2. NAFARROAKO TOKI ADMINISTRAZIOA
2.2. XEDAPEN ETA IRAGARKIAK, HERRIEN ARABERA ANTOLATUAK
ERRONKARI
Ordenantzak. Behin betiko onespena
Erronkariko Udalak, 2009ko abenduaren 22an egin bilkuran, erabaki zuen hasiera batean onestea Desgaitasuna duten pertsonei aparkatzeko txartelak ematea arautzen duen ordenantza (23.a), baita aldaketa ere Ur horniduraren tasa arautzen duen ordenantzan (3.a), Udal hilerriaren erabilera eta hilobien kontzesio tasak arautzen dituen ordenantzaren I. eranskinean (14.a) eta indarra duten zenbait ordenantza fiskalen tarifen edo, bertzenaz, zerga-tasen eranskinetan, 2010eko ekitaldian aplika daitezen.
Hasierako onespenaren iragarkia urtarrilaren 22an argitaratu zen, 2010eko 10. Nafarroako Aldizkari Ofizialean, eta jendaurrean egoteko legeak aurreikusten duen epea iragan da inork erreklamaziorik, kexarik edo oharrik aurkeztu gabe. Hortaz, behin betikoz onetsirik gelditu dira, Nafarroako Toki Administrazioari buruzko Foru Legearen 325. artikuluan ezarriari jarraikiz. Hona hemen nola gelditu diren idatzirik.
Erronkarin, 2010eko apirilaren 8an.-Alkatea, Agapito Boj Garate.
3. ORDENANTZA FISKALA,
UR HORNIDURAREN TASA ARAUTZEN DUENA
2009ko 62. Nafarroako Aldizkari Ofizialean argitaratu zen, maiatzaren 20an.
21. artikulua aldatu da, eta honela utzi:
21. artikulua.
21.1.-20. artikuluaren a), b), c), g), h) eta j) ataletan tipifikaturiko arau-hausteak arintzat hartuko dira, eta artikulu beraren d), e), f) eta i) ataletakoak, berriz, arau-hauste larritzat. Hala ere, 20. artikuluaren a), b), c), g), h) eta j) ataletan aipatzen diren arau-hausteetan berreroriz gero, arau-hauste larritzat hartuko dira.
21.2.-Arau-hauste mota bakoitzari aplikatzen ahal zaizkion zehapenak Nafarroako Toki Ogasunei buruzko martxoaren 10eko 2/1995 Foru Legearen 52. artikuan aurreikusten denari lotuko zaizkio eta, kasu bakoitzean, proportzionaltasunaren printzipioaren arabera mailakatuko dira, Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen IX. tituluan legez aurreikusitako irizpideei jarraikiz.
21.3.-Bidezko diren zehapenak ezartzeko, lehenik tramitatuko da Administrazio Publikoen zehapen ahalmena erabiltzeko erregelamenduz aurreikusitako legezko prozedura.
21.4.-Arau-hauste edo zehapenei dagozkien gainerako kontuetarako, eta bereziki tributu arloko arau-hauste eta zehapenei dagokienez, Ordenantza fiskal orokorrean xedatuari jarraituko zaio, bai eta Nafarroako Toki Ogasunei buruzko martxoaren 10eko 2/1995 Foru Legean eta horrekin bat heldu diren gainerako arauetan xedatuari ere.
4. ORDENANTZA FISKALA, ESTOLDERIAREN
ETA HONDAKIN-UREN ARAZKETAREN
ZERBITZUAREN TASA ARAUTZEN DUENA
1997ko 105. Nafarroako Aldizkari Ofizialean argitaratu zen osorik, irailaren 1ean, eta haren aldaketa, berriz, 2000ko 56. Nafarroako Aldizkari Ofizialean, maiatzaren 8an. Tarifen eranskina aldatu da.
Tarifen eranskina
a) Etxebizitzak: 3,40 euro/urtea.
b) Erabilera bakarra etxebizitzarakoa ez duten finka eta lokalak: 5,00 euro/urtea.
6. ORDENANTZA FISKALA, ERRONKARIKO EREMU PUBLIKOKO ETA HERRILURRETAKO ZORU, HEGALKIN ETA ZORUPEKO APROBETXAMENDU BEREZIEN TASAK ARAUTZEN DITUENA
1997ko 105. Nafarroako Aldizkari Ofizialean argitaratu zen osorik, irailaren 1ean, eta haren aldaketa, berriz, 2000ko 56. Nafarroako Aldizkari Ofizialean, maiatzaren 8an. Tarifen eranskina aldatu da.
I. epigrafea.-Zoruko aprobetxamendu bereziak.
I.1. Mahaiak, aulkiak, mahaitxoak, metro koadro edo zatiki bakoitzeko, kioskoak: 7,00 euro/urtea.
