten Nafarroako finantza entitateekin. Finantza entitate horiek laguntzaren onuradun diren enpresei beharrezkoa den finantzaketa emanen diete.

Laguntza mota honen enpresa onuradunak Nafarroako Gobernuari ordaindu beharko dio diru kantitate bat, abalaren irekitze-komisio gisa. Kantitate hori kalkulatzeko, emandako diru-laguntzaren zenbatekoari portzentaje bat aplikatuko zaio. Portzentaje hori diru-laguntza emateko ebazpenean eta finantza entitateekin sinatutako lankidetza hitzarmenean (aurreko paragrafoan aipatuta) zehaztuko da.

b) Mailegu gisa ematen diren laguntzak.

Salbuespen gisa, finantzaketa bide arruntetatik lortu ezin duten enpresek laguntza mailegu gisa jasoko dute. Aldez aurretik, Enpresa Sustapenaren Zerbitzuak beren egoerak baloratuko ditu.

Mailegu gisa ematen den laguntza amortizatzeko epea 5 urte izanen da gehienez. Interes tasa, berriz, abal gisa ematen diren laguntzetarako lankidetza hitzarmenean ezartzen den bera izanen da.

2. Emandako edo abalatutako maileguaren gehieneko zenbatekoa enpresaren finantzaketa beharren eta enpresako langile kopuruaren arabera zehaztuko da, honako taula honi jarraikiz:

Ematen den zenbatekoa, eskatutakoaren arabera, gutxienez 80.000 euro izanen da 10 langile baino gehiago dituzten enpresentzat, eta 300.000 euro 50 langiletik gorakoentzat.

3. Foru agindu honetan aurreikusten diren laguntzek, diru-laguntzaren gordin gisa kalkulatuta, inola ere ez dituzte gaindituko foru agindu honen 8.2 artikuluan de minimis laguntzetarako aurreikusten diren mugak.

Diru-laguntza gordina kalkulatzeko eragiketa hau erabiliko da: maileguaren urteko interes efektiboa ken erreferentziazko oinarrizko tasa eta dauden marjinetako bat batuta ateratzen den kopurua. Marjina horiek enpresaren kalifikazio-kategoriaren eta maileguaren kolateralizazio-mailaren araberakoak dira, eta Europako Batzordeak erreferentziako tasak finkatu eta eguneratzeko metodoa berrikusteko eman zuen komunikazioan aurreikusten dira (2008ko 14. AO, urtarrilaren 19koa).

4. artikulua. Eskaerak eta eskatutako agiriak aurkeztea.

1. Eskaerak aurkezteko epea foru agindu hau Nafarroako Aldizkari Ofizialean argitaratu eta biharamunean hasi eta 2011ko urriaren 31n bukatuko da, egun hori barne.

Eskaerak, Nafarroako Gobernuaren interneteko atarian (www.navarra.es) lortzen ahal den ereduaren arabera, Berrikuntza, Enpresa eta Enplegu Departamentuko erregistroan aurkeztuko dira (Iruñeko Tomás Caballero parkea, 1, 31005), edo, bestela, Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 38.4 artikuluan ezarritako lekuetako batean edo Nafarroako Foru Komunitateko Administrazioaren Erregistro Orokor Elektronikoan.

Eskaera posta bulego batean aurkezten bada, gutun-azala irekita izan beharko da, lehen orriko goiko aldean bulegoaren izena, eguna, tokia eta ordua (minutuak eta guzti) agertarazteko. Datu horiek guztiak gordekinean ere azaldu beharko dira.

2. Eskabidearekin batera honako agiri hauek aurkeztu behar dira:

a) Azken hiru ekitaldietako urteko kontu ikuskatuak edo sozietateen gaineko zerga, eta eskaera aurkezten den eguneko egoera-balantzea.

b) Eskabide orrian ezartzen den gutxieneko edukia izanen duen memoria.

c) Bermeei dagokienez, hau aurkeztu beharko da:

-Bermeen tasazio eguneratua, aditu independente batek egina eta eta dagokion elkargo ofizialak ikus-onetsia.

