2. NAFARROAKO TOKI ADMINISTRAZIOA
2.2. XEDAPEN ETA IRAGARKIAK, HERRIEN ARABERA ANTOLATUAK
SANTSOL
Ordenantza fiskala, Santsolgo Udalaren hilerriaren erabilera
eta hura erabiltzeko eta hartan zerbitzu egiteko eskubide eta tasak arautzen dituena. Behin betiko onespena
Nafarroako Toki Administrazioari buruzko Foru Legearen 326. artikuluan ezarritakoari jarraituz, Sansolgo Udalaren hilerriaren erabilera eta hura erabiltzeko eta hartan zerbitzu egiteko eskubide eta tasak arautzen dituen ordenantzaren testu osoa argitaratzen da. Sansolgo Udalak 2010eko abenduaren 16an hasiera batez onetsi zuen ordenantza. Iragarki oholean eta 2011ko 8. Nafarroako Aldizkari Ofizialean, urtarrilaren 13an, aginduzko iragarkiak jarri ondotik, legezko epean ez da haren aurkako erreklamaziorik aurkeztu; beraz, aipatutako udal erabakiari jarraituz, ordenantza behin betiko onetsitzat jotzen da.
Santsolen, 2011ko otsailaren 23an.-Alkate udalburua, Francisco Javier Díaz de Ilarraza Sanz.
SANTSOLGO UDAL HILERRIAREN ERABILERA ETA HURA ERABILTZEKO ETA HARTAN ZERBITZU EGITEKO ESKUBIDE ETA TASAK ARAUTZEN DITUEN ORDENANTZA
Lehenbiziko kapitulua
Hilerriaren erabilera eta erabiltzeko eskubideak
1. artikulua. Toki Araubidearen Oinarriei buruzko Legeko 4, 25 eta 26. artikuluetan, Toki Administrazioari buruzko Foru Legearen 4 eta 29.etan, eta Nafarroako Toki Ogasunei buruzko Foru Legeko 12 eta 100.etan ezarritakoaren arabera, udal hilerriaren administrazioak, zuzendaritzak eta zaintzak Santsolgo Udalaren esku egon behar dute, batere ukatu gabe bertze administrazio batzuek alor berean dauzkaketen legezko eskumenak.
2. artikulua. Administrazioak, zuzendaritzak eta zaintzak ahalmen hauek dakartzate berekin:
a) Hilerriko higienearekin eta osasungarritasunarekin zerikusia duen guztia.
b) Hilotzak eramateari dagokiona eta hilerriaren barne araubidea ukitzen duen guztia.
c) Lurren eta hilobien antolaketa, banaketa, erabilera eta aprobetxamendua.
d) Eskubideak eta tasak kobratzea.
3. artikulua. Alkatetzaren ardurapekoak izanen dira hilerriaren antolaketa eta funtzionamendua; horretarako, behar adina langile izanen ditu eta bere eginbehar hau ahalik eta hobekien betetzeko, behar diren proposamenak aurkeztuko dizkio Udalari.
4. artikulua. Hilerrian hilobi hutsak izanen dira udalerriko biztanleriaren zentsuaren araberako kopuruan, edo horietarako lur aski bederen bai.
5. artikulua. Ehorzteko ekartzen diren hilotz guztiak lurperatuko dira, legezko izapideak bete badira, eta tasen eranskinean aipatzen diren ehorzketa eskubideak ordaindu beharko dira zerbitzu horiengatik.
6. artikulua. Hilotzak hilerrian berean lekuz aldatzeko atera daitezke hobitik, baita beste hilerri batera eramateko ere.
Nolanahi ere, osasunari buruz indarra duten xedapenetan ezarritakoari jarraikiz atera behar dira, osasunaren aldetik behar diren neurri guztiak hartuta.
7. artikulua. Epea amaitzeagatik hilotza atera behar denean, ez da inolako gaztigurik eman beharko.
Eskatzaileak hilotza ateratzeko lanak bere kontura eginen ditu. Alkatetzari jakinaraziko dio aurretik, hark lanak ikuskatu beharko baititu.
8. artikulua. Beste hilerri batetik ekartzen diren hilotzak ehorzteko ez da lur berria okupatuko. Gutxienez ere hamar urteko antzinatasuna duen hilobian ezarriko dira edo, bestela, hezurtegira eramanen dira.
9. artikulua. Heriotzaren arrazoiak osasun arriskurik ez badu, baltsamatu gabeko hilotzak baldintza hauetan ateratzen ahal dira:
a) Lurpean ehortzitako hilotzak lurperatu zirenetik gutxienez ere hamar urte iraganda atera daitezke, arrunt hezurturik baldin badaude.
b) Hilobi mota guztietan: ehorzketa zinkezko hilkutxan egin baldin bada, edozein mementotan atera eta lekuz aldatzen ahal da; betiere, hilkutxa kontserbazio egoera ezin hobean badago.
Horiek baino epe laburragoetan ez da hilotzik ateratzeko baimenik emanen, epaile baten aginduz ez bada.
Ekainetik irailera bitarte, biak barne, ez da ateratzerik bat ere eginen, epaile batek manatu ezean.
10. artikulua. Hilotz baltsamatuak atera eta lekuz aldatzeko baimena noiznahi eman daiteke, baina zerraldoaren kanpoko kutxa berria ezarri beharko da, ongi kontserbaturik ez badago.
