Iragarkia

60. ALDIZKARIA - 2010eko maiatzaren 17a

1. NAFARROAKO FORU KOMUNITATEA

1.5. ESTATUTUAK ETA LAN HITZARMEN KOLEKTIBOAK

406/2010 EBAZPENA, martxoaren 30ekoa, Arriskuen Prebentziorako eta Lanaren zuzendari nagusiak emana, Iruñeko "ANFAS" enpresaren lan hitzarmen kolektiboa erregistratu eta Nafarroako Aldizkari Ofizialean argitaratzea erabakitzen duena (espediente zenbakia: 23/2010).

Departamentu honetan 2010eko martxoaren 23an sartu da ANFAS enpresaren lan hitzarmen kolektiboaren testua, 29 artikuluz, 2 xedapen gehigarriz, 2 azken xedapenez eta bi eranskinez (2009rako eta 2010erako lansarien taula) osatua, enpresaren ordezkariek eta enpresa batzordeak (UGT) 2010eko martxoaren 17an izenpetu eta onetsia.

Estatuaren lan arloko eginkizunak Nafarroako Foru Komunitateari eskualdatzeko apirilaren 11ko 937/1986 Errege Dekretuan ezarritakoari jarraikiz, Berrikuntza, Enpresa eta Enplegu Departamentuak du lan hitzarmen kolektiboak erregistratu, gorde eta argitaratzeko eskumena. Eginkizun horiek martxoaren 24ko 1/1995 Legegintzako Errege Dekretuaren 90. artikuluan ezarrita daude. Horiek horrela, kontuan hartu da Lan hitzarmen kolektiboen erregistro eta gordailuei buruzko maiatzaren 22ko 1040/1981 Errege Dekretuan ezarritakoa.

Adierazitakoarekin bat eta Nafarroako Foru Komunitateko Administrazioari buruzko abenduaren 3ko 15/2004 Foru Legearen 22.1 artikuluak ematen dizkidan eskudantziak erabiliz,

EBATZI DUT:

1. Iruñeko "ANFAS" enpresaren lan hitzarmen kolektiboa (kodea: 3100602) erregistratzea Lan Hitzarmen eta Akordio Kolektiboak Erregistratu eta Gordetzeko Bulegoan horretarako bereziki prestaturik dagoen liburuan, eta bertako administrazio unitatean testua eta dokumentazioa gordetzea.

2. Ebazpen hau jakinaraztea Negoziazio Batzordeari eta adieraztea ebazpenak ez duela administrazio bidea amaitzen eta honen aurka gora jotzeko errekurtsoa jartzen ahal dela, Berrikuntza, Enpresa eta Enpleguko kontseilariari zuzendua, jakinarazi eta biharamunetik hilabeteko epean.

3. Ebazpen hau Nafarroako Aldizkari Ofizialean argitaratzea, orok jakin dezan.

Iruñean, 2010eko martxoaren 30ean.-Arriskuen Prebentziorako eta Lanaren zuzendari nagusia, Imelda Lorea Echavarren.

ANFAS (ADIMENEKO DESGAITASUNA DUTEN PERTSONEN ALDEKO NAFARROAKO ELKARTEA) ENPRESAREN LAN HITZARMEN KOLEKTIBOA 2009-2011 URTEETARAKO

1.-Aplikazio eremua.

1. artikulua. Lurralde eremua:

Hitzarmen kolektibo hau ANFAS enpresak gaur egun Nafarroan dituen edo hitzarmenaren indarraldian instalatzen dituen bulego eta zerbitzu guztietan aplikatuko da.

2. artikulua. Iraunaldia:

1. Indarraldia. Hitzarmenak hiru urteko indarraldia du (2009, 2010, 2011). Hitzarmen honek, ondorio guztietarako, legezko alderdiek sinatzen duten egunean hartuko du indarra, salbu eta artikulu batzuen kasuan, non berariaz adierazten baita haien indarraldiaren hasiera 2009ko urtarrilaren 1era atzeratuko dela.

2. Hitzarmenaren luzapena, amaiera iragartzea eta berrikuspena: Hitzarmenaren amaiera iragarri da sinatzen den une beretik.

Salbuespen gisa, hitzarmenaren klausuletakoren bat edo beste berrikusten ahal da, horretarako arrazoirik baldin badago eta sinatu duten bi alderdiak ados badaude.

