Iragarkia

95. ALDIZKARIA - 2010eko abuztuaren 6a

1. NAFARROAKO FORU KOMUNITATEA

1.7. BESTELAKOAK

405/2010 FORU AGINDUA, ekainaren 15ekoa, Lehendakaritza, Justizia eta Barneko kontseilariak emana, Nafarroako Aldizkari Ofizialean argitaratuta, jendaurrean jartzen duena Nafarroako Jarduera Arriskutsuen Katalogoa onetsi eta Nafarroako Autobabes Planen Erregistroa sortzen duen foru dekretuaren proiektua.

Lehendakaritza, Justizia eta Barneko kontseilariaren martxoaren 25eko 135/2008 Foru Aginduaren bidez, Nafarroako Jarduera Arriskutsuen Katalagoa onetsi eta Nafarroako Autobabes Planen Erregistroa sortzen duen foru dekretuaren proiektua prestatzeko prozedura hasi zen.

Nafarroako Larrialdietako Agentziako Babes Zibilerako Zuzendaritzak aipatu foru dekretuaren proiektua jendaurrean jartzea proposatzen du, Nafarroako Aldizkari Ofizialean argitaratuta.

Nafarroako Gobernuari eta Lehendakariari buruzko abenduaren 3ko 14/2004 Foru Legearen 61. artikuluari jarraikiz, kontseilari eskudunak zilegi du erregelamenduzko arauen proiektuak jendaurrean jartzea, arauaren ezaugarriengatik egokia iruditzen bazaio.

Horrenbestez, Nafarroako Gobernuari eta Lehendakariari buruzko abenduaren 3ko 14/2004 Foru Legeak ematen dizkidan eskudantziak erabiliz,

AGINDU DUT:

1. Nafarroako Jarduera Arriskutsuen Katalagoa onetsi eta Nafarroako Autobabes Planen Erregistroa sortzen duen foru dekretuaren proiektua jendaurrean jartzea, Nafarroako Aldizkari Ofizialean argitaratuta. Foru agindu honen eraskinean azaltzen da proiektuaren testua.

2. Hilabeteko epea ematea, foru agindu hau Nafarroako Aldizkari Ofizialean argitaratu eta biharamunetik hasita, interesdunek egokiak iruditzen zaizkien alegazioak aurkez ditzaten Lehendakaritza, Justizia eta Barne Departamentuan.

Iruñean, 2010eko ekainaren 15ean.-Lehendakaritza, Justizia eta Barneko kontseilaria, Javier Caballero Martínez.

ERANSKINA

FORU DEKRETUAREN PROIEKTUA, Nafarroako Jarduera Arriskutsuen Katalagoa onetsi eta Nafarroako Autobabes Planen Erregistroa sortzen duena.

Nafarroako Babes Zibilari eta Larrialdien Kudeaketari buruzko uztailaren 1eko 8/2005 Foru Legearen 7. artikuluak pertsonei edo ondasunei arrisku larria sortzen ahal dieten jardueren katalogoa ezartzea aurreikusten du, baita jarduera horiek garatzen diren zentro, establezimendu, toki eta instalazioena ere.

Bestetik, larrialdi egoerak sortzen ahal dituzten jardueretarako zentro, establezimendu eta egoitzen autobabesari buruzko oinarrizko araua onesten duen martxoaren 23ko 393/2007 Errege Dekretuak (irailaren 5eko 1468/2008 Errege Dekretuak aldatua), bigarren xedapen gehigarrian, ahalmena ematen die autonomia erkidegoei, zeinek bere eskumenen eremuan eta autobabesari buruzko oinarrizko arauan gutxieneko gisa xedatutakoa garatuz, behar diren xedapenak emateko, arrisku kolektiboak sortzen dituzten edo haien ondorioz kaltetuak izan daitezkeen jardueren katalogoak ezar ditzaten, baita kasu bakoitzean autobabesteko aurrekisten diren betebeharrak ezartzeko ere.

Horiek horrela, Lehendakaritza, Justizia eta Barneko kontseilariak proposaturik, Nafarroako Kontseiluarekin ados egonda, eta Nafarroako Gobernuak .......(e)ko ..............aren ....(e)an egindako bilkuran hartutako erabakiarekin bat,

DEKRETATU DUT:

1. artikulua. Xedea.

