Iragarkia

51. ALDIZKARIA - 2010eko apirilaren 26a

1. NAFARROAKO FORU KOMUNITATEA

1.5. ESTATUTUAK ETA LAN HITZARMEN KOLEKTIBOAK

343/2010 EBAZPENA, martxoaren 12koa, Arriskuen Prebentziorako eta Lanaren zuzendari nagusiak emana, "Industria Siderometalurgikoa" sektorearen lan hitzarmen kolektiboa aldatzeko akordioaren testua erregistratu, gorde eta Nafarroako Aldizkari Ofizialean argitaratzea erabakitzen duena (espediente zenbakia: 19/2010).

Departamentu honetan 2010eko martxoaren 9an sartu da "Industria Siderometalurgikoa'' sektorearen hitzarmen kolektiboa hein batean aldatzeko akordioa, Negoziazio Batzordeak izenpetua. Lan hitzarmena 2008ko 107. Nafarroako Aldizkari Ofizialean argitaratu zen, irailaren 1ean (espediente zenbakia: 65/2008).

Berrikuntza, Enpresa eta Enplegu Departamentua da Lan Hitzarmen Kolektiboaren testua erregistratu, gorde eta argitaratzeko eskumena duena, Estatuaren lan arloko eginkizunak Nafarroako Foru Komunitateari eskualdatzeko arauak ezartzen dituen apirilaren 11ko 937/1986 Errege Dekretuan ezarritakoaren arabera. Eginkizun haiek martxoaren 24ko 1/1995 Legegintzako Errege Dekretuaren 90. artikuluan ezarrita daude. Horiek horrela, eta kontuan hartuta Hitzarmen kolektiboen erregistro eta gordailuei buruzko maiatzaren 22ko 1040/1981 Errege Dekretuan ezarritakoa.

Adierazitakoarekin bat eta Nafarroako Foru Komunitateko Administrazioari buruzko abenduaren 3ko 15/2004 Foru Legearen 22.1 artikuluak ematen dizkidan eskudantziak erabiliz,

EBATZI DUT:

1. Nafarroako "Industria Siderometalurgikoa'' sektorearen lan hitzarmen kolektiboa (kodea: 3106805) hein batean aldatzeko akordioa, 2010eko martxoaren 5ekoa, erregistratzea, Lan Hitzarmen eta Akordio Kolektiboak Erregistratu eta Gordetzeko Bulegoan horretarako bereziki prestaturik dagoen liburuan, eta bertako administrazio unitatean testua eta dokumentazioa gordetzea.

2. Ebazpen honen berri ematea Negoziazio Batzordeari eta adieraztea ebazpenak ez duela administrazio bidea amaitzen eta honen aurka gora jotzeko errekurtsoa jartzen ahal dela, Berrikuntza, Enpresa eta Enpleguko kontseilariari zuzendua, jakinarazi eta biharamunetik hilabeteko epean.

3. Ebazpen hau Nafarroako Aldizkari Ofizialean argitaratzea, orok jakin dezan".

Iruñean, 2010eko martxoaren 12an.-Arriskuen Prebentziorako eta Lanaren zuzendari nagusia, Imelda Lorea Echavarren.

NAFARROAKO FORU KOMUNITATEKO
"INDUSTRIA SIDEROMETALURGIKOA" SEKTOREAREN 2008-2011RAKO HITZARMEN KOLEKTIBOA HEIN BATEAN ALDATZEKO AKTA

Iruñean, 2010eko martxoaren 5ean, Alejandro Lara Piñero jauna mahaiburu dela, jarraian adierazi diren entitateak eta ordezkariak bildu dira:

Enpresen ordezkariak

A. Asociación de la Pequeña y Mediana Empresa del Metal de Navarra (APMEN) elkartearen aldetik:

-Manuel Huici Izco jauna.

-Alfonso Huici Mariscal jauna.

B. Asociación Navarra de Empresarios del Metal (ANEM) elkartearen aldetik:

-José Secades Vázquez jauna.

-José Manuel Ayesa Villar jauna.

Langileen ordezkariak

A. Langileen Batasun Orokorra (UGT) sindikatuaren aldetik:

-Lorenzo Rios González jauna.

-Baltasar García Salaverri jauna.

B. Langile Komisioak (CCOO) sindikatuaren aldetik:

-José Ramón Fernández Rodríguez jauna.

-Oswaldo García Ibáñez jauna.

Ekitaldiari hasiera eman ondoren, bildu direnek,

ADIERAZI DUTE:

1. 2008ko uztailaren 2an, Nafarroako Foru Komunitateko "Industria Siderometalurgikoa" sektorearen 2008-2011rako (biak barne) indarreko hitzarmen kolektiboa sinatu zen.