3. artikulua. Langile eremua:

Hitzarmen kolektibo honek eragina izanen du langile guztiengan, direla finkoak, direla bitartekoak, behin-behinekoak, tituludunak nahiz gabeak, eta, oro har, Langileen Estatutuan eta harekin bat datozen legeetan ezarritako edozein motatakoak.

II.-Lan baldintzak (orokorrak).

4. artikulua. Aldi baterako ezintasuna.

Enpresak langilearen soldata errealaren %100era arte osatuko du, lehenbiziko egunetik hasita, aldi baterako ezintasuna gertatzen denean, dela laneko zein lanetik kanpoko istripuaren ondorioz, dela laneko eritasunaren nahiz eritasun arruntaren ondorioz, dela haurdunaldiko arriskuaren ondorioz.

Artikulu honetako aurreko lerroaldean aipatzen den ehunekoa aldi baterako ezintasun egoera gertatu aurreko hilabete naturalean langileak jaso zuen oinarrizko soldataren eta antzinatasun sariaren %100i dagokio. Dena dela, aldi baterako ezintasun egoeran dagoen langilearen soldata erreala ezin izanen da egoera horretan ez balego kobratuko lukeena baino handiagoa izan.

Kontzeptu honetan aipatzen den osagarria, enpresak ordaindu beharrekoa, lanerako aldi baterako ezintasunak dirauen bitartean ordainduko da, gehienez ere 12 hilabetean, baina beste sei hilabete ere luza daiteke.

5. artikulua. Lanaldia eta oporrak.

2009. urterako lanaldia 1.692 ordukoa izanen da, benetako lan-denboran kontatua. 2010. urtean 1.684 ordura murriztuko da, eta 2011. urtean 1.672 ordura.

Langileen lan egutegia zerbitzu, zona edo programa bakoitzerako prestatzen den urteko egutegia bezalakoa izanen da, bakoitzaren egoeraren eta beharren arabera. Egutegi horiek Anfaseko zuzendaritzak onetsi beharko ditu.

Langile guztiek kasuko urteko urtarrilaren 31 baino lehen eduki beharko du bere zona, programa, zerbitzu edo departamentuko lan egutegia. Egutegi horretan zerbitzurik gabeko aste bat agertuko da Aste Sainduan eta Eguberrietan (etxebizitzetan izan ezik) eta beste aste bat eskualdeko festetan.

Ahaleginak eginen dira lan egutegi horretan norberak opor egunak nahi bezala hartzearen irizpidea eta eragimenaren irizpidea orekatzen. Hortaz, opor egunen %65, gutxienez, jarraian hartzea finkatzen da eta, orobat, egunen %85 eskualdean zerbitzurik ez dagoen egunetan hartu beharra. Eskualdean udako jarduerak egiten badira (hiriko kanpaldiak...), opor egunen %95 zerbitzurik ez dagoen egunetan eta jarduera horiek egiten diren egunetan hartuko dira. Kanpaldietan, erreferentziako plantillaren %50 egotea bermatuko da, eta langile guztiek kanpaldietako hiru txandatan lan eginen dute.

Udan, hots, ekainaren 15etik irailaren 15era bitartean (biak barne), lanaldi osoan aritzen diren kontratupeko langile guztiek 7 orduko lanaldi jarraitua egiteko eskubidea izanen dute, benetako lan-denboran neurtua, desgaitasuna duten pertsonei zuzeneko arreta ematen dieten langileak izan ezik.

Hitzarmen honen eraginpeko langile guztiek 30 egun naturaleko oporrak izanen dituzte urtean. Oporraldiaren hasierako data langileen eta enpresaren artean adostuko da, zeinak negoziatzen hasiko baitira oporraldiak hasi baino bi hilabete lehenago gutxienez, elkartearen programei kalterik ez eragiteko. Adostasunik ez bada, Nafarroako Lan Magistraturak erabakiko du.

Artikulu honetan ezarritako oporraldi osoan, zeina benetan lan egindako denboraren arabera sortzen baita, unean-unean indarra duen soldata kobratuko da, kontzeptu hauei dagokiena: oinarrizko soldata eta, hala egokitzen bada, antzinatasuna.

