Iragarkia

92. ALDIZKARIA - 2010eko uztailaren 30a

1. NAFARROAKO FORU KOMUNITATEA

1.5. ESTATUTUAK ETA LAN HITZARMEN KOLEKTIBOAK

722/2010 EBAZPENA, ekainaren 11koa, Arriskuen Prebentziorako eta Lanaren zuzendari nagusiak emana, Leitzako "Sarriopapel y Celulosa, S.A." enpresaren lan hitzarmen kolektiboaren testua erregistratu eta Nafarroako Aldizkari Ofizialean argitaratzea erabakitzen duena (espediente zenbakia: 40/2010).

Departamentu honetan 2010eko maiatzaren 21ean sartu da "Sarriopapel y Celulosa, S.A.'' enpresaren lan hitzarmen kolektiboaren testua, 77 artikuluz, azken xedapen batez eta 15 eranskinez (2010eko ordainsarien taula barne) osatua, enpresaren ordezkaritzak eta enpresako batzordearen zati batek (LAB) 2010eko maiatzaren 7an izenpetu eta onetsia.

Estatuaren lan arloko eginkizunak Nafarroako Foru Komunitateari eskualdatzeko apirilaren 11ko 937/1986 Errege Dekretuan ezarritakoaren arabera, Berrikuntza, Enpresa eta Enplegu Departamentuak du lan hitzarmen kolektiboak erregistratu, gorde eta argitaratzeko eskumena. Eginkizun horiek martxoaren 24ko 1/1995 Legegintzako Errege Dekretuaren 90. artikuluan ezarrita daude. Horiek horrela, kontuan harturik lan hitzarmen kolektiboen erregistro eta gordailuei buruzko maiatzaren 22ko 1040/1981 Errege Dekretuan ezarritakoa.

Adierazitakoarekin bat eta Nafarroako Foru Komunitateko Administrazioari buruzko abenduaren 3ko 15/2004 Foru Legearen 22.1 artikuluak ematen dizkidan eskudantziak erabiliz,

EBATZI DUT:

1. Leitzako "Sarriopapel y Celulosa, S.A." enpresaren lan hitzarmen kolektiboa erregistratzea (kodea: 3108142) Lan Hitzarmen eta Akordio Kolektiboak Erregistratu eta Gordetzeko Bulegoan horretarako bereziki prestaturik dagoen liburuan, eta bertako administrazio unitatean testua eta dokumentazioa gordetzea.

2. Ebazpen hau negoziazio batzordeari jakinaraztea, eta adieraztea ebazpenak ez duela administrazio bidea amaitzen eta haren aurka gora jotzeko errekurtsoa jartzen ahal dela, Berrikuntza, Enpresa eta Enplegu Departamentuko kontseilariari zuzendua, jakinarazi eta biharamunetik hilabeteko epean.

3. Ebazpen hau Nafarroako Aldizkari Ofizialean argitaratzea, orok jakin dezan.

Iruñean, 2010eko ekainaren 11n.-Arriskuen Prebentziorako eta Lanaren zuzendari nagusia, Imelda Lorea Echavarren.

SARRIÓPAPEL Y CELULOSA, S.A. LEITZAKO LANTEGIAREN 2010EKO ENPRESA HITZARMEN KOLEKTIBOA

I. KAPITULUA

Xedapen orokorrak

1. artikulua. Eremu funtzionala.

Enpresako hitzarmen kolektibo hau nahitaez bete beharko da Leitzako (Nafarroa) SARRIÓPAPEL Y CELULOSA, S.A. lantegian.

2. artikulua. Langile eremua.

Enpresako hitzarmen kolektibo honek 1. artikuluan adierazitako lantegiko plantillako langileen baldintza sozioekonomikoak arautzen ditu.

Zuzendariak, zuzendariordeak eta teknikari buruak mozkinetako parte-hartzea, aparteko eskersariak eta ordainsariak izeneko artikuluen aplikaziotik baztertuta daude.

3. artikulua. Iraunaldia.

Enpresako hitzarmen kolektibo honek urtebeteko iraunaldia izanen du. 2010eko urtarrilaren 1ean hartuko du indarra ondorio guztiekin, eta 2010eko abenduaren 31n bukatuko da.

2010eko azaroaren 1etik aurrera iragarriko da bere amaiera, besterik gabe, eta egun horretatik aurrera hasten ahal dira ordezko hitzarmen kolektiborako negoziazioak.

II. KAPITULUA

Lanaren antolaketa

4. artikulua. Lanaren antolaketa.

Enpresako zuzendaritzari dagokio lana antolatzeko ahalmena. Hitzarmen honetako arauei jarraituz erabiliko du ahalmen hori, une bakoitzean indarra duten xedapen orokorrak errespetatuta.

III. KAPITULUA

Lanaren erregimena

5. artikulua. Lanaldia.

1. Enpresaren ekoizpenaldia langileen lanalditik aparte da.

2. Langile bakoitzaren urteko lanaldia gehienez ere 1.704 lanordukoa da 2010. urtean, lanaldia zatitua edo jarraitua izan.

Enpresako zuzendaritzak artikulu honetan finkatutako lanaldia betetzeko moduan antolatuko du lana, une bakoitzean indarra duen araudia errespetatuta.

6. artikulua. "Non stop" lan erregimena (5 txanda).

a) Ordainsariak.

Erregimen honetan aritzen diren langileek 1. eranskinean jasotako diru-kopuruak eta igoerak jasoko dituzte.

Langilearen zuzeneko ahaide baten (andrea, gurasoak, seme-alabak edo anai-arrebak) heriotza, ebakuntza edo presako ospitaleratzea, seme-alaben jaiotza edo langilearen beraren ezkontza dela-eta larunbat, igande edo jaiegun batean lanera agertzen ez bada, ez da jaiegunaren zenbatekoa kenduko, baina ez zaio ordezkoari ordainduko.

Lan egindako igande edo jaiegun bat kendu eta ordaintzeko, 2009ko zenbatekoari tauletan jasotako portzentaje bera gehituko zaio.

59. artikuluan itundutakoari buruz, gaixotasun baten ondoriozko aldi baterako ezintasunaren kasuan, bajako 14. egunetik aurrera sorraraziko da Non Stopeko hilabeteko zenbatekoa, eta gaixoa ordezten duten langileek jasoko dute zenbateko hori lehen 13 egunetan.

Eskolako laguntzaren ondorioetako, langileak "Non Stop" dela-eta jasotakoa ez da kontuan hartuko baremoa zehazteko.

b) Geldialdi-egunak.

Non Stop sistema ezarrita dagoen lanpostuetan, honako hauek geldialdi-egunak izanen dira: urtarrilaren 1a, Pazko eguna, maiatzaren 1a, abuztuaren 11, abenduaren 25a eta abenduaren 24a eta 31, 14:00etatik aurrera.

Geldialdi-egun horietan Enpresak "gutxieneko zerbitzuetarako" ahalik eta talde murritzena mantenduko du, produkzioari berriro ekiteko ezinbestekoak diren makinek modu egokian funtzionatzen jarrai dezaten.

Geldialdi-egun horietarako eratutako langileek Non Stop erregimenaren eguneko plusa jasoko dute, gehi jaieguneko aparteko 8 orduren zenbatekoa.

Abenduaren 24ko eta 31ko gaueko txanda-aldaketetan lan egiten dutenek eta abenduaren 25eko eta urtarrilaren 1eko goizeko txanda-aldaketan lan egiten dutenek Non Stop erregimenaren eguneko plusa jasoko dute, gehi jaieguneko aparteko 12 orduren zenbatekoa.

c) Non Stop ezartzea eta kentzea.

Atal edo makina batean Non Stop erregimenean lan egiten ez bada eta enpresak bertan sistema hori aplikatzeko asmoa baldin badu, gutxienez ere asmo hori bete baino 30 egun lehenago jakinaraziko zaie eragindako langileei eta beren ordezkariei.

Jakinarazpen hori egiten den aldi berean, langileen legezko ordezkariei kontsulta egiteko gehienez ere 15 egun iraungo duen aldia hasiko da. Kontsulta aldi hori oporrei eta zikloen programazioari buruzkoa izan beharko da, eta gutxienez 3 zikloko aldia bermatuko da. Aldi hori 105 egun naturalekoa izanen da.

Kontsulta aldia amaitu ondoren enpresak langileei aldaketari buruzko erabakia jakinaraziko die.

Langileen interesak (sistemari heltzea) eta enpresarenak (produkzio-jarduerari eustea) uztartzeko helburuz, irizpide hauek ezarri dira:

-Adierazitako makinako langileak.

-Makinako antzeko langileak.

Hori guztia langileek enpresan duten antzinatasunaren arabera, eta produkzio-jarduera ziurtatze aldera.

Hutsik dauden lanpostuak Non Stop erregimenean banan-banan sartzeko, irizpide berberak aplikatuko dira.

Zuzendaritzak lan sistema hori bertan behera utzi edo kenduko du erabakitzen diren makina eta instalazioetatik, lan baldintzetako funtsezko aldaketak egiteko eskatzen diren legezko betebeharrak ematen direnean. Makina bakoitzean antzinatasunik handiena daukaten langileek makina horietan jarraitzeko lehentasuna izanen dute.

Sistema horri uko egiteko aukera emanen zaio hala nahi duenari, baldin eta ordezkoa izanen duela bermatuta badago, dela behar adinako langileak daudelako, dela beharrezko kualifikazioa daukaten langileak daudelako.

d) Oporrak.

"Non Stop" lan-sistemari atxikitako langileen oporren erregimena ondorio horretarako egindako egutegi batean programatuko da. Opor horiek taldeen edo txanda aldaketen arabera hartuko dira, ekainetik urrira, biak barne.

Hala eta guztiz ere, langileen ordezkariek oporretarako beste edozein egutegi proposatzen ahalko dute, baldin eta guztiz programatuta badaude, eta programatutako oporraldi bakoitzean dauden bost talde edo txanda aldaketatik bakarra oporretan badago.

Zuzendaritzak langileei beren urteko oporraldia nahi duten bezain eroso hartzea utziko die, betiere lanpostu bereko bost langileko taldearen barrenean, baldin eta kasu horretan langileek hitza ematen badute instalazioak etengabe artatuko dituztela eta oporrak hartuz gero aparteko orduak egin eta ordaindu behar ez badira edo enpresari kosturik eragiten ez bazaio. Kontramaisuari aldez aurretik behar den denboraz jakinarazi beharko zaio.

e) Lantokiko lanak.

"Lantokiko lanak" izenekoak, itundutako urteko lanaldia osatzeko ordezpen lanak, urteko azken hiruhilekoan programatuko dira (urrian, azaroan eta abenduan).

"Lantokiko lanak" urteko azken hiruhilekoan programatzen badira ere, lan horiek urtearen hasieratik amaierara arte egin ahal izanen dira. Hortaz, norberak urtean "lantokiko lanak" egin dituen egun guztiak urrian, azaroan eta abenduan egin beharreko egunen konturakoak izanen dira.

"Lantokiko lanak" astelehenetik ostiralera eginen dira Non Stop erregimenaren barrenean.

Sistema eraginkorra izan dadin, langileek lanera ez joateak, aurreikusitakoak zein ustekabekoak, behar beste denbora lehenago jakinarazteko hitza eman dute; horrenbestez, txandako kontramaisuari prozedurarik azkarrenaren bitartez jakinaraziko dizkiote.

7. artikulua. Oporrak.

Hitzarmen kolektibo honen eraginpeko langile guztiek 30 egun naturaleko opor ordainduak izanen dituzte. Egun horietatik 26 gutxienez lanegunak izanen dira; nagusiki, udaldian hartuko dira, langileen artean txandaka, baldin eta enpresak bere produkzio-jarduerak eteten ez baditu.

Lanegunak dira Nafarroako Foru Komunitatearen urteko egutegi ofizialean hala agertzen direnak.

Urtean zehar lanean hasi edo lana uzten duen langileak eskubidea du oporren zati proportzionala izateko, lan egindako hilabeteen arabera. Hilabete osotzat joko da hilabetearen zatia.

Oporraldiaren hasieran langilea lan istripu edo lanbide gaixotasunetik ondorioztatutako ABE egoeran badago, bere oporraldia eten eginen da, egoera horrek irauten duen aldian. Halaber, eta ospitaleratzearen ondoriozko edozein egoerak eragindako ABE egoeretan, oporraldi hori ospitaleratzeak iraun duen aldian eten eginen da. Etenaldiari dagozkion egunak urte naturalaren barrenean hartuko dira, alde biek adostutako egunetan, ABE egoera amaitu ondoren.

8. artikulua. Lan egutegia.

Enpresaren zuzendaritzak, langileen ordezkariak aldez aurretik jakinaren gainean egonik, urteko orduen taula eta lan egutegia ezarriko ditu.

Enpresaren zuzendaritzak, Nafarroarako Egutegi Ofiziala argitaratzen denetik aurrera, eta nolanahi ere aurreko urte bakoitzeko abenduaren 30a baino lehen, langile guztientzako lan egutegia ezarriko du. Lan egutegi horretan gutxienez lanaldiko orduen taula agertuko beharko da.

Enpresaren zuzendaritzak laneko egutegiak eta ordutegiak ezarri ondoren urteko lanaldietan aldaketak gertatzen badira, 15 eguneko epean enpresaren zuzendaritzak egutegi eta ordutegi horietan beharrezko doikuntzak eginen ditu.

9. artikulua. Ordaindutako baimenak.

Langileak, lehenbailehen abisatuta, eta behar bezala justifikatuta, lana huts egin dezake, edo lanetik alde egin, ordainsaria izateko eskubidearekin, arrazoi hauengatik eta gutxienez, adierazten den denborarako:

a) Langilearen ezkontzagatik, hamasei egun natural.

b) Seme-alaben jaiotza edo ezkontidearen eritasun larriarengatik, bi egun natural; langileak bidaia egin behar badu, gehienez beste hiru egun gehiago hartzen ahalko ditu. Zesarearen bidezko jaiotza bada, hiru egun natural hartzen ahalko ditu.

c) Langilearen eta ezkontidearen seme-alabak, gurasoak, bilobak, aitona-amonak, suhi-errainak, anaia-arrebak eta koinata-koinatuen gaixotasun larria, ebakuntza larria edo heriotzagatik, baita 2. gradu arteko odol edo ezkontza bidezko ahaideek haurra izateagatik ere, bi egun natural; langileak bidaia egin behar badu, gehienez beste hiru egun gehiago hartzen ahalko ditu. Seme-alaben anginen edo semearen fimosiaren ondoriozko ebakuntzagatik, egun natural bat.

Bi ahaidek edo gehiagok baimen-egun horiek hartzeko eskubidea badaukate, horiek pertsona bakarrak hartzen ahalko ditu, edo bestela baten atzetik besteak hartzen ahalko ditu, baldin eta haiek hala nahi badute, zuzendaritzarekin ados jarrita.

b) eta c) atalen ondorioetarako, gaixotasun larritzat joko da ospitaleratzera behartzen duena edo Gizarte Segurantzako medikuak horrela kalifikatzen duena.

Artikulu honetako b) eta c) ataletan azaldutako arrazoiengatik langilea bidaia egin beharrean bada, epeak hiru egun gehiago iraun dezake, irizpide hauekin:

1. Distantzia 30 km baino gehiagokoa eta 100 km baino gutxiagokoa bada, egun bat gehiago emanen da (3 guztira).

2. Distantzia 100 km baino gehiagokoa eta 250 km baino gutxiagokoa bada, bi egun gehiago emanen dira (4 guztira).

3. Distantzia 250 km baino gehiagokoa bada, 3 egun gehiago emanen dira (5 guztira).

Hiru kasuetan distantzia lantokitik eta baimenerako arrazoi den ahaidea dagoen tokitik (ospitalea edo etxea) hasten da kontatzen.

Bidaiaren luzera neurtzerakoan, enpresaren eta langilearen artean adostasunik ez izatera, distantziaren proba egiteaz enpresa arduratuko da. Garraio publikoan egiten den ibilbide motzena izanen da distantzien neurria.

Baldin eta b) eta c) ataletan azaldutako ahaideetako bat langilearekin bizi bada, eta laguntza eman diezaiokeen beste pertsonarik ez badago, soldatadun lizentzia luzatzen ahalko da, gehienez hiru egun gehiago.

b) eta c) ataletan aurreikusitako gaixotasun larriak bere horretan jarraitzen badu, behin eta berriro, ordaindutako lizentzietarako eskubidea izanen du denboraldi berberarekin, aurreko lizentzia amaitu eta hogeita hamar egun jarraian iragan ondotik.

d) Ezkontidearen heriotzagatik, lau egun natural.

Osaba-izebak (langilearen edo bere ezkontidearen gurasoen anai-arrebak), eta iloben (langilearen edo bere ezkontidearen anai-arreben seme-alabak) heriotzagatik, egun natural bat.

A, B, C eta D ataletan ezarritako lizentziaren hasierako data, gertaera eragilearen hasierako data izanen da.

e) Gurasoen, anai-arreben edo seme-alaben ezkontzagatik, egun natural bat.

f) Ohiko bizilekua aldatzeagatik, egun natural bat.

g) Beharrezkoa den denbora, langilea espezialista baten kontsultara joateko, Gizarte Segurantzakoa izan zein ez; salbuespenezko kasuetan izan ezik, langileak kontsultaren ordua adierazi beharko du, eta gerora bisita hori enpresan justifikatu.

Era berean, beharrezkoa den denbora izanen da Gizarte Segurantzako familia-medikuaren kontsultara joateko.

h) Hezkuntza eskubide orokorrak eta lanbide prestakuntza jasotzeko ezarritako denbora, indarreko legedian araututako kasuetan eta moduan.

i) Publikoa edo pertsonala den eginbehar saihestezina betetzeko behar-beharrezkoa den denbora. Aldi jakin bat lege bidez edo hitzarmenen bidez ezarritako arau batean jasota dagoenean, absentziaren iraupenari eta konpentsazio ekonomikoari dagokienez, arau hartan xedatutakoari jarraituko zaio.

