51. ALDIZKARIA - 2010eko apirilaren 26a

1. NAFARROAKO FORU KOMUNITATEA

1.4. DIRU-LAGUNTZAK, LAGUNTZAK ETA BEKAK

27/2010 FORU AGINDUA, martxoaren 17koa, Vianako Printzea Erakundea-Kultura eta Turismo Departamentuko kontseilariak emana, Museoen Zerbitzuan (Nafarroako Museoaren Atalean) aritzeko bi prestakuntza bekaren deialdia onetsi, dagokion ebaluazio batzordea izendatu eta deialdi horretarako behar den gastua egiteko baimena ematen duena.

Kultura Zuzendaritza Nagusiko Museoen Zerbitzuak txostena aurkeztu du eta bertan proposatu Museoen Zerbitzuan (Nafarroako Museoaren Atalean) aritzeko bi prestakuntza bekaren deialdia egitea, hura arautuko duten oinarriak onestea eta behar den gastua egiteko baimena ematea.

Nafarroako Foru Komunitateko Administrazioan eta haren erakunde autonomoetan prestakuntza bekak emateko araubide orokorra ezartzen duen apirilaren 19ko 172/2004 Foru Dekretuak ematen dizkidan ahalmenak erabiliz,

AGINDU DUT:

1. Bi bekatarako deialdia egitea, lizentziadunek, Nafarroako Gobernuko Museoen Zerbitzuaren bidez (Nafarroako Museoaren Atala), museoen antolaketaren eta funtzionamenduaren gaineko ezagutza teoriko eta praktikoa jaso eta prestakuntza akademikoa osa dezaten.

2. Foru agindu honen xedeko bi prestakuntza bekak Museoen Zerbitzuan (Nafarroako Museoaren Atalean) aritzeko dira, 2010eko irailetik 2011ko abuztura bitarte, biak barne.

3. Deialdia arautuko duten oinarriak onestea.

4. Eskaerak ebaluatuko dituen batzordeko kideak izendatzea:

Batzordeburua: Carmen Valdés Sagüés andrea, Kultura Zuzendaritza Nagusiko Museoen Zerbitzuko zuzendaria.

Batzordekidea: Miguel Angel Hurtado Alfaro jauna, Nafarroako Museoaren Ataleko burua.

Batzordekidea: Francisco Javier Zubiaur Carreño jauna, Museoetako goi mailako teknikaria, Nafarroako Museoaren Atalari atxikia.

Batzordekidea: Ana Elena Redín Armañanzas andrea, goi mailako teknikaria, Nafarroako Museoaren Atalari atxikia.

Ordezko mahaikidea: Berta Balduz Azcárate andrea, Zaharberritze lanetako goi mailako teknikaria, Nafarroako Museoaren Atalari atxikia.

5. Guztira 20.400,00 euroko gastua baimentzea. Horietatik, 6.800,00 euro, 2010eko irailetik abendura bitarte erabiltzeko izanen dira eta 2010eko gastuen aurrekontuko "Bekadunak" izeneko A20003 A2300 4800 333100 kontu-sailaren bidez ordainduko dira. Gainerakoa, 13.600,00 euro, 2011ko urtarriletik abuztura bitarte (hori barne) erabiltzeko, 2011ko kontu-sailaren kargura. Betiere, dagokion kontu-sailean behar adina diru izan beharko da horretarako.

6. Ebazpen hau Nafarroako Aldizkari Ofizialean argitara dadila agintzea.

7. Espediente hau Nafarroako Gobernuko Diru-laguntzen eta Laguntzen Biltoki Zentralean erregistratuko da, gako hauekin: A23000 gakoa, Museoen Zerbitzua, diru-laguntzen 1866 lerroa, 2010eko bekadunak, 521206-000 marjinal-ordinala, 2315 deialdia.