Urteko oporrak kasuan kasuko urte naturalean hartu behar dira. Behin opor egunak finkatutakoan, aldatzen ahalko dira, laneko istripu edo eritasuna gertatuz gero.

Oporretarako finkatutako aldian laneko istripua, laneko eritasuna, ama izateagatiko atsedenaldia edo haurdunaldiko arriskuagatiko baja gertatuz gero, langileak eskubidea izanen du oporrak beste egun batzuetan hartzeko; gertaera horien ondoriozko baja-egunak aurreikusitako opor egunekin bat egin duten adina egun, ez gehiago. Kasu horretan, enpresak zehaztuko du noiz hartu egun horiek.

Nolanahi ere, oporrak hurrengo urteko urtarrilaren 15ean iraungiko dira, salbu eta haurdunaldiaren ondoriozko aldi baterako lan ezintasun kasuetan, Langileen Estatutuaren 38. artikuluan finkatutakoaren arabera.

6. artikulua. Ordaindu gabeko baimenak.

Enpresan urtebetetik gorako antzinatasuna duten langileek aukera izanen dute, enpresari eskatu ondoren, ordaindu gabeko bi hilabete bitarteko baimena hartzeko; baimena lortzeko, langileak idatziz eskatu beharko du eta zertarako nahi duen behar bezala justifikatu; baimena erabili ahal izateko, enpresaren aldez aurreko baimen idatzia beharko da.

Enpresak baimena emanez gero, ordaindu gabeko baimenaren aldi hori enpresako antzinatasunaren ondorioetarako kontatuko da.

7. artikulua. Borondatezko eszedentziak.

Borondatezko eszedentziarako eskubidea izateko betebeharrak hauek dira: idatziz eskatzea hilabete bat lehenago, enpresan urtebetetik gorako antzinatasuna izatea eta aurreko lau urteetan borondatezko beste eszedentziarik hartu gabea izatea. Eszedentzia lau hilabetetik bost urte bitartekoa izanen da.

Eszedentzia urtebetetik gorakoa bada, ez dago lanpostua erreserbatzeko eskubiderik. Dena dela, langileak utzi duen lanpostua bezalako bat edo antzeko bat gelditzen bada hutsik, enpresara berriz itzultzeko lehentasuna izanen du.

Borondatezko eszedentzian dagoen bitartean, langilearen eskubide eta betebehar guztiak etenak geldituko dira, eta horrenbestez, ez du inolako kontzepturen lansaririk jasoko, eta eszedentziako denbora ez zaio antzintasunerako kontatuko.

Langileak lanera itzuli nahi badu, idatziz eskatu beharko du eszedentzia bukatu baino hamabost egun lehenago. Borondatezko eszedentzian egonik, lanera itzultzeko eskaera eszedentzialdia bukatu baino hamabost egun lehenago aurkezten ez duen langileari behin betiko baja emanen zaio enpresan.

8. artikulua. Baimen ordainduak.

Ondoko arrazoiengatik, langileak lanera ez agertzeko eskubidea izanen du, dagokion ordainsaria kobratuta, ahalik eta lehenen abisatzen badu eta gero behar bezala justifikatzen:

4. eta 5. zenbakietako baimenetan, beharrezkoa izanen da baimenaldia bitartean ospitaleraturik egotea.

Enpresak baimena emanez gero, baimen hau geroago har daiteke. Gozamen gerokotuaren sistema berri honen bidez, langileak ezin izanen du inola ere hartu lanegun gehiago baimena sortzen duen gertakaritik beretik aurrera eta ospitaleratzeak iraun bitartean dagozkion egun naturalak hartu izan balitu baino.

Aipatutako kasu guztietan egun naturalak kontatuko dira eta gertaera eragiletik aurrera hasiko da kontatzen.

9. artikulua. Langileen prestakuntza.

Enpresako zuzendaritzak konpromisoa hartzen du urteko lehenengo hiruhilekoan urteko prestakuntza plan bat egiteko, ikusten diren beharren araberakoa, zerbitzu guzti-guztiak bermatzeko eta langile guztien gaitasun tekniko eta profesionala hobetzeko. Ahaleginak eginen dira prestakuntza orokorreko ekintzak zuzeneko arretarik ez dagoen egunetan izan daitezen, eta hori urteko ekintza planean adostu eta jasoko da.