I.2. Merkatu eta azoka tikiak, eta kalez kaleko salmenta denda-ibilgailuetan, saltoki bakoitzeko (6 metro lineal).
Elikagai, jantzi, oinetako, eskulan, liburu, numismatika eta kulturazkotzat hartzen diren edo baimentzen diren bertze gai batzuen salmenta, saltoki bakoitzeko:
-Urteko tarifa: 45,00 euro.
-Sei hilabeteko tarifa: 30,00 euro.
-Hiru hilabeteko tarifa: 18,00 euro.
-Eguneko tarifa: 6,00 euro.
I.3. Beste aprobetxamendu batzuk (besta eta ferietako etxolak eta barrakak, salmenta postuak eta ikuskizun edo dibertimendurako edozein motatako postuak) postu bakoitza (6 metro lineal):
-Urteko tarifa: 32,30 euro.
-Sei hilabeteko tarifa: 19,30 euro.
-Hiru hilabeteko tarifa: 10,95 euro.
-Eguneko tarifa: 2,20 euro.
Abuztuko bestetan, %50 handituko dira tarifak, salbu eta esleipena enkante bidez eman bada.
I.4. Herrilurrak edo jabari publikoko lurrak okupatzea material, makineria edo behin-behineko eraikuntzekin. Metro koadro edo zatiki bakoitza: 7,00 euro/urtea.
Urbanizatzen ari diren eremuetan, zenbatekoak %75 beheitituko dira.
13. ORDENANTZA, ARRAZOI SOZIALENGATIK JENDE EDO FAMILIEI OSTATU EMATEKO ZERBITZUA ARAUTZEN DUENA
1999ko 104. Nafarroako Aldizkari Ofizialean argitaratu zen osorik, abuztuaren 20an. Akats zuzenketa, 2003ko 73. Nafarroako Aldizkari Ofizialean, ekainaren 11n.
16. artikulua honela gelditu da idatzirik:
16. artikulua. Zerbitzua erabiltzeko tasa 36,76 euro izanen da hilean, 3. artikuluaren d) eta f) letretako kasuetan izan ezik, haietan tasaren zenbatekoa higiezinaren salmentako balioaren %6 adina izanen baita, urte baterako kalkulatuta.
14. ORDENANTZA, UDAL HILERRIAREN ERABILERA
ETA HILOBIEN KONTZESIOEN TASAK ARAUTZEN DITUENA
2000ko 121. Nafarroako Aldizkari Ofizialean argitaratu zen, urriaren 6an, osorik. I. eranskina (Hilobietako apaingarrien materialak eta neurriak) eta II.a (Tarifak) aldatu dira.
I. ERANSKINA
Hilobietako apaingarrien materialak eta neurriak
A) Hilobiburuan gurutzeak edo hilarriak paratzen ahalko dira, gehienez ere ondoko neurri hauetakoak:
-Garaiera: 120 cm.
-Zabalera: 60 cm.
-Lodiera: 10 cm.
B) Aipatu diren ikur eta apaingarri horien material eta koloreak, nahitaez, ondoko hauetako zenbait izanen dira:
-Tafallako harria
-"Macael" marmol zuria.
-"Hegoafrika" marmol beltza.
-"Quintana" granitoa.
-Burdinazko gurutzeak
C) Ez da inola ere baimenik emanen hilobietan hilarriak, lauzak, panteoiak edo oroitarriak paratzeko, aitzineko ataletan adierazitako neurriak baino handiagoak edo ezaugarri ezberdinak badituzte.
D) Debeku da, orobat, hilobien inguruan hesiak edo itxiturak, heskaiak edo bertzelako landareak paratzea.
E) Hilartitzak, oroigarriak, ezaugarriak eta ikurrak edozein hizkuntzatan para daitezke, eta hilerriaren izaerari begiratu beharko diote, ordenantzaren 5. artikuluan adierazitakoaren arabera. Hirugarrenendako eskubideen aurka jo dezaketen inskripzioen erantzukizuna titularrarena izanen da.
II. ERANSKINA
Ehorzketa eskubide eta ehorzketa zerbitzuen gaineko tasen tarifak
a) Tasa kontzesioengatik: 43,00 euro hilobi bakoitzagatik.
Haurrak ehorzteko hilobiak: 0,00 euro.
b) Hilerria kontserbatu, mantendu eta oro har zaintzeko zerbitzuaren tasa: 4,25 euro urtean, hilobi bakoitzagatik.
c) Ehorzteko zerbitzuari dagokion tasa, orain arte bezala, Erronkariko Cofradía de la Santa Fe elkarteak haren kideendako uneoro finkatzen dituen kuotek eta ekarpenek zehaztuko dute, erakunde horrek duelako ehorzketak egiteko ardura.
-Urteko kuota, indarra duena: 3 euro laguneko.
