51. ALDIZKARIA - 2010eko apirilaren 26a

1. NAFARROAKO FORU KOMUNITATEA

1.4. DIRU-LAGUNTZAK, LAGUNTZAK ETA BEKAK

94/2010 EBAZPENA, martxoaren 15ekoa, Garraioetako zuzendari nagusiak emana, 2010. urtean laneko garraio zerbitzuen autobus geralekuetan markesinak eraiki eta instalatzen egindako inbertsioak zati batean finantzatzeko, enpresa pribatuei diru-laguntzak emateko deialdia onesten duena.

Bidaiari garraioaren zerbitzua eta segurtasuna hobetzen dituzten elementuetako bat markesinen instalazioa da eta, hortaz, komenigarri da enpresei diru-laguntzak emateko irizpideak ezarriko dituen deialdia onestea, laneko garraio zerbitzuen autobus geralekuetan markesinak eraiki eta instalatzen egindako inbertsioak zati batean finantzatzeko.

Horrenbestez, Herri Lan, Garraio eta Komunikazio Departamentuaren egitura organikoa ezartzen duen otsailaren 24ko 47/2005 Foru Dekretuaren 28. artikuluaren bidez emandako ahalmenak erabiliz, eta Garraioen Plangintza eta Araubide Juridikoaren Zerbitzuak egindako proposamenari jarraituz,

EBATZI DUT:

1. 2010. urtean laneko garraio zerbitzuen autobus geralekuetan markesinak eraiki eta instalatzen egindako inbertsioak zati batean finantzatzeko, enpresa pribatuei diru-laguntzak emateko deialdia onestea, ebazpen honetako I. eranskineko oinarriek eta II. eranskinean xedatutakoak arautuko baitute.

2. 40.000 euroko gastua onestea, 2010. urteko Gastuen Aurrekontuko "Gelditzeko bideak eta markesinak enpresentzat" izeneko 630000-62110-7609-441102 kontu-sailaren kargura gauzatuko dena. Espediente zenbakia: RCSA 2464.

3. Ebazpen hau eta eranskinak Nafarroako Aldizkari Ofizialean argitaratzea.

4. Ebazpen hau Garraioen Plangintza eta Araubide Juridikoaren Zerbitzura eta Garraioen Antolamendu eta Kudeaketaren Zerbitzura, Kudeaketa Ekonomikoaren Bulegora eta Herri Lan, Garraio eta Komunikazio Departamentuan Ekonomia eta Ogasunekoak duen kontu-hartzaile delegatuari igortzea, behar diren ondorioak izan ditzan.

Iruñean, 2010eko martxoaren 15ean.-Garraioetako zuzendari nagusia, Susana Labiano Bastero.

I. ERANSKINA

Enpresa pribatuendako diru-laguntzen oinarriak, 2010. urtean
laneko garraio zerbitzuen autobus geralekuetan markesinak eraiki
eta instalatzen egindako inbertsioak zati batean finantzatzeko

1.-Deialdiaren xedea.

Enpresei diru-laguntzak emateko arauak ditu xede deialdi honek, norgehiagokako araubidean, 2010. urtean laneko garraio zerbitzuen autobus geralekuetan markesinak eraiki eta instalatzen egindako inbertsioak zati batean finantzatzeko.

2.-Onuradunak.

Deialdi honen xedeko diru-laguntzak izaten ahal dituzte baldintza hauek betetzen dituzten enpresa pribatu guztiek:

a) Nafarroako Foru Komunitatean kokatuta dauden lantokiak izatea.

b) Laneko garraio zerbitzuak eskaintzea lantoki horietako langileei, bai bere autobusekin (bidaiari garraio pribatu osagarrirako baimen baten bitartez), bai bidaiari garraioan aritzen den enpresa batekin zerbitzua kontratatuta, enpresa horrek erabilera bereziko garraio erregularrerako baimena izanik.

c) Diru-laguntzei buruzko azaroaren 9ko 11/2005 Foru Legearen 13. artikuluan ezarritako debekurik ez izatea.

