43. ALDIZKARIA - 2010eko apirilaren 7a

1. NAFARROAKO FORU KOMUNITATEA

1.2. AGINTARIAK ETA LANGILEAK

1.2.2. Oposizioak eta lehiaketak. Lan publikoaren eskaintza

DEIALDIA, Nafarroako Administrazio Publikoaren Institutuko zuzendari nagusiak martxoaren 18an emandako 58/2010 Ebazpenaren bidez onetsia, Nafarroako Larrialdietako Agentziako S.O.S. Nafarroako aretoko buru izateko bi lanpostu oposizio-lehiaketa bidez barne igoera murriztuan betetzeko.

Nafarroako Administrazio Publikoaren Institutuko zuzendari nagusiak martxoaren 18an emandako 58/2010 Ebazpenaren bidez, Nafarroako Larrialdietako Agentziako S.O.S. Nafarroako aretoko buru izateko bi lanpostu oposizio-lehiaketa bidez barne igoera murriztuan betetzeko deialdia onetsi da.

Hautapen prozesua honako hauetan xedatutakoari jarraikiz eginen da: Nafarroako Administrazio Publikoen Zerbitzuko Langileen Estatutuaren Testu Bategina, abuztuaren 30eko 251/1993 Legegintzako Foru Dekretuaren bidez onetsi zena; aipatu estatutua garatu eta betearazteko Sarrera Erregelamendua; maiatzaren 4ko 150/1998 Foru Dekretua, Ekintza Koordinaziorako Zentroa arautzen duena, gainerako aplikazio arauak eta deialdi honen oinarriak.

1.-Deialdiaren xedea.

1.1. Deialdi honen xedea da S.O.S. Nafarroako aretoko buru izateko bi lanpostu oposizio-lehiaketa bidez barne igoera murriztuan betetzea. Lanpostuak funtzionario araubidekoak dira, C mailakoak, plantilla organikoan 4277 eta 7214 zenbakiak dituzte, Nafarroako Larrialdietako Agentziako Babes Zibilerako Zuzendaritzari atxikita daude eta Iruñean dute destinoa.

1.2. Lanpostuen ordainsariak hauek izanen dira: uztailaren 4ko 158/1984 Foru Dekretuaren bidez onetsitako Ordainsarien Behin-behineko Erregelamenduan C mailarentzat oro har ezarritakoak eta aplika daitezkeen gainerako xedapenetan kasu bakoitzerako ezartzen direnak.

1.3. Halaber, aldi baterako kontratatuak izateko zerrenda bat osatzea du xede deialdi honek, sarrerako hautapen prozesuan lanpostua eskuratzen ez duten izangaiekin, deialdiaren 8. oinarrian xedatutakoari jarraituz.

2.-Betebeharrak.

2.1. Oposizio-lehiaketa honetan onartuak izateko, izangaiek ondoren azaltzen diren betebeharrak bete beharko dituzte eskabideak aurkezteko epea bukatzen den egunetik izendapena egin bitarte:

a) Nafarroako Foru Komunitateko eta haren erakunde autonomoetako langile finkoa izatea.

b) Borondatezko edo nahitaezko eszedentzian ez egotea, barne igoera honetara aurkeztu baino lehenagoko lanpostuan.

c) Koordinazioko operadore laguntzaile lanetan langile finko gisa aritzeko izendatua edo kontratatua izatea eta lanpostu horretan langile finko gisa bi urteko edo gehiagoko zerbitzualdia egin izana frogatzea.

d) Batxilergoko titulua, Lanbide Heziketako Bigarren Mailako titulua edo horien baliokidea izatea eta administrazio publikoetan bost urteko antzinatasuna frogatzea; edo aipatu administrazioetan zortzi urteko antzinatasuna frogatzea.

3.-Eskabideak.

3.1. Deialdian parte hartzeko eskabideak Lehendakaritza, Justizia eta Barne Departamentuko Erregistro Orokorrean (Karlos III.aren etorbidea, 2, 31002 Iruña) edo erregistro horretako beste edozein bulegotan (zerrenda 2009ko 14. Nafarroako Aldizkari Ofizialean argitaratu zen, martxoaren 18an) aurkeztu beharko dira, edo, bestela, Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 38.4 artikuluan adierazitako bideren bat erabiliz, deialdia Nafarroako Aldizkari Ofizialean argitaratu eta biharamunetik hogeita hamar egun naturaleko epean.

