Iragarkia

20. ALDIZKARIA - 2010eko otsailaren 12a

1. NAFARROAKO FORU KOMUNITATEA

1.5. ESTATUTUAK ETA LAN HITZARMEN KOLEKTIBOAK

81/2010 EBAZPENA, urtarrilaren 22koa, Arriskuen Prebentziorako eta Lanaren zuzendari nagusiak emana, Altsasuko "ARFE-Felipe Lecea Fundazioa" enpresaren lan hitzarmen kolektiboaren testua erregistratu, gorde eta Nafarroako Aldizkari Ofizialean argitaratzea erabakitzen duena (espediente zenbakia: 2/2010).

Departamentu honetan 2010eko urtarrilaren 15ean sartu da "ARFE-Felipe Lecea Fundazioa" enpresaren lan hitzarmen kolektiboaren testua, 44 artikuluz, xedapen gehigarri batez eta eranskin 1ez (2009rako ordainsarien taula) osatua, enpresaren ordezkaritzak eta langileen ordezkariek (ELA-STV) 2009ko abenduaren 21ean izenpetu eta onetsia.

Berrikuntza, Enpresa eta Enplegu Departamentua da Lan Hitzarmen Kolektiboaren testua erregistratu, gorde eta argitaratzeko eskumena duena, Estatuaren lan arloko eginkizunak Nafarroako Foru Komunitateari eskualdatzeko arauak ezartzen dituen apirilaren 11ko 937/1986 Errege Dekretuan ezarritakoaren arabera. Eginkizun haiek martxoaren 24ko 1/1995 Legegintzako Errege Dekretuaren 90. artikuluan ezarrita daude. Horiek horrela, eta kontuan hartuta Hitzarmen kolektiboen erregistro eta gordailuei buruzko maiatzaren 22ko 1040/1981 Errege Dekretuan ezarritakoa.

Adierazitakoarekin bat eta Nafarroako Foru Komunitateko Administrazioari buruzko abenduaren 3ko 15/2004 Foru Legearen 22.1 artikuluak ematen dizkidan eskudantziak erabiliz,

EBATZI DUT:

1. Altsasuko "ARFE-Felipe Lecea Fundazioa" enpresaren lan hitzarmen kolektiboa erregistratzea (kodea: 3108862) Lan Hitzarmen eta Akordio Kolektiboak Erregistratu eta Gordetzeko Bulegoan horretarako bereziki prestaturik dagoen liburuan, eta bertako administrazio unitatean testua eta dokumentazioa gordetzea.

2. Ebazpen honen berri ematea Negoziazio Batzordeari eta adieraztea ebazpenak ez duela administrazio bidea amaitzen eta honen aurka gora jotzeko errekurtsoa jartzen ahal dela, Berrikuntza, Enpresa eta Enpleguko kontseilariari zuzendua, jakinarazi eta biharamunetik hilabeteko epean.

3. Ebazpen hau Nafarroako Aldizkari Ofizialean argitaratzea, orok jakin dezan.

Iruñean, 2010eko urtarrilaren 22an.-Arriskuen Prebentziorako eta Lanaren zuzendari nagusia, Imelda Lorea Echavarren.

Altsasun, 2009ko abenduaren 21ean.

BILDU DIRA:

Alde batetik: Jesús Torralba Zelaia jauna, Altsasuko ARFE-F. LECEA Fundazioaren legezko ordezkaria den aldetik.

Eta bestetik: Rakel Ausin Campos andrea (NAN zk.: 72669046V), Amaia Beaskoetxea Martinez andrea (NAN zk.: 14588739T) eta Arantxa Salegi Rivera andrea (NAN zk.: 72663018S), ARFE-F. LECEA Fundazioko langileen ordezkariak diren aldetik.

Ados jarrita, ARFE-F. Lecea Fundazioko langileentzako II. hitzarmen kolektiboko klausulak ezarri dituzte. Hona hemen horien edukia:

I. TITULUA

Aplikazio esparrua eta Batzorde Paritarioa

1. artikulua.-Langileria.

Hitzarmen kolektibo honek eragina izanen du Langileen Estatutuak eta gainerako legeek ezarri dituzten kontratu modalitateetako edozeinetan oinarrituta ARFE-Felipe Lecea Fundazioan lan egiten duten langile guztiengan, baina ez zaie aplikatuko boluntariotza sozialean dihardutenei edo ARFE-Felipe Lecea Fundazioak zerbitzuen errentamendurako kontratatu dituen enpresetako plantilletan dauden langileei.

2. artikulua.-Iraunaldia.

Sinatu eta biharamunean hartuko du indarra hitzarmen honek, eta atzerako eragina izanen du, 2009ko urtarrilaren 1etik.

Hitzarmenak hiru urte iraunen du, 2009ko urtarrilaren 1etik 2011ko abenduaren 31ra arte.

Hitzarmen honen amaiera bere mugaegunean iragarritzat emanen da, eta sinatu duten alderdiek konpromisoa hartu dute indarraldiaren azken seihilekoan hitzarmen berria negoziatzen hasteko. Hitzarmen berria egin arte, hitzarmen honetako klausula arauemaileek indarrean iraunen dute, testu berria ezarri arte.

