Iragarkia

41. ALDIZKARIA - 2011ko martxoaren 1a

1. NAFARROAKO FORU KOMUNITATEA

1.4. DIRU-LAGUNTZAK, LAGUNTZAK ETA BEKAK

528/2010 EBAZPENA, abenduaren 28koa, Antolamenduaren, Kalitatearen eta Berrikuntzaren zuzendari nagusiak emana, Nafarroako Foru Komunitateko maila ez-unibertsitarioko irakasleen 2011-2012 ikasturteko Euskarazko Prestakuntza Plana onesten duena eta dagokion gastua egiteko baimena ematen duena.

Eskolako Hizkuntza Plangintzaren Zerbitzuak Nafarroako Foru Komunitateko maila ez-unibertsitarioko irakasleen 2011-2012 ikasturteko Euskarazko Prestakuntza Planaren XXXI. deialdia onestearen aldeko txostena aurkeztu du.

Planean epe horretan eginen diren eguneratze eta prestakuntza jarduera zientifiko-teknikoak jasotzen dira.

Nafarroako Foru Komunitateko Administrazioari buruzko abenduaren 3ko 15/2004 Foru Legearen 22.1 d) artikuluak ematen dizkidan ahalmenak erabiliz,

EBATZI DUT:

1. Nafarroako Foru Komunitateko maila ez-unibertsitarioko irakasleen 2011-2012 ikasturterako Euskarazko Prestakuntza Plana eta haren oinarriak, ebazpen honen I. eranskinean ageri direnak, baimentzea.

2. 35.000 euroko gastua erreserbatzea 2011ko aurrekontuetako "Irakasleen euskarazko prestakuntza" izeneko 421001 42400 2266 322900 kontu-sailaren kontura, edo horretarako ezartzen den kontu-sailaren kontura.

3. 35.000 euroko gastua baimentzea 2011ko aurrekontuetako "Irakasleen euskarazko prestakuntza" izeneko 421001 42400 2266 322900 kontu-sailaren kontura edo horretarako ezartzen den kontu-sailaren kontura, betiere kreditu nahikoa badago.

4. Ekonomia eta Ogasun Departamentuari eskatzea 35.000 euroko ordainketa egin dezala 2011ko aurrekontuetako "Irakasleen Euskarazko Prestakuntza" izeneko 421001 42400 2266 322900 kontu-sailaren kontura edo horretarako ezartzen den kontu-sailaren kontura, egindako jardueren ebazpenak eta fakturak aurkeztu ondoren.

5. Ebazpen hau eta eranskinak Nafarroako Aldizkari Ofizialean argitara daitezela agintzea.

6. Ebazpen hau eta eranskinak igortzea Giza Baliabideen Zerbitzura, Hezkuntzako Ikuskapen Zerbitzura, Ekonomia eta Ogasun Departamentuak Hezkuntza Departamentuan duen kontu-hartzaile delegatuari, Aurrekontu eta Kudeaketa Ekonomikoaren Atalera, Kudeaketa Ekonomikoaren Bulegora, Eskolako Hizkuntza Plangintzaren Zerbitzura, Euskara Atalera, Euskararen Didaktika Bulegora, Euskararen Irakaskuntzarako Baliabide Zentrora eta Zubiarte euskaltegi publikora.

7. Ebazpen honen kontra gora jotzeko errekurtsoa jartzen ahal da Hezkuntza Departamentuko kontseilariari zuzendua, ebazpen hau argitaratu eta biharamunean hasi eta hilabetez.

Iruñean, 2010eko abenduaren 28an.-Antolamenduaren, Kalitatearen eta Berrikuntzaren zuzendari nagusia, Teresa Aranaz Jiménez.

I. ERANSKINA

Nafarroako Foru Komunitateko maila ez-unibertsitarioko irakasleen Euskarazko Prestakuntza Plana 2011-2012 ikasturterako

Deialdi honetan sartzen diren prestakuntza jarduerak:

I.-Euskara ikasteko ikastaroak:

-Euskara ikasteko ikastaro estentsiboak, laneko lizentziarik gabeak.

