30. ALDIZKARIA - 2011ko otsailaren 14a

1. NAFARROAKO FORU KOMUNITATEA

1.2. AGINTARIAK ETA LANGILEAK

1.2.1. Kargu-uzteak, izendapenak eta bestelako egoerak

2437/2010 EBAZPENA, abenduaren 23koa, Osasunbidea-Nafarroako Osasun Zerbitzuko zuzendari kudeatzaileak emana, apirilaren 18ko 657/2008 Ebazpenaren bidez Laguntza Espezializatuko kudeaketa-zuzendariari egindako eskuordetza ezeztatzen duena eta Osasunbidea-Nafarroako Osasun Zerbitzuko Laguntza Espezializatuko zuzendariari eskourdetzen dizkiona 75.000 eurotik gorako esparru-akordioetan oinarritutako administrazio kontratuak esleitzeari buruzko eskumenak.

Horrelako kontratuak esleitzeko eskumena Osasunbidea-Nafarroako Osasun Zerbitzuko zuzendari kudeatzaileak dauka, Osasunbidea-Nafarroako Osasun Zerbitzuaren Estatutuak onetsi zituen uztailaren 3ko 45/2006 Foru Dekretuaren 11.1.j) artikulua aplikatuz. 75.000 eurotik gorako esparru-akordioak esleitzeko eskumena, gaur egun, Laguntza Espezializatuko Zuzendaritzako kudeaketa-zuzendariari dagokio, Osasunbidea-Nafarroako Osasun Zerbitzuko zuzendari kudeatzaileak apirilaren 18ko 657/2008 Ebazpenaren bidez egindako eskuordetzaren ondorioz. Orain, eskuordetza hori ezeztatzea proposatzen da Laguntza Espezializatuko zuzendariaren esku uzteko.

Osasunbidea-Nafarroako Osasun Zerbitzuaren Estatutuak onetsi zituen uztailaren 3ko 45/2006 Foru Dekretuaren 15.1 artikuluak xedatzen du zuzendari kudeatzaileak bere eskudantziak besteen esku uzten ahalko dituela, Nafarroako Foru Komunitateko Administrazioari buruzko abenduaren 3ko 15/2004 Foru Legean ezarritakoarekin bat. Bestalde, Nafarroako Foru Komunitatearen Administrazioari buruzko abenduaren 3ko 15/2004 Foru Legearen 36. artikuluak adierazten du Nafarroako Foru Komunitateko Administrazioko organoen berezko eskumenak maila bereko edo beheragoko beste organo batzuen esku uzten ahalko direla, hierarkian menpekoak ez badira ere. Prozedurari dagokionez, agindu horretan adierazita dago, eta eskuordetza egiten duen organoak onetsi behar du eta Nafarroako Aldizkari Ofizialean argitaratu.

Halaber, Nafarroako Foru Komunitateko Administrazioari buruzko abenduaren 3ko 15/2004 Foru Legearen 36.6 artikuluan xedaturikoarekin bat, eskuordetza baten bidez ematen diren administrazio ebazpen eta egintzetan inguruabar hori azaldu beharko da berariaz eta, ondorio guztietarako, eskuordetza egin duen organoak eman balitu bezala hartuko dira.

Araubide Juridikoaren Zerbitzuko buruaren txostena eta Antolaketa eta Administrazioko zuzendariaren txostena ikusita.

Uztailaren 3ko 45/2006 Foru Dekretuan emandako ahalmenak erabiliz,

EBATZI DUT:

1. 75.000 eurotik gorako esparru-akordio batean oinarritutako kontratuak esleitzeko, apirilaren 18ko 657/2008 Ebazpenaren bidez Laguntza Espezializatuko kudeaketa-zuzendariari egindako eskuordetza ezeztatzea.

2. Osasunbidea-Nafarroako Osasun Zerbitzuko Laguntza Espezializatuko zuzendariari eskourdetzea 75.000 eurotik gorako esparru-akordioetan oinarritutako administrazio kontratuak esleitzeari buruzko eskumenak.

3. Ebazpen hau Nafarroako Aldizkari Ofizialean argitaratzea.

4. Ebazpen hau jakinaraztea Laguntza Espezializatuko kudeaketa-zuzendariari, Laguntza Espezializatuko zuzendariari, Ogasun Departamentuak Osasunekoan duen kontu-hartzaile delegatuari, Administrazio eta Antolaketako zuzendariari eta Osasunbidea-Nafarroako Osasun Zerbitzuko Araubide Juridikoaren Zerbitzuari eta Osasun Departamentuko Idazkaritza Tekniko Nagusiari, behar diren ondorioak izan ditzan.

Iruñean, 2010eko abenduaren 23an.-Osasunbidea-Nafarroako Osasun Zerbitzuko zuzendari kudeatzailea, José Carlos Garde Celigueta.

Iragarkiaren kodea: F1100205