Iragarkia

92. ALDIZKARIA - 2010eko uztailaren 30a

1. NAFARROAKO FORU KOMUNITATEA

1.5. ESTATUTUAK ETA LAN HITZARMEN KOLEKTIBOAK

592/2010 EBAZPENA, maiatzaren 18koa, Arriskuen Prebentziorako eta Lanaren zuzendari nagusiak emana, Nafarroako "Desgaitasuna duten pertsonei arreta emateko zentro pribatu itunduak" sektorearen lan hitzarmen kolektiboaren testua erregistratu, gorde eta Nafarroako Aldizkari Ofizialean argitaratzea erabakitzen duena (espediente zenbakia: 29/2010).

2010eko apirilaren 9an departamentu honetan sartu da "Desgaitasuna duten pertsonei arreta emateko zentro pribatu itunduak" sektorearen lan hitzarmen kolektiboaren testua, 44 artikuluz, 3 xedapen gehigarriz, 4 xedapen iragankorrez, 3 azken xedapenez eta 5 eranskinez (ordainsarien taulak) osatua, eta sektoreko enpresaburuen elkartearen ordezkaritzak (EANA) eta sindikatuetako batzuek (CCOO eta UGT) osaturiko negoziazio batzordeak 2010eko otsailaren 5ean izenpetu eta onetsia.

Berrikuntza, Enpresa eta Enplegu Departamentua da Lan Hitzarmen Kolektiboaren testua erregistratu, gorde eta argitaratzeko eskumena duena, Estatuaren lan arloko eginkizunak Nafarroako Foru Komunitateari eskualdatzeko arauak ezartzen dituen apirilaren 11ko 937/1986 Errege Dekretuan ezarritakoaren arabera. Eginkizun haiek martxoaren 24ko 1/1995 Legegintzako Errege Dekretuaren 90. artikuluan ezarrita daude. Horiek horrela, eta kontuan hartuta Hitzarmen kolektiboen erregistro eta gordailuei buruzko maiatzaren 22ko 1040/1981 Errege Dekretuan ezarritakoa.

Adierazitakoarekin bat eta Nafarroako Foru Komunitateko Administrazioari buruzko abenduaren 3ko 15/2004 Foru Legearen 22.1 artikuluak ematen dizkidan eskudantziak erabiliz,

EBATZI DUT:

1. Nafarroako "Desgaitasuna duten pertsonei arreta emateko zentro pribatu itunduak" sektorearen lan hitzarmen kolektiboa erregistratzea (hitzarmenaren kodea: 3108485) Lan Hitzarmen eta Akordio Kolektiboak Erregistratu eta Gordetzeko Bulegoan horretarako bereziki prestaturik dagoen liburuan, eta bertako administrazio unitatean testua eta dokumentazioa gordetzea.

2. Ebazpen hau jakinaraztea Negoziazio Batzordeari eta adieraztea ebazpenak ez duela administrazio bidea amaitzen eta honen aurka gora jotzeko errekurtsoa jartzen ahal dela, Berrikuntza, Enpresa eta Enpleguko kontseilariari zuzendua, jakinarazi eta biharamunetik hilabeteko epean.

3. Ebazpen hau Nafarroako Aldizkari Ofizialean argitaratzea, orok jakin dezan.

Iruñean, 2010eko maiatzaren 18an.-Arriskuen Prebentziorako eta Lanaren zuzendari nagusia, Imelda Lorea Echavarren.

NAFARROAKO GOBERNUAREKIN ITUNA SINATU DUTEN "DESGAITASUNA DUTEN PERTSONEI ARRETA EMATEKO ZENTRO PRIBATUEN" II. HITZARMEN KOLEKTIBOA. 2009-2011

I. TITULUA

Aplikazio eremua

1. artikulua. Iraunaldia. Lan hitzarmen kolektibo hau 2009ko urtarrilaren 1etik 2011ko abenduaren 31 bitarterako da, salbu eta berariaz beste iraunaldi baterako hitzartzen diren auzietarako.

Hitzarmen honen amaiera bere mugaegunean iragarriko da, eta sinatu duten alderdiek konpromisoa hartu dute hitzarmen honen indarraldiko azken hiruhilekoan hitzarmen berria negoziatzen hasteko. Beste lan hitzarmen bat egin arte, lan hitzarmen honetako klausula arauemaileek indarrean segituko dute.

2. artikulua. Langile eremua. Lan hitzarmen kolektibo honek desgaitasuna duten pertsonei arreta emateko zentroak, Nafarroako Gobernuarekiko itun edo kontratuaren bidez, kudeatzen dituzten entitateen eta bertako langileen arteko lan harremanak arautzen ditu. Eremu honetan sartutako zentroak I. eranskinean azaltzen dira. Zerrenda hori handitu daiteke Nafarroako Mendekotasun Agentziak kontratu edo itun gehiago sinatzen baditu eranskinean azaltzen diren zentroen eremu berean jarduten duten beste zentro batzuk kudeatzeko.

Aplikazio eremutik kanpo gelditzen dira gizarte-boluntariotzan diharduten pertsonak, zerbitzu erlijiosoa ematen dutenak, kontratu bereziak dituzten langileak (laguntzarekiko enplegua izan ezik), langile autonomoak eta zentroarekin zerbitzuak alokatzeko kontratuak hitzartuak dituzten enpresetako langileak.

3. artikulua. Osotasunarekiko lotura. Hitzarmen honetan itundutako baldintzek multzo banaezin bat osatzen dute, eta legezko manu baten aginduz, jurisprudentziaz, hitzarmen kolektiboen indarrez, banakako kontratuen ondorioz edo tokiko edo jarduera sektoreko usadio eta ohituren indarrez lehenago indarra zutenekin konpentsatzen ahalko dira.

II. TITULUA

Langileen sailkapena

4. artikulua. Langileen sailkapena.

-1. taldea: teknikariak eta bulegariak: dagokien titulazioa eskatuko zaie, hitzarmen edo itunetan, edo sektorearen arauetan kasu bakoitzerako ezarritakoa kontuan hartuta.

-2. taldea: zuzeneko arretako langile espezializatugabeak.

-3. taldea: zerbitzu orokorretako langileak.

Kategoriak, lanpostuak eta eginkizunak II. eranskinean zehazten dira.

Artikulu honetan aipatzen den langileen sailkapena adibide gisara eman da. Horrek ez du lanpostu guztiak betetzera behartzen. Adibide bat baino ez dira, halaber, II. eranskinean esleitutako eginkizunak. Langile guztiak beren nagusiek agintzen dizkieten lan eta operazioak egitera behartuak daude, nor bere eskumen eta lanbide kategoriaren barnean, beren duintasunaren eta lanbide prestakuntzaren kalterako izan gabe.

Dena dela, zentro bakoitzeko zuzendaritzak langileen legezko ordezkariei esparru orokorreko kategoria funtzionalen berri emanen die; kategoria horiek borondatez ezarriko ditu, zerbitzuaren antolaketa hobea izateko.

III. TITULUA

Kontratazioak

5. artikulua. Kontratazioak. Lan zentroan langile berriak hartzeko eta edozein motatako kontratazioak egiteko langile berriaren eta enpresako zuzendaritzaren arteko kontratu librea beharko da egin.

Behin-behineko kontratu bat mugaegunik gabeko kontratu bihurtzen bada, inolako etenaldirik gabe edo 20 lanegunetik gorako tarterik gabe, enpresa behartua egonen da aurreko behin-behineko kontratuak zuen antzinatasun data mantentzera.

6. artikulua. Barne igoera. Hitzarmen hau sinatzean, zentro batean lanaldi partzialeko kontratu mugagabea duten langileek lehentasuna dute zentro horretako lanaldi osoko langileen aldi baterako ezintasunaren, baimenen eta eszedentzien ondoriozko bajen ordezkapenak egiteko, aurrez ezarritako gaitasun, prestakuntza edo igoera baldintzak betetzen badituzte eta kontratu hobaridunak ez badira (amatasuna, haurdunaldiko arriskua, seme-alabak zaintzeko eszedentzia eta gutxienez %25eko hobaria duten bestelako kontratuak), betiere muga hauek gainditu gabe:

-Hilabetetik gorako ordezkapenen %50 (2tik 1).

-Hilabetetik beherako ordezkapenen %75 (4tik 3).

Edonola ere, mailaz igotzen den langileak lehengo lanpostura itzultzeko eskubidea izanen du, kontrakorik ituntzen ez bada behintzat.

Kontratu hobaridunen salbuespena aplikatuz gero, hobaria duen pertsona bat kontratatzen ez bada lanpostua barne igoeraren bidez beteko da.

Langile batek barne igoerako lanpostu bat betetzeari uko egiten badio, hurrengoetan gora egiteko lehentasunezko eskubidea galduko du, berriz egokitzen zaion arte, horrelakorik bada.

7. artikulua. Praktikaldiko kontratua. Modalitate horretan kontratatzen diren langileek kategoria horretako soldataren %90 kobratuko dute. Nolanahi ere, jaieguneko osagarriak oso-osorik kobratuko dira.

8. artikulua. Errelebo kontratua. Enpresak erraztasunak emanen dizkie legez ezarritako betebeharrak bete eta erretiro partziala hartu nahi duten langileei, eta horrelakoetan errelebo kontratuak egiteko konpromisoa hartu du, murrizten den lanaldia gutxienez %50ekoa baldin bada eta langileak berariaz onartzen baditu enpresak ezarritako prestazioaldiak eta lanaldi murriztuaren antolaketa. Kasu horretan, langileak egin behar duen lanaldiaren portzentajea aukeratuko du, adierazitako gutxieneko horretatik abiatuta.

9. artikulua. Lana uztea. Enpresatik borondatez alde egin nahi duen langileak gutxienez hamabost egun lehenagotik abisatu beharko du. Epe hori betetzen ez badu, hamabost egun bete arte falta diren egunei dagokiena kenduko zaio likidaziotik.

Enpresak ohartarazpen hori epearen barrenean eta behar bezala jasotzen badu, beharrezkoa den likidazioa lan harremana bukatzean egin beharko du. Betebehar hori betetzen ez badu, langileak kalte-ordain bat jasotzeko eskubidea izanen du, hain zuzen, egun bateko soldata likidazioa atzeratzen den egun bakoitzeko. Ohartarazpena zenbat egun aurretik egin den, horixe izanen da kalte-ordainetarako muga. Kalte-ordain hori bere kontratuaren bukaeran jaso behar duenaz apartekoa izanen da, kontratuak, berez, hala ezartzen badu.

10. artikulua. Probaldia. Langile sartu berri orok probaldi bat pasatu beharko du nahitaez, 5. artikuluko kategoria bakoitzarentzat ondotik ezartzen den denbora gainditu ezin izanen duena:

-1. taldea:

• Goi mailako tituludunak: 5 hilabete.
• Erdi mailako tituludunak: 3 hilabete.
• Gainerakoak: 2 hilabete.

-2. taldea: 2 hilabete.

-3. taldea: hilabete.

Probaldi horiek kontuan hartuko dira antzinatasunerako, probaldia iragan eta gainditu ondoren. Aldi baterako ezintasun egoerak horren kontaketa etenen du.

IV. TITULUA

Lan baldintzak

11. artikulua. Lanaldia. Urteko benetako lanordu kopurua ondorengo laukian azaltzen da (urteko lanorduen kopurua).

Aurrekoak lanaldi osoak dira, aipatzen diren taldeen baldintzei jarraikiz ezarri direnak. 2010. eta 2011. urteei dagozkien lanaldi murriztapenak, oro har, lanaldi osotan eginen da, eta oporretako lanegun gisa hartuko dira.

Lanaldi partziala duten langile kontradudunei ez zaie inolako lanaldi murriztapenik aplikatuko eta 2009ko urtarrilaren 1ean kontratatutako ordu kopuru bera izanen dute. Soldata ere lanaldi osoaren araberakoa izanen da. Horren ondorioetarako, ez da kontratatutako lanalditzat hartuko ordezkapenak egiteko benetan egiten ari dena (baimenak, eszedentziak, lanaldi murriztua edo egun ordainduak direla kausa), salbu eta lanaldi hori bere kontratuaren edukian berean agertzen bada berariaz.