-Euskara ikasteko banakako laguntzak.

II.-Euskara hobetzeko ikastaroak:

-Euskara hobetzeko ikastaro trinkoak, laneko lizentzia partzialarekin ("Freskatze ikastaroa").

-Euskara hobetzeko ikastaroak eta eguneratze didaktikorako ikastaroak.

I.-Euskara ikasteko ikastaroak, laneko lizentziarik gabeak

Euskara ikasteko ikastaro estentsiboak.

-Ikastaro presentzialak.

Euskara ikasteko ikastaro hauek ikastetxe publiko eta pribatuetako irakasle ez-unibertsitarioei eskaintzen zaizkie. Laneko lizentziarik gabekoak dira eta irakasle horiek ez dute aldez aurretik EGA agiria edo baliokidea eskuratua izanen. Aldi baterako langileek ere har dezakete parte ikastaro estentsiboen deialdi honetan, beren kontratuak indarra duen bitartean.

Ikastaroak "Zubiarte euskaltegia" IPan emanen dira. Nolanahi ere, ikastetxeetan edo ILZetan ere ematen ahalko dira, baldin eta ikastetxe bateko edo inguruan dauden ikastetxe batzuetako irakasle taldeak sortzen badira eta haien euskara maila antzekoa bada, betiere dauden baliabideen arabera.

Nolanahi ere, talde bakoitzeko parte-hartzaileak hamar izanen dira gutxienez eta hamabost gehienez. Astean 6 eskola ordu izanen dituzte, gutxienez.

Euskara helduei irakasteko curriculumaren mailei ezarritako helburuetara egokituko da programa. Gaur egun egokiturik dago Hizkuntzen ikaskuntzarako, irakaskuntzarako eta ebaluaziorako Europako Erreferentzia Esparru Bateratura (A1, A2, B1, B2 eta C1).

Deialdia irailean eginen da. Ikastetxeetara ikastaroen gaineko argibideak igorriko dira eta haietan esanen da nola eman behar den izena. Ikastaldia 2011ko irailaren bukaeran hasiko da, eta 2012ko maiatzaren bukaera aldean amaituko.

Kurtsoak eta taldeak antolatu ondoren, ikaspostu hutsik badago, izena emateko beste epe bat irekiko da 2012ko urtarrilean. Betebeharrak betetzen dituzten ikasleak izena emateko ordenaren arabera onartuko dira, ikaspostu huts horiek bete arte.

-Autoikaskuntzako ikastaroak.

Euskara ikasteko lan lizentziarik gabeko autoikaskuntzako ikastaro hauek zuzentzen zaizkie EGA titulua edo baliokidea ez duten ikastetxe publiko eta pribatuetako irakaskuntza ez unibertsitarioetako irakasleei. Aldi baterako langileek ere har dezakete parte deialdi honetan, beren kontratuak indarra duen bitartean.

Ikastaroak Zubiarte Euskaltegia IPan emanen dira, eta haren turoretzapean. Autoikaskuntzako modalitate honetan matrikulatutako ikasleak konpromisoa hartzen du gutxienez lau orduko banakako lana egiteko BOGA programaren bidez eta/edo tutoreak adieraziko dizkion ariketa osagarriak eginez. Gainera, astean behin, taldekako mintza-praktika saio batera joan beharko du.

Nolanahi ere, mintza-praktikako taldeek gutxienez hiru kide izan beharko dituzte, eta gehienez bost.

Ikaskuntzako modalitate honetan parte hartzeko gehieneko pertsona kopuru bat ezartzen ahalko da eta, gisa berean, hartutako konpromisoak hartzen ez dituztenei baja ematen ahalko zaie.

Euskara helduei irakasteko curriculumaren mailetarako ezarritako helburuetara egokituko da programa. Gaur egun egokiturik dago Hizkuntzen ikaskuntzarako, irakaskuntzarako eta ebaluaziorako Europako Erreferentzia Esparru Bateratura.

