194. ALDIZKARIA - 2011ko irailaren 30a

1. NAFARROAKO FORU KOMUNITATEA

1.7. BESTELAKOAK

40E/2011 EBAZPENA, abuztuaren 9koa, Ingurumen Kalitatearen Zerbitzuko zuzendariak emana, baimena ematen duena, zenbait baldintzarekin, Burgiko udalerriko 1. poligonoko 44-A azpilurzatian, Mellua alderdian, borda zahar bat berritzeko, nekazaritzako makineriaren eta bestelako makineriaren biltegi gisa erabiltzeko. Sustatzailea Germán Reclusa Armendáriz da.

Xedea: Ebazpena. Erreferentzia: Espediente kodea: 0001-0015- 2011-000032. Unitate kudeatzailea: Ingurumenaren eta Uraren Zuzendaritza Nagusia. Ingurumen Kalitatearen Zerbitzua. Ingurumenaren gaineko Eragina Aztertzeko Atala. González Tablas kalea, 9. 31005 Iruña. Telefonoa: 848 427625. Helbide elektronikoa: secevamb@cfnavarra.es.

Espedientea: Ingurumen ukipenetarako baimena. Jarduera: Burgiko "Ramonen borda" zaharberritzea. IBEHFLaren eranskina: 2C-Ingurumen ukipenen baimenaren mende dauden jarduerak eta proiektuak. Herria: Burgi. Udalerria: Burgi. Poligonoa: 1. Lurzatia: 44. Sustatzailea: German Reclusa Armendariz. Eskaeraren data: 2011/03/15.

2011ko maiatzaren 21ean, espediente honen Ingurumen ukipenetarako baimena lortzeko eskaera sartu da Ingurumen Kalitatearen Zerbitzuan.

Espedientea abenduaren 28ko 93/2006 Foru Dekretuaren 2C eranskineko P epigrafean sartua dago. Beraz, Ingurumen ukipenetarako baimena behar du. Foru dekretu horrek Ingurumena babesteko esku-hartzeari buruzko martxoaren 22ko 4/2005 Foru Legea garatzeko Erregelamendua onetsi zuen.

Proposatzen da lanabesen eta erreminten biltegia/etxola eraikitzea, behe solairukoa, 6 m x 5 m-koa (30 m²), gaur egun erortzear dagoen borda zaharraren tokian.

Burgiko 1. poligonoko 44. lurzatia "Illongo Mendilerroa eta Burgiko Arroila" izeneko Batasunaren Intereseko Lekuan dago (BIL ES0000124). Mendebaldetik, "Erronkariarren Errege Altxonbidea" izeneko abelbidearekin egiten du muga.

Dokumentazioak "Ramonen borda zaharberritzeko memoria baloratua" jasoa du eta, 2011ko apirilaren 15ean, planoak eta argazkiak biltzen zituen eranskina aurkeztu zuen sustatzaileak.

Abenduaren 28ko 93/2006 Foru Dekretuaren 36. artikuluak ezartzen du Ingurumen, Lurraldearen Antolamendu eta Etxebizitzako kontseilariak ebazpen arrazoitua emanen duela Ingurumen ukipenetarako baimena eman ala ukatzeari buruz.

Foru dekretu horren 31.2 artikuluak ezartzen du Ingurumen ukipenetarako baimenak lurzoru urbanizaezinean baimentzen ahal diren jardueretarakoa ere bilduko duela, eta horrek Lurraldearen Antolamenduari eta Hirigintzari buruzko abenduaren 20ko 35/2002 Foru Legearen 117. artikuluan ezarritako ondorioak izanen ditu. Horren ondorioetarako, Lurraldearen Antolamendu eta Hirigintza Zerbitzuak proiektuaren aldeko txostena eman zuen 2011ko maiatzaren 23an, lurzoru urbanizaezinari dagokionez.

Eskaera Burgiko Udalari igorri zaio, 93/2006 Foru Dekretuaren 35. artikuluan xedatutakoari jarraikiz. 2011ko martxoaren 1eko data duen udal txostena jaso da, non adierazi baita jarduketa bateragarria dela hirigintza aldetik.

Espedientean dauden txostenak ikusirik eta Landa Garapeneko eta Ingurumeneko kontseilariak urriaren 10eko 426/2007 Foru Aginduaren bidez eman dizkidan eskumenak erabiliz,

EBATZI DUT:

1. Baimena ematea, zenbait baldintzarekin, Burgiko udalerriko 1. poligonoko 44-A azpilurzatian, Mellua alderdian, borda zahar bat berritzeko, nekazaritzako makineriaren eta bestelako makineriaren biltegi gisa erabiltzeko. Sustatzailea Germán Reclusa Armendáriz da.