Prestakuntza protokolo bat prestatuko da eta bertan garbi azalduko dira prestakuntza ekintzetan parte hartzeko irizpideak.

Elkarteak antolatzen dituen ikastaroetan parte hartzeko eskaintza plantillako langile guztiei eginen zaie.

Langile bakoitzari, urtean, gutxienez 20 ordu esleituko zaizkio prestakuntzarako. Gai hau nolakoa den ikusita, erabaki da puntu honetan malgu jokatzea eta batzorde misto baten esku uztea jarraipena egitea.

Prestakuntza orduak lanordutzat hartuko dira, baita joan-etorrietakoak ere. Dietak baldin badaude, hitzarmen honen 21. artikuluan erabakitakoari kasu eginen zaio.

ANFASek antolatu edo eskainitako prestakuntza ekintzetan, profesionalen prestakuntzaren arloko arduradunak RZri eta RPri eskainiko die, eta zein langilerentzat izan daitekeen egokia adieraziko du. RZk eta RPk erabakiko dute nori eskaini ikastaroa, langileen ezaugarrien, prestakuntzarako interesaren norbanakoen galdetegian erantzundakoaren, lanpostuaren ezaugarrien eta bakoitzak egindako prestakuntza orduen arabera.

Langileren batek ANFASek ez beste erakunde batek eskainitako prestakuntza ekintza batera joan nahi badu, zuzendaritzari edo haren zuzeneko arduradunari eskatuko dio baimena. Ekintzan parte hartzea egokitzat hartzen bada, orduen erdiak lanordutzat hartuko dira, eta gainerakoak, langileak jarriko ditu. Parte hartzea ez bada egokitzat hartzen, langileari jakinaraziko zaio.

10. artikulua. Lanpostu berriak, barne igoerak eta lekualdaketak.

Kasu guztietan, lanpostu hutsen bat gertatuz gero, lehenbizi, barreneko txandan betetzeko eskainiko da, eta lantoki bakoitzaren iragarki oholean iragarriko da.

Lanpostu berriak betetzeko hautapen taldeak osatuko dira -6 hilabetetik gorako lekualdaketak eta barne igoerako lanpostuak betetzeko izangaiek eskaturik-, enpresako 2 kidek eta Enpresa Batzordeko kide batek osatuak.

Langilea eskatzen den profilari egokitzen bazaio betiere, lehentasun irizpide hauek izanen dira:

1. Barne egoera edo kategoria beraren barruko lekualdaketa.

2. Lanaldi partzialeko langileak.

3. Ordezkoak eta laguntzarako langileak.

4. Kanpoko langileak.

11. artikulua. Familia laguntza.

ANFASeko langileen seme-alabek adimenaren desgaitasunen bat baldin badute, eskubidea dute dohaineko arreta izateko, langileak, enpresarekin ados jarrita, aukeratzen dituen elkartearen programetan.

12. artikulua. Erretiroak.

Enpresak indarrean den legeriaren arabera erretiro partziala eskura dezaketen langileei aukerabide hori onartuko die, eta errelebo-kontratuak egiteko konpromisoa hartzen du, beharrezkoa den kasuetan.

Kasu horietan, lana noiz eginen den eta lanaldi partzialeko ordutegi berria bi aldeek negoziatu beharko dute. Adostasunik lortzen ez bada, enpresaren esku izanen da haiek finkatzea.

13. artikulua. Lan ordutegitik kanpora lan egindako orduen konpentsazioa.

Lan ordutegitik kanpora lan egindako orduak langilearen zuzeneko arduradunarekin adostu bezala konpentsatuko dira (denboran, dirutan edo bietan). Adostasunik ez bada, batzorde paritariora bideratuko da afera.

III.-Baldintza ekonomikoak.

14. artikulua. Oinarrizko soldata.

2009. urtean hileko oinarrizko soldata 1. eranskinean adierazten da. 2008. urteko soldata bere horretan utzi da, nahiz eta negoziazioan Nafarroako KPIrentzat %2ko igoera aurreikusi zen, baina KPI erreala %1,2koa izan zen.