8. Foru agindu hau jakinaraztea Kultura Zuzendaritza Nagusiari, Ekonomia eta Ogasun Departamentuak Zuzendaritza Nagusi horretan duen kontu-hartzaile delegatuari, Museoen Zerbitzuari, Nafarroako Museoaren Atalari, Vianako Printzea Erakundea-Kultura eta Turismo Departamentuko Idazkaritza Tekniko Nagusiari, Kudeaketa Ekonomikoaren Bulegoari eta ebaluazio batzordeko kideei, eta adieraztea horren kontra gora jotzeko errekurtsoa jar daitekeela, Nafarroako Gobernuari zuzendua, hilabeteko epean, jakinarazi eta biharamunetik aurrera.

Iruñean, 2010eko martxoaren 17an.-Vianako Printzea Erakundea-Kultura eta Turismo Departamentuko kontseilaria, Juan Ramón Corpas Mauleón.

ERANSKINA

Nafarroako Gobernuko Museoen Zerbitzuan (Nafarroako Museoaren Atalean) aritzeko prestakuntzako bi beka emateko deialdiaren oinarriak. Deialdia honako arau hauen mende egonen da: Nafarroako Foru Komunitateko Administrazioaren eta haren erakunde autonomoen prestakuntza bekak emateko araubide orokorra ezartzen duen apirilaren 19ko 172/2004 Foru Dekretua (2004ko 57. Nafarroako Aldizkari Ofiziala, maiatzaren 12koa) eta Diru-laguntzei buruzko azaroaren 9ko 11/2005 Foru Legea (2005eko 136. Nafarroako Aldizkari Ofiziala, azaroaren 14koa)

OINARRIAK

1.-Prestakuntza bekaren xedea.

Deialdiko prestakuntza beken xedea da lizentziadunek, Nafarroako Gobernuko Museoen Zerbitzuaren bidez, museoen antolaketaren eta funtzionamenduaren gaineko ezagutza teoriko eta praktikoa jasotzea, prestakuntza akademikoa osatzeko.

2.-Beka kopurua.

Deialdian bi prestakuntza beka eskaintzen dira.

3.-Bekaren iraupena.

Prestakuntza beka bakoitza hamabi hilabete artekoa izanen da, bekak erabiltzen hasten direnetik hasita, oinarri hauetako 10.1 puntuan zehazten den bezala.

4.-Bekaren dotazio ekonomikoa, ordaintzeko modua eta Administrazioarekiko harremana.

4.1.-Prestakuntza beka bakoitzak 10.200,00 euro izanen ditu urtean.

Hamabi hilabetetan ordainduko da, 850,00 euro hilero.

4.2.-Hilero ordainduko da, dagokion zatia, hilabetearen bukaeran.

4.3.-Bekadunei ematen zaien dirua ez da soldata edo lansaritzat hartuko, diru-laguntza publikotzat baizik.

4.4.-Beka erabiltzea eta bekaduna izatea ez da zerbitzuak ematea, eta egoera horrek ez dakar berarekin lan harremana, administratiboa edo estatutupekoa sortzea Nafarroako Foru Komunitateko Administrazioarekin edo haren erakunde autonomoekin, ez eta antzeko eskubiderik lortzea ere. Administrazioak ez du konpromisorik hartuko beka bukatutakoan bekaduna bere plantillan sartzeko.

4.5.-Prestakuntza bekaren onuradunari agintzen zaizkion lan edo jarduerak Museoen Zerbitzuko funtzionario edo kontratudunek gainbegiratuko dituzte, horiek izanen baitira lan horien erantzuleak. Bekadunak ezin izanen ditu funtzionario publikoen eginkizunak bete edo berarentzat hartu, ez eta hirugarrenen aurrean Administrazio Publikoaren kide, ordezkari edo agente gisa agertu ere.

4.6.-Praktikaldiak iraun bitartean bekadunek hogeita hamar atseden egun izanen dituzte, hilabete bakoitzeko 2,5 egun natural.

4.7.-Halaber, prestakuntzarako behar diren joan-etorriak egin beharko ditu bekadunak.

5.-Beka eskatzen dutenek bete behar dituzten baldintzak.