Lanaldi osorako kontratatutako langileek, hitzarmen honen arabera legokiekeen urteko lanaldia baino laburragoa den lanaldia aitortua baldin badute, eutsiko diote lanaldi horri, berme pertsonal gisara. Horren ondorioetarako, besteen baimenak, eszedentziak, lanaldi murriztuak edo egun ordainduak ordezkatzeko benetan egiten den lanaldia ez da lanaldi murriztutzat hartuko.

12. artikulua. Lanbide prestakuntza eta birziklapena. Urteko orduetatik parte bat nahitaezko prestakuntzarako izanen da, eta horrelakotzat joko dira enpresak antolatu eta/edo baimentzen dituen prestakuntza ekintzak, ohiko orduetan zein ordutik kanpo egiten direnak. Bertaratzea nahitaezkoa izateko, enpresak ikastaroa hasi baino gutxienez 15 egun lehenago jakinarazi beharko du.

Prestakuntza hori lanorduetatik kanpo edo lanegunak ez direnetan egin behar denean, egoera horretan ematen diren orduak eta egunak ezin izanen dira ezarritako gehieneko kopurua baino gehiago izan. Kasu horretan, horien errekuperazioa lanaldi osotan eginen da, ordu hondarrak salbuetsita.

Hona hemen nahitaez eman beharreko orduen kopurua:

Langileen legezko ordezkariei kontsulta egin ondoren, enpresak zentro bakoitzeko prestakuntza plana prestatuko du. Horretarako, urteko lehenengo bi hilabeteetan zentro bakoitzeko langileen legezko ordezkariei urteko prestakuntza planaren proiektua helaraziko die eta kontsultetarako aldia irekiko du. Halaber, ekitaldia bukatu ondoren, aurreko ekitaldiko prestakuntza planaren betetze-mailari buruzko txostena emanen du, honako hauek adieraziz: egindako jarduerak, horietako bakoitzean parte hartu duten langileak eta egindako ziurtapenak.

Egindako eta gainditutako prestakuntza jardueren ziurtagiria jarduera bukatu eta bi hilabeteko epearen barruan emanen zaie langileei.

Zentroetan plantillarik txikiena duten kategorietako langileek berariazko prestakuntza ekintzak eskatzen ahalko dituzte. Eskariaren arabera, jarduera horiek hitzarmen honen eraginpeko zentro guztientzat eskaintzen ahalko dira.

13. artikulua. Atsedenaldiak. Lanaldi jarraituetarako, benetan lan egindako denboratzat hartuko den atsedenaldi hau ezarri da oro har:

-5-6 orduko lanaldiak: 10 minutu.

-6 orduko edo gehiagoko lanaldiak: 20 minutu.

Eragozpenik ez badago, atsedenaldia lantokian bertan hartu beharko da. Atsedenaldiak zentroko zuzendaritzak finkatzen ahal ditu, eta horren kariaz zerbitzu egokia emateari ez zaio inola ere kalterik eginen.

Ohiko lanaldiaren barnean atsedenik ez hartzeak ez du, inola ere, enpresari konpentsazioa eskatzeko eskubiderik sortuko.

14. artikulua. Lan egutegia. Enpresak urtero prestatuko du lan egutegia. Bertan, zentroaren oporraldiak eta txanda orokorrak agertuko dira, eta lantokiko ageriko tokiren batean paratuko da. Aldez aurretik, zentroko zuzendaritzak langileen ordezkariekin hitz eginen du.

2010. urtetik aurrera, zentro bakoitzeko lan egutegia abenduren 15era finkatuta egon beharko da, langileei egun horretan emanen baitzaie.

15. artikulua. Oporrak.

Lanean emandako urte oso bakoitzeko, langileek 26 laneguneko oporraldi ordaindua izateko eskubidea dute 2010. urtean eta 27 lanegunekoa 2011. urtean, edo proportzionalki dagozkien egunak, zerbitzualdia laburragoa izan baldin bada.

Oro har ezarritako lanaldia beste modu batean banatua duten enplegatuen kasuan, atxikita dauden lan txandako urteko lanaldiaren arabera banatuko zaizkie oporrak, bakoitzak lantokian benetan egoteko ezarrita duen urteko lanaldiaren betetzea erreferentziatzat harturik.

Oporrak hartzeko aldien eta deiak egiteko sistemaren antolaketa zentro bakoitzean erabakiko da aurretik enpresaren eta langileen legezko ordezkariaren artean.

Oporrak urte natural bakoitzaren barruan hartu beharko dira. Oporrak hartzeko eskubidea hurrengo urteko urtarrilaren 15ean iraungiko da.

Langileen Estatutuaren 38.3 artikuluan adierazitakoarekin bat, enpresaren opor egunen egutegian finkatutako oporraldiak bat egiten badu langile baten haurdunaldiaren edo erditzearen ondoriozko edo bularra emateko aldi baterako ezintasun egoera batekin edo Langileen Estatutuaren 48.4 artikuluan aurreikusitako egoera dela-eta lan kontratua eteteko aldiarekin, langileak eskubidea izanen du opor egunak aldi baterako ezintasun egoera edo agindu hori aplikatuz dagokion baimena bukatutakoan hartzeko, kontratuaren etenaldia bukatu ondoren, oporrei dagokien urte naturala bukatu bada ere.

Adierazitako oporrek bat egiten badute bestelako kausa batzuek eragindako aldi baterako ezintasunekin, behin-behinekoz, laugarren xedapen iragankorraren arabera jokatuko da.

6 hilabetetik gorako kontratuetan, oporrak nahitaez hartu beharko dira, eta ezin izanen dira ez ordaindu ez konpentsatu.

16. artikulua. Norberaren aferetarako egunak.

Gutxienez 6 hilabeteko antzinatasuna duten langileek, 2010eko urtarrilaren 1etik aurrera, norberaren aferetarako zenbait egun solte hartzen ahalko dituzte urtero. Horrek ez du ezarrita dagoen benetako urteko lanaldia murriztuko.

-Lanaldi osoa: 4 egun.

-Gaueko txanda eta %50eko edo gehiagoko lanaldiak: 3 egun.

-%50etik beherako lanaldiak: 2 egun.

Horretarako, lanaldiaren portzentajeak ohiko lanaldiaren araberako lanaldi kopuruari erreparatuz kalkulatuko dira, alde batera utzita lanaldi bakoitzean lan egiten den ordu kopurua.

Egun horiek gutxienez 5 egun lehenago eskatuko dira, ezinbesteko kasuetan izan ezik, eta zerbitzuaren beharrek eragozten ez badute emanen dira (erreferentziako plantillak).

17. artikulua. Baimen ordainduak. Langileek, aurrez jakinarazi eta ondoren justifikatuta, zilegi dute lantokitik ateratzea, soldata kobratzeko eskubidearekin, Langileen Estatutuaren 37.3 artikuluan aurreikusitako denborarako, b) atalean xedatutako kasuan izan ezik, ondoko honetan dioenak ordezten baitu:

-Seme-alaba batean jaiotza: 4 egun natural.

-Gurasoen, anaia edo arreben zein seme edo alaben ezkontza: egun bat.

-Heriotza:

• Ezkontidea eta seme-alabak: 6 egun natural.
• Gurasoak: 3 egun natural.
• Anaia edo arrebak: 2 egun natural.
• Aiton edo amonak, bilobak, aitaginarreba edo amaginarrebak (*), koinata edo koinatuak (*): egun natural 1.

Lantokitik hileta egiten den herrira 300 km baino gehiago baldin badaude, aurreko baimen egunei beste bat erantsiko zaie.

-Ospitaleratzeak:

• Ezkontidea eta seme-alabak: 5 egun natural.
• Gurasoak: 3 egun natural.
• Koinatu-koinatak eta amaginarreba edo aitaginarreba (*): 2 egun natural.
• Aiton edo amonak eta ilobak: egun natural bat.

Ezkontidea, semea edo alaba ospitaleratzen badute, eta langileak lantokitik 100 km baino urrunago dagoen herri batera joan-etorria egin behar badu, aurreko baimen egunei beste bat erantsiko zaie.

Espresuki ezartzen da baimena ezin dela ospitalizazioa baino luzeagoa izan.

Ospitaleratze kasuetan, egoerak irauten duen denbora guztian izanen da baimena hartzeko aukera. Ezein kasutan ezin izanen dira hartu, gozamen gerokotuaren sistema honen bidez, gertaera eragilearen ondo-ondotik hartu izan balitu zegozkiokeenak baino lanegun gehiago.

-Langilearen ezkontidearen edo harekin bizi diren seme-alaben kirurgia handi anbulatorioa: egun natural bat. Hemengo ondorioetarako, honako hau da ''kirurgia handi anbulatorioa'': gorputz atal bateko anestesia edo anestesia orokorra beharrezkoa den konplexutasun ertaineko prozedura kirurgikoa, zeinean pazienteak, denbora tarte zehaztu gabe baten ondoren, operazioko egun berean etxera itzultzen baitira.

-Langileen Estatutuaren 37.3.b artikuluarekin bat eta hura aplikatuz, bigarren mailara bitarteko odol edo ezkontza ahaideen kirurgiagatik, ospitaleratu gabe ere etxeko atsedenaldia beharrezkoa baldin badute: bi egun natural. Arrazoi horregatik langilea bidaia egin beharrean bada, lau egun.

-Gizarte Segurantzako medikuntza orokorreko medikuen eta espezialisten kontsultara joateko: kontsultara joateko behar-beharrezkoa den denbora.

-Azterketak egitera joan beharra: ikastetxe publikoetako eta unibertsitateetako azterketa ofizialetara joateko. Azterketetara lanorduetatik kanpo joaterik ez badute, lehenengo 10 orduak baino ez zaizkie ordainduko, urte natural bakoitzeko. Ez dira zenbatuko azterketa bakoitza egiteko bidean ematen dituen orduak (gehienez 2 ordu), betiere azterketak lantokia duen herritik kanpo badira. Gainerakoak urte naturalaren barruan errekuperatu beharko dira.

"Ezkontidea" aipatzen denean, balio bera du ofizialki eratu eta erregistratutako izatezko bikoteentzat.

(*) Izatezko bikotekideen gurasoak eta anai-arrebak aita-amaginarrebekin eta koinata-koinatuekin parekatuko dira.

18. artikulua. Amatasuna. Amatasunaren legezko denbora bi aste gehiago luzatuko da, soldataren %100 ordainduta, baldin eta emakumezko langileak amatasunaren hemezortzi aste horietatik lau bederen haurra jaio baino lehen hartzen baditu eta, eskaera egiteko momentuan, aldi baterako ezintasun egoeran ez badago.

Emakumezko langileak aukera hori hartzen badu, 18 aste horiek oso-osorik hartuko ditu, erditze eguna edozein dela ere. Horretarako, medikuaren ziurtagiria aurkeztu beharko du, aurreikusitako erditze eguna adierazten duena.

Langileen Estatutuaren 37.4 artikuluarekin bat eta hura aplikatuz, bederatzi hilabetetik beherako semeari edo alabari esnea ematen dioten emakumezko langileek eskubidea dute lanetik ordu betez lekutzeko. Denbora hori bi zatitan bana dezakete. Erditze multipleen kasuan dagokion kopuruan gehituko da baimen denbora. Emakumezko langileak eskubide hori ohiko lanaldiaren eguneko ordu erdiko murrizketarekin ordezka dezake, hala nahi badu, helburu berbererako, edo denbora hori lanaldi osotan pilatzen ahal du, zentroko zuzendaritzarekin adostu ondoren.

