Iragarkia

60. ALDIZKARIA - 2010eko maiatzaren 17a

1. NAFARROAKO FORU KOMUNITATEA

1.5. ESTATUTUAK ETA LAN HITZARMEN KOLEKTIBOAK

450/2010 EBAZPENA, apirilaren 13koa, Arriskuen Prebentziorako eta Lanaren zuzendari nagusiak emana, Artaxoako "Virgen de Jerusalén zaharren egoitza" enpresaren lan hitzarmen kolektiboaren testua erregistratu, gorde eta Nafarroako Aldizkari Ofizialean argitaratzea erabakitzen duena (espediente zenbakia: 25/2010).

Departamentu honetan 2010eko apirilaren 6an sartu da ''Virgen de Jerusalén zaharren egoitza'' enpresaren lan hitzarmen kolektiboaren testua, 16 artikuluz, xedapen gehigarri batez eta eranskin batez (2008ko, 2009ko eta 2010eko ordainsarien taulak) osatua. Enpresaren ordezkariek eta langileen ordezkariak (CCOO) 2010eko martxoaren 30ean izenpetu eta onetsi dute.

Berrikuntza, Enpresa eta Enplegu Departamentua da Lan Hitzarmen Kolektiboaren testua erregistratu, gorde eta argitaratzeko eskumena duena, Estatuaren lan arloko eginkizunak Nafarroako Foru Komunitateari eskualdatzeko arauak ezartzen dituen apirilaren 11ko 937/1986 Errege Dekretuan ezarritakoaren arabera. Eginkizun haiek martxoaren 24ko 1/1995 Legegintzako Errege Dekretuaren 90. artikuluan ezarrita daude. Horiek horrela, eta kontuan hartuta Hitzarmen kolektiboen erregistro eta gordailuei buruzko maiatzaren 22ko 1040/1981 Errege Dekretuan ezarritakoa.

Adierazitakoarekin bat eta Nafarroako Foru Komunitateko Administrazioari buruzko abenduaren 3ko 15/2004 Foru Legearen 22.1 artikuluak ematen dizkidan eskudantziak erabiliz,

EBATZI DUT:

1. Artaxoako "Virgen de Jerusalén zaharren egoitza" enpresaren lan hitzarmen kolektiboa erregistratzea (kodea: 3108462), Lan Hitzarmen eta Akordio Kolektiboak Erregistratu eta Gordetzeko Bulegoan horretarako bereziki prestaturik dagoen liburuan, eta bertako administrazio unitatean testua eta dokumentazioa gordetzea.

2. Ebazpen honen berri ematea Negoziazio Batzordeari eta adieraztea ebazpenak ez duela administrazio bidea amaitzen eta honen aurka gora jotzeko errekurtsoa jartzen ahal dela, Berrikuntza, Enpresa eta Enpleguko kontseilariari zuzendua, jakinarazi eta biharamunetik hilabeteko epean.

3. Ebazpen hau Nafarroako Aldizkari Ofizialean argitaratzea, orok jakin dezan.

Iruñean, 2010eko apirilaren 13an.-Arriskuen Prebentziorako eta Lanaren zuzendari nagusia, Imelda Lorea Echavarren.

ARTAXOAKO ''VIRGEN DE JERUSALÉN ZAHARREN EGOITZA'' ENPRESAREN LAN HITZARMEN KOLEKTIBOA

Artaxoako "Virgen de Jerusalén zaharren egoitza"ko langileen ordezkarien eta zuzendaritzaren arteko hitzarmena

1. artikulua. Aplikazio esparrua.

Hitzarmen honek, enpresaren legezko ordezkariak eta langileen legezko ordezkaritzak sinaturik, "Virgen de Jerusalén zaharren egoitza" enpresa eta bertan ari diren langile guztiak hartzen ditu bere baitan.

2. artikulua. Indarraldia eta iraupena.

Hitzarmenak lau urteko indarraldia izanen du: 2008ko urtarrilaren 1etik 2011ko abenduaren 31ra arte. Epe hori bukatzen denean arauen indarra luzatu eginen da, hitzarmen berriren bat hartu arte.

Hitzarmen honen indarraldia bukatutakoan, amaiera iragarri beharrik izan gabe, edozein aldek eskatzen ahalko du berrikustea.

3. artikulua. ''Ad personam'' bermea -baldintza hobea-.

