Iragarkia

65. ALDIZKARIA - 2010eko maiatzaren 28a

1. NAFARROAKO FORU KOMUNITATEA

1.2. AGINTARIAK ETA LANGILEAK

1.2.2. Oposizioak eta lehiaketak. Lan publikoaren eskaintza

808/2010 EBAZPENA, apirilaren 27koa, Osasunbidea-Nafarroako Osasun Zerbitzuko zuzendari kudeatzaileak emana, Osasunbidea-Nafarroako Osasun Zerbitzuan Osasun Dokumentazioko teknikari espezialista (ODTE) izateko 3 lanpostu, 1.1 oinarrian zehazten direnak, oposizio-lehiaketa bidez betetzeko deialdia onesten duena.

Osasunbidea-Nafarroako Osasun Zerbitzuko zuzendari kudeatzailearen ebazpenaren bidez, Osasunbidea-Nafarroako Osasun Zerbitzuan Osasun dokumentazioko teknikari espezialista (ODTE) izateko 3 lanpostu, 1.1 oinarrian zehazten direnak, oposizio-lehiaketa bidez betetzeko deialdia onetsi da, arau hauei jarraikiz:

1.-Arau orokorrak.

Deialdi honen oinarriak eta ereduak web orri honetan kontsultatzen eta eskuratzen ahal dira: www.navarra.es, ''Zerbitzuak'' ''Enplegu publikoa'' epigrafeak.

Deialdi honen gaineko arauak honako hauek dira: Osasunbidea-Nafarroako Osasun Zerbitzuan sartu eta bertako lanpostuen betetzea arautzen duen azaroaren 22ko 347/1993 Foru Dekretua; Osasuneko kontseilariak urriaren 3an emandako 464/2001 Foru Agindua, Osasunbidea-Nafarroako Osasun Zerbitzuan sartzeko eta bertako lanpostuak betetzeko prozeduretan aplikatuko diren merezimenduen baremoak arautzen dituena, A mailako osasun arloko langileen kasuan izan ezik (A.1 eta A.2 estamentuak); ekainaren 15eko 55/2009 Foru Dekretua, euskaraz jakitearen trataera arautzen duena; uztailaren 30eko 203/2001 Foru Dekretua, non zehazten baita, batetik, Nafarroako Foru Komunitateko Administrazioaren eta haren erakunde autonomoen plantillako zein lanpostutarako den nahitaezkoa euskaraz jakitea eta zer jakite maila behar den bakoitzean, eta, bestetik, zein lanpostutan hartu behar den euskaraz jakitea beste batzuen arteko merezimendu gisa, eta gainerako arau osagarriak.

1.1. Deialdi honen xedea da Osasun Dokumentazioko teknikari espezialista izateko 3 lanpostu oposizio-lehiaketa bidez betetzea, hutsik gelditu baitira Osasunbidea-Nafarroako Osasun Zerbitzuko zuzendari kudeatzaileak otsailaren 1eko 176/2010 Ebazpenaren bidez onetsitako deialdiaren bitartez egindako lekualdatze lehiaketan. Aipatu deialdia 2010eko 26. Nafarroako Aldizkari Ofizialean argitaratu zen, otsailaren 26an. Hauek dira bete beharreko lanpostu hutsak:

-1 Bideko Ama Birjina Ospitalean; plantillako zenbakia: 69801.

-1 Lizarrako Osasun Barrutian; plantillako zenbakia: 69882.

-1 Tuterako Osasun Barrutian; plantillako zenbakia: 69979.

1.2. Lanpostu hutsak halako lanpostuak betetzeko ordena honi segituz banatuko dira:

a) Lehenbizikoa, hirugarrena, bosgarrena, zazpigarrena eta bederatzigarrena igoera txandatik beteko dira, Nafarroako edozein administrazio publikotako plantillako langile finkoentzako hautapen prozesu murriztutik alegia, beste kategoria batekoak izanik deialdiko lanpostuaren maila-talde berekoak edo baxuagokoak badira, betiere barne igoerari buruz azaroaren 22ko 347/1993 Foru Dekretuaren 12. artikuluan eta indarreko hitzarmen kolektiboan ezarritakoari jarraikiz.

b) Bigarrena, laugarrena, seigarrena, zortzigarrena eta hamargarrena, txanda irekitik.

Lanpostu hutsak betetzeko hurrenkera barne igoeratik hasiko da kontatzen, lehenago eskaini zen azken lanpostua txanda irekikoa izan baitzen.

1.3. Txanda murriztuan lanposturen bat bete gabe gelditzen bada izangaiak hautaprobak gainditzeko ezarritako gutxieneko puntuaziora iristen ez direlako, aurreko oinarriaren arabera bidezko diren txandakoei gehituko zaie.

Era berean, igoera txandan lanpostu hutsen kopurua baino izangai gehiagok gainditzen badituzte probak, txanda horretan probak gainditu arren lanposturik lortzen ez dutenek txanda irekiko lanpostu hutsetarako aukera izanen dute, aipatu txandara aurkeztu direnekin lehia hertsian, lortutako azken puntuazioari jarraituz.

Igoera txandako izangaiak, deialdi honen 2.1.2 oinarrian eskatutako baldintzak betetzen ez badituzte, txanda irekian besterik gabe onartuko dira, baldin eta txanda horretan parte hartzeko baldintzak betetzen badituzte eta kontrakorik espresuki adierazten ez bada.

1.4. Izendapena dela bide, izendatuak Nafarroako Foru Komunitateko Administrazioaren plantillako nominadun funtzionario bihurtuko dira eta Nafarroako Foru Komunitateko Administrazioko funtzionarioei buruz indarra duten xedapenetan ezarritako eskubideak eta betebeharrak izanen dituzte.

1.5. Deialdiko lanpostuak C maila edo taldekoak dira, eta Osasunbidea-Nafarroako Osasun Zerbitzuko "Osasun teknikariak" estamentuan eta "Osasun dokumentazioa" espezialitatean sailkatuta daude (urriaren 20ko 11/1992 Foru Legea, Osasunbidea-Nafarroako Osasun Zerbitzuari atxikitako langileen araubidea erregulatzen duena, Eranskina). Lanpostuetako ordainsariak urriaren 20ko 11/1992 Foru Legean eta aplika daitezkeen gainerako xedapenetan ezarritakoak izanen dira.

1.6. Lanaldia zerbitzuaren beharretara egokituko da eta administrazio organo eskudunek edozein unetan aldatzen ahalko dute.

2.-Izangaiek bete beharreko baldintzak.

2.1. Oposizio-lehiaketa honetan onartuak izateko, izangaiek betebehar hauek izanen dituzte eskabideak aurkezteko epea bukatzen den egunean:

2.1.1. Txanda irekiko izangaiak:

a) Espainiako nazionalitatea izatea, edo Europar Batasuneko beste estaturen batekoa. Orobat, espainiarren eta Europar Batasuneko beste estatuetako herritarren ezkontideek hartzen ahal dute parte, zuzenbidez bereizita ez badaude; halaber, haien ondorengoek eta ezkontidearenek, zuzenbidez bereizita ez badaude, 21 urtetik beherakoak badira, edo gorakoak, haien kontura biziz gero. Halaber, Europar Batasunak sinatu eta Espainiak berretsitako nazioarteko itunen aplikazio esparruan sartutako pertsonek badute parte hartzeko eskubidea, herrialde horietan langileen zirkulazio librea aplikagarria bada.

b) Hamasei urte beteta izatea eta erretiroa nahitaez hartzeko gehieneko adina gainditua ez izatea.

c) Osasun Dokumentazioko goi mailako teknikari titulua edo baliokidea izatea, edo eskabideak aurkezteko epea bukatzen den egunean titulu hori eskuratzeko moduan egotea.