19. artikulua. Ordaindu gabeko baimenak. Enpresan urtebeteko antzinatasuna duten langileek 15 egun lehenagotik eskatuz gero, gutxienez hamabost eguneko bi baimen hartzen ahalko dituzte urtean, betiere baimena guztira hiru hilabetetik gorakoa ez bada. Baimen hori zentro bakoitzeko oporraldietan lortzeko, enpresaren aldez aurreko baimen idatzia beharko da. Oporraldi edo inguruabar horietatik kanpo, baimena automatikoa izanen da, betiere erreferentziako plantillak betetzen badira.

Baimena emateak ez du inolako eraginik izanen langileen oporretan.

Legezko ondorio guztietarako, baimen horiek eszedentzia gisa tramitatuko dira, enpresara itzultzea salbuetsita; izan ere, baimena bukatu eta besterik gabe itzuliko baita langilea. Baimena hartzeak ez du antzinatasunaren kontaketa etengo.

20. artikulua. Borondatezko eszedentzia. Enpresan bi urteko edo gehiagoko antzinatasuna duten langileek borondatezko eszedentzia har dezakete, lanpostu gordetzeko eskubidea izanda, baldintza hauetan:

-II. multzoko langileak: borondatezko eszedentzia ematea eta lanpostua 18 hilabetez erreserbatzea bermatzen da. Eszedentzia 3 hilabeterako izanen da gutxienez eta aldi bakar batean hartu beharko da. Eszedentziarako eskaera, eta lanera itzultzekoa ere, idatziz egin beharko da, 20 egun lehenagotik gutxienez.

-I. eta III. multzoetako langileak: borondatezko eszedentzia ematea eta lanpostua erreserbatzea, 3 hilabetetik 18 hilabete bitarteko aldi bakar baterako, zentro bakoitzeko erreferentziako plantillaren araberakoa izanen da. Kategoria horretan langile bakarra baldin badago zentroan, edo bere kategoriakoaren antzekoa dena erreferentziako plantilla organikoan ez badago, eszedentziarako eskaera idatziz eta 30 egun lehenagotik egin beharko da gutxienez. Salbuespenak horiek izanda, aurretik jakinarazteko epea 20 egunekoa izanen da.

Teknikarien eta zuzendaritzako langileen kasuan, zentroan lanbide kategoria bateko lanpostu bakar bat baldin badago, eszedentzia 2 hilabete lehenagotik jakinaraziko da gutxienez. Kasu horietan, eszedentzia urtebeterako eskatuko da gutxienez.

Oro har, beste eszedentzia bat hartu ahal izateko, langilea lanpostura itzultzen denetik gutxienez bi urte igaro beharko dira.

21. artikulua. Familiakoak zaintzeko eszedentzia.

Langileen Estatutuaren 46.3 artikuluarekin bat eta hura aplikatuz, langileek eskubidea izanen dute hiru urte bitarteko eszedentzia hartzeko, haurra zaintzeko, norberak izandakoa edo adoptatua izan, edo etxean hartua, bai modu iraunkorrean bai adoptatu aurreko harrera fasean. Hiru urte horiek haurra jaiotzen denetik edo, bestela, epaileen edo administrazioaren ebazpenaren egunetik aurrera kontatuko dira.

Hiru urtera arteko eszedentziarako eskubidea izanen dute, halaber, adinagatik edo istripu, eritasun edo desgaitasun baten ondorioz bere kasa bizitzeko gauza ez den eta lan ordaindurik egiten ez duen ahaideren bat -odol bereko edo ezkontza bidezko bigarren mailara artekoa- zaindu behar duten langileek.

Idatz-zati honetan ezartzen den eszedentzia langile bakoitzaren eskubidea da, gizonezkoa izan edo emakumezkoa izan, eta zatika hartzen ahal da. Hala ere, pertsona bera zaintzeko eskubidea enpresa bateko bi langilek edo gehiagok izaten badute, enpresak aukera izanen du aldi berean erabili nahi den eskubidea mugatzeko, funtzionamenduarekin lotutako bidezko arrazoirik baldin badago.

Beste subjektu eragile batek beste eszedentzialdi bat izateko eskubidea sortzen duenean, hori hastearekin bukatuko da ordura artekoa, halakorik izanez gero.

Langileak artikulu honetan ezarritakoaren arabera eszedentzian pasatzen duen denbora antzinatasunerako kontatuko da, eta bitartean eskubidea izanen du lanbide prestakuntzako ikastaroetara joateko, enpresaburuak deituta, batez ere lanera itzuli behar duenean.

Lehenbiziko urtean lanpostua gordetzeko eskubidea izanen du. Epe hori bukatuta, gordeko zaion lanpostua lanbide talde berekoa edo kategoria baliokidekoa izanen da.

Aurrekoa hala izanik ere, langilea ofizialki aitortutako familia ugarikoa baldin bada, lanpostua 15 hilabetez gordeko zaio, gehienez ere, kategoria arrunteko familia ugaria denean, eta 18 hilabetez, luzeenera jota, kategoria berezikoa denean.

22. artikulua. Semea edo alaba eta beste ahaideren bat zaintzeko lanaldi murrizketa.

Legepeko zaintza dela-eta, langileren batek adingaberen bat edo ordaindutako lanik egiten ez duen urritu fisiko, psikiko edo sentsorialen bat bere kargu izanez gero, eskubidea izanen du lanaldia murrizteko, zortziren bat gutxienez eta erdia gehienez ere, soldata ere hein berean murriztuta.

Lanaldia murrizteko eskubideak haurrak 12 urte bete bitarte iraunen du, eta luzatu ere luzatzen ahalko da, semeak edo alabak urteak betetzen ditueneko urteko ikasturtea amaitu bitartean (ekaina).

8 urtetik gorako adingabeak zaintzeko aldia luzatzeak borondatezko lanaldi murrizketaren ondorio berberak izanen ditu, soldatari eta kotizazioari dagokienez. Lanaldiaren eta txandaren banaketa alderdien artean ituntzen dena izanen da.

Langileen Estatutuaren 37.5 artikuluarekin bat eta hura aplikatuz, adinagatik edo istripu edo eritasun baten ondorioz bere kasa bizitzeko gauza ez den eta lan ordaindurik egiten ez duen odol edo ezkontza ahaideren bat (bigarren mailara artekoa) zuzenean zaindu behar duen langileak ere eskubide bera izanen du.

Ordutegia zehaztea langileari dagokio, bere ohiko lanaldiaren barrenean. Langileak, lanaldi arruntera itzuli behar badu, hamabost egun lehenago emanen dio horren berri enpresaburuari.

23. artikulua. Lanaldiaren borondatezko murrizketa adinagatik.

50 urte betetzen dituzten langileek eskubidea dute ohiko lanaldia %50 murrizteko, soldata ere hein berean murriztuta.

Teknikarien eta bulegoetako langileen kasuan, eskaera 2 hilabete lehenagotik egin beharko da.

Elkarrekin adostuko da lanaldiaren banaketa. Adostasunik ez izatera, enpresak ezarriko ditu ordutegia eta/edo lan txandak.

24. artikulua. Zerbitzuaren bermeak.

Erreferentziako plantilla: zuzeneko arretako langile espezializatugabeak, plantillaren %50, bederen, egonkorrak izanen dira.

Plantilla egonkorra dela ulertuko da 6 hilabeteko antzinatasuna, gutxienez, duen langileria (edo 130 lanaldi metatuak dituena, 18 hilabeteko aldian), egin diren zerbitzuak antzekoak izan badira, betiere.

Gainerako langileentzat enpresak zehaztuko du erreferentziako plantilla.

V. TITULUA

Baldintza ekonomikoak

25. artikulua. Ordainsariak. Hitzarmen honen eraginpeko langileen ordainsariak oinarrizko soldatak eta soldata osagarriek osatzen dituzte. Ordainsarien zenbatekoa eta banaketa eranskineko soldaten taulan ageri dira eta orobat ondorengo urteetakoa ere. Ordainsari kontzeptuen zenbatekoak lanaldi osoari eta itundutako urteko ordu kopuruari dagozkio. Lanaldi partzialen ordainsaria lan egindako orduen araberakoa izanen da. Ordainsariak hilabetea bukatutakoan ordainduko dira, hurrengo hilabeteko lehenengo lanegunean eta lanaldiaren barnean, salbu eta hilabetetik beherako kontratua duten langileak badira.

25.1.-Oinarrizko soldata: lanbide kategoria bakoitzarentzako soldata taulen eranskinean ageri da, eta lanaldi osoari eta itundutako urteko ordu kopuruari dagokie.

25.2.-Lan hitzarmeneko osagarria: Lanbide kategoria bakoitzeko soldata taulen eranskinean ageri dena da, lan egindako orduen araberakoa. Langileak ez du beste inolako osagarririk kobratuko oraingo lan mota berean eta oraingo baldintza beretan aritzeagatik edo lan hitzarmen honen aplikazioaren ondorioz dagokion lana egiteagatik. Hori dela-eta, osagarri hori hitzarmen honetan ageri ez den beste edozein ordainsarik irensten eta konpentsatzen ahalko du etorkizunean. 14 pagatan ordainduko da, aparteko bi pagak barne.

25.3.-Jaieguneko osagarria: igandez edo jaiegunez benetan egindako lana ordainduko da. Benetan lan egindako ordu osoen arabera ordainduko da eta "produktibitatetzat" hartuko da ondorio guztietarako. Aparteko pagetarako ez da kontuan hartuko eta oporren ordainsaritik espresuki baztertzen da.

25.4.-Eguberrietako egun berezietako plusa: Eguberrietako egun berezietako plusa ezarri da. Abenduaren 24an eta 31n eta urtarrilaren 5ean arratsaldeko eta gaueko txandetan lan egiten duten langile guztiek jasoko dute. 2009. urtean 50 euro gordin emanen dira egindako lanaldi oso bakoitzeko, edo dagokion zatia.

Era berean, abenduaren 25ean, urtarrilaren 1ean eta urtarrilaren 6an goizeko edo arratsaldeko txandetan lan egiten duten langile guztiek, jaiegunagatik dagokien ordainsariaz gainera, plus bat jasoko dute. 2009. urtean 40 euro gordin emanen dira egindako lanaldi oso bakoitzeko, edo dagokion zatia.

25.5.-Erantzukizuneko/lanpostuko osagarria: lanpostuaren erantzukizuna edo eginkizun berariazkoa ordainduko zaie enpresak postu horretarako edo eginkizun horretan aritzeko izendatzen dituen langileei. Hilero sorraraziko da edo egunez eguneko hainbanaketa baliokidea eginen da. 14 pagatan ordainduko da, aparteko bi pagak barne.

Osagarri honen esparruan, IV. eranskinean azaltzen diren txandako arduradunek hilero jaso beharreko zenbatekoa bateratzen da. 2010. urtean 150 eurokoa izanen da hilero, 14 pagatan. Lanaldi partzialeko langileen kasuan, lanaldiaren arabera jasoko da.

Lanpostuan aldi baterako edo txandaka arituz gero, benetan lan egindako orduen arabera ordainduko da. Orduaren prezioa finkatzeko, osagarriaren urteko zenbatekoa (14 pagatan) zati langilea atxikita dagoen txandaren (astea, asteburua, gauak edo txandaka) urteko lanaldi osoa eginen da.

Nolanahi ere, txandako arduradunaren lanpostuan jardun ahal izateko, langileak erreferentziako plantillan egon beharko du.

25.6.-Prestasuneko osagarria: etxebizitza funtzionaletarako langileentzako prestasuneko osagarri bat ezarri da. 2010. urtean 200 eurokoa izanen da hilero, 14 pagatan. Osagarri hau asteburuetan eta jaiegunetan guardia lokalizatuak egiteko ardura bere gain hartzen duten langileek jasoko dute. Adacen-en kasuan, kontzeptu hau gaueko guardia lokalizatura mugatuko da.

Osagarri honen hilabeteko kobraketa langile baten baino gehiagoren artean bana daiteke, erantzukizuna banatzen badute. Horrelakoetan, osagarriaren urteko zenbatekoa lanpostuan benetan emandako denboraren arabera hainbanatuko da.