Baldintzei dagokienez, ordainketen eta urteko gehieneko lanaldiaren arloan plantillako langileek banaka zein taldeka dituzten onuragarrienak mantenduko dira.

Hitzarmen honek indarra hartzean urtean hitzarmenean ezartzen dena baino lansari handiagoa kobratzen duten langileei hitzarmen honetan onetsiriko ordainsarien taulak aplikatuko zaizkie. Ordainsarien arteko aldea bermearen osagarri pertsonal gisa agertuko da nominan. Ezin izanen da xurgatu, ezta ordaindu eta birbaloratu ere. Osagarri horren zenbatekoa zehazteko, oraingo urteko ordainsaritik hitzarmen honetan ezarririko urteko ordainsaria kenduko da. Hortik ateratzen den kopurua, hamabiz zatitua, izanen da norberaren osagarriaren zenbatekoa, hileko hamabi soldatatan kobratuko dena.

4. artikulua. Egutegia.

Urte bakoitzeko lehenbiziko hilean, enpresak txandak eta ordutegiak biltzen dituen lan egutegia eginen du, hiru hilean behin berrikusten ahalko dena. Hori guztia eginen da langileen ordezkariarekin negoziazioa gauzatu ondoren, eta kopia bat emanen zaie langileen ordezkariei astebete lehenago, iragarki oholean erakuts dadin.

5. artikulua. Lanaldia eta lan ordutegia.

1. 2008rako 1.792 benetako orduko urteko gehieneko lanaldia ezarri da; 2009rako eta 2010erako, berriz, urteko gehieneko lanaldia 1.785 ordukoa izanen da eta 1.778 ordukoa 2011rako.

Ahal den neurrian, enpresak txanda aldatzeko aukera emanen die langileei, odol bidezko lehen mailako ahaideak diren adingabe edo mendekoekin batera joateko medikuaren kontsultara. Ondorio horietarako, kontuan hartuko dira enpresari jakinarazten zaizkion langileen arteko akordioak.

Eguneko lanaldi jarraitua 6 ordukoa baino luzeagoa bada, 15 minutuko atsedenaldia hartuko da, ondorio guztietarako benetan egindako lan denboratzat joko dena.

2. Hitzarmen honek indarra duen bitartean, hauxe izanen da lan ordutegia:

Zerbitzu anitzetako zaharren zaindarien kategoria duten langileentzako ordutegia honako hau izanen da:

-Goizeko txanda: 7:45etik 15:05era.

-Arratsaldeko txanda: 14:55etik 22:15era.

-Gaueko txanda: 22:10etik 7:50era.

Laneko txandak gainjartzen direnean, langileak laneko eguneko partea elkarri jakinaraztera behartuta egonen dira, gertakari guztiak adierazita.

Gainerako langileen ordutegia hitzarmen honek indarra hartzean enpresarekin itundu dutena izanen da.

"Mendekotasuna duten Pertsonak Zaintzeko eta Autonomia Pertsonalaren Sustapena Garatzeko Zerbitzuetako V. Esparru Hitzarmena"k ezarri bezala, arratsaldeko txandako langileek gaueko ordutegian egin behar dituzten 15 minutuak gaueko lantzat joko dira eta gaueko ordu bati dagokion prezioarekin ordainduko dira. Urtean horregatik sortzen diren zenbatekoak abenduko nominarekin edo, abenduaren aurretik amaitzen diren kontratuei dagokienez, saldoaren likidazioarekin eta kitapenarekin batera ordainduko dira.

3. Enpresako itun honek indarra hartzen duenean, gaueko txanda finkoa sortuko da, artikulu honen 2. puntuan zehaztu den ordutegia eginen duena. Gainerako langileek goizeko eta arratsaldeko txandak eginen dituzte, txandaka.

6. artikulua. Asteko atsedenaldia.

Langileek eskubidea izanen dute astean egun eta erdiko (36 ordu) atsedenaldi jarraitua izateko, gutxienez.

Hilabete bakoitzeko asteburuen %50ean, gutxienez, atsedenaldi hori asteburu osokoa (larunbat eta igande osoak) izan beharko da, lanaldiaren %100eko kontratua duten langileentzat.

Lanaldi partzialeko kontratua duten langileentzat atsedenaldi hori asteburu osokoa (larunbat eta igande osoak) izan beharko da hilabete bakoitzeko hiru asteburuko batean, gutxienez.

7. artikulua. Oporrak.

