78. ALDIZKARIA - 2010eko ekainaren 28a

3. ESTATUKO ADMINISTRAZIOA

ESTATUKO ADMINISTRAZIO OROKORRA

JUS/1653/2010 Agindua, maiatzaren 31koa, Laguntza Judizialeko Kidegora sarbide libreko sistema orokorraren bidez sartzeko hautapen prozesurako deialdia egiten duena

2009rako eta 2010erako enplegu publikoko eskaintzak onesten dituzten otsailaren 27ko 248/2009 Errege Dekretuan (Estatuko Aldizkari Ofiziala, martxoaren 3koa) eta martxoaren 31ko 406/2010 Errege Dekretuan (Estatuko Aldizkari Ofiziala, apirilaren 1ekoa) xedatutakoa betez eta Justizia Administrazioaren zerbitzuko langileen beharrizanei erantzuteko asmoz.

Botere Judizialari buruzko uztailaren 1eko 6/1985 Lege Organikoa aldatzen duen abenduaren 23ko 19/2003 Lege Organikoan eta Justizia Administrazioaren zerbitzuko funtzionarioen sarrerari, lanpostuak betetzeari eta lanbide sustapenari buruzko Erregelamendua onesten duen abenduaren 7ko 1451/2005 Errege Dekretuan esleituriko eskumenak erabiliz eta Botere Judizialari buruzko uztailaren 1eko 6/1985 Lege Organikoaren VI. liburuan aipatzen diren Justizia Administrazioaren zerbitzuko funtzionarioen kidegoetan sartzeko hautapen prozesuak arautzeko oinarri orokorrak ezarri dituen maiatzaren 5eko JUS/1294/2010 Aginduaren (Estatuko Aldizkari Ofiziala, maiatzaren 19koa) arabera, eta Funtzio Publikoaren Zuzendaritza Nagusiak aldeko txostena egin ondoren, Ministerio honek Laguntza Judizialeko Kidegora sartzeko hautapen prozesurako deialdia egitea erabaki du.

Deialdi honetan kontuan hartuko da, lan publikoa eskuratzeari dagokionez, emakumeen eta gizonen arteko tratu berdintasunaren printzipioa, Espainiako Konstituzioaren 14. artikuluarekin, Langile Publikoen Oinarrizko Estatutuari buruzko apirilaren 12ko 7/2007 Legearekin eta martxoaren 22ko 3/2007 Lege Organikoarekin bat etorriz, eta Ministroen Kontseiluak 2005eko martxoaren 4an hartutako erabakia betetzeko, horren bidez Estatuko Administrazio Orokorreko Genero Berdintasunerako Plana onetsi baitzen. Halaber, honako hauek kontuan hartuta garatuko da:

OINARRI OROKORRAK

Deialdi hau arautzen duten oinarri orokorrak maiatzaren 5eko JUS/1294/2010 Aginduan (Estatuko Aldizkari Ofiziala, maiatzaren 19koa) ezarri direnak izanen dira.

BERARIAZKO OINARRIAK

1.-Lanpostuen deskribapena.

1.1. Sarbide libreko hautapen prozesuetarako deialdia egin da, otsailaren 27ko 248/2009 Errege Dekretuaren (Estatuko Aldizkari Ofiziala, martxoaren 3koa) I. eranskineko Justizia Administrazioko langileei buruzko atalean eta martxoaren 31ko 406/2010 Errege Dekretuaren (Estatuko Aldizkari Ofiziala, apirilaren 1ekoa) III. eranskinean azaltzen direnetatik 937 lanpostu betetzeko, Laguntza Judizialeko kidegoan (kidegoaren kodea: 030), oposizio-sistemaren bidez. Honako lurralde banaketa hau egonen da:

LURRALDE EREMUA

TXANDA IREKIA

GUZTIRA

SISTEMA OROKORRA

DESGAITUENTZAKO ERRESERBA

Andaluzia

251

18

269

Kanariak

97

6

103

Kantabria

3

-

3

Katalunia

107

6

113

Valentziako Erkidegoa

62

4

66

Madril

78

6

84

Nafarroa

9

2

11

Euskal Autonomia Erkidegoa

24

3

27

Penintsulako gainerakoak eta Balearrak

243

18

261

GUZTIRA

874

63

937

1.2. Deialdiko lanpostu guztietatik 32 gordeko dira, 1.1 puntuan ageri den lurralde banaketarekin, legez %33ko edo gehiagoko desgaitasuna duten pertsonek bete ditzaten, frogatzen baldin badute desgaitasun gradu hori dutela eta Laguntza Judizialeko Kidegoari dagozkion eginkizunekin bateragarria dela, eta hautapen probak gainditzen badituzte. %33tik goitiko elbarritasuna duten pertsonatzat joko dira, abenduaren 1eko 1414/2006 Errege Dekretuaren 1. artikuluan xedatutakoari jarraikiz, abenduaren 2ko 51/2003 Legearen ondorioetarako, ezintasun iraunkor osoko, absolutuko edo baliaezintasun handiko pentsioa aitorturik duten Gizarte Segurantzako pentsiodunak, eta ezintasun iraunkorragatiko edo desgaitasunagatiko erretiro pentsioa aitorturik duten klase pasiboetako pentsiodunak.

Desgaitasuna dutenentzat erreserbatzen diren lanpostuetatik batzuk bete gabe geratzen badira, ez dira metatuko sarbide orokorreko lanpostuetara.

Desgaitasuna duten pertsonentzako erreserba kupoa aukeratzen duten izangaiek ezin izanen dute parte hartu sistema orokorreko gainerako lanpostuetarako.

1.3. Izangaiek ez dute zilegi izanen lurralde eremu bakar batean baizik parte hartzea, eta beraz, oposizioa gainditzen badute parte hartu duten lurralde eremu horretantxe izanen dute destinoa. Lurralde eremu batean bete gabe geratzen diren lanpostuak ezin izanen dira beste eremu batean metatu.

1.4. Deialdiko oinarri hauek aldi berean "Estatuko Aldizkari Ofizialean" eta lanpostuen deialdia egin duten Autonomia Erkidegoetako Aldizkari Ofizialetan argitaratuko dira. Ezin bada bietan aldi berean argitaratu, agindu honetan ezartzen diren baldintzak eta epeak "Estatuko Aldizkari Ofizialean" argitaratzen den egunetik aurrera zenbatuko dira.

2.-Hautapen prozesua.

2.1. Hautapen prozesua oposizio sistemaren bidez eginen da, eta I. eranskinean zehazten diren ariketak, balorazioak eta puntuazioak bilduko ditu.

2.2. Hautapen prozesuan hautapenerako praktikaldia egin beharko da. Praktikaldi hori egiteko, oposizioa gainditu duten izangaiek -izangaiak ezin izanen dira deialdiko plazak baino gehiago izan- Justizia Ministerioak praktiketako funtzionario izendatuko ditu.

2.3. Hautapen prozesuaren azken kalifikazioa oposizioaldian eta hautapen-ikastaroan lortutako azken puntuazioen batura izanen da.

2.4. Berdinketa izanez gero, honela ezarriko da puntuazio ordena: lehenik eta behin, oposizioaldia nagusituko da; bigarrenez, hautapen ikastaroa. Oraindik ere berdinketa egonez gero, oposizioaldiaren bigarren ariketaren nota nagusituko da. Hala ere berdinketak irauten badu, lehen deiturako lehen letra lehenetsiko da, "J" letratik hasita.

3.-Programa.