Lan arloko agintaritza eskudunak hitzarmen kolektibo hori erregistratu zuen eta 2008ko irailaren 1eko Nafarroako Aldizkari Ofizialean argitaratu zen.

2. Gaur egun, eta dauden zirkunstantziak kontuan hartuta, Negoziazio Mahaia eratu da berriro. Langileen eremuan UGT, CCOO, ELA eta LAB sindikatuen ordezkariak agertu dira eta enpresen eremuan, aldiz, APMEN eta ANEM elkarteen ordezkariak.

2010eko martxoaren 3an eta gaur bertan negoziazio saioak egin dira eta horien emaitza bidezko aktetan adierazi da. Aplikatzen ahal diren lege arauen arabera ordezkari gehien dituzten elkarteak direnez, alde batetik, UGT eta CCOO sindikatuen ordezkariek eta, beste aldetik, ANEM eta APMEN elkarteen ordezkariek adostasuna lortu dute eta honako akordio hauen arabera adierazi dute:

AKORDIOAK:

Lehenbizikoa.-Soldaten 2008ko berrikuspena.

Soldaten 2008ko berrikuspenari dagokionez, bi alderdiek erabaki dute gaur egun dauden egoerak finkatutzat jotzea. Horrela, 2009ko soldata igoeren konturako aurrerakin gisa soberakinaren kenketa aplikatuz soldaten erregularizazioa gauzatu duten enpresetan, ukitutako langileek ez dute eskubiderik izanen enpresek diru-kopuru horiek itzultzeko.

Era berean, soldaten 2008ko berrikuspena aplikatuz erregularizazio hori gauzatu ez duten enpresek ezin izanen dute soldaten kenketa egin.

Bigarrena.-Soldaten 2009ko berrikuspena.

Alde horri dagokionez, sinatzaileek honako hau erabaki dute:

A. Homogeneotasunez eta enpresek duten soldaten egiturari eutsiz, 2009an %2,75eko hasierako igoera izan duten banakako batez besteko soldata kontzeptu gordinak erregularizatu beharko dira eta, horrenbestez, soldata horiek %1,2ko kenketa edo deflazioa izanen dute. Gauzak horrela, 2009ko behin betiko soldata igoera hasierako igoera aplikatzeko kontuan hartu ziren oinarrien gaineko %1,55ekoa izanen da.

Alde horretatik, 2009an %3,25eko hasierako igoera izan zuen soldata bermatua ere erregularizatu beharko da, horri ere %1,2ko kenketa egiteko. Horren ondorioz, soldata bermatuaren 2009ko igoera soldaten hasierako igoera aplikatzeko kontuan hartu ziren oinarrien gaineko %2,05ekoa izanen da.

Deflazioa edo kenketa aplikatzearen ondoriozko soldatak oinarri erabiliko dira, soldaten 2010eko igoera aplikatzeko.

Dokumentu honi erantsi zaizkio,I. eranskin gisa, Nafarroako Foru Komunitateko "Industria Siderometalurgikoa" sektorearen hitzarmen kolektiboaren 2009ko abenduaren 31ko ordainsarien taula, deflazioa egin ondoren.

B. Hala ere, enpresek 2009an sobera ordaindu dituzten zenbatekoei dagokienez, horiek ez dira berrikusi eta erregularizatuko 2010eko soldta igoeren konturako aurrerakin gisa. Beraz, enpresek ezin izanen diete eskatu langileei zenbateko horiek itzultzeko.

Hirugarrena.-2010erako eta 2011rako ordainsariak.

A) Egiazko soldaten gaineko igoera.

1. 2010erako %1,55eko soldata igoera hitzartu da, estatuko 2009ko KPI errealari (%0,8) %0,75 batzearen ondorioz, 2009an esleituriko banakako batez besteko soldata kontzeptu gordin guztietan (bigarren akordioaren A) atalean xedatutakoaren arabera deflazioa aplikatu ondoren), homogeneotasunez eta enpresek duten soldata egiturari eutsiz.

2. 2011ko urtarrilaren 1etik ondorioak izanda, 2010ean esleituriko banakako batez besteko soldata kontzeptu gordin guztiak igoko dira, estatuko 2010eko KPI errealari %0,75 batzetik ateratzen den zenbatekoa erantsiz, homogeneotasunez eta enpresek duten soldata egiturari eutsiz.

B) Soldata bermatuaren gaineko igoera.

1. Lanbide talde bakoitzerako soldata bermatuaren zenbateko gordinari dagokionez, 2010ean honela kalkulatuko da: %1,8 (estatuko 2009ko KPI errealari (%0,8) puntu 1 batzearen ondorioz sortua) aplikatuko da, kontzeptu horrek 2009an izan dituen zenbatekoak, akta honen I. eranskinean adierazi direnak, alegia, oinarri hartuta, bigarren akordioaren A) atalean adierazi bezala kenketa edo deflazioa aplikatu ondoren.