Eskabideak deialdi honen eranskineko ereduari lotu behar zaizkio eta, haietan, izangaiek adierazi beharko dute eskatutako baldintza guztiak betetzen dituztela. Eskabide eredua Nafarroako Gobernuko Erregistro Orokorrean dago eskuragarri. Interneten bidez ere lortzen ahal da, www.navarra.es helbidean, bai argitaratzen deneko aldizkari ofizialetik abiatuta, bai "Zerbitzuak", "Enplegu Publikoa" atalean dagoen deialdiaren aiputik abiatuta.

3.2. Eskabideari, behar bezala bete ondoren, agiri hauek erantsiko zaizkio:

Bat.-Espedientea formalizatzeko eta azterketa eskubideetarako 25 euro ordaindu izanaren jatorrizko ziurtagiria. Azterketa eskubideen tasa ordaintzen ez bada, baztertu eginen da izangaia.

Prozedura hauetakoren bat erabiliz ordaintzen ahalko da tasa hori:

-Behar den bezala betetako ordainketa gutunaren bidez (Nafarroako Foru Komunitateko banku entitateetan ordaintzeko). Deialdiari buruz Interneten dagoen iragarkian, lehen aipatutako helbidean, dago ordainketa gutunaren eredua.

-Banestoko (Banco Español de Crédito) 0030 8124 87 0870002271 kontuan eskudirutan edo bankuko transferentzia bidez ordainduz; horrelakoetan, ordainagirian datu hauek jarri beharko dira nahitaez:

-Izangaiaren izen-deiturak.

-NANa/IFZ.

-Ordainketa zein kontutan egiten den, haren zenbakia.

-Kontzeptua: S.O.S. Nafarroako aretoko buru izateko oposizio-lehiaketa.

Ez dute tasa ordainduko %33ko edo gehiagoko desgaitasuna aitortua duten pertsonek; desgaitasuna laugarren zenbakian ezarritako moduan frogatu beharko da.

Bi.-Batxilergoko edo Lanbide Heziketako Bigarren Mailako tituluaren edo balio bereko beste titulu baten fotokopia konpultsatua, deialdiaren 2.1 oinarriaren d) letraren arabera, administrazio publikoetan zortzi urteko antzinatasun aitortua ez duten izangaien kasuan.

Hiru.-Deialdiaren II. eranskinean ezarritakoaren arabera, izangaiek alegatzen dituzten merezimendu guztiak frogatzen dituzten jatorrizko agiriak edo behar bezala konpultsatutako fotokopiak.

Lau.-Desgaitasuna duten izangaiak.

Tasak ordaindu beharrik ez izateko eta denborak eta baliabideak egokitzea eskatzeko, %33ko edo hortik gorako desgaitasuna duten izangaiek hori frogatu beharko dute jatorrizko agiri hauetako baten bidez edo kopia konpultsatuaren bidez:

-IMSERSOk edo autonomia erkidegoan eskumena duen organoak luzatutako ziurtagiria.

-Gizarte Segurantzako Institutu Nazionalaren ebazpena, prestazio bat jasotzeko eskubidea onartzen diona hauetakoren bat izateagatik: ezintasun iraunkor osoa, erabateko ezintasun iraunkorra edo baliaezintasun handia.

Desgaitasuna duten izangaiek ariketak egiteko denboren eta baliabideen egokitzapenak eskatzeko, hala adierazi beharko dute eskabidean, eta aparteko orri batean azaldu beharko dute nolako desgaitasuna duten eta zein egokitzapen eskatzen duten. Egokitzapenak eskatzeko bada eredu bat interesdunen eskura www.navarra.es web orrian, "Zerbitzuak", "Enplegu Publikoa" atalean, deialdiaren aipuan.

3.4. Eskabideak aurkezteko epea ezin izanen da luzatu.

3.5. Eskabidean atzematen diren akats materialak edo egitezkoak ofizioz edo interesdunak eskaturik zuzentzen ahalko dira, noiznahi ere.

4.-Izangaien onarpena eta erreklamazioak.

4.1. Eskaerak aurkezteko epea bukatuta, Sarrerarako Hautapenaren Zerbitzuko zuzendariak, Nafarroako Administrazio Publikoaren Institutuko zuzendari kudeatzaileak eskuordetuta (103/2008 Ebazpena, ekainaren 26koa), ebazpena emanen du izangai onartuen eta baztertuen behin-behineko zerrenda onesteko, eta Nafarroako Aldizkari Ofizialean argitara dadila aginduko.