25.7.-Jarduerako/produktibitateko osagarria: lan gehiago egitea edo lanaren kalitatea ordainduko du. Hilero sorraraziko da edo egunez eguneko hainbanaketa baliokidea eginen da. Enpresak zehaztuko du zeinek kobratuko duen, eta kasu bakoitzeko epeak eta zenbateko zehatzak. Bakarrik ordainduko da jarduera benetan burutzen bada eta ez da kontuan hartuko aparteko pagetarako, ez eta aldi baterako ezintasunaren osagarriak kalkulatzeko ere.

25.8.-Eguneko lanaldiak 15 ordutik gorakoak egitearen osagarria: Eguneko lanaldia 15 ordutik gorakoa egin ohi duten langileek hileko osagarri bat jasoko dute 14 pagatan. 2009. urtean, osagarri hori 90 eurokoa da hilean.

25.9.-Dedikazioko osagarria: langile batek zaintzaile kategoriarako ezarritako urteko lanaldia (zaintzaile kategoriarako ezarritako handiena) gainditzen badu, dedikazioko osagarria jasoko du benetan lan egindako soberako ordu bakoitzarengatik, hots, bere kategoriako soldaten taulan ezarritako orduaren prezioa. Osagarri hori urtarrilean emanen den paga baten bidez ordainduko da.

Dena dela, langile hauek aukera izanen dute, urtero, zaintzaileari dagokion kategoriarentzat ezarritako lanaldi orokorra aukeratzeko, konpentsazio ordainketa horren ordez. Murrizten diren lan orduak egun osotan ezarriko dira, eta enpresarekin itunduko da zein alditan hartuko diren. Aukera hori erabili nahi izanez gero, langileak urteko urtarrilaren 15a baino lehen jakinarazi beharko du.

Dedikazioko osagarria jasotzen bada, edozein kontingentzia dela eta sortzen diren aldi baterako ezintasun egoerak, baita lizentzia eta baimen ordainduak ere, ez dira benetan egindako urteko lanalditik murriztuko, haien ordainketen ondorioetarako. Ordaindu gabeko lizentzietako aldiak, berriz, urte naturalaren arabera deskontatuko dira.

25.10-Trebakuntzako osagarria: osagarri honen bitartez saritzen dira norberaren lanpostuan lortutako esperientziaren bidez jardueraren ezagutza handiagoa eta zerbitzuari irtenbideak eta kalitatea emateko gaitasun handiagoa duten langileak.

Zenbatekoa soldaten tauletako eranskinean adierazten dena da, edo lan egindako orduen araberako proportzionala. 14 pagatan ordainduko da, aparteko bi pagak barne.

-I. mailako trebakuntza: zentroan gutxienez 4 urteko antzinatasuna duten langileek jasoko dute, betiere denbora tarte horretan beren lanpostuari dagozkion benetako lanaldien eta ezarri diren nahitaezko prestakuntza orduen %50, gutxienez, egin badituzte.

-II. mailako trebakuntza: zentroan gutxienez 8 urteko antzinatasuna duten langileek jasoko dute, betiere lehen mailako trebakuntza lortu zutenetik beren lanpostuari dagozkion benetako lanaldien eta ezarri diren nahitaezko prestakuntza orduen %50, gutxienez, egin badituzte.

-III. mailako trebakuntza: zentroan gutxienez 11 urteko antzinatasuna duten langileek jasoko dute, betiere bigarren mailako trebakuntza lortu zutenetik beren lanpostuari dagozkion benetako lanaldien eta ezarri diren nahitaezko prestakuntza orduen %50, gutxienez, egin badituzte.

Trebakuntza aldiaren kontaketa 2007-01-01ean hasten da Mutiloako Adacen, Aspace Residencia, Carmen Aldave eta Aspace Ramón y Cajal zentroetako langileentzat, eta 2005-01-01ean gainerako zentroetako langileentzat. Hortaz, trebakuntzako osagarria 2011-1-1etik aurrera edo 2009-1-1etik aurrera jasotzen hasiko da, kasuan-kasuan.

Dena dela, behar diren trebakuntzako lanaldiak kalkulatzeko, langileak zentroan lan egin duen denbora osoa kontuan hartuko da, betiere 18 hilabetetik gora eman ez badu enpresan alta eman gabe, lanpostua erreserbatzeko kasuetan izan ezik.

Erditzearen ondoriozko lizentzietako aldiak edo, hardunaldiko arriskua, adopzioa edo harrera dela-eta, kontratuan egiten diren etenaldiak eta, orobat, aitatasun baimenak edo bularra emateko lan pilaketak benetan lan egindako alditzat hartuko dira prestakuntzaren kontaketa egitearen ondorioetarako.

Urte bakoitza bukatzean, enpresak ez badu nahitaezko prestakuntzarik eskaini, langileak benetan egin duela ondorioztatuko da.

25.11.-Antzinatasuneko osagarri pertsonala: 2004-12-31ra arte finkatutako antzinatasunaren edo asimilatuen zenbatekoa jasoko du (Mutiloako Adacen, Carmen Aldave eta Ramón y Cajal zentroen kasuan 2006-12-31ra arte) eta "ad personam" eskubidetzat hartuko da, lehenengo xedapen iragankorrean garatzen den bezala. Osagarri hau gainerako osagarriekin bat eguneratuko da.

25.12.-Osagarri pertsonala: aurreko hitzarmenaren aplikazioaren edo garapenaren indarrez jasotzen diren osagarri pertsonalak mantenduko dira. Osagarri hori jasoko dute, orobat, aurreko hitzarmen, erabaki edo epaien ondorioz, hitzarmen hau aplikatuz dagokien guztirako ordainsaritik gorako urteko guztirako ordainsaria jasotzen duten langileek. Osagarri hau gainerako osagarriekin bat errebalorizatuko da urtero.

26. artikulua. Aparteko pagak. Langileek aparteko 2 paga izateko eskubidea izanen dute, bata uztailean eta bestea Eguberrietan. Hauek osatuko dute aparteko paga: oinarrizko soldata, hitzarmeneko osagarria, trebakuntzako osagarria, erantzukizuneko/lanpostuko osagarria, osagarri pertsonala eta antzinatasuneko osagarri pertsonala. Paga hauek, urtero, uztailaren 1ean eta abenduaren 22an jasoko dira beranduenik.

27. artikulua. Soldaten berrikuspena. 2008ko soldaten taulak formula honen arabera eguneratuko dira hitzarmenaren indarraldiaren bitartean:

-2009. urtea: ordainsarien igoera orokorra %2koa izanen da soldata kontzeptu guztietan, 2008. urterako ezarritako diru-kopuruetatik abiatuta.

-2010. urtea: ordainsarien igoera orokorra 2009ko Nafarroako KPIa gehi %0,3 adinakoa izanen da soldata kontzeptu guztietan, 2009. urterako ezarritako diru-kopuruetatik abiatuta. Nafarroako KPIa + %0,3 aplikatzearen ondorioz ehuneko batetik beherako indizea ateratzen bada, gutxienez %1eko igoera bermatzen da.

Igoera orokor horretaz gainera, zerbitzu anitzetako laguntzaileen eta ostalaritzako zerbitzuetako langileen kategorien oinarrizko soldatak 40 euro gordineko igoera izanen du hilero, 14 pagatan.

-2011. urtea: ordainsarien igoera orokorra 2010eko Nafarroako KPIa gehi %0,5 adinakoa izanen da soldata kontzeptu guztietan, 2010. urterako ezarritako diru-kopuruetatik abiatuta. Nafarroako KPIa + %0,5 aplikatzearen ondorioz ehuneko bitik beherako indizea ateratzen bada, gutxienez %2ko igoera bermatzen da.

Igoera horretaz gainera, jaiegunetako osagarriaren zenbatekoa 2011ko urtarrilaren 1etik aurrera 5,75 eurokoa izanen da orduko.

Eguneratze horiek ordainduko dira Nafarroako Gobernuak dagozkion igoerak ordaindu ondoren zentro bakoitzeko kudeaketa entitateari, kudeaketarako itun edo kontratuko moduluan.

Konturako aurrerakina: 2010eko eta 2011ko hasieran urte bakoitzerako bermatutako igoera aplikatuko da soldata tauletan eta, Nafarraoko Gobernuak itun edo kontratuen eguneratze hori kudeaketa enpresei ordaindu ondoren, nominetan ordainduko da.

28. artikulua. Aparteko orduak. Aparteko ordutzat joko dira lan hitzarmen honetan ezarritako urteko lanaldiaren gainetik egiten direnak. Aparteko orduak ez dira ohiz eginen, ohiz kanpoko egoeretan baizik.

Orduen kontaketa urtea bukatutakoan eginen da. Enpresak baimendurik, langilearen kategoriarako ezarritako urteko lanalditik gora egindako ordu arrunt bakoitzeko -kasuko txandaren urteko lanalditik abiatuta kalkulatua- %150 ordainduko da, gehi jaiegunetako plusaren %150, aparteko ordua igandean edo jaiegun batean egiten bada.

Ezinbestean eguneko ohiko lanalditik gaineko orduak egiten badira, egindako orduen %150eko atsedenaldiaren bidez konpentsatuko dira, edo zenbateko berberaren bidez ordainduko, gehi jaiegunetako plusaren ordainketa, hala badagokio. Ordu horiek enpresak eta langileak adostu bezala edo aparteko orduak egin eta hurrengo 2 hilabeteetan hartuko dira.

29. artikulua. Dietak eta kilometrajea. Enpresaren beharrengatik beren ibilgailua erabili behar duten langileek kilometro bakoitzeko ordaina jasoko dute edo, bestela, erregaiaren, autobideen eta bestelako gastuak ordainduko dira, faktura aurkeztuta. Kilometrajeagatik eta joan-etorrietarako dietengatik ordainduko den zenbatekoa urteko soldata taulan ezarritakoa da. Kilometrajearen prezioa hauxe izanen da: 2010. urtean, 0,25 euro kilometro bakoitzeko eta 2011. urtean 0,26 euro kilometro bakoitzeko. Dietaren eta dieta erdiaren prezioak %2 igoko dira 2010. urtean, eta 2010eko Nafarroako KPIa adina 2011. urtean.

VI. TITULUA

Hobekuntza sozialak

30. artikulua. Erantzukizun zibileko asegurua. Enpresak, erantzukizun zibileko poliza baten bidez, aseguru bat eginen die langile guztiei, lanaren ondorioz gerta litezkeen erantzukizunak estaltzeko.

31. artikulua. Bizi eta istripu asegurua. Enpresak aseguru poliza bat itunduko du, laneko istripurako edo eritasun profesionalerako, heriotzako eta erabateko baliaezintasun iraunkorreko arriskuak estaltzen dituena. Estaldura 30.000 eurokoa izanen da.

32. artikulua. Laneko segurtasuna eta osasuna. Laneko arriskuen prebentzioari buruzko azaroaren 8ko 31/1995 Legean xedatutakoari jarraituko zaio. Enpresek hitz eman dute legearen aginduak eta hura garatzen duten erregelamenduak aplikatuko dituztela.

-Arriskuen prebentziorako plangintza. Arriskuen prebentziorako ekintza integratu bat enpresan ezartzeko, arriskuen prebentziorako plan bat ezarri beharko da, besteak beste honako hauek biltzen dituena: antolaketaren egitura, eginkizunen definizioa, praktikak, prozedurak, prozesuak eta aipatu ekintza aurrera eramateko behar diren baliabideak.

-Norbera babesteko ekipamendua. Norbera babesteko ekipamendua (NBE) erabili beharko da langileen segurtasun eta osasunerako arriskurik dagoenean eta ezin izan denean saihestu edo behar adina mugatu babes kolektiboko baliabide teknikoekin edo lan antolaketako neurri, metodo edo prozeduren bidez.

NBE horiek babes eraginkorra emanen dute, horrelakoak erabiltzeko arrazoi diren arriskuen aurrean, eta horiek erabiltzeak berak ez du berez inolako arrisku gehigarririk sorraraziko.

NBEak banatzen direnean, banatzearen ardura duen pertsonak horri buruzko informazioa eman beharko du, nola erabili eta zaindu behar den jakiteko.