Oposizioaldiaren programa maiatzaren 5eko JUS/1294/2010 Aginduan (Estatuko Aldizkari Ofiziala, maiatzaren 19koa) agertzen da. Oposizioko ariketa guztietarako gai-zerrendaren edukiak Estatuko Aldizkari Ofizialean deialdi honen egunean argitaratzen den araudia beteko du, araudi hori artean indarrean jarri ez bada ere.

4.-Titulazioa eta parte hartzeko bestelako betebeharrak.

Hautapen prozesu honetan parte hartzeko Oinarri Orokorren zazpigarren oinarrian adierazten diren betebehar guztiak bete beharko dira, eta eskabideak aurkezteko epea amaitzen den egunean bigarren hezkuntzako graduatu- titulua eduki beharko da, edo titulu hori lortzeko baldintzak bete. Gainera, Hezkuntzari buruzko maiatzaren 3ko 2/2006 Lege Organikoan araututako Derrigorrezko Bigarren Hezkuntzako graduatu eta Batxilergo tituluekiko baliokidetasunak ezartzen dituen ekainaren 10eko EDU/1603/2009 Aginduan (ekainaren 17ko Estatuko Aldizkari Ofiziala) ezarritakoari jarraitu beharko zaio. Atzerrian lortutako titulazioen kasuan horien homologazioa edo, bidezkoa bada, baliozkotzea egiaztatzen duen agiriaren jabe izan beharko du, ondorio akademiko eta profesionaletarako. Baldintza hori ez zaie aplikatuko beren lanbide kualifikazioaren aitorpena, lanbide arautuen esparruan, Europar Batasuneko Zuzenbideko xedapenen babesean eskuratu duten izangaiei (89/48/EEK Zuzentaraua).

5.-Eskabideak.

5.1. Hautapen prozesu honetan parte hartu nahi dutenek Justizia Administrazioko hautaprobetan onartua izateko eta azterketa egiteko eskubidearen tasak likidatzeko eskabidearen eredu ofiziala (790 eredua) bete beharko dute. Inprimaki hori autokopiakoa da eta goialdean "Justizia Ministerioa, Justizia Administrazioko hautaprobetan onartua izateko eskaera eta azterketa tasaren likidazioa" izenburua du. Eredua gaztelaniaz eta autonomia erkidegoetako beste hizkuntza ofizialetan eskuratzen ahalko da, eta dohainik banatuko da Justizia Ministerioan, justizia auzitegi nagusietan, probintzia auzitegietan, Justizia Ministerioaren lurraldeetako gerentzietan, lanpostuak eskaintzen dituzten autonomia erkidegoetako organo eskudunetan, Lehendakaritza Ministerioko Informazio Administratiborako Zentroan eta Gobernuaren ordezkaritza eta ordezkariordetzetan. Eskabidearen eredua web gunetik (www.Mjusticia.es) ere deskargatzen ahalko da.

5.2. Eskabideak aurkezteko epea hogei egun naturalekoa izanen da, deialdia Estatuko Aldizkari Ofizialean argitaratu eta biharamunetik hasita. Eskabidea Justiziako estatu idazkariari zuzenduko zaio. Eskabidea behar den denboran eta moduan aurkeztu ezean, izangaia baztertuta geratuko da.

5.3. Eskaera, dagokion tasa pagatu eta gero, hemen ere aurkezten ahalko da:

a) Justizia Ministerioko Erregistro Orokorrean (Jacinto Benavente, 3, 28071 Madril).

b) Gobernuaren ordezkaritza eta ordezkariordetzetako erregistroetan, edo Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 38.4 artikuluan aurreikusitako organo edo bulegoetako edozeinetan.

c) Erregistro telematikoaren bitartez Interneteko www.Mjusticia.es helbidean, eta helbide horretan azaltzen diren jarraibideen arabera.

Eskabidea horrela aurkezten dutenek bide telematikotik ordaindu beharko dute azterketaren tasa.

Oinarri orokorrak ezarri dituen maiatzaren 5eko JUS/1294/2010 Aginduaren (Estatuko Aldizkari Ofiziala, maiatzaren 19koa) bederatzigarren oinarrian xedatuta dagoenaren arabera ordainketa horretatik salbuetsita dauden edo tasen murrizketarako eskubidea duten izangaiek ezin izanen dute sistema hori erabili, eta paperezko eskabidea nahitaez aurkeztu beharko dute. Salbuespenerako edo murrizketarako eskubidea egiaztatzen duen dokumentazioa aurkeztu beharko dute oinarri honetako a) edo b) ataletan adierazten diren erregistroetako batean.

5.4. Azterketa-eskubideen tasa.

Azterketa-eskubideen tasaren zenbatekoa 10,67 euro izanen da, eta bederatzigarren oinarri orokorrean adierazten denaren arabera ordainduko da.

Tasa ordaintzetik salbuetsita egonen dira bederatzigarren oinarri orokorreko 6. puntuan zehazten diren betebeharrak betetzen dituzten izangaiak. Horiek salbuespen horretarako eskubidea egiaztatu beharko dute oinarri horren 4. puntuan adierazten den dokumentazioa aurkeztuz.

5.5. Eskabidea betetzeko jarraibideak emanen dira eskabidearen atzealdean. Jarraibide horiek III. eranskinean agertzen dira. Gainera, jarraibide partikular hauei ere jarraitu beharko zaie:

5.5.1. "Azterketa egiteko probintzia" laukian, izangaiek oposizioaldiko ariketak zein probintziatan egin nahi dituzten adierazi beharko dute. Zein lurralde-eremutan aurkezten diren, horretan egin beharko dute; hona hemen probintziak:

LURRALDE EREMUA

AZTERKETA EGITEKO HIRIA

Andaluzia

Sevilla (41)

Kanariak

Las Palmas Kanaria Handikoa (35)

Santa Cruz Tenerifekoa (38)

Kantabria

Santander (39)

Katalunia

Bartzelona (08)

Madril

Madril (28)

Nafarroa

Iruña (31)

Euskal Autonomia Erkidegoa

Vitoria-Gasteiz (01)

Valentziako Erkidegoa

Valentzia (46)

Penintsulako gainerako erkidegoak eta Balearrak

A Coruña (15)

Albacete (02)

Burgos (09)

Cáceres (10)

Ceuta (51)

Logroño (26)

Penintsulako gainerako erkidegoak eta Balearrak - Madril(28)

Melilla (52)

Murtzia (30)

Oviedo (33)

Palma de Mallorca 07)

Valladolid (47)

Zaragoza (50)

Nolanahi ere, eskaeran ez bada zehazten izangaiak zer azterketa leku hautatzen duen, ofizioz bere helbidea Justizi Auzitegi Nagusiari dagokion zerrenda behin betikoan sartuko da eta beraz lurralde eremu horri atxikita geldituko. Deialdi honetako 1.3 oinarriak agintzen duenaren arabera.

5.5.2. Desgaitasuna duten izangaien kasurako.

a) Izangai batek deialdi honen 2.1 oinarrian aipatutako desgaitasuna izan eta desgaitasuna dutenentzat erreserbatu kupotik hartu nahi badu parte, hala adierazi beharko du eskabidean markatuz eta A) laukian, "deialdiko oinarrien arabera jaso beharreko datuak" idazpuruan, adierazi beharko du zein egokitzapen behar dituen denboran eta baliabideetan ariketak egiteko, Epaimahaiak behar duen informazioa izan dezan ariketak egiteko modua egokitzeko.

b) Desgaitasuna izanda ere desgaitasuna dutenentzako erreserbako kupoan sartzeko aukera egin ez duten izangaiek, ariketak egiteko denbora eta baliabideen egokitzapenak behar badituzte, "egokitzapena behar du" laukian adierazi beharko dute hori, X bat eginez, eta "Deialdiaren oinarrien arabera, eraso beharreko datuak" epigrafeko B) laukian, ariketak egiteko denbora eta baliabideen aldetik zein egokitzapen behar duten adierazi beharko dute.