Titulua atzerrian lortuz gero, homologaturik dagoela frogatzen duen ziurtagiria eduki beharko da.

d) Bete behar dituen eginkizunetan aritzeko behar den gaitasun fisiko eta psikikoa izatea.

e) Eginkizun publikoak betetzeko ezgaitua edo gabetua ez egotea, eta inongo administrazio publikoren zerbitzutik baztertua ez izatea.

2.1.2. Igoera txandako izangaiek, txanda irekikoentzat adierazitakoez gain, honako hauek ere bete beharko dituzte:

a) Nafarroako administrazio publikoetako funtzionarioak, estatutupeko langileak edo lan-kontratudun finkoak izatea, eta jatorrizko lanpostuan borondatezko edo nahitaezko eszedentzian ez egotea.

b) Deialdiko lanpostu hutsen maila edo talde berekoa edo beheragokoa eta beste kategoria batekoa izatea.

c) Osasun Dokumentazioko goi mailako teknikari titulua edo baliokidea izatea, edo eskaerak aurkezteko epea bukatzen den egunean titulu hori eskuratzeko moduan egotea eta Administrazio Publikoetan gutxienez ere bost urteko antzinatasuna dutela frogatzea.

2.1.3. Desgaitasuna dutenentzako txandako izangaiek, txanda irekikoentzat ezarritako baldintzez gain, %33ko desgaitasuna edo handiagoa dutela frogatu beharko dute.

2.1.4. Uztailaren 30eko 203/2001 Foru Dekretuan aipatzen diren euskal eremuko lanpostuak eskuratzeko, behar den euskara maila frogatzea.

2.2. Betiere, izangaiek eskabideak aurkezteko epearen azken egunerako bete behar dituzte baldintza horiek, eta hautapen prozesu osoan eutsi behar diete, harik eta izendatu arte.

3.-Eskaerak eta agiriak.

3.1. Eskabideak aurkezteko tokiak:

a) Osasunbidea-Nafarroako Osasun Zerbitzuko Erregistroan (Irunlarrea kalea, 39, 31008 Iruña), edo ekainaren 24ko 137/2002 Foru Dekretuan aipatzen diren Nafarroako Gobernuko Erregistro Orokorreko bulegoetako edozeinetan (95. Nafarroako Aldizkari Ofiziala, abuztuaren 7koa) edo Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 38.4 artikuluan ezarritako erregistro eta bulegoetan.

Eskabidea posta-bulego batean aurkeztuz gero, gutun-azal irekian eginen da, posta zerbitzuko funtzionarioak, ziurtatu aurretik, data eta zigilua jar ditzan.

b) Eskabideak Nafarroako Foru Komunitateko Administrazioaren Erregistro Orokor Elektronikoan ere aurkezten ahal dira, Nafarroako Gobernuaren www.navarra.es web orriaren bidez. Eskatzailearen sinadura elektronikoa beharko da.

3.2. Eskabide eredua.

Deialdi honetan parte hartu ahal izateko eskabideak deialdi honetan (I. eranskina, Interneten ere eskuragarri) argitaratutako ereduaren arabera egin behar dira eta haietan izangaiek adierazi behar dute baldintza guzti-guztiak betetzen dituztela eskabideak aurkezteko epearen azken egunean.

3.3. Azterketa egiteko eskubideak ordaintzea.

Deialdi honetan parte hartu nahi duten izangaiek, eskabideak aurkezteko epean, 25 euro ordaindu beharko dituzte espedientea formalizatu eta azterketa egiteko eskubideengatik.

Azterketa eskubideak Internet bidez ordainduko dira Nafarroako Gobernuaren orri honetan: www.navarra.es, "Zerbitzuak" eta "Enplegu Publikoa" epigrafeetan, honako prozedura hauetako baten bidez:

a) Ordainketa gutuna bete eta inprimatzea. Ordaintzeko, web orrian argitaraturiko zerrendan ageri diren entitate laguntzaileetako edozeinetara jo beharko da.

b) Telematika bidez bete eta ordaintzea, azalduriko jarraibideei jarraituz. Sinadura digitala behar da.

Tasatik salbuetsirik daude:

a) %33ko desgaitasuna edo handiagoa duten pertsonak.

b) Deialdia argitaratu aurretik hilabetez gutxienez lan-eskatzaile gisa inskribatuta egon diren pertsonak. Salbuespen hori aplikatzeko baldintza izanen da inskribatuta egon diren bitartean eskainitako inolako lan egokiri uko egin ez izatea, ezta lanbide sustapen, prestakuntza edo eraberritze ekintzetan parte hartzeari ere, justifikatutako kasuetan izan ezik, eta, horrez gainera, lanbide arteko gutxieneko soldatatik gorakoa den diru-sarrerarik ez izatea hilabetean. Paragrafo honetan xedatutakoa honela frogatu beharko da:

-Lan-eskatzailea dela frogatzeko, Enplegu Bulegoak emandako agiria aurkeztu beharko da. Bertan, lan-eskatzaile gisa inskribatu zeneko data agertuko da eta, orobat, adieraziko da inskribaturik egon den bitartean ez diola uko egin handik eskainitako inolako lan egokiri, ezta lanbide sustapen, prestakuntza edo eraberritze ekintzetan parte hartzeari ere, justifikaturiko kasuetan izan ezik.

-Interesdunaren aitortzaren bidez frogatuko da lanbide arteko gutxieneko soldatatik gorako errentarik ez duela hilean. Horren eredua Erregistro bulegoan hartzen ahal da, edo deialdi honen 1. oinarrian adierazitako Interneteko helbidetik.

Azterketa eskubideak ordaintzeak ez du inola ere aldatuko eskabidea behar den epean eta moduan aurkeztu beharra.

3.4. Eskabidearekin batera aurkeztu beharreko agiriak.

Igoera txandako parte-hartzaileek:

a) Nafarroako Foru Komunitatekoek edo haren erakunde autonomoetakoek titulazioaren jatorrizko agiria eta notarioak edo administrazioak konpultsaturiko kopiak aurkeztu beharko dituzte bakarrik.

b) Nafarroako Foru Komunitateko Administrazioa ez den Nafarroako beste administrazio publikoren bateko langile finkoek edo Nafarroako Foru Komunitateari eskualdatutako Justizia Administrazioko zerbitzuei atxikitako langile finkoek, lehengoaz gainera, deialdi honen 2.1.2 oinarrian jasotzen diren betebeharrak betetzen dituztela frogatzen duen agiria ere gehitu beharko diote eskabideari.

Desgaitasuna dutenentzako txandako parte-hartzaileek:

Desgaitasuna frogatuko behar dute, erakunde eskudunek emandako agiria aurkeztuz.

3.5. Eremu euskaldunean aritzeko lanpostuak (euskaraz jakin beharra daukatenak) aukeratuz gero, ziurtagiria merezimenduekin batera aurkeztuko da eta ez eskabidearekin batera. Betebehar hori frogatzeko, izangaiak eskatzen zaion hizkuntza maila baduela egiaztatzeko berariazko probak gainditu beharko ditu (Nafarroako Administrazio Publikoaren Institutuak prestatuko ditu probak), edo 1. jakite maila duela frogatu beharko du, hizkuntza eskola ofizial batean lau ikasmaila edo Nafarroako Gobernuak antolaturiko ikastaroetan bederatzi "urrats" gainditu dituela adierazten duen ziurtagiri baten bidez.