2. Halaber, kontzeptu horrek 2011n izanen duen zenbatekoa ezartzeko, lanbide talde bakoitzerako 2010eko soldata bermatua hartuko da oinarri, eta estatuko 2010eko KPI errealari puntu 1 batzearen ondorioz sortzen den kopurua gehituko zaio.

Laugarrena.-Aurreko bigarren eta hirugarren akordioetan itundu dena ez da beti aplikatuko. Izan ere, akta hau sinatu baino lehen, zenbait enpresatan estatutuetatik kanpoko itunak edo beste mota bateko akordioak sinatu dituzte zuzendaritzak eta langileen ordezkariek, igoerak eta soldaten berrikuspenak aplikatzeko arauak ezartzen dituztenak. Arau horiek indarra izaten jarraituko dute eta adierazi bezala bete beharko dira, estatutuetatik kanpoko itunen edo akordioen indarra amaitu arte. Une horretatik aurrera, akta honek aurreko bigarren eta hirugarren akordioetan ezartzen duen ordainsari sistema berria aplikatuko zaie.

Bosgarrena.-Hemen erabaki denaren ondorioz, testu berria idatzi beharko da Nafarroako Foru Komunitateko "Industria Siderometalurgikoa" sektorearen 2008-2011rako indarreko hitzarmen kolektiboaren hainbat artikulu aldatzeko, akta honen II. eranskinean adierazten den edukiaren arabera. Hitzarmen kolektiboaren gainerako artikuluak ez dira aldatuko, 2008ko irailaren 1eko Nafarroako Aldizkari Ofizialean argitaratu zen testuan agertu bezala utziko direla.

Seigarrena.-Akta hau sinatu dutenek erabaki dute testua bera eta bi eranskinak Nafarroako Gobernuko Berrikuntza, Enpresa eta Enplegu Departamentura igortzea, erregistra dezan. Espresuki eskatuko zaio behar dena xedatu dezala gero Nafarroako Aldizkari Ofizialean argitaratu ahal izateko.

Eta horrela ager dadin, bilera amaitu da eta bildu direnek akta hau eta bi eranskinak sinatu dituzte, goian aipatu tokian eta egunean.

Batzordeburua

I. ERANSKINA

Nafarroako Foru Komunitateko "Industria Siderometalurgikoa" sektorearen hitzarmen kolektiboaren 2009ko abenduaren 31ko ordainsarien taula, aurreikusiriko deflazioa egin ondoren.

II. ERANSKINA

Lehenbizikoa.-Nafarroako Foru Komunitateko "Industria Siderometalurgikoa" sektorearen 2008-2011rako hitzarmen kolektiboaren 39. artikulua aldatu da eta honela gelditu da:

39. artikulua. Soldata igoera.

1. epigrafea. Egiazko soldaten gaineko igoera.

A) 2010erako eta 2011rako ordainsariak.

1. 2010erako %1,55eko igoera hitzartu da, 2009an esleituriko banakako batez besteko soldata kontzeptu gordin guztietan, homogeneotasunez eta enpresek duten soldata egiturari eutsiz.

2. 2011ko urtarrilaren 1etik ondorioak izanda, 2010ean esleituriko banakako batez besteko soldata kontzeptu gordin guztiak igoko dira, estatuko 2010eko KPI errealari %0,75 batzetik ateratzen den zenbatekoa erantsita, homogeneotasunez eta enpresek duten soldata egiturari eutsiz.

2. epigrafea. Soldata bermatuaren gaineko igoera.

A) 2010erako eta 2011rako soldata bermatua.

Hitzarmen honen indarraldiko bi urteetan enpresek soldata gordin hauek bermatuko dizkiete 18 urtetik gorako langileei, prestakuntzako edo praktikaldiko kontratua dutenei izan ezik:

1. Urteko soldata gordina, 2010ean, hitzarmen kolektibo honen 70. artikuluaren 1. zenbakian lanbide talde bakoitzerako ezarritakoa izanen da.

2. Kontzeptu horren zenbatekoa 2011rako zehazteko, hitzarmen kolektibo honen 70. artikuluaren 2. zenbakian ezarritakoari jarraituko zaio.

3. Soldata bermatu horien zenbaketan kontzeptu guztiak hartuko dira kontuan, honako hauek izan ezik: antzinatasuna, nekearen, toxikotasunaren eta arriskuaren plusak, eta pizgarrien sistemak dituzten enpresetako produkzio prima, Bedaux eskalako 68 puntu, sistema ehundarreko 114,68 puntu edo bestelako neurketa sistemetako kopuru baliokidea gainditzeagatik ematen dena.