3. artikulua.-Osotasunarekiko lotura.

Hitzarmen honetan itundutako baldintzek multzo zatiezina osatzen dute eta aurreko hitzarmenaren aplikazioz zeudenekin konpentsatzen ahal dira.

4. artikulua.-''Ad personam'' bermea - baldintza hobea.

Baldintzei dagokienez, hitzarmena sinatzen denean plantillako langileek dituzten onuragarrienak mantenduko dira.

Hitzarmen honek indarra hartzean bertan ezartzen direnak baino lansari handiagoak (urteko konputuan) kobratzen dituzten langileei hitzarmen honetan onetsiriko ordainsari taulak aplikatuko zaizkie. Ordainsarien arteko aldea "ad personam" bermearen osagarri gisa agertuko da nominan. Ezin izanen da xurgatu, ezta ordaindu eta birbaloratu ere. Osagarri horren zenbatekoa zehazteko, oraingo ordainsaritik hitzarmen honetan ezarririko urteko ordainsaria kenduko da. Hortik ateratzen den kopurua, hamalauz zatitua, izanen da norberaren osagarriaren zenbatekoa, hileko hamabi soldatatan eta aparteko bi pagatan kobratuko dena.

5. artikulua.-Batzorde Paritarioa.

Hitzarmen hau sinatzean, hitzarmenaren segimendu, aplikazio eta interpretaziorako Batzorde Paritario bat eratuko da, alderdi sinatzaileek osatua.

Batzorde Paritario horrek alderdietako edozeinek eskatuta eginen du bilera. Eskaera formala egiten denetik bilera egunera bitarte ez dira inoiz hamabost egun baino gehiago pasatuko. Eskaera formala izateko, hitzarmena sinatu duten alderdietako baten (enpresa nahiz sindikatua) kide guztien sinadurak bildu beharko dira.

Lan hitzarmenaren sinatzaileek konpromisoa hartzen dute lan hitzarmenaren aplikazioan edo interpretazioan sortzen ahal diren arazoak, Lan arloko Jurisdikzioari igorri aurretik, Batzorde Paritarioari jakinarazteko, salbu eta haien ebazpena legeak ezarritako epeen menpe badago (kaleratzeak, gatazka kolektiboak, lan baldintzen funtsezko aldaketak, etab.).

II. TITULUA

Langileen sailkapena

6. artikulua.-Langileen sailkapena.

Artikulu honetan aipatzen den langileen sailkapena adibide gisara eman da. Horrek ez du lanpostu guztiak betetzera behartzen.

A taldea:

Zuzendari medikoa.

Kudeatzailea.

Mediku espezialistak.

Psikologoa.

Giza Baliabideak.

Erizaintzako burutza.

B taldea:

OLT/EUD.

Gizarte langilea.

Fisioterapeuta.

Okupazio-terapeuta.

Administraria.

C taldea:

Erizaintzako laguntzailea.

Sukaldaria.

Administrari laguntzailea.

D taldea:

Garbitzailea.

Mantentze lanetako langilea.

7. artikulua.-Definizioak eta eginkizunak.

Eginkizun horiek Zentroaren Kalitate Kudeaketako Sisteman deskribatuta daude.

Nolanahi ere eta oro har, langile guztiak beren nagusiek agintzen dizkieten lan eta operazioak egitera behartuak daude, nor bere eskumen eta lanbide kategoriaren barnean eta duintasunaren eta lanbide prestakuntzaren kalterako izan gabe. Nolanahi ere, orain arte kategoria eta postu guztietan zentroan egin izan diren lan guztiak eginen dira.

Eguneko zentroan lan egiten duten Erizaintzako laguntzaileek beren gaur egungo kategoriari eta soldatari eutsiko diete uneoro, eta ezin izanen zaie aplikatu gaur egungo egoera kaltetzen duen inolako formularik.

III. TITULUA

Kontratazioak

8. artikulua.-Kontratazioak.

Lanean hasteko eta zentroan edozein motatako kontratazioak egiteko, langilearen eta Enpresako Zuzendaritzaren arteko kontratazio askea eginen da, langileei beren lanaren kategoriari dagokion titulazio akademikoa eskatuko zaiela.

9. artikulua.-Barne igoera.

Hitzarmen hau sinatzen den unean lanaldi partzialeko kontratu mugagabea duten langileek lehentasuna izanen dute lanaldi osoko langileek zentroan sortzen dituzten aldi baterako ezintasuneko bajak, baimenak, txanda aldaketak eta eszedentziak betetzeko, ezarritako mugaraino eta adierazi bezala, baldin eta ezartzen diren gaitasun, gaikuntza edo igoera betekizunak betetzen badituzte eta hobaria duten kontratuak ez badira.