Kurtsoak eta taldeak antolatu ondoren, ikaspostu hutsik badago, izena emateko beste epe bat irekiko da 2012ko urtarrilean. Betebeharrak betetzen dituzten ikasleak izena emateko ordenaren arabera onartuko dira, ikaspostu huts horiek bete arte.

Urtarrilean eta maiatzean, "Zubiarte euskaltegia" IPak txosten idatzia bidaliko du Eskolako Hizkuntza Plangintzaren Zerbitzuko Euskara Atalera. Txosten horretan agertuko dira, besteak beste, parte-hartzaileen bertaratzeak eta haiek eskuratutako maila eta helburuak.

Bakarkako laguntzak, helduak euskalduntzeko ikastegi pribatuetan ematen diren ikastaroak egiteko.

1.-Xedea.

Laguntza hauen xedea da helduak euskalduntzeko ikastegi pribatuek ematen dituzten ikastaroak diruz laguntzea, baldin eta eraginpeko herri edo eskualdean eskaintza hori betetzen duen administraziopeko euskaltegirik ez bada, salbu eta azken horietan onartua ez izana justifikatzen bada.

Parte-hartzaileek eskubidea izanen dute 2010eko irailetik 2011ko abuztura bitarteko matrikularen eta hileko gastuen zati bat ordain diezaieten, betiere laguntzaren xede den ikastaroan %80ko bertaratzeak badituzte gutxienez. Ikastaroetara bertaratzearen araberakoa izanen da ordainketa.

2.-Onuradunak.

Eskola eta lanbide irakaskuntzan diharduten ikastetxe publikoetako eta pribatuetako irakasleek eskatzen ahalko dituzte diru-laguntzak. Aldi baterako irakasleek ere eska ditzakete diru-laguntza horiek, beren kontratuak indarra duen bitartean.

3.-Laguntza motak.

a) Urritik ekainera bitarteko ikasturtea: 0,90 euro frogatutako orduko; ikasturte bakoitzeko 450 euro gehienez ere.

b) Udako ikastaroak eta ikastaro trinkoak, 2 astetik 6 astera bitartekoak.

b.1) Barnetegia ez denean, egunean gutxienez 2 eskola ordu hartuz: 0,90 euro frogatutako orduko; 160 euro gehienez ere.

b.2) Barnetegian, egunean gutxienez 5 eskola ordu hartuz: 18 euro eskola egun osoko, ostatua barne; 525 euro gehienez ere.

Urrian ordainduko dira laguntzak.

4.-Eskaeren tramitazioa.

Bakarkako diru-laguntzetarako eskaerak, deialdi honetako II. eranskineko ereduaren araberakoak, Hezkuntza Departamentuko Erregistroan aurkeztuko dira, edo azaroaren 26ko 30/92 Legearen 38.4 artikuluan zehaztutako tokietako edozeinetan, edo Erregistro Orokor Elektronikoan.

Eskabidearekin batera honako agiri hauek aurkeztuko dira:

-Ikasketa tasei dagozkien fakturak eta, hala behar denean, ostatuari dagozkionak.

-Euskaltegiak emandako aprobetxamendu ziurtagiria. Ziurtagiri horretan honako hauek agertuko dira: bertaratzea, hasierako maila, kurtsoaren iraupena eta ordu kopurua, eskatzaileak egindako orduak eta bukaeran lortutako maila.

Eskabide eredua eta euskaltegiak eman beharreko ziurtagiriaren eredua Hezkuntza Departamentuaren web-gunean jarriko dira (http://www.navarra.es/home_es/Servicios/ficha/1961/Ayudas-al-profesorado-para-el-aprendizaje-de-euskera-Bakarkako-laguntzak).

Eskaerak ekainaren 2011ko ekainaren lehenetik irailaren azkeneko egun baliodunera bitarte aurkeztuko dira. Eskaera egiteko epeak luzaezinak dira.