Bigarrena.-Nafarroako Foru Komunitateko "Industria Siderometalurgikoa" sektorearen 2008-2011rako hitzarmen kolektiboaren 40. artikulua, Soldata kontzeptuak deritzona, aldatu da eta honela gelditu da:

40. artikulua. Soldata kontzeptuak.

Soldata bermatuari kalterik egin gabe, hitzarmenaren gutxieneko soldata kontzeptuak honako hauek izanen dira:

Oinarrizko soldata eta hitzarmeneko plusa: enpresa bakoitzaren soldata egituretan horrela ezartzen direnak. Haien zenbatekoari urtero aplikatuko zaio hitzarmen honen 39. artikuluaren 1. epigrafearen A) atalaren 1. eta 2. zenbakietan ezarritakoa aplikatuz egokia den egiazko soldatetarako igoera, aurreko urtean izan duten batez besteko balioa oinarri hartuta.

Pizgarri gabeziaren plusa:

A) Hitzarmen hau sinatu aurretik sortutako enpresek kontzeptu hau ordainduko diete langile guztiei, prestakuntzako edo praktikaldiko kontratua dutenei izan ezik:

-2010ean: 79,58 euro hilean.

-2011n: urte bakoitzean, kontzeptuak aurreko urtean izandako batez besteko balioa oinarri hartuta, hitzarmen honen 39. artikuluaren 1. epigrafearen A) atalaren 2. zenbakian xedatutakoa aplikatuz egiazko soldatetarako kalkulatzen den igoera.

B) Hitzarmen honen aplikazio eremuan aurrerantzean sortzen diren enpresa berriek ondoko formula erabiliko dute pizgarri gabeziaren plusa ordaintzeko, hitzarmenaren indarraldiko lau urteetan:

C) Pizgarrien bidezko ordainketa sistemak ezarriak dituzten enpresek primetatik behar adinako kopuruak hartzen ahalko dituzte, gutxieneko kontzeptu bermatuetan sartzeko.

Hitzarmeneko plusa lanegun, igande eta jaiegun bakoitzeko sorraraziko dute produkzio primari lotu gabe lan egiten duten langileek. Produkzio primari edo pizgarriari loturiko langileek plus hori igande eta jaiegunetan jasoko dute.

Langile bat lanera joan ez edo berandu iristen bada edo lanaldi osoa egiten ez badu berari egozten ahal zaizkion arrazoiengatik, hitzarmeneko plusa jasotzeko eskubidea galduko du, honela:

-Berandu iristeagatik, egun bateko hitzarmeneko plusaren %25.

-Lanera ez joateagatik edo ezarritako lanaldia osorik ez betetzeagatik, egun horretako eta ondorengo bi eguneko plusaren %25 galduko du.

-Hileko ordainsaria duten langileei, artikulu honetan ezarritakoaren ondorioetarako, kasuan kasuko hilabeteak zenbat egun, horrenbeste egunetan zatituko zaie hitzarmeneko plusa, eguneko zatia kalkulatzeko.

Hirugarrena.-Nafarroako Foru Komunitateko "Industria Siderometalurgikoa" sektorearen 2008-2011rako hitzarmen kolektiboaren 42. artikulua, aparteko eskersariak arautzen dituena, honela gelditu da:

42. artikulua. Aparteko eskersariak.

Langile guztiek aparteko bi eskersari izanen dituzte. Bata uztailaren lehenbiziko astean ordainduko da eta bestea abenduaren 22an.

Eskersari horiek lan egindako denboraren proportzioan ordainduko dira, horietako bakoitza urteko seihileko naturalen arabera modu proportzionalean banatuz.

Horietako bakoitzaren zenbatekoa honela zehaztuko da:

-2010erako, 2009an erabilitako kontzeptu berberen 30 eguneko batez bestekoa eginen da (oinarrizko soldata eta hitzarmeneko plusa), %1,55 gehituta.

-2011rako, oinarrizko soldataren eta hitzarmeneko plusaren 30 egunekoa, soldata kontzeptu horiek 2010ean izandako batez besteko balioari hitzarmen honen 39. artikuluaren 1. epigrafearen A) atalaren 2. zenbakian xedatutakoa betez kalkulatzen diren igoerak aplikatuz.

Laugarrena.-Nafarroako Foru Komunitateko "Industria Siderometalurgikoa" sektorearen 2008-2011rako hitzarmen kolektiboaren 44. artikulua, antzinatasunari buruzkoa dena, honela gelditu da:

44. artikulua. Antzinatasuna.