-7. egunetik 30.era bitarteko ordezpenen %25 (lautatik bat). Aldi baterako kontratua duten langileak ordezpena egiten hasiko dira eta gero txandaka eginen dute aldi baterako kontratua duten langileek eta langile finkoek. Igoera hori ez da aplikatuko ekainetik irailera bitarteko eta abenduko oporraldi nagusietan.

-Hobaridunak ez diren hilabetetik gorako ordezpenen %50 (bitatik bat). Kontratu mugagabea duten langileak ordezpena egiten hasiko dira.

-Lanpostu hutsak eta lanpostu berriak: lanaldi partzialeko kontratu mugagabea duten langileek lehentasuna izanen dute dauden lanpostu hutsak edo lanpostu berriak betetzeko beren lanbide kategoriaren barnean, barne igoerari aplikatutako gaitasun eta gaikuntza betekizun berberak kontuan hartuta.

Funtzionamenduari buruzko irizpideak:

1. Lanpostu huts edo berri bakoitza kontratazio finkoarekin, aldi baterako kontratazioarekin eta horrela jarraituz beteko da.

2. Langile batek igoeraren bidez lanpostu bat betetzen badu, igoeraren bidez bete beharreko beste lanpostu bat hartzen ahalko du.

3. Une horretan betetzen ari den lanpostuaren txanda ere igoeraren bidez bete beharko da.

Igoerari buruz ezarririko irizpideak:

4 puntu, lehenbiziko kontratuaren egunaren antzinatasunagatik (kontratuen artean 20 egun baino gehiago igarotzen ez badira): puntu 1 urte bakoitzeko, eta gehienez 4 urte.

3 puntu, egokitasun-gaitasun-gaikuntzagatik (Zuzendaritza Medikoak ezarritakoa).

Puntu 1, lanpostuko ezagutzagatik eta esperientziagatik.

2 puntu, ustekabeko edo premiazko txandei buruzko prestasunagatik.

Puntu 1, azken lau urteko prestakuntzagatik: 0,25 puntu 10 ordu presentzialetik gorako ikastaro bakoitzeko / 0,50 puntu 50 ordu presentzialetik gorako ikastaro bakoitzeko / 0,10 puntu on line ikastaro bakoitzeko (gehienez 0,20 puntu).

2 puntu, bidezko barne igoeran lehentasuna duen langilearen lehentasunagatik.

Edonola ere, mailaz igotzen den langile finkoak lehengo lanpostura itzultzeko eskubidea izanen du, kontrakorik ituntzen ez bada behintzat.

Hobaria duten kontratuetan hobaridun izateko baldintzak betetzen dituen pertsonarik kontratatzen ez bada, ordezpena promozioan jarriko da.

Artikulu honen xede den igoera sistema hitzarmen honen indarraldia amaitzen denean berrikusiko da, barne igoera horrekin jarraitzea ala ez jarraitzea baloratuta.

10. artikulua.-Praktikaldiko kontratua.

Modalitate horretan kontratatzen diren langileek kategoria horretako lansariaren %100 kobratuko dute. Nolanahi ere, jaiegunetako osagarriak oso-osorik kobratuko dira.

11. artikulua.-Errelebo kontratua.

Gizarte Segurantzaren arloko Neurriei buruzko abenduaren 4ko 40/2007 Legean ezarritakoari lotuko zaio.

12. artikulua.-Lana uztea.

Beren borondatez enpresatik alde egin nahi duten langileak behartuak daude Giza Baliabideetako arduradunari jakinaraztera, idatziz, aurreabisurako epe hauek betez:

-15 egun natural, B, C eta D lanbide kategorietarako.

-Hilabetea, A lanbide kategoriarako.

Epe hori betetzen ez badu, hamabost egun bete arte falta diren egunei dagokiena kenduko zaio likidaziotik.

13. artikulua.-Probaldia.

Langile sartu berri orok probaldi bat pasatu beharko du nahitaez, hitzarmen honetan kategoria bakoitzarentzat ezarritako denbora gainditu ezin izanen duena, zerrenda honetan adierazten den bezala:

-A lanbide kategoria 2 hilabete.

-B lanbide kategoria hilabete 1.

-C eta D lanbide kategoriak 15 egun.

Probaldi horiek kontuan hartuko dira antzinatasunerako, probaldiak iragan eta gainditu ondoren. Aldi baterako ezintasun egoerak ez du horren konputua etengo.

IV. TITULUA

Lan baldintzak

14. artikulua.-Lanaren antolaketa.

Lanaren diziplina eta antolaketa enpresaburuaren berariazko eskumena da eta Langileen Estatutuan ezarritakoari, aplikatzen ahal diren lege eta arauzko xedapenei eta hitzarmen honen edukiei lotuko zaizkie.

8:00etan, 15:00etan eta 22:00etan, txandaka lan egiten duten langileek beren lanpostuetan egon beharko dute, behar bezala uniformaturik.

Ezinbesteko zirkunstantzia bat dela eta langile bat ezin bada joan bere lanpostura, aurreko txandako langilea lanpostuan geratuko da, baina inoiz ez 2 ordu baino gehiago; ordu horietako bakoitza 1,5 gisa ordainduko da, orduen tasaren gainean.