3.6. Azterketak gainditu eta lanpostua eskuratzen duten izangaiek gainerako betebeharrak agiri bidez frogatu beharko dituzte, deialdi honen 8. oinarrian ezarri den epean eta moduan.

3.7. Desgaitasuna duten izangaiek ariketak egiteko egokitzapenak eskatzen ahalko dituzte, beharrezkoa izanez gero. Eskabidean adierazi behar dute zer-nolako desgaitasuna duten eta zein egokitzapen behar den. (Desgaitasuna frogatu egin behar dute, erakunde eskudunek emandako agiria aurkeztuz).

3.8. Eskabidea aurkezteko epea hogeita hamar egun naturalekoa izanen da, deialdi hau Nafarroako Aldizkari Ofizialean argitaratu eta biharamunetik hasita. Epe hori luzaezina da.

4.-Izangai onartuen eta baztertuen zerrenda.

4.1. Eskabideak aurkezteko epea bukatutakoan, Osasunbidea-Nafarroako Osasun Zerbitzuko Giza Baliabideen zuzendariak onartuen eta baztertuen behin-behineko zerrenda onesteko ebazpena emanen du, eta Nafarroako Aldizkari Ofizialean argitaratzeko aginduko.

4.2. Izangaiek hamar egun balioduneko epea izanen dute, behin-behineko zerrenda Nafarroako Aldizkari Ofizialean argitaratu eta biharamunetik hasita, erreklamazioak aurkezteko eta, akatsik egin badute, haiek zuzentzeko. Horretarako, zuzenketa eskaeren onarpena edo ezespena behin betiko zerrendaren ebazpenean inplizituki jasoko da.

4.3. Ezarritako epean eskabiderik aurkezten ez bada, organo eskudunak oposizio-lehiaketa bete gabe utzi dela adierazteko ebazpena emanen du. Ebazpen hori Nafarroako Aldizkari Ofizialean argitaratu beharko da.

4.4. Erreklamazioak aurkezteko epea bete eta haiek ebatzita, Osasunbidea-Nafarroako Osasun Zerbitzuko Giza Baliabideen zuzendariak onartuen eta baztertuen behin betiko zerrenda onesteko ebazpena emanen du, eta Nafarroako Aldizkari Ofizialean argitaratzeko aginduko.

4.5. Onartuen zerrendan agertzea ez da aski ebazpen honen bitartez abiatzen den prozeduran izangaiek eskatutako baldintzak betetzen dituztela aitortzeko. Hautapen prozedura gainditu eta dokumentazioa aurkeztutakoan, baldintzaren bat ez dela betetzen ohartuz gero, interesdunek prozeduran parte hartzeagatik dituzten eskubide guztiak galduko dituzte.

5.-Epaimahaia.

5.1. Epaimahaiak kide hauek izanen ditu:

Epaimahaiburua: Miguel Angel Gil Asenjo jauna, Osasunbidea-Nafarroako Osasun Zerbitzuko Tuterako Osasun Barrutiko zuzendaria.

Ordezko mahaiburua: Mariano Hernández Galindo jauna, Osasunbidea-Nafarroako Osasun Zerbitzuko Tuterako Osasun Barrutiko Oinarrizko Osasun Laguntzako zuzendariordea.

Mahaikidea: María Jesús Vicente Arbeláiz andrea, Osasunbidea-Nafarroako Osasun Zerbitzuak izendatua.

Ordezko mahaikidea: Alejandra Chamorro Camazón andrea, Osasunbidea-Nafarroako Osasun Zerbitzuak izendatua.

Mahaikidea: Pilar Jiménez Carnicero andrea, Osasunbidea-Nafarroako Osasun Zerbitzuak izendatua.

Ordezko mahaikidea: Montserrat Díaz Calve andrea, Osasunbidea-Nafarroako Osasun Zerbitzuak izendatua.

Mahaikidea: Ángel Manuel Visus Eraso jauna, Osasunbidea-Nafarroako Osasun Zerbitzuko langileen ordezkariek izendatua.

Ordezko mahaikidea: Osasunbidea-Nafarroako Osasun Zerbitzuko langileen ordezkariek izendatu beharrekoa.

Idazkaria: Carlos Monterrubio Murugarren jauna, Osasunbidea-Nafarroako Osasun Zerbitzuko Lizarrako Osasun Barrutiko Langileria Zerbitzuko burua.

Ordezko idazkaria: Ana Beamonte Aréjula andrea, Osasunbidea-Nafarroako Osasun Zerbitzuko Tuterako Osasun Barrutiko Langileria Zerbitzuko burua.

Hautaprobak hasi baino lehen eratuko da epaimahaia.

5.2. Epaimahaia nork osatzen duen, izangai onartu eta baztertuen zerrendarekin batera emanen da aditzera.

5.3. Epaimahaia ezin izanen da eratu, ezta jardun ere, kideen gehiengo osoa gutxienez bildu gabe.

Organo kolegiatu horren eraketa baliozkoa izateko, beharrezkoa izanen da kide hauek biltzea: mahaiburua eta mahaikide idazkaria edo horien ordezkoak, eta gutxienez ere mahaikideen erdiak.

6.-Oposizio-lehiaketa nola eginen den.

6.1. Deialdi honetako faseak hurrenkera honetan izanen dira: lehenik, oposizioaldia eta hori bukatutakoan, lehiaketaldia.

6.2. Oposizioa 2010eko irailean hasiko da. Onartu eta baztertuen behin betiko zerrenda onesten duen ebazpenean berean finkatuko da oposizioaldia zein tokitan, egunetan eta ordutan hasiko den. Hala denean, epaimahaiak gainerako probak edo ariketak egiteko iragarkiak jakinaraziko ditu, arauz egin behar den moduan.

6.3. Oposizioaldia eta balorazioa.

6.3.1. Oposizioaldian proba teoriko-praktiko bat izanen da: idatziz erantzun beharko da II. eranskinean agertzen diren gaiei buruzko galdera sorta bat. Probaren gehieneko iraupena epaimahaiak ezarriko du proba hasi baino lehen.

6.3.2. Oposizioaldian 60 puntu lortzen ahalko dira gehienez.

Gutxienez ere 30 puntu lortzen ez dituzten izangaiak baztertu eginen dira.

6.3.3. Probarako deialdi bakarra eginen da. Izangaiek aldean izan beharko dute nortasun agiri nazionala edo epaimahaiaren iritziz identifikaziorako balio duen beste agiriren bat.

Probetara agertzen ez diren izangaiak oposizioalditik baztertuta geldituko dira.

6.3.4. Hautaprobetan, eskaeran azaldutakoaren araberako egokitzapenak eginen dira, desgaitasuna dutenentzat.

6.3.5. Ariketa egindakoan, epaimahaiak jendaurrean erakutsiko ditu, Osasunbidea-Nafarroako Osasun Zerbitzuaren iragarki oholean edo proba egin den tokian, hura gainditzen duten izangaien zerrenda eta erdietsitako kalifikazioak.