Urteko oporraldi ordaindua hogeita hamar egun naturalekoa izanen da. Benetako lan urtea bete gabe dagoen kasuetan, langileek zati proportzionala hartzeko eskubidea izanen dute.

Oporraldia hamabost eguneko bi alditan banatuko da eta ezin izanen da aldi gehiagotan zatitu, enpresaren eta langileen arteko adostasunik egon ezean. Dena den, hurrengo irizpideak errespetatuko dira beti:

a. 15 opor eguneko aldia ezarriko da ekain, uztail, abuztu eta irailean.

b. Udako oporretarako txanden araubidea langileen hilekako txandaketa zorrotza izanen da, enpresan jada indarra duen txandaketari jarraituko zaiola. Txanda horiek lan egutegiarekin bat etorriz eginen dira, zerbitzuaren prestazioen arabera.

c. Gainerako opor egunak urteko gainerako hiletan hartuko dira langileek hautatzen duten 15 eguneko beste aldi batean, zerbitzua beteko dela bermatuta beti. Langileen legezko ordezkariek hautatzen den oporraldia jakinarazi beharko diote enpresari, behin-behineko urteko lan egutegia iragarki oholean argitaratu eta 15 egun igaro ondoren. Txandaketa dela eta, udako oporraldia ekaineko lehenbiziko hamabostaldian edo iraileko bigarren hamabostaldian esleituta duten langileek lehentasuna izanen dute oporren beste txanda hautatzeko orduan.

Oporraldiaren edo jaiegun ordaingarrien lehenbiziko eguna ezin izanen da asteko atsedenaldiko egunik izan. Gauzak horrela, hori gertatzen denean ulertuko da oporrak asteko atsedenaldiaren hurrengo egunean hasten direla. Oporren azken eguna egun librea bada, hori errespetatu, eta hurrengo egunean hasiko da lanean langilea.

d. Oporren egutegia urte bakoitzeko lehenbiziko hiruhilekoa amaitu baino lehen eginen da eta, nolanahi ere, oporraldia hasi baino bi hilabete lehenago, gutxienez.

e. Oporren txandan aldaketaren bat egin behar bada, langileak ados jarrita beti, enpresari horren berri eman beharko zaio, idatziz, apirilaren 30erako.

Oporren txandakako sistema aldatzen ahalko da langileen legezko ordezkariak eta enpresa ados badaude, funtzionamenduan arazoak antzematen badira.

8. artikulua. Ordainsariak.

8.1. Ordainsarien egitura.

Hona hemen ordainsarien egitura:

a. Oinarrizko lansaria: langilearen ordainsariaren zati bat da, denbora-unitateko finkatzen dena, langilearen taldearen eta lanbide kategoriaren arabera, berariazko lanpostuagatik edo beste edozein inguruabarrengatik langileari dagokion ordainsaria edozein izanda ere. Oinarrizko lansaria eranskineko lansarien taulan ageri dena izanen da. Egindako lanaldiarekin proportzioan jasoko da.

b. Antzinatasun plusa: hona hemen hurrengo urteetarako ezarritako kopuruak: 2008rako, 19 euro hirurteko bakoitzeko; 2009rako, 20 euro hirurteko bakoitzeko, eta 2010erako eta 2011rako, 22 euro hirurteko bakoitzeko, hau da, enpresan lanean emandako hiru urteko tarte bakoitzerako.

c. Gaueko lanaren plusa: 22:00etatik 07:00etara bitartean lanean emandako orduek berariazko ordainsaria izanen dute, "Mendekotasuna duten Pertsonak Zaintzeko eta Autonomia Pertsonalaren Sustapena Garatzeko Zerbitzuetako V. Esparru Hitzarmena"k ezarritakoaren arabera. Osagarri hori oporren ordainsarian ere jasoko dute gaueko txanda finkoa duten langileek.

d. Igandeetako plusa: igandeko lanaldiek 11,00 euroko ordainsaria izanen dute 2008ko ekitaldian; 14,00 eurokoa 2009ko ekitaldian, 17,00 eurokoa 2010ekoan eta 19,00 eurokoa 2011koan. Zenbateko horiek igandean egindako lanaldiko ordainduko dira, benetako lanorduak kontuan hartu gabe.

Gaueko txandan lan egiten duten langileentzat igandean lan egin dutela ulertuko da, lanaldia igandean hasten bada.

e. Bermearen osagarri pertsonala, xurgatu, ordaindu eta birbaloratu ezin dena. Artaxoako "Virgen de Jerusalén zaharren egoitza"n lan egiten duten pertsona guztiek 234,25 euroko plusa kobratuko dute, xurgatu, ordaindu eta birbaloratu ezin dena.