15. artikulua.-Urteko lanaldia (benetako lan denbora).

2009rako urteko lanaldia ondokoa izanen da:

Neuropsikologia Benetako 1.710 ordu*.

Administrazioa Benetako 1.710 ordu*.

Erizaintzako burutza Benetako 1.784 ordu.

EDU Benetako 1.609 ordu.

Fisioterapia eta okupazio-terapia Benetako 1.651 ordu.

Ospitaleko laguntzaileak Benetako 1.710 ordu.

Eguneko zentroko laguntzaileak Benetako 1.728 ordu.

Sukaldaria Benetako 1.736 ordu.

Garbitzailea Benetako 1.710 ordu.

2008ko abenduaren 18ko hitzarmenaren arabera, orduak murriztuko dira, eguneko zentroko laguntzaileen eta sukaldarien kategorietarako, 2012an benetako orduak 1.710 izan daitezen.

-Benetako lanorduak arautzea, hitzarmen honen indarraldiaren hiru urteetan.

Urriaren 1ean urteko orduak berrikusiko dira orduen orekarik eza zuzentzeko, kategoria bakoitzaren benetako lanorduak betetze aldera.

Urteko benetako lanaldiaren balizko orekarik eza hurrengo urtean konpentsatuko da ordu horiek egun oso bat, gehienez, sortzeko metatuz, eta hurrengo urteko egutegian sartuko da.

Urteko lanaldi hori betetzeko, astean benetako 40 lanordu eginen dira gehienez. Enpresa eta langileen ordezkariak ados jarriz gero kopuru hori gainditzen ahalko da, baina urteko lanaldia gainditu gabe.

16. artikulua.-Lanbide prestakuntza eta birziklapena.

Urteko prestakuntza plana egitea, langileen ekarpenak kontuan hartuta.

Lehentasuna izanen dute ikastaroari dagokion arloan lan egiten duten langileek eta aurretik ikastarorik egin ez dutenek (norberaren kontu egin ezean).

Bidezkoa bada, zozketa eginen da gutxienez 6 hilabetez lan egin duten langileen artean.

17. artikulua.-Atsedenaldiak.

6 ordutik gorako lanaldi jarraituetako langile guztientzat 20 minutuko atsedenaldia ezarri da eguneko. Denbora hori benetan lan egindako denbora bezala kontatuko da.

Edozein arrazoi dela medio, lanaldi murrizketa dela-eta, egunean 6 orduko lanaldia gainditzen ez bada, ez da atsedena izateko eskubiderik izanen.

Atsedenaldiko taldea bi pertsonak osatuko dute, gehienez.

Eragozpenik ez badago, atsedenaldia lantokian bertan hartu beharko da. Atsedenaldiak zentroko Zuzendaritzak finkatzen ahal ditu eta horren kariaz zerbitzu egokia emateari ez zaio inola ere kalterik eginen.

Ohiko lanaldiaren barnean atsedenik ez hartzeak ez du enpresari konpentsazioa eskatzeko eskubiderik sortuko.

Atsedenaldi horretan laguntza beharrizanak estaliko dira eta atsedenaldia eteten ahalko da, zirkunstantzia zehatz batean zerbitzuaren beharrizanek hori eskatzen badute.

18. artikulua.-Lan egutegia.

Urtero eta aurreko urteko azken hilean enpresak egutegia eginen du, honako hauek adieraziko dituena: laneko ordutegia, lanegunen urteko banaketa, jaiegunak, asteko edo lanaldien arteko atsedenak eta egun baliogabeak.

Ondoren, zentroko Zuzendaritza langileen ordezkariekin bilduko da eta egutegia jendaurrean jarriko du zentroko ageriko toki batean.

19. artikulua.-Oporrak.

Urteko oporren lanegunen kopurua hurrengo taulan adierazitakoa izanen da.

Astelehenetik ostiralera bitarteko lanaldia duten langileek opor egun bat gehiago izanen dute larunbatak diren jaiegunen truke, fisioterapeutaren kategorian izan ezik, haren lan txanda lanaldi jarraitukoa bada. (Hori gertatzen da orduen murrizketagatik eta lanaldi zatitua lanaldi jarraitu bihurtu izanagatik).

Oporrak eskatzeko eta emateko prozedura honako hau da guztientzat:

1. Eskaera eguna: antolaketaren, langileen banaketa egokiaren eta klinikako zerbitzuen beharren ondorioetarako, urte bakoitzeko martxoaren 15a baino lehen, langileek beren oporraldiak aurkeztuko dituzte eta eskaerak onartuko dira, apirilaren 30a baino lehen.

Oporraldi nagusiak:

Aste Santua (ostegunetik astelehenera).

Ekainaren 23tik irailaren 20ra.

Abenduko zubia.

Eguberriak (abenduaren 24tik 31ra).

Sasoi horietatik kanpora eskatzen diren oporrei dagokienez, horiek hasi baino hilabete bat lehenago aurkeztuko dira eskaerak. Zenbait hilabetetan tartekatutako aldietarako eskaera egiteko, inprimaki bat aurkeztuko da hilabete bakoitzeko.