5.5.3. Beren hizkuntza ofiziala duten autonomia erkidegoetan parte hartzen duten izangaiek bi sistemaren bidez frogatu ahal izanen dute hizkuntza hori dakitela:

a) Aukerako proba bat egitea. Horretarako, "Aukerako hizkuntza-proba" epigrafearen barneko "Egingo du" laukian X jarri beharko dute.

b) Agiri bidez frogatzea hizkuntza dakitela. Horretarako, "Agiri bidez frogatuko du" laukian X jarri beharko dute, eta garaia denean igorri beharko dituzte hizkuntza hori dakitela frogatzeko agiriak, agindu honetan adierazten den moduan.

Kontzeptu horrengatik ematen ahal den gehieneko puntuazioa egiaztatuta ez duten izangaiek bi sistemak erabiltzen ahalko dituzte: alde batetik, egiaztatutako mailari dagokion egiaztagiria aurkeztuko dute eta, beste aldetik, goiko mailaren hautazko azterketara aurkeztuko dira. Kasu horretan "X" ipini beharko dute "Agiri bidez frogatuko du" eta "Egingo du" bi laukietan.

Era berean jokatuko da Euskal Autonomia Erkidegoko foru zuzenbide zibilari buruzko ezagutzak baloratzeko, lauki egokiak markatuz.

6.-Epaimahaiak.

6.1. Justizia Ministerioak Epaimahai Bakarra izendatuko du.

Epaimahaiaren hautapena Estatuko Aldizkari Ofizialean eta lanpostuen deialdia egiten duten autonomia erkidegoetako Aldizkari Ofizialetan argitaratuko da, oinarri orokorretan (hamaikagarren oinarriaren 1. idatz-zatia eta hurrengoak) ezarritakoaren arabera.

Lanpostuen deialdia egiten duten autonomia erkidegoetako esparru bakoitzean Justizia Ministerioak epaimahai delegatu bat hautatuko du.

Azterketa egoitzetan, bertan epaimahai bakarra edo epaimahai delegaturik ez badago, Justiziako Estatuko Idazkaritzak Estatuko Administrazio Orokorreko, autonomia erkidegoko administrazioko (bi kasuetan Justizia Ministerioan edo autonomia erkidegoko organo eskudunean dihardutenak) edo Justizia Administrazioko funtzionarioak izendatzen ahalko ditu, probak garatzen laguntzeko, epaimahai bakarrak edo epaimahai delegatuak zuzendurik. Hori ordezkatuko dute eta hautaproba bakoitzean betearazpen materialerako eta antolaketa administratiborako beren esku uzten diren eskumenak izanen dituzte.

6.2. Epaimahai kalifikatzaile bakarreko (titularra eta ordezkoa) kideak izanen dira honako hauek: karrera judizialeko kide bat edo fiskal bat; bi idazkari judizial; Justizia Ministerioko A1, A2 edo C1 taldeko bi funtzionario; eta Laguntza Judizialeko kidegoko bi funtzionario.

Mahaiburua epailea, fiskala edo idazkari judizialetako bat; idazkaria, berriz, Justizia Ministerioko funtzionarioetako bat.

Epaimahai delegatuen osaera epaimahai bakarrarena bezalakoa izanen da, Justizia Ministerioko funtzionarioen ordez autonomia erkidegoetako funtzionarioak jarrita.

Epaimahaiek hirugarren kategoria izanen dute, zerbitzuarengatiko kalte-ordainei buruzko maiatzaren 24ko 462/2002 Errege Dekretuaren IV. eranskinean aurreikusten direnetatik.

6.3. Epaimahaiek, Espainiako Konstituzioaren 14. artikuluan xedaturikoarekin bat, bi sexuen artean aukera berdintasuna hertsiki betetzea bermatuko dute.

6.4. Hautapen probei buruzko informazioa eskura egonen da Justizia Ministerioaren lurraldeetako gerentzietan, Justizia Ministerioan, Justiziako Estatu Idazkaritzan (San Bernardo kalea, 21, 28071-Madril, 902 007 214 telefonoa), Justizia Ministerioaren www.Mjusticia.es webgunean (lan publikoaren eskaintzak), Lehendakaritza Ministerioko Informazio Administratiborako Zentroan (060 telefonoa) eta lanpostuetarako deialdia egiten den autonomia erkidegoetako organo eskudunetan.

6.5. Jakinarazpenen eta gainerako gertakarien ondorioetarako, epaimahai bakarraren egoitza honakoa izanen da: San Bernardo kaleko 21. 28015 Madril (telefono zk.: 902007214). Epaimahai delegatuek hurrengo egoitzak izanen dituzte:

AUTONOMIA ERKIDEGOA

ORGANOA

TELEFONO ZK.

Andaluzia

Andaluziako Administrazio Publikoaren Institutua, Justiziako Langileen Prestakuntzarako eta Hautapenerako Zerbitzua, Ramón y Cajal kalea, 35, 41071-Sevilla, www.iaap.junta-andalucia.es/ institutodeadministracionpublica

955 04 27 09

955 04 24 00

Kanariak

Justizia Administrazioarekiko Harremanetarako Zuzendaritza Nagusia, José Manuel Guimerá etorbidea, 10, erabilera anitzeko eraikina II, lehen solairua. 38003 - Santa Cruz Tenerifekoa, www.gobiernodecanarias.org/dgjusticia/

922 47 38 92

Kantabria

Justizia Zuzendaritza Nagusia, Pereda pasealekua, 36, solairu nagusia, ezkerraldea, 39071 Santander, www.pas.cantabria.es

942 20 87 87

942 20 87 96

Katalunia

Giza Baliabideen Kudeaketarako eta Kudeaketa Ekonomikorako Zuzendariordetza Nagusia, Justizia Departamentua, Pau Clarís, 81, 3. solairua, 08010 Bartzelona, www.gencat.net/oposicions/

93 316 41 23

93 316 41 24

Madril

Justizia Zuzendaritza Nagusia: Gran Vía kalea, 18, 28013 - Madril, www.madrid.org

914936950

Nafarroa

Justizia Zuzendaritza Nagusia, Iratxeko monasterioaren kalea, 22, beheko solairua, 31011 Iruña, www.navarra.es

848 42 67 86

848 42 67 80

Euskal Autonomia Erkidegoa

Bulego Judizial eta Fiskalaren Zuzendaritza, Donostia-San Sebastián kalea, 1, 01010 Gasteiz, www.justizia.net

945019132

Valentziako

Erkidegoa

Justizia Zuzendaritza Nagusia, Bailia kalea, 1-2. solairua, 46071 Valentzia, www.cjap.gva.es

96 386 36 51

96 386 90 23

96 386 34 39

7.-Hautapen prozesua nola eginen den.

7.1. Hautapen prozesuaren iraupena.

Epaimahai bakarrari entzun ondoren Justiziako Estatu Idazkaritzak ontzat emandako arrazoi objektiboren batengatik besterik erabaki ezean, hautapen prozesuak sei hilabete iraunen du gehienez, lehen ariketa egiten den egunetik hasi eta hautapenerako ikastaro eta praktikaldia hasten diren egunera arte.