3.-Diru-laguntza jaso dezaketen gastuak eta horiek gauzatzeko epea.

3.1. Deialdi honetan araututako diru-laguntzak markesinak eraiki eta instalatzeko behar diren inbertsioak zati batean finantzatzeko erabiliko dira osorik.

Diru-laguntza markesina eraiki eta instalatzeak sorturiko gastuaren %75ekoa izanen da, eta nolanahi ere, ez da izanen 12.000 eurotik gorakoa, markesina bakoitzeko.

Onartutako eskaera kopuruaren eta aurrekontuetan dagoen diruaren arabera, diru-laguntza markesina eraiki eta instalatzeak sorturiko gastuaren %90ekoa izaten ahal da, betiere 15.000 eurotik gorakoa izan gabe, markesina bakoitzeko.

Orobat, aurreko lerroaldean aurreikusitakoaren arabera, aurrekontua nahikoa bada onartutako eskaera guztientzat, enpresa edo lantoki berean bi markesina eraiki eta instalatzeko diru-laguntza ematen ahalko da.

3.2. Ez dute diru-laguntzarik izanen markesinak konpondu, berritu, edo beste toki batera eramateko gastuek, ezta haien mantentze eta kontserbazio lanetako gastuek ere.

3.3. 2010eko ekitaldi ekonomikoan hasi beharko da markesina eraikitzen, eta 2010eko azaroaren 17a baino lehen instalatuta egon beharko du.

4.-Eskaeren aurkezpena eta ekarri beharreko agiriak.

4.1. Eskaerak Herri Lan, Garraio eta Komunikazio Departamentuko Erregistroan (Iruñeko San Ignazio etorbidea, 3-behea, Iruña) aurkeztu beharko dira, edo Lehendakaritza, Justizia eta Barne Departamentuaren iragarkian (2009ko 33. Nafarroako Aldizkari Ofiziala, martxoaren 18koa) ageri diren Nafarroako Gobernuaren Erregistro Orokorreko edozein bulegotan, edo Herri Administrazioen Araubideari eta Administrazio Prozedura Erkideari buruzko azaroaren 26ko 30/1992 Legearen 38.4 artikuluan adierazitako erregistro edo bulegoetan, hilabeteko epean, deialdi hau Nafarroako Aldizkari Ofizialean argitaratu eta biharamunetik aurrera.

Postetxeetan aurkezten diren eskabideei dagokienez, gutun-azal ireki batean aurkeztuko dira, lehen orrialdearen idazpuruan bulegoaren izena, data, tokia eta minutua adieraz daitezen. Datu horiek eskabidea igorri dela frogatzen duen gordekinean ere adierazi beharko dira.

4.2. Eskaerak prestatu den ereduaren araberakoak izanen dira. Eredua Garraio Zuzendaritza Nagusian (Yanguas y Miranda, 5; Iruña) eta Nafarroako Gobernuaren web gunean (Zerbitzuak) eskura daiteke, eta dokumentazio hau erantsiko zaio:

a) Erantzukizuneko aitorpena, Diru-laguntzei buruzko Foru Legearen 13. artikuluko baldintza orokorrak (2.c. oinarria) betetzearen gainekoa, eta lortutako gainerako diru-laguntzen gainekoa, "de minimis" laguntzak barne (7.2 oinarria).

b) Bidaiari garraio pribatu osagarrirako baimena, edo 2010. urtean laneko garraio zerbitzua emateko enpresa batekin egindako kontratua. Enpresa horrek indarrean izan beharko du erabilera bereziko garraio erregularrerako baimena.

c) 2009ko abenduari dagokion Tc1.

d) Erantzukizuneko aitorpena, 2009an laneko garraio zerbitzua erabili zuten langileen kopuruari buruzkoa.

e) Markesina eraiki eta instalatzeko aurrekontua, eta markesinaren oinarrizko proiektuari buruzko txosten baloratu eta eguneratua, arloko teknikari eskudunak sinaturikoa. Horiekin batera, eraiki eta instalatu beharreko obra agertzen duen dokumentazio grafikoa erantsi beharko da, obra aztertu eta baloratzeko.