2. Langileek gehienez ere hiru alditan hartuko dituzte oporrak.

3. Oporretan dauden langileak: oporraldi beretan oporrak hartzen ahal dituzten talde bakoitzeko langileen gehieneko kopurua.

-Ospitaleko laguntzaileen taldea: 3 laguntzaile, gehienez.

-Erizainen taldea: erizain 1, gehienez, eta lanaren egoeraren arabera, 2 erizain.

-Eguneko zentroko laguntzaileen taldea: lanaldi osoko laguntzaile bat eta lanaldi erdiko beste laguntzaile bat, gehienez.

-Gainerako taldeak: langile 1 taldeko, gehienez.

Fisioterapeuten oporrek ez dute eraginik izanen laguntzaileen oporretan.

Lanpostu ibiltaria betetzen duen langileak urte batean ospitalean hartuko ditu oporrak eta hurrengoan, aldiz, eguneko zentroan, eta horrela hurrenez hurren.

4. Langileen arteko adostasunik ez badago, Giza Baliabideetako arduradunak esku hartuko du, oporraldi nagusietatik kanpo gutxienez 4 egun hartzeko irizpidea eta 5. idatz-zatiko irizpideak aplikatuz oporrak esleitzeko.

5. Oporrak esleitzeko irizpideak, beharrezkoa izanez gero:

-Giza Baliabideetako arduradunak aurreko urtean oporraldi nagusietan lan egin duten langileak hartuko ditu kontuan.

-Oporraldi luzeak oporraldi laburren aurretik.

-Zozketa.

Ezarritako prozeduraren arabera oporrak hartzeko egunak eskatu, sinatu eta eman ondoren, zehaztapen kolektibokotzat hartuko dira, eta horregatik, aldi baterako ezintasun prozesuak direla-eta, ezin izanen da egunez aldatzeko eskaera egin, non ez den laneko istripua edo lanbide eritasuna, amatasun baja edo haurdunaldiko arriskua edo ospitalizazioa suertatzen oporraldia hasi baino lehen. Kasu horietan, gertakizun horietako batekin batera gertatzen diren opor egunak bakarrik aldatuko dira egutegiko beste data batera.

Oporrak eteten badira, enpresak etenaldi hori nabarmendu eta justifikatu beharko du. Ukitutako langileari 303,60 euroko zenbateko likidoa (aurreko urteko KPI errealaren urteko eguneraketa. %0tik gorako KPI) ordainduko zaio nominan, etendako opor egunak hartuko ditu beste aldi batean eta etenaldi horretatik ondorioztatutako gastu ekonomikoak negoziatuko dira.

Oro har, oporrak urteko abenduaren 31n bukatuko dira.

20. artikulua.-Baimen ordainduak.

1. Langilea, aurretik abisatu eta justifikatuta lanetik atera daiteke, ordaindua izateko eskubidearekin, arrazoi hauetako bat dela medio eta Langileen Estatutuaren 37.3 artikuluan ezarririko denborarako:

a) Hamabost egun natural, ezkontzeagatik.

b) Bi egun natural, seme-alaben jaiotzagatik edo bigarren mailara arteko odol edo ezkontza bidezko ahaideen heriotzagatik, istripu larriagatik, eritasun larriagatik edo 7 egun baino gutxiagoko ospitalizazioagatik.

c) Lau egun natural, bigarren mailara arteko odol edo ezkontza bidezko ahaideen 7 egunetik gorako ospitalizazioagatik.

d) Bi egun natural, bigarren mailara arteko odol edo ezkontza bidezko ahaideen ebakuntza kirurgikoagatik, ospitaleratu beharra izan gabe etxean atseden hartzea agintzen bada.

Arrazoi horrengatik langileak 100 km-tik gorako distantzian dagoen herrira joan behar badu, baimenak bi egun gehiago hartuko ditu.

Baimenerako bi egun baino gehiago badaude, baimen hori bitan zatitzen ahalko da, gehienez.

Lizentziaren denbora ezin izanen da inola ere ospitaleratzea baino luzeagoa izan.

e) Egun natural bat, ohiko bizilekuz aldatzeagatik.

f) Behar-beharrezkoa den denbora, publikoa edo pertsonala den eginbehar saihestezina betetzeko, boto ematekoa barne.

g) Behar-beharrezkoa den denbora, eginkizun sindikaletan edo langileen ordezkaritza lanetan aritzeko, lege bidez edo hitzarmenen bidez ezarritakoari jarraikiz.

h) Bederatzi hilabetetik beherako seme-alabei bularra ematea: bederatzi hilabetetik beherako seme edo alabari bularra ematen dioten emakumezko langileek eskubidea dute lanetik ordu betez irteteko. Denbora hori bi zatitan bana dezakete.

i) Behar-beharrezkoa den denbora, erditu aurreko azterketa medikoak egiteko eta erditzea prestatzeko tekniketan trebatzeko, lanorduetan egin behar badira.

