1. NAFARROAKO FORU KOMUNITATEA
1.7. BESTELAKOAK
ERABAKIA, Nafarroako Gobernuak 2010eko ekainaren 21ean hartua, Nafarroako Foru Komunitateko Azpiegituren Lurralde Plana, "Neo-Sky 2002, S.A.k" aurkeztua, jendaurrean jartzeko eta ukitutako udalari entzunaldia emateko tramiteak ebazten dituena.
2009ko abenduaren 11n, "Neo-Sky 2002, S.A." enpresak, banda zabaleko telekomunikazioetako operadore gisa, ezartzeko eta garatzeko plan teknikoa aurkeztu zuen, azpiegituren lurralde plan (ALP) gisa tramita zedin, Nafarroako Foru Komunitatean uhin elektromagnetiko ez-gidatuen bidezko telekomunikazioko oinarrizko estazioak antolatzeko maiatzaren 6ko 10/2002 Foru Legean ezarritakoari jarraikiz.
ALP horrek kokaleku bakarra du, Basoko dorreko teilatu lauan, hain zuzen (Antso Azkarra etorbidea, 71, Iruña). Helburua da inguru horretan irrati bidezko Internet zerbitzuari estaldura ematea, Radiosite delakoa instalatuz, telekomunikazioetako irratiko sarbide-sarerako, 3,5 GHz-ko bandan.
Nafarroako Gobernuak 2010eko martxoaren 15ean hartutako Erabakiaren bidez, "Neo-Sky 2002, S.A.k" aurkeztutako Azpiegituren Lurralde Plana jendaurrean jartzeko eta, aldi berean, ukitutako udalari entzunaldia emateko tramiteei hasiera eman zitzaien.
Aipatu den erabakia 2010eko 39. Nafarroako Aldizkari Ofizialean argitaratu zen, martxoaren 29an, eta espedientea jendaurrean egon den denboran ez da alegaziorik jaso.
Horrenbestez, Lurraldearen Antolamenduko Batzordeak 2009ko urtarrilaren 20an emandako txostenarekin bat etorririk, eta Lurraldearen Antolamenduari eta Hirigintzari buruzko abenduaren 20ko 35/2002 Foru Legean eta aplikatu beharreko gainerako arauetan xedatutakoari jarraikiz, Nafarroako Gobernuak Osasuneko kontseilariaren, Landa Garapeneko eta Ingurumeneko kontseilariaren, Lurraldearen Antolamendu eta Etxebizitzako kontseilariaren eta Berrikuntza, Enpresa eta Enpleguko kontseilariaren proposamenei jarraituz,
ERABAKI DU:
1. Plana jendaurrean jartzeko eta ukitutako udalari entzunaldia emateko tramiteak ebaztea, eta espedientea telekomunikazioen arloan eskumenak dituen departamentuak onetsiko duela zehaztea, baldintza hau betetzen bada:
-Nafarroako Osasun Zerbitzua-Osasun Publikoaren Institutuak 2010eko urtarrilaren 27an egindako txostena betez, lurralde planean agertzen diren oinarrizko estazioen berariazko baimenei buruzko prozesuan, 10/2002 Foru Legearen I. eta II. eranskinetan ezarritakoa eta sentikortzat jotako gune edo lekuetarako ezarritako berariazko xedapenak betetzen direla justifikatu beharko da.
2. Erabaki hau Iruñeko Udalari eta sustatzaileari jakinaraztea. Aditzera ematen da, halaber, erabaki horrek bide administratiboa agortzen duela eta haren kontra bidezko dela administrazioarekiko auzi-errekurtsoa jartzea, Nafarroako Auzitegi Nagusiko Administrazioarekiko Auzien Salari zuzendua, argitaratu edo, kasua bada, jakinarazi eta biharamunetik bi hilabeteko epean.
Nolanahi ere, administrazio publikoek aurretiazko errekerimendua egiten ahalko diote Nafarroako Gobernuari, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean.
3. Erabaki hau Nafarroako Aldizkari Ofizialean argitaratzea eta Ingurumenaren eta Uraren Zuzendaritza Nagusiko Ingurumen Kalitatearen Zerbitzuari, Enpresa Zuzendaritza Nagusiko Azpiegituren, Instalazioen eta Industria Segurtasunaren Zerbitzuari, Osasun Publikoaren Institutuari, Nafarroako Udalerrien eta Kontzejuen Federazioari eta sustatzaileari igortzea, behar diren ondorioak izan ditzan.
Iruñean, 2010eko ekainaren 21ean.-Nafarroako Gobernuko kontseilari eta idazkaria, Javier Caballero Martínez.
Iragarkiaren kodea: F1010960