Plus hori kontratuko lanaldiaren portzentajearen proportzioan kobratuko da.

Plusa kobratu eginen da, plantillako langileen kontratu modalitatea edozein dela ere.

8.2. Aparteko eskersariak:

Aparteko bi eskersari ordainduko dira, sei hilean behin sortuko direnak eta oinarrizko lansariaren hileko soldata gehi antzinatasuna jasotzea dakartenak. Lehenbizikoa ekainaren 15ean eta bigarrena abenduaren 15ean ordainduko dira. Eskersari horiek ez dira inola ere ordainduko hiletan proportzionalki banatuak, sei hiletik beherako kontratuetan izan ezik edo langileen ordezkariak ados badaude.

8.3. Ordainsarien igoera.

Hitzarmen honek indarra duen bitartean, lansarien taulan agertzen diren kontzeptuak urtero igoko dira hurrengo portzentajeen arabera, antzinatasuneko osagarria, igande eta jaiegunetako osagarria eta prestasun plusa izan ezik:

-2008ko ekitaldirako igoera honakoa izanen da: 2007ko ekitaldiari dagokion Nafarroako egiazko KPI + 1,5.

-2009ko ekitaldirako igoera honakoa izanen da: 2008ko ekitaldiari dagokion Nafarroako egiazko KPI + 1,3.

-2010eko ekitaldirako igoera honakoa izanen da: 2009ko ekitaldiari dagokion Nafarroako egiazko KPI + 2.

-2011ko ekitaldirako igoera honakoa izanen da: 2010eko ekitaldiari dagokion Nafarroako egiazko KPI + 2.

Nafarroako egiazko KPI gehi itunduriko portzentaje igoera batzearen ondoriozko emaitza %2tik beherakoa bada, lansarien %2ko igoera bermatuko da, gutxienez.

8.5. Larrialdietako edo behar gorriko ordainsaria.

-Langile batek aurreikusten badu ezin izanen dela joan bere lanpostura, zuzendaritzari jakinarazi beharko dio ahalik eta lasterren.

-Gaueko txandan eta salbuespen moduan zerbitzua bete gabe gera daitekeela aurreikusten baldin bada, enpresak eskatzen ahalko dio/die langile bati/batzuei, atseden egunean lanera joateko norberaren borondatez. Lanegun hori honako formuletako baten bidez ordainduko da:

1. Bi atseden egun ematea, benetan lan egindako egun gisa zenbatuko direnak.

2. 200 euro gordineko ordainsaria jasotzea.

-Urteko lehenbiziko 2 hiletan aipatutako ordainsaria kobratzeko eskubidea sortzen ahal duten egunak eta txandak ezarriko dira langileen legezko ordezkarien eta enpresako zuzendaritzaren artean.

-Egun horietaz gain, enpresak ordainsari berezia kobratzeko eskubidea sortzen ahal duten egun eta txanda gehiago ezartzen ahalko ditu bere kabuz, eta ondoren egoeraren berri eman beharko die langileen legezko ordezkariei. Kasu horietan ere bi formula hauetako bat hautatu beharko da ordaina jasotzeko:

1. Atseden egun bat ematea, benetan lan egindako egun gisa zenbatuko dena.

2. 100 euro gordineko ordainsaria jasotzea.

-Larrialdietako egoeretan zerbitzua betetzeko enpresak deitzea nahi duten pertsonen zerrenda eginen da. Deitzeko ordena txandakakoa izanen da eta deiari erantzuten ez dion edo zuzendaritzaren eskaerari erantzuten ez dion pertsona zerrendaren amaieran geratuko da.

9. artikulua. Jaiegunetako lanaren ordaina:

Urte natural bakoitzeko jaiegun ordaingarri eta berreskuraezinetan langileek lan egiten badute, hori ordaintzeko modua aukeratzen ahalko dute. Dena den, langileak urtearen hasieran adierazi beharko du zein formula nahiago duen eta itzultzeko egunak finkatuko ditu urteko lan egutegian:

a) Urteko oporrekin batera pilatzea.

b) Atsedenaldi jarraitu gisa erabiltzea beste aldi batean; halakoetan 5 egun konputatuko dira hartu ez diren 4 eguneko. Lanaldiaren urteko konputua egiteko, libratzeko bosgarren eguna egiazki lan egindako eguntzat hartuko da.

c) Likidazioaren/kitapenaren ondorioetarako, atsedenaren bidez ordaindu ezin izan badira, honela ordainduko dira:

Enpresak, urte naturala bukatzen denean, ordaindu eginen ditu lan egin arren ezarritako moduren batean konpentsatu ez diren jaiegunak, urte natural horri dagozkionak.