j) Enpresan urtebeteko antzinatasuna duten langileek norbere eginbeharretarako egun bat izanen dute; lanaldi zatitua duten langileek, norbere eginbeharretarako bi egun izanen dituzte. Egun hori hartu ahal izateko, hartu baino hamabost egun lehenago, gutxienez, eskatu beharko da (premia larriko kasuetan izan ezik; izan ere, horietan hiru egun lehenago eskatu beharko da, gutxienez). Enpresak hori hartzeko baimena emanen du, antolaketa arrazoi justifikatuak direla-eta egun horretan hartzeko ezintasuna egon ezean. Edonola ere, langileari jakinaraziko dio 48 ordu lehenago, gutxienez.

k) Enpresan urtebeteko antzinatasuna duten langileei egun 1 esleituko zaie bai beraiek, bai lehenbiziko mailara arteko odol bidezko ahaideak (hau da, gurasoak eta seme-alabak) mediku espezialistengana joateko.

21. artikulua.-Amatasuna.

Langileen Estatutuaren 48. artikuluan eta Laneko eta Familiako Eginkizunak batera Eramateari buruzko 39/1999 Legean eta horiekin bat heldu diren legeetan xedatutakoa aplikatuko da.

22. artikulua.-Borondatezko eszedentzia.

Borondatezko eszedentziari dagokionez, Langileen Estatutuaren 46. artikuluan eta Emakumeen eta Gizonen arteko egiazko Berdintasunerako Legean xedatutakoari jarraituko zaio.

Kontratu mugagabea izan eta enpresan gutxienez urtebeteko antzinatasuna duen langileak eskubidea izanen du borondatezko eszedentzia onartua izateko, urtebetetik beherako eperako edo urtebeterako, lanpostua gordeta.

Eskubide horretaz berriro balia daiteke langile bera, borondatezko aurreko eszedentzia bukatu eta lau urte igaro eta gero.

23. artikulua.-Eszedentzia berezia amatasunagatik eta ahaideak zaintzeagatik.

Langileen Estatutuaren 46. artikuluan xedatutakoa aplikatuko da, Emakumeen eta Gizonen arteko egiazko Berdintasunerako Legearen arabera.

24. artikulua.-Semea edo alaba eta familiakoren bat zaintzeko lanaldi murrizketa.

Langileen Estatutuan ezarritakoa aplikatuko da. Emakumeen eta Gizonen arteko egiazko Berdintasunerako Legea.

25. artikulua.-Lanaldi murrizketa adinagatik.

Langileen Estatutuan ezarritakoa aplikatuko da.

26.artikulua.-Zerbitzuan dauden langileen gutxieneko kopurua.

Zerbitzuaren kalitatea eta langilearentzako baldintzak babesteko asmoz, langileen kategoria guztiek ohiko plantillaren %70ari eutsiko diote uneoro, lanuzteetan eta grebetan izan ezik.

Arlo horretako ez-betetzeei dagokienez, diziplina arloan indarra duen araudia aplikatuko da.

V. TITULUA

Baldintza ekonomikoak

27. artikulua.-Ordainsariak.

Hitzarmen honen eraginpeko langileen ordainsariak oinarrizko lansariak eta osagarriek osatzen dituzte.

Ordainsarien zenbatekoa eta banaketa eranskineko lansarien taulan ageri direnak izanen dira eta, orobat, ondorengo urteetakoak.

Ordainsari kontzeptuen zenbatekoak lanaldi osoari eta itundutako orduen urteko konputuari dagozkie.

Lanaldi partzialen kasuan, ordainsaria lan egindako orduen proportziokoa izanen da.

Nomina hilabete bakoitzeko lehenbiziko 3 eguneko epean ordainduko da.

Plusak kalkulatzeko egunen zenbaketa hilabete naturala errespetatuta eginen da, hau da, hilabete bakoitzeko 1. egunetik azken egunera bitartekoak zenbatuta.

Lanbide kategoriaren araberako ordu arruntaren prezioa kalkulatzeko, urteko ordainsari gordina urteko ordu gordinez zatituko da.

2009ko urtarrilaren 1etik aurrera, erizainei 15 minutu ordainduko zaizkie txandarteko gisa.

Oinarrizko lansaria: oinarrizko lansaria lanbide kategoria bakoitzaren lansari taulen eranskinean ageri da, eta lanaldi osoari eta itundutako urteko ordu kopuruari dagokie.

Hamalau pagatan ordainduko da, aparteko bi pagak barne.

Hitzarmenaren osagarria: hitzarmenaren osagarria lanbide kategoria bakoitzaren lansari taulen eranskinean ageri da, eta lanaldi osoari eta itundutako urteko ordu kopuruari dagokie.

Hamalau pagatan ordainduko da, aparteko bi pagak barne.

Antzinatasunaren osagarria: langileak oinarrizko lansariaren gaineko %5eko osagarria jasoko du, lanean jarraian emandako hiru urteko aldi bakoitzeko. Hirurteko bakoitzaren zenbateko osoa ordainduko da epea bete eta hurrengo hileko nominan.