II.-Euskara hobetzeko ikastaroak

-Euskara hobetzeko ikastaro trinkoak, laneko lizentzia partzialarekin ("Freskatze ikastaroa").

1.-Ikastaroaren xedea.

Ikastaroaren helburuak dira parte hartzen duten irakasleek gramatika ezagutza eguneratzea eta testuen ekoizpena, bai ahoz bai idatziz, hobetzea. Irakasle parte-hartzaileak beren ikastetxeetan erreferente bat izan daitezke euskarazko komunikazioaren eta hizkuntzaren kalitatea hobetzeko.

2.-Parte-hartzaileak.

Deialdi honetan 10 postu eskaintzen dira, bakar-bakarrik, Nafarroako Foru Komunitateko ikastetxe publikoetan behin betiko destinoa izanik, unibertsitatetik kanpoko irakaskuntzetan euskaraz irakasten duten irakasle funtzionarioentzat.

Ez dute parte hartzen ahalko, aurreko deialdiren batean onartuta izanda, parte hartzeari uko egin ziotenek behar bezala justifikatu gabe.

Zenbait espezialitatetako irakasleak ordezteko dauden zailtasunak direla eta, irakasle horiek behin betiko onartuak izateko baldintza izanen da prestakuntzaldia bitartean hutsik geldituko diren postu horiek bete ahal izatea. Arau berezi horregatik kaltea jasaten duten irakasleei horren berri emanen zaie eta lehentasuna izanen dute hurrengo deialdietan parte hartzeko.

3.-Ikastaroaren egitura.

Ikastaroaren edukiak bi fasetan banaturik dauden moduluetan daude antolaturik: 200 orduko fase trinko bat, bi hilabetekoa, lan lizentziarekin, eta 100 orduko fase estentsibo bat, lan lizentziarik gabe. Bi fase horiek oso-osorik egin beharko dira ikasturte beraren barnean.

4.-Ikasturtearen antolaketa.

2011ko irailaren 13an informazio saioa eginen da hautatutako irakasleekin. Saio horretan zehaztuko dira egutegia, ordutegia eta ikastaroaren bi faseen antolaketa.

Ikastaroaren fase estentsiboa, nahitaez egin beharrekoa, 2011ko irailean hasiko da "Euskara hobetzeko on-line ikastaroarekin". Informazioa emateko saioaren ondoren, ordu eta erdiko saio presentziala izanen da, non material digitala banatuko den eta behar diren jarraibideak emanen diren. Nahitaezkoa da bertaratzea.

Ikastaroaren fase trinkoa, lan lizentziarekin egin beharrekoa, 2012ko urtarrilaren 9tik 2012ko martxoaren 9ra bitartera eginen da, biak barne. Lizentzialdiko lehen eta azken egunak ikasgelako jarduerak ordezko irakaslearekin koordinatzeko erabiliko dira. Ikastaldian irakasleek Euskararen Irakaskuntzarako Baliabide Zentroaren eskola egutegia izanen dute.

Azken balorazioa egiteko saioarekin bukatuko da ikastaroa, aurrerago zehaztuko den egunean.

Euskararen Irakaskuntzarako Baliabide Zentroan (Uharte, Zubiarte kalea, 13) emanen dira eskolak.

Lan lizentziarekin egiten den prestakuntzaldi trinkoko eskola saioak goizeko 9:00etatik 14:30era emanen dira, 30 minutuko atsedenaldia tartean dela.

Eskolako Hizkuntza Plangintzaren Zerbitzuak, behar teknikoak direla eta, aldaketak egin ditzake eskolak emateko aurreikusitako orduen banaketan, egutegian eta ordutegian.

5.-Parte-hartzaileen eskubideak eta betebeharrak.

5.1. Parte-hartzearen eskaerak berarekin dakar ikastaroko bi faseetarako aurrez ikusi diren jarduera guztiak egiteko konpromisoa hartzea. Abenduaren 15erako fase estentsiboaren on-line ikastaroa egin gabe badu irakasleak, baja emanen zaio eta haren ordez beste bat sartuko da, ezarritako irizpideen arabera.