Eguberri eta Urtezahar egunak jaiegun berezitzat joko dira, egun bereziak baitira. Abenduaren 24tik 25era bitarteko gaueko txandaren hasieratik 25eko arratsaldeko txanda bukatu arte aritzen diren langileek, bai eta abenduaren 31tik urtarrilaren 1era bitarteko gaueko txandaren hasieratik urtarrilaren 1eko arratsaldeko txanda bukatu arte aritzen direnek ere, bi atseden eguneko konpentsazioa izanen dute, tarte horretan egindakoen parekoak (bat jaieguna izateagatik eta bestea egun berezia dela eta); bigarren egun librea egiazki lan egindako egun gisa hartuko da.

Atsedenaren bidezko konpentsazioa ematen ez bazaie, likidazioari, kitapenari edo urte bukaerari begira formula honen araberako ordaina jasoko dute:

10. artikulua. Aldi baterako ezintasuneko egoerak.

a) Laneko istripuaren edo lanbide eritasunaren ondoriozko aldi baterako ezintasun kasuetan, enpresak hobekuntza ekonomiko gisa ordainduko du langileak aldi baterako ezintasunarengatik hartzen duen sorospenarekiko aldea, (aldi baterako ezintasuna gertatu aurretik osorik lan egindako hileko) egiazko lansariaren %100 bermatuz, baja aldi guztian.

b) Eritasun arruntaren edo lanetik kanpoko istripuaren ondoriozko aldi baterako ezintasun kasuetan, enpresak gizarte segurantzaren prestazioak osatuko ditu, bajaren lehen egunetik hasita, oinarri arautzailearen % 75era arte.

11. artikulua. Lizentziak.

1. Lizentzia ordainduak.

Langileak, aurretik abisatu eta justifikatuta, baimena du lanera ez agertzeko, ordaindua izateko eskubidearekin, arrazoi hauetako bat dela medio eta honenbeste denborarako:

a. Ezkontzen bada, 15 egun natural.

b. Norberak hartzeko 4 egun urtean. Egun horiek benetako lanaldi gisa zenbatuko dira.

Urtearen hasieran langileak egun horietako hiru (bat hiruhileko bakoitzeko) finkatu beharko ditu urteko lan egutegian. Enpresak bakarrik ukatzen ahalko ditu egun horiek, antolaketa arrazoi justifikatuak direla-eta. Kasu horretan, egun horietarako data berria ezarri beharko da, enpresa eta langilea ados egonda.

Laugarren egun hori hartu ahal izateko, hartu baino zazpi egun lehenago, gutxienez, eskatu beharko da (premia larriko kasuetan izan ezik; izan ere, horietan hiru egun lehenago eskatu beharko da, gutxienez). Enpresak hori hartzeko baimena emanen du, antolaketa arrazoi justifikatuak direla-eta egun horretan hartzeko ezintasuna egon ezean. Edonola ere, langileari jakinaraziko dio 48 ordu lehenago, gutxienez (premia larriko kasuetan izan ezik).

Nolanahi ere, langileak 4 egun horiek hartuko ditu hurrengo urteko urtarrilaren 15a baino lehen, justifikatu behar izan gabe.

4 egun horiek hartu ahal izateko, aurretik hiru hilabeteko aldian lan egin beharko da, norberak hartzeko egun bakoitzeko.

c. Hiru egun natural, jaiotzagatik edo adopzioagatik edo ezkontidearen/izatezko bikotekidearen edo bigarren mailara arteko odol edo ezkontza bidezko ahaideen heriotzagatik, istripuagatik, eritasun larriagatik edo ospitaleratzeagatik. Ondorio horretarako langilea Nafarroako Foru Komunitatetik kanpora joan behar bada, 50 km-tik beherako distantziara doanean izan ezik, edo benetan justifikatutako arrazoia badago, epea bi egun gehiagotan luzatzen ahalko da. Egun gehiago ere hartzen ahalko dira, ordaindu beharreko jaiegunak eta/edo opor egunak deskontatuz, langileak aldez aurretik hala eskatzen badu.

