1. NAFARROAKO FORU KOMUNITATEA
1.7. BESTELAKOAK
1394/2011 EBAZPENA, irailaren 6koa, Ingurumenaren eta Uraren zuzendari nagusiak emana, Ingurumen baimen integratua ematen duena Iruñeko udal mugapean hondakin arriskutsuak eta ez-arriskutsuak kudeatzeko instalazio baterako. Titularra Servicios Ecológicos de Navarra, S.L. da.
Espedientea.
Espediente mota: Ingurumen baimen integratua.
Espedientearen kodea: 1134/06.
Aplikatu beharreko araua: Ingurumena Babesteko Esku-hartzeari buruzko 4/2005 Foru Legea.
Eranskina eta epigrafea: 2A - 14. 2.B eranskinean ageri ez diren hondakin arriskutsuak kudeatzeko eragiketak.
Jarduera: hondakin arriskutsuak eta ez-arriskutsuak kudeatzeko instalazioa.
Sustatzailea: Servicios Ecológicos de Navarra, S.L.
Kokalekua: Agustinos industrialdea, z.g.
Zentroaren zenbakia: 3120100288.
UTM koordenatuak (Huso 30N, Datum ED50): X = 608395; Y = 4743046.
Udalerria: Iruña.
Proiektua: Ingurumen baimen integratuaren eskaera.
Eskaeraren data: 2006ko abenduaren 29a.
2006ko abenduaren 29an, Ingurumen, Lurraldearen Antolamendu eta Etxebizitza Departamentuan Ingurumen baimen integratua eskatu zuen Servicios Ecológicos de Navarra, S.L. enpresak, Iruñeko udal mugapean duen industria instalaziorako.
Lehendik baden instalazio hori Ingurumena Babesteko Esku-hartzeari buruzko martxoaren 22ko 4/2005 Foru Legea garatzeko Erregelamenduaren 2A eranskineko 14. epigrafean jasota dago, hots, "2B eranskinean ageri ez diren hondakin arriskutsuak kudeatzeko eragiketak" izenekoan, eta horren ondorioz, Ingurumen baimen integratuaren araubidearen menpe dago. Erregelamendu hori abenduaren 28ko 93/2006 Foru Dekretuaren bidez onetsi zen.
Industria establezimendua ez dago ekainaren 16ko 1254/1999 Errege Dekretuaren aplikazio eremuan. Dekretu horrek istripu larriek sortzen dituzten arriskuak kontrolatzeko neurriak onetsi zituen, gai arriskutsuak tarteko diren kasuetarako.
Egin den tramitazio administratiboaren laburpena ebazpen honen V. eranskinean sartu da; aurkeztutako alegazioak, berriz, VI. eranskinean.
Ingurumenaren arloko eskumenak Ingurumenaren eta Uraren zuzendariari, Ingurumen Kalitatearen Zerbitzuko zuzendariari eta Biodibertsitatea Zaintzeko Zerbitzuko zuzendariari eskuordetzen dizkien urriaren 10eko 426/2007 Foru Aginduaren bidez eskuratu ditudan ahalmenak erabiliz,
EBATZI DUT:
1. Ingurumen baimen integratua ematea Iruñeko udal mugapean hondakin arriskutsuak eta ez-arriskutsuak kudeatzeko instalazio baterako. Titularra Servicios Ecológicos de Navarra, S.L. da.
2. Jarduera hori ingurumen baimen integratuaren eskaeraren oinarrizko proiektuan eta 1134/06 espediente administratiboko gainerako agirietan aipatzen diren baldintzei jarraikiz garatu beharko da, betiere ebazpen honen II., III. eta IV. eranskinetako neurriak betez.
3. Ingurumen baimen integratuak zortzi urteko indarraldia du. Iraungi baino gutxienez ere hamar hilabete lehenago, titularrak baimena berritzeko eskatu beharko du, Ingurumena Babesteko Esku-hartzeari buruzko martxoaren 22ko 4/2005 Foru Legea garatzen duen Erregelamenduaren 30. artikuluan xedatutakoarekin bat. Erregelamendu hori abenduaren 28ko 93/2006 Foru Dekretuak onetsi zuen.