Beka bat lortu ahal izateko, betebehar hauek izanen dira:

a) Adinez nagusia izatea.

b) Espainiako herritarra izatea edo Europar Batasuneko estaturen batekoa edo, Europar Batasunak izenpetu eta Espainiako Estatuak berretsitako nazioarteko itunen arabera, langileen joan-etorri askea aplikatzen duen estaturen batekoa. Dena den, Espainiako nazionalitatea ez dutenek gaztelaniaz behar adina badakitela frogatu beharko dute.

c) Jarduteko gaitasun osoa izatea eta Nafarroako Foru Komunitatearen eta haren erakunde autonomoen laguntza eta diru-laguntza publikoak jasotzeko desgaitua ez egotea.

d) Bizitokia Nafarroan izatea, deialdiaren eguna baino urte bat lehenagotik gutxienez.

e) Unibertsitateko titulu ofiziala edo baliokidea izatea, Espainiako agintariek emana edo baliozkotua, arlo hauetakoren batean: Historia, Artearen Historia, Giza Zientziak, Pedagogia, Psikopedagogia, Hezkuntzaren Zientziak, Antropologia, Soziologia, Dokumentazioa eta Arte Ederrak.

f) Eskatutako titulu hori prestakuntza bekarako deialdia egin aurreko hiru urteen barrenean eskuratua izatea.

g) Bekaren prestakuntza jardueran aritzea galaraz dezakeen gaixotasunen bat ez izatea eta beharrezkoa den gaitasun fisikoa izatea.

h) Museo, liburutegi eta agiritegietan aritzeko Nafarroako Gobernuak emandako prestakuntza bekez inoiz baliatu direnek ezin izanen dituzte beka hauek eskatu.

6.-Eskaera, epeak eta aurkeztu beharreko agiriak.

6.1.-Betebehar horiek agirien bidez eta idatziz frogatu beharko dira, prestakuntza beka jasotzeko eskabidea aurkeztearekin batera. Hori guztia Nafarroako Gobernuaren Erregistro Orokorreko bulegoetan edo Vianako Printzea Erakundea-Kultura eta Turismo Departamentuko Erregistroan (Navarreria kalea, 39. zk., 31001 Iruña) aurkeztu beharko da, edo Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 38.4 artikuluan aipatutako bideetako bat erabiliz.

Hauek dira aurkeztu beharreko agiriak:

a) Eskabidea, http://www.navarra.es/home_es/Servicios/Recursos/Impresos+generales.htm web gunean edo Nafarroako Gobernuko erregistroetan eskura egonen den eskabide orokorreko ereduari jarraikiz, 6.2 puntuan ezarritako epean eta moduan aurkeztu beharrekoa.

b) Nortasun agiri nazionala edo izangaiaren nazionalitatea eta identitatea frogatzen dituen beste agiri baliokideren bat, eta udalaren errolda ziurtagiria, eskaera aurkeztu aurreko urtean Nafarroan bizi izan dela egiaztatzeko.

c) Ikasketa espedientearen ziurtagiria, kurtso bakoitzeko gai guztien kalifikazioekin, zein deialditan gainditu ziren espresuki aipatuta.

d) Izangaiaren "curriculum vitae-a", ikasketa osagarriak, ikastaroak, argitalpenak, lortutako bekak, egindako ikerlanak eta izangaiari egokiak iruditzen zaizkion gainerako jarduera edo merezimendu guztiak adierazten dituena.

e) Nafarroako Ogasun Publikoko zergaduna bada, zerga betebeharrak eguneraturik dituela egiaztatzen duen ziurtagiria.

f) Zinpeko aitorpena, horren bidez jakinarazteko prestakuntza beka hauen xede bereko beste bekarik edo laguntzarik eskatu den edo jasotzen ari den beste departamentu, administrazio edo erakunde publiko edo pribatu batzuen eskutik.

Agertutako merezimenduak jatorrizko edo ofizialki konpultsatutako agiri egokien bidez frogatu behar dira.

6.2.-Prestakuntza bekak deialdi hau Nafarroako Aldizkari Ofizialean argitara eman eta biharamunetik hogei egun naturaleko epean eskatzen ahalko dira.

