1. NAFARROAKO FORU KOMUNITATEA
1.7. BESTELAKOAK
802/2010 EBAZPENA, abenduaren 21ekoa, Ingurumen Kalitatearen Zerbitzuko zuzendariak emana, Ingurumen ukipenetarako baimena ematen duena 400 kVA-ko transformazio zentrora 13,2 kV-eko aireko-lurpeko linearen deribazioa egiteko proiekturako, Leringo (Nafarroa) udalerriko Baigorriana parajean ahateak gizentzeko abeltegi baterako. Iciar Echandi Istilart da sustatzailea.
Ingurumen Kalitatearen Zerbitzuan sartu da aipatutako espedientearen Ingurumen ukipenetarako baimena lortzeko dokumentazioa, Ingurumena Babesteko Esku-hartzeari buruzko martxoaren 22ko 4/2005 Foru Legea garatzeko Erregelamendua onesten duen abenduaren 28ko 93/2006 Foru Dekretuaren 2C eranskineko I) atalean sartuta baitago.
Foru dekretu horren 36. artikuluak ezartzen du Ingurumen, Lurraldearen Antolamenduko eta Etxebizitzako kontseilariak Ingurumen ukipenetarako baimena eman edo ukatzeko ebazpen arrazoitua emanen duela, eskaera aurkeztu eta lau hilabeteko epean.
Abenduaren 28ko 93/2006 Foru Dekretu horren 31.2 artikuluak ezartzen du Ingurumen ukipenetarako baimenak lurzoru urbanizaezinean baimentzen ahal diren jarduerena bilduko duela, eta horrek Lurraldearen Antolamenduari eta Hirigintzari buruzko abenduaren 20ko 35/2002 Foru Legearen 117. artikuluan ezarritako ondorioak izanen ditu.
Proiektuaren xedea da aireko-lurpeko linea elektriko bat eta transformazio zentro bat egitea Baigorriana parajean, ahateak gizentzeko abeltegi bat elektrizitatez hornitzeko. 13,2 KV-eko aireko linea berriak Casería de La Sardarako deribazioko aireko lineako 06 euskarrian du jatorria; tarte bat airekoa izanen da eta bestea lurpekoa. Aireko lineak 41 bat metro izanen ditu, eta bloke bakarreko zimentazioa duen metalezko euskarri bat izanen du. Euskarri hori linea berria ebakitzeko, babesteko eta aireko linea lurpeko bihurtzeko erabiliko da. Bestalde, lurpeko tarteak 690 metro izanen ditu, eta 60 cm zabaleko eta 150 cm sakoneko kanalizazio batean eginen da; hartan HEPR-Z1 12/20 kV eroalea jarriko da. 400 kVA-ko transformazio zentroa barnekoa izanen da, aurrefabrikatua.
Ingurumenaren gaineko Eragina Aztertzeko Atalak txosten batean adierazten duenez, proiektatutako linea elektrikoak estepako Hegaztien Kontserbaziorako Lehentasuneko Intereseko Baigorriana Eremua ukitzen du eta, hortaz, aplikatzekoa da, apirilaren 4ko 129/1991 Foru Dekretuaz gain, abuztuaren 29ko 1432/2008 Errege Dekretua. Errege dekretu horren bidez hegaztiak goi tentsioko linea elektrikoak jo eta elektrokutatzetik babesteko neurriak ezarri ziren. Errege dekretuaren arabera, pausalekuen eta eroale biluziaren arteko gutxieneko isolamendu-distantziak 1 m-koa izan behar du. Horretarako, beirazko isolatzaile gehiago dituzten lotzeko kate horizontalak instalatu behar dira, edo 66 kV-eko edo gehiagoko tentsioa duten linea elektrikoetarako compositezko kateak edo, bestela, lotzeko grapa isolatuz edo babestuz, material isolatzaileko estalki aurreformatuekin eta eroale biluziaren 0,50 metrorekin. Egiaztaturik dago hegaztiek pausatzeko erabiltzen dituztela luzagarriak. Hortaz, ez dira erabilgarriak gurutzeten eta eroaleen arteko distantzia handitzeko. Gainera, espezie handienen elektrokuzioak eragiten segitzen dute (kasu askotan, espezie horiek izaten dira mehatxatuenak).
Espedientean Lurraldearen Antolamendu eta Hirigintza Zerbitzuaren aldeko txostena ageri da.