-Subjektu pasiboa kofradia horretako kidea ez bada, edo kidea izanagatik ere hobia bere txandan egitea bidezko ez bada, ordaindu beharreko tarifa 319,00 eurokoa izanen da.
d) Altaren kuota: 2,00 euro, bider eskatzaileak eskaera egitean duen adinaren urte bakoitza.
23. UDAL ORDENANTZA, DESGAITASUNA DUTEN PERTSONEI APARKATZEKO TXARTELAK EMATEA ARAUTZEN DUEN
1. artikulua. Xedea.
Ordenantza honen helburua da desgaitasuna dutenei aparkatzeko txartelak emateko edo berritzeko arauak ezartzea, kontuan hartuz desgaitasuna dutenen aukera berdintasuna eta haien gizarteratzea. Hori, legedi honekin bat: Europako Kontseiluak 1998ko ekainaren 4an egin zuen 98/376/CE Gomendioa eta 8/98 Jarrera Komuna (EE), 1997ko abenduaren 19koa, Kontseiluak Europako Elkartea eratzeko Itunaren 189 C artikuluan ezarritako prozedurarekin bat onetsia, desgaitasuna dutenek aparkatzeko txartel bat izan dezaten Kontseiluaren gomendio bat egiteari begira (Hamabien K., 62/24, 1998ko otsailaren 26koa); Oztopo fisiko eta zentzumenezkoei buruzko uztailaren 11ko 4/1988 Foru Legea, martxoaren 25eko 22/2003 Foru Legearen bidez aldatua; eta abenduaren 19ko 19/2001 Legearen 7.b artikulua; azken lege horrek Bide Segurtasunari eta Ibilgailu Motordunen Zirkulazioari buruzko Legearen testu artikuluduna (martxoaren 2ko 339/1990 Legegintzako Errege Dekretuaren bidez onetsia) aldatu zuen.
2. artikulua. Betebeharrak.
2.1.-Aparkatze txartela eskuratzeko eskubidea izateko, beharrezkoa da ondotik ematen diren baldintzak betetzea egoera bakoitzerako:
2.2.-Baliaezintasun iraunkorra duten gidariak:
1. Elbarriak indarra duen gidabaimena izan beharko du.
2. Mugikortasuna urritzen dion elbarritasuna izatea; xehetasun hauek frogatu beharko ditu:
a) %33ko edo gehiagoko elbarritasunak jota egotearen ziurtagiria.
b) Nafarroako Osasun Zerbitzuak emandako osasun agiria, frogatzeko ezen elbarritasunak modu larrian eragiten diola:
-Ibiltzeko, zangoetako edo gerri pelbikoko gaitz muskulu eskeletikoa dela-eta, makulua, eskumakilak, protesiak edo ortesiak erabiltzera behartuz.
-Ehun metroko tartean gelditu gabe ibiltzeko, gaitz organiko edo funtzionalek eraginda.
-Aulki gurpilduna behar izatea bere joan-etorrietarako.
-Aparkatzeko maniobrak egiteko, zango-besoetako edo gerri pelbikoko eta/edo sorbalda-gerrikoko gaitz muskulu eskeletikoa dela eta.
c) b) azpiatalak adierazten duenaren ordez, Nafarroako Mendekotasun Agentziaren txostena, ziurtatzen duena gutienez ere 7 puntukoa dela garraio kolektiboa erabiltzeko zailtasunen baremoan eskatzaileak duen puntuazioa, abenduaren 23ko 1971/1993 Errege Dekretuaren III. eranskinari jarraikiz.
2.3.-Elbarritasun iraunkorra dutenen zaintzaileak edo haiekin bizi diren ahaideak.
1. Zaintzaileak edo ahaide bizikideak indarra duen gidabaimena eduki beharko du.
2. Eskatzailearen dokumentazioa, elbarriarekin duen familia lotura frogatzen duena, edo hura zaintzen duela erakusten duena.
3. Zaintzen duten ahaideak mugikortasuna urritzen dion elbarritasuna izatea; hori dela eta, honako hauek egiaztatu beharko dira:
a) %33ko edo gehiagoko elbarritasunak jota egotearen ziurtagiria.
b) Nafarroako Osasun Zerbitzuak emandako osasun agiria, frogatzeko ezen elbarritasunak modu larrian eragiten diola:
-Ibiltzeko, zangoetako edo gerri pelbikoko gaitz muskulu eskeletikoa dela-eta, makulua, eskumakilak, protesiak edo ortesiak erabiltzera behartuz.
-Ehun metroko tartean gelditu gabe ibiltzeko, gaitz organiko edo funtzionalek eraginda.
-Aulki gurpilduna behar izatea bere joan-etorrietarako.