6.3.-Prestakuntza beka jasotzeko eskaera aurkezteak berarekin dakar eskatzaileak deialdiaren oinarriak onartzea.

7.-Eskatzaileek adierazten dituzten merezimenduak baloratzeko modua eta irizpideak.

7.1.-Izangaiek alegatutako merezimenduak Vianako Printzea Erakundea-Kultura eta Turismo Departamentuko kontseilariak izendatuko duen ebaluazio batzorde batek baloratuko ditu. Kide hauek osatuko dute: Batzordeburua: Carmen Valdés Sagüés andrea, Kultura Zuzendaritza Nagusiko Museoen Zerbitzuko zuzendaria. Batzordekideak: Miguel Ángel Hurtado Alfaro jauna, Nafarroako Museoaren Ataleko burua; Francisco Javier Zubiaur Carreño jauna, Museoetako goi mailako teknikaria, Nafarroako Museoaren Atalari atxikia; Ana Elena Redín Armañanzas andrea, goi mailako teknikaria, Nafarroako Museoaren Atalari atxikia; eta, ordezko, Berta Balduz Azcárate andrea, Zaharberritze lanetako goi mailako teknikaria, Nafarroako Museoaren Atalari atxikia.

Merezimenduak aztertu eta baloratzeko, ebaluazio batzorde horrek beharrezkotzat jotzen dituen txostenak eskatzen ahalko ditu, eta prestakuntza bekak puntu gehien ateratzen dutenei ematea proposatuko du, ondoko baremoan oinarrituz:

-Ikasketa espedientea: 10 puntu gehienez.

-Ikastaroetan, biltzarretan, jardunaldietan, sinposioetan, mintegietan eta antzekoetan parte hartu izana: 5 puntu gehienez.

-Argitalpenak, hitzaldiak, lankidetza bekak, ikerkuntzarako bekak, etab.: 5 puntu gehienez.

Azken bi ataletan aipatutako ikasketak, ikastaroak, argitalpenak, bekak, etab. baloratuko dira, bakar-bakarrik, ondoko arloei buruzkoak direnean, horiexek baitira Nafarroako Museoan aplikatzen diren arloak: Historia, Arkeologia, Numismatika, Artearen Historia, Argazkigintza eta ikus-entzunezko baliabideak, Bibliotekonomia, Antropologia, Soziologia, Dokumentazioa, Pedagogia, Museologia eta Kultur Ondasunen Zaharberritzea.

Eranskinean agiri hau agertzen da: "Nafarroako Gobernuko Museoen Zerbitzuan (Nafarroako Museoaren Atalean) aritzeko prestakuntza beketarako izangaien merezimenduak baloratzeko aplika daitezkeen puntuazioak". Agiri horrek zehaztasun handiagoz adierazten du alderdi hori.

7.2.-Prestakuntza beken banaketa Vianako Printzea Erakundea-Kultura eta Turismo Departamentuko kontseilariak onetsiko du, foru agindu bidez.

8.-Ebazpena jakinarazteko modua eta epea.

8.1.-Bekadunak hautatzeko prozeduraren ebazpena interesdunei jakinaraziko zaie administrazio prozedura erkideari buruzko legerian ezarritako moduan, eta jendaurrean jarriko da Nafarroako Museoko eta Vianako Printzea Erakundea-Kultura eta Turismo Departamentuko iragarki oholean eta Nafarroako Atariko (http://www.navarra.es) Zerbitzuen atalean (Diru-laguntzak, laguntzak eta bekak).

8.2.-Prestakuntza beka jaso ahal izateko, interesdunak hura onartzen duela adierazi beharko du, idatziz, beka erabiltzen hasteko ezartzen den eguna baino lehen. Onarpena Museoen Zerbitzuko Zuzendaritzan (Nafarroako Museoaren Atalean) aurkeztu beharko da.

8.3.-Hautaketa prozedura hiru hilabeteko epean ebatzi ez bada, eta horri buruzko administrazio ebazpenik espresuki jakinarazi edo argitaratu ez bada, interesdunen eskaera administrazioaren isiltasunaren bidez ezetsi dela ulertzen ahalko da.