Nafarroako Jarduera Arriskutsuen Katalogoa onetsi eta Nafarroako Autobabes Planen Erregistroa sortzea ditu xede foru dekretu honek, Nafarroako Babes Zibilari eta Larrialdien Kudeaketari buruzko uztailaren 1eko 8/2005 Foru Legearen 7. artikuluari jarraituz.

I. KAPITULUA

Nafarroako jarduera arriskutsuen katalogoa

2. artikulua. Egitura.

Nafarroako Jarduera Arriskutsuen Katalogoak bi atal ditu:

Jarduera arriskutsuak.

Instalazio arriskutsuak.

3. artikulua. Jarduera arriskutsuak.

1. Nafarroako Foru Komunitatearen lurraldean pertsonei edo ondasunei arrisku larria sortzen ahal dizkieten jarduerak sartzen dira Nafarroako Jarduera Arriskutsuen Katalogoan.

Jarduera horiek foru dekretu honen I. eranskinean azaltzen dira.

2. Barneko zuzendari nagusiaren ebazpenaren bidez, jarduera berriak sartzen ahal dira jarduera arriskutsuen atalean.

Jarduera katalogoan sartu aurretik, nahitaezkoa da jendaurrean jartzea hogei egun baliodunean, iragarkia Nafarroako Aldizkari Ofizialean agertzen denetik aurrera.

Betiere, katalogoan sartzeko ebazpena Nafarroako Aldizkari Ofizialean argitaratu beharko da, orok jakin dezan.

4. artikulua. Instalazio arriskutsuak.

Jarduera arriskutsuen atalean sartutako jarduerak zein zentro, establezimendu, toki eta instalaziotan garatzen diren, haiek osatuko dute instalazio arriskutsuen atala.

5. artikulua. Instalazio arriskutsuen titularren betebeharrak.

1. Nafarroako Jarduera Arriskutsuen Katalogoan sartutako zentro, establezimendu, instalazio eta tokien titularrek autobabes plana prestatu beharko dute, eta organo eskudunari igorri beharko diote jarduera baimendu dadin; gainera, arriskuak behar adina estaltzeko beharrezko aseguruak kontratatuko dituzte, suteena eta erantzukizun zibilekoa oro har, gutxienez ere.

2. Jarduera hasteko beharrezko lizentzia edo baimena eskuratzeko behar diren gainontzeko dokumentuei erantsiko zaie autobabes plana.

3. Onetsi aurretik, Lehendakaritza, Justizia eta Barne Departamentuaren aginduzko txostena emateko epea, Nafarroako Babes Zibilari eta Larrialdien Kudeaketari buruzko uztailaren 1eko 8/2005 Foru Legearen 15.3 artikuluan aipatzen dena, berrogeita bost egunekoa izanen da, bertan sartzen denetik. Epe horretan ez bada txostena egiten, autobabes planaren edukiarekiko adostasuna dagoela ulertuko da.

4. Aldi baterako jardueren eta/edo jarduera desmuntagarrien edo denboraldikoen kasuan, 30 egunekoa da aurreko lerroaldean txostena egiteko adierazi den epea, gehienez ere.

5. Autobabes planak prestatu, ezarri, mantendu, aldatu, berrikusi eta tramitatzeko, martxoaren 23ko 393/2007 Errege Dekretuan horren gainean ezarritakoa aplikatuko da, errege dekretu horretan onesten baita larrialdiko egoerak eragin ditzaketen jardueretan aritzen diren zentro, establezimendu eta tokien autobabesari buruzko oinarrizko araua.

6. Jardueren titularrek autobabes planean aurreikusitako simulakroen berri eman beharko diete babes zibileko organo eskudunei, 15 egun lehenagotik gutxienez.

II. KAPITULUA

Nafarroako autobabes planen erregistroa

6. artikulua. Erregistroa sortzea.

1. Nafarroako Autobabes Planen Erregistroa sortzen da Nafarroako Larrialdien Agentzia erakunde autonomoari atxikita, horrek izanen baititu haren ardura eta erantzukizuna.

2. Nafarroako Autobabes Planen Erregistroa publikoa da, eta autobabes planak jendaurrean jartzeko eta ezagutzeko tresna da.

7. artikulua. Nafarroako Autobabes Planen Erregistroaren xedea eta eremua.