6.4. Lehiaketaldia eta balorazioa.

6.4.1. Epaimahaikoek lehiaketaldia abiatuko dute oposizioa gainditzen duten izangaiekin.

Oposizioaldia gainditzen duten izangaiek merezimenduak alegatu beharko dituzte eta agiri bidez frogatu, epaimahaikoek eskatu eta hamabost eguneko epean. Horretarako, jatorrizko agiriak aurkeztuko dituzte, edo notario edo administrazio bidez konpultsatutako kopiak, deialdian ezarritako baremoaren arabera. Merezimendu horiek argitara emanen den autobaremaziorako agirian adieraziko dira.

6.4.2. Izangaiek aurkeztu eta frogatutako merezimenduak kalifikatuko dira lehiaketaldian, deialdi honi erantsitako baremoen arabera (III. eranskina).

Lehiaketaldian ez da izangairik baztertuko. Fase horretan gehienez 40 puntu biltzen ahalko dira.

6.4.3. Merezimenduak baloratzean, deialdia Nafarroako Aldizkari Ofizialean argitaratzen den egunera arte egindakoak baizik ez dira kontuan hartuko. Geroago egindako merezimenduak ez dira aintzat hartuko.

6.4.4. Merezimenduen baremoaren 1. ataleko balorazioan kontuan hartuko da deialdiko lanpostua "Osasun teknikariak" estamentuan eta "Osasun dokumentazioa" espezialitatean sailkatuta dagoela, Osasunbidea-Nafarroako Osasun Zerbitzuko estamentu eta espezialitateetako izendapenen indarreko sailkapenaren arabera (urriaren 20ko 11/1992 Foru Legea, Osasunbidea-Nafarroako Osasun Zerbitzuari atxikitako langileen berariazko araubideari buruzkoa, Eranskina).

Egindako zerbitzuak frogatzeko, zentroko zuzendariak edo langileen buruak emandako ziurtagiriak aurkeztu beharko dira, eta bertan nahitaez datu hauek jarri:

-Lantokia.

-Estamentua eta/edo espezialitatea.

-Zerbitzuen iraupena, behar bezala adierazita hasiera eta bukaera egunak eta guztira zenbat egun diren.

-Zerbitzuak lanaldi partzialean eman baldin badira, honako hau erantsi:

a) egunean, astean, hilabetean edo urtean egindako ordu kopurua eta emandako zerbitzuei dagokien urteko lanaldia,

b) edo, bestela, ohiko lanaldiaren aldean zein portzentaje osatzen duten.

Enpresa pribatuetan eginiko zerbitzuak izanez gero, ziurtagiri horrez gain, Gizarte Segurantzako Diruzaintzak lan bizitzari buruz egindako txostena ere aurkeztu beharko da. Lan bizitzari buruzko txostena errazago eskuratzearren, Gizarte Segurantzako Diruzaintzak telefono zerbitzu bat jarri du martxan, 901502050 zenbakiarekin, txosten hori eskatzeko.

6.4.5. Epaimahaiak baremoaren atal bakoitzean izangaiek dituzten merezimenduak baloratuko ditu. Epaimahaiak ez du inoiz aintzat hartuko izangaiak aurretik alegatu eta agiri bidez frogatu gabeko merezimendurik, eta ezin izanen du atal bakoitzerako ezarritako puntuazioa baino handiagorik eman.

6.4.6. Euskaraz dakitela proben bidez frogatu nahi duten izangaiei haiek egiteko tokia, eguna eta ordua adieraziko zaizkie, behar den denborarekin.

6.4.7. Lehiaketaldia bukatzen denean, epaimahaiak jendaurrean jarriko du balorazioaren emaitza, hau da, izangaiek lortutako puntuazioak, Osasunbidea-Nafarroako Osasun Zerbitzuko iragarki oholean.

6.4.8. Izangaiek aurkeztutako jatorrizko agiriak berreskuratzen ahalko dituzte, espres eskatuz gero, hiru hilabeteko epean, izendapena jakinarazi ondoren bi hilabete pasaturik, salbu eta izangairen batek erreklamazioa jartzen badu, hala izanez gero agiriak luzaroago gordetzen ahal baitira egiaztapenak eta probak egiteko. Arestian aipatutako epean izangaiak agiriak berreskuratzen ez baditu, berreskuratzeari uko egin diola ulertuko da eta haien gaineko eskubidea galduko du.

7.-Azken puntuazioa.

Azken kalifikazioa lehiaketaldian eta oposizioaldian lortutako puntuazioen batura izanen da.

Azkeneko puntuazioetan berdinketarik badago, oposizioaldian puntuaziorik altuena duen izangaiak izanen du lehentasuna. Berdinketa hausten ez bada, osoko puntuazio handiena duen izangaia lehenetsiko da, deialdi honen eranskineko baremoaren atal bakoitzean ezarritako hurrenkerari jarraituz.

8.-Probak gainditzen dituztenen zerrenda eta agirien aurkezpena.

8.1. Lehiaketaldia eta oposizioaldia bukatu ondoren, epaimahaiak probak gainditzen dituztenen zerrenda, guztira lortutako puntuazioen araberako hurrenkeran, jendaurrean jarriko du Osasunbidea-Nafarroako Osasun Zerbitzuko iragarki oholean. Gero, probak gainditu eta, puntuazio handiena izateagatik, lanpostuen kopuruan sartzen diren izangaiak izendatzeko proposamena eginen dio administrazio organo eskudunari, eta Nafarroako Aldizkari Ofizialean argitaratuko da.

8.2. Proposatutako izangaiek, izendatzeko proposamena Nafarroako Aldizkari Ofizialean argitaratu ondoko hogeita hamar egun naturaleko epean, agiri hauek aurkeztu beharko dituzte Osasunbidea-Nafarroako Osasun Zerbitzuko Langileriaren Kudeaketa, Sarrera eta Barne Igoerarako Zerbitzuan:

8.2.1. Nafarroako Foru Komunitateko Administrazioaren edo haren erakunde autonomoen zerbitzuko langile finko ez diren izangaiek:

a) Nortasun agiri nazionalaren fotokopia konpultsatua, edo izangaiaren nazionalitatea eta nortasuna frogatzen dituen beste agiri baliokideren batena.

b) Tituluaren jatorrizko agiriak, edo haien kopiak, notario edo administrazio bidez konpultsatuak.

c) Zinpeko aitorpena, erakusten duena ez dagoela eginkizun publikoetan aritzeko desgaitua edo gabetua eta ez dutela baztertu inongo administrazio publikoren zerbitzutik.

d) Zin egin edo hitzematea Nafarroako Foru Eraentza errespetatuko duela, Konstituzioari eta legeei men eginen diela eta karguari dagozkion eginkizunak zuzen beteko dituela.

e) Laneko Arriskuei Aurrea hartzeko Zerbitzuak emandako txostena, interesdunak karguan aritzea eragotziko liokeen gaixotasun edo akats fisiko edo psikikorik ez duela egiaztatzeko.

f) Europar Batasunetik kanpokoa bada, bertan bizi eta lan egiteko baimena, legeek ezarririko kasuetan.

8.2.2. Nafarroako Foru Komunitateko edozein administrazioren edo haren erakunde autonomoen zerbitzuko langile finkoak diren izangaiak:

a) Laneko Arriskuei Aurrea hartzeko Zerbitzuak emandako txostena, aurreko atalean ezarritako baldintza beretan.

b) 3.4.b) oinarrian aipatzen diren izangaien kasuan, funtzionarioak, estatutupeko langileak edo lan-kontratudun finkoak direla frogatzen duten agiriak eta haien egoera administratiboa eta espediente pertsonaleko gainerako inguruabarrak frogatzen dituztenak.