-Amatasunaren babesa. Enpresek konpromisoa hartu dute ahalik lasterrena egiteko eta emateko haurdunaldiko arriskua dela-eta behar diren agiri eta tramite guztiak.

-Istripuen eta gertakarien ikerketa. Laneko istripuen eta gertakarien ikerketa-protokolo bat sortuko da, lan zentroko benetako beharrak kontuan hartuko dituena, langileen osasunari kalte zerk egin dion detektatzeko.

Istripuen ikerketaren helburu nagusia istripua zerk sortu duen jakitea da, gertatutakoak ezagutu ondoren. Helburua lorturik, ondorengo helburua izanen da ikasitakoari etekina ateratzea, neurri zuzentzaileak diseinatzeko eta ezartzeko, istripu berdinak edo antzekoak sortzen dituen arrazoia ezabatu eta enpresan prebentzioa hobetzearren.

-Prestakuntza. Enpresan sartu berri diren langileei "hasierako prestakuntza" emanen zaie, hots, laneko arriskuen prebentzioaren arloan bakoitzaren lanpostuaren ezaugarri hauei buruzko informazioaz osatua:

• Lantokiaren deskripzio fisikoa.
• Jokabide moldakaitzei buruzko berariazko jarduketak.
• Lanposturako neurri prebentiboak.

-Osasuna zaintzea. Neurri gehigarri gisa, osasun arrazoiengatik edo eszedentzia hartu dutelako luzaz lanera joan gabe egon eta berriz itzultzen diren langileei osasun azterketa eginen zaie.

33. artikulua. Jantziak eta oinetakoak.

Enpresak jantziak eta oinetakoak banatuko dizkie kategoria edo lanpostu hauetakoei: osasun langileak, II. eta III. taldeetako langileak. Enpresak oinetakorik ematen ez badu, kontzeptu honengatik 30 euro ordainduko dizkio urtero langileari, maiatza bukatu baino lehen.

Uniformeak eskuratzen dituzten langileak behartuta daude zentro bakoitzeko baldintza estandarren arabera janztera.

Uniformea norberaren erabilerarako izanen da eta langileak berak zainduko du eta haren ardura izanen du, kontrakorik ituntzen ez bada behintzat. Zentro bakoitzak, langileen legezko ordezkariei kontsultatu eta gero, bere uniforme mota eta banatuko dituen jantzien kopurua ezarriko ditu, neguko eta udako beharrak kontuan hartuta. Banaketa maiatzean eta urrian eginen da.

Enpresan berritik sartzen diren langileek, probaldia gainditu ondoren, denboraldiko bigarren horniduran sartzen diren jantziak jasoko dituzte.

34. artikulua. Aldi baterako ezintasuna.

Oro har, probaldia gainditu ondoren (*), edozein kontingentzia dela eta aldi baterako ezintasun egoeran dauden langileek gizarte segurantzaren prestazioaren gainetiko osagarri bat jasotzeko eskubidea izanen dute, hitzarmen honetan ezarritako kalkulu-oinarriaren %100 osatu arte.

(*) Baldintza hau ez da aplikatuko aldi baterako ezintasuna laneko istripuaren, lanbide eritasunaren edo haurdunaldiko arriskuaren ondorioz gertatu bada, kontingentzia horiek araudi orokorraren babespean baitaude baldintza hori bete gabe ere.

Adacen, La Atalaya, Santa María, Valle del Roncal eta Carmen Aldave zentroentzat araubide iragankor bat ezarri da, bigarren xedapen iragankorrean jasota dagoena.

Prestazioa kalkulatzeko oinarria kontzeptu hauek osatuko dute: bajaren aurreko hilabetean sorrarazitako oinarrizko soldata, hitzarmeneko osagarria, trebakuntzako osagarria, erantzukizuneko osagarria, osagarri pertsonala eta antzinatasuneko osagarri pertsonala, gehi aparteko pagen zati proportzionala.

Gutxienez 30 jaiegunetan edo 210 jai-ordutan lan egiten duen langile batek lan istripua duenean, aurreko paragrafoan adierazitako kalkulu-oinarriari dagokion hilabeteko jaiegunen batez bestekoaren balioa gehituko zaio. Jaiegunen kopurua ezartzeko, langile bakoitzari dagokion jaiegun teorikoen (igandeak eta jaiegun ofizialak) batez bestekoa hartuko da aintzat, urte horretako eta aurreko urteko egutegiak kontuan hartuta.

Asteburuetako langileen kasuan, 2010. urtean, kalkulu-oinarriari hilabeteko jaiegunen batez bestekoaren %50 gehituko zaio, aurreko formula bera erabiliz, kontingentzia guztietarako. 2011. urtean oinarria osatuko da, jaiegunen batez bestekoaren %100eraino. Hitzarmen honen hirugarren xedapen gehiagarrian ezartzen den Azterketa Batzordeak absentismoaren bilakaera aztertuko du eta 2010. urtean zehar behar diren antolaketa neurriak ezar daitezela proposatuko du kalkulu-oinarriaren hobekuntza hau 2011. urtean finkatzeko.

Barne igoeraren edo bestelako mugikortasun egoeren ondorioz, langileak lanaldi luzeagoa hartzen duenean, aldi baterako ezintasun egoeran artzen bada, goian adierazitako prestazioen osagarria aplikatuko zaio, lanaldi luzeago hori egin duen denboraren araberakoa izanen dena. Une horretatik aurrera jasoko dituen prestazioak ez dira gizarte segurantzak ezarritakoak baino handiagoak izanen, salbu eta jatorrizko egoeran jasoko lituzkeenak baino txikiagoak badira. Halakoetan, bere jatorrizko lanpostuan jasoko lituzkeen prestazioak berdinduko lirateke.

Berme osagarri gisa, aldi baterako ezintasunaren prestazioa hobetzeko kalkulu-oinarria finkatzeko asmoz hitzarmenean jasotzen ez diren soldata-kontzeptuek gainditzen badute bajaren aurreko hilabeteko azkeneko nominan jasotako soldata osoaren %20, kontzeptu horien %50 sartuko da kalkulu-oinarrian.

VII. TITULUA

Hutsegiteak eta zehapenak

35. artikulua. Hutsegite arinak.

a) Hogeita hamar egunean lanera hiru aldiz berandu iristea.

b) Lanera agertu ez eta hurrengo hogeita lau orduetan hutsegitearen arrazoiak ez jakinaraztea.

c) Lanetik bidezko arrazoirik gabe alde egitea, nahiz eta denbora gutxirako izan, baldin eta enpresarentzako, erabiltzaileentzako edo lankideentzako kalteak direla-eta, arau-hauste larri edo oso larritzat hartzerik ez badago.

d) Zabarkeriaz jokatzea arauei edo jasotako aginduei dagokienez.

36. artikulua. Hutsegite larriak.

a) Hogeita hamar egunean lanera hiru aldiz baino gehiagotan eta hamar baino gutxiagotan berandu iristea.

b) Hogeita hamar egunean behin lanera ez joatea justifikatu gabe.

c) Zerbitzuari dagokionez, agindutako lanetan behar den arreta ez jartzea eta goragokoen jarraibideei jaramonik ez egitea, enpresaren edo erabiltzaileen kalterako.

d) Jasotako aginduak edo ezarritako arauak ez betetzea. Batez ere laneko segurtasun eta higieneko neurriei dagozkienak.

e) Hirurogei egunean hutsegite arin bera behin baino gehiagotan egitea.

37. artikulua. Hutsegite oso larriak.

a) Urtebeteko epean lanera 20 alditan baino gehiagotan berandu iristea.

b) Hilabete batean, bidezko arrazoirik izan gabe, hirutan lanera ez joatea.

c) Eritasunaren edo istripuaren itxurak egitea, edo aldi baterako ezintasun egoeran izanik edonolako iruzurra egitea.

d) Hitzezko eta egitezko tratu txarrak ematea erabiltzaileei, nagusiei edo lankideei.

e) Lanetik alde egitea edo zabarkeria larriz aritzea, enpresari kalte larriak egiten bazaizkio edo erabiltzaileei egiten ahal zaizkienean.

f) Agindutako kudeaketetan iruzurra, leialtasunik eza edo konfiantza-abusua erakustea, eta enpresari nahiz hirugarrenei lapurtzea, ebastea edo jokabide horren konplize gisa aritzea, enpresan berean zerbitzua ematerakoan.

g) Agintekeria.

h) Aginduak era nabarmenean ez betetzea.

i) Hiruhileko batean hutsegite larriak behin baino gehiagotan egitea.

Aurreko artikuluetako hutsegiteen zerrenda adierazpen gisa eman da.

38. artikulua. Zehapenak.

Enpresak zehapenak jartzeko ahalmena du. Zehapenak idatziz jakinaraziko zaizkio langileari; gertakariak, hutsegitearen gradua eta ezarritako zehapena adieraziko dira.

Hutsegite larrien edo oso larrien eta, orobat, zehapenen berri langileen legezko ordezkariei emanen zaie, halakorik baldin bada, jakinaren gainean egon daitezen.

Enpresek, egindako hutsegiteen larritasuna eta inguruabarrak kontuan hartuta, gehienez zehapen hauek jartzen ahal dituzte:

a) Hutsegite arinak: hitzezko kargu-hartzea. Behin eta berriz gertatzen baldin bada, kargu-hartze idatzia.

b) Hutsegite larriak: idatzizko kargu-hartzea. Enplegu-soldaten etenaldia hamabost egun bitarte.

c) Hutsegite oso larriak: kaleratzeko ohartarazpena. Enplegu-soldaten etenaldia hirurogei egun bitarte. Kaleratzea. Aldi baterako ezintasun egoeretan iruzurra egiten denean, gehieneko zehapena aplikatuko da.

39. artikulua. Hutsegiteen preskripzioa. Langileek egindako hutsegite arinak hamar egunen buruan preskribatuko dira, larriak hamabost egunen buruan eta oso larriak berrogeita hamarren buruan, enpresa hutsegiteaz jakitun egindako egunetik aurrera.

VIII. TITULUA

Eskubide sindikalak

40. artikulua. Ordu sindikalak.

Langileen delegatu guztiek eta Enpresa Batzordeko kideek legez ezarritako ordu sindikalen kopurua izanen dute. Ordu horien banaketa delegatu bakoitzarekin ezarriko da banan-banan, urtarriletik abendura bitarte urte osorako ezarritako ordu kopurua gainditu gabe, hitzarmena sinatzen denetik hasita. Ordu kreditua ordezkariei berez dagozkien lanetarako erabili izanaren justifikazioa hilero eginen da eta ezinbestekoa izanen da ordu horiek nominan ordaintzeko.

Osasun eta Segurtasunaren Batzordeko delegatuek kreditu berariazkoa esleitua duten zentroetan, kreditu hori mantenduko zaie, eta Enpresa Batzordeari dagokiona bezalakoa izanen da. Bi figura horiek langile beraren esku baldin badaude, kreditu berariazkoa ohiko kredituari gehituko zaio.

Langileen ordezkarien lana errazteko asmoz, zentro bakoitzeko langileen delegatuen eta batzordeetako kideen ordu kreditua, osorik edo parte bat, meta daiteke eta kide bakar baten edo gehiagoren esku utzi. Ordu metaketak gutxienez hilabeteko epeetan eginen dira, eta haien ezaugarrien berri zentroko zuzendaritzari eman beharko zaio, epe bakoitza hasi baino 15 egun lehenagotik gutxienez.

2010. urtetik aurrera eta hitzarmen honek indarra duen bitartean, sindikatuek Hitzarmenaren Azterketa Batzordean -hirugarren xedapen gehigarrian ezarri bezala- parte hartzeko kreditu gehigarri bat finkatzen da. Kreditu hori, hilabetero, 4 ordukoa izanen da delegatu bakoitzeko eta ANDEPek ordainduko die zuzenean enpresei, urteko erregularizazioaren bidez, orduak erabili direla justifikatu ondoren.

