1. NAFARROAKO FORU KOMUNITATEA
1.3. LURRALDEAREN ANTOLAMENDUA ETA HIRIGINTZA
119/2010 FORU AGINDUA, ekainaren 23koa, Lurraldearen Antolamenduko eta Etxebizitzako kontseilariak emana, Doneztebeko Udal Plana 1. banaketa eremuko 2. sektorean, Aparan alderdian, aldatzeko espedientea, José Fausto Ostolaza Elizondok sustatua, behin betiko onesten duena.
Doneztebeko Udalak idazpuruan azaltzen den espedientea aurkeztu du Lurraldearen Antolamendu eta Etxebizitza Departamentuan, behin betikoz onets dadin.
Ikusirik aurkeztutako agiriak eta Lurraldearen Antolamendu eta Hirigintza Zerbitzuaren txostena, bidezkoa da behin betiko onestea.
Lurraldearen Antolamendu eta Etxebizitza Departamentuaren egitura organikoa ezarri zuen irailaren 3ko 127/2007 Foru Dekretuaren bidez eskuratu ditudan ahalmenak erabiliz,
AGINDU DUT:
1. Behin betiko onestea Doneztebeko Udal Plana 1. banaketa eremuko 2. sektorean, Aparan alderdian, aldatzeko espedientea, José Fausto Ostolaza Elizondok sustatua.
2. Doneztebeko Udalari eskatzea sektore horretako plan partziala, urbanizazio proiektua eta birzatitze proiektua alda ditzala, Lurraldearen Antolamenduko Zerbitzuak 2010eko ekainaren 15ean egindako txostenaren 5.3 eta 5.4 ataletan adierazi bezala. Txostena espedienteari erantsi zaio. Plan partzialaren araudian behar diren neurriak jaso beharko dira eraikuntza proiektuetan sotoen estankotasuna bermatzeko, uholdeei aurre egiteko, eta zehaztu beharko da lurzatien salmenta kontratuetan eta eraikinaren liburuan sotoen estankotasuna bermatzen duten ezaugarri zehatzak jaso beharko direla.
3. Ubideratze planaren ukipen eremuan (ibaiaren bi bazterretan), ibai-ibilguko 100 metroko polizia-eremuaren barrenean, egin nahi diren obra guztietarako, Kantauriko Ur Konfederazioaren aurretiko baimena beharko da. Horretarako, plan partzialaren aldaketa eta urbanizazio proiektu zuzenduak erakunde horretan aurkeztuko dira.
4. Ubideratze Planeko obrak burutu arte eta uholde kasuetan pertsonen segurtasuna bermatu arte, udalak ez du sektore honetan aurreikusitako etxebizitzak lehenbiziko aldiz okupatzeko udal lizentziarik emanen.
5. Adieraztea foru agindu honek ez duela administrazio bidea amaitzen. Interesdunek, administrazio publikoek izan ezik, gora jotzeko errekurtsoa jartzen ahalko dute legezkotasuna kontrolatzea helburu duen egintza honen kontra, Nafarroako Gobernuari zuzendua, foru agindu hau jakinarazi eta biharamunetik edo, hala denean, Nafarroako Aldizkari Ofizialean argitaratu eta biharamunetik hilabeteko epean.
Halaber, onetsitako hirigintza araudiaren kontra administrazioarekiko auzi-errekurtsoa jar daiteke, Nafarroako Justizia Auzitegi Nagusiko Administrazioarekiko Auzien Salari zuzendua, edukia Nafarroako Aldizkari Ofizialean argitaratu eta bi hilabeteko epean, dagokion udalak eskaturik.
Administrazio Publikoek zilegi dute administrazioarekiko auzi-errekurtsoa jartzea, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean. Horrek ez du alde batera uzten Nafarroako Gobernuan aldez aurreko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean.
6. Foru agindu hau jakinaraztea Doneztebeko Udalari eta José Fausto Ostolaza Elizondo jaunari, eta Nafarroako Aldizkari Ofizialean argitaratzea, behar diren ondorioak izan ditzan.
Iruñean, 2010eko ekainaren 23an.-Lurraldearen Antolamenduko eta Etxebizitzako kontseilaria, Amelia Salanueva Murguialday.
Iragarkiaren kodea: F1011082