7.2. Oposizioa nola eginen den.

Oposizioko bi ariketak, deialdi honen 1.A eranskinean azaltzen direnak, batera eginen dira ekitaldi berean, egun berean eta ordu berean, azterketaren egoitza guztietan.

Oposizioaldiko bi ariketak barnean hartzen dituen azterketa izangai onartuen eta baztertuen zerrenda behin betiko bihurrarazten duen ebazpena argitaratu eta hurrengo 30 eguneko aldiaren barnean eginen da. Ondorio horretarako, azterketaren eguna, ordua eta tokiak argitaratuko dira Estatuko Aldizkari Ofizialean.

Oposizioaldiko lehenengo ariketa zuzendu ondoren, epaimahaiek Justizia Ministerioaren www.Mjusticia.es webgunean eta autonomia erkidegoetako webguneetan argitaratuko dituzte ariketa gainditzeko ezarririko gutxieneko puntuazioa lortu duten oposiziogileen zerrendak, lurralde eremu bakoitzean lortutako puntuazioekin batera.

Zerrenda horietan ageri ez diren oposiziogileak ez gaitzat hartuko dira, eta hautapen prozesutik kanpo geldituko. Jarraian, lehenengo ariketa gainditu duen izangaien bigarren ariketa zuzenduko da, eta lurralde eremu bakoitzean ezarririko gutxieneko puntuazioa lortzen duten oposiziogileen zerrendak argitaratuko dira, lortutako puntuazioarekin batera.

Oposizioko ariketa guztiak bukatzean, epaimahai bakarrak Justizia Ministerioaren webgunean argitaratuko ditu lurralde eremuetan oposizioaldia gainditu duten izangaien zerrendak. Izangai horien kopurua ez da deialdian eskainitako lanpostuena baino handiagoa izanen. Bere hizkuntza ofiziala duen autonomia erkidego batean aurkeztu badira eta eskabidean adierazi badute hizkuntza horren ezagutza agiri bidez frogatzea aukeratzen dutela, hamar egun balioduneko epea izanen dute frogagiriak aurkezteko epaimahai delegatu eskudunaren egoitzan. Epaimahaien egoitzak agindu honen 5.5 oinarrian adierazitakoak dira. Euskal Autonomia Erkidegoan parte hartzen duten oposiziogileek foru zuzenbide zibilari buruzko ezagutzak frogatzeko agiriak aurkeztu beharko dituzte aipatu epe horretan.

7.3. Haurdunaldi arriskutsua eta erditzea.

Haurdunaldiko arriskuaren edo erditzearen ondorioz izangairen batek hautapen prozesua bukatzerik ez badu eta inguruabar hori behar bezala frogatzen badu, baldintzapeko egoeran geratuko da, prozesua bukatzeko eta geroratutako faseak gainditzeko zain. Epaimahaiak aintzat hartuko du geroratze horrek ez diola kalterik egin behar gainerako izangaiek prozesua zentzuzko epean ebazteko duten eskubideari. Nolanahi ere, geroratutako faseak egin beharko dira hautapen prozesua gainditu duten izangaien zerrenda argitaratu baino lehen.

7.4. Autonomia erkidegoetako hizkuntza ofizialen eta Euskal Autonomia Erkidegoko Zuzenbide Zibil Bereziaren edo Foru Zuzenbide Zibilaren ezagutza baloratzea.

Oposizioaldiko nahitaezko ariketak bukaturik, hizkuntza ofizial bat daukaten autonomia erkidegoetan aurkeztu eta probak gainditu dituztenen zerrendako izangaiei dei eginen zaie aukerako ariketa egin dezaten, hizkuntza hori dakitela frogatzeko, eskabidean hala eskatu bazuten. Ariketa hori ez da baztergarria izanen. Orduan, kasuan kasuko epaimahai delegatuak hizkuntzaren jakite maila frogatzen duten agiriak baloratuko ditu, jakite hori agirien bidez frogatu nahi izan duten oposiziogileek behar den epearen barruan aurkeztutakoak.

Izangairen batek, 5.5.3 oinarrian xedatutako moduan, bi sistemak aukeratzen baditu, bi puntuazioetatik handiena emanen zaio, baina inoiz ez dira bi puntuazioak batuko.

Azterketan eta ziurtagirietan lorturiko puntuak deialdiko I-B eranskineko baremoaren arabera doituko dira eta bakarrik kasuan kasuko autonomia erkidegoko postuak banatzeko izanen ditu ondorioak.

Berdin jokatuko da eta ondorio berak sortuko dira Euskal Autonomia Erkidegoko foru zuzenbide zibilari buruzko ezagutzak baloratzean.

7.5. Agiriak aurkeztea eta praktiketako funtzionarioen izendapena.

7.5.1. Oposizioaldia amaitu ondoren, epaimahaiek proposamena bidaliko diote Justizia Ministerioko organo eskudunari, lurralde eremu bakoitzean prozesua gainditu duten izangaien zerrendarekin. Zerrendako izangaien kopurua ez da izanen deialdian eskainitako lanpostuena baino handiagoa. Zerrenda hori argitara emanen da Estatuko Aldizkari Ofizialean eta lanpostuetarako deialdia egiten den autonomia erkidegoetako aldizkari ofizialetan; hurrenkera zenbakia ageriko da, eta halaber NANa, ariketa bakoitzean izandako puntuazioa, eta nahitaezko ariketetan eta, halakorik izan bada, lehiaketaldian guztira lortutako puntuazioa. Guztizko nota horren ondoan, baina bereiz eta hari batu gabe, autonomia erkidegoko gaztelaniaz besteko hizkuntza ofizialean izandako nota ere jasoko da hala behar denean, eta Euskal Autonomia Erkidegoko foru zuzenbide zibilari buruzko ezagutzagatik lortutakoa, hala behar denean.

Desgaitasunak dituzten pertsonentzako erreserba kuporako aurkezturiko izangairen bat, ariketak gainditu bai, baina lanposturik lortu ezik, txanda orokorreko izangaiek baino puntu gehiago lortuz gero, txanda horretan sartuko da, puntuen hurrenkerari jarraikiz.

Hogei egun naturaleko epean, prozesua gainditu dutenen behin betiko zerrenda Estatuko Aldizkari Ofizialean eta lanpostuetarako deialdia egiten den autonomia erkidegoetako aldizkari ofizialetan argitaratzen den egunetik hasita, zerrenda horretan ageri diren izangaiek ondoko agiriak aurkeztuko dituzte Justizia Ministerioko Erregistro Orokorrean (Justiziako Estatu Idazkaritza, Jacinto Benavente plaza, 3, 28071 Madril), edo, bestela, Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legeak, urtarrilaren 13ko 4/1999 Legearen bidez aldatuta, 38. artikuluan ezartzen dituen bideetatik:

a) Nortasun agiri nazionalaren edo agiri baliokidearen bi fotokopia, baldin eta interesdunak ez badu baimena ematen berariaz, IV. eranskina aurkeztuz, hautapen prozesu honetako instrukzio organoak haren nortasun datuak kontsultatu eta egiaztatu ahal izan ditzan ofizioz.

b) Deialdian eskatzen den tituluaren fotokopia konpultsatua edo titulua eskuratzeko eskubidea ematen dioten irakasgai guztiak gainditu izana frogatzen duen ziurtagiri akademikoa, harekin batera titulua luzatzeko eskubideak pagatu izanaren frogagiria ere aurkeztuta.

