1. NAFARROAKO FORU KOMUNITATEA
1.7. BESTELAKOAK
63E/2011 EBAZPENA, urriaren 5ekoa, Ingurumen Kalitatearen Zerbitzuko zuzendariak emana, Ingurumen ukipenetarako baimena ematen duena Sartaguda gasez hornituko duen adarraren proiekturako. Sustatzailea Gas Natural Navarra, S.A. da.
Xedea: Ebazpena. Erreferentzia: Espediente kodea: 0001 0015 2011 000053. Unitate kudeatzailea: Ingurumenaren eta Uraren Zuzendaritza Nagusia. Ingurumen Kalitatearen Zerbitzua. Ingurumenaren gaineko Eragina Aztertzeko Atala. González Tablas kalea, 9. 31005 Iruña. Telefonoa: 848 427625. Helbide elektronikoa: secevamb@cfnavarra.es.
Espedientea: Ingurumen ukipenetarako baimena.
Jarduera: Sartaguda gas naturalaz hornitzeko adarra. IBEHFL Erregelamenduaren eranskina: 2C-Ingurumen ukipenen baimenaren mende dauden jarduerak eta proiektuak. Herria: Sartaguda Udalerria: Sartaguda. Sustatzailea: Gas Navarra, S.A. Eskaeraren data: 2011-06-24.
2011ko ekainaren 24an Ingurumen Kalitatearen Zerbitzuan sartu zen goian aipatutako espedienteari dagokion Ingurumen ukipenetarako baimena lortzeko eskaera. Espedientea abenduaren 28ko 93/2006 Foru Dekretuaren 2C eranskineko I epigrafean sartua dago. Foru dekretu horrek Ingurumena Babesteko Esku-hartzeari buruzko martxoaren 22ko 4/2005 Foru Legea garatzeko Erregelamendua onetsi zuen.
Proiektuaren helburua da Sartaguda gas naturalaz hornitzea, eta horretarako bi adar eraikiko dira. Adar nagusia V-0 erpinetik V-31 erpinera, eta Endinava, S.A.ren adarra, V-1/0 erpineraino.
Adar nagusiaren trazadura Lodosako udalerrian hasten da, ERM-E02-040 estazioaren irteerako MPB kanalizazioan. Lotune horretatik aurrera, kanalizazioa Lodosa-Sartaguda NA-6221 errepidearen paretik joanen da, eskuinaldetik, Sartagudako norabidean, udalerriaren mugaraino. Luzera, guztira, 2.096 m-koa da. Sartagudan, trazadurak errepide horren ondotik segituko du, bi erreka gurutzatu, eta Sartagudako iparraldeko industrialdean sartuko da.
Endinava, S.A.ren adarra NA-6221 errepidea gurutzatu aurretixe hasten da, eta NA-6222 errepidearen ondotik joanen da, bideetan barna Endinava, S.A.ren jabetzako lurzatiraino. Adarra 2.073 metro luze da.
Bi adarren trazadura alor eta bideetan barna doa, eta gurutzatzen dituen bi erreketan (bigarrena handiagoa, Enmedio erreka) apenas dago bertako landaredi naturalik, beraz, ingurumenaren gaineko ukipen nabarmenik ez dela izanen iritzita, departamentu honetako Ingurumen Kalitatearen Zerbitzuak jarduketaren aldeko txostena eman du, zenbait baldintzarekin.
Abenduaren 28ko 93/2006 Foru Dekretuaren 36. artikuluak ezartzen du Ingurumen, Lurraldearen Antolamendu eta Etxebizitzako kontseilariak ebazpen arrazoitua emanen duela Ingurumen ukipenetarako baimena eman ala ukatzeari buruz.
Foru dekretu horren 31.2 artikuluak ezartzen du Ingurumen ukipenetarako baimenak lurzoru urbanizaezinean baimentzen ahal diren jardueretarakoa ere bilduko duela, eta horrek Lurraldearen Antolamenduari eta Hirigintzari buruzko abenduaren 20ko 35/2002 Foru Legearen 117. artikuluan ezarritako ondorioak izanen ditu.