4.2. Behin-behineko zerrenda Nafarroako Aldizkari Ofizialean argitaratzen denetik, izangai baztertuek hamar egun balioduneko epea izanen dute erreklamazioak aurkezteko eta, akatsik egin badute, haiek zuzentzeko.

4.3. Erreklamazioak aurkezteko epea bukaturik eta haien gaineko ebazpena eman ondoren, Sarrerarako Hautapenaren Zerbitzuko zuzendariak, Nafarroako Administrazio Publikoaren Institutuko zuzendari kudeatzaileak eskuordetuta (103/2008 Ebazpena, ekainaren 26koa) ebazpena emanen du, izangai onartuen eta baztertuen behin betiko zerrenda onesteko, eta Nafarroako Aldizkari Ofizialean argitara dadila aginduko.

4.4. Izangaiei ez zaizkie azterketa egiteko eskubideak itzuliko, baldin eta beraiei egotzitako arrazoiengatik baztertzen badira.

5.-Epaimahaia.

5.1. Epaimahaia honako kide hauek osatuko dute:

Batzordeburua: Alberto Otamendi Saldise jauna, Nafarroako Larrialdietako Agentziako Babes Zibileko zuzendaria.

Ordezkoa: Javier Vitrián Arigita jauna, Nafarroako Larrialdietako Agentziako kudeaketa zuzendaria.

Batzordekidea: José Javier Boulandier Errera jauna, Nafarroako Larrialdietako Agentziako Larrialdietako Koordinazio eta Zuzendaritzaren Arloko burua.

Ordezkoa: Juan Manuel Lobo Palanco jauna, Nafarroako Larrialdietako Agentziako Sostenguko Arlo Teknikoko burua.

Batzordekidea: Juan José Minondo Sanz jauna, Nafarroako Larrialdietako Agentziako Plangintza Arloko burua.

Ordezkoa: Jesús María Janices Pérez jauna, Nafarroako Larrialdietako Agentziako Boluntarioen Unitateko burua.

Batzordekidea: Nafarroako Larrialdietako Agentziako Langileen Batzordearen ordezkari bat.

Ordezkoa: Nafarroako Larrialdietako Agentziako Langileen Batzordearen ordezkari bat.

Mahaikide idazkaria: Begoña Esparza Razquin andrea, Nafarroako Larrialdietako Agentziako administraria.

Ordezkoa: Eusebio Medina Ureña jauna, Nafarroako Larrialdietako Agentziako Azpiegitura Teknikoaren Unitateko burua.

Epaimahaia hautaprobak hasi baino lehen eratuko da.

5.2. Epaimahaia ezin izanen da eratu, ezta aritu ere, kideen gehiengo osoa bertan izan gabe.

Kide anitzeko organoaren eraketak eta jardunak balio izateko, mahaiburuak eta mahaikide idazkariak edo haien ordezkoek egon beharko dute bertan.

5.3. Epaimahaiko kideek ez dute parte hartuko, baldin eta Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legean parte ez hartzeko aipatzen diren egoeretako batean badaude, eta organo dei egileari hala jakinaraziko diote.

Izangaiek, halaber, zilegi dute epaimahaikideak errefusatzea, egoera horietako bat gertatzen denean.

5.4. Epaimahaiak gehiengoz erabakiko ditu deialdiaren oinarriak ulertu eta aplikatzeko moduaren gainean sortzen diren arazo guztiak.

5.5. Epaimahaiak aholkulari adituen laguntza izan dezake, proba batzuetan nahiz guztietan. Aholkulari horiek beren espezialitate teknikoetan baizik ez dira ariko eta haietan bakarrik emanen diote laguntza epaimahaiari.

6.-Oposizio-lehiaketa nola eginen den.

6.1. Oposizio-lehiaketa bi alditan eginen da, lehiaketaldia lehenbizi eta oposizioaldia gero, oinarri hauetan zehazten den gisara.

6.2. Oposizioa 2010eko ekainean hasiko da. Izangai onartu eta baztertuen behin betiko zerrenda onesten duen ebazpen berean zehaztuko dira probak hasteko lekua, eguna eta ordua.

Ondoren, epaimahaiak gainerako probak egiteko iragarkiak jakinaraziko ditu, arauz egin behar den moduan.

6.3. Merezimendu lehiaketa.

6.3.1. Epaimahaiak lehiatzaileek alegatutako eta egiaztatutako merezimenduak baloratuko ditu, deialdiaren II. eranskineko baremoari jarraikiz.