Antzinatasuna zenbatzeko hasierako eguna lehenbiziko kontratuaren hasierakoa eta langilea enpresara era jarraituan lotzen duten hurrengoen hasiera eguna izanen da, kontratuen artean 20 egun baino gehiago igarotzen ez badira.

Jaiegunetako plusa: Hona hemen plusaren 2009ko ekitaldirako zenbatekoa:

Erizainak eta diplomadunak: 25,30 euro.

Laguntzaileak eta gainerako taldeak 16,20 euro.

Jaiegunean benetan egindako lana ordainduko da, honela:

%100, 4 orduko edo hortik gorako lanaldietan.

%50, 4 ordutik beherako lanaldietan.

Aparteko pagetarako ez da kontuan hartuko eta oporren ordainsaritik espresuki baztertzen da.

Igandeetako plusa: Hona hemen plusaren 2009ko ekitaldirako zenbatekoa:

Erizainak eta diplomadunak: 23,78 euro.

Laguntzaileak eta gainerako taldeak: 14,67 euro.

Jaiegunean benetan egindako lana ordainduko da, honela:

%100, 4 orduko edo hortik gorako lanaldietan.

%50, 4 ordutik beherako lanaldietan.

Gaueko lanaren plusa: gaueko 22:00etatik goizeko 8:00ak arte egiten diren lanorduek berariazko ordainsaria izanen dute, %35 gehituz oinarrizko lansaria gehi antzinatasuna zati urteko benetako orduen kopurua.

Hona hemen plusaren 2009ko ekitaldirako zenbatekoa:

Erizainak (antzinatasunik gabe): 4,73 euro orduko.

Laguntzaileak (antzinatasunik gabe): 3,31 euro orduko.

Eguberrietako plusa:

Eguberri eta Urte Berri egunak jaiegun bereziak direnez, egun horietan (abenduaren 24ko gaueko txandaren hasieratik abenduaren 25eko arratsaldeko txandaren amaierara arte eta abenduaren 31ko gaueko txandaren hasieratik urtarrilaren 1eko arratsaldeko txandaren amaierara arte) 2009ko ekitaldirako honako zenbateko hauek ordainduko dira:

Erizainak eta diplomadunak: 60,72 euro.

Laguntzaileak eta gainerako taldeak: 50,60 euro.

28. artikulua.-Aparteko pagak.

Langileek urtean aparteko bi paga izateko eskubidea dute, uztailaren 20an eta abenduaren 20an jaso beharrekoak. Aparteko pagaren osagaiak dira oinarrizko lansaria, hitzarmenaren osagarria eta antzinatasuna.

Lanean urteko edozein unetan hasita ere, langileek eskubidea izanen dute aparteko eskersarietatik dagokien parte proportzionala jasotzeko.

29. artikulua.-Ordainsari igoera.

Hitzarmenaren indarraldiaren hiru urteetan klinikako langileen ordainsariak honela igoko dira:

2009. urterako: 2008ko NAFARROAKO KPI erreala + 200,00 euro.

2010. urterako: 2009ko NAFARROAKO KPI erreala + 200,00 euro.

2011. urterako: 2010eko NAFARROAKO KPI erreala + 350,00 euro.

Erizaintzako laguntzaileen kategoriak, aurreko igoeraz gain, 240,75 euroko ordainsari igoera izanen du, hitzarmenaren indarraldiaren urte bakoitzeko.

30. artikulua.-Lansarien bermea.

2010eko lehenbiziko hiruhilekoan lansarien bermeari buruzko oinarriak ezarriko dira, Nafarroako KPI erreala zerotik beherakoa den kasurako.

Berme hori gaur egungo hitzarmenari erantsiko zaio.

31. artikulua.-Lanaldiaren aldaketa.

Ezinbesteko, premiazko edo ustekabeko arrazoiak direla-eta, lanaldia aldatzen ahalko da bi egunez, gehienez. Dena den, alderdiak ados egonez gero, egun horiek luzatzen ahalko dira.

Lanaldiaren aldaketa borondatezkoa izanen da.

-Txandakako lanaren osagarria gehitzea:

1. Langileak hurrengo 24 orduen barnean lan egin behar badu, txanda aldaketagatik ordu horietako bakoitza 1,2 gisa ordainduko zaio, hileko ordu arruntaren prezioaren gainean.

2. Langileak lanera joan beharrik ez bazuen, ordu horietako bakoitza 1,3 gisa ordainduko zaio eta hartzen duen lehenbiziko oporraldian egun bat gehiago izanen du.

32. artikulua.-Aparteko orduak.

Enpresa honen izaera berezia dela-eta, eguneko 24 orduetan etengabeko zerbitzua egiten baitu, presako eta ustekabeko arrazoiengatiko absentziak betetzeko egin beharreko ordu osagarriak aparteko ordutzat joko dira baldin eta, urteko kopuruan, hitzarmen honetan itundutako urteko lanaldia gainditzen badute.