2010. urtean hileko oinarrizko soldata 2. eranskinean azaltzen da eta 2009. urteko oinarrizko soldatari Nafarroako 2009ko KPI erreala + %0,5 aplikatzearen ondorioa da, kategoria hauetarako: irakaskuntza espezializatuetako irakasle titularrak, aisialdiko eta hezkuntzako jardueretako teknikaria, dinamizazioko teknikaria, hezitzailea, etxebizitzako monitorea, aisialdiko jardueren monitorea, begiralea, 1. mailako administrari ofiziala, 2. mailako administrari ofiziala, admistrari ofiziala, mandataria, etxeko andrea eta kualifikatu gabeko langileak (hemendik aurrera zerbitzuetako langileak deituko zaie).

Gainerako kategoriei KPIak Nafarroan 2009. urtean izandako igoera aplikatuko zaie.

2010eko urtarrilaren 1etik aurrera psikologoaren kategoria jasotzen da.

2011. urtean ANFASeko langile guztiei KPI errealak Nafarroan 2010. urtean duen igoera gehi %0,3 aplikatuko zaie.

Enpresak konpromisoa hartzen du, etxebizitzetako zerbitzuak kontratatzeko lehiaketa publikoan parte hartzen duen unean, ANFASeko etxebizitzetako langileen soldatak finkatzeko orduan, Nafarroako Gobernuarekin ituna sinatu duten Desgaitasuna duten Pertsonei Arreta Emateko Zentro Pribatuen II. hitzarmen kolektiboaren erreferentziei jarraitzeko. 2010. urtean, etxebizitzako monitorearen eta etxeko andrearen hileko oinarrizko soldata 1.280,69 eurokoa izanen da.

15. artikulua. Asteburuko plusa aisialdiko eta autogestioko langileentzat (larunbata eta igandea).

Asteburu osoko lana egiten denean, aisialdiko eta autogestioko teknikariei honela kontatuko zaizkie egindako lanorduak:

-Larunbatetan: larunbateko 22:00ak bitarte ohiko lanalditik aparte egiten duten lanordu bakoitzeko atseden-ordu bat emanen zaie.

-Ordu horretatik aurrera eta igandean -noiznahi delarik ere- itzuli arte, lanordu bakoitzeko atseden-ordu bat emanen da, 8 ordu gehienez, eta aginte-lanpostuaren eta erantzukizun bereziaren plusa jasoko da, 70 eurokoa.

16. artikulua. Jaiegunetako osagarria.

Igande eta jaiegunetan lan egiten dutenek soldata-osagarri bat jasoko dute lan egiten duten ordu bakoitzeko, honenbestekoa:

-2010. urtea: 3,50 euro jaiegunean lan egindako ordu bakoitzeko.

-2011. urtea: 3,75 euro jaiegunean lan egindako ordu bakoitzeko.

17. artikulua. -Etxebizitzetako langileendako osagarria.

Etzebizitzetako programako langile guztiek, igandeetan eta jaiegun ofizialetan lan eginez gero, jaiegunetako plusa kobratuko dute, honenbestekoa:

-2010. urtea: 3,50 euro jaiegunean lan egindako ordu bakoitzeko.

-2011. urtea: 3,75 euro jaiegunean lan egindako ordu bakoitzeko.

Gainera, norberaren lan-txandarentzat ezarritako lanalditik kanpora edo planifikatutako koordinazio bilerez gainera lanera joan behar baldin badute, 2 orduko konpentsazioa emanen zaie lanordu bakoitzeko. Konpentsazioa atseden-ordutan, eskudirutan edo bietan hartzen ahalko dute, langileak nahi bezala. Atsedenaldia hartuz gero, zuzeneko arduradunarekin adostuko da.

Abenduaren 25a eta urtarrilaren 1a egun bereziak dira, eta horregatik, 8 orduko txanda bakoitzeko soldata-osagarri bat (edo dagokion zati proportzionala) ordaintzea erabaki da, honenbestekoa: 00:00etatik 24:00ak arte:

-2009. urtea: 30 euro.

-2010. urtea: 35 euro.

-2011. urtea: 40 euro.

18. artikulua. Udako oporretarako langileen osagarria.

Gure udako oporretan parte hartzen duten ANFASeko langileen kasuan, eguneko lanaldi bakoitzeko 16 ordu kontatuko zaie, eta 10 eguneko txanda bakoitzeko 100 euroko konpentsazioa emanen zaie.