6.3.2. Baremoaren aplikaziorako beharrezkoa den informazio guztia jaso beharko dute agiri horiek. Justifikatu gabeko merezimenduak ez dira baloratuko.

Epaimahaiak lehiakideek alegatu eta frogatutako merezimenduen gaineko azalpen eta datuak eskatzen ahalko ditu noiznahi.

6.3.3. Lehiaketaldia ez da baztertzailea izanen, eta 24,38 puntuko balorazioa izanen du, gehienez ere. Deialdiaren II. eranskinari jarraikiz banatuko dira puntuak, honela:

-Egindako zerbitzuak: 20 puntu gehienez.

-Hizkuntzak jakitea: 4,38 puntu gehienez.

6.3.4. Epaimahaiak baremoaren atal bakoitzean izangaien merezimenduak baloratuko ditu. Epaimahaiak ez du inoiz aintzat hartuko izangaiak alegatu gabeko edo agiri bidez egiaztatu gabeko merezimendurik, eta ezin izanen du atal bakoitzerako ezarritako puntuazioa baino handiagorik eman.

6.3.5. Lehiaketaldia amaitzen denean, epaimahaiak Nafarroako Gobernuaren iragarki oholean jarriko du izangai bakoitzak lortutako puntuazioa.

Lehiaketaldiko puntuazioa oposizioaldikoari gehituko zaio, eta emaitza oposizio-lehiaketako puntuazio osoa izanen da.

6.4. Oposizioa.

Oposizioa baztertzailea izanen da eta bi alditan gauzatuko da: lehena hautapenaldia izanen da eta zenbait ariketak osatuko dute, eta bigarrena trebakuntzaldia izanen da, non prestakuntza ikastaro bat gainditu beharko baita, maiatzaren 4ko 150/1998 Foru Dekretuan (Ekintza Koordinaziorako Zentroa arautzen du), irailaren 12ko 113/2005 Foru Dekretuan (Nafarroako Segurtasun Eskolaren antolamendu eta funtzionamendurako Erregelamendua onesten du) eta aplikatzekoak diren gainerako arauetan xedatutakoari jarraikiz. Lehenengo foru dekretua 1998ko 65. Nafarroako Aldizkari Ofizialean argitaratu zen, ekainaren 1ean, eta, bigarrena, 2005eko 117. Nafarroako Aldizkari Ofizialean, irailaren 30ean.

6.4.1. Hautapenaldia.

6.4.1.1. Ariketak:

Lehenengoa: deialdiaren gai-zerrendan jasotzen diren gaiei buruzko galdetegi bat idatziz entzutea (III. eranskina).

Bigarrena: gai-zerrendan agertzen diren gaiei buruzko kasu edo galdera teoriko-praktiko bat edo gehiago ebaztea.

Hirugarrena: proba psikoteknikoak eginen dira, izangaiak lanpostuaren soslai profesiografikoaren eskakizunei noraino egokitzen zaizkien neurtzeko.

Proba horiek Nafarroako Administrazio Publikoaren Institutuko Psikologia Atalak prestatuko ditu eta haren emaitza loteslea izanen da epaimahaiarentzat.

Lehenbiziko eta bigarren ariketa hasi aurretik, epaimahaiak adieraziko du izangaiek zenbat denbora duten haiek egiteko.

Bigarren ariketa plika sistemaren bidez eginen da.

6.4.1.2. Hautapenaldiko ariketen balorazioa:

Lehenengoa: 0tik 25 puntura bitarte kalifikatuko da. Bazterturik geldituko dira gutxienez 12,5 puntu lortzen ez dituzten izangaiak.

Bigarrena: 0tik 25 puntura bitarte kalifikatuko da. Bazterturik geldituko dira gutxienez 12,5 puntu lortzen ez dituzten izangaiak.

Hirugarrena: 0tik 25 puntura bitarte kalifikatuko da. Bazterturik geldituko dira gutxienez 12,5 puntu lortzen ez dituzten izangaiak.

6.4.1.3. Hautapenaldiko ariketa bakoitza amaitutakoan, epaimahaiak jendaurrean jarriko du, ariketa egin den lekuan eta Nafarroako Gobernuaren iragarki oholean, probak gainditu dituzten izangaien zerrenda, bakoitzaren kalifikazioekin. Horrez gainera, hurrengo proba non, zein egunetan eta zer ordutan eginen den adierazten duen oharra argitaratuko du, gutxienez hura hasi baino 48 ordu lehenago.