Alde horretatik, gertaera eragilea Espainiatik kanpo eta 1.000 kilometrotik gorako distantzian gertatzen bada eta ukitutakoa ezkontidea, izatezko bikotekidea edo lehen mailako odol edo ezkontza bidezko ahaidea bada, langileak aldez aurretik eskatuz gero 5 eguneko baimena beste bost egunean luzatzen ahalko da, nahiz eta azken horiek ordainduko ez diren. Kasu horretan langileak modu fede-emailean frogatu beharko du egindako bidaia.

d. Bi egun natural, ezkontidearen/izatezko bikotekidearen edo bigarren mailara arteko odol edo ezkontza bidezko ahaideen kirurgia anbulatorioagatik, ospitaleratu beharra izan gabe etxean atseden hartzea agintzen bada. Ondorio horretarako langilea Nafarroako Foru Komunitatetik kanpora joan behar bada, 50 km-tik beherako distantziara doanean izan ezik, edo benetan justifikatutako arrazoia badago, epea bi egun gehiagotan luzatzen ahalko da. Egun gehiago ere hartzen ahalko dira, ordaindu beharreko jaiegunak eta/edo opor egunak deskontatuz, langileak aldez aurretik hala eskatzen badu.

e. Egun bat, ohiko bizilekua aldatzeagatik.

f. Behar-beharrezkoa den denbora, publikoa edo pribatua den eginbehar saihestezina betetzeko.

Azterketetara joateko behar diren baimenak, langileak titulu ofizial akademikoak edo profesionalak lortzeko ikasketak egiten baditu. Kontuan izan behar da azterketa baztertzaileetara joateko ematen diren baimenak bakarrik izanen direla ordainduak. Langileak azterketa egunean hartuko du baimen hori, eguneko edo arratsaldeko lanaldia badu. Gauez lan egiten badu, azterketa egunaren aurreko gauean hartuko du baimena.

g. Gertaera eragilearen eguna, gurasoen, anai-arreben eta seme-alaben ezkontzagatik.

h. Behar-beharrezkoa den denbora, langilea medikuaren kontsultara joateko.

2. Lizentzia ordaindugabeak.

Norberaren aferetarako lizentzia: urtean hiru hilabete, batera edo zatika (inoiz ere ez hilabetetik beherakoa) zenbatuko dena. Ezin izanen da hartu ekainean, uztailean, abuztuan edo irailean eta 20 egun lehenago eskatuko da, premia larriko kasuetan izan ezik. Enpresak eta langileek aldi hori luzatzea ituntzen ahalko dute, baina ez da inoiz sei hilabetetik gorakoa izanen. Zerbitzuaren inguruabarrek horretarako aukera ematen badute, baimen mota hori lehen aipatu den udaldian erabiltzen ahalko da.

Enpresari aldez aurretik jakinarazi, justifikatu eta adostu ondoren, langileek zazpi egun ordaindugabe, gehienez, hartzen ahalko dituzte urtero, lizentzia ordainduei buruzko atalean adierazten ez diren kontu pertsonalak direla-eta.

12. artikulua. Laneko arropa.

Enpresek bi uniforme, gutxienez, eman behar dituzte, honako hauek barne hartzen dituztenak: berokia (uniformea jantzita kanpora joatera behartuta badaude), beharrezko oinetako eta eskularru homologatuak, erabili eta botatzeko materialak eta babes pertsonaleko derrigorrezko bitartekoak, lan egiteko orduan langileentzat egokiak direnak. Langileek, lanean ari direnean, enpresak emandako arropak erabili behar dituzte, eta zaindu egin behar dituzte.

Laneko arropa berria emandakoan, langileak erabilitako arropak itzuliko ditu.

13. artikulua. Lanbide kategoriak eta funtzioak.