1. Antzinatasuna hirurtekoa edo bosturtekoa betetzen den egunean eta ondoko urteetako egun berean sorraraziko da.

Antzinatasuna modu proportzionalean banaturik ordainduko da, Nafarroako Industria Siderometalurgikoen 2000-2003rako hitzarmen kolektiboaren 44. artikuluaren 1. zenbakian ezarritako arauei jarraituz, orain aplikagarriak diren heinean.

2. Antzinatasun hori zehazteko, kontuan hartuko dira enpresan lan egindako urteak, hirunaka kontatuak, eta hirurteko horien kopuruak ez du mugarik izanen. Antzinatasunaren ondorioetarako, ikastunen, pintxeen eta mandatugileen zerbitzualdiak kontuan hartuko dira.

Eszedentziek, ordaindu gabeko lizentziek edo antzeko arrazoiek antzinatasunaren urteko mugaeguna atzeratuko dute, egoera horiek dirauten denboran.

3. Jarraibide gisa, hirurtekoek gutxienez honako balio hauek izanen dituzte 2010ean:

Hortik gorako hirurteko bakoitzeko 64,68 euro gehituko dira.

Proportzionalki banatutako ordainketa sistema berria aplikatuz, goian adierazitako urteko gutxieneko balioak hamalau zati berdinetan banatuta ordainduko dira. Hamabi zati ordainduko dira sortzapenaren ondoko hamabi hilabeteetako soldaten likidazioen barnean, eta beste biak uztaileko eta Eguberrietako aparteko eskersariekin batera.

4. Aurreko hamabi hilabeteetan hirurteko edo bosturteko bakoitzari esleituriko balio ekonomikoak, 2010eko sorrarazpen egunean, %1,55 igoko dira.

2011n, sorrarazpen egunean, aurreko hamabi hilabeteetako antzinatasun saria igoko da, hitzarmen kolektibo honen 39. artikuluaren 1. epigrafearen A) atalaren 2. zenbakian urte bakoitzeko egiazko soldatetarako ezarritako kopuru berean.

Horrela kalkulatzen diren diru kopuruak hamalau zati berdinetan ordainduko dira, hurrengo hamabi hilabeteetan eta aparteko bi eskersarietan, artikulu honen 1. zenbakian ezarritakoari jarraituz.

Hitzarmen honen indarraldia amaitzen denean antzinatasun kontzeptuaren eraldaketa negoziatuko da aldeek ituntzen duten moduan.

Bosgarrena.-Nafarroako Foru Komunitateko "Industria Siderometalurgikoa" sektorearen 2008-2011rako hitzarmen kolektiboaren 45. artikulua, toxikotasun, nekagarritasun eta arriskugarritasun plusak arautzen dituena, honela gelditu da:

45. artikulua. Toxikotasun, nekagarritasun eta arriskugarritasun plusak.

1. Hitzarmen hau sinatu aurretik sortutako enpresentzat:

-Plus horiek 2009an izandako batez besteko zenbatekoa %1,55 igoko da 2010erako.

-Kontzeptu horien eguneko zenbatekoa 2011rako zehazteko, 2010ean izandako batez besteko balioei igoera hau aplikatuko zaie: hitzarmen honen 39. artikuluaren 1. epigrafearen A) atalaren 2. zenbakian xedatutako moduan egiazko soldatetarako kalkulatzen den igoera.

2. Hitzarmen honen aplikazio eremuan aurrerantzean ezartzen diren enpresa berriek ondoko formula erabiliko dute toxikotasun, nekagarritasun eta arriskugarritasun plusak ordaintzeko, hitzarmenaren indarraldiko lau urteetan:

3. Plus horiek lan egindako egun bakoitzeko ordainduko dira. Lan nekagarri, toxiko edo arriskutsuak 60 minutu baino gehiago iraun baina lanaldi erditik gora hartzen ez badu, plusaren erdia ordainduko da.

Enpresa berrietan nahiz hitzarmen hau sinatu aurretik sortutako enpresetan, lehenbiziko aldiz gertatzen bada aparteko nekagarritasuna, toxikotasuna edota arriskua, industrian ohikoa dena baino handiagoa, orduan goiko 1. eta 2. paragrafoak aplikatuz ateratzen den eguneko balioa %25 handituko da, egoera horietako bi gertatuz gero, edo %50, hirurak gertatuz gero.

Oporrak hasi aurretik lan egindako azken hiru hilabeteetan langileak batez beste kobratu dituen plusak ordainduko dira oporretan.

Seigarrena.-Nafarroako Foru Komunitateko "Industria Siderometalurgikoa" sektorearen 2008-2011rako hitzarmen kolektiboaren 46. artikulua, gaueko lanaren plusa arautzen duena, honela gelditu da:

46. artikulua. Gaueko lanaren plusa.

1. Hitzarmen hau sinatu aurretik sortutako enpresentzat:

-Plus horrek 2009an izandako batez besteko zenbatekoa %1,55 igoko da 2010erako.