Kreditu gehigarri hori hitzarmena sinatzen duten edo hitzarmenari atxikitzen zaizkion sindikatuetako delegatu baten edo gehiagoren esku meta daiteke, bakar-bakarrik. Ordu metaketa sindikatu bakoitzari zentro guztietan dagozkion ordu guztiak edo zati bat erabiliz egin daiteke, eta orduak, gutxienez, seihileko oso batean metatuko dira.

Aurreko paragrafoan ezarritakoa gauzatzeko, sindikatuek agentziari eta ukitutako enpresari jakinaraziko diete, metaketa aldi bakoitza hasi baino hilabete bat lehenagotik gutxienez, beren delegatuen orduak metatzeko borondatea, baita metaketa zein pertsonaren esku eginen den, eta berariaz adierazi beharko da metatzen dena sindikatuek Hitzarmenaren Azterketa Batzordean parte hartzeko dagoen hileko kreditu gehigarria dela.

41. artikulua. Langileen legezko ordezkaritzaren esku jartzen diren baliabideak.

Enpresek langileen legezko ordezkaritzaren esku utziko dituzte ohiko funtzionamendurako behar dituen baliabideak, gutxienez honako hauek:

-Enpresa batzordea baldin badago, haren bilerak egiteko toki bat, erabilera esklusiboa izan gabe, batzordeak eskatu eta libre egonez gero.

-Enpresa batzordea baldin badago, gainera, armairu giltzadun bat izanen dute, dokumentazioa artxibatzeko.

-Langileen legezko ordezkaritzarentzako iragarki taulen hornidura legez ezarriko diren baldintzetan eginen da.

IX. TITULUA

Beste xedapen batzuk

42. artikulua. Batzorde Paritarioa.

Lan hitzarmen hau sinatzean, lan hitzarmenaren segimendurako, aplikaziorako eta interpretaziorako batzorde paritario bat eratuko da, negoziazio batzordean parte hartu duten alderdi sinatzaileek osatua. Batzorde paritario horrek alderdietako edozeinek eskatuta eginen du bilera. Eskaera formala egiten denetik bilera egunera bitarte ez dira inoiz hamabost egun baino gehiago pasako. Eskaera formala izateko, hitzarmena sinatu duten alderdietako baten (enpresa nahiz sindikatu) kide guztien sinadurak bildu beharko dira.

Hitzarmenaren sinatzaileek konpromisoa hartzen dute hitzarmenaren aplikazioan edo interpretazioan sortzen ahal diren arazoak, Nafarroako Lan Auzitegiari edo Lan arloko Jurisdikzioari igorri aurretik, batzorde paritarioari jakinarazteko, salbu eta haien ebazpena legeak ezarritako epeen mende badago (kaleratzeak, gatazka kolektiboak, lan baldintzen funtsezko aldaketak).

43. artikulua. Kudeaketa entitateen titulartasuna aldatuz gero, nola jokatuko den:

Sektore honen ezaugarri eta inguruabar bereziak kontuan harturik eta, arreta emateko zentroen kudeaketa kontratuen esleipen prozesuen ondorioz, zerbitzuaren kudeaketa entitateen titulartasuna aldizka aldatu daitekeenez, artikulu honen helburua da langileen enpleguaren egonkortasuna eta haien lan baldintzak mantenduko direla bermatzea.

1.-Entitate batek administrazioak kontratatutako zerbitzuak esleitzeari uzten dionean, kudeaketa entitatearen titulartasunaren aldaketak ez du berez lan harremana iraungiko. Hortaz, sartzen den entitate berriak aurrekoak zituen lan betebehar eta eskubide guztiak subrogatuko ditu, ateratzen den entitateko plantillari dagozkionak, langileak sinatua duen kontratuaren modalitatea eta izaera edozein direla ere.

Hitzarmenari edo itunari atxikitako zentroko langileen kopurua eta baldintzak bermatzeko asmoz, kudeaketa entitateak, titulartasunaren balizko aldaketaren aurreko lehiaketa-prozedura egin bitartean, ez du inolako konpromiso, akordio, itun edo lan kontraturik sinatuko, ez kolektiborik, ezta banakakorik ere, lehiaketaren fasea hasten den egunean lantokian dauden baldintzak hobetzea dakarrenik. Nolanahi ere, ateratzen den entitateak esleipen hartzaile berriaren aurrean erantzun beharko du, baldin eta epe horretan eskaintzen den zerbitzua garestitzen duten aldaketa, egintza edo xedapen justifikatu gabeak gertatzen badira.

Entitatearen titulartasuna aldatzen den unean probaldian dauden langileek egoera horretan segituko dute probaldia bukatu arte.

Entitatearen titulartasuna aldatzen den unean aldi baterako ezintasun egoeran, eszendentzian, ordaindu gabeko lizentzialdian, oporretan, diziplina bidezko eginkizun-etenaldian edo lanpostua erreserbatzeko eskubidea ematen duen beste egoera batean dauden langileak kontratuaren entitate esleipen hartzaile berriari atxikita gelditzera igaroko dira.

Langile horiek ordezten dituzten bitarteko kontratudun langileak enpresa titular berrian sartuko dira ordezko langile gisa, eta izaera eta kontratu hori mantenduko zaie ordeztuak itzuli arte.

2.-Ateratzen den entitatearen betebeharrak:

Ateratzen den entitateak zerbitzuen errentamendu kontratuaren suntsiarazpenaren berri eta esleipen hartzaile berriaren izenaren berri emanen die ukitutako langileei, langileen legezko ordezkaritzaren bitartez, bataren edo bestearen berri formala izan bezain laster.

Ateratzen den entitateak ondoren zehazten den dokumentazioa utzi beharko du esleipen hartzaile berriaren esku, zerbitzuaren prestazioa hasi behar duen eguna baino hamar egun baliodun lehenagotik gutxienez, edo formalki esleipenaren berri jakiten duenetik hasita epe berean:

a) Ateratzen den entitatea zerbitzuak emateko kontratuaren amaieraz, amaieraren iragarpenaz edo ez berritzeaz jakitun izan zeneko dataren behar bezalako egiaztapena.

b) Ziurtagiri bat, honako datu hauek jasoko dituena: subrogazioak ukitutako langileen izen-abizenak, jaiotze data, helbidea, NANa, gizarte segurantzaren afiliazio zenbakia, kontratu mota, lanaldia eta ordutegia, lanbide kategoria, enpresan duen antzinatasuna, hitzarmenean sartuta ez dauden ordainsari kontzeptuak, bestelako baldintzak eta banakako itunak.

c) Sinatutako lan kontratuen fotokopia, idatziz jaso baldin bada.

d) Azkeneko hilabeteetako nominen fotokopia, urte naturalaren hasieratik kontatuta, eta kontratuaren titulartasuna aldatzen den egunean, ukitutako langileak beren soldatak garaiz jasotzen ari direla egiaztatzeko agiri bat.

e) TC1 eta TC2 kotizazio buletinen fotokopiak eta Gizarte Segurantzan ordaindu direla egiaztatzeko agiria. Horretarako, sartzen den entitateari Gizarte Segurantzako Institutu Nazionalak luzatutako ziurtagiri bat aurkeztuko dio, zeinetan aurrekoa egiaztatzeaz gainera, ziurtagiriaren datan mugaeguneraturik dauden kotizazioak agertuko baitira.

f) Artikulu honen 1. idatz-zatian adierazitako edozein arrazoi dela kausa, kontratua eten zaien langileen zerrenda, horren zergatia eta aurreikusten den etenduraren iraupena adierazita.

g) Zentroko urteko egutegia, ordutegien antolamendua eta lan txandak, hitzartutako oporraldien zerrenda barne, horiek adostu baldin badira, baita plantillako langile bakoitzak hartutako opor egunak, norberaren aferetarako egunak, lizentziak eta baimenak ere.

h) Titulartasunaren aldaketarako aurreikusitako egunera arte, plantillako langile bakoitzak benetan egindako lanaldien zerrenda, egindako lanaldi aldaketak adieraziz (kontratuan ohiz ezarritako lanaldien murrizketak eta luzapenak).

i) Urteko prestakuntza plana eta haren betetze-maila, oro har eta plantillako langile bakoitzari dagokionez. Ordura arte langile bakoitzak egindako nahitaezko prestakuntza berariaz egiaztatu beharko da, prestakuntzako sariaren kobraketaren ondorioetarako (hitzarmen honen 25.10 artikulua), lan ordutegitik kanpo egindako prestakuntza adieraziz, konpentsatu gabe baldin badago (hitzarmen honen 12. artikulua).

j) Langileen legezko ordezkaritza hautatzeko azkeneko prozesuaren espedientea, hala nola aurreko bileretako akten fotokopiak, eta, orobat, ordura arte alderdiek sinatu eta erregistratuta dauden entitateko edo zentroko hitzarmen edo itun kolektibo guztien fotokopia.

k) Esleipena hartzen duen entitateak, ondorio horietarako, eskatzen duen edo bidezkoa den beste edozein agiri, beharrezkoa edo aginduzkoa baldin bada.

Ateratzen den entitateak aurreko xehetasun guztiak egiaztatzen ez baditu, sartzen denak modu sinesgarrian eskatuko dizkio, egiaztatu ez dituen betebeharrak berariaz adieraziz, bi egunen buruan salatutako ez-egiteak zuzen ditzan.

Emandako informazioaren faltsutasuna edo zehazkabetasuna dela-eta, entitate esleipen-hartzaileari sortzen zaizkion ondorioen erantzulea ateratzen den entitatea izanen da, deusetan galarazi gabe bidegabeki subrogatutako langileak ateratzen den entitatera itzultzea.

3.-Zerbitzuaren esleipen-hartzaile berriaren betebeharrak:

Entitate berriak langileak lehengo enpresan zituen lan eskubide guztiak errespetatu beharko ditu, betiere eskubide horiek legezko itun edo akordio idatzien ondorioz badira eta, behar den dokumentazioarekin batera, entitateari jakinarazi bazaizkio edo langileak frogatzerik baldin badu.

Sartzen den enpresak, orobat, lan egitearen ondoriozko ordainketak eta kuotak aurreikusitako egunetan ordaintzea bere gain hartuko du, zentroaren kudeaketa esleitzen zaion unetik.

4.-Beste alderdi batzuk:

Sartzen den entitateak zentroan ezarritako oporren egutegia errespetatuko du goitik behera eta oporraldi guztiak egutegi horretan ezarri bezala onartuko ditu, enpresa bakoitzean sorrarazitako oporren zati proportzionala kontuan hartu gabe.

Subrogazioa urte naturala hasi aurretik gertatzen bada, sartzen den entitateak eta ateratzen den entitateak aurrekoa betetzeko behar diren konpentsazio ekonomikoak eginen dituzte.

Bi entitateak konpentsazio ekonomikoaren gainean ados jartzen ez badira, oporraldi osoa egin deneko entitateko titularrak langilearen nominatik edo, hala bada, likidaziotik deskontatuko du beste entitatean sorrarazitako aldiari dagokiona. Oporrik hartzen ez deneko entitateak oporrengatik dagokien zati proportzionala ordainduko die langileei, likidazioarekin edo lehenengo nominarekin batera, kasuan-kasuan.

Adostasunik ez badago, sorrarazitako oporrei dagokien aldia Gizarte Segurantzan kotizatu ez duen entitatea behartuta egonen da kotizazio horiei dagokien dirua ordaintzera beste entitateari.

Entitateen arteko konpentsazio ekonomikoaren kopia bat emanen zaie, langileen legezko ordezkariei, enpresa elkarteari eta hitzarmenaren batzorde paritarioari.

Ateratzen den entitateak langileei legozkiekeen hartzekoen likidazioa eta eskersarien zati proportzionalak ordainduko dizkie.

Enpresak eta langileak ados jartzen badira, langile bera entitate bereko zentro ezberdinetan lanean aritzeko jatorrizko egoerak desagertzeko ahaleginak eginen dira, zentro horietako baten titulartasuna beste entitate batera igarotzen den kasuetan.