Eskaera Sartagudako Udalari igorri zaio, 93/2006 Foru Dekretuaren 35. artikuluan xedatutakoarekin bat. Abuztuaren 11n erantzuna jaso da eta bertan adierazten da jarduketa bateragarria dela Sartagudako udal planeamenduarekin.
Espedientean dauden txostenak ikusirik eta Landa Garapeneko eta Ingurumeneko kontseilariak urriaren 10eko 426/2007 Foru Aginduaren bidez eman dizkidan eskumenak erabiliz,
EBATZI DUT:
1. Ingurumen ukipenetarako baimena ematea, zenbait baldintzarekin, Sartaguda gas naturalaz hornitzeko adarraren proiekturako; sustatzailea Gas Navarra, S.A. da
2. Baimena neurri zuzentzaile hauek betetzearen baldintzapean eman da:
-Zangak bete ondoren sobran gelditzen den lurra hondakindegi baimendu batera eramanen da edo, bestela, lurzatian berean hedatuko, eroanbidearen zortasun eremuaren barrenean, ondoko ingurunearekin bat egin dezan fisiografia aldetik.
-Enmedio errekaren gaineko ukipena ahalik eta txikiena izanen da, eta horretarako, lanerako eremua landaredi naturalik ez duen inguruan ezarriko da, ahal dela, lanek irauten duten bitartean behar bezala balizatuta. Errekaren beheko aldean dagoen milazkadian, proiektuak ukitutako eremuan, horrelako landaredirik gabeko lur-zerrenda bat dago.
-Erreketan, itxitako zangen gainean, erreka-ohearen legarrak lehengoratuko dira, ateratako lurretatik bereizirik gorde eta pilatuko baitira lanak hastean.
-Lanek ukitutako bi erreketako ezpondetan landaredia berrezarriko da, hidroereintza bi alditan erabiliz, azarotik otsailera bitarte, bertako belar espezieen hazi nahasketa batekin.
-Adar nagusiaren trazaduraren ondoan, V-24 erpinetik V-25 erpinera bitarte, han-hemenka dauden zumarren gaineko ukipenak handiagoak izan ez daitezen, adarrak eskuz inausiko dira.
-Lanetatik sortzen diren harriei, hormigoi hondarrei eta asfaltoari dagokienez, Eraikuntza eta eraispenetako hondakinen sorrera eta kudeaketa arautzen dituen otsailaren 1eko 105/2008 Errege Dekretuan ezarritakoa bete beharko da.
-Obrak amaitutakoan obrek ukitutako eremua garbitu beharko da.
3. Proiektuaren Ingurumen ukipenetarako baimena eskuratzeko ezinbestekoa da 3.000 euroko fidantza jartzea, baimendutako jarduerak kalterik sortzen badu haiek lehengoratu edo gutxituko direla bermatzeko.
4. Baimenak, gainera, Lurraldearen Antolamenduari eta Hirigintzari buruzko abenduaren 20ko 35/2002 Foru Legearen 117. artikuluan ezartzen diren ondorioak izanen ditu. Artikulu horretan, lurzoru urbanizaezinean egin behar diren jarduerak baimentzeko prozedura ezartzen da.
5. Ebazpen honek ez du administrazio bidea amaitzen, eta espedientean interesa dutenek, administrazio publikoek izan ezik, haren kontra gora jotzeko errekurtsoa jartzen ahalko dute, Nafarroako Gobernuari zuzendua, hilabeteko epean.
Administrazio publikoek zilegi dute administrazioarekiko auzi-errekurtsoa jartzea, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean. Horrek ez du alde batera uzten Nafarroako Gobernuan aldez aurreko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarririko moduan eta epean.
Epeak ebazpen hau jakinarazi eta biharamunetik hasita kontatuko dira.
6. Ebazpen hau Nafarroako Aldizkari Ofizialean argitaratzea.
7. Ebazpen hau Lurraldearen Antolamendu eta Hirigintza Zerbitzuari, Sartagudako Udalari eta interesdunari igortzea, behar diren ondorioak izan ditzan.
Iruñean, 2011ko urriaren 5ean.-Ingurumen Kalitatearen Zerbitzuko zuzendaria, Pedro Zuazo Onagoitia.
Iragarkiaren kodea: F1116418