Goian aipatu den eginbehar hori betetzeagatik hiru hilabeteko tartean lanorduetako %20 baino gehiagotan ezin izan bada egin beharreko lana bete, enpresak eszedentzia egoerara pasa dezake langilea, Langileen Estatutuaren 46. artikuluaren 1. atalean arautu bezala, eszedentzia eskatzea eragin zuen kargua betetzen duen bitartean. Langile batek, eginbeharra betetzeagatik edo karguan jardun beharragatik, kalte-ordaina kobratzen badu, diru kopuru horixe deskontatuko zaio enpresak ordaindu ohi dion soldatatik.

j) Behar bezala justifikatuz gero, behar den denbora izanen du Gizarte Segurantzako pediatraren kontsultara joateko, 6 urtetik beherako seme-alabarik badute. Langilearen familia bizi den herrian Gizarte Segurantzako pediatrarik ez badago, Pediatra pribatuen kontsultara joaten ahalko da.

10. artikulua. Amatasuna, adopzioa.

Erditzeagatik edota adoptatzeagatik lan-kontratuaren etenaldiak irauten duen bitartean, enpresak emakume langileari behar den osagarria ordainduko dio, jasotzen duen Gizarte Segurantzaren prestazioarekin batera, bere soldata errealaren %100 bermatzeko.

Erditzearen kasuan, Langileen Estatutuan eta une bakoitzean indarran duen legerian ezarritakoari jarraituko zaio.

Adopzio kasuetan, adopzioaren aurreko harrera nahiz harrera iraunkorretan, baldin eta hiru urte baino gutxiagoko haurrak hartzen badira, etenaldiak hamasei aste iraunen du jarraian. Denbora hori beste bi astez luzatzen ahalko da seme edo alaba bakoitzarengatik, bigarrenetik aurrera, adopzio anitzaren kasuan; denbora hori langileak hautatzen duen moduan kontatuko da, adopzioa egiteko ebazpen judizialetik aurrera.

Etenaldiaren iraupena hamasei astekoa izanen da, hiru urte baino gehiagoko adingabeak adoptatuz gero, baldin eta adingabe desgaitu edo minusbaliatuak badira edo inguruabar edo esperientzia pertsonalengatik nahiz atzerritik datozelako, gizarteratzeko eta familian integratzeko zailtasun bereziak badaude; hori guztia, betiere, gizarte zerbitzu eskudunek egiaztatu beharko dute.

Aitak eta amak lan eginez gero, etenaldia interesdunek hautatzen duten moduan banatzen ahalko dute, eta aldi berean nahiz bata bestearen ondoren baliatzen ahalko dira hartaz, betiere etenik gabeko aldietan, adierazitako mugekin. Atsedenaldiak batera bi gurasoek hartuz gero, haien baturak ezin izanen du gainditu aurreko ataletan aurreikusitako hamasei asteko kopurua, edo erditze anitza izanez gero dagokien kopurua.

Artikulu honetan aipatzen diren aldiak lanaldi osoan edo lanaldi partzialean hartzen ahalko dira, enpresa eta eragindako langileak aldez aurretik ados jarrita, erregelamenduz erabakitzen diren baldintzen arabera.

Nazioarteko adopzio kasuetan, gurasoek adopzioan hartuko duten haurraren jatorrizko herrialdera joan beharra dutenean, artikulu honetako kasu bakoitzerako aurreikusitako etenaldia adopzioari buruzko ebazpena eman baino lau aste lehenagotik ere hasten ahalko da.

Haurdun dagoen emakume orori, enpresako medikuaren txostena izanik, eta langileak edo enpresak hala eskatuz gero, bere egoerarako lan nekagarri edo arriskutsua egiten badu, arriskurik ez daukan lanpostu erosoago batera aldatuko da, bere jatorrizko kategoriari eutsita. Kasu horretan, enpresaren zuzendaritzak izendatuko du emakume haurdunak hutsik utzitako lanpostua nahitaez bete beharko duen pertsona. Egoera hori behin-behinekoa denez, emakume haurduna bere lanpostura itzultzen denean pertsona hori ere bere lehengo lanpostura itzuliko da.

11. artikulua. Borondatezko eszedentziak.

Hitzarmen honen indarraldian, enpresaren zerbitzuan gutxienez urte bateko antzinatasuna duten plantillako langile finkoei borondatezko eszedentzia hartzeko baimena emanen die enpresak, gutxienez urtebetez eta gehienez bost urtez.

Eskatzaileak hilabete lehenago eska dezake eszedentzia, arrazoirik eman gabe, eta enpresak nahitaez onartu beharko du. Langilearen aurreko eszedentziaren bukaeratik gutxienez lau urte iragan baldin badira, enpresaren esku egonen da eszedentzia ematea.

Eszedentzian dagoen bitartean, arau orokor gisa, urtebetetik gorako eszedentzia eskatu eta eman izan arren, langileak urtebeteren buruan eszedentziaren gainerako zatiari uko egiten ahalko dio; orduan, hilabete lehenago adierazi beharko du lanera itzultzeko asmoa duela.

Nolanahi ere, langileak eskakizunak betez gero, enpresak eszedentzia eskatzean zuen lanpostua itzuliko dio, edo bestela, antzeko beste bat.

Itzultzeko eskaera eszedentzia amaitu baino hilabete lehenago egin behar da. Eszedentzian dagoen langileak aipatutako baldintzetan itzultzeko eskatzen ez badu, borondatezko baja dela ulertuko da.

Arau orokorraren salbuespenak dira 7, 8, 9, 10 11, 12, 13 eta 14. lanbide-taldeetako langileak.

Lanbide-talde horiek ez dute beste eskubiderik enpresan hutsik dauden eta bere kategoriakoak edo antzekoak diren lanpostuetan sartu ahal izateko lehentasuna izatea baizik.

Bere lanpostua hutsik ez badago, langileak kategoria handiagoko edo txikiagoko lanpostu huts bat hartzen ahalko du; azken kasu horretan, beste langile batzuk igotzeko eskubidea errespetatu beharko du, eta hartzen ahal duen lanpostuaren ezaugarriak bete beharko ditu.

Borondatezko eszedentzia ez da ezertarako zenbatuko.

Eszedentzia bukatutakoan, enpresaren esku egonen da luzatzea, langileak hala eskatuz gero.

IV. KAPITULUA

Erregimen ekonomikoa

12. artikulua. Berme pertsonalak.

Langileek, bakarka zein oro har, urteko zenbaketan eta orokorrean, hitzarmen honetan ezarritakoak baino baldintza ekonomiko eta bestelako baldintzak izanez gero, errespetatu eginen zaizkio.

13. artikulua. Konpentsazioa eta irenspena.

Itundutako baldintza guztiek multzo organiko eta zatiezina osatzen dute; halaber, enpresak emandako hobekuntza baten edo dagoen lege baten bidez lehenagotik indarrean dauden baldintzekin konpentsatzen eta irensten ahal dira.

14. artikulua. Lanaldi jarraituaren konpentsazioa.

Egunean etengabe 5 ordutik gorako lanaldiak egiten dituzten langileek, baldin eta beren lanaren ezaugarriengatik ezarritako 15 minutuko atsedenaldia ezin badute egin, horregatik 7. Eranskinean adierazten den zenbatekoa jasoko dute. Konpentsazio hori, atsedenaldirik gabe lan egindako egun bakoitzagatik emanen da.

Aurreko paragrafoan adierazi diru konpentsazioa soldaten ordainagiri ofizialean aparteko lauki batean agerraraziko da, "lanaldi jarraituaren konpentsazioa" izeneko kontzeptupean, laburduraz "LEK", eta ez da, inola ere, aparteko ordu gisa kontatuko.

Lanaldiaren ondorioetarako, atsedenaldi hori benetako lan denboratzat zenbatuko da.

15. artikulua. Aparteko orduak.

Egungo langabezia-egoera kontuan hartuta eta horren ondorioak arintzeko, aparteko ordurik ez egitea izanen da lan-arau orokorra, ezinbesteko arrazoiengatik edo egiturazkoak izateagatik ordu horiek egin behar direnean eta aldi baterako edo lanaldi partzialeko kontratazioen bidez ordezkapenik egin ezin denean izan ezik.

-Ezinbesteko orduak: istripuak, suteak, uholdeak edo aparteko bestelako ezbeharrak konpontzeko edo saihesteko egiten dira.

-Beharrezko orduak edo egiturazkoak: lehengaiak edo produktu bukatuak galtzeko arriskua, txanda aldaketak, langilearen bat-bateko gaixotasuna dagoenean egiten dira, edo honako balizko hauetako lizentzia ordainduetan: emaztearen erditzea, ezkontidearen, seme-alaben, gurasoen, anai-arreben, biloben edo aitona-amonen gaixotasun larria edota aipatu senideen heriotza.

Beharrezko edo egiturazko aparteko ordutzat hartuko dira, halaber, enpresak derrigorrez eman behar dituen eta atal honetako lehenengo paragrafoan bildu gabeko lizentzia ordainduen ondorioz sortzen diren orduak.

40 aparteko ordu baino gehiago eginez gero, atsedenaldi ordu baliokideekin konpentsatuko dira, eta gainera, taulen arabera dagokion aparteko orduaren %75eko balioa abonatuko da. 8. eranskina

Egindako aparteko orduen atsedena ordu horiek egin eta hurrengo lau hilabeteen barrenean hartuko da, urte natural berean.

Enpresa eta langilea ados jarriko dira atsedenaldiak zein egunetan hartuko diren zehazteko.

16. artikulua. Laneko arropa.

Enpresek langileei lohihartzekoak, monoak, petoak, batak edo burutzen dituzten funtzioei egokitutako antzeko jantziak emanen dizkiete, pareka beti, eta segurtasun-oinetakoak ere bai. Azidoekin eta bestelako material erregarriekin jarduten duten langileei beren zereginari egokitutako lan-jantziak emanen zaizkie, eta kanpoan edo toki hezeetan lan egiten dutenei, arropa iragazgaitzak eta hezetasunaren kontrako oinetako ahalik eta erosoenak.

Enpresak uniformea erabiltzera behartzen dituen langileei uniformea emanen zaie.

Jantzi hauek erabiltzeko epea urtebetekoa izanen da, eta hori zenbatzeko beti benetako lan denbora kontuan hartuko da eta inoiz ez denboraldi naturalak.

Mantentze-lanetako langileei eta azidoekin eta bestelako material erregarriekin lan egiten duten langileei gehienez urtean bitan berrituko zaizkie lan-jantziak. Beraz, langile hauei ematen eta berritzen zaizkien lan-jantziak urtean ez dira lau baino gehiago izanen.

Segurtasuneko jantziei dagokienez, arlo horretako adituek (enpresakoek, ugazaben mutualitatekoek edo erakunde eskudun ofizialekoek) azterlan egokiak egin ondoren zehaztuko da nahitaez erabili eta eman behar diren.

Lan egitean betaurrekoak, ortopediako aparatuak eta entzuteko aparatuak apurtuz gero, enpresak haien konponketak abonatuko ditu, ondorio horietarako eginen den espedientean adieraziko diren beharrezko egiaztapenak egin ondoren. Espediente hori lan istripuen kasuetan egiten direnen antzekoa izanen da.

Hori guztia hitzarmen hau sinatzen den unetik aurrera jarriko da indarrean. Lan zehatz batzuk egiteko material berezia emanen zaio langileari, zuzendaritzak beharrezkotzat jotzen duen kasu guztietan, Laneko Segurtasun eta Osasun Batzordeari entzun ondoren.

17. artikulua. Lansarien sistema.

Jarraian adierazten diren kontzeptuek osatuko dute:

Ordaintze sistemako tauletan ezarritako kopuruei 2009ko KPI erreala gehituko zaie, %25 igota.

18. artikulua. Hitzarmeneko soldata.

Hitzarmen hau sinatzen denetik aurrera, lanbide-talde edo kategoria bakoitzarentzat kontzeptu hori hitzarmen honek indarraldiaren urte bakoitzean zehazten duena izanen da (2. Eranskina); horrek atzerako eragina izanen du, 2010eko urtarrilaren 1etik hain zuzen.

Soldataren gehikuntzak aplikatzean ateratzen den kopurua eranskinetako tauletan agertutakoak baino handiagoa bada, beren soldaten hartu agiriak taula horiei egokituko zaizkie, eta gehiegizko kopurua aparteko lauki batean zenbatuko da, "Osagarri Pertsonal" gisa.

"Osagarri Pertsonal" hori urtero Hitzarmeneko Soldatan itundutako ehunekoan igoko da.

Hitzarmenak indarra duen bitartean, enpresak guztira 21.165,15 euroko diru-sarrera gordina bermatzen die 2010. urtean langile guztiei, kontzeptu guztiak kontuan hartuta.

Hitzarmen honetan ezarritako lansariak gordinak direla ulertzen da. Gizarte Segurantzako kuoten eta mota guztietako zergen kontzeptuan langileek abonatu behar dituzten kopuruak beren lansarietatik kenduko zaizkie, eta horren kontrako itun oro baliogabea izanen da.

19. artikulua. Antzinatasuna.

Langile finko guztiek izanen dituzte zerbitzuan emandako denboragatiko aldizkako igoerak, elkarren segidako bi hirurteko eta bosturtekoz osatuak.

Tauletan ezartzen da hirurteko edo bosturteko horien balioa. 3. eranskina.

1979ko urtarrilaren 1a baino lehen sartutako langileentzat aldizkako igoeren muga 2 hirurteko eta 5 bosturtekotakoa da (31 urte).

1979ko urtarrilaren 1etik aurrera sartutako langileentzat aldizkako igoeren muga 2 hirurteko eta 4 bosturtekotakoa da (26 urte).

Bete eta hurrengo hileko lehen egunetik emanen dira ezarritako aldizkako igoerak.

Kategoriaz igo edo lanbide-taldez aldatzen direnek, taulan bere kategoria edo talde berriari dagokion antzinatasun plusa kobratuko dute.

Langile batek enpresan lana utzi eta berriro bertan sartzen bada, antzinatasuna azken sarrera honen datatik aurrera hartuko da kontuan.

20. artikulua. Aparteko eskersariak.

Ekaineko eta Eguberrietako aparteko eskersarien zenbatekoa 4. eranskineko tauletakoa da, eta hitzarmeneko soldataren, osagarri pertsonalaren eta antzinatasunaren 30 egunen baliokidea da.

Eskersari horiek ekaineko eta abenduko 15etik 20ra bitartean ordainduko dira, hurrenez hurren, eta lehenengoa nominarekin batera.

Urtean enpresan sartu edo enpresatik alde egiten duten langileek lan egindako denboraren proportzioan kobratuko dituzte eskersari horiek; hilabete osotzat joko da hilabetearen zati bakoitza.

21. artikulua. Mozkinetan parte hartzea.

Mozkinetako parte-hartze gisa tauletan ezarrita dagoenaren arabera abonatuko da. 5. eranskina

Urte bakoitzeko martxoaren 31 baino lehen ordainduko da.

Urtean enpresan sartu edo enpresatik alde egiten duten langileek, behin-behinekoek eta bitartekoek, lan egindako denboraren proportzioan kobratuko dute parte hartze hori; hilabete osotzat joko da hilabetearen zati bakoitza.

22. artikulua. Gaueko txandako plusa.

Zerbitzuak gaueko 10etatik goizeko 6etara bitartean egiten dituen langileak gaueko txandako plusa kobratuko du. Plus honen zenbatekoa tauletan adierazten da talde bakoitzerako. 6. eranskina

Aipatu plusa gauez lan egindako egun bakoitzeko kobratuko da eta tarte horretan lan egindako orduen proportzioan, eta beraz, langilearen hutsegiteetan ez da ordainduko, absentzia hauek baimen ordainduaren izaera badute ere, 67. eta 72. artikuluetan xedatutakoan izan ezik.

23. artikulua. Txanda eta mantentze-lanetarako lanaldi zatituaren plusa.

Erregimen horietan lan egiten duten langileek tauletan adierazitako kopurua jasoko dute hilero. 9. eranskina.

24. artikulua. Mantentze-lanetako deien plusa.

Mantentze-lanetako langileek, beren txandatik kanpo deiak hartzen badituzte, tauletan adierazitako kopuruak jasoko dituzte. 10. eranskina.

25. artikulua. Distantziaren plusa.

Enpresaren garraio zerbitzuak ezin erabili dituzten langileek dagokien kilometro-ordaina jasoko dute, 0,177 euro kilometroko 2010. urtean. 11. eranskina.

26. artikulua. Seme-alaben ikasketetarako laguntza.

Eskolara (derrigorrezko zikloak) joateko adineko seme-alabak dauzkaten langileei ikasketetarako laguntza gisa urtero kopuru bat abonatuko zaie.

Laguntza horren baremo eta zenbatekoak tauletan adierazitako ehunekoetan gehituko dira. 12. eranskina.

27. artikulua. Langileen ikasketetarako laguntza.

Ikastetxe ofizialetan ikasketak egiten ari diren langile guztiei ikasketetarako laguntza ordainduko zaie, horretarako idatzitako araudiaren arabera. Araudi hori hitzarmen honetan sartuko da 14. eranskin gisa.

28. artikulua. Desgaitasunak dituztenendako laguntza.

Gizarte Segurantzak aintzatetsitako desgaitasunak dauzkaten seme-alabengatik, oneratzen laguntzeko gastuak ordaintzearen irizpideari eutsiko zaio; horretarako, aldez aurretik frogagiri egokiak aurkeztu beharko dira, eta gizarte segurantzako prestazioak nahiz interesdunak jaso edo kudeatzen ahal dituen beste laguntza guztiak kenduko dira; gainera, interesdunak laguntza hori jasotzeko laguntza eta sostengua emanen du.