1. Nafarroako Foru Komunitateko zentro, establezimendu eta tokien babes zibilerako garrantzitsuak diren autobabes planak inskribatzea du xede Nafarroako Autobabes Planen Erregistroak, haiek foru dekretu honen I. eranskinean aipatu larrialdi egoeretako bat sor dezaketen jardueretan aritzen direlako.

2. Nafarroako Autobabes Planen Erregistroak Nafarroako Foru Komunitatearen eremua hartuko du.

8. artikulua. Inskripzioa.

1. Autobabes planen erregistroa nahitaezkoa izanen da Nafarroako Jarduera Arriskutsuen Katalogoan sartutako jardueretarako, eta borondatezkoa titularrek hala hartzen dituztenetarako.

2. Foru dekretu honen II. eranskinean ezarritakoa da Nafarroako Autobabes Planen Erregistroan inskribatzeko idazpenaren gutxieneko edukia; hala ere, Lehendakaritza, Justizia eta Barneko kontseilariaren foru agindu baten bitartez eguneratu edo handitzen ahalko da.

3. Erregistroko inskripzioa ofizioz eginen da.

Jarduera hasitakoan, jardueraren titularrak se hilabete izanen ditu, gehienez ere, III. eranskineko ereduaren araberako autobabes plana ezarri izanaren ziurtagiria aurkezteko.

9. artikulua. Erregistroko datuak aldatzea.

Nafarroako Autobabes Planen Erregistroan azaltzen diren datuetan edozein aldaketa izanez gero, horren berri eman beharko zaio hari datuak aldatzeko eskabidearen bitartez; horretarako, II. eranskinean ezarritako eredua erabiltzen ahal da.

10. artikulua. Erregistroko datuetan sartzea.

Erregistroko datuetan sartzeko eskubidea Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legean ezarritakoaren arabera arautuko da.

11. artikulua. Datuen babesa.

Nafarroako Autobabes Planen Erregistroan biltzen diren datu pertsonalei buruz, Datu Pertsonalak Babesteari buruzko abenduaren 13ko 15/1999 Lege Organikoan xedatutakoari jarraituko zaio. Nafarroako Autobabes Planen Erregistroaren segurtasun maila oinarrizkoa izanen da.

Xedapen gehigarri bakarra.-Jarduerak berrikustea.

Lehendakaritza, Justizia eta Barne Departamentuak indarra hartu eta hiru urteren buruan berrikusiko du jarduera bakoitza zertan den Nafarroako Jarduera Arriskutsuen Katalogoan.

Xedapen iragankor bakarra.-Planen aurkezpena.

Foru dekretu honek indarra hartzen duenean jarduerarako lizentzia edo funtzionatzeko nahiz ustiatzeko baimena eskuratua duten I. eranskineko jarduerek zortzi hilabetean, gehienez ere, aurkeztu beharko diote autobabes plana jarduera baimentzeko organo eskudunari, foru dekretu hau Nafarroako Aldizkari Ofizialean argitaratu eta biharamunetik aurrera. 8.3 artikuluan finkatu da autobabes plana ezarri izanaren ziurtagiria aurkezteko epea.

Azken xedapenak

Azken xedapenetan lehena.-Arauen garapena.

Ahalmena ematen zaio Lehendakaritza, Justizia eta Barneko kontseilariari foru dekretu hau garatzeko beharrezkoak diren xedapenak eman ditzan.

Azken xedapenetan bigarrena.-Toki entitateetako jarduera arriskutsuen katalogoak.

Toki entitateek, beren eskumenen eremuan eta Autobabesari buruzko Oinarrizko Arauan (martxoaren 23ko 393/2007 Errege Dekretuak onetsia) gutxieneko gisa xedatutakoa garatuz, behar diren xedapenak eman ditzakete arrisku kolektiboak sortzen dituzten edo haien ondorioz kaltetuak izaten ahal diren jardueren katalogoak ezartzeko, baita kasu bakoitzerako aurreikusten diren autobabeserako betebeharrak ezartzeko ere, eta nahiz foru dekretu honen I. eranskinean sartu gabeko jarduerak garatu, haietara ere zabaltzen ahal dituzte, baita haiek gauzatzen diren zentro, establezimendu, gune, instalazio edo tokietara ere.

Azken xedapenetan hirugarrena.-Ordezkotasuna.