Atzerrian lortutako tituluak badira, homologazioaren frogagiriaren fotokopia konpultsatua aurkeztu beharko da.

c) Laguntza Judizialeko Kidegoko ohiko eginkizunetan aritzea galarazten dion gaixotasun edo akats fisiko edo psikikorik ez duela frogatzeko osasun ziurtagiria, interesdunari dagokion Gizarte Segurantzako medikuntza orokorreko fakultatiboak emana.

Legez %33ko edo gehiagoko desgaitasuna duten izangaiek organo eskudunen edo kasuan kasuko autonomia erkidegoaren ziurtagiria aurkeztu beharko dute frogatzeko desgaitasun hori dutela eta gai direla Laguntza Judizialeko Kidegoko ohiko eginkizunetan aritzeko.

d) Zinpeko aitorpena, non izangaiak adieraziko baitu ez duela bateraezintasun arrazoirik, ez dagoela eginkizun publikoetan aritzeko desgaiturik diziplina bidean edo bide judizialean, eta ezein administrazio publikoren zerbitzuko kidegotik diziplina prozedura baten bidez inoiz bereizi gabea dela, non eta birgaitzea lortu ez duen (II. eranskina).xo II).

Zigor-aurrekariei buruzko ziurtagiria ofizioz aurkeztuko du Justizia Ministerioak, Herri Administrazioen Araubide Juridikoari eta Administrazio Prozedura Erkideari buruzko Legearen 35. f) artikuluan ezarritakoarekin bat.

Aurreko atalean aipatutako dokumentuak aurkeztu ezina ongi frogatzen bada, zilegi da beste edozein bide erabiltzea, zuzenbidean onartzeko modukoa bada, deialdian eskatutako baldintzak betetzen direla frogatzeko.

Funtzionario publikoak diren izangaiek ez dute aurkeztu beharko aurreko izendapenerako frogatu zituzten baldintza eta betekizunen frogagiririk. Haien gaineko ministerio edo erakundeak egindako ziurtagiria bakarrik aurkeztu beharko dute, funtzionarioak direla eta Laguntza Judizialeko Kidegoko funtzionario izendatzeko baldintzak betetzen dituztela egiaztatu dadin.

Inork behar den epean delako dokumentazioa aurkezten ez badu, ezinbesteko arrazoiengatik ez bada, edo dokumentazioa aztertuta agertzen bada ez duela betetzen ezarri direnetako baldintzaren bat, ezin eginen zaio praktiketako funtzionarioaren izendapena eta baliogabetuko zaizkio jarduketak, hasierako eskaeran informazio faltsua jartzeagatik egozten ahal zaion erantzunbeharra ezertan galarazi gabe.

Azkeneko kasu horretan, edo izangairen batek uko eginez gero, betiere epaimahaiak deitutako lanpostu adina izangai proposatuta, Justizia Ministerioak azkeneko horri eskatuko dio ariketak gainditu eta proposatutako izangaien atzetik dauden izangaien zerrenda osagarria, deitutako lanpostu guztiak bete arte.

Kasu horretan, zerrenda osagarri hori osatzen duten izangaiek oinarri honetan bertan adierazten diren agiriak aurkeztu beharko dituzte, Justizia Ministerioaren webgunean argitaratu eta bost egun balioduneko epean.

Ukitutako oposiziogileei, berezko hizkuntza ofiziala eta/edo foru zuzenbidea baloratzen duten lurralde eremuetan aurkezten direnei, dagokion aukerako probarako dei eginen zaie edo bere garaian aurkeztutako egiaztagiriaren puntuazioa gehituko zaie.

7.5.2. Izangaiek deialdi honetako laugarren oinarriko eta Oinarri Orokorretako zazpigarren oinarriko baldintzak betetzen dituztela egiaztatu ondoren, Justizia Ministerioko organo eskudunak ebazpen bat emanen du hautaprobak gainditu dituzten izangaiak praktiketako funtzionario izendatu eta hautapen ikastarora deitzeko. Ebazpen hori Justizia Ministerioaren webgunean argitaratuko da.

7.6. Hautapenerako praktikaldia.

7.6.1. Praktiketako funtzionarioek hautapenerako ikastaroa eta praktikaldia eginen dituzte, Justizia Ministerioak eta lanpostuetarako deialdia egina duten autonomia erkidegoek lurralde eremu bakoitzean zehazten duten zentro, institutu, unitate edo lanlekuan.

Praktikaldiaren iraupena bi astekoa izanen da guztira, eta bi fase izanen ditu. Lehenbiziko faseak astebeteko iraupena izanen du eta horretan funtzionarioek beren lurralde eremuko egitura organikoari eta eskumenei buruzko berariazko prestakuntza eta tresna eta aplikazio informatikoak erabiltzeko beharrezko ezagutzak eta trebetasunak eskuratzeko aukera ematen diena jasoko dituzte, baita Justizia Administrazioan erabiltzen diren baliabide teknikoei buruzkoa ere. Bigarren faseak ere astebeteko iraupena izanen du, eta horretan tutoretzapeko praktikak eginen dituzte organo judizialetan. Nolanahi ere, praktika horien barnean komunikazio egintzak, enbargoak eta botatzeak, eta epaiketa-aretoen kudeaketa sartuko dira.

Lehen fasea, irakaskuntzakoa, amaitu ondoren, horren aprobetxamendua ebaluatuko da test motako proba objektibo baten bidez. Praktikaldiko zentro edo institutuak edo destinoko unitate edo lanlekuko arduradunak prestatu eta kalifikatuko du proba hori.

Proba horretako kalifikazioa 25 puntukoa izanen da; horietatik 15 puntu emanen dira informatikako prestakuntzaren aprobetxamenduaren ebaluazioan, eta 10 puntu prestakuntzako gainerako gaien aprobetxamenduaren ebaluazioan.

Ondoren izangaiei bigarren faserako deia eginen zaie, organo judizialetan tutoretzapeko praktikak egin ditzaten. Amaitutakoan "gai" edo "ez gai" kalifikazioa jasoko dute.

Justizia Administrazioko edozein kidegotan jardunean diren izangaiek, frogatzen baldin badute azken bost urteetan, Laguntza Judizialeko Kidegoko (lehen Justiziako Administrazioko Agenteak) izendapenak direla bide, sei hilabetetik gora egin dutela lanean bitarteko funtzionario gisa, salbuetsita egonen dira organo judizialean tutoretzapeko praktikak egin beharretik, eta "gai" kalifikazioarekin baliozkotuko zaizkie.

Ondorio horietarako bakar-bakarrik, 7.5 oinarrian agiriak aurkezteko ezarritako epearen azken egunera arte egindako zerbitzuak hartuko dira kontuan, eta bost urteko epea ere egun horretatik atzera kontatuko da.

Hautapen ikastaroa gainditzeko, gutxienez 12 puntu lortu behar dira lehenbiziko fasean eta "gai" kalifikazioa lortu behar da bigarrenean.

Ikastaroa amaitutakoan izangaiek lanean jarraituko dute praktiketako funtzionario gisa harik eta karrerako funtzionario izendatzen dituzten arte behin betiko lanlekuan.

7.6.2. Praktiketako funtzionario guztiek abenduaren 7ko 1451/2005 Errege Dekretuaren 25. artikuluan jasotako eskubideak eta betebeharrak dituzte (2005eko abenduaren 27ko Estatuko Aldizkari Ofiziala, Justizia Administrazioaren zerbitzuko funtzionarioen sarrerari, lanpostuak betetzeari eta lanbide sustapenari buruzko Erregelamendua).