Oinarrizko proiektu horrek deialdi honetako II. eranskinaren 1. eta 3. ataletan ezarritako baldintzak izan beharko ditu kontuan, eta instalatuko den markesinaren modeloa adierazi beharko du.

f) Non instalatu nahi den markesina, higiezin horren lurzatiaren zedula, eskatzailearen titulartasuna erakusten duela, edo eskaerak aurkezteko epea bukatzen denetik higiezin hori 5 urtean gutxienez eskura duela frogatzen duen dokumentazioa.

Aipatu lurzati zedulan geralekuaren eta markesinaren kokalekua zehazki adieraziko da.

Markesinaren kokalekuak deialdi honetako II. eranskinaren 2. atalean jasotako gomendioak bete beharko ditu, autobus geralekuak zuzen kokatu eta seinalatzeko.

4.3. Agiriek jatorrizkoak edo notario nahiz administrazio bidez kautotutako kopiak izan beharko dute.

4.4. Agirien aurkezpenean akatsik atzemanez gero, edo oso-osorik beteta egon ez edo eskaera baloratzeko aspektu garrantzitsuren bat behar bezala frogaturik ez badago, eskatzaileari akats edo hutsunea zuzentzeko eskatuko zaio. Horretarako, gehienez ere 10 egun balioduneko epea emanen zaio, errekerimendua jakinarazi eta ondoko egunetik hasita, eta ohartaraziko, hala egin ezean, eskaera bertan behera uzten duela ulertuko dela, eta espedientea artxibatzeko ebazpena emanen dela, eta jakinaraziko zaiola.

5.-Hautatzea eta eskaerak baloratzeko irizpideak.

5.1. Aurkeztutako agiriak aztertu eta baloratuko ditu Garraioen Plangintza eta Araubide Juridikoaren Zerbitzuak 5.2 oinarrian ezarritako irizpideen eta deialdi honetako II. eranskinean xedatutakoaren arabera, Garraioko zuzendari nagusiari diru-laguntzak emateko txostena eta proposamena egiteko.

Eskaerak ahalik eta hobekien baloratzeko, Garraioen Plangintza eta Araubide Juridikoaren Zerbitzuak txosten osagarri ez lotzaileak eskatzen ahalko dizkie Barne Zuzendaritza Nagusiko Segurtasun Politikak Garatzeko Zerbitzuari, trafikoaren eta bide segurtasunaren inguruan, eta Herri Lan Zuzendaritza Nagusiari, markesinen kokalekuan eragina izan dezaketen bide sareko jarduketak egitearen inguruan.

Garraioen Plangintza eta Araubide Juridikoaren Zerbitzuak proposatuta, deialdi honetan araututako diru-laguntza ukatzen ahalko da, deialdiaren II. eranskinaren 2. atalean adierazitako gomendioak betetzen ez badira.

5.2. Balia daitekeen diruak mugatuko du eskaeren hautaketa, norgehiagokako araubidean, eta markesina instalatu gogo den lantokiko langile kopuruaren irizpidea hartuko da kontuan, ondoko honen arabera:

-10-50 langile: puntu bat.

-50-100 langile: 2 puntu.

-100-500 langile: 3 puntu.

-500-1.000 langile: 4 puntu.

-1.000 langiletik gora: 5 puntu.

Eskaeren artean berdinketarik emanez gero, zein enpresak izan dituen langile gehien 2009an haren lantokian laneko garraio zerbitzua erabiltzen, hark izanen du lehentasuna.

6.-Ebazpena.