Foru dekretu honetan araututa ez dagoen hartan, martxoaren 23ko 393/2007 Errege Dekretuan ezarritakoari jarraituko zaio, larrialdi egoerak sor ditzaketen jardueretan aritzen diren zentro, establezimendu edo tokien autobabesari buruzko oinarrizko araua onesten baitu.

Azken xedapenetan laugarrena.-Indarra hartzea.

Foru dekretu honek Nafarroako Aldizkari Ofizialean argitaratu eta biharamunean hartuko du indarra.

Iruñean, .......(e)ko ...........ren ....(e)an.-Lehendakaritza, Justizia eta Barneko kontseilaria, Javier Caballero Martínez.

I. ERANSKINA

Nafarroako jarduera arriskutsuen katalogoa

1.-Industriako, biltegiko eta ikerketako jarduerak.

-Uztailaren 16ko 1254/1999 Errege Dekretuaren 1. eranskineko 1. eta 2. zatietako 2. zutabean zehaztutako substantzia arriskutsuen %60 edo gehiago dituzten establezimenduak. Errege dekretu horretan (uztailaren 29ko 948/2005 Errege Dekretuak aldatua) substantzia arriskutsuek eragindako istripu larriei lotutako arriskuak kontrolatzeko neurriak onetsi ziren.

-Produktu kimikoak biltegian gordetzen dituzten jarduerak, adierazten diren produktu kimikoak biltegian gordetzeko erregelamenduaren jarraibide tekniko osagarriek arautuak, inguruabar hauetan:

• ITC-APQ-1 200 m3-tik gorako edukiera.
• ITC-APQ-2 Tona batetik gorako edukiera.
• ITC-APQ-3 4 tonatik gorako edukiera.
• ITC-APQ-4 3 tonatik gorako edukiera.
• ITC-APQ-5 Biltegian gordetakoaren kategoria 4 edo 5.
• ITC-APQ-6 500 m3-tik gorako edukiera.
• ITC-APQ-7 200 m3-tik gorako edukiera.
• ITC-APQ-8 200 tonatik gorako edukiera.

-Lehergaien erregelamenduko 10. jarraibide tekniko osagarriak (istripu larriei aurrea hartzeari buruzkoa) arautzen dituen establezimenduak.

-Industriako edo biltegiko jarduerak, 8. arrisku intrintseko gisa sailkatuak, industriako establezimenduen suteen kontrako segurtasunerako erregelamendua onesten duen abenduaren 3ko 2267/2004 Errege Dekretua aplikatuta.

-Bigarren eta hirugarren multzoko likido hozgarriak dituzten hozkailu instalazioak, hozkailu planta eta instalazioen segurtasunerako erregelamenduaren arabera, 3 tonatik gorako kantitateak erabiltzen direnean.

-Petrolio instalazioen erregelamenduko IP02, IP03 eta IP04 jarraibide tekniko osagarriek araututako instalazioak dituzten establezimenduak, 500 m³-tik gorakoak.

-Hondakin bereziak kudeatzen dituzten jarduerak.

-Meategietako segurtasunari buruzko oinarrizko arauen erregelamendu orokorrak (apirilaren 2ko 863/1985 Errege Dekretuak onetsia) eta haren jarraibide tekniko osagarriek araututako meatzaritzako ustiategiak.

-Genetikoki aldatutako organismoen erabilera konfinatuko instalazioak, 3. motakoak (arrisku moderatua) eta 4. motakoak (arrisku handia), urtarrilaren 30eko 178/2004 Errege Dekretuaren arabera.

-3. eta 4. multzoetako agente biologikoak dituzten instalazioak, maiatzaren 12ko 664/1997 Errege Dekretuan zehaztutakoaren arabera.

2.-Garraioko azpiegiturak.

-Aireportuak, uztailaren 7ko 21/2003 Errege Dekretuak arautuak.

-Errepideko tunelak, 500 metrokoak edo luzeagoak.

-Lurreko garraioko geltoki edo trukatokiak, 1.500 lagunekoak edo gehiagokoak.

-Autobideak eta autobiak.

-Salgai arriskutsuen garraiorako aparkalekuen eremuak.

3.-Energiari lotutako jarduera eta azpiegiturak.

-A eta B kategoriako uharka eta urtegiak.

-Erradioaktibitateko instalazioak.