19. artikulua. Aparteko eskersariak

Hitzarmen kolektibo honen eraginpeko langileek aparteko bi eskersari jasoko dituzte, hilabete bateko soldata adinakoak, une bakoitzean indarrean dagoen soldataren arabera. Sari horretan sartuko dira oinarrizko soldata gehi antzinatasuna, horrelakorik duten langileen kasuan.

Uztaileko aparteko paga hil horren 5ean ordainduko da edo egun baliodun bat lehenago, data hura jaiegun bada; Eguberrietako aparteko paga abenduaren 22an ordainduko da edo egun baliodun bat lehenago, data hura jaiegun bada.

Bi eskersariok seihilabetero sortuko dira, halatan non uztaileko aparteko pagaren sortzapen epea urtarrilaren 1etik ekainaren 30era artekoa izanen baita, urtero, eta Eguberrietakoa, uztailaren 1etik abenduaren 31ra artekoa.

Epe horietako batean enpresan sartzen diren langileek eskubidea dute eskersari bakoitzari dagokion seihilekoaren aparteko pagaren zati proportzionala kobratzeko.

20. artikulua. Antzinatasuna.

Antzinatasunaren osagarria hirurtekotan sorrarazten da eta hirurtekoa betetzen den egunetik hilabetera hasiko da ordaintzen. Gehienez ere bost hirurteko ordainduko dira. Hirurteko gehiago egiaztatu dutenen egoera pertsonalak errespetatuko dira, eta horiek kobratzeko eskubideari eutsiko diote. Alabaina, bosgarren hirurtekotik aurrera aitortuak dituztenak baino hirurteko gehiago ez dira sorraraziko.

Oinarrizko soldataren %4,8 ordainduko da antzinatasun-hirurteko bakoitzagatik.

Hirurtekoak kontatzean, probaldiak eta ikasten emandako denbora ere kontatuko dira.

Enpresak hirurteko bakoitzaren muga-egunaren eta kobraketaren berri emanen die langileei idatziz.

6. hirurtekoa, 7. hirurtekoa eta hurrengoak betetzean, langileak 8 ordu izanen ditu hirurtekoa betetzen den urte berean nahierara erabiltzeko.

21. artikulua. Kilometrajea/Dietak.

Enpresak, hitzarmena sinatzen denetik, 0,25 euro ordainduko ditu kilometro bakoitzeko 2010. urtean eta 0,26 euro 2011. urtean, langileak bere ibilgailuan eta zuzendaritzak aginduta enpresaren zerbitzura egiten dituen joan-etorriengatik. Joan-etorriak langilearen lantokitik neurtuko dira, salbu eta langilea etxetik abiatzen baldin bada eta distantzia laburragoa bada.

ANFASek istripu aseguru bat itunduko du, joan-etorriak egin ohi dituzten langileen arriskuak estaltzeko.

Enpresak dietengatik justifikatzen den benetako diru kopurua ordainduko du. Janarietako dieta, gehienez, 12,00 eurokoa izanen da.

22. artikulua. Baldintzarik hoberenak.

Hitzarmen hau sinatu aurretik bere lanposturako finkatutakoa baino gehiago kobratzen zuten pertsonek horrela kobratzen segituko dute, hitzarmen honetan langile guztientzat aitortuak dauden gehikuntzekin, harik eta enpresarekiko lan harremana bukatu arte, non ez den, elkarrekin ados jarririk, aldatzeko erabakia hartzen.

IV.-Laneko segurtasuna eta osasuna.

23. artikulua. Laneko segurtasuna eta osasuna.

Enpresak indarreko legedian laneko segurtasunari eta osasunari buruz ezarrita dauden xedapen guztiak beteko ditu lantoki guztietan.

24. artikulua. Laneko arropa.

Arropa beharra duten langileei, eskatuz gero, emanen zaie, edo bestela, urtean 35,00 euro. Ahal bada, gure biltegiko arropa aprobetxatuko da.

25. artikulua. Bizi eta istripu asegurua.

Enpresak istripu aseguruaren poliza bat itunduko du, arriskuetarako, lanbideari mugatua, enpresako langile guztientzat.

Honako kapital hau aseguratuko da:

-30.051 euro, laneko istripuaren ondoriozko heriotzagatik.