-Kontzeptu horren eguneko zenbatekoa 2011rako zehazteko, 2010ean izandako batez besteko balioari igoera hau aplikatuko zaio: hitzarmen honen 39. artikuluaren 1. epigrafearen A) atalaren 2. zenbakian xedatutako moduan egiazko soldatetarako kalkulatzen den igoera.

2. Hitzarmen honen aplikazio eremuan aurrerantzean ezartzen diren enpresa berriek ondoko formula erabiliko dute gaueko lanaren plusa ordaintzeko, hitzarmenaren indarraldiko urteetan:

3. Osagarri horiek, betiere, langileei aparteko orduengatik eta lan nekagarri, toxiko eta arriskutsuengatik dagozkien hobariez kanpokoak izanen dira.

Zazpigarrena.-Nafarroako Foru Komunitateko "Industria Siderometalurgikoa" sektorearen 2008-2011rako hitzarmen kolektiboaren 47. artikulua, bidaiekin eta dietekin zerikusia duen guztia antolatzen duena, honela gelditu da:

47. artikulua. Bidaiak eta dietak.

1. 2010ean, langileek enpresaren aginduz egin behar dituzten joan-etorrietan, garraio gastuez gainera 35 euro kobratuko dituzte dieta osoagatik, non eta joan-etorria hiru egunetik beherakoa ez den, horrelakoetan dieta 42,63 eurokoa izanen baita.

Dieta erdia 20,27 eurokoa izanen da.

Inguruabar bereziengatik joan-etorriak eragindako gastua dieten zenbatekoa baino gehiago bada, soberakina enpresak ordaindu behar du, horren berri izan eta langilearen justifikazioa jaso ondoren.

2. Enpresek kontzeptu horrengatik 2009an ordaindu duten zenbatekoa %1,55 igoko da 2010erako.

3. 2011rako, bai artikulu honen 1. zenbakian adierazitako zenbatekoei bai enpresek kontzeptu honengatik 2010ean batez beste ordaindutakoari igoera hau aplikatuko zaie: hitzarmen honen 39. artikuluaren 1. epigrafearen A) atalaren 2. zenbakian xedatutako moduan egiazko soldatetarako kalkulatzen den portzentajea.

Zortzigarrena.-Nafarroako Foru Komunitateko "Industria Siderometalurgikoa" sektorearen 2008-2011rako hitzarmen kolektiboaren 48. artikulua, kontratazioei buruzkoa dena, honela gelditu da A) epigrafean ("Prestakuntzarako kontratua"), artikuluaren gainerako atalek aurreko testuari eutsiko diotela:

48. artikulua. Kontratazioak.

Hitzarmen hau sinatu duten aldeek, dauden lanpostuak egonkortu eta kontratazio berriak sustatu nahian, konpromiso hauek hartu dituzte arlo honetan:

A) Prestakuntzarako kontratua.

Prestakuntzarako kontratua egiten ahalko zaie praktiketako kontraturako titulaziorik izan ez eta 16 urte baino gehiago eta 21 baino gutxiago dituzten langileei.

Prestakuntzarako kontratua duten langileek 2010ean ordainsari bakarra kobratuko dute, ondoko zenbateko gordinak baino gutxiagokoa izan ez daitekeena, betiere:

Lehen urteko prestakuntzako langileak: 531,22 euro hilean.

Bigarren urteko prestakuntzako langileak: 630,63 euro hilean.

Prestakuntzako langileen ordainsari bakarraren zenbatekoa 2011rako zehazteko, 2010eko batez besteko zenbatekoari aplikatuko zaio egiazko soldatetarako igoera, hitzarmen honen 39. artikuluaren 1. epigrafearen A) atalaren 2. zenbakian xedatutako moduan kalkulatua.

B) Praktikaldiko kontratua.

Kontratu mota hori sustatu nahian eta tituludun berrien lanbide prestakuntza errazte aldera, Langileen Estatutuaren Testu Bateginaren 11. artikuluaren 1. zenbakiaren e) atalean ezarritako ordainsari-portzentajea handitzea hitzartu da. Kontratuaren indarraldiko lehenbiziko urtean %65 izanen da, eta bigarren urtean %80.

C) Behin-behineko kontratua.

Merkatuaren gorabeherek, lan metaketek edo eskaera gehiegi izateak baldintzatutako iraupen jakineko kontratu mota horren iraupena gehienez ere 12 hilabetekoa izanen da 18 hilabeteko tartean, aipatu diren arrazoiak sortzen direnetik hasita, horrela arautua baitago Langileen Estatutuaren Testu Bateginaren 15. artikuluaren 1. zenbakiaren b) atalean.

