2. NAFARROAKO TOKI ADMINISTRAZIOA
2.2. XEDAPEN ETA IRAGARKIAK, HERRIEN ARABERA ANTOLATUAK
IRUÑA
Euskarazko XXIII. literatur lehiaketa, Iruña eta Iruñerriko ikastetxeetako Lehen Hezkuntza eta Derrigorrezko Bigarren Hezkuntzako lehen zikloko ikasleei zuzendua. 2010. urtea
Iruñeko Udalak XXIII. Literatur Lehiaketa deitu du, Iruñeko ikastetxeetako Lehen Hezkuntzako eta Derrigorrezko Bigarren Hezkuntzako Lehen Zikloko ikasleendako (DBHko 1. eta 2. mailak), betiere Iruñeko Udalaren Diru-laguntzei buruzko Ordenantza Orokorrak xedatutakoarekin bat, zeina 2006ko 21. Nafarroako Aldizkari Ofizialean, otsailaren 17koan, argitaratu baitzen.
1.-Xedea.
Lehiaketa honen xedea Iruñeko eta Iruñerriko ikastetxeetako Lehen Hezkuntzako eta Derrigorrezko Bigarren Hezkuntzako Lehen Zikloko ikasleek egindako literatur lanik hoberenak saritzea da, 2. puntuan zehaztutako ipuin eta komiki modalitateetan.
Gaia libre izanen da, eta idazlanak (ikasle bakoitzeko bat), jatorrizkoak eta euskaraz idatziak.
2.-Sariaren Modalitatea.
Hona, modalitateak eta kategoriak:
-Ipuinak:
A kategoria: Lehen Hezkuntzako lehen eta bigarren mailak.
B kategoria: Lehen Hezkuntzako hirugarren eta laugarren mailak.
C kategoria: Lehen Hezkuntzako bosgarren eta seigarren mailak.
D kategoria: Derrigorrezko Bigarren Hezkuntzako lehen eta bigarren mailak.
-Komikiak:
A kategoria: Lehen Hezkuntzako bosgarren eta seigarren mailak.
B kategoria: Derrigorrezko Bigarren Hezkuntzako lehen eta bigarren mailak.
3.-Diru Zuzkidura.
Deialdi honi, gehienez ere, 4.740,00 euro esleitu zaio, sarietarako, eta 2.300,00 euro, plaketarako, Iruñeko Udalaren indarreko Aurrekontu Orokorreko 5045140/480000 kontusailaren kargura, hurrenez hurren.
Ondoko sariak ezarri dira, kategoria bakoitzeko, betiere 2. puntuarekin bat:
Lehen saria: Oroit-plaka eta 340 euro, eskola-materialetan, ikastetxerako, eta oroit-plaka eta 170 euro, eskola-materialetan, egilearendako.
Bigarren saria: Oroit-plaka eta 125 euro, eskola-materialetan, egilearendako.
Hirugarren saria: Oroit-plaka eta 95 euro, eskola-materialetan, egilearendako.
Laugarren saria: Oroit-plaka eta 60 euro, eskola-materialetan, egilearendako.
Eskolarako material-sorta txartel baten bidez jasoko da, sariak zenbat jo eta horrenbestekoa. Ikasle saridunek aipatu liburudendetan hartu beharko dute beraiek hautatzen duten eskola-materiala, txartel horren truke, betiere txartela noizkoa izan eta hurrengo lau hilabeteko epean. Txartela ez bada erabiltzen, Iruñeko Udalak ulertuko du saritutako pertsonak edo ikastetxeak uko egin diola jasotako saria hartzeari.
Iruñeko Udalak, saria ordainduta, lan saridunari dagozkion jabetza intelektualeko eskubide ekonomiko guztiak eskuratuko ditu egilearengandik, beretako bakarrik eta mundu mailan; orobat, lan horiek erreproduzitu, banatu, jendaurrean paratu eta eraldatu ahalko ditu, libreki eta ezer gehiago ordaindu gabe, Jabetza intelektualari buruzko Legearen Testu Bateratuaren 26. artikuluak ezarritako epearen barruan, halako maneran non eskubidea izanen baitu lana gaur ezaguna den edo geroan asma daitekeen beste edozein bitarteko edo euskarri ukigarri edo ezin ukituzkotan aurkezteko. Horrek barne hartzen ditu ustiatzeko modalitateak oro, hau da, lana edozein euskarri edo formatotan erreproduzitzekoa, eta horien artean bereziki, hala liburu batean edo euskarri digital edo zenbakizko batean egitekoa nola lana banatzeko eta jendaurrean paratzeko eskubideak, mundu osoko merkatuetan ustiatze aldera. Eskubide horien artean berariaz daude sarturik hala lanak on-line eran igorri eta zabaltzea nola internet bezalako sare digital elkarreragileetan eskura jartzea.
4.-Izangaien Betekizunak.
Iruñeko eta Iruñerriko ikastetxeetako Lehen Hezkuntzako eta Derrigorrezko Bigarren Hezkuntzako Lehen Zikloko ikasleek (DBHko 1. eta 2. mailak) hartzen ahalko dute parte Lehiaketa honetan.
Ikastetxe parte-hartzaileek gehienez ere bost (5) lan aurkeztuko dituzte aurreko kategoria eta modalitateetako ikas-talde bakoitzeko, ikastetxeak aldez aurretik hautatuta.
Saridunei ez zaizkie aplikagarri izanen Diru-laguntzei buruzko Ordenantza Orokorraren 10,2. artikuluak ezarritako debekuak.
Baldin eta lan batean ez badira egilearen datuak behar bezala ematen, lana ezin izanen da lehiaketan onartu.