7.7. Karrerako funtzionarioen izendapena.

Hautapen ikastaroa eta praktikaldia amaiturik, eta bertan lortutako kalifikazioa jaso ondoren, hura gainditu eta betekizunak frogatu dituzten izangaiak karrerako funtzionario izendatuko dira agindu baten bidez. Agindu hori Estatuko Aldizkari Ofizialean eta eskumenak bereganatuak dituzten autonomia erkidegoetako aldizkari ofizialetan argitaratuko da. Izendatutako funtzionarioen kopurua ez da inola ere izanen lurralde eremu bakoitzean deialdian eskainitako lanpostuak baino handiagoa.

Laguntza Judizialeko Kidegoaren izaera nazionala kontuan hartuta, karrerako funtzionarioak izendatzeko bi zerrenda eginen dira, eta bietan kontuan hartuko da oposiziogileek zer puntuazio izan duten lurralde eremu bakoitzean, autonomia erkidegoetako hizkuntza ofizial propioaren eta Euskal Autonomia Erkidegoko Zuzenbide Zibil bereziaren edo Foru Zuzenbide Zibilaren jakintzari buruzko proban lortu den puntuazioa zehaztuta.

7.8. Oinarri Orokorretako hamabosgarren oinarriko 2. puntuan xedatutakoarekin bat, izendapenaren aurretik edo lanpostuaz jabetu baino lehen izangairen batek uko eginez gero, betiere epaimahaiak deitutako lanpostu adina izangai proposatuta, Justizia Ministerioak azkeneko horri eskatuko dio ariketak gainditu duten eta proposatutako izangaien atzetik dauden izangaien zerrenda osagarria, deitutako lanpostu guztiak bete arte.

Azkeneko kasuan, zerrenda osagarri horretako izangaiek, autonomia erkidegoko hizkuntzari buruzko azterketa edo balorazioa egin baino lehen, bidezkoa bada, eta eskatzen diren baldintzak betetzen direla frogatzeko agiriak aurkeztu ondoren, praktiketako funtzionario izendatuko dituzte eta eginen den hurrengo deialdi arruntean edo berezian hautapen ikastaroa egin beharko dute.

8.-Azken araua.

Hautapen prozesu honi ondoko arauak aplikatuko zaizkio: 19/2003 Lege Organikoa; abenduaren 7ko 1451/2005 Errege Dekretua (abenduaren 27ko Estatuko Aldizkari Ofiziala), Justizia Administrazioaren zerbitzuko funtzionarioen sarrerari, lanpostuak betetzeari eta lanbide sustapenari buruzko Erregelamendua onesten duena; martxoaren 31ko 406/2010 Errege Dekretua, 2010eko lan publikoaren eskaintza onesten duena; maiatzaren 5eko JUS/1294/2010 Agindua (maiatzaren 19ko Estatuko Aldizkari Ofiziala), Justizia Administrazioko funtzionarioen kidego edo eskaletan sartzeko hautapen prozesuak arautuko dituzten Oinarri Orokorrak ezartzen dituena; azaroaren 26ko 30/1992 Legea, Herri Administrazioen Araubide Juridikoari eta Administrazio Prozedura Erkideari buruzkoa, urtarrilaren 13ko 4/1999 Legeak aldatua; eta deialdia egiten duen agindu honetan xedatutakoa.

Modu osagarrian, deialdian ezartzen ez den guztirako, Enplegatu Publikoaren Oinarrizko Estatutuari buruzko apirilaren 12ko 7/2007 Legean eta arloari buruzko indarreko gainerako arauetan xedatutakoa aplikatuko da.

Deialdi honi eta haren ondoriozko egintza administratiboei aurka egiteko berraztertze-errekurtsoa jartzen ahal da, Justiziako ministroari zuzendua, hilabeteko epean, deialdia argitaratzen denetik hasita, edo bestela Administrazioarekiko auzi-errekurtsoa, jurisdikzio organo eskudunari zuzendua, bi hilabeteko epean, deialdia Estatuko Aldizkari Ofizialean argitaratzen denetik hasita. Horrela dago xedatuta Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legean eta Administrazioarekiko Auzien Jurisdikzioa arautzen duen uztailaren 13ko 29/1998 Legean. Berraztertzeko errekurtsoa jarriz gero, ezin izanen da Administrazioarekiko auzi-errekurtsorik jarri harik eta berraztertzeko errekurtsoa berariaz ebatzi edo ustezko ezespena gertatu arte.

Halaber, Justiziako Estatu Idazkaritzak epaimahaiaren ebazpenak berrikusi ahal izanen ditu, azaroaren 26ko 30/1992 Legean ezarritakoaren arabera.

Madrilen, 2010eko maiatzaren 31n.-Justiziako ministroak eskuordeturik (JUS/3770/2008 Agindua, abenduaren 2koa), Justiziako estatu idazkaria, Juan Carlos Campo Moreno.

I-A ERANSKINA

Hautapen prozesuaren deskripzioa

1.-Oposizioaldia, ekitaldi berean eta egun berean, bata bestearen ondotik eginen diren ariketa hauek osatuko dute:

1.1. Lehen ariketa. Teorikoa, idatzia, nahitaezkoa eta baztertzailea. Maiatzaren 5eko JUS/1294/2010 Aginduan (Estatuko Aldizkari Ofiziala, maiatzaren 19koa) zehaztuta dagoen programako gaiei buruzko test galdetegiak 100 galdera izanen ditu eta galdera bakoitzak lau erantzun. Erantzun zuzena bakarra izanen da.

Ariketaren iraupena 75 minutukoa izanen da.

0tik 100 puntu bitarte emanen dira.

Erantzun zuzen bakoitzeko puntu bat emanen da; erantzun oker bakoitzeko 0,25 puntu kenduko da; erantzun gabeko galderengatik ez da punturik emanen.

Izangai bakoitzak lortutako puntuazioa bat etorriko da erantzun zuzenen kopuruarekin, erantzun okerrengatiko kenketa egin ondoren.

Ariketa gainditzeko 50 puntu lortu beharko dira gutxienez. Gutxieneko puntu kopuru hori lortzen ez duten oposiziogileek ez dute ariketa gaindituko eta bigarren ariketa ez zaie baloratuko.

1.2. Bigarren ariketa. Praktikoa, idatzizkoa, nahitaezkoa eta baztertzailea. Test galdetegi bati erantzunak ematea; galderak 50 izanen dira eta lau erantzun emanen dira aukeran, eta horietatik bakarra baino ez da zuzena izanen; Epaimahaiak proposatutako kasu praktikoak izanen dira, eginbide judizialei buruzkoak.

Zerotik ehun puntura bitarte kalifikatuko da eta kasu praktikoetako batean puntuaziorik lortzen ez duten izangaiak kanpo geldituko dira.

Ongi erantzundakoei 2,00 puntuko balorazioa emanen zaie, gaizki erantzundakoengatik 0,50 puntu eta erantzun gabekoengatik 0,25 puntu kenduko dira. Emaitza negatiboa izaten bada, 0 puntuko kalifikazioa jarriko zaio.

Ariketak 45 minutu iraunen du.

Epaimahaiak, aurkeztutako izangaien kopurua eta ezagutza maila ikusirik, lurralde eremu bakoitzean ariketa hau gainditzeko gutxienez zenbat puntu lortu behar diren erabakiko du (sekula ez dira 50 puntu baino gutxiago izanen), eta erabaki hori aditzera emanen da. Gutxieneko puntu kopuru hori lortzen ez duten oposiziogileek ez dute ariketa gaindituko.

Oposizio fasearen kalifikazioa ariketa bakoitzean lortutako kalifikazioen batura izanen da.