6.1. Garraioen Plangintza eta Araubide Juridikoaren Zerbitzuak txostena eta proposamena egin ondoren, Garraioko zuzendari nagusiak ebazpena eman eta hura jakinaraziko du, bi hilabeteko epean, eskaerak aurkezteko epea amaitzen denetik kontatzen hasita. Epe hori espresuki ebazpenik jakinarazi gabe iraganik, interesdunek eskabidea ezetsi dela ulertuko dute. Hala ere, Administrazioa beharturik dago ebazpena ematera.

6.2. Diru-laguntza emateko ebazpena arrazoitua izanen da eta bertan diru-laguntzaren xedeak, zenbatekoa eta ordaintzeko modua agertuko dira.

6.3. Deialdirako onetsitako gastuak eta 3. oinarrian aurreikusitako mugak, diru-laguntzaren zenbatekoa baldintzatu eta mugatuko dute.

2010eko ekitaldi ekonomikotik diru-laguntzak jasotzeak ez du inolako eskubiderik ematen ondorengo ekitaldietan ere diru-laguntzak hartzeko.

6.4. Diru-laguntza emateko kontuan hartu diren baldintzen edozein aldaketaren ondorioz, laguntza emateko ebazpena aldatuko da.

7.-Diru-laguntzen bateragarritasuna eta "de minimis" diru-laguntzen izaera.

7.1. Deialdi honen bidez emanen diren diru-laguntzak bateragarriak izanen dira Administrazio honek, beste edozein administrazio publikok, erakunde publiko, pribatu edo partikularrek, nazionalak nahiz nazioartekoak direnak, emandako diru-laguntzekin.

Diru-laguntza jasotzen dutenek aldi berean beste entitate bateko diru-laguntzak hartu izana jakinaraziko diote, kobratu baino lehen, Garraioaren Plangintza eta Araubide Juridikoaren Zerbitzuari. Laguntza guztien zenbateko osoa ez da izanen, inola ere, onuradunak eraiki eta instalatzeko egin beharreko obren kostua baino handiagoa. Kasu horretan, deialdi honek emaniko diru-laguntza murriztuko da, jasotako laguntzen zenbateko osoa markesina eraiki eta instalatzeko obren benetako kostua baino handiagoa izan ez dadin.

7.2. Deialdi honetako diru-laguntzak "de minimis" laguntzak dira, Europako Batzordeak abenduaren 15ean emandako 1998/2006 Erregelamenduan xedaturikoarekin bat. Erregelamendu hori Itunaren 87. eta 88. artikuluak "de minimis" laguntzei aplikatzeko moduari buruzkoa da.

Erregelamendu horrekin bat, edozein enpresari emaniko "de minimis" laguntza osoa, gehienez ere, 200.000 eurokoa izanen da, edo 100.000 eurokoa, errepide bidezko garraioko sektorean diharduten enpresentzat, hiru zergaldiko edozein denboralditan.

Horretarako, onuradunak behartuta daude kasuan kasuko zergaldian eta aurreko bi zergaldietan harturiko bestelako "de minimis" laguntzak adieraztera, eskabideak aurkezten dituztenean. "De minimis" laguntzen baturak, diru-laguntza hau barne, gehieneko mugak gainditzen baditu, diru-laguntzaren zenbatekoa gutxituko da, muga horiek ez gainditzeko.

8.-Diru-laguntzaren onuradunen betebeharrak.

Onuradunek Diru-laguntzei buruzko azaroaren 9ko 11/2005 Foru Legearen 9. artikuluan ezarritako beharkizunak bete beharko dituzte.

8.1. Diru-laguntza hauek jasotzen dituzten onuradunek deialdi honen 3. oinarrian aipatutako xederako erabili beharko dituzte ematen zaizkien funtsak.

8.2. Markesinak zaindu, garbitu, mantendu, konpondu edo ondoren berritzeko lanak haien onuradunen kontura eta kargura eginen dira.

8.3. Markesinak instalatzeko deialdi honen xedeko laguntzen onuradunek ezin izanen dituzte kendu edo beste toki batera eraman deialdi honek emandako diru-laguntzaren ordainketa onesten denetik ondoko 5 urteetan, gutxienez, Garraio Zuzendaritza Nagusiak aurretik horretarako baimena eman ezean.

