Iragarkia

86. ALDIZKARIA - 2010eko uztailaren 16a

1. NAFARROAKO FORU KOMUNITATEA

1.7. BESTELAKOAK

42/2010 FORU AGINDUA, ekainaren 21ekoa, Herri Lan, Garraio eta Komunikazioetako kontseilariak emana, "Bideak egokitzea, Arrubiasko obra-hondakindegiaren ingurumena lehengoratzeko proiektua" jendaurrean egoteko epea ebatzi eta proiektu hori behin betiko onesten duena.

Herri Lan, Garraio eta Komunikazioetako kontseilariaren irailaren 25eko Foru Aginduaren bidez, "Bideak egokitzea, Arrubiasko obra-hondakindegiaren ingurumena lehengoratzeko proiektua" behin-behineko onetsi eta jendaurrean paratu zen. Foru agindu hura 125. Nafarroako Aldizkari Ofizialean argitaratu zen, urriaren 9an.

Proiektu, Trenbide eta Lan Hidraulikoen Zerbitzuak aditzera eman du jendaurreko aldian honako alegazio hauek aurkeztu direla. Hona haien edukia eta erantzuna:

1. alegazioa.-Juan María Lezáun Labiano jauna.

Adierazten du obra-hondakindegira NA-6007 errepidetik sartzeko bideak, proiektuan aurreikusitakoak, alegatzailearen landa finka bitan banatzen duela, eta bide hori egiteko desadostasuna agertzen du, ez baitago justifikatuta onura publikokoa edo gizarte interesekoa denik.

Erantzuna:

Onartu egin da alegatutakoa.

Espediente honetatik at geratzen dira obra-hondakindegira NA-6007 errepidetik sartzeko bidearen gaineko ukipenak eta, behar izatera, haiei buruzko espediente bat eginen du gerora Berrikuntza, Enpresa eta Enplegu Departamentuak.

2. alegazioa.-Francisco Javier Echeverría Artieda jauna.

Adierazten du GA-10 eta GA-11 finkak, Arlegiko Kontzejuaren ondasun eta eskubideen zerrendan ageri direnak, haren jabetzakoak direla. Eransten du Iruñeko José María Marco García Mina notarioaren aurrean jasotako jaraunspena onartzeko eskritura eta eskatzen du ondasun eta eskubideen zerrendan sartzeko eta jabetzat jotzeko.

Erantzuna:

Proiektuak Nafarroako Lur-ondasunen Erregistro Fiskaletik hartzen ditu identifikaziorako erreferentziak eta deskripzio datuak, eta datu horiek eguneratuta daude eta bat datoz udal katastroarekin. Horien arabera, GA-10 eta GA-11 finken (Galarko 9. poligonoko 262. eta 263. lurzatiak) katastroko titularra Arlegiko Kontzejua da. Dena dela, aurkeztutako jabetza tituluaren kopia partziala ikusita, Nahitaezko Desjabetzeari buruzko Legearen 5.2 artikuluan xedatutakoari jarraikiz, Francisco Javier Echeverría Artieda jauna, Arlegiko Barriobajo kaleko 6. zenbakian bizi dena, ukitutako ondasun eta eskubideen zerrendan sartu da; hala ere, okupatu aurreko aktak jasotzean titulartasun hori frogatzen duten jatorrizko agiriak aurkeztu beharko ditu, balizko akatsa zuzentze edo auziren bat dela ondorioztatze aldera.

3. alegazioa.-Eugenio Osinaga Cenoz jauna, Errealaiz kooperatiba sozietatearen izenean.

Adierazten du proiektuak BE-11 finkako (Beriaingo 5. poligonoko 831. lurzatia) 3 m inguruko zabalerako zerrenda bat ukitzen duela, luzera osoan, eta lurzatiko ohiko jarduera mugatzen duela; hortaz, eskatzen du proiektua aldatzeko edo ukitzen dituen elementuak ordezteko.