-Informazio ohar soila, jabetza-erregistro batek emana, bermeak ondasun higiezinak badira, edo merkataritzako eta ondasun higigarrien erregistro batena, bermeak ondasun higigarriak izanez gero.

d) Gizarte Segurantzako kotizazioen TC-1 eta TC-2 agiriak, eskaeraren data baino lehenagoko hilabetekoak.

3. Eskaera osorik ez badago edo ezarritako baldintzak betetzen ez baditu, enpresari eskatuko zaio zuzen dezala eta adieraziko, ezarritako epean egin ezik, ulertuko dela eskaerari uko egin diola, eta espedientea artxibatzeko ebazpena emanen da.

5. artikulua. Eskaerak baloratzeko irizpideak.

1. Laguntza hauen zenbatekoa zehazteko balorazio irizpideak honako hauek izanen dira:

a) Bere jarduera ekonomikorako beharrezkoak diren finantza baliabideak bide arruntetatik lortzeko ezintasuna.

b) Enpresak bere lehiakortasuna hobetzeko hartu dituen eta memorian azaldu dituen neurrien koherentzia eta egingarritasuna.

c) Emandako laguntzen eta enpresak egindako ahaleginen arteko proportzionaltasuna.

d) Enpresaren egoeraren ondorioz gizarteari eragiten ahal zaizkion kalteak.

e) Nafarroako Gobernuak enpresen esku jarritako bestelako finantza laguntzarako tresnak erabiltzeko ezintasuna.

2. Laguntza hauen kontzesioa banakako ebaluazio araubidean tramitatuko da. Beraz, eskaerak aipatutako irizpideei jarraituz ebaluatuko dira, eta ebaluazio horren emaitzaren arabera esleituko dira diru-laguntzak.

Eskaerak zein hurrenkeran aurkezten diren, horren arabera tramitatu eta ebatziko dira espedienteak, aurrekontuan horretarako kreditua dagoen bitartean. Aurrekontuko dirua agortzen bada, gainerako eskaerak ezetsi eginen dira.

6. artikulua. Laguntzak ematea.

1. Enpresa Sustapenaren Zerbitzuak aurkeztutako agiriak aztertuko ditu. Enpresari eskatzen ahalko dio espedientea behar bezala aztertu eta ebazteko komenigarritzat jotzen dituen bestelako datu edo argibideak aurkez ditzala. Enpresak eskaera hori ezarritako epean bete ezik, ebazpen bat emanen da, eskatutako laguntzak ukatuko dituena.

Eskaera ebaluatu ondoren, Enpresa Sustapenaren Zerbitzuak organo eskudunari igorriko dio ebazpen proposamena, non adieraziko baita onuradunek laguntzak jasotzeko baldintza guztiak betetzen dituztela.

2. Enpresako zuzendari nagusiak izanen du laguntzak emateari eta, bidezkoa bada, ordaintzeari buruz ebazteko eskumena. Ebazpena eman eta jakinarazteko epea 3 hilabetekoa izanen da, eskabidea aurkezten den egunetik hasita.

Epe horretan berariazko ebazpenik jakinarazten ez bada, eskaera ezetsi egin dela ulertuko da. Berariazko edo ustezko ezespenaren aurka interesdunek zilegi izanen dute gora jotzeko errekurtsoa jartzea, Berrikuntza, Enpresa eta Enpleguko kontseilariari zuzendua, administrazio prozedura erkideari buruzko legeriari jarraikiz.

7. artikulua. Onuradunen eginbeharrak eta haiek ez betetzearen ondorioak.

1. Laguntzen onuradunek honako eginbehar hauek bete beharko dituzte:

a) Laguntzaren xede diren ekintzak egitea, jasotako funtsak horretan erabiliz.

b) Laguntzak emateko ebazpenean enpresaren geroko bideragarritasuna eta jasotako funtsen aplikazio zuzena bermatzeko ezarritako baldintzak betetzea.

c) Laguntzaren indarraldiko ekitaldiren batean enpresak mozkinak lortzen baditu, kapital-gehikuntza egin beharko da, legezko erreserbarako ez diren mozkinetatik hartuz. Kapital-gehikuntza laguntza bukatzen denean eginen da, eta hala egiten ez bada, diru-laguntza gordina itzuli beharko da. Gordin hori diru-laguntza emateko ebazpenean ageriko da.

d) Diru-laguntzei buruzko Foru Legearen 9. artikuluan ezarritako eginbehar orokorrak.