5.2. Hautatutako irakasleek ezin izanen dute parte hartu bestelako eskola edo prestakuntza jardueretan, baldin eta ikastaroaren jarduera presentzialetan egotea oztopatzen badute.

5.3. Ez da kilometrajerako laguntzarik emanen.

5.4. Baldintza, konpromiso eta betebehar hauek betetzen ez dituztenek ikastaroko parte-hartzailearen izaera galduko dute, ikastaroari dagokion egiaztagiria galduko dute eta Administrazioak behar diren neurriak hartuko ditu.

5.5. Ez da inolako eskubiderik izanen eritasuna, greba edo ezinbesteko arrazoiak direla-eta egiten diren hutsegiteak berreskuratzeko.

5.6. Jarduera bukatutakoan, bertaratze ziurtagiria emanen zaie hartutako konpromisoak bete dituzten parte-hartzaileei.

5.7. Parte-hartzaileren batek oposizioak gainditzen baditu, Freskatze ikastaroa egiteari uko egin beharko dio. Praktikaldia gainditu ondoren, Freskatze ikastaroa berriz egiteko eskaera egin dezake.

6.-Eskaerak tramitatzea.

Ikastaro hauetan parte hartzeko eskaerak (III. eranskineko eredua) Hezkuntza Departamentuko Erregistroan aurkeztuko dira edo, bestela, azaroaren 26ko 30/92 Legearen 38.4 artikuluak zehaztutako tokietan.

Eskaerak aurkezteko epea hogei egun naturalekoa izanen da, deialdi hau Nafarroako Aldizkari Ofizialean argitaratzen denetik hasita.

Eskabidearekin batera honako agiri hauek aurkeztuko dira:

-Zerbitzu orri eguneratua. Giza Baliabideen Zerbitzuak ofizioz erantsiko ditu orri horiek.

-Hezkuntza Departamentuak ziurtatutako hizkuntza ikastaroetan (euskararen gramatika eguneratzekoetan, itzulpen ikastaroetan edo hizkuntza berritzeko proiektuetan) parte hartu izanaren egiaztagirien fotokopiak.

-Euskararen Gaitasun Agiriaren (EGA) edo agiri baliokide baten fotokopia.

7.-Parte-hartzaileen hautaketa.

7.1. Birziklapenaren Jarraipen eta Hautapen Batzordea.

Batzorde honek parte-hartzaileak hautatuko ditu eta honako kide hauek izanen ditu: Eskolako Hizkuntza Plangintzaren Zerbitzuko zuzendaria, Euskara atalburua, Zerbitzuak Ikuskatzeko eta Ikuskapen Teknikorako Zerbitzuko zuzendaria edo bere ordez arituko dena, Giza Baliabideen Zerbitzuko zuzendaria edo bere ordez arituko dena, Ikastetxe ez-unibertsitarioetako Irakasleen Batzordeko kide bat, Euskarabideako Euskararen Garapenerako Zerbitzuko zuzendaria edo bere ordez arituko dena eta programa honen ardura duen Euskara Ataleko teknikaria, Batzordeko idazkari lanetan ere arituko dena.

"Zubiarte euskaltegia" Helduak Euskalduntzeko Ikastegi Publikoko zuzendariak eta Euskararen Irakaskuntzarako Baliabide Zentroko zuzendariak aholku emanen diote batzordeari, laneko lizentzia izanik, ikastaro hauek egin nahi dituzten langileak hautatzeko orduan: euskaraz ikasteko ikastaro trinkoak eta hizkuntza maila hobetzeko ikastaro trinkoa, hurrenez hurren.

7.2. Hautatzeko irizpideak.

Birziklapenaren Jarraipen eta Hautapen Batzordeak ikastetxe bakoitzeko 2 pertsona hautatuko ditu, gehienez ere. Irakasleak hautatzeko lehentasun irizpide hauek erabiliko dira, behean agertzen diren hurrenkera berean:

-Ikastaro hau lehenago egin ez dutenak.