9.-Prestakuntza jarduerak egiteko tokia, haien zuzendaritzaz arduratuko den unitate administratiboa eta tutoretza.

9.1.-Prestakuntza praktikak Vianako Printzea Erakundea-Kultura eta Turismo Departamentuko Kultura Zuzendaritza Nagusiko Museoen Zerbitzuari atxikita egonen dira, eta Nafarroako Museoan bertan eginen dira (Santo Domingo kalea, 47, Iruña).

9.2.-Bekadunek jarraian adierazten diren funtzionamendu arloetako bat hautatuko dute praktikaldia egiteko. Jaso dituzten puntuazioen arabera (handienetik txikienera) eginen dute hautaketa.

Arloak:

-Bildumak eta kultur jarduera.

-Jarduera didaktikoa.

9.3.-Eskatutako titulazioa edo goragokoa duen tutore batek zuzendu eta gainbegiratuko du bekadunen jarduera. Tutore hori Nafarroako Museoaren Atalak izendatuko du bertan ari diren langileen artetik.

9.4.-Tutoreak egin beharreko lanak agindu eta ordutegiak programatuko ditu, eta bekadunek beren eginbehar orokor eta berariazkoak betetzen dituzten begiratuko du.

10.-Prestakuntza praktiken hasiera eta iraupena. Prestakuntza bekari uko egitea.

10.1.-Prestakuntza bekaren onuraduna 2010eko irailaren 1ean hasiko da jarduerak egiten eta 2011ko abuztuaren 31n bukatuko ditu, bi egunak barne. Horrela egiten ez badu, onuradunak bekari behin betiko uko egiten diola ulertuko da, non eta organo eskudunak ezinbesteko arrazoiak edo behar bezala justifikatutako beste edozein gorabehera ikusten ez dituen.

10.2.-Bekadunak hogeita hamar orduko jardunaldia (08:00etatik 14:00ak arte) izanen du astean, astelehenetik ostiralera, biak barne, jaiegun ofizialetan izan ezik.

10.3.-Edozein arrazoi dela-eta, onetsitako bekari uko egiten bazaio, Nafarroako Gobernuko Kultura Zuzendaritza Nagusiko Museoen Zerbitzuari (Nafarroako Museoaren Atalari) jakinarazi behar zaio, idatziz.

10.4.-Horrelako kasuetan, ebaluazio batzordeak prestaturiko puntuazioaren araberako zerrendan hurrengo denari deituko zaio, bekaldia bukatu bitartean jardun dezan. Bigarren onuradun horrek oinarri hauetako 8. eta 10. puntuetan ezarritako moduan onartu beharko du beka, eta bekaduntzat hartuko da ondorio guztietarako, deusetan galarazi gabe lehenengo bekadunak uko egin arte zituen betebeharrak.

11.-Bekadunaren berariazko betebeharrak, eskubideak eta administrazio erantzukizuna.

11.1.-Honako hauek dira bekadunak prestakuntzaldian dituen betebehar orokorrak:

a) Beka emateko arrazoitzat jo den prestakuntza jarduera egin eta frogatzea. Prestakuntzaz arduratzen den administrazio unitateak lan eta txostenak aurkezteko eskatzen ahalko du, bekadunaren errendimendu mailaren jarraipena eta ebaluazioa egiteko.

b) Beka emateko betebehar eta baldintzak betetzea.

c) Eskumena duten organoek eman den bekaren gainean egin ditzaketen egiaztapen lan guztiak onartzea.

d) Museoen Zerbitzuari (Nafarroako Museoaren Atalari) jakinaraztea harturiko bekari espresuki uko egiten diola, jarduerak utzi baino hamabost egun natural lehenago gutxienez.

e) Beka dela-eta eginiko jardueraren zuzeneko ondorioa den edozein argitalpenetan bekaduna dela adieraztea.

f) Zein erakundetan jarduten duen, bertako barne edo funtzionamendu araubidea betetzea.

g) Prestakuntzaldia bukaturik, gehienez ere hilabeteko epean, eginiko lanen memoria igorri beharko du Museoen Zerbitzura (Nafarroako Museoaren Atalera), baita lorturiko ezagutza teknikoari buruzko balorazioa ere.