5.-Eskatzaileek zer agiri aurkeztu behar duten, zein epetan eta non.
Lanak ikastetxeek aurkeztuko dituzte, eta ondoko luzera izanen dute:
-Ipuinak:
A kategoria (Lehen Hezkuntzako 1 eta 2. mailak) Gehienez ere bi (2) orri, alde bakar batetik idatziak, eta marrazkiak barne.
B kategoria (Lehen Hezkuntzako 3 eta 4. mailak) Gehienez ere hiru orri (3), alde bakar batetik idatziak, eta marrazkiak barne.
C kategoria (Lehen Hezkuntzako 5 eta 6. mailak) Gehienez ere lau (4) orri, alde bakar batetik idatziak, eta marrazkiak barne.
D kategoria (DBHko 1 eta 2. mailak) Gehienez ere sei orri (6), alde bakar batetik idatziak, eta marrazkiak barne.
-Komikiak:
A kategoria (Lehen Hezkuntzako 5 eta 6. mailak) Gehienez ere hiru orri (3), DIN A-4 formatukoak edo horren pareko neurrikoak.
B kategoria (DBHko 1 eta 2. mailak) Gehienez ere lau (4) orri, DIN A-4 formatukoak edo horren pareko neurrikoak.
Gaia libre izanen da, eta idazlanak (ikasle bakoitzeko bat), jatorrizkoak eta euskaraz idatziak.
Lanak aurkezteko mugaeguna maiatzaren 5a izanen da, epea luzaezina delarik.
Lanak Iruñeko Udaleko Kultura Alorrean (Descalzos k., 72) aurkeztu behar dira, ondoko eran:
Iruñeko udalaren euskarazko xxiii. literatur lehiaketa, haurrendako:
Modalitatea:
Kategoria:
Lanaren izenburua:
Egilearen ikurritza edo izenordea:
Gutunazalaren barnean, lanaz gain, beste gutunazal itxi bat sartuko da, egilearen ikurritzaz edo izenordeaz errotulatua, non egilearen datu hauek sartuko baitira: izen-deiturak, helbidea, telefonoa, ikasmaila eta ikastetxea.
6.-Epaimahaia:
Epaimahaia Iruñeko Udalak izendatuko du, eta ondoko pertsonek osatuko dute:
Epaimahaiburua: Kultura Zinegotzi Delegatua, edo horrek eskuordetutako pertsona.
Epaimahaikideak: Hizkuntza eta Literaturako irakasle bat, Kultura Zinegotzi Delegatuak izendatua.
-Haurren adierazpen plastikoko aditu bat, Kultura Zinegotzi Delegatuak izendatua.
-Euskaltzaindiaren ordezkari bat.
-Udaleko Euskara koordinatzailea.
Idazkaria: Kultura Alorreko zuzendariak izendatuko du.
Baldin eta sari bat egile batek baino gehiagok egindako lan bati ematen bazaio, ex aequo banatuko da, egileen artean.
Epaimahaiak eman gabe uzten ahalko du modalitatate eta kategoria ezberdinetako edozein sari.
Epaimahaiak sariak emateko proposamena eginen du, eta organo eskudunari aurkeztuko dio, horren gainean ebatz dezan.
7.-Ebatzi eta jakinarazteko epea, eta argitaratzea.
Ebatzi eta jakinarazteko epea sei hilabetekoa izanen da, gehienez ere. Epea iragarki hau Nafarroako Aldizkari Ofizialean argitaratu eta hortik aitzina hasiko da kontatzen.
Diru-laguntzak emateko ebazpenak amaiera emanen dio administrazio-bideari, eta interesdunei jakinaraziko zaie, Herri Administrazioen Araubide Juridikoaren eta Administrazio Prozedura Erkidearen azaroaren 26ko 30/1992 Legearen 58 eta 59. artikuluek agindutakoarekin bat.
Sariak emateko ebazpena Udaleko Iragarki-taulan argitaratu behar da.
Saritu gabeko lanak Iruñeko Udaleko Kultura Alorretik (Descalzos k., 72-2.a) erretiratu ahalko dira, lehiaketaren epaia argitara eman eta hurrengo hilabetea bitarte. Hortik aitzina, Udalak libreki erabiltzen ahalko ditu erretiratu gabe utzitako lanak.
Lehiaketa honetan parte hartzeak berekin dakar Oinarri hauek erabat onartzea, bai eta Iruñeko Udalaren erabakiak ere, oinarriok interpretatzean sor litekeen edozein zalantzaren aurrean.
8.-Errekurtsoak.
Deialdi honen, oinarri hauen eta horiek betearazteko har daitezkeen administrazio-ebazpenen aurka, ondoko errekurtsoak paratzen ahalko dira, aukeran:
-Berraztertzeko errekurtsoa, administrazio-egintzaren egile den organoari zuzendua, hilabeteko epean, errekurritzen den egintza jakinarazi edo, bestela, argitara eman eta biharamunetik aitzina.
-Gora jotzeko errekurtsoa, Nafarroako Administrazio Auzitegiari zuzendua, hilabeteko epean, errekurritzen den egintza jakinarazi edo argitaratu eta hortik aitzina.
-Administrazioarekiko auzi-errekurtsoa, Administrazioarekiko Auzien Epaitegiari zuzendua, bi hilabeteko epean. Epe hori errekurritzen den egintza jakinarazi edo argitaratu eta biharamunetik aitzina kontatuko da.
Iruñean, 2010eko apirilaren 16an.-Kultura Zinegotzia, Paz Prieto Sáenz de Tejada.
Iragarkiaren kodea: L1006925