Artikulu honetan subrogatzeko ezarrita dagoen bidea berez erabiliko da, entitatearen izaera zein den kontuan hartu gabe, pertsona fisikoa, juridikoa edo bestelakoa.

Artikulu honen aplikazioa nahitaezkoa izanen da lotetsitako alderdi guztientzat: zerbitzua uzten duen entitatea eta entitate titular berria.

44. artikulua. Aplikaziotik kanpo gelditzeko klausula.

Nafarroako Mendekotasun Agentziak kudeaketa kontratu edo itunetan jasotako langileria gastuak -hitzarmen honen aplikazioaren ondoriozkoak- ordaintzen ez baditu, entitateek hitzarmenean ezarritako baldintza ekonomikoen araubidea aplikatu gabe uzten ahalko dute.

Horrelakoetan, entitateek idatziz jakinaraziko dizkiete langileen ordezkariei edo, halakorik ezean, langile guztiei, hartutako erabakia justifikatzeko arrazoiak eta gertatutako kalte ekonomiko zehatza, idazkiarekin batera alegatutako arrazoiak egiaztatzen dituzten agiriak atxikiz.

Hitzarmena interpretatzeko batzorde paritarioari ere jakinaraziko zaio. Batzordeak neurri horren justifikazioari buruzko txostena egin beharko du eta enpresari eta administrazioari bidaliko die.

Alegatutako arrazoiak ikusita, batzorde paritarioak bitarteko lanak eginen ditu Administrazioarekin, ukitutako entitateari eta hango langileei eragindako kaltea ahalik eta laburrena izan dadin eta ahalik eta ondorio gutxien izan ditzan.

Xedapen gehigarriak, iragankorrak eta azkenak

Lehen xedapen gehigarria.

Hitzarmen honetan adostutako neurriek ez dituzte inola ere murriztuko aurreko akordioetan jasotako eskubideak, ez I. hitzarmenekoak, ez eta hitzarmen hau sinatu arte zentro bakoitzean sinatutako akordio indardunetakoak ere.

Baldintza partikularrak: zentroetako langile batzuek dituzten banakako baldintza hobeak errespetatuko dira, bai I. hitzarmenean eta haren eranskinetan ezarritakoak, bai II. hitzarmen honen langile eremuan sartzen diren zentro berrietarako 2007. eta 2008. urteetan sinatutako enpresa hitzarmenetakoak, baita zentro bakoitzean norbanako batzuentzat adostutako beste baldintza batzuk ere.

Zentro batzuetako berariazko akordioak: II. hitzarmena sinatzearekin batera, I. hitzarmeneko III. eta IV. eranskinak kentzen dira (eranskin horietan zentro jakin batzuetan hitzarmena aplikatzeko baldintza bereziak ezarri ziren). Hitzarmena sinatzean, Servirecord-en eranskina erantsi zitzaien. Era berean, indarrik gabe uzten dira zentro berrietarako 2007. eta 2008. urteetarako itundutako enpresa hitzarmenak, II. hitzarmen sektorialaren aplikazio esparruan sartzen baitira. Gainera, I. hitzarmenaren indarraldian zehar, sektoreko hitzarmenaren baldintza orokorrak hobetzen edo garatzen dituzten erabakiak sinatu dira zentroetan.

Horregatik, II. hitzarmenean itundutakoa hobetzen edo garatzen duten zentroetako baldintza partikularrak mantenduko dira, hala I. hitzarmeneko eranskinetan jasotako akordioetakoak, nola akordio honen langileria eremuan sartu diren zentroetako hitzarmenetan sinatutakoak, baita II. hitzarmen hau sinatu baino lehen zentro bakoitzean enpresak eta langileen legezko ordezkaritzak sinatutako zentroko akordioetan jasota daudenak ere.

Alderdiek erabaki dute itun horiei forma eman eta Erregistro Bulegoan erregistratzea II. hitzarmen hau sinatzearekin batera.

Bigarren xedapen gehigarria.

Txandakako lana. Itundutako lanaldia eta soldatak ezartzeko, kontuan hartu dira gaueko langileen eta/edo goizez, arratsaldez eta gauez aritzen direnen inguruabarrak. Lan hitzarmen honek lanaldi espezifikoak eta bereziak ezartzen ditu gaueko langileentzat eta/edo goizez, arratsaldez eta gauez aritzen direnentzat, lan erregimen berezi horiek konpentsatzeko.

Horregatik, espresuki ezartzen da talde horietako langileek ez dutela jasoko lan hitzarmen honetan inguruabar horietarako itundutako konpentsazio ekonomiko osagarririk 2011. urtera arte (gaueko lanaren plusa, txandako lanaren plusa, etab.), espresuki konpentsatzen baitira ezarritako lanaldi bereziarekin.

2011. urterako, 50.000 euroko kontu-sail berariazko bat finkatu da -10.000 euro I. taldeko kategorietarako eta 40.000 euro gainerakoentzat-, txandakako lanaren osagarri berri bat ezartzeko, hitzarmenaren batzorde paritarioan erabakitzen den bezala, batez ere langileen bizitza pertsonala eta familiarra bateratzeko gehien konprometitzen diren txandentzat.

11. artikuluan urteko lanaldiari buruz xedatutakoaren ondorioetarako, Zizurko Aspace zentroko egoitzetako asteko langileen txanda mistoa GAG gisako txandatzat hartuko da. Zerbitzuaren antolamendua dela-eta egiten duten urteko lanaldia txanda horretarako ezarritakoa baino handiagoa bada, ordu soberakina konpentsatzeko, osagarri bat jasoko dute txandakako langileen urteko lanaldiaren gainetiko dedikazioagatik. Osagarri hori hilabetero jasoko da, 14 pagatan, eta ez da aukerakoa izanen.

Hirugarren xedapen gehigarria.

Hitzarmenaren azterketarako batzordea: hitzarmen honetan araututako baldintza batzuk aplikazioaren esparruko zentroetan nola ezarri eta garatzen diren aztertzeko, 2010. urteko lehenengo hiruhilekoan lan batzorde bat eratuko da, baldintza horiek aztertu eta balorazio txosten bat egiteko. Batzorde honen esparruan, gutxienez, gai hauek jorratuko dira:

-Lanbide sailkapena, kategoriak eta eginkizunak.

-Lanaldi partzialeko langileen igoera, aldi baterako kontratuak eta kontratazioa.

-Laneko osasuna, absentismoa eta, aldi baterako ezintasun egoeretan, kalkulu-oinarriaren hobekuntzak.

-Berdintasuna eta laneko eta familiako eginkizunak batera eramatea.

-Prestakuntza, lanbide kualifikazioa, gaitasunen egiaztapena eta lanbide igoera.

Batzorde hori II. hitzarmena sinatu duten sindikatu bakoitzaren bina ordezkarik osatuko dute, gehi aholkulari batek, eta zentroetako kudeaketa enpresa bakoitzaren bina ordezkarik. Batzordean, II. hitzarmenaren esparruko zentroren batean ordezkaritza duten sindikatuek parte hartzen ahalko dute, negoziazio batzordean parte hartu ez badute ere, hitzarmenari lotzea berariaz eskatzen baldin badute. Nafarroako Mendekotasun Agentzia bileretara joanen da, behatzaile gisa.

Hitzarmenaren azterketarako batzordea hiru hilean behin bilduko da ohiz, eta aztertutako gaietatik ateratako ondorioen txosten bat prestatuko du 2011. urtean zehar.

Lehen xedapen iragankorra.

I. hitzarmenaren lehenengo xedapen gehigarriaren c) letraren testua desegoki idazteagatik, Valle del Roncal, Santa María eta La Atalaya zentroetako langile batzuek 2006. eta 2007. urteetan jaso ez zituzten diru-kopuruei dagokien atzerakinen pagaren ordainketa (antzinatasuneko osagarri pertsonala).

2006ko ekainaren 27an sinatutako I. hitzarmen sektorialaren batzorde paritarioaren erabakia aplikatuz, erabaki hartako zerrendan agertzen diren langileek hantxe ezarritako formula aplikatzearen ondorioz ateratzen diren atzerakinen paga jasoko dute II. hitzarmena sinatu eta bi hilabeteko epean gehienez.

Horretarako, aipatutako epean zentro horiek kudeatzen zituen enpresak ahalik eta lasterren txosten bat bidaliko dio Nafarroako Mendekotasun Agentziari, honako datu hauek azalduz: ukitutako langileen zerrenda, 2006. eta 2007. urteetan bakoitzak lan egindako aldiak eta, urte horietako lanaldiekin alderatuta, bakoitzak benetan lan egindako aldiek osatzen duten ehunekoa.

Behar diren kalkuluak egin ondoren, Agentziak txosten bat bidaliko dio hitzarmenaren batzorde paritarioari, non langile bakoitzak jaso beharreko diru-kopuruak agertuko baitira. Batzorde paritarioak banan-banan jakinaraziko die langile guztiei bakoitzaren atzerakinen pagaren zenbatekoa eta erreklamazioak egiteko epe bat finkatuko du. Erreklamazioak idatziz eginen dira eta batzorde paritarioari zuzenduko zaizkio. Erreklamazioaren zergatia garbi adieraziko da eta erreklamazioaren funtsa egiaztatzeko dokumentazioa erantsiko.

Litezkeen erreklamazioak ebatzita, Nafarroako Mendekotasun Agentziak berrikusi eta onartu ondoren, behin betiko diru-kopuruak gaur egun zentroak kudeatzen dituzten enpresei bidaliko zaizkie, berariaz prestatuko den nomina batean langileei ordain diezazkieten.

Bigarren xedapen iragankorra.

Zenbait zentrotan, aldi baterako ezintasun egoera jakin batzuetan prestazioa hobetzeko araubide iragankorra: 2010. eta 2011. urteetan, Adacenen zentroentzat eta La Atalaya, Santa María, Valle del Roncal eta Carmen Aldave zentroentzat berariaz, araubide iragankor bat ezarri da 2011ko abenduaren 31tik aurrera %100 kobratu arte, kontingentzia guztietan. Epe iragankor horretan, hauexek izanen dira aldi baterako ezintasuneko osagarriaren iraupena eta zenbatekoa, kontingentzia motaren arabera:

Hirugarren xedapen iragankorra.

Prestakuntzaldiko zaintzailearen kategoriaren iraungipena: 2010eko abuztuaren 31tik aurrera prestakuntzaldiko zaintzailearen kategoriako kontratu berririk ez da eginen. 2010eko abenduaren 31n kategoria hori iraungiko da lanbide sailkapenean.

Laugarren xedapen iragankorra.

Aldi baterako ezintasun prozesuak jadanik adierazita dauden opor egunekin bat egitea: adierazita dauden opor egunek aldi baterako ezintasun prozesuekin bat eginez gero, ezintasunaren zergatia Langileen Estatutuan araututakoren bat ez bada, I. hitzarmenean xedatutakoa mantenduko da behin-behinekoz. Honako kasu hauetan, beste opor egun batzuk finkatzen ahalko dira:

-Ospitaleratzealdiarekin bat egiten duten opor egunak, betiere ospitaleratzea finkatutako oporraldia hasi baino lehen gertatu bada.

-Laneko istripuen kasuan, horren ondoriozko baja 7 egunekoa edo luzeagoa bada.

Kasu horietan, gertakizun horietako batekin batera gertatzen diren opor egunak baino ez dira aldatuko. Enpresa eta langilea ados jarrita aldatuko dira opor egunak beste egun batzuetara. Adostasunik ez izatera, enpresak erabakiko du opor egun horiek noiz hartu behar diren. Oporrak, betiere, hurrengo urteko urtarrilaren 15ean iraungiko dira.

Kontuan harturik gai honen gainean epaileen ebazpen asko izaten ari direla eta oraindik ez dela berariaz arautu, bi alderdiek adierazten dute prest daudela hitzarmenaren indarraldian zehar batzorde paritarioan aurrekoa hobetzen duen beste araudi bat adosteko eta II. hitzarmenaren 15. artikuluari eransteko (oporrei buruzkoa).