Beste kasu batzuetan, enpresak lantoki honetan lan egiten duen familiako buruari bere semeari edo alabari desgaitasunik ez izatezar egokituko litzaiokeen eskola-laguntzaren bikoitza ordainduko dio, adinaren aldetik mugarik gabe.

29. artikulua. Gabonsaria.

Eguberria baino egun batzuk lehenago, Enpresak lantoki honetako langileei "Eguberrietako Saski" tradizionala emanen dien opari.

Saski horren balioa eguneratzeko, erreferentzia-balio gisa 2. eta 1. mailako Ofizial baten egun bateko enpresa hitzarmeneko soldata hartuko da.

30. artikulua. Soldaten ordainketa.

Soldatak hilabetea amaitutakoan ordainduko dira, bai beren hartzekoak hilero sortzen dituzten langileei eta bai eguneko edo lanorduko sortzen dituztenei ere.

Lansariak enpresaren usadiozko edo ohizko datan ordainduko dira.

Lansari modu guztietan, langileak soldata-ordainagiriaren kopia bat jasoko du kontzeptu ordaingarri desberdinak, Ogasun Publikoari ordaintzen diona eta Gizarte Segurantzarako kotizatzen duena jakin dezan.

Behar bezala kreditaturiko banku-abonuak dagokion soldata-ordainagiriaren sinadura ordeztuko du.

31. artikulua. Dietak.

Zerbitzuaren beharrengatik langileren bat bere ohiko destinoa daukan herritik desplazatu beharrean aurkitzen bada, enpresak bere eguneko hitzarmeneko soldataren %75 ordainduko dio otordu bat bere bizilekutik kanpo egiten duenean eta %200 bizilekutik kanpo jan eta lo egin behar duenean.

Enpresak ohikoak ez bezalako lanak agindu dizkiola-eta, langileak ezin duenean bere bizilekura bazkaltzera itzuli, bazkariagatiko dieta kobratzeko eskubidea izanen du, bere herrian bertan bada ere.

Joan-etorriko gastuak enpresaren kontura izanen dira.

Inguruabar bereziengatik joan-etorriak sortutako gastuak dieten zenbatekoa gainditzen badute, enpresak ordaindu beharko du gainerakoa aurrez egindako gastuak justifikatu ondoren. Bidaietan emandako denborak ez du inolako gehigarririk sortuko ezein kasutan, bere iraupenak legezko jarduna gainditzeagatik.

V. KAPITULUA

Langileen erregimena

32. artikulua. Berdintasuna eta diskriminazio eza.

Enpresaren barrenean ezin izanen da langilerik diskriminatu ideologia, erlijioa, arraza, afiliazio politiko edo sindikala eta abarreko arrazoiak direla eta.

Enpresako lanpostu guztietarako sarbide berdintasunaren printzipioa errespetatuko da, nola gizonezkoentzat hala emakumezkoentzat eta inolako diskriminaziorik gabe.

Lanposturen bat betetzeko deialdiren bat gertatzen denean, sexu egoeraren erabateko abstrakzioa egingo da, eta eskatutako gaitasun profesionalari besterik ez zaio begiratuko.

Batzorde Mistoak, indarra duen bitartean, Berdintasunari buruzko Legea aplikatzeko behar diren egokitze eta garatze neurriak aztertuko ditu, 250 langiletik gorako enpresetarako berdintasun planei buruzkoa barne dela.

33. artikulua. Laneko segurtasuna eta osasuna.

1.-Enpresak eta langileek beren gain hartuko dituzte laneko segurtasun eta osasunaren arloan Hitzarmen Kolektibo honetako xedapen berariazkoek zehazten dituzten elkarrekiko eskubideak eta erantzukizunak eta unean-unean indarrean dagoen legerian ezartzen diren bezala.

Ondorioz, enpresaren zuzendaritzak eta langileen ordezkariek konpromisoa hartzen dute, dituzten aukeren baitan betiere, eta aurrez adosturiko epeetan, prebentzio planak ezartzeko. Horien helburu komun eta zehatzak istripuak eta egiaztaturiko arriskua, toxikotasuna edo nekagarritasuna pixkanaka desagerraraztera edo kopurua murriztera zuzenduko dira, ingurumen baldintzak eta lanpostuetakoak hobetze aldera. Horretarako, posible eta beharrezko diren zuzenketako neurri teknikoak aplikatuko dira eta, bitartean, beharrezko eta egoki iritzitako babes pertsonalerako jantzi eta baliabideak jarriko dira langileen esku, baita erabili ere.

Bestalde, langileek, banaka harturik, laneko segurtasun eta osasunaren arloan jasotako jarraibideak bete beharko dituzte nahitaez, behar duten prestakuntza eta informazio teoriko eta praktiko guztia eskaini ondoren. Batez ere enpresan prebentzio zerbitzuaz arduratzen direnen aholkularitza jasoko dute, eta horren bidez babes pertsonalerako baliabide eta jantzien erabilerari buruzko informazioa emanen diete.

2.-Laneko arriskuei aurrea hartzeko gaietan zeregin berariazkoez jabetutako ordezkariak dira prebentzioko delegatuak.

Langileen ordezkariek beren artean izendatuko dituzte prebentzioko delegatuak, Laneko Arriskuen Prebentzioari buruzko Legearen 34. artikuluak aipatzen dituen arauetan aurreikusitako ordezkaritza organoen eremuan, eskala honen arabera:

251 eta 500 langile bitartean: Prebentzioko 4 delegatu.

501 eta 1000 langile bitartean: Prebentzioko 5 delegatu.

Batzordean, alde batetik, prebentzioko delegatuak izanen dira eta, bestetik, enpresaburua eta/edo haren delegatuak (prebentziokoak zenbat, horiek ere horrenbeste).

Aurreko paragrafoetan aipatutako osaeran sartzen ez diren sindikatuen delegatuak eta enpresako prebentzioko teknikari arduradunak batzordearen bileretara joanen dira, eta hitz egiteko eskubidea izanen dute; ez, ordea, botoa ematekoa. Berebat batzordean egoten ahalko dira, arestian aipatu diren baldintzetan, segurtasun eta osasun batzordean eztabaidatzen diren gaietan adituak diren edo prestakuntza berezia izan duten enpresako langileak, baita enpresakoak ez diren prebentzio teknikariak ere, baldin eta batzordeko ordezkari batek hala eskatzen badu.

Prebentzioko delegatuek, langileen ordezkariak direnez, Langileen Estatutuko 73. artikuluan ezarritako berme guztiak izanen dituzte.

Prebentzioko delegatuek beren eginkizunetan ematen dituzten orduak ordezkaritza eginkizunetan emandako ordutzat joko dira, hitzarmen honetako 67. artikuluan aurreikusi diren hileko ordu ordainduen kredituaren erabilerari dagokionez.

Nolanahi ere, ordu horiek lanean sartutako ordutzat joko dira, hau da, aurreko atalean aipatu ordu kreditura ez egozteko ordutzat, arriskuen prebentzio alorrean enpresaburuak deitutako segurtasun eta osasun batzordearen bileretan emandakoak badira. Berebat, lanean sartutako ordutzat joko dira, Laneko Arriskuen Prebentzioari buruzko Legearen 36.2 artikuluko a) eta c) idatz-zatietan aurreikusitako bileretarako erabiltzen direnak.

Beren eginkizunetarako premiazkoak diren prebentzio alorreko baliabideak eta prestakuntza emanen dizkie prebentzio delegatuei enpresaburuak.

Enpresaburuak prestakuntza bere baliabidez emanen du, edota alor horretan espezializatuta dauden erakunde edo entitateekin egingo dituzten akordioen bidez; dena dela, prestakuntza hori arriskuen bilakaerara egokituko da uneoro, hala nola, sor daitezkeen arrisku berrietara, eta beharko balitz aldizka-aldizka errepikatuko dira prestakuntza aldiak.

Enpresak, bestalde, beharturik daude langileek behar dituzten baimen ordainduak ematera, prebentzio alorrean erakunde edo instituzio ofizialek antolatzen dituzten laneko segurtasun eta osasun alorreko prestakuntza ikastaroetara joan daitezen. Enpresaburuek, halaber, hitzarmen hau sinatu duten erakundeek antolatzen dituzten prestakuntza ikastaro eta jardunaldietara joateko baimenak emanen dituzte, horiek eskudun diren organismoak emandako ahalmenetan sartzen direnetakoak badira.

3.-Laneko segurtasun eta osasun batzordeak urte bakoitzerako ezartzen den egutegiaren arabera eginen ditu bilerak eta gutxienez hiru hilean behin bilera bat egitera behartzen duen araua beteko du; gainera lehendakariak eskatzen duen bakoitzean edota batzordean ordezkaritza duen edozein aldek deitzen duenean.

Horren ondorioetarako, eta proposamenak egiteari dagokionez zein alderdien arteko erabaki zehatzak hartzeko ahalmenak erabiltzeari dagokionez, enpresaburuak izendatutako kideek langileek izendatutako ordezkarien boto kopuru berdina dutela joko da beti, ez gehiago ez gutxiago.

Laneko segurtasun eta osasun batzordearen bilera bakoitzaren akta eginen da, eta horren kopia bana emanen zaie hitzarmen honetako 69. artikuluan aipatzen diren enpresako Sindikatu Ataletako delegatuei.

4.-Laneko segurtasun eta osasun batzordeak ondorengo ataletan zehaztuko diren ahalmenak eta erantzukizunak izanen ditu; hala ere, une jakin batean indarrean dauden lege xedapenek ematen dizkioten ahalmenak izanen ditu.

a) Artikulu honen 1. atalean zehazturiko programen zein lantokian nahitaez bete behar diren laneko segurtasun eta osasun arauak prestatzen, abiarazten eta horien ezarpenaren aplikazioa kontrolatzen parte hartzea.

b) Enpresaburuari proposatzea egoki iritzitako lehentasunen ordena, aurreikusitako programak burutzeko beharrezko inbertsioak onartu aurretik.

c) Material, instalazio, makina eta produkzio prozesuaren bestelako alderdiei buruzko informazioa jasotzea, dauden arrisku erreal edo potentzialak ezagutzeko eta haiek desagerrarazteko edo murrizteko neurriak proposatzearren beharrezkoa den neurrian.

d) Eragindako langileei osasun neurriei edo arrisku edo istripuen ikerkuntzari buruzko informazioa ematea, egokien iritzitako baliabideen bidez.

e) Enpresaburuari babeserako eta zaintzarako neurri bereziak hartzeko eskatzea langileen osasunerako arrisku nabarmenak ekartzen dituzten lanpostuetan.

f) Enpresako prebentzio zerbitzuarekin, agintariekin eta segurtasun teknikariarekin elkarlan estuan aritzea, laneko istripu eta gaixotasunen arrazoiak desagerraraztera bideratutako prebentzio neurriak ezartzen eta horien eraginkortasuna eta emaitzak kontrolatzen.

g) Prebentzio zerbitzuaren eta segurtasun teknikariaren aholkularitza eskura izatea, lanbide eremuan berezko edo espezifiko zaizkien alor guztietan.

Halaber, laneko segurtasun eta osasunean espezializaturiko erakunde ofizialek eta, hala badagokio, enpresaburuarekin aldez aurretik harturiko akordioaz, beste erakunde espezializatu batzuek lanpostuetan agertzen diren agente kutsatzaileen metaketa erreala edo arrisku maila ikertzen parte har dezaten eta horri buruz aholkularitza eman dezaten eskatzea. Nolanahi ere, alderdi biek onartuko dituzte egindako neurketen emaitzak, eta egindako ikerlana biltzen duten txostenetan proposatzen diren agindu eta neurri zuzentzaileak aplikatuko dituzte; horien kopia bat laneko segurtasun eta osasun batzordeari eskuratuko zaio.

34. artikulua. Medikuntza zerbitzua.

Laneko segurtasun eta osasun batzordeak laneko medikuntza, higiene eta segurtasun zerbitzuek enpresetako lanean egiten dituzten ekintzen berri izanen du, eta bere lankidetza osoa eskainiko du; halaber, langileen babes eta osasunarekin loturiko alderdi guztien berri izanen du.

Enpresak bere langileei urtean azterketa mediko bat eginen die.

Azterketa horretan gutxienez hauek egingo dira: gernu eta odol analisia eta azterketa orokorra. Toxiko, neketsu edo arriskutsutzat jotzen diren lanpostuetan lan egiten duten langileen kasuetan, arriskuaren araberakoak izan beharko dira azterketa horiek, hala denboraldian nola analisien eta azterketen espezializazioan.

Azterketa medikoak langile bakoitzaren ohiko lanaldiaren barrenean eginen dira.

Zerbitzu medikoek langileari berari entregatu beharko dizkiote azterketaren emaitzak.

35. artikulua. Gaitasun urriko langileak.

Edozein arrazoigatik gaixotasun edo istripu baten ondorioz gaitasun fisikoa edo mentala urritua duten langileei, beren hondar-gaitasunarekin bateragarriak diren lanpostuak betetzeko aginduko zaie.

Hala ere, eta bestelako konponbideak ezinezkoak izanez gero, beren lanpostuari eusteko lehentasuna izanen dute edozein egoera txarren aurrean.

Enpresak indarreko legedia bete beharko du minusbaliotasunen bat duten langileei dagokienez; horrek esan nahi du plantillaren %2 mota horretako langileek bete beharko dutela.

Enpresak ohiko lanbiderako ezintasun iraunkorra eta osoa adieraztearen ondorioz lan-kontratua suntsituta daukaten 55etik beherako langileak kontratatuko ditu; gehienez ere 10 pertsona kontratatuko ditu, beren hondar-gaitasunaren arabera. Lanaldi erdiko kontratuak eginen dira eta lanpostu berriari proportzioan dagokion lansaria ordainduko zaie; enpresan duten antzinatasuna aintzatetsiko zaie eta inola ere ez zaie deskontatuko jasotako kalte-ordainaren zenbatekoa.

36. artikulua. Kontratazioa.

Plantilla handitzeko erabakia enpresaren zuzendaritzaren ahalmena izanen da. Lanpostu berriak bete behar dituzten pertsonak zehaztea ere enpresaren zuzendaritzari dagokio, hitzarmen kolektibo honetan xedatutakoaren eta uneoro indarrean dagoen legediaren arabera.

Enpresak tratu eta aukera berdintasuna errespetatuko du, eta neurriak hartuko ditu gizon eta emakumeen arteko laneko diskriminaziorik izan ez dadin (Berdintasun legearen garapena).

37. artikulua.

Enplegu arloan indarra duten xedapenen arabera onartuko dira langileak, baldintza berdinetan behin-behineko edo bitarteko langile gisa zerbitzuak emanak dituztenei lehentasuna emanez. Izangaiek legeak eskatutako formalitateen mende egon beharko dute, baita lege horren aurka joan gabe enpresak finkatzen dituenen mende ere.

38. artikulua.

1. Langileak enpresan lanean hastean proba gisa ariko direla ulertuko da, idatziz horrela agertzen bada.

2. Probaldiaren gehieneko iraupena hau izanen da:

I. taula.

a) 4.etik 14.era bitarteko taldeak: 2 hilabete.

Bere titulazioaren arabera (goi-mailakoa, erdi-mailakoa edo diploma) kontratatu direnak salbu, horien probaldia 6 hilabetekoa izanen baita.

b) b) 2. eta 3. Taldeak: 15 lanegun.

c) 1. Taldea: 7 lanegun.

II. taula.

a) E-tik J-ra bitarteko taldeak: hilabetea.

b) B, C eta D taldeak: 15 lanegun.

c) A taldea: 7 lanegun.

3. Ezintasun iragankorraren egoerak eten eginen du probaldia, baldin hala jasotzen bada idatzita dagokion kontratuan.

4. Probaldian, langileak zein enpresaburuak hura bere horretan utzi edo kontratua iraungitzen ahal dute aldez aurretik abisurik eman gabe, ezein alderdik kalte-ordainik jasotzeko eskubiderik izan gabe, baina bai langileak dagokion likidazioa. Probaldia gainditu ondoren, langilea plantillan sartuko da eta probaldiaren denbora antzinatasunaren ondorioetarako zenbatuko da.

5. Behin-behineko edo bitarteko langileek ez dute probaldirik beharko bere kontratuarengatik finko izatera igarotzen direnean.

39. artikulua.

Enpresak libreki izendatuko ditu 10etik 14ra arteko lanbide-taldeen barrenean dauden kategoria eta lanpostuak, eta teknikari tituludunak, kasu orotan.

Gainontzeko taldeetako lanpostuak enpresan sartzekoak izanen dira baldin enpresan haiek betetzeko probak gainditu dituen langilerik ez badago.

40. artikulua. Mailaz igotzea.

Enpresa behartuta dago enpresa batzordeari sarrera eta igoera plazak hornitzeko oposizio-lehiaketa bidezko deialdien berri ematera, probak egin behar diren eguna baino lehen, behar bezain garaiz. Orobat, enpresaren iragarki oholetan argitaratuko dituzte.

41. artikulua.

Enpresako langile guztiek lehentasunezko eskubidea izanen dute Lantoki honetako edozein talde eta ataletan sortzen diren lanpostu hutsak betetzeko, baldintza berberetan.

Gai honi buruz indarra duten legezko xedapenetan ezartzen dira sarrera eta igoeretarako baldintzak, baita aurreko eta ondorengo artikuluetan ere. Igoeretarako, antzinatasuna lehentasunezko merezimendua izanen da, baldintza berberetan.

42. artikulua.

Oposizio-lehiaketa bidez eginen dira 6.etik 9.era arteko lanbide-taldeetako lanpostu eta kategorietarako igoerak, enpresako langileen artean.

Arau honetatik baztertuta gelditzen dira teknikari tituludunak.