6.4.1.4. Ariketa bakoitzerako dei bakarra eginen da, hau da, deitutako izangaiek epaimahaiak adierazitako tokian, egunean eta orduan aurkeztu beharko dute; deialdira azaltzen ez direnak oposiziotik kanpo geratuko dira.

Izangaiek nortasun agiri nazionala, pasaportea, gidabaimena edo epaimahaiak nahikotzat jotzen duen beste agiriren bat aldean dutela agertu beharko dute. Azterketara agertzen ez direnak edo arestian aipatutako agirietako baten bidez beren nortasuna egiaztatzen ez dutenak prozeduratik baztertuko dira.

6.4.1.5. Hautaprobak egiteko, onartutako desgaitasunen bat dutenentzat beharrezkoak diren denbora eta baliabide egokitzapenak ezarriko dira, eskabidean azaldutakoaren arabera.

6.4.2. Izendapen proposamena eta agirien aurkezpena.

Hautapenaldiko probak amaituta, epaimahaiak jendaurrean jarriko du, Nafarroako Gobernuaren iragarki oholean, hura gainditu duten izangaien zerrenda, haietako bakoitzak lehiaketaldian eta hautapenaldiko ariketetan lortutako kalifikazioak batuta ateratzen den puntuazio osoaren arabera ordenatuta.

Berdinketarik egonez gero, hautapenaldiko bigarren ariketan punturik gehien lortzen dutenen alde eginen da. Eta baldin badirau, lehiaketaldian lorturiko puntuazioa hartuko da kontuan.

Era berean, Nafarroako Administrazio Publikoetan Sartzeko Erregelamenduaren 31., 32. eta 33. artikuluetan xedatutakoaren arabera, deialdia egin duen organoari, espedientearekin batera, deialdiko probak gainditzeagatik iragarritako lanpostuetan sartzen ahal diren izangaiak izendatzeko proposamena igorriko dio, prestakuntza ikastaroa egin dezaten. Proposamen hori Nafarroako Aldizkari Ofizialean argitaratu beharko da.

6.4.3. Trebakuntzaldia edo prestakuntza ikastaroa.

Funtzio Publikoaren zuzendari nagusiaren behar bezalako ebazpenaren bidez, proposatzen diren izangaiak Nafarroako Segurtasun Eskolari atxikiko zaizkio, prestakuntza ikastaroa egin dezaten, eta ikastaroa hasteko eguna finkatuko da.

Ikastaro hori egin eta gainditu dutela Nafarroako Segurtasun Eskolak luzatutako ziurtagiriaren bidez egiaztatzen duten izangaiek ez dute prestakuntza ikastaroa egin beharrik izanen.

Prestakuntza ikastaroa Nafarroako Segurtasun Eskolak emanen du. Baztertzailea izanen da eta 100 ordu inguru izanen ditu, horietatik 65 praktiketarako. Arlo hauek jorratuko dira:

a) Larrialdiak kudeatzeko sistema informatikoaren arloa.

b) Sistema eta aplikazioen arloa.

c) Zuzendaritzarako trebetasunen eta langileriaren kudeaketaren arloa.

d) Arlo psikoteknikoa.

e) Praktiketako arloa.

Ikastaroan baja emanez gero, oposizio-lehiaketan segitzeko eskubidea galduko da. Baja eman bezain pronto, Nafarroako Segurtasun Eskolak horren berri emanen dio eta organo dei egileari.

Prestakuntza ikastaroa bukatu eta azken puntuazioak onartu ondoren, Segurtasun Eskolako zuzendariak izangaien zerrenda igorriko dio organo dei egileari; bertan, "Gai" kalifikazioa azalduko da, baldin eta ikasleak ikastaroko arlo guzti-guztiak gainditu baditu, eta, "Ez gai", gainditu ez baditu.

Kalifikazio hori loteslea izanen da. "Ez gai" kalifikazioa lortzen duten ikasleak oposizio-lehiaketatik kanpo geratuko dira.

7.-Izendapena, lanpostuen esleipena eta jabetza hartzea.

7.1. Funtzio Publikoaren zuzendari nagusiak, ebazpen baten bitartez, prestakuntza ikastaroa "Gai" kalifikazioarekin gainditzen duten izangaiak Nafarroako Foru Komunitatearen Administrazioko funtzionario izendatuko ditu, S.O.S. Nafarroako aretoko buruen lanpostuetan aritzeko. Ebazpen horren bidez lanpostuen esleipena ere eginen da.