-Aparkatzeko maniobrak egiteko, zango-besoetako edo gerri pelbikoko eta/edo sorbalda-gerrikoko gaitz muskulu eskeletikoa dela eta.
c) b) azpitalak adierazten duenaren ordez, Nafarroako Mendekotasun Agentziaren txostena, ziurtatzen duena gutienez ere 7 puntukoa dela garraio kolektiboa erabiltzeko zailtasunen baremoan eskatzaileak duen puntuazioa, abenduaren 23ko 1971/1993 Errege Dekretuaren III. eranskinari jarraikiz.
3. artikulua. Eskaera egiteko prozedura.
Txartela Udalaren bulegoetan eskatuko da, eta eskabidearekin batera honako hauek aurkeztuko dira:
-Minusbaliatuaren karnet neurriko argazki bat, kolorezkoa.
-Minusbaliotasunaren ziurtagiriaren fotokopia konpultsatua.
-Osasun ziurtagiriaren edo Nafarroako Mendekotasun Agentziaren fotokopia konpultsatua, biak aipatu baitira 2. artikuluan.
-Gidabaimen eguneratuaren fotokopia konpultsatua.
-Ibilgailuaren zirkulatzeko baimenaren fotokopia konpultsatua.
-NANaren fotokopia konpultsatua.
-Herrian erroldaturik dagoelako ziurtagiria. Eskaera familiako batek edo zaintzaile batek egiten duenean, elbarriaren eta eskatzailearen arteko loturari buruzko datuak sartuko dira.
4. artikulua. Txartelaren erabilera.
4.1.-Txartela ibilgailuaren aitzineko partean paratuko da, txartelaren aurrealdea kanpotik argiro ikusten dela.
4.2.-Indarraldia bi urtekoa izanen da txartela ematen denetik eta hura burututa ez du baliorik izanen, eta hartu zen tokian itzuli beharko da. Han, bidezko bada, berritu eginen da.
4.3.-Txartela duen ibilgailua aparkatzen ahalko da:
a) Ordutegi mugarik gabe, desgaitasuna dutenendako erreserbatuta eta seinalatuta dauden lekuetan.
b) Denbora tarte mugatu batean, bai zamalanetarako erreserbatuta dauden lekuetan (seinale bidez aparkatzeko debekua adierazi denetan) bai bertzelakoetan, udaltzainek espresuki baimena emanez gero.
4.4.-Ondoko kasuetan, ezin izanen da inola ere ibilgailua aparkatu baimen honen babespean:
a) Txartelaren titularra eramaten ez duenean.
b) Oinezkoen pasabideetan.
c) Espaloiaren gainean.
d) Orokorrean, ibilgailuen nahiz oinezkoen joan-etorria larriki trabatzen den tokietan.
5. artikulua. Arau-hausteak eta zehapenak.
5.1.-Arau-hauste administratiboak dira:
a) Txartela lortzeko aurkezten diren datuak faltsutzea eta txartela lortzea eragotziko luketenak gordetzea.
b) Txartelak kontzesio administratiborik gabe erabiltzea.
c) Bertze baten txartela erabiltzea.
5.2.-Faltsutzea egin dutenak eta txartela eskatzen dutenak izanen dira arau-haustearen erantzuleak.
5.3.-a), b), c) ataletan tipifikaturiko arau-hausteak larriak izanen dira.
5.4.-Arau-hauste mota bakoitzari aplikatzen ahal zaizkion zehapenak Nafarroako Toki Ogasunei buruzko martxoaren 10eko 2/1995 Foru Legearen 52. artikuan aurreikusten denari lotuko zaizkio eta, kasu bakoitzean, proportzionaltasunaren printzipioaren arabera mailakatuko dira, Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/199 Legearen IX. tituluan legez aurreikusitako irizpideei jarraikiz.
5.5.-Bidezko diren zehapenak ezartzeko, lehenik tramitatuko da Administrazio Publikoen zehapen ahalmena erabiltzeko erregelamenduz aurreikusitako legezko prozedura.
XEDAPEN IRAGANKOR BAKARRA
Lehenago emandako txartelen edukitzaileek urtebete izanen dute ordenantza honetan xedatuarekin bat etorriz eman zaizkiela frogatzeko. Udalak, aitzinetik, jakinarazpena eginen die, hartan aurreikusitako dokumentazioa aurkez dezaten; Udalak kontzesioa kentzen ahalko du, aipatu den hori betetzen ez badute edo ezarritako irizpideei jarraikiz txartela ematea bidezkoa ez bada.
AZKEN XEDAPEN BAKARRA
Ordenantza honek indarra hartuko du, eta ondorio juridiko osoak sortuko, bere testua oso-osorik Nafarroako Aldizkari Ofizialean argitaratutakoan eta Estatuko edo Foru Komunitateko Administrazioek toki entitateen egintza edo erabakiak indargabetzeko duten eskumena erabiltzeko epea iragandakoan.
Iragarkiaren kodea: L1007076