4. Jarduera edonola ere aldatzeko, titularrak aldez aurretik Landa Garapen, Industria, Enplegu eta Ingurumen Departamentuari jakinarazi beharko dio. Arrazoiak emanda, adierazi beharko du aldaketa funtsezkoa, nabarmena edo garrantzirik gabea den ala ez, Ingurumena babesteko esku hartzeari buruzko martxoaren 22ko 4/2005 Foru Legea garatzeko Erregelamenduan xedatutakoarekin bat. Aipatutako erregelamendua abenduaren 28ko 93/2006 Foru Dekretuaren bidez onetsi zen.
5. Instalazioak hondakin arriskutsuen kudeatzaileen erregistroan duen inskripzioa mantentzea, 15G02201002881998 zenbakiarekin transferentzia zentro gisa, eta 15G01201002881998 zenbakiarekin erabiltzetik utzitako ibilgailuen eta erabilitako motelgailuen tratamendu zentro gisa. Kudeatzen ahalko dituen hondakin arriskutsuak eta kudeaketa baimendua Ingurumen baimen integratu honen IV. eranskinean jaso dira. Hondakin arriskutsuen kudeaketan egiten diren aldaketak jakinarazi egin beharko dira, erregistratzeko eta, bidezkoa bada, aipatutako IV. eranskinean sartzeko.
6. Instalazioak hondakin ez-arriskutsuen kudeatzaileen erregistroan duen inskripzioa mantentzea 15G04201002881999 zenbakiarekin, transferentzia zentro gisa, eta 15G05201002881999 zenbakiarekin, balioztatzeko tratamendurako zentro gisa. Kudeatzen ahalko dituen hondakin ez arriskutsuak eta kudeaketa baimendua Ingurumen baimen integratu honen IV. eranskinean jaso dira. Hondakinen kudeaketan egiten diren aldaketa guztiak jakinarazi egin behar dira, erregistratzeko eta, bidezkoa bada, lehen aipatutako IV. eranskinean sartzeko.
7. 2011ko irailaren 30a baino lehenago, titularrak irekitzeko baimena eskatu beharko du, Ingurumena babesteko esku-hartzeari buruzko martxoaren 22ko 4/2005 Foru Legea garatzeko Erregelamenduaren 40. artikuluan eta ebazpen honen II. eranskinean ezartzen diren baldintzetan xedatutakoarekin bat. Aipatutako erregelamendua abenduaren 28ko 93/2006 Foru Dekretuaren bidez onetsi zen.
8. Departamentu honek araudi sektorial aplikagarriaren ondorioz baimenaren xedeko jarduera edo instalaziorako emandako baimenak eta gainerako administrazio egintzak indarrik gabe uztea; betiere, ebazpen honetan haiei buruz espresuki egindako adierazpenik badago.
9. Ebazpen hau Nafarroako Aldizkari Ofizialean argitaratzea.
10. Ebazpen honek ez du administrazio bidea amaitzen eta espedientean interesa dutenek, administrazio publikoek izan ezik, haren kontra gora jotzeko errekurtsoa jartzen ahal dute, Nafarroako Gobernuari zuzendua, hilabeteko epean.
Administrazio publikoek zilegi dute administrazioarekiko auzi-errekurtsoa jartzea, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean. Horrek ez du alde batera uzten Nafarroako Gobernuan aldez aurreko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarririko moduan eta epean.
Epe horiek ebazpen honen jakinarazpena egin edo, bestela, Nafarroako Aldizkari Ofizialean argitaratu eta biharamunetik aurrera hasiko dira kontatzen.
11. Ebazpen hau jakinaraztea Servicios Ecológicos de Navarra, S.L.ri, Iruñeko Udalari, Ingurumen Kalitatearen Zerbitzuari eta Nafarroako Larrialdietako Agentziako Babes Zibilerako Zuzendaritzari, behar diren ondorioak izan ditzan.
Iruñean, 2011ko irailaren 6an.-Ingurumenaren eta Uraren zuzendari nagusia, Andrés Eciolaza Carballo.
Oharra: ebazpen honetan aipatzen diren eranskinak interesdunen eskura daude Ingurumenaren eta Uraren Zuzendaritza Nagusiaren bulegoetan (González Tablas, 9-behea; Iruña), Ingurumen Kalitatearen Zerbitzuan, eta Nafarroako Gobernuaren web atarian, hain zuzen ere Landa Garapen, Industria, Enplegu eta Ingurumen Departamentuaren sailean, "Ingurumen baimenak" kontsulten atalean.
Iragarkiaren kodea: F1115172