11.2.-Bekadunen eskubideak:

a) Bekadunek, Nafarroako Foru Komunitateko Administrazioarekin duten harreman juridikoa ezertan aldatu gabe, eskubidea izanen dute zerbitzu eta bidaien arabera izaten dituzten gastuengatik funtzionarioei dagozkien ordain berberak jasotzeko.

b) Orobat, bekadunek Nafarroako Foru Komunitateko Administrazioaren kalte-ordaina jasotzeko eskubidea izanen dute, zerbitzu publikoen funtzionamenduaren ondorioz kalteak edo lesioak dituztenean, ezinbesteko kasuetan izan ezik. Administrazioaren ondare erantzukizuna administrazio bidetik eskatuko da.

c) Nafarroako Foru Komunitateko Administrazioa izanen da prestakuntza jardueran bekadunak hirugarrenei sortzen dizkien kalteen erantzulea, baina administrazio horrek zilegi izanen du iruzur, erru edo zabarkeria larriagatik bekadunak izan dezakeen erantzukizuna eskatzea.

d) Asistentzia eta aprobetxamenduaren ziurtagiria jasotzeko eskubidea izanen dute, Museoen Zerbitzuan (Nafarroako Museoaren Atalean) egindako prestakuntzaldian jasotako jakintza eta ezagutzaren araberakoa. Vianako Printzea Erakundea-Kultura eta Turismo Departamentuko Idazkaritza Tekniko Nagusiak eginen du ziurtagiri hori.

12.-Bateraezintasunak.

a) Onuraduna prestakuntzarako jarduera berbera egiteko beste beka edo diru-laguntza bat jasotzen ari denean, guztira jasotako zenbatekoa ezin izanen da 13.000 eurotik gorakoa izan, dela bakarka dela Nafarroako Foru Komunitateko Administrazioaren, beste administrazio publiko baten edo erakunde publiko nahiz pribatuen edo partikularren, Espainiakoen nahiz atzerrikoen, beste beka edo diru-laguntza batzuekin baturik.

Aipatu zenbatekoa gainditzen bada, Vianako Printzea Erakundea-Kultura eta Turismo Departamentuak bekaren zenbatekoa eta iraupena dagokienean murriztuko ditu. Halakoetan, departamentuak gainerako izangaiei beste beka bat eskaini ahalko die, lortutako puntuen hurrenkerari jarraituz, hasierako bekaren iraupenaren eta zenbatekoaren osagarri gisa.

b) Prestakuntza beka emateko kontuan hartu diren baldintzak ezertan aldatzen badira eta betiere aldi berean hauekin ezin bateratu den beste diru-laguntzarik eskuratzen bada, deuseztatu edo aldatu eginen da kontzesiorako ebazpena.

13.-Ez-betetzeak.

Bekadunak bere gain hartutako betebehar eta eginkizunak betetzen ez baditu, haiek egitean ardurarik jartzen ez badu, errendimendu eta aprobetxamendu eskasa badu edo lanak kalitate gabekoak badira, beka aldi bateko edo betiko kentzea erabakiko du organo eskudunak, dagokion administrazio unitateak proposaturik eta interesdunari entzunaldia eman ondoren; horrekin batera zuzkidura ekonomikoaren zati proportzionala ere galduko du, eska daitezkeen diru-itzulketak, berandutza interesak eta ezar litezkeen zehapenak galarazi gabe.

14.-Behar diren aurrekontu kredituak.