-30.051 euro, laneko istripuaren ondoriozko erabateko baliaezintasun iraunkorragatik.

-Enpresak heriotza aseguruen poliza bat itunduko du, istripu aseguruarekin batera ezina, 15.000 eurokoa, enpresan jardunean diren langileen alde.

26. artikulua. Laguntza medikoa eta psikiatrikoa.

Langile guztiei osasun azterketa eginen zaie urtero eta azterketa psikiatrikoa, berriz, eskatzen dutenei.

V.-Langileen ordezkariak.

27. artikulua. Enpresa batzordearentzako laguntzak.

Enpresa batzordearentzako laguntza gisa, langileen ordezkariei 300 euro emanen zaizkie urtean.

28. artikulua. Ordu sindikalak metatzeko aukera.

Ordu sindikalen kontaketa hilabetero eginen da, baina nahi izanez gero, enpresako langileen ordezkarien orduak metatzen ahalko dira.

Bi hilabeteko edo gehiagoko ordu sindikalak pilatzeko, eskaera justifikatua aurkeztu beharko da, zuzendaritzak baimena eman dezan.

29. artikulua. Langileen batzarra.

Langileek urtean 4 ordu hartzeko eskubidea izanen dute beren ohiko lan ordutegian enpresan biltzeko, betiere enpresako jarduerei traba egiten ez bazaie. Horretarako, ahalik eta azkarren, bilera egiteko eskaera aurkeztu beharko zaio zuzendaritzari, gai-zerrenda eta guzti.

VI.-Xedapen gehigarriak.

1. Anfaseko programen eta zerbitzuen ezaugarriak kontuan harturik, eta alderdi negoziatzaileentzat lehentasunezkoa denez behin betiko enplegua eta ahalik eta lanaldi osoenak lortzea, honako neurri hauek hartu dira helburu horietara iriste aldera:

-Lanaldiaren banaketa irregularra:

• Langileen ordezkariei aurretik jakinarazita, lanaldiaren banaketa irregularra duten egutegiak ezartzen ahalko dira, Langileen Estatutuaren 34. artikuluan ezarritakoaren arabera, baina betiere legeak finkatutako gutxieneko atsedenaldiak errespetatuz.

-Kontratazio mugagabea:

• Enpresak, Master Navarra enpresak egindako azterketari jarraikiz, aldi baterako 20 kontratu aldatuko ditu, azterketa horren arabera lanpostu finko bihurtu behar baitira.

2. Hitzarmen honetan araututa ez dagoen gai guztietan, ahalmen urriko pertsonei lagundu, diagnostikatu, errehabilitatu eta sustatzeko zentroen Estatuko hitzarmenak, unean uneko erredakzio indardunean, xedatutakoari jarraituko zaio.

AZKEN XEDAPENAK

1. Batzorde paritarioa:

Hitzarmen honen gaineko auziak interpretatu eta segimendua egiteko, eta lan arloko agintaritzak eta organo jurisdikzionalek legez aitortuak dituzten eskumenak galarazi gabe, hitzarmena sinatzearekin batera, batzorde paritario bat eratuko da, langileen ordezkariek eta enpresaren ordezkariek osatua.

2. Osotasunarekiko lotura:

Hitzarmen honetako baldintzek multzo organiko eta zatiezina osatzen dute eta, praktikan aplikatzerakoan, beren osotasunean hartuko dira, eta aldeek beteko dituzte hitzarmenaren osotasunari lotetsirik.

Lan arloko agintaritzak edo jurisdikzioak, euren eskumenen erabileran, hitzarmen honetako klausularen bat onartu ez edo ezabatzen baldin badute, aldeetako batek espresuki eskatuz gero, hitzarmena berriz ikusi eta aztertu beharko da oso-osorik.

1. ERANSKINA

2009ko soldaten taulak

2. ERANSKINA

2010eko soldateni taulak

Sinatua:

Enpresa batzordeko sindikatuen aldetik, UGTren izenean: Lourdes Cuesta Jorquera andrea, Encarna Lizar Planillo andrea, Edurne Gómez Villar andrea, Sonia Ganuza Biurrun andrea, Miguel Santos Larramendi Bengoechea jauna.

Enpresaren aldetik: Gerardo Posada Laca jauna.

Iragarkiaren kodea: F1006071