7.2. Izendapena Nafarroako Aldizkari Ofizialean argitaratuko da eta lanpostuaren jabetza hartzea izendapenaren ebazpenean finkatzen den egun berean izanen da.

7.3. Izendapenak eta jabetza hartzeak ez du aldatuko izangaiek barne igoera murriztu honetan parte hartu aurretik zuten aurreikuspen sozialaren araubidea.

7.4. Lanaldia zerbitzuaren beharretara egokituko da eta noiznahi aldatzen ahalko dute administrazio organo eskudunek, aplikatzekoa den araudian ezarritakoarekin bat.

7.5. Funtzionarioek bizilekua destinoko herrian ez izateak ez du alde batera uzten lantokira puntual iritsi beharra eta lanaldia eta lanpostuko eginkizunak zuzen bete beharra, eta, gainera, ez da inolako konpentsaziorik jasoko lantokirako joan-etorriengatik.

Behar bezala justifikatutako kasu batzuetan, administrazio publikoek zilegi izanen dute funtzionarioei destinoko herrian bizi daitezela eskatzea, lanpostuko eginkizunengatik eta eskatzen den dedikazioagatik bidezkoa denean.

7.6. Izendatu ondoren, lanpostuaren jabetza hartzen ez duten izangaiek S.O.S. Nafarroako aretoko buru izateko eskubide guztiak galduko dituzte, ezinbesteko kasuetan izan ezik.

8.-Aldi baterako kontratuetarako izangaien zerrenda.

8.1. Kontuan harturik Nafarroako Administrazio Publikoan sartzeko Erregelamenduaren 42. artikulua, Lehendakaritza, Justizia eta Barneko kontseilariaren azaroaren 14ko 146/2005 Foru Agindua (Lanpostuak aldi baterako betetzeko kudeaketa arauak onetsi zituena) eta oinarri honexetan ezarritako prozedura, eta horiei jarraikiz, hautapen faseko ariketak gainditzen dituzten izangaiekin, aldi baterako kontratazioetarako zerrenda prestatuko da.

Funtzio Publikoaren zuzendari nagusiaren ebazpen baten bidez, aldi baterako kontratatzeko izangaien zerrenda hori onetsiko da,eta Nafarroako Gobernuaren iragarki oholean argitaratuko (Karlos III.aren etorbidea, 2, atalondoa, Iruña).

Aldi baterako kontratazioetarako zerrendan izangaiek izanen duten ordena finkatzeko, lehiaketaldian eta hautapen faseko ariketetan lortutako puntuen batuketa hartuko da aintzat. Berdinketa dagoenean, nor nagusitzen den erabakitzeko, deialdi honetan kasu horietarako ezarritako irizpideak hartuko dira kontuan.

Nafarroako Larrialdietako Agentziak eta Segurtasun Eskolak ezarriko dituzte, hala badagokio, prestakuntza ikastaroaren hurrengo edizioetako datak, toki kopuruaren eta aldi baterako kontratazio premien arabera, puntuazio ordenari zorrotz jarraikiz deitu ahal izateko aipatu zerrendan ageri diren izangaiei, baldintza hori betea izan dezaten aldi baterako kontratazio eskaintzarik denean; ikastaro bakoitzean gehienez ere 25 ikaslek hartzen ahalko dute parte.

9.-Errekurtsoak.

Epaimahaiaren egintzen eta ebazpenen kontra gora jotzeko errekurtsoa jartzen ahalko da, Nafarroako Administrazio Publikoaren Institutuko zuzendari kudeatzaileari zuzendua, errekurtsoaren xede den egintza argitaratu edo jakinarazi eta biharamunetik hilabeteko epean.

Deialdiaren, oinarrien eta horiek aplikatzeko egintzen kontra, epaimahaiak hartutakoen kontra izan ezik, zilegi izanen da gora jotzeko errekurtsoa jartzea, Lehendakaritza, Justizia eta Barneko kontseilariari zuzendua, errekurtsoaren xede den egintza argitaratu edo jakinarazi eta biharamunetik hasita hilabeteko epean.

Hori guztia Nafarroako Foru Komunitateko Administrazioari buruzko abenduaren 3ko 15/2004 Foru Legearen 57. artikuluarekin bat eta Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 114. eta 115. artikuluei jarraikiz.

Iruñean, 2010eko martxoaren 18an.-Nafarroako Administrazio Publikoaren Institutuko zuzendari kudeatzailea, Gregorio Eguilaz Gogorza.