1. Sukaldaria.

Eginkizunak:

a) Departamentuko arduradun gisa, sukaldeko langile guztiak antolatu, banatu eta koordinatuko ditu. Halaber, janariak prestatu eta onduko ditu. Menuak eta jan-neurriak proposatuko dizkie zentroko zuzendaritzari, onesteko, eta medikuntza departamentuari, gainbegiratzeko.

b) Egunero zehazten diren zerbitzu arruntak, bereziak eta apartekoak gainbegiratzea.

c) Sukaldeko langileei otordu prestatuak ematea orgetan muntatzeko.

d) Elikagaien biltegiratzea eta kontrola zaintzea eta biltegia jaki-tokirako gaiez hornitzea; egin beharreko zerbitzuetarako behar diren gaiak aterako ditu eta haien egoera begiratuko du.

e) Janariak egoki administratzen saiatzea, etekin hobea lortzeko.

f) Egoitzetako administratzaileekin batera izakinen zenbaketak egitea, ikusten dituen gabeziak zuzendaritzari jakinaraztea, eta bere karguko langileek beren lanbide zereginak bete ditzaten begiratzea. Langileen garbitasuna eta uniformeen txukuntasuna ere zaintzea.

g) Departamentuko makinak eta tresnak funtzionamendu eta garbiketa baldintza egokietan mantentzen diren begiratzea (erretiluak, labeak, frijigailua, erauzgailuak, iragazkiak, ebakitzaileak, eltzeak, etab.).

h) Menuak proposatu behar direnean laguntza ematea.

i) Hornitzaileei egin behar zaizkien eskabideetan laguntzea, jasotako jarraibideak kontuan hartuta.

j) Baimenik ez dutenei sukaldean eta despentsan sartzen ez uztea.

k) Sukaldeko edozein gorabeheraren berri ematea, janariak zorrotz zaintzea, eta janarien sartzeak eta ateratzeak, haien pisua eta kalitatea kontrolatzea.

l) Zehaztuta ez badaude ere haren lanpostuarekin bat datozen eginkizun guztiak betetzea.

Kokagune organikoa: zuzenean zaharren egoitzako Zuzendaritzaren menpe dago.

2. Zerbitzu anitzetako zaharren zaindaria.

Egoitzako zuzendariaren edo hark izendatzen duen pertsonaren agindupean, erabiltzaileei laguntzen die beren kabuz egin ezin dituzten eguneroko jardueretan eta horiek zaintzen ditu. Gainera, erabiltzaile horiei arreta pertsonala emateko eta haien ingurunea zaintzeko lanak egiten ditu.

Erabiltzaileen prozesu patologikoak eta haien intimitateari buruzko edozein gai isilean gordeko ditu eta goragoko profesional hurrenekin koordinaturik eta haien ardurapean lan eginen du beti.

Eginkizunak:

a) Erabiltzaileei garbitzen laguntzea eta zaintzea eta behar fisiologikoetan eta itxuran laguntzea, baldin eta beren kabuz ezin badute egin.

b) Egoitzetako eginkizun planaren arabera, erabiltzaileen gauzak garbitu eta mantentzeko lanak egitea, oheak egitea, logelak mantentzeko lanetan laguntzea, arropa jaso eta ikuztegira eramatea, eta erabiltzaileen arropaz arduratzea.

c) Jaten ematea beren kabuz jateko gauza ez diren erabiltzaileei. Gainera, janariak hartu eta erabiltzaileei banatzeko eta jasotzeko ardura izanen du.

d) Ohean daudenen jarrera-aldaketak egitea, hori behar dutenak jaikiaraziz eta oheratuz, eta bere prestakuntza teknikoaren arabera eskatzen zaizkion zerbitzu osagarriak ere bai.

e) Erizaintzako langileei erabiltzaileen osasunaren inguruko gorabeheren berri ematea, dagoen protokoloa aplikatuta. Erabiltzaileengan zerbaiten zeinu edo sintomarik ikusten bada, erizaintzako arduradunei horren berri ematea.

f) Botika gelako aparatuak, materialak eta altzariak garbitu eta prestatzea.

g) Erabiltzaileak kanpora (hitzordu medikoak, txangoak, kudeaketak eta abar) joan behar direnean, haiekin batera joatea.

h) Profesionalen taldearekin lankidetzan aritzea, haien zerbitzu espezializatuen osagarri diren lan oinarrizkoak eginez, erabiltzaileen autonomia pertsonala eta gizarteratzea helburu.

i) Zuzendaritzak eta eginkizun planak emandako jarraibideei helduta, erabiltzaileen senideei arreta ematea eta horiek egoitzako bizitzan sartzen laguntzea.

j) Erabiltzaileekiko harreman edo jarduera guztietan, profesionalen arreta, hezkuntza eta heziketa lana osatzen saiatzea.

k) OLT/EUD ez badago, glukosaren proba egin, eta erabiltzaileei intsulina eta heparina larruazalpetik emateko ahalko die, medikuek edo erizainek dosiak eta tratamenduaren jarraipena egiten badituzte eta behar bezalako prestakuntza badauka.

l) Erizaintzako arduradunei laguntzea erabiltzaileei botikak eman eta sendaketak egin behar zaizkienean.

m) Erabiltzaileak lekuz aldatzean, haien gauza beharrezko guztiak prestatzea.

n) Jantokiko eta sukalondoko lanak egitea.