8.4. Laguntza hauek hartzen dituen enpresa onuradunak gutxienez 5 urtean eutsi beharko dio laneko garraio zerbitzuari, diru-laguntza ordaintzeko onesten den egunetik aurrera.

8.5. Diru-laguntzaren onuradunek onartu beharko dute Garraio Zuzendaritza Nagusiak eskatzen dituen frogak eta dokumentuak aurkeztea.

8.6. Onuradunek Herri Lan, Garraio eta Komunikazio Departamentuari jakinarazi beharko diote diru-laguntzaren xedeko jarduera noiz den hastekoa eta bukatzekoa. Halaber, hala eskatzen zaienean jakinarazi beharko dute eraikitzea nola dagoen eta zer beste edozein gorabehera gertatu den markesina instalatzeko prozesuan. Markesina aurkezteko, edo deialdi honetan aipatzen den jarduera abian jartzeak dakartzan jarduketei buruzko edozein argibide emateko, departamentuak aldez aurretik baimena eman beharko du.

8.7. Garraio Zuzendaritza Nagusiak, Garraioen Plangintza eta Araubide Juridikoaren Zerbitzuak bitarteko, zilegi izanen du obrak ikuskatzeko nahi adina bisita tekniko egitea obrak irauten duen bitartean. Diru-laguntza hartzen duen enpresa onuraduna beharturik dago obretara sartzen uztera eta obraren gaineko edozein dokumentazio ematera.

8.8. Publizitatean eta edozein argibidetan, Nafarroako Gobernuaren komunikazio arloko araudia aplikatuko da, indarrean dagoena. Diruz lagundutako jardueren xedeko dokumentu guztietan, Nafarroako Gobernuaren logotipoa sartu beharko da, Nafarroako Gobernuaren sinbolo ofiziala eta haren erabilera arautzen dituen maiatzaren 3ko 189/2004 Foru Dekretuan xedaturikoarekin bat. Halaber, deialdi honen baitan egindako jarduerak zabaltzeko ekintzetan, espresuki adieraziko da Nafarroako Gobernuak, Herri Lan, Garraio eta Komunikazio Departamentuaren bitartez, parte hartu duela. Hedabideak bertan daudela egindako ekitaldietara Nafarroako Gobernuko ordezkari bat gonbidatu beharko da.

9.-Diru-laguntzaren xedea bete izanaren justifikazioa eta ordainketa.

9.1. Markesina eraiki eta instalatzeko obra amaitu ondoren, diru-laguntza jasotzen duten enpresa onuradunek hurrengo agiriak aurkeztu beharko dituzte 2010eko azaroaren 30a baino lehen, onetsitako diru-laguntza ordaintzeko:

a) Markesina eta argibideetarako zutabea deialdi honen II. eranskinaren 1. atalean adierazi bezala instalatu direla adierazten duen dokumentazioa, markesina eraiki eta instalatzen egindako gastuaren ordainagiriekin batera.

b) Ondoko datuak zehazten dituen dokumentazioa: obra noiz esleitu zen, enpresa esleipen-hartzailea, identifikazio datuak adierazita (izena, IFZ, helbidea, telefonoa, posta kodea eta herria) eta esleipenaren zenbatekoa.

c) Markesina instalatueta kontratatzeko gastuaren zenbatekoa 30.000 eurotik gorakoa denean, onuradunak erantzukizuneko aitorpena aurkeztu beharko du, non azalduko baitu hornitzailea eragimen eta ekonomia irizpideei jarraituz hautatu dela.

9.2. Lanak diruz lagundutako proiektuaren arabera eginen dira. Diru-laguntzaren xedeko inbertsioan hasieran aurreikusi ez ziren kostu gehigarriak onuradunaren kargura izanen dira.

9.3. Obren bukaerako kostua diruz lagundutako aurrekontukoa baino txikiagoa bada, diru-laguntzaren zenbatekoa murriztuko da, kostua jaitsi den proportzio berean, deialdi honen 3. oinarrian aipatutako ehunekoa ez gainditzeko.