I. ERANSKINA

Eskabidea

Izena: ..................................., N.A.N.: ..........................., jaioteguna: .................., jaioterria: ......................., probintzia: ...................., egungo helbidearen herria: ................., probintzia: ................, kalea: ............., zenbakia.: ......, solairua: ........., letra: ......., posta kodea: ..........., etxeko telefonoa: ......................, laneko telefonoa: ..........................., sakelako telefonoa: ...........

Nafarroako Larrialdietako Agentziako S.O.S. Nafarroako aretoko buru izateko bi lanpostu oposizio-lehiaketa bidez barne igoera murriztuan betetzeko deialdian parte hartzeko eskaera egiten dut. Deialdi hori Nafarroako Administrazio Publikoaren Institutuko zuzendari kudeatzailearen ebazpenaren bidez onetsi zen eta .................(e)ko Nafarroako Aldizkari Ofizialean argitaratu (......... zk.). Hori dela eta,

ADIERAZTEN DUT:

-Oposizio-lehiaketa honetan eskatutako betebehar guztiak betetzen ditudala eskaerak aurkezteko finkatutako epea bukatzen den egunean.

-Desgaitasuna dudala eta, horregatik, aparteko folio batean adierazten diren egokitzapenak eskatzen ditudala eta desgaitasun horren egiaztagiriak aurkezten ditudala.

-Deialdian ezarritako azterketa eskubideak ordaindu ditudala, eta horren egiaztagiria erantsi dudala.

-Eskabideari atxiki dizkiodala baremoan ezarritakoaren arabera lehiaketaldian baloratzeko azaltzen ditudan merezimenduen egiaztagiriak, .............(e)tik ..............(e)ra zenbakituak.

Horrenbestez,

Eskabide hau eta erantsitako dokumentazioa garaiz eta behar bezala aurkeztutzat hartu dezazuela eskatzen dut, eta horrenbestez, onar nazatela Nafarroako Foru Komunitateko Administrazioaren zerbitzuko S.O.S. Nafarroako aretoko buru izateko bi lanpostu oposizio-lehiaketa bidez barne igoera murriztuan betetzeko deialdian.

Iruñean, .........(e)ko ....................aren ........(e)an.
(Sinadura)

II. ERANSKINA

Merezimenduen baremoa

1.-Egindako zerbitzuak.

Deialdiko lanpostuan edo antzeko batean admininistrazio publikoetako zentroetan egindako zerbitzuak: 2 puntu lanean egindako urte bakoitzeko.

Urteen kopurua osoa ez bada, zerbitzuan egindako aldiari proportzioan dagokion puntuazioa emanen zaio.

Atal honetan 20 puntu lortzen ahal dira gehienez ere.

2.-Hizkuntzak jakitea.

-Frantsesa, ingelesa edo alemana jakiteagatik, Europar Batasuneko lan hizkuntzak diren aldetik, hizkuntza horietako bakoitzeko puntu 1 gehienez.

Hizkuntza eskola ofizial batek luzaturiko Gaitasun Agiria edo ofizialki baliokidetzat jotzen den titulua edukitzeagatik, aurreko atalean hizkuntza bakoitzerako adierazten den gehieneko puntuazioa emanen da.

Halako titulaziorik ez dutenei hizkuntza eskola ofizial batean gainditutako maila bakoitzeko puntu bat emanen zaie.

-Euskaraz jakiteagatik, izan ere, lanpostu guztiak eremu mistokoak dira eta herritarrekin harreman edo tratu zuzena dutenak, eta hala jasotzen da plantillan: 1,38 puntu bitarte.

Horren ondorioetarako, EGA titulua edo beste titulu ofizial bat, Hizkuntzen Europako Erreferentzia Esparru Bateratuaren C1 mailaren baliokidea, izateak aurreko atalean emandako gehieneko balorazioa jasoko du.

Titulu hori izan ezean, Hizkuntzen Europako Erreferentzia Esparru Bateratuaren A1 maila izanez gero, gehienez eman daitekeen puntuazioaren 1/5 jasoko da, A2 maila izanez gero 2/5, B1 izanez gero 3/5 eta B2 izanez gero 4/5. Titulu baliokideek balorazio bera izanen dute. Bestela, Nafarroako Gobernuak antolatutako ikastaroetan gainditutako urrats bakoitzak gehienez eman daitekeen puntuazioaren 1/12 jasoko du.