-EGA agiriak edo baliokideak gaiturik, euskaraz irakasten urte gehien daramatenak.

-Berdinketarik izanez gero, lehentasuna izanen dute Hezkuntza Departamentuak ziurtatutako ikastaroetan (euskararen itzulpenari buruzkoetan, euskararen gramatika eguneratzekoetan edo hizkuntzaren berrikuntza proiektukoetan) prestakuntza ordu gehien dituztenak. Ez dira kontuan hartuko hizkuntzaren gaitasun agiriak edo ziurtagiriak eta behin-behineko hizkuntza gaikuntza eskuratzera bideratutako ikastaroak.

Atal honetan soilik baloratuko dira hezkuntza administrazioekin lankidetza hitzarmenak sinaturik dituzten administrazio publikoek, unibertsitateek edo irabazi-asmorik gabeko erakundeek ziurtaturiko jarduerak.

7.3. Hautatzeko prozedura.

Hautatzeko prozedura honako egintza hauei lotuko zaie:

-Birziklapenaren Jarraipen eta Hautapen Batzordearen bilera, onartuen behin-behineko zerrenda onesteko.

-Onartuen behin-behineko zerrenda Hezkuntza Departamentuaren iragarki-oholean, http://www.navarra.es/home_es/Servicios/ficha/3200/Curso-intensivo-de-perfeccionamiento-linguistico-en-euskara-con-licencia-laboral-parcial-Freskatze-ikastaroa- web-gunean eta EIBZren web-gunean (http://centros.educacion.navarra.es/eibz) argitaratzea.

-Onartuen behin-behineko zerrendari erreklamazioak aurkeztea.

-Birziklapenaren Jarraipen eta Hautapen Batzordearen bilera, erreklamazioak ebazteko.

-Onartuen behin betiko zerrenda Hezkuntza Departamentuaren iragarki-oholean, http://www.navarra.es/home_es/Servicios/ficha/3200/Curso-intensivo-de-perfeccionamiento-linguistico-en-euskara-con-licencia-laboral-parcial-Freskatze-ikastaroa- web-gunean eta EIBZren web-gunean (http://centros.educacion.navarra.es/eibz) argitaratzea.

Hautapen prozesua bukaturik, aurkeztutako merezimenduen kopia konpultsatuak aurkeztu beharko dituzte hautatutako izangaiek.

8.-Itxaron zerrenda.

Parte-hartzaileak hautatu ondoren, abenduaren 15era arte sor daitezkeen postu hutsak betetzeko itxaron zerrenda prestatuko da.

Euskara hobetzeko ikastaroak eta eguneratze didaktikorako ikastaroak.

1.-Xedea.

Prestakuntza eskaintzaren helburua da irakasleen prestakuntza beharrei erantzutea, bi arlo hauek ardatz hartuta: batetik, irakasleen euskarazko komunikazio eta hizkuntza gaitasunak hobetzea eta, bestetik, Euskal Hizkuntza eta Literaturaren arloko curriculumaren plangintza eta garapena egitea.

2.-Parte-hartzaileak.

Ikastaro hauek ez dute lan lizentziarik behar. Nafarroako ikastetxe publikoetan eta pribatuetan diharduten irakasle ez-unibertsitario EGAdunei edo agiri baliokidea dutenei eskaintzen zaizkie. Aldi baterako langileek ere har dezakete parte deialdi honetan, beren kontratuak indarra duen bitartean.

3.-Prestakuntza modalitateak.

Prestakuntza jarduerak modalitate hauetan eskainiko dira: ikastaroa (presentziala, on-line edo erdipresentziala), modulua, mintegia eta informazio saioa. Hala ere, ikastetxean berean hartu beharreko prestakuntzak laguntza berezia izanen du.

4.-Prestakuntza eskaintza.

Prestakuntza jarduerak honako atal hauen gainean antolatuko dira:

-Gramatika eguneratzea, eta euskara zuzen eta egoki erabiltzea.