ñ) Eguneroko lana antolatzeko diseinatzen diren lan programak betetzea.

o) Egoitzako areto guztietan garbiketa lanak egitea.

p) Ikuztegiko lanak, lentzeriakoak, arropa armairuetakoak eta makinen erabilera eta zaintzakoak egitea, arropa eta produktuak kontu handiz erabiliz.

q) Eguneroko lana ahalik eta arreta handienaz egitea, eta lanabes zein produktuak erabiltzean arduraz jokatzea.

r) Aretoetan edo geletan jende arrotza sartzen ikusten badu edo bestelako gorabeheraren bat gertatzen bada, dagokion arduradun organikoari jakinaraztea.

s) Erabiltzaileak, langileak eta, oro har, zentroan dauden pertsona guztiak behar den begiruneaz eta gizatasunaz tratatzea.

t) Zentrotik kanpoko janariak sartzen badira, arduradunari jakinaraztea.

u) Betiere, garbi eta txukun ibiliko dira, eta uniforme egokia jantziko dute.

v) Erabiltzaileei unean-unean behar duten laguntza ematea, bere lanbide eskumenen barrenean.

w) Betiere lanbide isilpekotasuna betetzea.

x) Txanda osoan hari esleitutako telefonoa eramatea.

y) Oro har, goian zehaztutako jarduerez gain, eskatzen zaion beste edozein, bere lanbide jarduerarekin eta prestakuntza teknikoarekin bateragarria bada.

15. artikulua. Prestakuntza.

Zuzendaritzak prestakuntza ekintzak planifikatzen ahalko ditu, langileen ezagutzak eta trebetasunak hobetzeko. Prestakuntza horrek 40 orduko iraupena, gehienez, izaten ahalko du urtean; horien %50 urteko gehieneko lanalditik kenduko da eta gainerako %50 langilearen konturakoak izanen dira.

16. artikulua. Erretiro partziala.

Enpresako itun honek indarra dueino eta lege orokorrek eta Gizarte Segurantzak dirauteino, enpresak bertako langileei baimena emanen die erretiro partziala hartzeko, Gizarte Segurantzako erretiroko kotizaziopeko pentsioa kobratzeko eskubidea eskatzen diren baldintza orokorrak biltzen dituztenean. Hala ere, adinak eskatzen dena baino bost urte gutxiagokoa izan beharko du gehienez ere.

Horretarako, lanaldi partzialeko kontratu bat idatziko da, egiazko lanaldia eta lansaria murriztuko dituena. Erretiro partziala hartu duen langilearen ordez beste langile bat arituko da, legez ezarri bezala.

Lehen xedapen gehigarria

Hitzarmen honetan ezarri ez den guztiari dagokionez, "Mendekotasuna duten Pertsonak Zaintzeko eta Autonomia Pertsonalaren Sustapena Garatzeko Zerbitzuetako V. Esparru Hitzarmen"ean xedatutakoari eta aplikatzen ahal diren gainerako lege eta hitzarmen arauei jarraituko zaie.

Itun hau sinatu ondoren, hitzarmen kolektibo hau hobetzen duen autonomia mailako batek, eremu funtzional bera daukanak, indarra hartuko balu, autonomia mailako hitzarmen kolektibo hori aplikatuko litzateke.

I. ERANSKINA

Lansarien taulak

2008ko ordainsariak. Lansarien taula.

2009ko ordainsariak. Lansarien taula.

2010eko ordainsariak. Lansarien taula.

Enpresaren ordezkaria, sinadura irakurtezina.

Pedro María Egea Ortiz.

Artaxoako "Virgen de Jerusalén zaharren egoitza"ko udal patronatuko lehendakaria.

Langileen ordezkaria, sinadura irakurtezina.

María Teresa Larrea Esparza.

Artaxoako "Virgen de Jerusalén zaharren egoitza"ko langileen ordezkaria.

Artaxoan, 2010eko martxoaren 30ean.

Iragarkiaren kodea: F1006697