Hitzarmen honetan ezarrita dagoen gehieneko iraupenetik beherako kontratua egiten denean, eta bi alderdiak ados egonez gero, kontratua luzatzen ahalko da, behin bakarrik. Kontratuaren iraupen osoa ezin izanen da gehieneko iraupen hura baino luzeagoa izan.

D) Obra edo zerbitzu jakin baterako kontratua.

Obra edo zerbitzu jakin baterako kontratutzat hartuko dira obra edo zerbitzu bat egitea helburu dutenak, enpresaren jardueren barnean autonomiadunak, eta orobat munta handiko lanak edo eginbeharrak betetzeko itundutakoak, horiek egiteko denbora mugatua izanik ere, zehazterik ez dagoenean.

Enpresek langileen ordezkariei jakinarazi behar dizkiete halako kontratuen arrazoiak, ukitutako langileen kopurua, esleitu beharreko lanbide taldeak eta aurreikusten den iraupena.

E) Erretiro partziala eta errelebo kontratua.

Gai hori Langileen Estatutuaren 12.6 artikuluan xedatutakoaren bidez arautuko da.

Bi aldeek positibotzat jotzen dute sektorean tresna horiek erabiltzea enplegua sustatzeko, plantillak gaztetuz eta belaunaldiak ordeztuz, horrela pertsona gehiago laneratzea lortzen baita. Aldi berean tresna erabilgarriak dira plantillaren berrikuntzei eta gerta daitezkeen berregituratzeei ekiteko.

Horregatik guztiagatik, enpresek, beren antolaketa ahalmenak erabiliz eta funtzionamendu beharrek ezartzen dituzten mugen barnean, erretiro partziala hartzeko eskaerak aztertuko dituzte, langileek aurkeztuz gero.

Enpresak langilearen eskaera onartzen ez duenean, aldeetako edozeinek Hitzarmenaren Interpretaziorako Batzorde Mistora jotzen ahalko du. Batzordea, aldeei entzun ondoren, haien jarrerak hurbiltzen saiatuko da, enpresaren eta langilearen arteko akordioaren bila, langileak erretiro partziala hartu ahal izateko.

Aurrekoaren ildotik langileak bere lanaldia eta soldata murriztea ituntzen ahalko du enpresarekin. Hori egiteko modua eta baldintzak ezartzen dira Gizarte Segurantzaren arloko Neurriei buruzko abenduaren 4ko 40/2007 Legearen 4. artikuluan eta hogeita bederatzigarren xedapen gehigarrian, zeinaren bidez Langileen Estatutuari buruzko Legearen 12. artikuluan 6. idatz-zatiaren testua aldatu eta 7. idatz-zati berria eransten baita.

F) Erretiro berezia 64 urte betetzean.

Langileek 64 urte betetzean erretiro berezia hartzen ahalko dute, uztailaren 17ko 1194/1985 Errege Dekretuan eta hura garatu eta aldatzeko arauetan ezartzen diren moduan eta baldintzetan.

Hori dela-eta enpresek eginbehar hauek izanen dituzte:

1. Erretiro partziala hartzen duen langilearen ordez beste bat jartzea, enplegu bulegoan langabe gisa inskribatua.

2. Ordezko langilearen kontratuak kasuan kasuko kontratu modalitateari dagozkion arauak beteko ditu. Gutxienez urtebete iraunen du, eta idatziz eginen da beti. Ordeztutako langilearen izena ere agertuko da.

3. Kontratua enplegu bulegoan erregistratuko da eta ale bat gordeko da bertan; beste ale bat, behar bezala eginbidetua, erretiroa hartzen duen langileari emanen zaio, erretiro pentsiorako eskubidea aitortu behar dion entitate kudeatzaileari aurkezteko.

4. Kontratuaren indarraldian langileak enpresa uzten badu, 15 eguneko epean enpresak haren ordez beste langabe bat jarri beharko du kontratuaren gutxieneko iraupena bete arte geratzen den aldirako, ezinbesteko kasuetan izan ezik.

G) Subrogazioa.

Hitzarmen kolektibo hau aplikatu behar duten enpresek Administrazio Publikoarekin egiten dituzten mantentze lanetako kontratuak amaitzean, lanaren esleipena hartzen duen hurrengo enpresak, esleipenak indarra hartzen duen unetik, lan horretan aritu diren langileak azpikontratatzeko konpromisoa hartuko du eta langile horiek esleipen-hartzaile berrian subrogatzeko eskubidea izanen dute, baldintza hauek betetzen badira:

A) Aurreko enpresa gutxienez 12 hilabete lehenagotik aritu izana Administrazio Publikoarekiko kontratuaren xede den zerbitzuan.

B) Zerbitzu horri eta lantokiari lotuta 6 hilabete baino gutxiago daramaten langileak ezin izanen dira subrogatu.