-Irakaskuntzan aplikaturiko itzulpena.

-Euskalkiak.

-Euskal Hizkuntza eta Literatura arloa.

-Teknologia berriak, ikus-entzunezko baliabideak eta bestelako baliabide didaktikoak.

2011ko ekainean jarriko da jendaurrean prestakuntza eskaintza zehatza, Hezkuntza Departamentuaren eta EIBZren web orrien bidez.

5.-Argibideak eta kudeaketa.

Ebazpen hau Nafarroako Aldizkari Ofizialean argitaratu ondoren, ikastetxeek eta prestakuntza jardueretan parte hartzen dutenek egokitzat jotako ekarpenak eta iradokizunak egiten ahal dizkiote Eskolako Hizkuntza Plangintzaren Zerbitzuko Euskara Atalari.

Eskaintzaren behin betiko formatua ezarri ondoren, eskaintza hori Hezkuntza Departamentuak 2011-2012 ikasturterako prestatuko duen Irakasleen Prestakuntza Planean islatuko da.

2011ko ekainean, Eskolako Hizkuntza Plangintzaren Zerbitzuko Euskara Atalak prestakuntza jardueren gaineko informazio xehea bidaliko du ikastetxeetara eta esanen du jarduera horiek noiz eta non eginen diren eta haietan izena emateko epeak eta modua zein izanen diren.

2011ko abuztuaren bukaeran irekiko da izena emateko epea.

Behar den informazio guztia EIBZren web-gunean egonen da eskuragarri: http://centros.educacion.navarra.es/eibz.

II. ERANSKINA

Euskarazko ikastaroak egiteko bakarkako diru-laguntzetarako eskaera. 2011-2012 ikasturtea

Eskatzailea:

Lanpostua:

2011-2012 ikasturtean duen destinoa:

Lan-egoera:

Egindako ikastaroen datuak:

Asteko ordutegia:

................................., ......... 20...ko ...............aren .....(a).

(Eskatzailearen sinadura)

III. ERANSKINA

Euskara hobetzeko ikastaro trinkoa
lan lizentzia partzialarekin egiteko eskaera. (Freskatze ikastaroa)

Eskatzailea:

Deiturak:

Izena:

Jaioteguna:

NANa: ....................................... Langile erroldaren zk.:

Helbidea:

Herria: ............................................... PK:

Posta elektronikoa: ...................................................... Tel.:

Lanpostua:

[ ] Maisua/Maistra.

[ ] Bigarren Hezkuntzako irakaslea.

[ ] LHko irakaslea.

2010-2011 ikasturtean duen destinoa:

Ikastetxea:

Herria:

Etapa: .................................... Titulazioa:

Espezialitatea:

Lan egoera:

[ ] Behin betikoa.

[ ] Lan-kontratudun finkoa.

[ ] Praktiketako funtzionarioa.

[ ] Behin-behinekoa.

[ ] Eskatutako edo behartutako lekualdatzearen zain.

[ ] Lan-kontratuduna.

Gaurkotze gramatikaleko, itzulpeneko eta berrikuntzako jardueretan egiaztatutako orduak: ...............................

Zenbat urtez ari den euskaraz irakasten: ................

Birziklapen ikastaroak, lan lizentziarekin (zenbat hilabete): ............

EGA agiria edo baliokidea zein urtetan eskuratu zuen: ......................

Honen bidez Euskararen Irakaskuntzarako Baliabide Zentroan (EIBZ) euskara hobetzeko eginen den ikastaroan parte hartzea eskatzen dut.

Adierazten dut ikastaro hori egiteko ezarritako baldintzak ezagutu eta onartzen ditudala eta esandako datuak errealak eta egiazkoak direla.

Eta hala ager dadin eta behar diren ondorioak izan ditzan, sinatzen dut agiri hau.

...............................

Eskatzailearen sinadura

........................., ............ 20.....ko ...............aren .....(e)an.

Iragarkiaren kodea: F1100887