8.3. Eskabidean %33ko desgaitasuna edo handiagoa dutela adieraziz gero, izangaiek, aurreko agiriez gainera, desgaitasun horrek deialdiko lanpostuan aritzea ez diela eragozten frogatu behar dute, eskumena duten balorazio eta orientazio taldeek emandako agiriaren bitartez.

8.4. Inork agiri horiek goian adierazitako epean ekartzen ez baditu, behar bezala arrazoitutako ezinbesteko kasuetan izan ezik, ezin izanen dute izendatu eta haren jarduketa guztiak deuseztatu eginen dira, eskabidean gezurra esateagatik izan lezakeen erantzukizuna eskatzea baztertu gabe.

8.5. Aurreko atalean azaldutakoa gertatzen bada, gainditzen dutenen zerrendan ondo-ondotik heldu den izangaiarekin beteko du hutsunea administrazioko organo eskudunak.

9.-Lanpostu hutsak hautatzea.

9.1. Administrazioko organo eskudunak esleituko du destinoko lantokia, izendapen proposamena argitaratu baino lehen, deialdiaren xedeko lanpostuetan sartzen ahal diren eta probak gainditu dituzten izangaien eskaeren arabera, lanpostu horiek lortzeko oinarri honetan eskatzen diren betebeharrak betetzen badituzte, hautaprobetan lorturiko hurrenkerari jarraituz.

%33ko edo hortik gorako desgaitasuna duten pertsonek, edozein txandaren bidez lanpostua lortzen badute sarrerako deialdi batean, lanpostuak aukeratzerako lehentasuna izanen dute gainerako izangaien aurretik. Gero, igoera txandatik parte hartzen duten langileek hautatuko dute eta, azkenik, lanpostua txanda irekiaren bidez lortzen duten langileek.

Desgaitasuna duen izangairik bada, eta horrek eragina badu lanpostu bat edo bestea hautatzeko, aukeratzen hasi aurretik, desgaitasunarekin hobeki egokitzen dena esleituko zaio, horren gaineko txostena aztertu eta gero.

Euskarari buruzko Foru Legeak ezarritako eremu euskaldunean dauden lanpostuetarako lehiatuz gero (uztailaren 30eko 203/2001 Foru Dekretuak zehazten ditu) eta horiek lortzeko nahitaezkoa bada euskaraz jakitea, ezinbestekoa izanen da hori frogatzea. Lanpostuak hutsik geldituko dira bai baldintza hori betetzen duen izangairik ez badago, bai, izan arren, eremu euskalduneko lanpostuak hautatzen ez badituzte aurreko lerroaldean onartutako eskubidea erabiltzen dutenean.

9.2. Destinoko lantokia aukeratzeko prozedura hauxe izanen da:

1. Aukeratu baino lehen, hautatu behar duten izangaien zerrenda argitaratuko da. Halaber, aukeratu beharreko lantokien (edo, bestela, lanpostuen) zerrenda jarriko da izangaien eskura.

Zerrenda horiek Osasunbidea-Nafarroako Osasun Zerbitzuko zerbitzu zentraletako iragarki oholean eta Nafarroako Gobernuaren web orrian argitaratuko dira.

2. Parte-hartzaileek bertara agertuz eginen dituzte beren eskaerak eta, horretarako, eskabidea beteko dute, non lehentasun hurrenkeraren arabera adierazi beharko baitituzte eskaintzen diren destinoak. Eskabidea Osasunbidea-Nafarroako Osasun Zerbitzuko Zerbitzu Zentralen Erregistroan (Irunlarrea, 39) hartu edo Nafarroako Gobernuaren web orritik jaisten ahalko da.

3. Eskabidea 15 egun naturaleko epean aurkeztu beharko da, aukera egin behar duten izangaien zerrenda argitaratu eta biharamunetik hasita, deialdi honen 3. oinarrian aipatzen diren erregistroetako edozeinetan.

4. Organo dei-egileak gidatuko du ekitaldia, eta horren emaitza Osasunbidea-Nafarroako Osasun Zerbitzuko Zerbitzu Zentralen iragarki oholean eta Nafarroako Gobernuaren web orrian argitaratuko da.

9.3. Epe horretan aukeratzen ez duten izangaiek, behar bezala justifikatutako ezinbesteko kasuetan salbu, eskubide guztiak galduko dituzte oposizio-lehiaketaren xedeko lanpostuetan jarduteko. Horrelakorik gertatuz gero, 8. oinarrian ezarritakoari jarraituko zaio.

10.-Izendapena eta jabetza hartzea.

10.1. Administrazio organo eskudunak, egoki bada, aurreko oinarrietan ezarritako baldintzak betetzen dituzten izangaiak Nafarroako Foru Komunitateko Administrazioko eta haren erakunde autonomoetako funtzionario izendatuko ditu ebazpen bidez, Osasun Dokumentazioko teknikari espezialista (ODTE) lanpostuan jardun dezaten.

10.2. Izendapena Nafarroako Aldizkari Ofizialean argitaratuko da.

10.3. Izendatutako izangaiak hilabeteko epean jabetu behar du lanpostuaz, izendapena jakinarazten diotenetik hasita. Epe horretan lanpostuaz jabetzen ez bada, ezinbesteko kasuetan salbu, Foru Komunitateko Administrazioko funtzionario izateko eskubide guztiak galduko ditu. Horrelakorik gertatuz gero, 8. oinarrian ezarritakoari jarraituko zaio.

10.4. Izangairen bat funtzionario bihurtu eta lanpostuan batere aritu gabe, zuzenean eta berak eskatuta, borondatezko eszedentzia ematen bazaio jabetza hartzearen egunetik bertatik, data horretan beste administrazio publiko batean ari delako, kasuko lanpostu hutsa ere beteko da deialdiaren 8. oinarriak agintzen duen moduan.

Aurreko bi ataletan aipatutako kasuetan, ez da aldatuko izendapenaren aurretik egindako lanpostu hutsen hautaketa. Beraz, funtzionario berriei, zuzenean, egoera horien ondoriozko lanpostuak esleituko zaizkie.

10.5. Izangaietatik inork ez badu gainditzen oposizio-lehiaketa, organo eskudunak oposizio-lehiaketa bete gabe utzi dela adierazteko ebazpena emanen du. Ebazpen hori Nafarroako Aldizkari Ofizialean argitaratuko da.

10.6. Izendapenean eragina izan lezakeen errekurtsoren bat aurkezten bada deialdiaren, oposizio-lehiaketaren nondik-norakoen edo horren ebazpenaren aurka, izendapena ez da irmoa izanen, eta administrazio bidean nahiz administrazioarekiko auzien jurisdikzioan errekurtsoari buruz eman beharreko ebazpenaren zain eta mende geldituko da.

11.-Aldi baterako kontratazioak egiteko zerrendak.

11.1. Osasun Dokumentazioko teknikari espezialistak (ODTE) aldi baterako kontratatzeko zerrendak 2009ko ekainaren 9ko Erabakian xedatutakoaren arabera prestatuko dira eta hari jarraituz erabiliko dira, erabaki horren bidez onetsi baitzen Osasun Administrazioak eta sindikatuek sinatutako ituna Osasunbidea-Nafarroako Osasun Zerbitzuko zentro eta establezimenduetan aldi baterako langileak hautatzeko. Erabakia 2009ko 95. Nafarroako Aldizkari Ofizialean argitaratu zen, abuztuaren 3an.