43. artikulua.

a) A taldeko langileak B, C, edo D taldeetako lanpostuetara igotzeko antzinatasuna hartuko da kontuan; horretarako, aldez aurretik gaitasun-proba gainditu beharko da.

b) b) Orobat, E-tik K-ra arteko taldeetan, biak barne, kategoria edo lansari handiagoko lanpostu hutsak antzinatasun bidez hornituko dira; horretarako, aldez aurretik gaitasun-proba gainditu beharko da.

44. artikulua.

Igoeretarako lehiaketak, gaitasun azterketak eta gaitasun probak juzkatuko dituen epaimahaietako burua enpresaren zuzendaria edo bere ordezkari bat izanen da, hitza eta botoa dituela. Bestetik, zuzendariak epaimahaiko bi kide izendatuko ditu eta enpresa batzordeak beste bi, hitza eta botoa dituztela jardun dezaten. Kide horien kategoria bete behar diren lanpostuena bezalakoa edo handiagoa izanen da.

45. artikulua. Plantillak.

1. Urte bakoitzeko azken hiruhilekoan, enpresak langileen ordezkariei plantillak urtean izan duen bilakaera azalduko die. Halaber, egindako jarduera eta produkzioen berri emanen die, eta horiek urtean nola antolatu diren azalduko die, baita zer kontratazio modalitate erabili diren eta aparteko zenbat ordu sartu diren ere.

2. Hori oinarri hartuta, enpresak hurrengo urterako plantilla aurreikuspenak eta helburuak finkatuko ditu, betiere, ekoizpen eta salmenta-eskaerekin lotuak. Halaber, finkatuko du urtean zehar izanen duen bilakaera, merkatu egoera, egin beharreko inbertsioak, berrikuntza teknologikoak, prestakuntza eta sustapen planak, plantillak gaztetzeko balizko proiektuak etab. Langileen ordezkariei aurreikuspen eta helburu horien berri emanen zaie.

Plantillaren balantze eta aurreikuspenak nahiz horien eta enpresaren jardueren arteko harremana egiteko, langileak arlo eta sail organiko funtzionaletan eta lanbide-taldetan banakatuko dira, eta dagozkien kontratu motak ere adieraziko dira.

3. Hiru hilean behin langileen ordezkariei azaldutako aurreikuspenen bilakaeraren eta hurrengo hiruhilekorako proiektuen berri emanen zaie, erabili beharreko kontratu motak ere adierazita.

4. Igoera bidez langileak sustatzea ukatu gabe enpresak hutsik gelditzen diren lanpostuak amortizatzen ahal ditu. Horren berri emanen zaie langileen ordezkariei.

46. artikulua. Lekualdatzeak.

Langileen lekualdaketak ondorengo arrazoiengatik egiten ahalko dira:

a) Interesdunak hala eskatuta.

b) Enpresaren eta langilearen artean erabakita.

c) Teknika, antolaketa edo ekoizpen arloko arrazoiengatik.

47. artikulua.

Enpresak aldez aurretik onartuta, lekualdatzea langileak eskatuta egiten denean, langileak ez du aldaketak sortzen dituen gastuengatiko kalte-ordainik jasotzeko eskubiderik, eta lanpostu berriaren baldintzak bete beharko ditu; baldintza horiek idatziz aditzera eman beharko zaizkio.

48. artikulua.

Lekualdatzea enpresak eta langileak adostuta egiten bada, lekualdatze horren baldintzei dagokienez, bi alderdiek hitzartutakoa beteko da; betiere, idatzita jasoko da.

49. artikulua.

Teknika, antolaketa edo ekoizpen arloko arrazoi justifikatuak daudenean eta aurreko artikuluan ezarritako adostasunera iristen ez denean, enpresak langilea lekualdatzen ahal du eta haren familiaren bizilekua aldatu, baldintza hauetan:

-Lekuz aldatutako langileak, aldez aurretik justifikatuz, konpentsazio gisa ondorengo gastuen zenbatekoa jasoko du:

• Interesdunaren joan-etorrien gastuak eta berarekin bizi diren senideenak edo ekonomikoki bere menpe daudenenak.
• Altzari eta tresnen aldairako gastuak.
• Soldata errealaren bi hilabeteko, kalte-ordain gisa esku-dirutan, familia-buru bada, eta 45 egunetakoa ez bada familia-buru.
• Bere seme-alaben eskola-gastuen alde justifikatua, halako alderik badago, lekualdatzea gertatzen deneko ikasturtea amaitu arte.

-Gainera, lekuz aldatutako langileari bere beharrizanei egokitutako eta lekuz aldatu arte ordaintzen zuen errenta berdineko etxebizitza lortu beharko dio enpresak, eta hau ezinezkoa bada, lekuz aldatutako langileari errentaren alde egiaztatua ordainduko dio.

-Enpresaburuak lekuz aldatzeko erabakia gutxienez agindu hori bete baino 30 egun lehenago jakinarazi beharko dio langileari eta bere legezko ordezkariei.

Lekuz aldatzeko erabakia jakinarazi ondoren, langileak kontratua desegitera erabakitzen badu, indarreko legedian xedatuta dagoena bete beharko da.

Langileak kontratua desegin ez arren, enpresaren erabakiarekin ados ez badago jurisdikzio eskudunaren aurrean horren aurka egiten ahal du, indarreko legedian ezarrita dagoen epean. Dena dela, lekuz aldatzeko agindua bete eginen da.

Enpresaren ahalmen hau langile bakoitzarekin behin soilik erabiltzen ahal da, baldin eta kontratuan horri buruzko hitzarmena egiten ez bada.

Aldi baterako lekuz aldatzeari dagokionez, Langileen Estatutuaren 40. artikuluko 4. atalean eta horri buruzko gainerako indarreko xedapenetan ezarritakoa beteko da.

Banakako zein taldeko mugikortasuna Leitzako eta Urangako (Berrobi) lantokien artekoa da bakarrik.

50. artikulua.

Gehiegizko plantillagatik langileak lanbide-talde batetik bestera nahitaez lekuz aldatu behar badira, jatorrizko taldera itzuli beharko dira bere kategoriako lanpostu hutsak sortu bezain laster.

Kategoria profesional beraren barreneko lekualdatzeetan, lekuz aldatutako langileak hobekuntza edo onuraren bat badu, lehentasuna izanen dute kategoria horretan antzinatasunik handiena dutenek, betiere bete nahi den lanpostua betetzeko trebakuntza teknikoari dagokionez berdintasuna baldin badago, 41. artikuluan igoerei buruz xedatutakoa deusetan ukitu gabe.

51. artikulua.

Enpresak lantokia beste herri batera lekuz aldatu nahi badu, uneoro indarrean dagoen legedian enplegu politikari buruz ezarritako prozedurari jarraitu beharko zaio.

52. artikulua.

Bere laneko nahitaezko lekualdatzea dela-eta ezkontideetako batek bere egoitza aldatzen badu, besteak, bera ere enpresa bereko langilea bada, betetzen ari den lanpostuaren lanpostu berdina edo antzekoa betetzeko lehentasunezko eskubidea izanen du.

53. artikulua. Lanpostua uztea.

Langileak, edozein izanik ere haren kontratu mota, bertan behera uzten ahalko du lan harremana noiznahi, baldintza bakarra betez: enpresari jakinaraztea gutxienez 15 egun lehenago.

Langileak aurretik abisua emateko baldintza hori behar den epean betetzen ez badu, enpresak likidaziotik kentzen ahalko dio egun bateko soldataren zenbatekoa atzerapen egun bakoitzeko.

Enpresak abisu hori behar den epean jasotzen badu, langileari likidazioa ordaindu beharko dio epea amaitutakoan. Enpresak betebehar hori betetzen ez badu, langileak eskubidea izanen du egun bateko soldata jasotzeko likidazioaren ordainketan atzeratutako egun bakoitzeko

54. artikulua.

Behin-behineko langileek lanpostua utziko dute hitzartutako epea amaitzean edo hark zehazten duen berariazko zeregin edo zerbitzuaren amaieran; langileak ez du izanen ezein kalte-ordainetarako eskubiderik, dagokion likidazioa izan ezik. Betebehar bakarra, enpresarentzat aginduzkoa, hamabost eguneko aurreabisuarekin lana utziko dela idatziz jakinaraztea izanen da. Betebehar hori betetzen ez bada, aurreabisuaren atzerapenaren egun kopuru baliokidearen kalte-ordaina soilik eman beharko du enpresak. Hala eta guztiz ere, kontratua amaitzean edo bere helburua betetzean behin-behineko langileak lana uzten ez badu eta bere zerbitzuak eskaintzen jarraitzen badu, langile finkotzat hartuko da ondorio guztietarako.

55. artikulua.

Bitarteko langileak lana utziko du langile honek berak ordezten duen titularra itzuli eta zazpi egunetara, baldin eta bere kontratu idatzian ordeztuarentzat gehienez hamabost eguneko egokitzapen-aldi bat ezartzen ez bada. Dena dela dagokion likidazioa jasotzen ahalko du.

Aurrekoa hala izanik ere, aldi baterako ezintasunaren ondoriozko ordezpenen kasuetan izan ezik, enpresak nahitatez bitarteko langilearen lan-uztea jakinarazi beharko du hamabost eguneko aurreabisuarekin; hala ere, aurreabisu honetan hutsegiten bada, idatziz egiten ez den kasuan izan ezik, aurreabisuaren atzerapenaren egun kopuru baliokidearen kalte-ordaina soilik eman beharko du enpresak.

Kasu orotan, betebehar hauek bete ezean plantillako langile finkotzat hartuko da ondorio guztietarako.

56. artikulua. Trukeak.

Enpresa eta kategoria berekoak izanik lanpostua herri desberdinetan duten langileek beren lanpostuen trukea ituntzen ahalko dute, enpresak kasuan-kasuan erabakitzen duenaren zain.

Horretarako, zerbitzuaren beharrizanak, destino berrirako bi trukatzaileen gaitasuna eta kontuan hartu beharreko gainerako inguruabarrak kontuan izanen dira. Trukea gauzatuz gero, langileek onartu egingo dituzte sor daitezkeen soldata aldaketak eta uko eginen diote lekualdatzearen gastuen kalte-ordain orori.

57. artikulua. Goragoko mailako lanak.

Behar izanez gero, hitzarmen honen eremuaren barreneko langileak goragoko lanpostu bat betetzera behartzen ahalko ditu enpresak, bi hilabete jarraitu edo txandakako lau gainditzen ez dituen epe baterako. Egoera horretan dagoen artean izatez betetzen ari den funtzioari dagokion ordainketa jasoko du, eta langileak bere aurreko postura itzuliko dira aldaketa eragin zuen arrazoia desagertzen denean.

Artikulu honetan xedatutakoa ez da aplikatuko ondorengo arrazoiengatiko ordezpen kasuetan: ezintasun iragankorra, amatasuna, behin-behineko baliaezintasuna, oporrak, baimenak eta enpresak nahitaez eman behar dituen eszedentziak. Azken kasu horietan, eragin duten inguruabarrek irauten duten denbora guztia barne hartuko du ordezpenak eta ez dute lanpostua finkatzeko eskubiderik ematen, baina bai ordea alde ekonomikoa kobratzeko ordezpenak irauten duen bitartean.

Langile batek goragoko kategoriako lanak bi hilabete jarraitu edo txandakako lau hilabete baino denbora luzeagoan zehar burutzen dituenean eta aurreko paragrafoan aipatzen diren kasu bereziak agertzen ez direnean, goragoko kategoria finkatuko du, beti ere hitzarmen kolektibo honetan igoeretarako ezarritako arauek uzten badute. Goragoko plaza betetzeko oposizio-lehiaketa bat galdatzen bada, proba hori burutzeko eskubidea izanen du, plaza hori betetzeko behar bezala egiaztatutako titulua izatea eskatzen denean izan ezik.

Artikulu honen 2. paragrafoan xedatutakoa gorabehera, gaixotasunen ondoriozko aldi baterako ezintasunengatik, ezintasun hori hasi eta sei hilabeteren buruan, hitzarmen honen 42. artikuluan igoerarako aurreikusitako mekanismoa abiaraziko da, eta merezimendu berberak izanez gero 6 hilabete horietan ordezpena egiten aritu den langileak izanen du lehentasuna.

58. artikulua. Beheragoko mailako lanak.

Enpresaren beharrengatik langile batek esleituta daukan kategoria baino beheragoko kategoriako lanak egin behar baditu, bere kategoriari dagokion soldata gordeko du. Egoera horrek ezin izanen du bi hilabete baino gehiago iraun, eta premia larriko kasuan, enpresak Lan Agintaritza eskudunaren baimena beharko du langilea beheragoko kategoriako lanak betetzen edukitzeko, aurrez enpresa batzordeak aginduzko txostena osatu ondoren.

Langileak bidezkotzat jotzen badu, Lan arloko Epaitegian kontratua desegitea planteatzen ahalko du bidegabeko kaleratzea izanen balitz bezala, bere lanbide prestakuntzaren kalte larria edo bere duintasunaren gutxiespen nabarmena gertatu dela irizten badu.

Aldaketa langilearen eskariz egin bada, egoera berriari dagozkion soldata eta kategoria esleituko zaizkio langileari.

Ez dira beheragoko kategoriako lantzat hartuko erabiltzen dituen makineria eta tresnak zaindu eta garbitzeko langileak burutzen dituen lanak, lan horiek bere eginkizunen barrenean daudela jotzen baita.

59. artikulua. Gaixotasun edo istripuagatiko bajak.

Gaixotasun arrunten edo istripuen kasuetan, lanekoak zein ez, enpresak Gizarte Segurantzaren prestazioak osatuko ditu langilearen jardun arrunteko soldata errealaren %100 arte. Onura hau lortzeko ezinbesteko baldintza izanen da ondorengo baldintzak betetzea:

1. Aurreko 12 hilabeteetan izandako gaixotasun arruntak edo istripuak, lanekoak izan zein ez, kontatuta, lantokiko langile guztien arteko absentismo indizearen arabera, honako eskala hau ezartzen da hurrengo urteetarako:

0tik %4,70erainoko absentismoa, soldataren %100.

%4,71tik %5,70erainoko absentismoa, soldataren %95.

%5,71tik %6,70erainoko absentismoa, soldataren %90.

%6,71tik %7,70erainoko absentismoa, soldataren %85.

%7,71tik %8,70erainoko absentismoa, soldataren %80.

Absentismo indizea hilean galdutako orduen kopurua laneko ordu teorikoen kopuruaz zatituz kalkulatuko da.

2. Absentzia lehenbailehen jakinarazi dagokion Agintariari eta bajaren edo altaren partea aurkeztu Zerbitzu Medikoan, 24 orduko epearen barrenean; ordutegi horretatik kanpo, Atezaintzan aurkeztu beharko da.

3. Gaixotasuna edo istripua jasan duen langilea astean behin joanen da enpresako Zerbitzu Medikora eta gaixotasunak joan-etorria eragozten badio, jakinarazi eginen du, medikuak etxean bisita egin diezaion.

Enpresa batzordeari hilero emanen zaio absentismo indizearen berri; berak aztertu eginen du eta egokiak iruditzen zaizkion neurriak erabakiko ditu.

60. artikulua. Erretiroa.

Hitzarmen kolektibo honek indarra duen bitartean, enpresak erretiro partzialak eginen ditu 60 urte dituzten langileekin, eta erreleboko kontratuak aldi berean, une bakoitzean indarra duen legeriari jarraituz eta horrek bide ematen badu.

Kontratazioa azken aldian zerbitzuak Leitzako lantokian eman dituzten langileen artean eginen da, dela behin-behineko kontratuen bidez, dela ABLEen bidez.

Etorkizunean kontratazio mugagabeak egin behar badira, lehentasuna izanen dute une horretan "erreleboko kontratuarekin" daudenek. Erreleboko kontratuarekin lanpostu berean aritzea lehenik eta antzinatasuna bigarrenik izanen dira lehentasunerako irizpideak.

Langileen Estatutuaren 12. artikuluan ezarritako erreleboko kontratua (erretiro partziala) edo borondatezko erabateko erretiroa aukeratzen ahal dute langileek.

Uztailaren 1eko 14/2005 Legeari jarraituz eta kontuan hartuta hitzarmen honen enpleguari buruzko edukia eta helburuak, lan kontratu guztien nahitaezko amaiera ezartzen da, kalte-ordain edo konpentsaziorako eskubiderik gabe, erretiro arrunteko adinera iristen diren langileentzat (65 urte gaur egun), Legeak eskatzen dituen gainontzeko baldintzak betez gero.

Aurrekoa gorabehera, oinarri arautzailearen %100era iristen ez den langileak hura iritsi arteko denboran jarrai dezake enpresan.

61. artikulua. Euskara.

Ahal dela, iragarki-oholean zein atalak, departamentuak etab. identifikatzeko errotuluetan argitaratzen diren informazioak euskaraz eta gaztelaniaz idatziko dira.

Euskara ikasten edo alfabetatzen ari diren pertsonei enpresak eskolen zenbatekoa zein horretarako lana utzi behar duteneko denbora ordainduko die; denbora hori, egunean ordubete izanen da asteko hiru egunetan, arratsaldeko txandan lan egitea egokitzen zaienean.

Langileen belaunaldi berriak lan arloan euskara normalizatzeko aukera ematen duenez, hitzarmen hau sinatu duten aldeek Leitzako lantokian harremanetan euskara ikasi, normalizatu eta erabiltzeko alternatibak eskaintzeko konpromisoa hartu dute. Horretarako, urtean aurrekontuak esleituko dira prestakuntza planen barrenean.

62. artikulua. Aseguru kolektiboa.

Enpresak 13. eranskinean ezarritako arriskuak estaliko dituen bizitza-poliza bat kontratatuko du.

Prima ordaintzeko, enpresak kopuru honen %55 jarriko du eta langileak %45.

63. artikulua. Lanbide-taldeak.

Ondoren deskribatzen eta zerrendatzen diren lanbide-taldeak eta lanpostuak adierazgarriak besterik ez dira.