C) Mantentze lanetarako kontratatuak izan eta kontratuan hala jasorik duten langileak bakarrik subrogatuko dira, ez bazaio enpresa berriari frogatzen langilea mantentze zerbitzuari atxikita dagoela; halakoetan subrogatu eginen litzateke.

Subrogazioa gauzatu dadin, mantentze zerbitzua uzten duen enpresak ukitutako langileei aldez aurretik eta idatziz jakinarazi behar die Administrazio Publikoarekin sinatutako kontratua amaituko dela, eta esleipena hartuko duen enpresari ukitutako langileen zerrenda eman behar dio, eta haien banakako kontratuak, behar bezala eginbidetuak, bai eta azken 6 hilabeteetako nominak eta TC 2 agiriak ere.

Langileak, lehengo enpresaren kargura, enpresa horrek zerbitzua utzi zuen egunera arte hartzeko dituen diru-kopuru guztiak kobratuko ditu: soldatak, aparteko pagen zati proportzionalak, oporrak eta abar, eta lehengo enpresa izanen da ordainketa horien erantzule bakarra.

Bederatzigarrena.-70. artikulua, lanbide taldeetarako soldatak arautzen dituena, honela gelditu da:

70. artikulua. Lanbide taldeetarako soldatak.

Hitzarmen honen indarraldiko bi urteetan enpresek soldata gordin hauek bermatuko dizkiete 18 urtetik gorako langileei, prestakuntzako edo praktikaldiko kontratua dutenei izan ezik:

1. Langileek beren lanbide taldearen arabera 2010ean kobratuko duten soldata bermatuaren urteko zenbateko gordina hauxe izanen da:

2. Halaber, kontzeptu horrek 2011n izanen duen zenbatekoa ezartzeko, lanbide talde bakoitzerako 2010ean hurrenez hurren izan duten batez besteko soldata bermatua hartuko da oinarri, eta estatuko 2010eko KPI errealari puntu 1 batzearen ondorioz sortzen den kopurua gehituko zaio.

3. Unean uneko soldata bermatua 12 paga arruntetan eta aparteko 2 eskersaritan banaturik ordainduko da.

4. Lanbide taldeen araberako soldata bermatu horien zenbaketan kontzeptu guztiak hartuko dira kontuan, honako hauek izan ezik: antzinatasuna, nekearen, toxikotasunaren eta arriskuaren plusak, eta pizgarrien sistemak dituzten enpresetako produkzio prima, Bedaux eskalako 68 puntu, sistema ehundarreko 114,68 puntu edo bestelako neurketa sistemetako kopuru baliokidea gainditzeagatik ematen dena.

Hamargarrena.-Nafarroako Foru Komunitateko "Industria Siderometalurgikoa" sektorearen 2008-2011rako hitzarmen kolektiboaren 43. artikulua, aparteko orduei buruzkoa dena, honela gelditu da:

43. artikulua. Aparteko orduak.

Aparteko ordu bakoitzaren 2009ko batez besteko prezioa %1,55 igoko da 2010ean.

Aparteko orduaren 2011ko batez besteko prezioa honela zehaztuko da: kontzeptu horrek 2010ean izandako balioari hitzarmen honen 39. artikuluaren 1. epigrafearen A) atalaren 2. zenbakian xedatutakoa betez kalkulatzen den soldaten igoera aplikatuko zaio.

Hamaikagarrena.-Nafarroako Foru Komunitateko "Industria Siderometalurgikoa" sektorearen 2008-2011rako hitzarmen kolektiboaren testuari hirugarren xedapen iragankorra gehitu zaio. Honako hau dio, hitzez hitz:

HIRUGARREN XEDAPEN IRAGANKORRA

Hitzarmen kolektiboa hein batean aldatzeko 2010eko martxoaren 5eko aktaren laugarren akordioan ezarritakoaren arabera, 39., 40., 42., 43., 44., 45., 46. eta 47. artikuluen, 48. artikuluaren A) atalaren eta 70. artikuluaren edukia, hau da, II. eranskin honetan artikulu horiei ematen zaien testu berria, ez da beti aplikatuko. Izan ere, 2010eko martxoaren 5a baino lehen, zenbait enpresatan estatutuetatik kanpoko itunak edo beste mota bateko akordioak sinatu dituzte zuzendaritzak eta langileen ordezkariek, igoerak eta soldaten berrikuspenak aplikatzeko arauak ezartzen dituztenak. Arau horiek indarra izaten jarraituko dute eta adierazi bezala bete beharko dira, estatutuetatik kanpoko itunen edo akordioen indarra amaitu arte. Une horretatik aurrera, ordainsari sistema berria aplikatuko zaie.

Iragarkiaren kodea: F1005183