11.2. Erabaki horretan xedatutakoaren arabera, oposizio-lehiaketa bidezko deialdi honen emaitzetan oinarrituko dira aldi baterako kontratazioetarako zerrendak, irizpide hauei jarraituz:

a) Deialdiko hautaprobak gainditu arren lanposturik lortzen ez duten izangaiek lehentasuna izanen dute aldi baterako kontrataziorako.

Izangai horiek, Langileriaren eta Lan Harremanen Zuzendariordetzari eskabidea igorrita, kontratazio zerrendetatik kentzeko eskatzen ahal dute, kontratazio zentro edo unitate batean edo gehiagotan.

b) Aurreko atalean adierazitako izangaien ondotik, oposizio-lehiaketa bidezko deialdi honetan aurkeztu eta hura gainditu gabe hautaprobaren bat gainditzen duten izangaiak jarriko dira kontratazio zerrendetan. Halakoetan, hautaprobarik gehien gainditzen dituztenen zerrendak erabiliko dira lehenik, lortutako puntuazio osoaren araberako ordenari zorrotz jarraikiz. Izangaien zerrendaren lehentasuna ezartzeko, bi hauek batuko dira: gainditutako proben puntuazioa eta kasuan kasuko baremoarena. Baremoan izangaiak edozein administrazio publikotan izan duen esperientzia profesionala baizik ez da aintzat hartuko.

c) Oposiziora aurkeztu arren hautaproba bat bera ere gainditu ez duten izangaiak. Halakoetan, zerrendan sartu ahal izateko, proba gainditzeko eskatutako puntuazioaren %30 lortu beharko dute gutxienez. Proban lortutako puntuazioaren ordena zorrotzari jarraikiz osatuko da zerrenda. Izangaien zerrendaren lehentasuna kalkulatzeko, bi hauek batuko dira: egindako probaren puntuazioa eta baremoarena. Baremoan izangaiak edozein administrazio publikotan izan duen esperientzia profesionala baizik ez da aintzat hartuko.

b) eta c) ataletako izangaiek Osasunbidea-Nafarroako Osasun Zerbitzuko Erregistroan aurkeztu beharko dute edozein administrazio publikotan egindako zerbitzuen egiaztagiria, hautaproben behin betiko emaitza argitaratu eta 15 egun balioduneko epean. Kasuan kasuko deialdia argitaratu arte egindako zerbitzuak baloratuko dira. Horretarako, egindako azken deialdi publikoa baizik ez da kontuan hartuko.

11.3. Esparru horietako bakoitzean bi zerrenda eginen dira: bata, iraupen laburreko kontratuetarako, eta iraupen luzeko kontratuetarako bestea.

-Kontratu luzeetarako zerrenda.

Lanpostu hutsak bitarteko gisa betetzeko egiten diren kontratuak dira, baita plantillako langileentzat erreserbatutako lanpostuak betetzeko egiten direnak ere eta, oro har, sei hilabeteko edo gehiagoko beste edozein kontratazio.

Izangai bakoitzak zein zentrotan jardun nahi duen adierazi beharko du. Guztiak hautatzen ahal dira.

-Kontratu laburretarako zerrenda.

Jardunean dauden plantillako langileak ordezteko xedea dute eta, oro har, hasierako aurreikuspenen arabera, sei hilabetetik beherako iraupena dutenak. Kontratu laburrak izanen dira, halaber, etengabeko edo guardiako osasun laguntza emateko egiten direnak, alde batera utzita zenbat irauten duten, baita lanaldi partzialeko kontratuak ere.

Izangai bakoitzak zentro bat aukeratu beharko du A, B eta C ataletan agertzen direnetatik, baina ez da beharrezkoa atal guztietan bat aukeratzea.

Interesdunek hasierako hautuak aldatzen ahal dituzte hamar eguneko epean, deialdiaren behin betiko emaitzak argitaratu eta biharamunetik aitzina.

Aipatu eremuetatik bakar bat ere hautatzen ez dutenek oinarri honen arabera prestatzen diren aldi baterako kontratazio zerrendetan sartzeari uko egiten diotela ulertuko da.

11.4. Hautapen prozesu honetan parte hartu eta lanpostua eskuratzen duen lehen izangaia lanpostuaz jabetzen denean hartuko du indarra aurreko ataletan xedatutakoaren arabera osatutako zerrendak.

12.-Errekurtsoak.

Deialdiaren eta bere oinarri eta egintzen kontra gora jotzeko errekurtsoa aurkezten ahalko da, Lehendakaritza, Justizia eta Barneko kontseilariari zuzendua, errekurtsoaren xedeko egintza argitaratu edo jakinarazi eta biharamunetik hasita hilabeteko epean, Nafarroako Foru Komunitateko Administrazioari buruzko abenduaren 3ko 15/2004 Foru Legearen 57.1 eta 2.c) artikuluan xedatutakoarekin bat.

Epaimahaiaren behin betiko egintzen kontra gora jotzeko errekurtsoa jartzen ahalko da, Osasunbidea-Nafarroako Osasun Zerbitzuko zuzendari kudeatzaileari zuzendua, jakinarazi edo argitaratu eta biharamunetik hasita hilabeteko epean, Nafarroako Foru Komunitateko Administrazioari buruzko abenduaren 3ko 15/2004 Foru Legearen 57. artikuluko 1 eta 3. idatz-zatiekin bat.

Iruñean, 2010eko apirilaren 27an.-Osasunbidea-Nafarroako Osasun Zerbitzuko zuzendari kudeatzailea, José Carlos Garde Celigueta.

I. ERANSKINA

Eskabidea

......................... jaunak/andreak, adin nagusikoak; Nortasun Agiri Nazionalaren zenbakia (edo horren baliokidea den nortasun-agiriarena): ..........., jaioteguna: ..........., jaioterria: ............., nazionalitatea: ................, gaurko helbidea: .............., herria: ...................., probintzia: .................., posta kodea: ................., etxeko telefonoa: ..............................., harremanetarako telefonoa: ......................., helbide elektronikoa:

Honako hau azaltzen dut:

-Nafarroako Foru Komunitateko Administrazioaren Osasunbidea-Nafarroako Osasun Zerbitzuan .............. izateko .....lanpostu ................... bidez betetzeko deialdian parte hartzeko onar nazatela eskatzen dudala, behean aipatzen den txandan (deialdia 20......(e)ko ..... Nafarroako Aldizkari Ofizialean argitaratu zen, .........(e)an):

• Txanda irekia.
• Igoera txanda.
• Desgaitasunen bat dutenentzako txanda.

-Eskabideak aurkezteko epearen azken egunean, deialdi honetako oinarrietan eskatzen diren betebehar guztiak betetzen ditudala. Betebehar horiek agiri bidez frogatuko dira, deialdian ezarririko epean eta moduan.

q Hautapen prozesurako, ondoko agirian zehazten den egokitzapena eskatzen dudala. (%33ko edo hortik goragoko desgaitasuna dutenentzat).

q Euskarazko probetara aurkeztea eskatzen dudala. (Bidezkoa denean bakarrik).

Hautapen prozesuan lanpostua eskuratzen ez badut, aldi baterako kontratazioetarako egiten diren zerrendetan egon nahi dudala:

-Kontratu luzeetarako zerrenda.