Lanpostu edo talde bakoitzerako aipatzen diren eginkizunek eginkizun nagusia definitzeko edo espezialitatea identifikatzeko soilik balio dute.

Zuzendaritzak eta enpresa batzordeak ezarritako lanbide-taldeak gaur egun dauden teknologia berrien arabera behar bezala aplikatzea aztertuko dute.

Aldeetako edozeinen ustez gaizki sailkatutako lanpostuak berrikusiko dituzte.

Teknologia berrien ondorioz enpresan sartutako makinen definizioak aztertuko dituzte.

Lanbide-talde bakoitzeko kategorien eta lanpostuen definizioa.

-1. taula.

A. Zuzendaritzako kideak.

1) Zuzendari nagusia: enpresaren jarduera orokorra zuzentzen du.

2) Zuzendariak: Zuzendaritza Nagusiaren aginduetara eta esleitutako zerbitzu edo kudeaketa unitatearen barrenean, enpresaren politika nagusia garatzen eta aplikatzen dute; kargu hauek eta antzekoak dira ezaugarri hauek biltzen dituztenak: produkzioko zuzendaria, zuzendari teknikoa, finantza zuzendaria, administrazio zuzendaria, merkataritza zuzendaria edo langileriaren zuzendaria.

Halaber, kategoria honetan fabrika eta enpresa zuzendariak sartzen dira.

3) Zuzendariordeak: zuzendariei eginkizun guztietan laguntzen diete eta haiek ez daudenean beren gain hartzen dute erantzukizuna.

4) Teknikari buruak: zuzendari edo zuzendariordeen agindupean egonik zuzendaritza eginkizunaren goiko mailan laguntzen dute.

Enpresaren Zuzendaritza Nagusiari dagokio zuzendarien taldearen barrenean dauden lanpostuak zehazki ezartzea; horretarako, kasu bakoitzean dagokion kategoria finkatu beharko du.

B. Profesional teknikoak.

Profesional horiek kategoria hauetan banatzen dira:

1) Goi-mailako profesional teknikoa: Goi mailako Eskola Tekniko batek edo Unibertsitateko Fakultate batek emandako titulua edukita, enpresaren barrenean erantzukizun zuzenez bere lanbideari dagozkion eginkizunak betetzen ditu.

2) Erdi mailako profesional teknikoa: Erdi mailako Eskola Tekniko batek emandako titulua edukita, enpresaren barrenean erantzukizun zuzenez bere lanbideari dagozkion eginkizunak betetzen ditu.

3) Diplomadunak: Espainiako Eskola Teknikoetan galdatzen diren baldintzak bete beharrik ez duten ikasketak eskaintzen dituzten ikastetxeek emandako diploma edukita, industriaren barrenean eginkizun teknikoak betetzen dituzte, diploma horren indarrez kontratatuak izanik.

C. Teknikariak.

Teknikari horiek azpitalde hauetan banatzen dira:

1) Antolaketako langileak: produkzioko prozedurak eta merkataritza eta administrazio eragiketak aztertu, aholkatu eta, hala badagokio, antolatu egiten dituzte. Denbora eta mugimenduen azterlanak planifikatzen eta aztertzen dituzte, errendimendua hobetzeko gomendioak egiten eta hauek betetzen direla zaintzen dute. Langile horiek kategoria hauetan banatzen dira:

a) Antolaketako burua: ekimen eta erantzukizunez metodo eta denbora hobekuntzei buruzko azterlan mota oro burutzen du, denbora eta mugimenduen azterlanak planifikatu eta zaindu eta, kasu guztietan, kontrolatzen ditu.

b) Antolaketako lehen mailako teknikaria: lanen antolamendu zientifikoari dagozkion ondoko eginkizunak burutzen ditu: mota guztietako denborak kronometratzea eta aztertzea. Metodoen azterlanak, edozein langile kopurutako taldeen saturazioarekin. Zenbatespen ekonomikoak, fitxa osoak burutzea, programatzeko ondorioetarako lan-lote edo multzoen definizioa, horien lan-denboraren kalkulua, kasu guztietan zama taulen ezarpena. Materialen beharrizan osoak ezartzea, antzemate zailtasunetatik abiatuta, mota guztietako atalkapen eta ondoriozko krokisatzea egitea, ikuskapena eta kontrola, atal-loteen muntaiarako ordenaren ezarpenean edo produkzioaren antolamendu orokorrerako funtzio-zonen ezarpenean laguntzea, zailtasun ertaina duen planteamenduan eta irudikapen grafikoetan laguntzea eta horiek ebaztea.

c) Antolaketako bigarren mailako teknikaria: lan hauek egiten ditu: mota guztietako kronometrajeak; arauak egiteko datuak aukeratzen laguntzea; zailtasun ertaineko lan metodoak aztertzea, hiru aldagai arteko taldeen saturazioarekin; zailtasun ertaineko fitxa konplexuak egitea; zenbatespen ekonomikoak; datuak hartzeko antzemate zailtasunak dituzten obren berri ematea; lan multzoak definitzea, goragokoek emandako jarraibide zehatzen arabera; denbora kalkulatzea, planoan hartutako datuez, eta zailtasun ertaineko obrak eta ondoriozko krokisatzea, materialen beharra ebaluatzea zailtasun arrunteko kasuetan, ikuskapena eta kontrola, planteamenduak eta irudikapen grafikoak egiten laguntzea.

d) Antolaketako laguntzailea: lanaren antolaketa zientifikoaren inguruko lan errazak egiten ditu: kronometraje errazak; datuen metaketa jarraibide ongi zehaztuen arabera; lan, azterketa eta ordainketa orriak ikuskatu eta prestatzea; eragiketa errazak kontrolatzea; plano eta agiriak artxibatu eta zenbakitzea; material-izakinen fitxak eta eskari-mugimenduen fitxak (batez ere, informazioa transkribatzea); denbora kalkulatzea ondo definituriko datu eta arau edo tarifetatik abiatuta eta irudikapen grafikoak.

2) Bulego Teknikoko langileak: goragokoen zuzendaritza eta zaintzapean, lan teknikoak egiten dituzte mota guztietako proiektuak prestatzen eta gauzatzen laguntzeko. Langile horiek kategoria hauetan banatzen dira:

a) Bulego Teknikoko burua: proiektuak aztertzera eta obra eta muntaia mota oro burutzeko zerbitzuen jarduera zuzentzen du, bai eta enpresaren instalazioen hobekuntza eta/edo erreforma ere.

b) Delineatzaile-proiektugilea: zein ataletan ematen dituen zerbitzuak, haren espezialitatearen barrenean, nagusi hurrenak adierazten duena proiektatu edo zehazten du, edo nagusi hori gabe, berak asmatutakoa egiten du eskaintzen zaizkion datuak edo baldintza teknikoak kontuan izanik. Gai izan behar du muntaiak zuzentzeko, aztertu beharreko obren kokalekuen plano topografikoak egiteko, muntatzeko eta birplanteatzeko. Eginkizun horien barrenean, hauek dira nagusiak: mota guztietako proiektuak aztertzea, eraiki beharreko obra garatzea eta aurrekontuen oinarri izan daitezkeen datuak prestatzea.

c) Delineatzailea: proiektu errazak garatzen ditu, planoak naturaletik zein aztertutako eskema edo aurreproiektuetatik abiatuta altxatzen ditu, makineriaren osoko krokisak egiten, kontsulta eta obretarako materialen eta garrantzi handiagoko garraioak eskatzen eta piezen eta mekanismoen edo egitura metalikoen erresistentzia kalkulatzen du, jasaten dituzten lan-baldintzak eta ahaleginak aldez aurretik ezaguturik.

3) Kalitate Kontroleko langileak: zerbitzuburuaren edo produkzioko teknikariaren jarraibideen pean, produkzio prozesuan den produktua bezeroak emandako zehaztapenetara edo fabrikazio aginduetara egokitzen den zaindu eta egiaztatzen dute, inguruabarrek gomendatzen duten saio edo azterketak eginez. Aldi berean, euren goragokoari edo produkzioko langileei antzematen dituzten anomalien berri emanen diete, produkzioa amaitu artean fabrikazio prozesu osoan zuzendu daitezen edota, ahal den neurrian saihets daitezen. Langile horiek kategoria hauetan banatzen dira:

a) Kalitate kontroleko burua: bere ekimen eta erantzukizunez atal hau zuzentzen du eta fabrikazio prozesuan dagoen edo bukatuta dagoen produktua bezeroak eskatutako edo zuzendaritzak ezarritako zehaztapenetara egokitzen den ziurtatu eta egiaztatzen du.

b) Kalitate kontrolatzailea: bere ekimen eta erantzukizunez, fabrikazio prozesuan dagoen edota fabrikaturik dagoen produktuak aurretik finkatutako ezaugarri espezifikoak betetzen dituen egiaztatzen du, sortzen diren akatsak atzematen ditu eta haien berri ematen du produkzioa zuzen dadin eta eskatutako zehaztapenetara egoki dadin.

c) Kalitate kontroleko laguntzailea: fabrikazio prozesuan dagoen edo fabrikaturik dagoen produktuaren kontrolerako zeregin osagarriak burutzen ditu.

4) Laborategiko langileak: ikerketa eta analisi kimiko eta fisikoak egiten dituzte, bereziki industriarekin loturiko produktu horiek guztiak probatu, landu, hobetu eta egiaztatzera zuzenduak, baita fabrikazio prozesuak egokitzera eta aztertzera ere, hoberenak izan daitezen. Langile horiek kategoria hauetan banatzen dira:

a) Laborategiko burua: bere ekimen eta erantzukizunez enpresak fabrikatzen dituen produktuen kalitate eta ezaugarrien hobekuntzari buruzko ikerketak zuzentzen ditu, aldi berean, fabrikazio prozedurak egiaztatu eta optimizatzen ditu. Halaber, industria honetan parte hartzen duten produktu mota guztien egiaztapen eta analisiaren arduraduna da.

b) Analista: prozesuaren, lehengaien eta produktu fabrikatuen kontrolean lanik kontuzkoenak egiten ditu. Behar adina ezagutu behar ditu kimika analitikoa, kualitatiboa eta kuantitatiboa, edozein analisi arazorik gabe jarraitu ahal izateko moduan. Laborategiko gainerako langileen gaineko erantzukizuna eta agintea izanen du, halakorik badago.

c) Prozesuko Analista: ore eta paperaren eta paper industriarekin loturik dauden gainerako produktuen analisia burutzen du, baita analistak edo laborategiko buruak gainbegiratuta espezializazio handiagoa behar duten bestelako analisiak ere.

d) Laborategiko laguntzailea: bere kabuz industria honek eskatu ohi dituen analisirik errazenak egiten ditu.

5) Informatikako langileak: datu zientifikoak, teknikoak, merkataritzakoak, ekonomikoak, pertsonalak edo bestelakoak sailkatu, aukeratu, kalkulatu, ebatzi eta erregistratzen dituzten makina automatikoak zein datuen antolamendurako ekipoari osagarri zaizkion gainerako aparatuak ere maneiatzen dituzte, hala nola txarteletatik zintetara edo alderantziz datuak transferitzen dituztenak, abiadura handiko inprimagailuak eta abar. Langile horiek kategoria hauetan banatzen dira:

a) Informatikako burua: teknikari hau ordenagailuak instalatu eta ustiatzeko jardueren zuzendaritzaz eta plangintzaz arduratzen da. Gainera, aplikazioen analisietarako eta programazioetarako lantaldeen erantzukizuna du. Halaber, lantalde horiek garatzen ahal dituzten kudeaketa-aplikazio arrunten analisiaren eta programazioaren inguruko arazoak ebatzi behar ditu.

b) Datu-prozesuetako analista: eragiketen analisi organikoak egiaztatzen ditu, haien soluzio mekanizatua lortzeko honako honi dagokionez: jarraitu beharreko eragiketa-kateak, lortu beharreko dokumentuak, horien diseinua, landu beharreko fitxategia eta honen tratamenduaren definizioa, programa bakoitzeko "logika" proben programarekiko lankidetza eta aplikazio konplexuetako espediente teknikoen amaiera.

c) Programatzailea: analistak definitutako prozesu konplexuak aztertzen ditu eta tratamendurako organigrama zehatzak egiten. Adierazten zaion programazio-lengoaian programak idazten ditu eta saio-probak moldatzen, programak prest jartzen ditu, horien espediente teknikoak osatzen ditu eta kontsolaren eskuliburua dokumentatzen du.

d) Operadorea: multiprogramazioan lan egiteko gai diren sistema eragileaz hornituta dauden ordenagailuak erabili eta kontrolatzen ditu, batez ere izaera konplexuko ekipo eta programak. Eragiketa arazoak atzematen eta ebazten jakin behar du, eragiketako edo makinako errore gisa definituz.

D. Administrariak.

Langile horiek kategoria hauetan banatzen dira:

1) Administrazioko burua: zenbait atal edo departamenturen kudeaketa administratiboaren erantzukizuna du, eta zerbitzuek eskatzen duten administrazioko langileak bere aginduetara ditu.

2) Administrazio Ataleko burua: bere karguko atala bideratu eta zuzentzeko ardura du, baita bere menpe dauden langileen artean lana koordinatu eta banatzeko ere.

3) Lehen mailako administrari-ofiziala: bere kargura eginkizun jakin bat du, eta horren baitan ekimenez jarduten du eta erantzukizuna du. Bere aginduetara langileak izan ditzake edo ez.

4) Bigarren mailako administrari-ofiziala: ekimen eta erantzukizun mugatuak dituelarik, bigarren mailako lanak egiten ditu; dena dela, administrazio-teknikaren gaineko ezagutza orokorrak behar dira halako lanak egiteko.

5) Administrari laguntzailea: administrazioko funtsezko eragiketak egiten ditu, batik bat horiei dagozkien lan mekanikoak.

6) Telefonozaina: telefonogunea eta/edo telex edo teletipoa bere kargu du, enpresaren bulego desberdinen arteko eta kanpoaldearekiko komunikazioak ezartzeko. Harreragile funtzioak ere ezartzen ahalko zaizkio.

E. Erdi mailako bestelako kargudunak.

1) Ataleko burua: atalburu kategoriarekin aipatutako lanpostuez gain, kategoria bereko beste batzuk egon daitezke euren goragokoen aginduetara, lanak banatu eta ongi burutzeko erantzukizuna dutenak, zeinek bere atalean.

2) Kontramaisuak: atalaren jarduera egokia zaintzen dute atalburuaren agindu zuzenetara. Aipatutako burua bertan ez bada, lana antolatzeko eta unean uneko edo halabeharrezko desberdintasunen bat zuzentzeko beharrezko ezaguerak dituzte.

Kontramaisuak bi kategoriatan banatzen dira: Lehen eta bigarren kategoriakoak, atalaren garrantziaren arabera edo esleitzen zaizkien erantzukizun edo eginkizunen arabera. Fabrikazio ataleko kontramaisuak eta konponketa atalekoak lehen kategoriakoak izanen dira.

3) Lanbide osagarrietako ikuskatzailea: Atalaren jarduera egokia zaintzen dute ataleko-tailerreko buruaren agindu zuzenetara. Aipatutako burua bertan ez bada, lana antolatzeko eta unean uneko edo halabeharrezko matxuraren bat zuzentzeko ezaguera nahikoak dituzte.

4) Areto-maisua:

a) Lehen mailako areto-maisuak: aretoko langileriaren zaintza hutsez gain, bere gain dute bertako produkzioaren kontrola, luzapen eta fakturazioez arduratuz. Lan horretara esleitutako langileriaren gaineko agindu zuzena dute.

b) Bigarren mailako areto-maisua: lehen mailakoen eginkizun berak betetzen ditu, fakturazio gaiei dagokienean izan ezik. Aretoko langileriaren erantzukizunez gain, fardo-egile eta enbalatzaileen gaineko agindu zuzena du.

F. Zerbitzuetako langileak.

Talde honek ondoko kategoriak biltzen ditu:

1) Zerbitzuetako burua: faktoria bateko zerbitzuak, hala nola biltegiak, materialak metatzea, zamalanak eta garraioa, betetzen dituzten langileen jarduera zuzentzen du, bere aginduetara dagoen langileriaren artean lana banatuz eta erabiltzen diren ibilgailuen mantentze-lanak eginez.

2) Zerbitzuetako kontramaisua: goragoko baten agindupean, ekimen eta erantzukizunez, arlo bateko edo batzuetako zerbitzuak garatzen ditu.

3) Biltegizaina: materialak eta salgaiak jasotzeko eta biltegi barrenean banatzeko ardura du, baita eskariak bideratzeko, lan-jardun bakoitzeko mugimenduak liburu eta fitxategietan erregistratzeko eta sarrera eta irteera parteak osatzeko ere. Bere menpe dauden igorleen artean, halakorik badago, lana antolatuko du.

4) Igorlea: igorri behar dituen artikuluen ezaguerak edukita, irteera-txartel edo agindua eman ondoren, haiek bidaltzen ditu, biltegiko salgai edo produktuen zaintza, garbiketa eta birjarpena zainduz eta bidezko oharrak idatziz.

H. Zaintza eta kontroleko langileak.

Talde honek ondoko kategoriak biltzen ditu:

1) Etxezaina: atezain, mandatari eta garbiketako langileak eta beste bere aginduetara izanik, zerbitzua banatzeaz arduratzen da eta enpresako eremu guztien ordena, garbitasun eta txukuntasuna zaintzen du.

3) Atezaina: atezaintzaren arreta eta zaintzaz arduratzen da, baita, pisatzailerik ez bada, baskulako eragiketena ere. Jendeari enpresako eremu guztietara heltzeko informazioa emanen dio eta, beharrezkoa denean, bulego orduez kanpo, telefonoaz ere arduratuko da.