Espedientean dauden txostenak ikusirik eta Landa Garapeneko eta Ingurumeneko kontseilariak urriaren 10eko 426/2007 Foru Aginduaren bidez eman dizkidan eskumenak erabiliz,
EBATZI DUT:
1. Ingurumen ukipenetarako baimena ematea 400 kVA-ko transformazio zentrora 13,2 kV-eko aireko-lurpeko linearen deribazioa egiteko proiekturako, Leringo (Nafarroa) udalerriko Baigorriana parajean ahateak gizentzeko abeltegi baterako. Iciar Echandi Istilart da sustatzailea.
2. Baimen hau emateko, baldintza hauek bete beharko dira:
-Elektrokutatzeko dituen arriskuak murrizteko, aireko linea lurpeko bihurtzeko euskarriko lotzeko isolatzaileen kate horizontalek 1 m-ko isolamendua eduki beharko dute gutxienez. Hori lortzeko, U70YB20P compositezko kateak erabil daitezke, oinarrizko proiektuan adierazi bezala, edo lotzeko grapa isolatuz edo babestuz, material isolatzaileko estalki aurreformatuekin eta eroale biluziaren 0,50 metrorekin, edo, bestela, beirazko edo compositezko isolatzaileen kate luzeagoak erabiliz (U70AB60). Abuztuaren 29ko 1432/2008 Errege Dekretuan ezarritako gutxieneko isolamendua, hau da 1 m-koa, ezin izanen da luzagarriak instalatuz lortu.
-Linearen bukaerako euskarrian elektrokuzio arriskua murrizte aldera, lineako eroaleak eta XS ebakigailuak lotzeko zubi lasaiak eta horiek eta tximistorratz autobalbulak eta terminalak lotzeko zubi lasaiak isolatu beharko dira, guztiz, goi tentsioko lanetarako eta hegaztiak babesteko material isolatzaile egokiaren bidez.
-Tximistorratz autobalbulak eta terminalak esekita jarriko dira edo, bestela, aurremoldeatutako BCAC ("Bushing Connection Animal Cover") estalkiekin edo antzekoekin babestuko dira.
-Obra bukatutakoan, ongi garbituko da eremua. Hondakin eta berrerabil ezin daitezkeen soberakin guztiak hondakindegi baimendu batera eramanen dira. Birziklatzen ahal diren soberakinak hondakinak tratatzeko zentro batera eramanen dira.
3. Baimenak, gainera, Lurraldearen Antolamenduari eta Hirigintzari buruzko abenduaren 20ko 35/2002 Foru Legearen 117. artikuluan (lurzoru urbanizaezinean egin behar diren jarduerak baimentzeko prozedurari buruzkoan) ezartzen diren ondorioak izanen ditu, baldintza honekin:
-Proiektua gauzatzean uki daitezkeen azpiegiturei eta zortasunei dagokienez, sustatzaileak, obrak gauzatzen hasi baino lehen, behar diren baimen guztiak eskuratuko ditu, kasuan kasuko gaian eskudun diren organoei eskatu eta gero.
4. Obrak hasi baino lehen, ezinbestekoa izanen da 3.000 euroko fidantza jartzea, baimendutako jarduerak kalterik sortzen badu, haiek konpondu edo murriztuko direla bermatzeko, Ingurumena Babesteko Esku-hartzeari buruzko martxoaren 22ko 4/2005 Foru Legearen 69. artikuluan ezarritakoari jarraikiz.
Fidantza jarri izanaren frogagiria eduki beharko da, lanek iraun bitartean ikuskatzaileei aurkeztu ahal izateko.
5. Ebazpen honek ez du administrazio bidea amaitzen eta espedientean interesa dutenek, administrazio publikoek izan ezik, haren kontra gora jotzeko errekurtsoa jartzen ahalko dute, Nafarroako Gobernuari zuzendua, hilabeteko epean.
Administrazio Publikoek zilegi dute administrazioarekiko auzi-errekurtsoa jartzea, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean. Horrek ez du galarazten Nafarroako Gobernuan aldez aurreko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean.
Epeak ebazpen hau jakinarazi eta biharamunetik hasita kontatuko dira.
6. Ebazpen hau Nafarroako Aldizkari Ofizialean argitaratzea.
7. Ebazpen hau Lurraldearen Antolamendu eta Hirigintza Zerbitzuari, Leringo Udalari eta sustatzaileari igortzea, behar diren ondorioak izan ditzan.
Iruñean, 2010eko abenduaren 21ean.-Ingurumen Kalitatearen Zerbitzuko zuzendaria, Pedro Zuazo Onagoitia.
Iragarkiaren kodea: F1021402