I-B ERANSKINA

Autonomia erkidegoetako hizkuntza ofizialen eta
Euskal Autonomia Erkidegoko foru zuzenbide zibilaren
edo zuzenbide zibil bereziaren ezagutza baloratzea

1.-Autonomia erkidegoetako hizkuntza ofizialak jakitea.

Bere hizkuntza ofiziala duen autonomia erkidego bateko lurralde eremuan parte hartzen duten oposiziogileei, baldin eta eskabidean aukera hori adierazi badute, dagokien autonomia erkidegoko hizkuntza ofizialaren ezagutza ebaluatuko zaie oposizioaldia amaitzen denean eta gainditu ostean lanpostua lortu duten pertsonen zerrendak ezartzen direnean. Ebaluazioa egiteko, autonomia erkidegoko hizkuntza ofiziala dakitela egiaztatuko da, aurkeztutako frogagirien (lehiaketaldian baloratu beharreko horien) bidez edo ezagutza maila neurtzeko proba eginez.

Autonomia erkidegoko hizkuntza ofizialaren ezagutza baloratzeko puntuazioa soilik aplikatuko da autonomia erkidego horretako eremuan eta soilik izangaiak parte hartzen duen lurralde eremuan gainditu duen pertsona kopurua ezartzeko. Beraz, puntuazio hori nahitaezko bi ariketetatik bereizi beharko da.

Gehienez 18 puntu emanen dira, izangaiak frogatu duen ezagutza mailaren eta ondoren ezartzen diren baloratzeko irizpideen arabera:

Autonomia erkidegoko hizkuntza baloratzeko irizpideak: Autonomia erkidegoko hizkuntza baloratzeko irizpide hauek erabiliko dira:

Kataluniako autonomia erkidegoan:

-B mailako egiaztagiria: Sei puntu.

-C mailako egiaztagiria: Hamabi puntu.

-D mailako egiaztagiria: Hamazortzi puntu.

Hizkuntzaren ezagutza frogatzeko Hizkuntza Politikarako Idazkaritzaren ziurtagiriak aurkeztu behar dira, edo horren baliokideak, Kataluniako Generalitat-eko Lehendakaritza Departamentuaren uztailaren 21eko PRE 228/2004 Agindua betez.

Nafarroako Foru Komunitatean:

Euskarari buruzko abenduaren 15eko 18/1986 Foru Legearen 5. artikuluak zehazten dituen eremu euskaldunean eta eremu mistoan:

-Hizkuntzetarako Europako Erreferentzia Esparru Bateratuko A2 edo B1 mailaren ziurtagiria, edo Nafarroako Gobernuak antolatutako ikastaroetan lau urrats gainditu izanarena: Sei puntu.

-Hizkuntzetarako Europako Erreferentzia Esparru Bateratuko B2 mailaren ziurtagiria, edo Nafarroako Gobernuak antolatutako ikastaroetan zortzi urrats gainditu izanarena: Hamabi.

-EGA titulua edo Hizkuntzetarako Europako Erreferentzia Esparru Bateratuko C1 mailaren baliokidea den beste tituluren bat izatea, edo Nafarroako Gobernuak antolatutako ikastaroetan hamabi urrats gainditu izana: Hamazortzi puntu.

Euskal Autonomia Erkidegoan:

Euskal Autonomia Erkidegoko administrazio publikoetan euskararen erabilera normalizatzeko prozesua arautzen duen apirilaren 15eko 86/1997 Errege Dekretuan ezarritakoaren arabera.

-2. hizkuntz eskakizuna: Sei puntu.

-3. hizkuntz eskakizuna: Hamabi puntu.

-4. hizkuntz eskakizuna: Hamazortzi puntu.

Valentziako Autonomia Erkidegoan:

-Oinarrizko valentziera mailaren ziurtagiria (mintzamena eta idazmena): Sei puntu.

-Valentziera maila ertainaren ziurtagiria (mintzamena eta idazmena): Hamabi puntu.

-Valentzieraren goi mailaren ziurtagiria (mintzamena eta idazmena): Hamazortzi puntu.

2.-Euskal Autonomia Erkidegoko zuzenbide zibil bereziari edo foru zuzenbide zibilari buruzko ezagutzaren ebaluazioa.

Euskal Autonomia Erkidegoan aurkezten diren izangaiei, eskabidean hala eskatuz gero, aurreko atalean azaldutako moduan eta ondorio berberekin, Euskal Autonomia Erkidegoko zuzenbide zibil bereziari eta foru zuzenbide zibilari buruzko ezagutzak ebaluatuko zaizkie. Sei puntu emanen dira atal honetan, betiere nahitaezko ariketetan lortutako puntuetatik bereizita, eta Euskal Autonomia Erkidegoko lurralde eremuan lehentasun hurrenkera ezartzeko bakarrik balioko dute.

Balorazio irizpideak:

A) Ezagutzak agiri bidez frogatzea aukeratzen duten oposiziogileentzat, hauek izanen dira agiri baliodunak:

1. Zuzenbideko lizentziatura, eta horren barnean, irakasgai hauek:

a) Euskal Autonomia Erkidegoko Foru Zuzenbide Zibila eta Zuzenbide Zibil Autonomikoa.

I. Deustuko Unibertsitatea, 1953ko plana: 90 ordu.

II. Deustuko Unibertsitatea, 1998ko plana: 60 ordu.

b) Euskal Autonomia Erkidegoko Foru Zuzenbide Zibila 1.

I. Deustuko Unibertsitatea, 1993ko plana: 30 ordu.

2. Euskal Autonomia Erkidegoko Foru Zuzenbide Zibileko eta Zuzenbide Zibil Autonomikoko masterra: 540 ordu (54 kreditu).

3. Euskal Autonomia Erkidegoko Foru Zuzenbide Zibileko espezializazioaren diploma (ikasgelan): 220 ordu (22 kreditu).

4. Euskal Autonomia Erkidegoko Zuzenbide Zibileko espezializazioaren diploma (on line): 210 ordu (21 kreditu).

5. Zuzenbideko doktoretza: (Gutxienez, 60 ordu: 6 kreditu).

a) Zuzenbideko doktore titulua, Euskal Autonomia Erkidegoko Foru Zuzenbide Zibilari buruzko tesiarekin.

b) Zuzenbideko doktorego ikastaroak, Euskal Autonomia Erkidegoko Foru Zuzenbide Zibilari buruzkoak.

B) Azterketa egitea aukeratzen duten oposiziogileek test motako galdera-sorta bati erantzun beharko diote. Berrogei galdera izanen dira, bakoitzak lau erantzun izanen ditu eta horietatik bakarra izanen da zuzena.

Erantzun zuzen bakoitzeko puntu bat emanen da. Erantzuna okerra bada edo galderari erantzuten ez bazaio ez da batere punturik emanen. Ariketa gainditzeko gutxienez 20 puntu lortu behar dira.

Galdera-sorta zerrenda honetako gaiei buruzkoa izanen da:

Azterketarako gaiak

1. Arau-esparrua eta iturrien sistema: Euskal Autonomia Erkidegoaren eskumena Foru Zuzenbide Zibilaren arloan. Euskal Autonomia Erkidegoko Foru Zuzenbide Zibilari buruzko legeak. Foru Zuzenbidearen Iturriak: Euskal Autonomia Erkidegoko Foru Zuzenbidearen iturrien sistema; zuzenbide osagarria. Euskal Autonomia Erkidegoko Foru Zuzenbide Zibileko legeen izaera.