2. Baimena neurri zuzentzaile hauek betetzearen baldintzapean eman da:

-Memoria baloratuak dioen moduan, ez da inolako aldaketarik eginen bordarako sarbideetan, bat baitatoz Erronkariarren Errege Altxonbidearekin, ez da aldatuko eremu horren egungo topografia eta ez da ukituko lurzatiko landaredia (larreak eta zuhaitzak). Zaharberritzea egiteko behar-beharrezkoa den eremuan soilik ukituko da landaredia (bordaren oinplanoa eta gutxi gorabehera 2 m zabal izanen den pasabidea bordaren inguruan). Zuhaitzen bat bota behar bada, horren berri emanen zaio Basozaintzari, zuhaitzak markatzeko.

-Obretarako sarbide gisa altxonbidea erabiltzeko, obrak hasi aurretik baimena eskatu beharko da, aldi baterako erabili ahal izateko, Plangintza eta Laguntza Atalean (Landa Garapen, Industria, Enplegu eta Ingurumen Departamentuan), ibilgailuen mota eta kopurua eta obren iraupena adieraziz eskabidean.

Hirigintza arlokoak:

-Proiektatu den "lanabesen borda/etxola" lurzatian garatzen diren jarduerei eta oihan erabilerei lotuta egonen da, eta ez da uste izan behar beste erabilera batzuetarako baimenik dagoenik.

-Eragin gutxien sortzen duten formak eta materialak erabiliko dira etxola eraikitzean, bai eta eraikina inguruan ongi integratzeko lagungarri diren koloreak ere. Hormetan eraikin zaharretik berreskuratutako harriak edo antzekoak erabiltzea gomendatzen da.

-Lurraldearen Antolamenduari eta Hirigintzari buruzko abenduaren 20ko 35/2002 Foru Legearen 112.2 artikuluak 3 m-ko zortasun eremua (kanpoaldeko ertzetik neurtuta) ezartzen du, berariazko araudian zortasun eremua mugatuta ez duten bide publiko eta intereseko ibilbideetarako. Proiektatu den borda/etxola altxonbidearen kanpoaldeko ertzetik hasita gutxienez ere 3 m-tara egin beharko da.

-Hirigintzako txostenean aipatutako zehaztapenak sartuko dira udal lizentziaren baldintza multzoan. Txosten hori Nasursa Sareak egin zuen Burgiko Udalarentzat (10/063 erref.), 2011ko martxoaren 1ean.

3. Proiektuaren Ingurumen ukipenetarako baimena eskuratzeko ezinbestekoa da 3.000 euroko fidantza jartzea, baimendutako jarduerak kalterik sortzen badu haiek lehengoratu edo gutxituko direla bermatzeko.

4. Baimenak, gainera, Lurraldearen Antolamenduari eta Hirigintzari buruzko abenduaren 20ko 35/2002 Foru Legearen 117. artikuluan ezartzen diren ondorioak izanen ditu. Artikulu horretan, lurzoru urbanizaezinean egin behar diren jarduerak baimentzeko prozedura ezartzen da.

5. Ebazpen honek ez du administrazio bidea amaitzen, eta espedientean interesa dutenek, administrazio publikoek izan ezik, haren kontra gora jotzeko errekurtsoa jartzen ahalko dute, Nafarroako Gobernuari zuzendua, hilabeteko epean.

Administrazio publikoek zilegi dute administrazioarekiko auzi-errekurtsoa jartzea, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean. Horrek ez du alde batera uzten Nafarroako Gobernuan aldez aurreko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarririko moduan eta epean.

Epeak ebazpen hau jakinarazi eta biharamunetik hasita kontatuko dira.

6. Ebazpen hau Nafarroako Aldizkari Ofizialean argitaratzea.

7. Ebazpen hau Lurraldearen Antolamendu eta Hirigintza Zerbitzuari, Burgiko Udalari eta interesdunari igortzea, behar diren ondorioak izan ditzan.

Iruñean, 2011ko abuztuaren 9an.-Ingurumen Kalitatearen Zerbitzuko zuzendaria, Pedro Zuazo Onagoitia.

Iragarkiaren kodea: F1115282