5) Zinpeko guarda edo zinpeko zaintzailea: enpresaren barrutiko segurtasuna eta zaintza esleitzen zaizkio, kargu hau arautzen duten legezko xedapenei jarraiki, instalazioei edo langileriari sortzen ahal zaizkion kalte eta galeren prebentziorako, horiek eragin dituztenak aurkitzeko, agintaritza eskudunaren edo agintaritza horren agenteen eskuetan jartzeko eta, hala badagokio, atezaintza zerbitzuaz arduratzeko.

I. Garbiketako eta kanpoko artapeneko langileak.

Talde honek ondoko kategoriak biltzen ditu:

1) Garbitzailea: esleitzen zaizkion enpresako eremuen garbiketaz eta ordena egokiaz arduratzen da.

2) Lorezaina: faktoriaren edo lantokiaren ornamentazio eremuen mantentze-lana du bere gain.

J. Gizarte zerbitzuetako langileak.

Talde honek ondoko kategoriak biltzen ditu:

1) Gizarte laguntzailea: bere goragokoaren aginduetara enpresan gizarte laguntzako zerbitzuak bere gain hartzen ditu eta kolektiboko kideek arlo pertsonal eta sozialean dituzten zailtasunak ebazten laguntzen du.

2) Sukaldaria: enpresako jantokiko menua egiten du, bere laguntzaileen lana zaindu eta koordinatzen du, laguntzailerik badago, eta bere eginbeharra betetzeko beharrezkoak zaizkion materialak eskatu edo erosten ditu.

3) Sukaldari laguntzailea: sukaldaritzako ezaguera praktikoak izanik, sukaldariak agintzen dizkion eragiketak burutzen ditu, lokalaren garbitasuna eta ordena egokia zaintzen du eta horretaz arduratzen da, baita erabilitako mahaiko tresnak garbitzeaz ere.

4) Zerbitzaria: enpresako jantokian zerbitzatzen du, mahaiak prestatzen ditu, mahaiko tresnak eta ongailuak jartzen ditu eta erabilitakoa jasotzen du.

-2. taula.

A taldea:

-Peoia: 18 urte baino gehiagoko langileak dira, bere lanak ahalegin fisikoa eta arreta besterik ez du eskatzen.

B taldea:

-Estukatze eta size-press sukaldariaren laguntzailea: estukatze eta size-press sukaldariari lanpostu horren eragiketa guztietan laguntzea da bere eginkizuna.

-Gofratzeko makinaren laguntzailea: gofratzeko makinaren gidariari lanpostu horren eragiketa guztietan laguntzea da bere eginkizuna.

-Ebakitzeko makina bikoitzeko 2. mailako laguntzailea: ebakitzeko makina bikoitzaren gidariari eta lehen laguntzaileari lanpostu horien eragiketa guztietan laguntzea da bere eginkizuna.

-Papera eta kartoia automatikoki paketatzeko-enbalatzeko-lotzeko makinako laguntzailea: papera eta kartoia automatikoki paketatzeko-enbalatzeko-lotzeko makinaren gidariari eta lehen laguntzaileari lanpostu horien eragiketa guztietan laguntzea da bere eginkizuna.

-Pintatzeko makinaren laguntzailea: pintatzeko makinaren gidariari lanpostu horren eragiketa guztietan laguntzea da bere eginkizuna.

-Etiketatzailea: langile honek etiketak prestatu eta jartzeko eginkizuna du.

C Taldea:

-Bobinatzeko eta birbobinatzeko II. makinen gidaria: bobinatzeko eta birbobinatzeko II. makinen gidariari lanpostu horren eragiketa guztietan laguntzea da bere eginkizuna.

-Ebakitzeko makina bakuneko laguntzailea: ebakitzeko makina bakunaren gidariari lanpostu horren eragiketa guztietan laguntzea da bere eginkizuna.

-Hautatzailea edo aukeratzailea: paper, kartoi edo kartoitxo orriak aukeratzea edo hautatzea eta akatsen arabera sailkatzea da bere eginkizuna.

D Taldea:

-Ebakitzeko makina bikoitzeko 1. mailako laguntzailea: ebakitzeko makina bikoitzaren gidariari lanpostu horren eragiketa guztietan laguntzea da bere eginkizuna.

-Gillotinazaina: gillotina arrunta gidatzea, elikatzea eta hustea da bere eginkizuna.

-Paketatzailea: paketeak egitea da langile honen eginkizuna.

-Balagilea: balak prestatzea da langile honen eginkizuna.

-Bobinagilea: bobinak egitea da langile honen eginkizuna.

-Fardogilea: fardoak egitea da langile honen eginkizuna.

-Kontatzailea: paper, kartoi edo kartoitxo orriak zenbatu, sailkatu eta biltzea da langile honen eginkizuna.

-Laborategiko laguntzailea: (lehen definitu da).

E Taldea:

-Gobratzeko makinaren gidaria: gofratzeko makina gidatu, elikatzea eta hustea da langile honen eginkizuna.

-Bobinatzeko eta birbobinatzeko I. makinetako laguntzailea: bobinatzeko eta birbobinatzeko I. makinen gidariari lanpostu horren eragiketa guztietan laguntzea da bere eginkizuna.

-Eskorgazaina: materialaren biltegiratze, zamalan, pilatze eta garraio zereginetan urkilako edo pintzako eskorgak gidatzea da langile honen eginkizuna. Eskorgaren mantentze-lana egin eta bere funtzionamendu egokia zaindu behar du, horretarako bidezko azterketa mekanikoak burutuz eta bere lan txandan gertatutakoa erregistratuz.

-Hondakin-uren instalazioko langilea: hondakin uren instalazioaren funtzionamendu egokia lortzea da bere eginkizuna, eta erregistroak ikuskatzen ditu, hoditeria zaintzen, beharrak aurreikusten, etab.

F Taldea:

-Ebakitzeko makina bakunaren gidaria: ebakitzeko makina bakuna gidatu, elikatu eta hustea da langile honen eginkizuna.

-Lanbide osagarrietako 3. mailako ofiziala: lanbide horretan jardutea ahalmentzen duen lanbide-heziketa izanik, zerbitzuak tailer mekanikoetan, elektrikoetan, aroztegietan, igeltserotzan, elektronikan, kontrolean eta abarrean egiten dituzte. 2. mailako ofizial izatera igarotzeko, hitzarmen honetan ezarritako arauei jarraiki, enpresak ezartzen dituen proba teoriko-praktikoak gainditu beharko ditu.

-Labaintzaile edo koipeztatzailea: beharra duten fabrikako instalazio guztiak koipeztatu eta labaintzea da bere eginkizuna, olio edo koipe maila kontrolatuz eta instalazioa behar bezalako labaintze egoeran izan dadin zainduz; horretarako aldizka azterketak egingo ditu.

-Garabi-pala-traktore gidaria: faktoriaren eremuan traktoreak, pala kargatzaileak, garabiak edo antzekoak gidatzea da bere eginkizuna, bidezko azterketa mekanikoak egiten ditu eta bere lan-txandan gertatutakoa erregistratzen du. Dagokion motako gidabaimena eduki beharko du.

-Uren tratamendurako instalazioko langilea: uraren tratamendurako lerroak eta ur freskoaren instalazio laguntzaileak funtzionamendu egoera ezin hobean izatea da bere eginkizuna; orobat, erreaktiboak biltegiratzea eta dosifikatzea, ur tratatuak biltegiratzea etab. Horrez gain, galdarako beharrizanak betetzeko eta hark behar bezala funtzionatzeko adineko kalitateko ur egon dadin zainduko du.

-Plastifikatzeko makinaren gidaria: plastifikatzeko makina prest jartzea, prozesuan gertatzen diren akatsak kokatzea eta konpontzea, makina gidatzea, lehengaiz hornitzea eta amaierako produktua hustea dira langile honen eginkizunak.

G Taldea:

-Lurrun-turbinaren gidaria: lurrunak edo urak mugitzen duen turbina baten funtzionamendua gidatzea eta kontrolatzea, energia elektrikoa sortuz eta fabrikako departamentu guztietara bidezko presioaz airea edo/eta lurruna igorriz, eta turbina abiaraztea eta beharrizanen arabera abiadura handitzeko edo txikitzeko taularen zehaztapenak jarraitzea dira langile honen eginkizunak.

-Estukatzeko makinaren laguntzailea: estukatzeko makinaren gidariari lanpostu horren eragiketa guztietan laguntzea da bere eginkizuna.

-Estukatze eta size-press sukaldaria: estukatze eta size-press saltsak (bainuak edo oreak) prestatzeko erabiltzen diren produktuak kargatzea, nahastea eta dosifikatzea dira langile honen eginkizunak.

-Bobinatzeko eta birbobinatzeko II. makinen gidaria: bobinatzeko eta birbobinatzeko II. makina gisa sailkatutako makinak gidatzea, elikatzea eta hustea dira langile honen eginkizunak.

-Papera eta kartoia automatikoki paketatzeko-enbalatzeko-lotzeko makinaren gidaria: papera eta kartoia automatikoki paketatzeko-enbalatzeko-lotzeko makinak gidatzea, elikatzea eta hustea dira langile honen eginkizunak.

-Kontrakolatzeko makinaren gidaria: kontrakolatzeko makina gidatzea, elikatzea eta hustea dira langilen honen eginkizunak.

-Pintatzeko makinaren gidaria: pintatzeko makina gidatzea, elikatzea eta hustea dira langile honen eginkizunak.

-Auto, kamioneta eta furgoneta gidaria: enpresako auto, kamioneta eta furgonetak gidatzea eta behar dituzten azterketa mekanikoak egitea dira langile honen eginkizunak. Haien zamalanetan laguntzen ahalko du. Legez galdatzen den gidabaimena izan beharko du.

-Prozesuko analista: (lehen definitu da).

H Taldea:

-Estukatzeko makinaren gidaria: estukatzeko makinak abiatu, gidatu, elikatu eta hustea dira langile honen eginkizunak, betiere "fabrikazio aginduan" zehaztutako ezaugarriei jarraiki.

-Bobinatzeko eta birbobinatzeko I. makinen gidaria: bobinatzeko eta birbobinatzeko I. makina gisa sailkatutako makinak gidatzea, elikatzea eta hustea dira langile honen eginkizunak.

-Ebakitzeko makina bikoitzaren gidaria: ebakitzeko makina bikoitza gidatzea, elikatzea eta hustea dira langile honen eginkizunak.

-Lanbide osagarrietako 2. mailako ofiziala: lanbide horretan jardutea ahalmentzen duen lanbide-heziketa izanik, zerbitzuak tailer mekanikoetan, elektrikoetan, aroztegietan, igeltserotzan, elektronikan, kontrolean eta abarrean egiten dituen langilea da. 1. mailako ofizial izateko, hitzarmen honetan ezarritako arauei jarraiki, enpresak ezartzen dituen proba teoriko-praktikoak gainditu beharko ditu.

-Lurrun-galdararen gidaria: galdararen eta lurruna sortzearekin zuzenean lotzen den ekipo eta instalazio guztien (erregaiak, erregailuak, haizagailuak, lurrun-sareak, gehigarriak elikatzeko ura, desgasifikazioa etab.) funtzionamendu egokiari eta segurtasunari eustea da bere eginkizuna.

-Kamioi gidaria: enpresako kamioiak gidatzea eta horiei bidezko azterketa mekanikoak egitea dira langile honen eginkizunak. Haien zamalanetan laguntzen ahalko du. Legez galdatzen den gidabaimena izan beharko du.

J Taldea:

-Lanbide osagarrietako 1. mailako ofiziala: lanbide horretan jarduteko ahalmena ematen duen lanbide-heziketa izanik, zerbitzuak tailer mekaniko eta elektrikoetan, aroztegietan, igeltserotzan, elektronikan, kontrolean eta abarrean egiten ditu.

-Analista: (lehen definitu da).

-Barreneko garraioen gidaria: kamioi gidariarentzat adierazitako eginkizunez gain, mota guztietako salgaiak enpresako leku batetik bestera garraiatzeaz arduratzen da. Legez galdatzen den gidabaimena izan beharko du.

1. Taula

2. taula

Definizioak:

Bobinatzeko eta birbobinatzeko I. makinak: 2,50 m. baino gehiagoko zabalera erabilgarria dutenak.

Bobinatzeko eta birbobinatzeko II. makinak: 2,50 m-ko zabalera erabilgarria edo txikiagoa dutenak.

Gizarte Segurantzako kotizazio tarifak.

Gizarte Segurantzari kotizatzeko tarifen sistemak dirauen artean, talde bakoitzari tarifa zenbaki bat dagokio ondoko parekatzearen arabera:

Aurreko parekatzeari jarraiki dagokiena baino tarifa handiagoaren arabera kotizatzen ari diren langileetako bakoitzak hala jarraituko du.

Langileei titulazioaren arabera parekatze taulan azaltzen dena baino tarifa handiagoa egokituz gero, haren arabera kotizatuko dute, betiere euren titulazioa kontuan hartuta kontratatu badituzte.

64. artikulua. Lanbide prestakuntza.

Hitzarmen hau sinatu duten alderdiak bat datoz enpresako langileen lanbide maila igotzeak duen garrantziarekin, eta prestakuntza iraunkorraren beharra aitortzen dute enplegua mantentzeko eta enpresaren lehiakortasuna hobetzeko modurik egokiena bezala.

Horretarako, enpresak urtero prestakuntza-plana eginen du, eta enpresa batzordeari plan horren berri emanen dio, horrek egokitzat jotzen dituen iradokizunak egin ditzan.

Lanpostuari egokitutako prestakuntza-jardueretara joatea nahitaezkoa izanen da. Laneko orduetatik kanpo ematen badira, hartan sartutako denbora aparteko orduaren %50az ordainduko da.

65. artikulua. Hutsegiteak eta zehapenak.

65.1. artikulua. Hutsegiteen sailkapena.

Eginiko hutsegiteak honela sailkatuko dira, kontuan hartuz hutsegitearen tamaina edo garrantzia: arinak, larriak edo oso larriak.

65.2. artikulua. Hutsegite arinak.

Hutsegite arin gisa ondoko hauek hartzen dira:

1) Edozein lan burutzean langileari egozten ahal zaizkion arduragabetasuna, axolagabekeriagatiko akatsak eta atzerapenak, betiere agindu zaion zerbitzuan gorabehera larririk sortzen ez badute.

2) Aldi baterako ezintasunarengatik lanera huts egitean, dagokion baja partea ez aurkeztea hurrengo 24 orduko epean.

3) Materiala zaintzean honen narriadura arina sor dezaten arduragabetasun txikiak.

4) Esleitu zaizkion makina edo tresnen garbitasunik eza, baldin eta enpresak horretarako baliabideak jarri baditu.

5) Jendeari behar bezalako arreta ez ematea, arreta hori bere laneko betebeharrei badagokie.

6) Lanekoak ez diren gaiei buruz jardunean zehar eztabaidatzea, agindu zaion zerbitzuan gorabeherak sortzen badituzte. Aipatutako eztabaidek iskanbila nabarmena sortzen badute, hutsegite larritzat har daitezke.

7) Irteera-ordua baino lehen arropa aldatzea, enpresak berariaz horrelakorik baimendu ez badu.

8) Paperak, trapuak, oskolak, zaborrak etab. biltzeko ontzietatik kanpora botatzea.

9) Lanorduetan lanarekin zerikusirik ez duten telefono-deiak egitea, baldin eta enpresak baimentzen ez baditu.

10) Ez dagokion txanda eta orduan lantokian sartzea, horretarako baimenik gabe.

11) Lanean jarraitzeko akats materialen edo material beharren berri goragoko buruari ez ematea, betiere nahaste larririk sortzen ez bada.

12) Laneko sarrerak eta irteerak jasotzeko arduradunen aurrean ez agertzea edo kontrol-erlojuan ez fitxatzea.

13) Familian izandako aldaketak, nahitaezko gizarte aseguruetan ondorioak izan ditzaketenak, behar den garaian ez jakinaraztea aurreikuspeneko eta familia laguntzako erakundeei.

14) Arropa edo gauzak aldageletatik kanpo uztea.

15) Lan-jardunetik kanpo esku-erremintak norbere erabilerarako baimenik gabe erabiltzea.

16) Makineria edo erremintak baimenik gabe erabiltzea.

17) Lan-jardunean zehar lanekoak ez diren jostaketetan edo irakurketetan aritzea. Horietatik kalte larria eratortzen bada, hutsegite larritzat hartuko da.

18) Baimenik gabe enpresako ibilgailuetara igotzea.

65.3. artikulua. Hutsegite larriak.

Hutsegite larri gisa ondoko hauek hartzen dira:

1) Hiru hilabeteko epean hutsegite arinean berrerortzea edo hura errepikatzea.

2) Lanera joanen ez dela behar bezalako lehentasunez ez adieraztea.

3) Egun batean lanera ez joatea bidezko arrazoirik gabe.

4) Nahitaezko gizarte aseguruetan, aurreikuspeneko erakundeetan edo Familia Laguntzan zein soldatan edo soldata osagarrian ondorioak izan ditzaketen datuak enpresari maltzurkeriaz ezkutatzea.

5) Zabarkeriaz edo utzikeriaz aritzea lanean, haren bilakaera ona edo produktuaren kalitatea larriki kaltetu dezakeenean.

6) Agindutako eginkizunak edo zerbitzuak garaiz ez betetzea, enpresari kalte larria eragiten zaionean.

7) Bere kargura dauden makina, material eta obretan ikusiriko kalte edo akatsak berehala jakitera ez ematea, enpresarentzat kalte larria sortzen denean.

8) Goragokoari obraren amaieraren edo lanean jarraitzeko material beharraren berri ez ematea, horregatik kalte larriak sortzen badira.

9) Liskar edo jokoetan parte hartzea.

10) Material, pieza, makina, erreminta, tresna eta altzariak baliogabetzea, narriatzea edo galtzea, langileari egozten ahal zaion zuhurtziagabekeriagatik.

11) Iragarki oholetan kokatutako jakinarazpenak narriatzea edo baliogabetzea.