Erantzuna:

Desbajetuko ez den jabari publikoko kanpoko zerrenda baizik ez du ukitzen; beraz, ez da elementurik aldatuko eta ohiko jarduerarekin jarraitzen ahalko da. Bestalde, hartarako sarbideak behar bezala utziko dira.

4. alegazioa.-Rafael Blanco Pena jauna, Beriaingo Udalaren izenean.

Proposatzen du NA-6007 eta NA-6009 errepideen bidegurutzeak kontuan izan beharko lukeela gune horri buruzko Hiri Antolamenduko Udal Planean jasotakoa eta, horretaz gainera, adierazten du NA-6007 errepidea hobetu beharko litzatekeela, NA-6009 errepidearekin duen lotunearen eta Beriainerako sarbideko biribilgunearen artean, proposatzen duen moduan.

Erantzuna:

Batetik, adierazi behar da proiektuaren xede zehatza eta berariazkoa dela proiektua behin-behinean onesten duen foru aginduaren atariko zatian aipatzen dena, laburbilduz, Arrubiasko obra-hondakindegiko materiala Berianen sodio kloruroa lortzeko dagoen lantegira garraiatzea erraztea; horretarako, bidea egokitu beharra dago garraio mota horren berezko segurtasun eta erabilera baldintzetara.

Bestetik, "Nafarroako Errepideen 2009-2016 bitarteko III. Plan Zuzentzailea" tramitatzeko prozesua aurrera doa, eta bertan aurreikusten da, 123. jarduketan zehazki, Beriain-Subitza NA-6009 errepidea zabaldu eta hobetzea.

Ondorioz, bidezkoa da alegazioa ezestea.

Horrenbestez, Proiektu, Trenbide eta Lan Hidraulikoen Zerbitzuak jakinarazi eta proposatu duenarekin bat eta Herri Lan, Garraio eta Komunikazioetako Departamentuaren egitura organikoa ezartzen duen otsailaren 24ko 47/2005 Foru Dekretuaren 2.2 artikuluaren bidez eskuratu ditudan eskudantziak erabiliz,

AGINDU DUT:

1. "Bideak egokitzea, Arrubiasko obra-hondakindegiaren ingurumena lehengoratzeko proiektua" jendaurrean egoteko epea ebaztea azalpen zatian azaldu bezala.

2. "Bideak egokitzea, Arrubiasko obra-hondakindegiaren ingurumena lehengoratzeko proiektua" eta eransten den ukitutako ondasun eta eskubideen zerrenda behin betiko onestea.

3. Foru agindu hau Nafarroako Aldizkari Ofizialean eta departamentuko web orrian argitaratzea, eta dagokion iragarkia Nafarroako Foru Komunitatean gehien zabaltzen diren egunkarietako batera bidaltzea.

4. Foru agindu hau jakinaraztea Proiektu, Trenbide eta Lan Hidraulikoen Zerbitzuari, Desjabetze Atalari, alegatzaileei eta Galarko eta Beriaingo udalei, eta azken horiek premiatzea zeinek bere udaleko iragarki oholean argitara dezaten.

5. Foru agindu honek ez du administrazio bidea amaitzen, eta interesdunek gora jotzeko errekurtsoa aurkezten ahal dute horren aurka, Nafarroako Gobernuari zuzenduta, hilabeteko epean, foru agindua jakinarazi edo Nafarroako Aldizkari Ofizialean argitaratu eta biharamunetik aitzina.

Aurreko lerroaldean xedatutakoa deusetan ukatu gabe, foru agindu honek administrazio bidea amaitzen du administrazio publikoentzat. Dena dela, administrazio publikoek administrazioarekiko auzi-errekurtsoa aurkez dezakete, Nafarroako Justizia Auzitegi Nagusiko Administrazioarekiko Auzien Salari zuzendua, hura jakinarazi edo argitaratu eta biharamunetik bi hilabeteko epean. Horrek ez du galarazten Nafarroako Gobernuan aldez aurreko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean.

Iruñean, 2010eko ekainaren 21ean.-Herri Lan, Garraio eta Komunikazioetako kontseilaria, Laura Alba Cuadrado.

Iragarkiaren kodea: F1011014