9.4. Lehendik Nafarroako Gobernuaren diru-laguntzarik jaso ez bada, onuradunak transferentzia bidez kobratzeko eskaeraren inprimakia (jatorrizkoa) igorri beharko du helbide honetara: Nafarroako Gobernua - Diruzaintza, Karlos III.aren etorbidea, 4-behea; 31002 Iruña. Inprimakia Nafarroako Gobernuaren web orrian (www.navarra.es) eskuratzen ahal da.

10.-Ez-betetzea.

Deialdi honetako oinarrietan ezarritakoa betetzen ez bada, diru-laguntza emateko oinarritzat hartu ziren datuak faltsutzen edo xedeak aldatzen direla ikusten bada, diru-laguntza galdu eginen da, eta ordura arte jasotako kopuruak itzuli beharko dira, alde batera utzi gabe legeetan aurreikusi diren gainerako erantzukizunak.

Oinarri hauetan aurreikusita ez dagoen orotan Diru-laguntzei buruzko ekainaren 9ko 11/2005 Foru Legean oro har xedatutakoa aplikatuko da.

11.-Arau-hausteak eta zehapenak.

Arau-hauste eta zehapenei dagokienez, Diru-laguntzei buruzko azaroaren 9ko 11/2005 Foru Legearen IV. tituluan xedatutakoari lotuko zaio.

12.-Emandako diru-laguntzen publizitatea.

Ematen diren diru-laguntzak eta haien onuradunen zerrenda Nafarroako Gobernuaren Interneteko atarian argitaratuko dira: www.navarra.es.

13.-Errekurtsoak.

Deialdi honen, bere oinarrien eta aplikazio egintzen aurka, interesdunek gora jotzeko errekurtsoa aurkezten ahal dute, Herri Lan, Garraio eta Komunikazioetako kontseilariari zuzendua, hilabeteko epean, hura argitaratu edo delako egintza jakinarazi eta biharamunetik aurrera.

II. ERANSKINA

Geralekuek, markesinek eta kokalekuak
bete beharreko baldintza eta betekizunak

1.-Markesina guztietarako nahitaezko elementua.

Argibideetarako zutabea.

Bi aldeetatik ikusgai dagoela markesinen ondoan jartzen den zutabea da. Batez ere, bi zeregin ditu:

1. Autobus geralekua dagoela adieraztea.

2. Autobusen ordutegiari buruzko informazioa, eta enpresak interesgarritzat jotzen dituen beste informazio batzuk ematea.

Gutxi gorabehera 3,25 metroko altuera, 0,5 metroko diametroa eta 1,5 milimetroko lodiera dituen zutoin zilindrikoa dauka (burdinazko xaflaz eginiko tutua). Zutoin horrek 3 zati bereizi ditu:

-Goiko zatia: metro 1eko altuera du, atzealdea gorria da, eta letrek Nafarroako Gobernuaren anagrama eta logotipoa adieraziko dituzte, zurian, diruz lagundutako obren informazio euskarrietarako diseinuari buruzko arauetan xedaturikoarekin bat, Nafarroako Foru Komunitatearen identitate korporatiboaren programaren arabera.

-Erdiko zatia alboko beirazko lau xafla gardenez osatzen da. Xaflak aroztegi metalikoko profilen gainean daude. Profilak 40 x 40-ko lau profil metalikoei lotuta daude, eta argibideetarako zutabearen goiko eta beheko aldeen arteko lotura eta euskarri gisa balio dute aldi berean. Lau xafletako bat birakaria da bertikalki, barrura sartzeko, eta giltzarrapo batekin edo antzeko zerbaitekin ixten da. 1,25 metroko altuera du. Barnetik euskarri biratzailea du, bidaiarien autobus garraioko zerbitzuen ordutegiari buruzko informazioa edo beste informazio interesgarri batzuk jartzeko.