12) Atal, bulego edo lan-eremutik ateratzea behar bezalako baimenik gabe. Horren ondorioz enpresari kalte larria sortzen bazaio edo lankide batek istripuren bat izaten badu, oso larritzat har daiteke.

13) Enpresaren egoitzako altzarietan edo hormetan idatzi edo kartelak ezartzea. Kartel horiek enpresarentzat edo bertako edozein langilerentzat iraingarriak badira, hutsegitea oso larritzat hartuko da.

14) Baimen bat lortzeko iruzurra edo itxurak egitea.

15) Enpresak berariaz baimendu gabeko pertsonak bertako ibilgailuetan igotzea.

16) Lanean mozkortzea edo drogak hartzea.

17) Lanean zuhurtziarik gabe jokatzea. Jokabide hori hutsegite oso larritzat joko da, baldin eta lankideak arriskuan edota instalazioak hondatzeko zorian jartzen badira.

Ondoko kasuetan zuhurtziagabekeria dagoela susmatzen da:

a) Istripuak sortzeko arriskua izanik motore edo makinak abiarazten badira.

b) Estutu, lotu edo eutsi gabeko arropa kateatu dezaketen makina edo transmisioen ondoan erabiltzen bada. Enpresak eman beharko dio langileari egin behar duen lanerako arropa egokia.

c) Goi-tentsioa dagoen instalazioetan lanak egitea, lineak moztuta daudela egiaztatu gabe.

d) Zintzilik dauden kargen azpitik pasatzea edo horien azpian jartzea, beharrik gabe.

e) Norberaren ekimenez eta baimenik gabe babeserako gailuak eta tresnak aldatu edo kentzea.

18) Debekatutako tokietan baimenik gabe sartzea.

19) Sexu desberdineko langileentzako garbigeletan sartzea, horretarako baimenik izan gabe.

20) Menpeko langileei laneko segurtasun eta higiene arauak hausten uztea.

21) Debekatuta dagoen tokietan erretzea.

22) Lan-jardunetik kanpo enpresaren makinak edo materiala norbere gauzetarako baimenik gabe erabiltzea.

23) Enpresako zerbitzu medikoek aldizkako osasun-azterketa egin diezaioten ukatzea.

24) Behar fisiologikoak komunetik kanpo egitea.

25) Jarraian eta ohitura gisa, norberaren garbitasun eta txukuntasunik ez izatea, lankideengan arrazoizko arrenkura sorrarazten duenean.

65.4. artikulua. Hutsegite oso larriak.

Hutsegite oso larri gisa ondoko hauek hartzen dira:

1) Sei hilabeteko epean hutsegite larrian berrerortzea edo hura errepikatzea.

2) Bi hilabeteko epean bi egunetan lanera ez etortzea, bidezko arrazoirik gabe.

3) Iruzurra, leialtasun eza edo konfiantza-abusua norberari agindutako kudeaketetan, eta ebastea edo lapurtzea.

4) Enpresaren lehengai, produktu erabilgarri, erreminta, makina, gailu, instalazio, eraikin, altzari, tresna eta dokumentuak suntsitu edo hondatzea.

5) Eritasunaren edo istripuaren itxurak egitea.

6) Baimenik gabe enpresako ibilgailuak gidatzea.

7) Baimenik gabe norberarentzako lanak egitea lanaldian zehar.

8) Goragokoek indarreko lege eta hitzarmenen arabera emandako aginduak ez betetzea, eta gainerakoak horretara bultzatzea.

9) Lan-kontrolerako dokumentuetako datuak faltsutzea.

10) Lan-istripuaren itxurak egiteko norbere buruari borondatezko lesioak egitea edo lan-istripua izan denaren itxura egitea lanetik kanpo izandako lesioak lanekoak balira bezala sinestarazteko.

11) Lanean sarritan mozkortzea edo drogak hartzea.

12) Enpresaren isilpeko gutunen sekretua haustea.

13) Enpresari lehia egitea edo negozio berberetan edo antzekoetan zerbitzuak ematea, enpresaren baimenik gabe.

14) Hitzezko eta egitezko tratu txarrak ematea, agintekeria edo errespetu falta larria buruei, lankideei eta menpekoei, baita haien ahaideei ere.

15) Agintekeria. Goragoko batek egitate arbitrario bat beheragoko baten kaltetan eta legezko agindu bat hautsiz egiten badu, aipatutako egintza agintekeriatzat eta hutsegite oso larritzat hartuko da; ondorioz, bidezko espedientea irekiko da.

Kasu horietan, langile interesdunak enpresa batzordeari edo langileen ordezkariei egitatea jakinaraziko die hiru eguneko epean eta horiek enpresaren zuzendaritzari igorriko diote berria. Enpresak bidezko espedienteari ekingo dio enpresa batzordearen edo langileen ordezkarien jakinarazpena hartu eta 10 eguneko epean, gehienez ere.

Enpresaren zuzendaritzak ez badu esandako espedientea aipatutako epearen barrenean hasten, kaltetuak, 15 eguneko epean, idatziz emanen dio horren berri Probintziako Lan Ordezkaritzari, langileen ordezkarien edo enpresa batzordearen bitartez. Ordezkaritzak bidezkotzat jotzen badu, gaiaren aurrekariak eskatuko dizkio enpresari eta bidezko aholkuak eman ondoren, gertakaria frogatzen bada, behar bezalako erabakiak hartuko ditu.

16) Zigor Kodean definitutako delituetan parte-hartze zuzena edo zeharkakoa izatea, betiere epai judizial irmoan aintzat hartuta badago.

17) Enpresako edo langileen ondarea ukitzen duten ondasunak desagertzen badira, enpresak langileen armairuak edo gauza pertsonalak arakatzeko agintzen ahalko du. Erregistroa egiteko, langileen ordezkarietako batek egon beharko du aurrean, baldin enpresan badaude. Esandako kontrola igarotzeari uko egitea hutsegite oso larritzat hartuko da.

18) Lanaldian zehar lo egitea, hala lanpostuetan, nola bertatik kanpo, baimenik dagoen kasuetan izan ezik.

19) Laneko errendimendua edo jarduera nahita gutxitzen jarraitzea.

20) Liskarrak eta borrokak sorraraztea.

21) Hutsegite larriak egitea, asmo txar nabaria dagoenean.

22) Beste langile bat lanera etorri denaren itxurak egitea, haren ordez sinatuz edo fitxatuz. Hutsegite bera eginen du sinatu edo fitxatutako langileak, horren jakinaren gainean dagoenetik aurrera azalpenik ematen ez badu

65.5. artikulua. Puntualtasun hutsegiteak.

Lanpostura sartzerakoan 10 minuturainoko atzerapena idatzizko kargu-hartzearekin zigortuko da, hutsegite hau lehen aldiz egin eta handik aurrera hilabete natural batean 3 aldiz errepikatzen bada.

Epe berean egindako hutsegite bakoitzean egun bateko enplegu eta soldata gabe utziko zaio, 7.era arte, hori barne. Hemendik aurrera egindako mota honetako hutsegite bakoitza, epe beraren barrenean, hutsegite arintzat hartuko da.

Atzerapena 10 minututik gorakoa bada eta 30 minututik beherakoa, eta epe berean 3 aldiz errepikatzen bada, bi egunetan enplegu eta soldatarik gabe utziko zaio.

Mota bereko eta epe beraren barrenean, hutsegite horretatik aurrera egindako hutsegite bakoitza, larritzat hartuko da.

Atzerapena 30 minututik gorakoa bada, eta epe berean birritan errepikatzen bada, egun batean enplegu eta soldatarik gabe utziko zaio.

Epe beraren barrenean mota honetako hirugarren aldiz huts egiten bada, lau egunetan enplegua eta soldata gabe utziko zaio eta laugarren hutsegitetik aurrera, oso larritzat hartuko da eta hala zigortuko da.

Puntualtasun hutsegiteek ez dute eraginik beste hutsegite baten berrerortze edo errepikapenen erregimenean.

Kontzeptu honengatiko hutsegite larriak, gehienezere, 15 eguneko enplegu eta soldata etendurarekin soilik zigortzen ahal dira.

Mota honetako lehen hutsegite oso larria zigortu aurretik, behar den negoziazioa eginen da langileen ordezkariekin, zehapenei buruzko artikuluan hutsegite oso larrietarako aurreikusitako zigorren artean. Beste hutsegite oso larri bat eginez gero, ez da aldez aurretik negoziatu beharko.

65.6. artikulua. Zehapenak.

Lanera ez joateagatik enpresak ez du langilea kaleratuko, baldin eta horietarako arrazoia osasun zerbitzu ofizialek behar bezala justifikatutako baja bada, edo lanera ez joateko arrazoiak naturalak izan badira (elurra, uholdeak eta ezinbesteko beste arrazoi batzuk).

Lan arloko jurisdikzioak diziplinako kaleratze bat bidegabekotzat kalifikatzen badu, zuzendaritzak eta enpresa batzordeak erabakia berrikusiko dute eta eragindako pertsona lehen egoeraren araberako lanpostu batera itzultzea aztertuko du.

Hutsegiteen arabera, zehapen hauek ezarriko dira:

-Hutsegite arinengatik:

• Hitzezko kargu-hartzea.
• Idatzizko kargu-hartzea.
• Egun bateko enplegu eta soldata etenaldia, langileari idatziz jakinarazita.

-Hutsegite larriengatik:

• Gehienez 15 eguneko enplegu eta soldata etenaldia.
• Goragoko kategoria batera pasatzeko gaitasuna kentzea aldi baterako, hiru urterako gehienez.

-Hutsegite oso larriengatik:

• 16 egunetik sei hilabetera bitarteko enplegu eta soldata etenaldia.
• Goragoko kategoria batera pasatzeko gaitasuna kentzea aldi baterako, sei urterako gehienez.
• Kaleratzea.

Hutsegite larri eta oso larriengatik zehapena jartzeko, langileari idatziz jakinarazi behar zaio. Era berean, jakinarazpenei buruz hitzarmen kolektibo honen 70. artikuluan xedatutakoa bete beharko da.

Ezar daitezkeen zehapenek ez dute galarazten erruduntasun-testigantza auzitegietara eramatea, egindako hutsegitea delitu edo hutsegitea izan daitekeenean, ezta gobernu-agintaritzari horren berri ematea ere.

65.7. artikulua. Preskripzioa.

Hutsegiteen preskripzioari dagokionez, indarreko legezko xedapenetan ezarritakoari jarraituko zaio.

66. artikulua. Kontratazioa eta enplegua.

66.1. artikulua. Prestakuntzako kontratua.

Kontratu horien helburua hitzarmen kolektibo honetako 63. artikuluko 2. taulan zehazten diren D, E, F, G, H, I, J taldeetako lanbideren bat doitasunez betetzeko behar den prestakuntza teorikoa eta praktikoa eskuratzea da.

Hitzarmen honetan ezarritako lanaldiaren barrenean, gutxienez %15 prestakuntza teorikorako eman beharko da nahitaez.

Langileen ordezkariek eta enpresaren zuzendaritzak formula praktikoak erabakitzen ahalko dituzte prestakuntza honetarako, eta eguneroko, asteroko edo hileroko aldiak ezar ditzakete. Enpresan bertan ez bada ikastarorik antolatzen, prestakuntza mota hori prestakuntza ematen duen edozein ikastegi ofizialetan buru daiteke.

Modalitate honetan kontratatutako langilearen lansaria lanpostu berdina edo antzekoa betetzen duen langile finkoarentzako hitzarmen honetan ezarritako soldataren %80 eta %90 izanen da, kontratua indarrean dagoen 1. eta 2. urtean, hurrenez hurren.

Hitzarmen honetan arautu gabeko gai guztietan, indarrean dagoen legediak ezarritakoa beteko da.

66.2. artikulua. Praktikaldiko kontratua.

Enpresak praktikaldiko kontratuaz jarduteko langileak kontrata ditzake. Eta kontratu horien helburua unibertsitate titulua edo maila ertaineko edo goi-mailako lanbide heziketa duten langileek egindako ikasketekin bat datorren praktika lortzea da.

Kontratazioak sei hilabeteko iraupena izanen du gutxienez, eta inola ere ezin izanen dira bi urte gainditu. Bi aldeen akordioz, gehienez ere bi luzapen egin daitezke baina bakoitzaren iraupena sei hilabetekoa izanen da gutxienez, eta ezin izanen da kontratuaren gehienezko iraupena gainditu. Probaldia hitzarmen honetako 38. artikuluan ezarritakoa izanen da.

Praktiketan dagoen langilearen lansaria hitzarmeneko soldataren %90 izanen da lehen urtean eta %100 bigarren urtean.

Lanpostu berdina edo antzekoa betetzen duen langile finkoaren soldata hartzen da hitzarmeneko soldatatzat.

Hitzarmen honetan arautu gabeko gai guztietan, indarrean dagoen legediak ezarritakoa beteko da.

66.3. artikulua. Behin-behineko kontratuak, produkzioaren inguruabarrengatik.

Hitzarmen hau sinatu dutenek martxoaren 24ko 1/1995 Legegintzako Errege-Dekretuak eta abenduaren 18ko 2720/1998 Errege-Dekretuak onetsitako Langileen Estatutuaren Testu Bategineko 15.1.b) artikuluan aurreikusitako lan kontratuaren erregulazio egokia egitea erabaki dute. Egokitzapen horren helburua enplegu eta produktibitateari buruz gaur egungo egoerak dirauen bitartean enpresako baldintza berezietara egokitzea da.

Horrela, aldeek ezarri dutenez, produkzio egoera, zeregin metaketa edo eskaerak gehitzeagatik sortzen diren behin-behineko kontratuek hamabi hilabete arte iraun dezakete, hemezortzi hilabeteko tartean.

Artikulu honetan adierazten diren behin-behineko kontratuen iraupena luzatzea ezin izanen zaie aplikatu, merkatuaren inguruabar, zeregin metaketa edo eskaerak gehitzeagatik, hitzarmen honen eraginpean dagoen enpresaren eta aldi baterako laneko enpresen artean itun daitezkeen langileak lagatzeko kontratuei.

Hitzarmen honetan arautu gabeko gai guztietan, indarrean dagoen legediak ezarritakoa beteko da.

66.4. artikulua. Aldi baterako laneko enpresak.

Enpresak kontratu-modalitate hori erabiliko du denboraldi laburretako absentziak edo beharrizanak estaltzeko. Denboraldi horiek gehienez bi hilabetekoak izanen dira urte naturalaren barruan etenik gabe, ekainetik irailera bitartean izan ezik, orduan 4 hilabetekoak izanen baitira.

Enpresak, aldi baterako laneko enpresen zerbitzuak kontratatzen dituenean, dagokion lanbide kategoria edo beteko duen lanposturako hitzarmen kolektibo honetan ezarritako lansariaren %100 eta laneko eskubide berberak bermatuko dizkio bere esanetara jartzen duen langile orori. Betebehar hori berariaz azaldu beharko da langileak lagatzeko kontratuan, aldi baterako laneko enpresaren eta hitzarmen honi lotutako enpresaren artean itundutakoan.

Indarrean dagoen araudian xedatutakoa kaltetu gabe, enpresa erabiltzaileak bertako langileen ordezkariei emanen die jakitera langileak lagatzeko kontratuaren ituna eta horren arrazoia, betiere langileak lagatzeko kontratua sinatu baino lehen. Berebat, aurreko paragrafoan ezarritako betekizunari buruz aldi baterako laneko enpresak bereganatu duen konpromisoaren egiaztagiria emanen die enpresa erabiltzaileak bertako langileen ordezkariei.

Era berean, aldi baterako laneko enpresen bidez kontrataturiko langileei legez dagokien ordezkaritza kaltetu gabe, enpresa erabiltzaileko langileen ordezkariek aldi baterako laneko enpresak kontratatu dituen langileen ordezkaritza hartzen ahalko dute beren gain, enpresa erabiltzaileari dagokionez, hitzarmen kolektibo honetan ezarritako eskubide eta betebeharrak betearazteko.

VI. KAPITULUA

Jarduera sindikala enpresan

67. artikulua. Enpresa batzordea.

Enpresa batzordea langileen ordezkaritza organoa da eta legeak eta hitzarmen kolektibo honek zehazten dituzten saera eta bermeak edukiko ditu.

Enpresa batzordeko kideentzat ezarritako ordu ordainduak ordezkari bati edo gehiagori gehitzen ahalko zaizkio, baita atal sindikaletako delegatuari ere, hileko gehieneko kopurua gainditu gabe.

Uko egiteek eta ondoriozko metaketek gutxienez hilabeteko iraupena izanen dute, baina gutxienez 15 egunetako aurrerapenarekin ohartarazi beharko da.

68. artikulua. Enpresa batzordearen eginkizunak.

Enpresa batzordearen eginkizunak hauek izanen dira:

a) Horretarako hautatuak izanik, ordezkaritzan jardutea enpresaburuaren aurrean, ordezkatzen dituzten langileen lan-baldintzei buruz sortzen diren arazo guztietan esku hartuz.

b) Laneko arauak beteko direla segurtatzea eta, orobat, laneko segurtasun eta osasunari buruzkoak eta gizarte segurantzakoak, enpresarentzat eta langileentzat indarrean daudenak. Aldi berean, gerta daitezkeen arau-hausteen berri emanen die enpresari eta langileei, eta arauak betetzeko behar diren erreklamazioak eginen ditu.

c) Txostena egitea lanbide sailkapenerako administrazio espedienteetan eta legeak xedatuta beharrezko direnetan ere.

d) Hiruhilekoan behin jakinarazpena jasotzea, segurtasun eta osasunaren egoera zertan den eta horiek hobetzeko zein neurri hartu diren.

e) Enplegu-erregulazioko espedienteen kasuetan ondoren aipatzen diren dokumentuak jaso beharko dituzte enpresaren zuzendaritzatik, langileen legezko ordezkariei eta Lan Agintaritzari zuzendutako jakinarazpen idatziarekin batera, kontsultaldia hasten den data adierazita. Hona hemen dokumentuok:

1. Espedientea eragiten duten arrazoi ekonomiko edo teknologikoak azaltzen dituen txostena.

2. Azken hiru urteetako balantzea.

3. Azken hiru urteetako galeren eta irabazien kontuak.

4. Sozietateen gaineko Zergaren ondorioetarako aitorpena, kasuan kasu, azken hiru urteei buruz.

5. Espedientearen eraginpeko lantokiko edo lantokietako langile guztien zerrenda, bertan haien izen-deiturak, jaiotze data eta tokia, espezialitatea eta lanbide-taldea, enpresan noiz sartu ziren, eta langileen legezko ordezkari ote diren adierazita.