Museoen Zerbitzurako bi prestakuntza beka emateak guztira sortuko duen 20.400,00 euroko gastutik 6.800,00 euro 2010eko gastuen aurrekontuko "Bekadunak" izeneko A20003 A2300 4800 333100 kontu-sailaren kargura ordaintzen ahalko dira, eta gainerakoa, 13.600,00 euro, 2011ko urtarriletik abuztura bitarteko aldiari dagozkionak (biak barne), 2011ko aurrekontuetan xede berberarako ezarriko den kontu-sailaren kargura, betiere kontu-sail horretan hartarako behar adina diru badago.

15.-Deialdiaren oinarrien aurka jar daitezkeen administrazio errekurtsoak.

15.1.-Deialdi honen, bere oinarrien eta horiek aplikatzeko egintzen kontra gora jotzeko errekurtsoa jartzen ahalko da, Nafarroako Gobernuari zuzendua, hilabeteko epean, deialdia jakinarazi edo argitaratu eta biharamunetik hasita.

15.2.-Oinarri hauetan ezarrita ez dagoen orotan, Nafarroako Foru Komunitateko Administrazioaren eta haren erakunde autonomoen prestakuntza bekak emateko araubide orokorra ezartzen duen apirilaren 19ko 172/2004 Foru Dekretuan xedatutakoa aplikatuko da (2004ko 57. Nafarroako Aldizkari Ofiziala, maiatzaren 12koa).

ERANSKINA

Nafarroako Gobernuko Museoen Zerbitzuan (Nafarroako Museoaren Atalean) aritzeko prestakuntza beken izangaien merezimenduak baloratzeko aplikatuko diren puntuazioak

Lehen multzoa. Ikasketa espedientea: 10 puntu gehienez.

-Espedientea.

  • Nahikoa: 1.
  • Oso ongi: 2.
  • Bikain: 3.
  • Ohorezko matrikula: 4.

-Beste lizentziatura batzuk: 2.

-Unibertsitateko beste diplomatura batzuk: 1.

-Doktorego tesia: 1.

-Ikasketa aurreratuen diploma: 1.

-Masterrak eta antzeko diplomak*: 0,7.

-Irakasgaitasunaren ziurtagiria: 0,3.

Bigarren multzoa. Ikastaroak, biltzarrak, praktikak: 5 puntu gehienez

-Ikastaroak* (puntu 1 gehienez).

  • 25 ordu baino gutxiagokoak: 0,1.
  • 25 ordu edo gehiagokoak: 0,2.

-Biltzarrak, jardunaldiak.

  • Sinposioak eta mintegiak* (0,5 puntu gehienez): 0,1.

-Erakusketaren komisario lana (puntu 1 gehienez): 0,2.

-Banakako erakusketa (0,5 puntu gehienez): 0,2.

-Arkeologia arloko esku-hartzeak (puntu 1 gehienez).

  • 6 hilabete baino gutxiagokoak: 0,1.
  • 6 hilabete edo gehiagokoak: 0,2.

-Lanbide/lan praktikaldiak*: puntu 1 gehienez.

  • 6 hilabete baino gutxiagokoak: 0,1.
  • 6 hilabete edo gehiagokoak: 0,2.

(Honetatik kanpo gelditzen dira unibertsitateko titulu bat lortzera bideratutako derrigorrezko praktikaldiak).

Hirugarren multzoa: argitalpenak, hitzaldiak, lankidetza zientifikoko bekak: 5 puntu gehienez

-Aldizkariko artikulua*: 0,2.

  • Txosten laburra: 0,1.

Monografia*: 2.

-Emandako hitzaldia*: 0,2.

  • Komunikazioa: 0,1.

-Lankidetzako/ikerketako beka: 0,1.

  • Beka unibertsitateko departamentuko barne ikasle gisa.

* Merezimendu horiek prestakuntza bekak jasotzeko eskatzen diren arloekin lotuta egonez gero baizik ez dira kontuan hartuko, deialdi hau arautzen duten oinarrietako 7.1 puntuari jarraikiz. Bibliotekonomiari, artxiboen kudeaketari eta dokumentazioari buruzko ikastaroak sartzen dira. Ikastaroen/praktikaldien iraupena jakinarazten ez bada, gutxieneko puntuazioa emanen da.

Iragarkiaren kodea: F1005020