2. Bizkaiko Foru Zibila. Lurralde eremua eta eremu pertsonala: Lur Laua eta hiribilduak. Bizkaitar forudunak eta bizkaitar forugabeak. Atzerritarren nazionalitatea eta auzotasuna Bizkaian.

3. Bizkaiko Foru Zibila. Tronkalekotasuna, definizioa. Nahitaezko oinordetza. Senipartea eta seniparteduna. Euskal Autonomia Erkidegoko Foru Zuzenbide Zibilean onartzen diren testamentu motak.

4. Bizkaiko Foru Zibila. Ezkontzaren ondasun-eraentza. Ezarpena eta aldaketak. Lege araubide osagarria, eta hori zehazteko arauak. Foru jakinarazpena: sorrera, finkapena eta amaiera.

5. Arabako Foru Zibila. Lurralde eremua eta eremu pertsonala. Gipuzkoako Foru Zibila. Lurralde eremua, eremu pertsonala eta funtzionala.

II. ERANSKINA

.................. jaunak/andreak (helbidea: ................................................................; adina: ....................; nortasun agiri nazionalaren zenbakia: ..................) zin edo agindu egiten dut, Laguntza Judizialeko Kidegoko funtzionario izenda nazaten, ez nautela inongo administrazio publikoren zerbitzutik bereizi, ez nagoela desgaitua funtzio publikoetan aritzeko, eta ez dudala lege-xedapenetan ezarritako ezgaitasun edo bateraezintasun kausarik.

.......................(e)n ...........ko .............................aren ......(e)an
Aitortzailea

III. ERANSKINA

Onartua izateko eskabidea betetzeko jarraibideak

Irakurri arreta handiz eta bete hurrengo jarraibideak. Jarraibideak bete ezean zure datuak oker gera daitezke gero dokumentu honen irakurketa elektronikoa egiteko.

Jarraibide orokorrak

-Idaztean erabili soilik boligrafo beltza edo urdina, eta idatzi zerbait gogor eta lauaren gainean.

-Datuak bete baino lehen aztertu ondo eskabideko "Karaktereen eredua", letrak, zenbakiak eta ikurrak ematen baitira bertan.

-Idatzi karaktereak (letrak, zenbakiak eta ikurrak) laukietan, "Karaktereen ereduan" adierazi bezala. Ez erabili ereduan agertzen ez den ikurrik.

-Lauki bakoitzean karaktere bakarra (letra, zenbakia edo ikurra) idatzi behar duzu. Ez idatzi inoiz laukiaren ertzen gainean. Ez idatzi ezer laukietatik kanpo.

-Ondo begiratu idaztean boligrafoak etenik gabeko marra uzten duela, eta datuak kopietan ere idazteko moduko indarraz idatzi.

-Zerbait oker jarri baduzu ez ezabatu edo zuzendu laukian bertan. Oker dagoen laukia bete edo gaineztatu osorik eta gero idatzi karaktere zuzena hurrengo laukian.

Laukia osorik beteta badago oker idatzitako karakterea baliorik gabe geratuko da. Ez ezabatu edo zuzendu ezer.

-Deiturak, izena, udalerria eta beste datu batzuk luzeegiak badira, saia zaitez ulertzeko moduan laburtzen. Ez laburtu lehen deitura. Erabili soilik "Karaktereen ereduan" agertzen diren ikurrak.

-Etxebizitzari buruzko atala betetzean (13. laukia), beheko solairuan edo solairuartean bada, idatzi 0.

-Telefonoari buruzko atala betetzean (18. laukia) idatzi zenbakiak bakarrik; ez utzi lauki hutsik edo ez idatzi banaketa-ikurrik aurrezenbakiaren eta zenbakiaren artean.

-Hitz bat baino gehiago idatzi behar den ataletan (izena, helbidea, etab.), utzi lauki huts bat hitz batetik bestera.

-Eskuz idatzi behar duzun laukietan (19 eta 28. laukiak) idatzi letra argia eta irakurterraza. Ez idatzi ezer laukitik kanpo.

-Ez ahaztu eskabidea sinatu behar duzula, dagokion laukian. Ez sinatu laukitik kanpo.

-Ez tolestu "Onartua izateko eskabidea", eta ez zikindu boligrafoarekin.

-Ez idatzi datuak bata bestearen gainean.

Eskabidean eskatzen diren datu jakin
batzuei buruzko jarraibide bereziak

-Kidegoaren kodea (20. laukia). Kidegoari dagokion deialdian ageri dena.

-Desgaitasuna dutenentzat gordetako lanpostuak (23. laukia). Desgaitua bazara bakarrik bete behar duzu, eta hartu ondokoak kontuan: A) Deialdiaren arabera, desgaituentzako kupo bat edo bi egon daitezke. Bakarra badago, jarri X bat "desgaitasun orokorrerako gordetakoak" laukian, ez beste inon. Baina egokitzapena ere eskatu baduzu, bete lauki hori. B) Desgaitasuna dutenentzat gordetako kupoetara aurkezten ez bazara baina elbarria zarelako probak egiteko egokitzapena eskatu behar baduzu, bete bakarrik "egokitzapena eskatzen du" laukia.

-Azterketa egiteko probintzia eta horren kodea (26 eta 27 laukiak). Adierazi azterketa egiteko aukeratu duzun hiria (26. laukia) eta horri dagokion kodea (27. laukia), deialdian halakorik eskatzen bada, ondoren zehaztu bezala: Albacete 02; Bartzelona 08; Burgos 09; Cáceres 10; Ceuta 51; Las Palmas 35; Logroño 26; Madril 28; Mallorca 07; Melilla 52; Murtzia 30; Oviedo 33; Iruña 31; P.G. eta B.-Madril 28; Santander 39; Coruña 15; Sevilla 41; Tenerife 38; Valentzia 46; Valladolid 47; Gasteiz 01; Zaragoza 50.

-Ordaindu behar duenak (subjektu pasiboa) sinadura eta data jarri behar ditu agiri honen atzealdean horretarako dagoen tartean, behean, ezkerraldean.

-Ordaindu beharreko diru kopurua: Idatz ezazu autolikidazioan azterketa egiteko eskubidearen tasaren zenbatekoa. Deialdia egiten duen aginduan dago zehaztuta.

-Ordaintzeko lekua. Erakunde laguntzaileetan (bankuak, aurrezki kutxak eta kreditu kooperatibak), sarrera-agiri hau aurkeztuz. Ez da beharrezkoa kontu bat irekita edukitzea.

-Ordainketaren frogagiria eta eskabidea:

Azterketa-eskubidearen tasa ordaintzerakoan, eskabidea aurkezten duzunean, eskatu erakunde laguntzaileari interesdunarentzako alea, eskubideak ordaindu dituzula frogatu ahal izateko, eta Administrazioarentzako alea. Azken hori deialdiaren oinarrian adierazten denaren arabera aurkeztu beharko da.

IV. ERANSKINA

.................. jaunak/andreak (helbidea: ................................................................; adina: ....................; nortasun agiri nazionalaren zenbakia: ..................), Laguntza Judizialeko Kidegoan sartzeko hautapen probetan parte hartzeko eskabidea aurkeztu baitut, baimena ematen dut deialdi honetako hautapen prozesuko instrukzio organoak nire nortasun datu pertsonalak kontsultatu eta egiaztatu ahal ditzan Administrazioaren artxibo, datu base eta bestelako dokumentu-funtsetan.

..........................(e)n ..............ko ........................aren ......(e)an
Aitortzailea

Iragarkiaren kodea: E1010496