6. Espedienteak plantilla guztia ukitzen ez badu, enpresako gainerako langileen zerrenda banandua, bertan datu berberak adierazita.

f) Enpresak hartu nahi dituen neurrien gaineko txosten idatzia, aldez aurretik, honako puntu hauei buruz:

-Enpresako lekualdaketa erabatekoak eta partzialak.

-Lan sistema berriak ezartzea edo daudenak berrikustea.

-Prima edo pizgarrien sistema ezartzea.

-Lanbide sailkapeneko aldaketak.

g) Hobekuntza teknikoen eta ekoizpenaren hobekuntzen arloan egokiak iruditzen zaizkion neurriak proposatzea zuzendaritzari.

Enpresaren zuzendaritzarekin lankidetzan aritzea, enpresaren produktibitatea mantentzen eta handitzen laguntzeko neurriak bete ahal izateko, horretarako informazio egokia emanda.

h) TC1a eta TC2a aztertzea.

69. artikulua. Informazioa enpresa batzordeei.

Enpresaren eta sektore ekonomikoaren egoera eta bilakaera orokorrari buruzko hiruhileko informazioa emanen dio enpresa batzordeari.

70. artikulua. Diziplinako neurriak.

Enpresa batzordeari aldez aurretik informazioa emanen zaio, hutsegite larriengatik eta oso larriengatik edo hutsegite arinetan berrerortzeagatik zehapenak ezarri aurretik.

Enpresaren zuzendaritzaren edo ordezkari jartzen duen pertsonaren iritziz zigorraren berehalako aplikazioa beharrezkoa ez den kasuetan, hori ez da ezarriko enpresa batzordearen arduradunari jakinarazi eta berrogeita zortzi ordu igaro arte.

Enpresak langileen espediente pertsonaletan hutsegiteen aurrekariak deuseztatuko ditu ondorengo betebeharrak betetzen badira:

1. Hutsegite arinetarako 6 hilabeteko epea igaro izana, hutsegite larrietarako 12 hilabetekoa eta hutsegite oso larrietarako 24 hilabetekoa.

Epe horiek zehapena ezartzen denetik zenbatuko dira.

2. Aurreko paragrafoan hutsegiteetarako beren larritasunaren arabera adierazitako denboraldietan zehatzeko modukoa izan daitekeen hutsegiterik ez egin izana.

71. artikulua. Enpresako sindikatu atala.

Legez aitortutako sindikatu batean kidetuta dauden enpresako langileek enpresako sindikatu atal bat eratzen ahalko dute, indarreko legediaren arabera.

72. artikulua. Sindikatu atalen bermeak.

Enpresako sindikatu atalek berme hauek dituzte:

a) Izaera sindikaleko edo lan arloko argitalpen eta oharrak banatzea enpresako lokaletan, euren kideen kotizazioak biltzea eta beren afiliazio sindikaleko lanetan oztoporik ez izatea, hori guztia lanorduetatik kanpo eta berme horiek betetzeak lana edo produkzio prozesuaren bilakaera orokorra eten gabe.

b) Enpresa batzordeko postuak betetzeko hauteskundeetarako hautagaiak proposatzea.

c) Sindikatuko delegatu bat hautatzea bere kideak enpresaren zuzendaritzaren aurrean ordezkatzen dituen sindikatu atal bakoitzeko.

Sindikatuko delegatuak enpresako jarduneko langile izan beharko du, eta ordezkatzen duen sindikatuaren estatutuen arabera izendatu beharko da. Enpresa batzordeko kide izanen da, ahal dela.

d) Aurreko artikuluan ezarritako afiliazio betebeharrak betetzen dituen enpresako sindikatu atal bakoitzeko delegatuak, enplegu-erregulazioko espedienteen kontsultaldian enpresak batzordearen esku jartzen duen informazio eta dokumentazio bera edukiko du, eta enpresaren zuzendaritzak eta enpresa batzordeak berariazko arrazoi horrekin egiten dituzten bileretan agertu eta parte hartzen ahalko du.

e) Enpresak hartu nahi dituen neurrien gaineko txosten idatzia, aldez aurretik, honako puntu hauei buruz:

-Enpresako lekualdaketa erabatekoak edo partzialak.

-Lan sistema berriak edo pizgarriak sartzea.

-Laneko segurtasun eta osasunari dagozkion erabakiak.

-Lanbide sailkapeneko aldaketak.

f) Aldez aurretik zuzendaritzari jakinarazi ondoren, enpresak bere lokaletan enpresako sindikatu atal bateko kideen bilerak egiten utziko du, lanorduetatik kanpo.

g) 71. artikuluan adierazitako betebeharrak betetzen dituzten sindikatu atalek bere sindikatuko arduradunak bertaratzeko eskatzen ahalko dute enpresarekin egiten diren bileretara, bere kideei eragiten dieten eta artikulu honen e) eta f) ataletan aipaturiko arazoak aztertzen direnean.

73. artikulua. Enpresako sindikatuko delegatuak.

Enpresetan eratu eta enpresaren zuzendaritzan kreditaturiko %10 baino afiliazio handiagoa duten sindikatu ataletako delegatuek 30 ordu izanen dituzte hilabetean beren eginkizunak betetzeko.

74. artikulua. Berme komunak.

(Enpresa batzordeak eta sindikatuko atalak).

Enpresa batzordeetako kideek eta sindikatuko delegatuek ondorengo berme komunak izanen dituzte:

a) Iragarki-ohol bat erabiltzea sindikatu eta lan arloko oharrak argitaratzeko.

b) Bileretarako lokalak eskuratzea.

c) Bere afiliazio edo ekintza sindikalarengatik ez kaleratzea edo beste edozein modutan kalterik ez izatea, betiere indarrean dagoen legedia betetzen badute.

d) Enpresa batzordeen eta sindikatuko atalen bileretarako deiak gutxienez 48 ordu lehenago egin behar dira, enpresaren barrenean egindako bileretarako, behar bezala arrazoitutako salbuespenetan izan ezik; horrelakoetan aurreabisuak egiteko epea laburragoa izan daiteke.

e) Diziplinazko neurriei dagokienez, sindikatuko ataletako delegatuek enpresa batzordeko kideek dituzten eskubide berak edukiko dituzte, baldin bere sindikatu ataleko kide bati eragiten badiote.

75. artikulua. Batzarrak.

Soldata errealaz ordaindutako 10 ordu edukiko dira urtean, batzarrak egiteko.

Enpresa batzordeak deituko ditu batzarrak edo enpresako sindikatu ataleko delegatuaren ekimenez eginen dira, ondorengo paragrafoan ezarritako baldintzetan eta aurreko paragrafoan ezarritako mugara arte.

Enpresa batzordea ordaindutako batzarrak deitzera behartua dago ezarritako mugaren barrenean, enpresako sindikatu atal bateko delegatuak hala eskatzen dionean, betiere atal horrek gutxienez enpresako plantilla osoaren herena adinako kide kopurua biltzen badu; halaber, enpresako langileen plantilla osoaren herenak batzarra egitea eskatzen ahalko du.

Batzarra egiteko deialdia gutxienez 48 ordu lehenago jakinaraziko zaio enpresaren zuzendaritzari, eta jakinarazpen horretan batzarraren ordua eta data finkatuko dira.

76. artikulua. Sindikatu arloko eszedentziak.

Enpresan egon beharreko gutxieneko denboralditik salbuesten dira gutxienez probintziako kargu sindikal bat betetzearren eszedentzia eskatzen duten langileak. Eszedentzia horiek nahitaezkoak izanen dira eta, hortaz, aginte sindikalak irauten duen denboraz zenbatuko da antzinatasuna, eta arlo horretan aplikatzen diren xedapen orokorren bidez erregulatuko dira.

77. artikulua. Enpresako sindikatu atalei informazioa ematea.

71. artikuluan ezarritako afiliazio betebeharrak betetzen dituzten enpresako sindikatu ataletako delegatuei, enpresaren eta sektore ekonomikoaren egoerari eta bilakaera orokorrari buruzko informazioa emanen die enpresak hiru hilean behin.

AZKEN XEDAPENA

Enpresako hitzarmen kolektibo honetako aurreko artikuluetan berariaz bildu ez den orotan, Langileen Estatutuan, Askatasun Sindikalari buruzko Lege Organikoan eta aplika daitezkeen gainerako lege eta xedapenetan ezarritakoa bete beharko da.

LEITZAKO 2010EKO HITZARMEN KOLEKTIBOAREN ERANSKINAK

1. ERANSKINA

Non stop

Tauletan lan sistema honetarako ezarritako kopuruak honela igoko dira:

2010. urtean: 2009ko KPI erreala %25 hobetua.

2. ERANSKINA

Hitzarmeneko soldata

Tauletan lanbide-talde eta kategoria bakoitzarentzat ezarritako hitzarmeneko soldata honela igoko da:

2010. urtean: 2009ko KPI erreala %25 hobetua.

3. ERANSKINA

Antzinatasuna

Tauletan lanbide-talde eta kategoria bakoitzarentzat ezarritako hirurteko eta bosturtekoen balioa honela igoko da:

2010. urtean: 2009ko KPI erreala %25 hobetua.

4. ERANSKINA

Aparteko eskersariak

Tauletan kontzeptu horrengatik ezarritako kopuruak honela igoko dira:

2010. urtean: 2009ko KPI erreala %25 hobetua.

5. ERANSKINA

Mozkinak

2010. urtean: 2009ko KPI erreala %25 hobetua.

6. ERANSKINA

Gaueko lanaren plusa

Tauletan kontzeptu horrengatik lanbide-talde eta kategoria bakoitzarentzat ezarritako kopuruak honela igoko dira:

2010. urtean: 2009ko KPI erreala %25 hobetua.

7. ERANSKINA

Lanaldi jarraituaren konpentsazioa

Tauletan kontzeptu horrengatik ezarritako kopuruak honela igoko dira:

2010. urtean: 2009ko KPI erreala %25 hobetua.

8. ERANSKINA

Aparteko orduak

Tauletan kontzeptu horrengatik ezarritako kopuruak honela igoko dira:

2010. urtean: 2009ko KPI erreala %25 hobetua.

9. ERANSKINA

Txanda eta mantentze-lanetako lanaldi zatituaren plusa

Lan erregimen hauetarako ezarritako kopuruak honela igoko dira:

2010. urtean: 2009ko KPI erreala %25 hobetua.

10. ERANSKINA

Deien plusa

Kontzeptu honengatik ezarritako kopuruak honela igoko dira:

2010. urtean: 2009ko KPI erreala %25 hobetua.

11. ERANSKINA

Distantziaren plusa

Gaur egun km bakoitzeko jasotzen den kopurua honela igoko da:

2010. urtean: 2009ko KPI erreala %25 hobetua.

12. ERANSKINA

Seme-alaben ikasketetarako laguntza

Tauletan laguntza horretarako agertzen diren baremo eta zenbatekoak honela igoko dira:

2010. urtean: 2009ko KPI erreala %25 hobetua.

13. ERANSKINA

Aseguru kolektiboa

Hitzarmen hau sinatzen denetik aurrera, aseguru konpainiak ondoko arriskuak estaliko ditu eta kalte-ordain hauek emanen ditu, osorik:

Gaixotasun arruntaren ondoriozko heriotza: 13.020,25 euro.

Lanbidekoa ez den istripuaren ondoriozko heriotza: 26.040,50 euro.

Lanbide gaixotasunaren ondoriozko heriotza: 26.040,50 euro.

Laneko istripuaren ondoriozko heriotza: 26.040,50 euro.

Gaixotasun arruntaren ondoriozko erabateko baliaezintasun iraunkorra: 13.020,25 euro.

Lanekoa ez den istripuaren ondoriozko erabateko baliaezintasun iraunkorra: 26.040,50 euro.

Lanbide eritasunaren ondoriozko erabateko baliaezintasun iraunkorra: 26.040,50 euro.

Lanbide istripuaren ondoriozko erabateko baliaezintasun iraunkorra: 26.040,50 euro.

14. ERANSKINA

Langileen ikasketetarako laguntza

Langileen lanbide heziketarako ikasketen laguntzari buruzko jarraibideak.

1. Araudi honen helburua Leitzako lantokiko langileek eskatzen dituzten ikasketetarako laguntzak emateko jarraitu beharreko prozedura ezartzea da.

2. Ikasketetarako laguntza enpresak lanalditik kanpo ikasketak egiten dituzten langileei ordaintzen dien kopurua da.

Jarraibide hori betetzeaz hauek arduratuko dira:

-Langileriaren zuzendaria; hark jasoko ditu ikasketetarako laguntzen eskabideak, eta eskabideek jarraibide honen eskakizunak bete ditzatela zainduko du.

-Giza Harremanen Departamentua; hark emanen die ikasketetarako orientabidea eskatzen duen langile orori.

-Lantokiko batzordea; hark Langileria Departamentuarekin batera aztertuko ditu eskabideak.

3. Ikasketetarako laguntzak eskatzaileak eskatutako beste edozein laguntza ofizial edo pribaturekin bateragarriak izanen dira, baina laguntza batzuen eta besteen artean ezin izanen da gainditu egindako ikasketen zenbatekoa. Ondore horretarako eskatzaileak beste bide batzuetatik jasotako laguntzen zenbatekoa aitortuko du.

4. Ikasketetarako laguntza emateko eskatzen ahalko dute lantoki honetako langile guztiek, baldin eta ikasketak lantokitik kanpo egiten badituzte.

5. Ikasketari buruzko pizgarria eta ikasketetan hobetzeko ahalegina benetakoak izan daitezen, ikasketetarako laguntzak ikasketak guztiz estaliko ditu, 240,40 eurora arte, baita kopuru horretatik gorakoaren %50 ere, gehienez ere 1.202,03 eurora arte urtean, ondoko zenbateko hauei dagokienez:

a) Matrikula gastuak edo inskribatzeko eskubidea.

b) Testuliburuak.

c) Hileko ordainketa, irakaskuntza ez ofiziala bada; eta antzeko kopurua ikastegi ofizialetan egiten diren ikasketa guztietarako.

6. Eskatzaileak urte bakoitzeko urriaren 30a baino lehen beteko du ikasketetarako laguntza eskatzeko dagokion inprimakia, eta Langileriaren zuzendariari bidaliko dio.

Eskabidea jaso eta gero, zuzendaritzak, enpresa batzordearekin batera, laguntzen eskariak aztertuko ditu, horretarako frogagiri egokiak eta eskatzaileak aurkeztutako gastu-kopurua egiaztatuta, eta horren guztiaren arabera, laguntzaren emakida onetsi, murriztu edo ukatuko du, eta interesdunari ahalik eta lasterren jakinaraziko dio.

Ikasketetarako laguntzaren emakida onesten bada, zuzendaritzak honako hau eginen du:

-Adierazten den epean laguntza ordaintzeko beharrezko fondoak eskatuko dizkio Diruzaintzari.

-Kopia bidaliko dio Langileria Departamentuari.

-Jatorrizkoa interesdunaren espedientean artxibatuko du.

Laguntza ukatzen bada, interesdunari horren berri emanen zaio ahalik eta lasterren.

7. Ondoko hauetako bat gertatzen bada, onuradunak laguntzarako eskubidea galduko du, guztiz edo zati batean, langileen ordezkariek eta zuzendaritzak batera emandako iritziaren arabera:

a) Ekaineko eta iraileko deialdien artean ikastaro ofiziala gainditzen ez badu.

b) Ikasketa ez ofizialak direnean, ikastarora joan dela eta aprobetxamendu normala izan duela adierazten duen Ikastegiaren egiaztagirik ez badago.

c) Eskatzaileak behar bezala frogatutako ezinbesteko arrazoiengatik (gaixotasuna, istripua, familiako arrazoi larriak etab.) ikasketak eteten baditu, ordura arte abonatutako zenbatekoak soilik abonatuko dira, jarraibide honen 5. artikuluaren arabera.

d) Eskatzaileak bere ikasketak bertan behera uzten baditu edo ikasketetara joan izanaren egiaztagiririk aurkezten ez badu, jasotako zenbatekoak konturako aurrerakin gisa hartuko dira, eta enpresak bere esku dauka horren itzulketa.

e) Eskaeraren inprimakian adierazitako daturen bat faltsua bada.

8. Langileria Departamentuak laguntza ordaintzeko beharrezko funtsak eskatuko dizkio Diruzaintzari. Laguntza honela ordainduko da:

-%50, urriko lehen hamabostaldian.

-Gainerako %50a, uztailean.

15. ERANSKINA

Batzorde paritarioa

Hitzarmen honen Interpretazio Batzorde Mistoa sortzea erabakitzen da; langileen lau ordezkarik eta enpresako beste lauk osatuko dute.

HITZARMENEKO SOLDATA 2010. URTEA

MOZKINETAKO PARTE-HARTZEA 2010. URTEA

APARTEKO ORDUAK 2010. URTEA

APARTEKO ORDUAK %75 2010. URTEA

ZENBAIT KONTZEPTUREN TAULAK 2010. URTEA

ESKOLA LAGUNTZAKO TAULA 2010. URTEA

Iragarkiaren kodea: F1010419