-Elektrizitatea ekoizten duten instalazioak, 300 MW-eko edo gehiagoko potentzia izendatukoak.

-Goi tentsioko energia elektrikoa sortzeko instalazioak eta hura eraldatzekoak.

4.-Ikuskizun publikoak eta aisiakoak.

-Ikuskizun publikoei eta josteta jarduerei buruzko araudiaren mendeko toki, barruti eta instalazioak, haiek 2.000 laguneko edo gehiagoko edukiera duten toki itxietan egiten direnean, edo 28 metroko edo gehiagoko ebakuazio altuera duten tokietan.

-Ikuskizun publikoei eta josteta jarduerei buruzko araudiaren mendeko toki, barruti eta instalazioak, haiek desmuntatzen ahal diren instalazio itxietan edo denboraldikoetan egiten direnean, 2.500 lagunetik gorako edukiera dutela.

-Ikuskizun publikoei eta josteta jarduerei buruzko araudiaren mendeko toki, barruti eta instalazioak, haiek aire zabalean egiten direnean, 10.000 laguneko edukiera edo handiagoa dutela.

5.-Osasun arloko jarduerak.

-Ospitalizazioko eta/edo kirurgia tratamenduko osasun establezimenduak, 200 ohe edo gehiago dituztela.

-Osasun arloko edozein establezimendu, ebakuazio altuera 28 metrotik gorakoa bada edo 2.000 laguneko edo gehiagoko okupazioa badu.

6.-Irakaskuntzako jarduerak.

-Urritu fisiko edo psikikoendako irakaskuntzako establezimenduak, edo ebakuatzeko beren kasa ezin baliatu direnentzakoak.

-Irakaskuntzako edozein establezimendu, ebakuazio altuera 28 metrokoa edo handiagoa bada edo 2.000 laguneko edo gehiagoko okupazioa badu.

7.-Egoitza publikoetako jarduerak.

-Zahar, urritu fisiko edo psikikoentzako egoitzak edo eguneko zentroak diren establezimenduak, edo haien ohiko okupatzaileak ebakuazioa beren kasa ezin egin dutenak badira; betiere, 100 lagun edo gehiago izanik.

-Edozein egoitza publiko, ebakuazio altuera 28 metrokoa edo handiagoa bada edo 2.000 laguneko edo gehiagoko okupazioa badu.

8.-Beste jarduera batzuk.

-Merkataritzako jarduerak, administraziokoak, zerbitzuen prestaziokoak edo korporatiboak, edozein eratakoak, dituzten eraikinak, ebakuazio altuera 28 metrokoa edo handiagoa bada edo 2.000 laguneko edo gehiagoko okupazioa badu.

-Aldi baterako edo denboraldiko instalazio itxiak, 2.500 laguneko edukiera edo handiagoa dutenak.

-2.000 laguneko edukiera edo handiagoa duten kanpinak.

-Aire zabalean egiten diren jarduera korporatiboak, 10.000 lagun edo gehiago biltzen dituztela.

II. ERANSKINA

Nafarroako autobabes planen erregistroko datuak inskribatu
edo aldatzeko eskabidea

Datu orokorrak

Egiturazko datuak

Inguruneari buruzko datuak

Sarbideak

Arriskuguneak eta elementu kaltekorrak

III. ERANSKINA

Autobabes plana ezarri izanaren ziurtagiria

Establezimenduaren datuak (zentroa edo tokia).

Izena:

Helbide osoa:

Jarduera edo erabilera:

Telefonoa:

Faxa:

Helbide elektronikoa:

Jardueraren titularraren datuak, edo haren legezko ordezkariarenak.

Izena:

NANa:

Helbide osoa:

Telefonoa:

Faxa:

Helbide elektronikoa:

ZIURTATZEN DUT: aipatu establezimenduaren (zentroa edo tokia) autobabes plana, ...................-k ......................... egunean onetsia, osorik ezarri dela plan horrek jasotako moduan, jarduera arriskutsuen katalogoa onesten duen ............... Foru Dekretuan ezarritako irizpideei jarraituz.

................................. (e)n, ......... (e)ko ............. aren ...... (e)an.

(tokia eta eguna)

Sinatua: ..................................................................................

(Jardueraren titularra, edo haren legezko ordezkaria)

NAFARROAKO LARRIALDIETAKO AGENTZIA.

Iragarkiaren kodea: F1010665