2. Diru-laguntza emateko ebazpenetan, foru agindu honetan edo Diru-laguntzei buruzko Foru Legean ezarritako eginbeharrak osorik bete ezik, emandako laguntza kobratzeko eskubidea galduko da edo diru hori itzuli egin beharko da, foru lege horren 35. artikuluan xedatutakoarekin bat.

Halaber, aurreko eginbeharrak neurri batean bete ezik, emandako laguntzen zenbatekoa berriro ere finkatzen ahalko da, proportzionaltasun printzipioari aplikatuz, edo, hala bada, dagokion zenbatekoa itzultzeko agintzen ahalko da.

3. Emandako laguntzak kobratzeko eskubidea galdu eta kopuru horiek askatuz gero, aurrekontuan behar adina diru ez egoteagatik hasiera batean ezetsi ziren eskaeretarako erabiltzen ahalko dira.

8. artikulua. Diru-laguntzen bateragarritasuna eta "de minimis" laguntzen izaera.

1. Foru agindu honen xede diren laguntzak bateragarriak dira Nafarroako Foru Komunitateko Administrazioak, beste administrazio publiko batzuek, beste erakunde publiko nahiz pribatuek edo nazioko nahiz atzerriko partikularrek emandako beste diru-laguntza batzuekin.

Laguntzak beste laguntza bateragarri batzuekin metatzen ahalko dira edo finantzaketa komunitarioaren beste bide batzuekin, baldin eta kategoria aplikagarrien arabera salbuesteko jarraibideetan edo erregelamenduetan ezarritako gehieneko laguntza mailak errespetatzen badira.

2. Foru agindu honetan aurreikusitakoak "de minimis" laguntzak dira, Europako Batzordeak abenduaren 15ean emandako 1998/2006 EE Erregelamenduan xedatutakoarekin bat. Erregelamendu hori Itunaren 87. eta 88. artikuluak "de minimis" laguntzei aplikatzeko moduari buruzkoa da.

Erregelamendu horrekin bat, edozein enpresari emandako "de minimis" laguntza osoa gehienez ere 200.000 eurokoa izanen da, hiru zergaldiko edozein alditan. Ondorio horietarako, onuradunak behartuta daude kasuan kasuko zergaldian eta aurreko bi zergaldietan jasotako bestelako "de minimis" laguntzak aitortzera eskabide orrian.

9. artikulua. Emandako diru-laguntzen publizitatea.

Diru-laguntzei buruzko Foru Legearen 15. artikuluan xedatutakoarekin bat, Enpresa Sustapenaren Zerbitzuak jendaurrean jarriko ditu emandako diru-laguntzak Nafarroako Gobernuaren interneteko atarian (www.navarra.es), honako hauek zehaztuta: deialdia, laguntza zein programari eta aurrekontu-kredituri egotziko zaion, onuraduna, emandako diru-kopurua eta diru-laguntzaren helburua.

Xedapen gehigarri bakarra.-Gastua baimentzea.

500.000 euroko gasturako baimena ematen da foru agindu honek sortzen dituen konpromisoak betetzeko, 2011ko gastuen aurrekontuko 830002 81150 8317 422300 "Birrabiatze-planak finantzatzeko kapital-aurrerakinak" izeneko kontu-sailaren kargura. Zenbateko hori handitzen ahalko da aurrekontuetan horretarako diru erabilgarria baldin badago.

Azken xedapen bakarra.-Indarra hartzea.

Foru agindu honek Nafarroako Aldizkari Ofizialean argitaratzen den egunean hartuko du indarra.

Iruñean, 2011ko martxoaren 10ean.-Berrikuntza, Enpresa eta Enpleguko kontseilaria, José María Roig Aldasoro.

Iragarkiaren kodea: F1104592