11. artikulua. Bai hilotz bat ateratzen denean lekuz aldatzeko bai berriz ere ehorzten denean, horren oharra jasoko da behar diren liburuetan.
12. artikulua. Ordenantza honetan arautzen diren zerbitzuak egiteagatik udal tasak ordaindu eta gero, hilerriko lur guztiak erabiliko dira lurpean lagun bakarra hogei urtean ehorzteko hilobietarako. Dena den, leku gutxi izateagatik beharrean egonez gero, legeak agintzen duen gutxienekoa beteta ateratzen ahalko dira hilotzak. Bestalde, ehorzketa zerbitzuen kontzesio administratiboa tartean baldin bada, zerbitzuak dagokion kostua izanen du.
13. artikulua. Hilerriko lurra ehorzketak egiteko baizik ez da erabiliko. Zilegi da, ordena egoki baten barruan, gurutze edo hilarriak paratzea, baldin eta haiek erraz mugitzen edo lekuz aldatzen badira.
14. artikulua. Hobien kokapena, lurrerauzketaren gastuak eta hobiak ireki nahiz ixteko kostuak Udalaren kontura izanen dira.
15. artikulua. Hilobiak segur, xahu eta apain atxikitzea titularren betebeharra da.
16. artikulua. Kontzesioak eta aprobetxamendua honako hauengatik ere iraungi daitezke:
a) Hilerria kentzen denean.
b) Interes publikoagatik.
c) Ehorzketa gehiago egiteko, hobiak behar direlako.
Bigarren kapitulua
Tasak hilerrian zerbitzuak emateagatik
17. artikulua. Zergapeko egintza ondoko zerbitzuak ematea da:
a) Ehorzketak.
b) Hilotzak hobitik ateratzea.
c) Hilobiei lotutako bertze lan batzuk.
18. artikulua. Ordenantza honetan araututako zerbitzuren bat eskatzen dutenak dira tasa hauen subjektu pasiboak, pertsona fisiko, juridiko edo, nortasun juridikorik gabe, batasun ekonomikoa edo ondare banatua eratzen duten entitateak izan.
19. artikulua. Zerga-oinarria ordenantza honen tarifen eranskinean agertzen da. Tributu-kuota eta zerga-oinarria berdinak dira.
20. artikulua. Hobi berean bi hilotz edo gorpuzki, nahiz gehiago, batera lurperatzeko lizentziak eman ahalko dira, baldin eta ehorzketa lekuak behar bezain zehazturik badaude, baina hilotz bakarra lurperatzetik gorako lanak partikularraren kontura izanen dira.
21. artikulua. Hilerri honetako beste hilobi batzuetatik gorpuzkiak atera eta berriz ere ehortziz gero, hilotza ateratzeagatik eta ehorzteagatik ordaindu beharko dira tasak. Gorpuzkiak bertze hilerri batetik ekarriz gero, ehorzketari dagokion tasa ordainduko da bakarrik.
22. artikulua. Gorpu bat lurperatzerakoan edo lurretik ateratzerakoan hilarriak eta/edo gurutzeak kentzea (eta gero paratzea) beharrezkoa bada, subjektu pasiboak horren ardura hartu beharko du, edo bestela Udalari zerbitzu horrek dakarkion kostua ordaindu.
Hilarriak eta/edo gurutzeak kentzerakoan (eta gero paratzerakoan) haietan edo hilobietan zerbait hondatuko balitz, subjektu pasiboak konpondu beharko du, edo Udalari konponketak dakarkion kostua ordaindu.
23. artikulua. 17. artikuluan aipatzen diren zerbitzuei dagozkien tasak zerbitzuak egin baino lehen ordaindu behar dira, premia larriko kasuetan edo udal bulegoek egun baliogabea dutenetan izan ezik. Horrelakoetan langileak oharra jasoko du eta horren berri emanen die udal bulegoei, behar den tarifa ordainarazteari ekin diezaioten.
Nafarroako Toki Ogasunei buruzko Legearen 108. artikuluan xedatutakoari jarraituz, tasak autolikidazio bidez eskatuko dira.
Azken xedapena
Bakarra.-Ordenantza honek indarra hartuko du eta ondorio juridiko osoak sortuko, bere testu osoa Nafarroako Aldizkari Ofizialean argitaratu ondoan.
Eranskina
Lurrean hobiratzeko eta hobitik ateratzeko tasak
-Santsolgo Udalean erroldatutakoak: salbuetsirik.
-Santsolgo Udalean erroldatuak ez direnak: 300 euro.
Errauts-kutxetan edo beste ontzi txikietan ehorzketak egiteko eta handik ateratzeko tasak:
-Santsolgo Udalean erroldatutakoak: salbuetsirik.
-Santsolgo Udalean erroldatuak ez direnak: 150 euro.
Lurzatiaren kontzesio administratiboa emateko tasa:
-Santsolen erroldatuta daudenentzat bakarrik: 600 euro.
Egoera:
-Lurzatia 2,5 x 2,5 m edo 2,5 x 2,75 m izanen da luze-zabal.
Kontzesioaren epea 20 urtekoa izanen da, eta amaitutakoan beste 20 urterako luzatzen ahal da, une horretako tasak ordainduta.
Iragarkiaren kodea: L1103376