Izangai bakoitzak zein zentrotan sartu nahi duen adierazi beharko du; guztiak hautatzen ahal dira.

-Kontratu laburretarako zerrenda.

Izangai bakoitzak zentro bat aukeratu beharko du A, B eta C ataletan agertzen direnetatik, baina ez da beharrezkoa atal guztietan bat aukeratzea.

[...] Eskabide honi erantsitako orri kopurua.

Eskabide hau ontzat hartu eta aipatu deialdian onartua izatea eskatzen dut.

Iruñean, 20.......ko ............................... (a)ren .................. (e)an.

Sinadura

II. ERANSKINA

Gai zerrenda

1. gaia.-Dokumentazio klinikoa: Dokumentazio mota bakoitzaren ezaugarriak. Historia klinikoa: definizioa, egitura, motak, eginkizunak eta erabiltzaileak. Ospitaleko senda-agiriaren txostena.

2. gaia.-Artxibo klinikoa: ezaugarriak. Historia klinikoen artxibo baten helburuak. Historia klinikoen artxiboak antolatzeko ereduak; artxibo zentralizatua, artxibo deszentralizatuak eta artxibo mistoa.

3. gaia.-Historia klinikoak jasotzea: historia klinikoak hasi eta identifikatzea. Prozedurak.

4. gaia.-Historia klinikoen instalazioa: antolamendua eta sailkapena. Antolatu eta sailkatzeko sistemak.

5. gaia.-Historia klinikoen mailegua: prozedura. Mailegatzeko prozesua. Mailegua egiteko zirkuituak. Mailegatutako dokumentazioaren kontrola.

6. gaia.-Dokumentazioaren zaintza. Artxibo klinikoen kontserbazioa. Lan arloak. Altzariak. Artxibo klinikoen segurtasunerako egiturazko baldintzak. Informazio klinikoaren segurtasuna eta konfidentzialtasuna.

7. gaia.-Artxibo klinikoen kalitatea. Kalitatearen kontzeptua. Kalitatea dokumentazio klinikoaren unitatean. Artxibo klinikoen kalitate-kontrola: auditoriak, erabilera komuneko estandarrak artxibo klinikoetan, historia klinikoak artxibatu eta mailegatzeko prozesuaren kontrola.

8. gaia.-Osasunari buruzko Lege Orokorra. 10/1990 Foru Legea, azaroaren 23koa, Osasunari buruzkoa.

9. gaia.-15/1999 Lege Organikoa, abenduaren 13koa, Datu Pertsonalak Babesteari buruzkoa.

10. gaia.-Osasunbidea-Nafarroako Osasun Zerbitzuko pazienteen eskubide eta eginbeharrak, azaroaren 14ko 41/2002 Lege oinarrizkoa, pazientearen autonomia eta informazioaren eta dokumentazio klinikoaren arloan dituen eskubide eta betebeharrak arautzen dituena, eta 11/2002 Foru Legea, maitzaren 6koa, gaixoaren zenbait eskubide, hain zuzen ere biziaren gaineko aurretiazko borondateak egitekoa eta informazioa eta agiri klinikoak eskuratzekoa, arautzen dituena, eta haren aldaketak.

11. gaia.-Oinarrizko infomatikaren ezagutza. Windows XP sistema eragilea. Testu prozesadoreen (Word XP) eta kalkulu orrien (Excel XP) gaineko funtsezko ezagutza.

12. gaia.- Datu baseak: funtsezko kontzeptuak. Access XP: taulak, kontsultak, formularioak, txostena. Datu-baseen kalitatearen ebaluazioa. Estatistika deskriptiboa. Osasun arloko adierazleak.

13. gaia.-Dokumentazio medikoa eta informazioa berreskuratzeko sistemak. Dokumentu-azterketa. Dokumentu-lengoaiak medikuntzan.

14. gaia.- Ospitaleko produktuaren neurketa. Pazienteak sailkatzeko sistemak, motak eta ezugarriak.

15. gaia.-Diagnostikoaren araberako taldeak. Kontzeptua. Motak. DATen esleipena.

16. gaia.-Datuen Oinarrizko Multzo Gutxienekoa: egitura eta lantzeko prozesua. 11/2003 Foru Dekretua, urtarrilaren 13koa, osasun zentro eta establezimenduetan Datuen Oinarrizko Multzo Gutxienekoa arautu eta Nafarroako Foru Komunitatean Atenditutako Gaixotasunen Tasen Erregistroa sortzen duena.

17. gaia.-Giza anatomia eta fisiologia: aparatu eta sistema nagusien oroitzapen anatomofisiologikoa.

18. gaia.-Patologia orokorraren nozioak. Kontzeptu nagusiak: etiologia, klinika (zeinuak, sintomak, sindromea), diagnostikoa, eboluzioa (akutua, kronikoa), aurrekariak, konplikazioak, prozedura diagnostikoak eta terapeutikoak. Terminologia medikoa, aparatuen eta sistemen arabera. Patologia nagusiak, sintomak eta zeinuak, aparatu eta sistemen arabera.

19. gaia.-GNS-9 sailkapenaren kontzeptu orokorrak. Formatua. Kodeen egitura. Ohiturak. Egoki sailkatzeko prozesua.

20. gaia.-Diagnostiko nagusiaren eta bigarren mailakoen kontzeptua. Diagnostikoen sailkapena. Diagnostikoak kodetzeko arau orokorrak.

21. gaia.-Prozeduraren kontzeptua. Prozeduren sailkapena. Prozedurak kodetzeko arau orokorrak.

22. gaia.-GNS-9 sailkapenaren arabera kodetzeko arau berariazkoak. Osasun egoeran eta osasun zerbitzuen erabileran eragina duten duten faktoreen sailkapen osagarria.

23. gaia.-GNS-9 sailkapenaren arabera kodetzeko arau berariazkoak. Pozoiduren eta lesioen kanpoko zergatien sailkapen osagarria. E kodea.

24. gaia.-Giza Immunoeskasiaren Birusa GNS-9 sailkapenaren arabera kodetzeko arau berariazkoak.

25. gaia.-Neoplasiak GNS-9 sailkapenaren arabera kodetzeko arau berariazkoak.

26. gaia.- Bihotz-hodietako eta arnas eta digestio aparatuko eritasunak GNS-9 sailkapenaren arabera kodetzeko arau berariazkoak.

27. gaia.-Gluzemiaren alterazioak GNS-9 sailkapenaren arabera kodetzeko arau berariazkoak.

28. gaia.-Buru eritasunak GNS-9 sailkapenaren arabera kodetzeko arau berariazkoak.

29. gaia.-Ugaltze eta gernu aparatuko eritasunak GNS-9 sailkapenaren araberakodetzeko arau berariazkoak.

30. gaia.-Aurkako ondorioak GNS-9 sailkapenaren arabera kodetzeko arau berariazkoak.

31. gaia.-Haurdunaldia, erditzea eta puerperioa GNS-9 sailkapenaren arabera kodetzeko arau berariazkoak.

32. gaia.-Jaiotza inguruko denboraldian gertatzen diren eritasunak GNS-9 sailkapenaren arabera kodetzeko arau berariazkoak.

33. gaia.- Sintomak, zeinuak, gaizki zehaztutako prozesuak eta proba osagarrietan atzematen diren anormaltasunak GNS-9 sailkapenaren arabera kodetzeko arau berariazkoak.

34. gaia.-Lesioak eta pozoidurak GNS-9 sailkapenaren arabera kodetzeko arau berariazkoak.