Lau hizkuntza horietako bakoitzean izangaiak zer dakien baloratzeko, Nafarroako Administrazio Publikoaren Institutuak espresuki antolatutako azterketak egiten ahal dira; bost zailtasun maila izanen dira, eta hizkuntza bakoitzari ematen ahal zaion gehieneko balorazioaren 1/5 izanen du maila bakoitzak.

III. ERANSKINA

Gai zerrenda

1. gaia.-Larrialdietan jokatzeko prozedurak; deiak eta gertaerak bideratzea, agintea eta baliabideen kontrola, gertaeren jarraipena.

2. gaia.-Larrialdiak kudeatzeko sistemak: deiak jaso eta erantzutea. Gertaerak lokalizatu eta balidatzea. Gertaerak tipifikatzea. Agentziak eta zerbitzuak esleitzea. Baliabideak esleitzea. Gertaeren segimendua eta bukaera. Txosten finkatua. Web ataria. TcGeolocator aplikazioa. ATDHT aplikazioa. SIGANE aplikazioa.

3. gaia.-Komunikazio sistemak. Radio Tetra. DWS aplikazioa. Estazioen azalpena. Zuzeneko modua, dei taldeak, dei pribatua. Larrialdietako deiak. Testuak bidaltzea irrati bidez. GIS, AVL-GPS. Baliabideen kokapena. Unitateen segimendua. Deiak lokalizatzea, POSIC.

4. gaia.-S.O.S. Nafarroako prozedura operatiboak. Jarduten duten zerbitzuen mobilizazioa, tipologiaren arabera.

5. gaia.-S.O.S. Nafarroako prozedura operatiboak. Interes berezia duten tokietara, establezimenduetara edo kolektiboengana joateko jarduketa zerbitzuen mobilizazioa.

6. gaia.-S.O.S. Nafarroako prozedura operatiboak. Zerbitzu edo agentziak mobilizatzeko irizpideak.

7. gaia.-Larrialdiak kudeatzeko tresna osagarriak. Informazio Hidrologikorako sistema automatikoak. Nafarroako informazio meteorologikoa. Meteoalerta. Arrisku kimikoa: CERET delakoa. Salgai arriskutsuak tarteko diren istripuetan esku hartzeko fitxak. Informazio sismikoa.

8. gaia.-Geografia aplikatua: funtsezko zerbitzuen baliabideak foru lurraldean ezartzea.

9. gaia.-Geografia: Nafarroako biziguneak: Nafarroako izendegia. Udal eta kontzejuak; entitate kolektiboak eta bereziak; lekuak eta hiribilduak; fazeriak, basoak eta Bardea; Iruñeko eta Tuterako barruti eta sekzioak. Kodeketa. Nafarroako toponimia.

10. gaia.-Babes Zibila. Kontzeptuak. 2/1985 Babes Zibilaren Legea. Babes Zibilaren Arau Oinarrizkoa. Nafarroako Babes Zibilari eta Larrialdien Kudeaketari buruzko 8/2005 Foru Legea.

15. gaia.-Babes Zibila. Babes Zibileko planak. Lurralde planak eta plan bereziak.

11. gaia.-Babes Zibileko planak Nafarroan: PLATENA, TRANSNA, Oihanetako suteak, Uholdeak. Tunelen plana. Bide sarean gertatzen diren gorabeheretan esku hartzeko plana eta neguko bidezaintza plana.

12. gaia.-Nafarroako Larrialdietako Agentzia. Nafarroako Larrialdietako Agentziako unitate organikoak eta haien eginkizunak.

13. gaia.-Maiatzaren 4ko 150/1998 Foru Dekretua, Ekintza Koordinaziorako Zentroa arautzen duena.

14. gaia.-Larrialdi Zerbitzuak: suhiltzaileak eta Foruzaingoa.

15. gaia.-Larrialdi Zerbitzuak: larrialdietako osasun garraioaren sarea.

16. gaia.-Larrialdi Zerbitzuak: oinarrizko osasun laguntza. Erietxeko larrialdi zerbitzuak.

17. gaia.-Larrialdi Zerbitzuak: larrialdietan zeregina izan dezaketen Nafarroako beste zerbitzu edo erakunde batzuk. Larrialdietarako boluntarioak.

18. gaia.-Estatuaren Babes Zibilaren antolaketa. Presako eta larrialdietako zerbitzuak. Larrialdietarako unitate militarra.

Oharra: Zein egunetan argitaratzen den deialdia Nafarroako Aldizkari Ofizialean, egun horretako legeriaren arabera eskatuko dira III. eranskineko gaiak.

Iragarkiaren kodea: F1005012