-Beheko zatiak metro bateko altuera du, metalezkoa da, gris kolorekoa, eta lurrari lotzeko sistemak ditu.

Beste aukera bat:

-Enpresak, Garraio Zuzendaritza Nagusiak baimena eman ondotik, zutabe mota aldatzen ahal du; betiere, Nafarroako Gobernuaren logotipoa eta anagrama agertuko dira zutabean, kolore zuritan, araudiari jarraituz, diruz lagundutako obra baten euskarriari dagokion moduan.

2.-Autobus geralekuetan markesinak zuzen kokatu eta seinalatzeko gomendioak.

A) Geralekuan autobuserako erreia egotea. Irisgarritasuna.

Guztiz ezinezkoa izan ezean, geralekua eta markesina galtzadatik kanpoko errei batean jarriko dira. Erreiaren eta galtzadaren artean autobus batek honako maniobra hauek egiteko beste distantzia egonen da: gelditzeko, jendea hartu eta uzteko eta bidean zailtasunik eta arriskurik gabe sartzeko.

Kokalekuak erabiltzaileen, eta bereziki, mugikortasun murriztuko pertsonen irisgarritasuna bermatu behar du, trafikoaren fluxua ahalik eta gutxien eraginda.

Bus geralekuetarako seinale horizontalak gomendatzen dira, formatu egokian eta aski den tamainarekin.

B) Kokalekua eta ikuspena.

Markesina eta autobusetarako geralekua tarte zuzenetan kokatu beharko dira. Markesinak ez dira inoiz instalatuko kurba batean, kurba baten amaieran eta sestra-aldaketan, ezta behar bezalako ikuspena ez duten lekuetan ere, eta betiere salgaien zamalanetatik urrun.

Geralekua, markesina eta seinale bertikalak argi ikusi behar dira, haiek atzematea eragozten duen elementurik gabe, hala nola: zuhaitzak, hiri altzariak, aparkatutako ibilgailuak...

Markesinen kokalekuan eragina izaten ahal duten hirigintzako jarduketak planifikatuta dauden eremuetan ez da markesinarik jarriko.

C) Zebra-bidea edo oinezkoen pasabidea.

Komeni da markesina eta geralekua zebra-bide baten ondoan jartzea. Bestela, markesinatik hurbil eta geralekuaren aurrean -zirkulazioaren noranzkoan- behar bezala seinalatutako zebra-bidea jarriko da, erabiltzaileak autobusaren atzetik gurutzatzea eragozteko, horrek ikuspenik ez izatea ekarriko luke eta.

Oinezkoen pasabideak edo zebra-bideak kalitatezko pintura distiratsuaz eta ez labaingarriaz seinalatzea gomendatzen da, euria egiten duenean motor-gidariak ez erortzeko eta ibilgailuek irrist ez egiteko. Behar bezalako seinale bertikalak egunez zein gauez edo eguraldi txarrean ikusteko modukoak izanen dira.

D) Argiztapena.

Sare elektrikoa hurbil daukaten lekuetan, argi egokiak instalatuko dira markesinan hobeki ikusteko, baita seinaleen ordutegiei buruzko informazioa ere ikusteko.

3.-Diru-laguntzaren xedeko markesinen modeloak.

1. modeloa; markesina herdoilgaitza:

Altzairu herdoilgaitzeko markesina, diseinuagatik obra zibilik behar ez duena; metalezko profil kroskobakarreko egitura du, metalezko eta polikarbonatoko profila duen estalkia, ura biltzen duena; beira gardeneko itxitura bertikalak, tako hedakorren bidez lurrean tinkatua, eta nibelazio sistemaz hornitua. Egiturari lotutako eserleku finkoa.

Ezaugarriak:

Itxura arineko markesina, altzairu herdoilgaitzekoa osorik; bere diseinuari esker, ez da obra zibil behar muntatzeko.