35. gaia.-Ondorio berantiarrak GNS-9 sailkapenaren arabera kodetzeko arau berariazkoak.

36. gaia.-Zainketa kirurgiko eta medikoetako konplikazioak GNS-9 sailkapenaren arabera kodetzeko arau berariazkoak.

37. gaia.-GNS-9 sailkapenerako Unitate Teknikoaren buletinak.

38. gaia.- Kasuistikaren azterketa edo Case-Mix delakoa. Kontzeptua eta erabilerak.

39. gaia.-Informazio klinikoaren sistemaren kalitate kontrola: Informazio sistemaren iturri diren dokumentuen kalitate kontrola, kodetzearen kalitate kontrola, CMBD delakoaren kalitate kontrola. Jardueraren eta kodetzearen kalitatearen adierazleak.

III. ERANSKINA

1. atala. Egindako zerbitzuak. Honako hauek baloratuko dira:

1. Lortu nahi den lanpostuaren estamentuan eta espezialitatean edozein administrazio publikotako edo horien mendeko erakunde autonomoetako zentroetan egindako zerbitzuak: 1,8 puntu, urte bakoitzeko.

2. Beste estamentu eta espezialitate batzuetan edozein administrazio publikotako zentroetan egindako zerbitzuak: 1,3 puntu, urte bakoitzeko.

3. Lehiatzaileak lortu nahi duen lanpostuaren kategoria berean enpresa pribatuan, Gizarte Segurantzan alta emanik eta haren kotizazioak ordaindurik, besteren kontura egindako zerbitzuak: 0,70 puntu, urte bakoitzeko.

Azpiatal hauetako bakoitzaren puntuazioa proportzionalki kalkulatuko da urtebetetik beherako kasuetan.

Atal honen puntuazioa, gehienez ere, 17 puntukoa izanen da.

Bateraezinak dira aurreko azpiatalengatik emandako puntuazioak, aldi berekoak direnean; halakoetan, handiena bakarrik hartuko da kontuan.

Baremo honetan aipatutako zerbitzuak urriaren 3ko 464/2001 Foru Aginduaren 2. artikuluan ezarritako arauei jarraikiz zenbatuko dira.

2. atala. Prestakuntza, irakaskuntza, ikerkuntza eta hizkuntzak:

Atal honetako merezimenduak baloratzeko, zerikusia izan beharko dute lehiaketaren xedeko lanpostuarekin.

1. Erakunde publikoek edo unibertsitate zentroek antolatu edo ziurtatutako prestakuntzako ekintzetan ikasle gisa parte hartzea: 0,1 puntu, kreditu akademiko bakoitzeko edo haren baliokide den ordu kopuruko (10 ordu). Ordu kopuru zehatzik agertzen ez denean, kreditu bateko balioa emanen zaio agiriari, eta denbora ikasturte batekoa dela dioenean, 12 kreditu kontatuko dira. Gehienez ere 10 puntu, denbora zatiak hainbanatuz.

Orobat, nahiz eta erakunde antolatzailearen beharkizuna ez bete, prestakuntza ekintzak baloratuko dira baldin eta Administrazioak aginduta egin badira edo hark homologatu baditu. Horien artean espresuki sartzen dira sindikatuek "Administrazio Publikoetako Etengabeko Prestakuntzarako Akordioen" barrenean antolatuak.

2. Biltzar edo jardunaldietan txostenak edo komunikazioak aurkeztea: 0,4 puntu, nazioartekoa bada, 0,3 puntu, nazionala bada, eta 0,2 puntu soilik eskualdea edo herria hartzen badu; gehienez ere 2 puntu.

3. Administrazio edo erakunde publiko baten saria edo beka jaso duten ikerlan zientifikoak: 0,75 puntu, nazioartekoak badira; 0,5 puntu, nazionalak badira; eta 0,2 puntu, autonomia erkidegokoak badira. Gehienez ere 2 puntu.

4. Aldizkari espezializatuetan argitaratutako lanak: 0,2na puntu lehen hiru sinatzaileei, gainerakoei 0,05na puntu; 2 puntu gehienez.

5. Prestakuntzako beka edo egonaldiak: 0,1 puntu hilabeteko, puntu 1 gehienez.

6. Sektore publikoan edo unibertsitatean prestakuntza ekintzak antolatzea eta/edo horietan irakasle gisa parte hartzea: kreditu akademiko bakoitzeko edo 10 orduko, 0,2 puntu; gehienez ere 3 puntu (zatikiak proportzionalki kalkulatuko dira). Iraupenik adierazten ez duten ziurtagiriak 2 ordukotzat joko dira.

7. Frantsesez, ingelesez edo alemanez jakitea, ofizialki frogaturik, Europar Batasunean erabilera ofizialeko hizkuntzak diren aldetik: 1,6 puntu, hizkuntza bakoitzeko. Hizkuntza eskola ofizial batek emandako gaitasun agiririk edo ofizialki baliokidetzat jotako titulurik ez izatera, hizkuntza eskola ofizial batean gainditutako maila bakoitzari ezarri den gehieneko puntuazioaren bosten bat emanen zaio.

Bateragarria da 2. eta 4. azpiatalei emandako puntuazioa, lan edo ikerketa berari edo antzekoari buruzkoa denean.

Deialdiko lanpostuan aritzeko gaitasunik ematen ez duten titulu ofizialak ez dira prestakuntzako merezimendutzat hartuko.

Atal honen puntuazioa, gehienez ere, 19,8 puntukoa izanen da.

3. atala. Euskaraz jakitearen balorazioa:

1. Eremu mistoko herrietan aritzeko lanpostuetarako euskaraz jakitea merezimendu gisa baloratzen denean, gainerako merezimenduen baremazioari esleitutako puntuazio osoaren %3ko balorazioa emanen zaio euskaraz jakiteari, betiere plantilla organikoan nahitaezkotzat jo ez bada.

Lanpostu jakin batzuetan herritarrekin izaten den harremanaren arabera, Nafarroako Foru Komunitateko Administrazioko eta haren erakunde autonomoetako plantilla organikoan ezartzen ahalko da, eremu mistoko lanpostu batzuk betetzeko deialdietan, gainerako merezimenduen baremazioari esleitutako puntuazio osoaren %6ko balorazioa ematea euskaraz jakiteari.

2. EGA titulua izanez gero, edo beste titulu ofizial bat, Hizkuntzen Europako Erreferentzia Esparru Bateratuaren C1 mailaren baliokidea, aurreko atalean euskaraz jakiteari emandako gehieneko balorazioa jasoko da.

Titulu hori izan ezean, Hizkuntzen Europako Erreferentzia Esparru Bateratuaren A1 maila izanez gero, gehienez eman daitekeen puntuazioaren 1/5 jasoko da, A2 maila izanez gero 2/5, B1 izanez gero 3/5 eta B2 izanez gero 4/5. Titulu baliokideek balorazio bera izanen dute. Bestela, Nafarroako Gobernuak antolatutako ikastaroetan gainditutako urrats bakoitzak gehienez eman daitekeen puntuazioaren 1/12 jasoko du.

Euskara maila frogatzeko, Nafarroako Administrazio Publikoaren Institutuak espresuki antolatutako azterketa egiten ahalko da; bost zailtasun maila izanen dira, eta hizkuntzari ematen ahal zaion gehieneko puntuazioaren 1/5 emanen zaio maila bakoitzari.

Iragarkiaren kodea: F1008509