1. NAFARROAKO FORU KOMUNITATEA
1.7. BESTELAKOAK
97/2011 EBAZPENA, irailaren 22koa, Hezkuntzaren, Lanbide Heziketaren eta Unibertsitateen zuzendari nagusiak emana, Bigarren Hezkuntzako ikastetxe jakin batzuei baimena ematen diena hizkuntzak irakasteko Bigarren Hezkuntzako atzerriko hizkuntzen eta euskal hizkuntza eta literaturaren curriculumak Hizkuntzen Urrutiko Irakaskuntza Ofizialaren curriculumarekin bateratuz; betiere, NUHEO-Nafarroako Urrutiko Hizkuntza Eskola Ofizialaren koordinaziopean.
Hezkuntza Antolamenduaren eta Berrikuntzaren Zerbitzuko zuzendariak aldeko txostena aurkeztu du, Bigarren Hezkuntzako ikastetxe jakin batzuei baimena eman dakien hizkuntzak irakasteko Bigarren Hezkuntzako atzerriko hizkuntzen eta euskal hizkuntza eta literaturaren curriculumak Hizkuntzen Urrutiko Irakaskuntza Ofizialaren curriculumarekin bateratuz, NUHEO-Nafarroako Urrutiko Hizkuntza Eskola Ofizialaren koordinaziopean.
Kontuan harturik Hezkuntzari buruzko maiatzaren 3ko 2/2006 Lege Organikoaren 60.3 artikulua, martxoaren 19ko 22/2007 Foru Dekretua, ekainaren 2ko 58/2008 Foru Dekretua, azaroaren 16ko 394/1999 Foru Agindua eta azaroaren 15eko 339/1993 Foru Dekretua.
Nafarroako Foru Komunitateko Administrazioari buruzko abenduaren 3ko 15/2004 Foru Legearen 22.1 d) artikuluak ematen dizkidan ahalmenak erabiliz,
EBATZI DUT:
1. Atzerriko hizkuntzen curriculumak hizkuntzen urrutiko irakaskuntzarenarekin bateratuz emateko baimentzea Leitzako "Amazabal" Bigarren Hezkuntzako Institutuari, ingelesa emateko, Cintruenigoko "La Paz" Derrigorrezko Bigarren Hezkuntzako Institutuari, frantsesa emateko, eta Atarrabiako "Pedro de Atarrabia" Derrigorrezko Bigarren Hezkuntzako Institutuari, ingelesa eta frantsesa emateko, NUHEO-Nafarroako Urrutiko Hizkuntza Eskola Ofizialarekiko lankidetza programaren arabera, 2011-2012 ikasturtetik aurrera.
2. Baimena ematea Atarrabiako "Pedro de Atarrabia" Derrigorrezko Bigarren Hezkuntzako ikastetxeari euskara emateko 2011-2012 ikasturtetik aurrera, hizkuntza horren irakaskuntzan euskal hizkuntza eta literaturaren curriculuma hizkuntzen urrutiko irakaskuntzarenarekin bateratuz, NUHEOrekiko lankidetza programaren arabera.
3. Ebazpen honen 1. eta 2. puntuetan aipatu diren Bigarren Hezkuntzako ikastetxeek baimena izanen dute, beraz, dagozkien hizkuntzak irakasteko Bigarren Hezkuntzako atzerriko hizkuntzen eta euskal hizkuntza eta literaturaren curriculumak hizkuntzen urrutiko irakaskuntza ofizialekoarekin bateratuz, NUHEOk koordinaturik; betiere, NUHEOren antolaketa eta jarduna arautzeko jarraibideetan ikasturte bakoitzerako onesten diren arauetan finkatzen diren mailen arabera.
4. Baimendu diren Bigarren Hezkuntzako ikastetxeetako ikasleak borondatez sartuko dira programan, eta matrikula egin beharko dute bai Bigarren Hezkuntzako ikastetxean, bai NUHEOn ere. Ikasleen ebaluazioa desberdina izanen da ikasketen balio akademikoaren arabera: alde batetik, atzerriko hizkuntza eta/edo euskal hizkuntza eta literatura gainditzea Bigarren Hezkuntzako irakaskuntzan, bere ebaluazio prozesua izanen duena, eta beste aldetik, hala badagokio, NUHEOren agiria lortzea, dagokion hizkuntzan.
5. Programa honetan hasten diren ikasleei ikastetxeek bermatuko diete bertan segituko dutela, harik eta Hizkuntzen Irakaskuntza Espezializatuen ikasketak burutu arte, gai horri buruz indarra duen arautegia kontuan harturik.
6. Hezkuntza Departamentuak bukatutzat eman dezake ebazpen honen 1. eta 2. puntuetan aipatzen den baimena, ondoko kasu hauetan:
-Ikastetxeak arrazoibidez eskatuz gero. Horretarako, Hezkuntzako Ikuskapen Zerbitzuaren eta NUHEOren txostenak beharko dira.
-Baimena bukatutzat emateko moduko gorabeherak azalduz gero. Horretarako, NUHEOk egindako ebaluazioa hartuko da kontuan.
7. Ebazpen honen kontra gora jotzeko errekurtsoa aurkezten ahal da, Hezkuntza Departamentuko kontseilariari zuzendua, hilabeteko epean, argitaratu eta biharamunetik aitzina.
8. Ebazpen hau igortzea Hezkuntza Antolamenduaren eta Berrikuntzaren Zerbitzura, Hezkuntzako Ikuskapen Zerbitzura, Hizkuntzen eta Arte Ikasketen Zerbitzura, Giza Baliabideen Zerbitzura, Ikasketak Antolatzeko Atalera eta ukitutako zentroetara, behar diren ondorioak izan ditzan.
9. Ebazpen hau Nafarroako Aldizkari Ofizialean argitaratzea.
Iruñean, 2011ko irailaren 22an.-Hezkuntzaren, Lanbide Heziketaren eta Unibertsitateen zuzendari nagusia, David Herreros Sota.
Iragarkiaren kodea: F1117246