Zehaztapen eta xehetasunak:

Oina:

Ainguratzeko bridak tako hedakorrekin eta zorro hariztatuak markesina nibelatzeko. Zorro horiek altzairu herdoilgaitzeko estalkia daramate. Hori guztia altzairu herdoilgaitzekoa.

Egitura:

Altzairu herdoilgaitz distiratsuko tutuak, 70ko diametrokoa gutxienez eta 1,5 milimetroko diametrokoa gutxienez.

Beirari eusteko piezak, material berekoak, soldatuak.

Itxitura bertikalak:

Segurtasuneko beira garden kolore gabea, 6 mm-ko bi kristalez osatua, tartean butiral gardeneko xafla daramana; alaka egina dute eta ertzak leunduta.

Ahalik eta tarte txikiena izanen da kristalen artean, haizea pasa ez dadin.

Estalkia:

Tutu egitura eta altzairu herdoilgaitz distiratsuko profilak, material bereko torloju eta erretenekin.

Materialak: polikarbonato trinkoko xaflak, 3 mm lodi gutxienez ere.

Altzariak:

Zurezko edo altzairuzko eserlekua, kartaboi herdoilgaitzez egiturari lotua.

Zola:

Egitura lotzeko behar bezain lodi. Malda txikia izanen du kanporantz, putzurik egin ez dadin, eta ez du koskarik izanen inguruarekin, gurpil-aulkian doazen minusbaliatuak edo mugikortasun murriztuko pertsonak sartu ahal daitezen.

Markesinaren neurriak, gutxi gorabehera:

-3,5-4,5 metro luze.

-1,5 metro zabal.

-2,7 metro altu, gehienez ere.

-2,2 metro altu, gutxienez ere.

-Beste aukera bat:

Enpresak komenigarri iritziz gero, altzairu herdoilkorreko egitura duen markesina instalatzen ahal da, eguraldiari aurre egiteko moduko tratamenduarekin gainazalean; horretarako, Garraio Zuzendaritza Nagusiaren onespena eskatu beharko da.

2. modeloa; zurezkoa:

Honakoek osatzen dute markesina hori:

Egitura hibridoa, burdina galbanizatuz eta zurez egina (trataturiko ler gorria, eguraldiaren aurreko erresistentzia handitzeko).

Estalkia eta bere euskarriak zur geruzatu lauzkoak dira. Goi-presioetan eta goi-tenperaturetan gogortutako zuntz eta erretxinen nahasketak osatzen du barnetik, 11-13 milimetroko lodiera du, bi isurialderekin eta behar adinako maldarekin. Guztira, 10 metro koadroko eremua egonen da estalirik.

Itxitura bertikalak: alboko bi horma eta atzeko bat: horiexek ere zur geruzatuzkoak dira, eta aluminiozko arrastelen gainean daude, atzeko hormak hiru metro ditu, alboko hormek 1,5 metro dituzte, eta altuera 2,2 metro ingurukoa da.

Atzeko horman zurezko bankua jartzen da, 2,4 x 0,4 metrokoa, burdina galbanizatuzko metalezko ainguraketen gainean.

Zola hormigoizko azalera lau bat da, 6,5 x 3,6 metroko (23 m², gutxi gorabehera), eta 13 cm-ko lodiera du. Legar trinkotuzko geruza baten gainean dago, egitura, bankua eta zutoina edo argibideetarako zutabea bertan ainguratuta daudela.

4.-Zehaztapenak:

Enpresa interesdunak bere lurzatian markesina instalatzeko diru-laguntza eskatzeari buruzko erabakia hartu ondoren, bertako teknikarien eta Garraioen Plangintza eta Araubide Juridikoaren Zerbitzuko langileen arteko bilera hitzartzen ahalko da, markesinaren instalazioak bete beharko dituen zehaztapenak eta xehetasunak zehazteko. Bi markesina modelo horien eraikuntza-xehetasunak eskatzaileen eskura egonen dira, Garraioen Plangintza eta Araubide Juridikoaren Zerbitzuan.

Iragarkiaren kodea: F1005044