Azken xedapenetan lehena.

Lege subsidiarioak: lan hitzarmen kolektibo honetan ezarri ez diren gaietarako, Langileen Estatutuan eta lan arloko legedi orokorrean xedatutakoa aplikatuko da.

Berariaz, ukitzen diren lan baldintzei dagokienez, Langileen Estatutuan xedatutakoari segituko zaio, hala Emakumezkoen eta gizonezkoen arteko benetako berdintasuna lortzeko martxoaren 22ko 3/2007 Lege Organikoak indarra hartu ondoren emandako idazketaren arabera, nola estatutuaren garapenerako arauetan ezarritakoaren arabera.

Azken xedapenetan bigarrena.

Nafarroako Lan Gatazkak konpontzeko Auzitegiaren menpe jartzea. Alderdiek erabaki dutenez, lan hitzarmen honen interpretazioan eta aplikazioan sor daitezkeen banakako eta taldeko gatazkak Nafarroako Lan Gatazkak konpontzeko Auzitegiak konponduko ditu, adiskidetze, bitartekotza eta arbitraje faseetan.

Azken xedapenetan hirugarrena.

Hitzarmenaren idazketa eta erabilitako generoa: hitzarmen honen gaztelaniazko testuan "trabajador" edo "trabajadores" hitzak erabiltzen direnean, ulertu behar da aplikazio eremuaren barreneko langile guztiei dagozkiela, gizonezkoei eta emakumezkoei. Izen maskulinoa neutrotzat erabili da hizkuntzaren ekonomiagatik eta, horrenbestez, hortik ezin daiteke ondorioztatu generoa dela-eta baztertzeko inolako asmorik dagoenik.

I. ERANSKINA

II. hitzarmenaren eremuan sartuta dauden zentroak

-Infanta Elena zentroa (Cordovilla).

-Valle del Roncal zentroa (Iruña).

-Santa María zentroa (Burlata), Las Hayas zentroa izanen dena (Sarriguren).

-La Atalaya zentroa (Tutera).

-Oncineda zentroa (Lizarra).

-Monjardín eguneko zentroa (Iruña).

-Adacen zentroa (Mutiloabeiti).

-Carmen Aldave egoitza (Iruña).

-Ramón y Cajal egoitzak eta eguneko zentroa (Zizur Nagusia).

-Vencerol etxebizitza funtzionala (Tutera).

-Las Torchas etxebizitza funtzionala (Lizarra).

-Mendebaldea etxebizitza funtzionala (Iruña).

II. ERANSKINA

Kategoriak eta funtzioak

1. Taldea: teknikariak eta bulegariak.

1.1. Zuzendari teknikoa (*).

1.2. Goi mailako tituluduna: zuzendaria, medikua, psikologoa.

1.3. Erdi mailako tituluduna: terapeuta, gizarte langilea, OLT-EUD, fisioterapeuta, logopeda, maisu-maistrak eta kontularia (azkeneko lanpostu horretan aritzeko, entitateak erdi mailako titulua eskatu baldin badu).

1.4. Hezitzailea.

1.5. Administrazioko langileak:

-1. mailako ofiziala.

-2. mailako ofiziala.

-Administrari-laguntzailea/Harreragilea

2. Taldea: Zuzeneko arretako langile espezializatugabeak.

2.1. Zaintzailea (egoitzetako zaintzailea eta laguntzailea barne).

2.2. Prestakuntzaldiko zaintzailea (iraungitzekoa).

2.3. Etxebizitza funtzionaleko zaintzailea.

2.4. Monitorea.

3. Taldea: Zerbitzu orokorretako langileak.

3.1. Gobernanta, zerbitzu orokorretako burua.

3.2. Zerbitzu anitzetako langileak:

-Mantentze-lanetako eta zerbitzu anitzetako ofiziala. Auto-gidaria.

-Zerbitzu anitzetako laguntzailea.

3.3. Ostalaritzako langileak:

-Sukaldeko burua (*).

-Sukaldaria.

-Ostalaritzako zerbitzuetako laguntzailea (garbiketa, arropa-garbiketa, sukaldea, ile-apaintzailetza).

(*) Iraungi beharreko kategoriak. Kategoria mantenduko zaie, bakar-bakarrik, orain daukatenei.

Prestakuntzaldiko zaintzailea.

Hirugarren xedapen gehigarrian ezarritakoari jarraikiz, kategoria hau 2010eko abenduaren 31n iraungiko da. Urte horretako abuztuaren 31tik aurrera, figura honetako kontratu berririk ez da eginen.

Aldi iragankor batean, kategoria horretan sartuko dira zaintzailearen kategoriari berez dagozkion lanak egiten dituzten pertsonak, behar den gaitasuna lortu ez badute ere. Kategoria horretan egonen dira 150 lanaldiko edo 900 orduko gaikuntzaldia egin arte (bi aukeretatik handiena osatu arte).

Benetan lan egindako lanaldiak baizik ez dira kontatuko, ez ordea aldi baterako ezintasun egoeran emandakoak, oporrak edo baimenak, etab., eta egindako lanari dagokion ordainsariaren %90 kobratuko dute, jaiegunetako plusa eta gaueko lanaren plusa, halakorik badago, izan ezik; jaiegunetako plusaren %100 kobratuko dute. Ezarritako lanaldi horiek bete ondoren, besterik gabe zaintzaile kategoriara pasatuko dira.

Prestakuntzaldia benetan lan egindako lanalditan neurtuko da eta ez da kontratuaren indarraldia kontuan hartuko, eta berdin jokatuko da "benetan lan egindako lanaldiei" dagokienez.

Prestakuntzaldiak ez dira elkarrekin batzen ahal horien artean 18 hilabete baino gehiagoko tartea egon bada, kontratu batetik bestera.

Taldeen eginkizunak

Eginkizunen deskribapena adibide gisara eman da. Langile guztiak beren nagusiek agintzen dizkieten lan eta operazioak egitera behartuak daude, nor bere eskumen eta lanbide kategoriaren barnean, beren duintasunaren eta lanbide prestakuntzaren kalterako izan gabe.

Orain arte kategoria eta postu guztietan zentroan egin izan diren lan guztiak eginen dira gutxienez.

1. taldea. Teknikariak eta bulegariak.

Beren lanbide kategoriaren eginkizunak beteko dituzte, eta plangintza, kontrola eta jarraipena egiteaz eta esleitutako jarduera egiteko beharrezko baliabideak eta pertsonak kudeatzeaz arduratuko dira; arreta berezia jarriko zaio esleitutako lanak ahalik eta hoberen egiten saiatzeari.

2. taldea. Zuzeneko arreta espezializatugabea.

Zaintzailea: balio anitzeko gaitasunak eta eginkizunak ditu eta erabiltzailearen eguneroko bizitzako jardueretan laguntzeko zerbitzuak egiten ditu, ohiturak hartzeko eta jarrera aldatzeko programetan parte hartzen du, eta erabiltzaile talde batez arduratzen ahal da, hauetan lagunduz: norbere garbitasunerako jarduerak, logelak, zainketa higienikoak, elikadura, aisialdia eta denbora librea, tailerrak, txangoak, ibilaldiak eta esleitzen zaizkion gainerako laguntza eta intregrazio eginkizunak.

Edonola ere, ez ditu eginen osasun tituludunek baizik egin behar ez dituzten eginkizunak. Arlo horretan, osasun agintariek ofizialki eta modu iraunkorrean zehazten dutenari jarraituko zaio (ebazpenak, zirkularrak, arauak, legeak, etab.).

3. taldea. Zerbitzu orokorretako langileak.

Beren lanbide kategoriaren edo ogibide klasikoen eginkizunak beteko dituzte, enpresaren beraren espezialitateak kontuan hartuta, eta zuzentasun edo eragimen nahikoarekin eta lanpostuari dagokion autonomia eta erantzukizun mailarekin, eta, behar izatera, zerbitzu eta/edo langile baten edo batzuen agintari eta/edo erantzule izaten ahalko dira.

IV. ERANSKINA

Txandako arduradunak zentroetan

V. ERANSKINA

Berdintasunerako planak

3/2007 Legean ezarritakoarekin bat, emakumeen eta gizonen benetako berdintasuna izan dadin, enpresek tratu eta aukera berdintasuna errespetatu behar dute lan esparruan eta, xede horretarako, lanean emakumeen eta gizonen arteko edozein bereizkeria eragozteko neurriak hartuko dituzte. Neurri horiek langileen legezko ordezkariekin negoziatu eta, hala bada, adostu beharko dituzte, lan arloko legerian zehazten den moduan.

Enpresak 250 langile baino gehiago baditu, aurreko idatz-zatian aipatutako berdintasunerako neurrien barrenean, berdintasun plan bat prestatu eta aplikatuko da, kapitulu honetan ezarritako edukia eta hedadura izanen dituena. Plana lan legedian adierazita dagoen bezala negoziatu beharko da.

Enpresetako berdintasunerako planak neurri multzo antolatuak dira, egoeraren diagnosia egin ondoren hartu direnak. Neurri horien helburua da enpresan emakumeek eta gizonek tratu eta aukera berdintasuna izatea lortzea eta sexuagatiko bereizkeria desagertzea.

Berdintasun planetan finkatuko dira lortu nahi diren helburu zehatzak eta horiek lortzeko erabili beharreko estrategiak eta jardunbideak. Halaber, helburuen jarraipen eta ebaluaziorako sistema eraginkorrak ezarriko dira.

Ezarritako helburuak lortzeko, berdintasunerako planek arlo hauek jorratuko dituzte, besteak beste: enplegua lortzea; lanbide sailkapena; barne igoera eta prestakuntza; ordainsariak; laneko denbora antolatzea laneko, norberaren eta familiako bizitza batera eramateko, emakumeen eta gizonen arteko berdintasunari dagokionez; eta sexu jazarpenaren eta sexuagatiko jazarpenaren prebentzioa.

Berdintasun planek enpresa oso bat hartuko dute, deusetan galarazi gabe zenbait zentrotan egokiak diren ekintza bereziak ezartzea.

Batzorde paritarioaren eginkizunak, aukera berdintasunaren arloan.

Hitzarmen hau sinatzen duten entitateen ordezkariek osaturiko batzorde paritarioa arduratuko da arlo honetan harturiko konpromisoak betetzen direla begiratzeaz. Horretarako, eginkizun hauek betetzen ahalko ditu:

a) Aurreko puntuetan ezarritako berdintasun planei buruzko xedapenak interpretatu eta aplikatzerakoan enpresetan sor litezkeen zalantzei buruz argibideak ematea.

b) Sektoreko enpresetan adosten diren berdintasun planen bilakaeraren jarraipena egitea.

c) Gizonen eta emakumeen arteko laneko tratu eta aukera berdintasunari buruz txosten teknikoak prestatzea, aldeek eskaturik.

d) II. hitzarmenaren azterketarako batzordearen berariazko esparruan, alderdiek zenbait jarraibide eta konpromiso ezarriko dituzte berdintasun planak prestatu eta abian jartzeko prozeduren gainean, berdintasun planak aplikatzera behartuta dauden enpresetan. Plan horiek abian jarri ondoren, azterketarako batzordeak hitzarmenaren esparruan berdintasunaren tratamendua hobetzeko proposamenen txosten bat prestatuko du.

Era berean, sektoreko aukera berdintasunari buruzko azterlan bat prestatzen ahalko da, zehazki, emakumeen lan eta enplegu egoeraren ebaluazio bat, hitzarmen honek ukituriko sektoreko enpresen artean inkesta bat eginez. Horretarako, enpresek generoaren arabera sailkaturik aurkeztu beharko dituzte datuak.

e) Lorturiko ondorioak ikusirik, Emakumearen Institutuarekin lankidetza hitzarmen bat sinatzeko aukera aztertuko da, hitzarmen honek ukituriko enpresetan tratu eta aukera berdintasunaren arloko praktika egokien kode bat prestatzeko.

Iragarkiaren kodea: F1011669