Aparteko ordu horien izaera kontuan hartuta, egiturazko ordutzat (puntako ekoitzaldiengatik, ustekabeko absentziengatik edo jarduera zehatzaren izaeratik ondorioztatutako egiturazko beste zirkunstantzia batzuengatik lanaldi arruntetik kanpo egin beharrekoak) joko dira, eta borondatezkoa izanen da horiek egitea.

Ordu horiek diruz konpentsatzen ahalko dira, ordu arruntaren balioaren gaineko 1,5 ordainduta, edo horien truke atseden denbora hartuko da, ordu bakoitzeko ordubeteko atsedenaldia. Atsedena zein egunetan hartu hautatzen ahalko da, baina ezin izanen da hartu oporraldi nagusietan.

Ezinbesteko aparteko orduak: ezbeharrak edo presako beste kalte batzuk konpontzeko behar diren orduak dira, eta orobat, lehengai galkorrak galtzeko arriskurik bada egin beharrekoak. Nahitaezkoak izanen dira eta ez dira zenbatuko urteko 80 orduren gehieneko mugan. Enpresak lan arloko agintaritzari jakinaraziko dio ordu horiek egin direla, egin eta hurrengo hilabetearen barnean.

Aparteko orduei eutsiko zaie, legeak ezarritako aldi baterako kontratuen edo kontratu partzialen ereduak erabili ezin badira. Enpresak langile bakoitzak egin dituen aparteko orduen kopurua eta ordu horien izaera jakinaraziko du hilean behin, eta horren berri emanen die hilero lan arloko agintaritzari eta langileen ordezkariei.

33. artikulua.-Ordu osagarriak.

Lanaldi partzialeko kontratuan adostutakoaren arabera ohiko orduez gainera egin litezkeenak dira.

Enpresaburuak ordu osagarriak egitea eskatzen ahalko du, langilearekin berariaz itundu duenean bakarrik. Itun hori idatziz egin beharko da nahitaez, ondorio horretarako ezarririko eredu ofiziala erabilita.

Ordu osagarrien kopurua ezin izanen da kontratuaren xede den lanaren ordu arrunten %15etik gorakoa izan.

Benetan egindako ordu osagarriak ordu arrunten moduan ordainduko dira eta Gizarte Segurantzako kotizazio oinarrien, gabealdien eta prestazioen oinarri arauemaileen ondorioetarako zenbatuko dira. Ondorio horretarako, egindako ordu osagarrien kopurua eta ordainsaria lansarien banakako ordainagirian eta Gizarte Segurantzako kotizazio agirietan adierazi beharko dira.

Ordu osagarriei buruzko ituna eta horiek egiteko baldintzak Langileen Estatutuan ezarririko betekizunak betetzearen eta, hala denean, aplikatu beharreko hitzarmen kolektiboetan ezarritako araubidearen baldintzapean egonen dira. Betekizun horiek eta araubide juridikoa bete ezean, langileak ordu osagarriak egiteari uko egiteak ez du ekarriko zehatzen ahal den lan portaerarik, nahiz eta ordu horiek aurretik itunduak izan.

VI. TITULUA

Hobekuntza sozialak

34. artikulua.-Erantzukizun zibileko asegurua.

Enpresak, erantzukizun zibileko poliza baten bidez, aseguru bat eginen die langile guztiei, lanaren ondorioz gerta litezkeen erantzukizunak estaltzeko.

Polizaren kopia eguneratua langileen ordezkariei emanen zaie.

35. artikulua.-Istripu asegurua.

Enpresak aseguru poliza bat itunduko du, laneko istripuetarako edo eritasun profesionaletarako, heriotzako eta erabateko baliaezintasun iraunkorreko arriskuak estaltzen dituena. Estaldura 30.000 eurokoa izanen da. Polizaren kopia eguneratua langileen ordezkariei emanen zaie.

36. artikulua.-Laneko segurtasuna eta osasuna.

Azaroaren 8ko 31/1995 Legean edo, hala denean, laneko arriskuei aurrea hartzeari buruz indarra duen legedian xedatutakoari jarraituko zaio.

Enpresak hitz eman du legearen aginduak eta hura garatzen duten erregelamenduak aplikatuko dituela. Prebentzioko ordezkari berria hautatzeko Batzordeak berariaz besterik adierazi ezean, kargu hori bere gain hartu duen langileak ordezkaria izaten jarraituko du.

Arriskuei aurrea hartzeko plangintza. Enpresan arriskuei aurrea hartzeko ekintza ezartzeak berarekin dakar arriskuei aurrea hartzeko plana ezartzea, antolaketaren egitura, eginkizunen definizioa, jardunak, prozedurak, prozesuak eta ekintza hori gauzatzeko beharrezko baliabideak barne hartzen dituena.

-Norbera babesteko ekipamenduak. Norbera babesteko ekipamendua (NBE) erabili beharko da langileen segurtasun eta osasunerako arriskurik dagoenean eta ezin izan denean saihestu edo behar adina mugatu babes kolektiboko baliabide teknikoekin edo lan antolaketako neurri, metodo edo prozeduren bidez.

NBE horiek babes eraginkorra emanen dute, horrelakoak erabiltzeko arrazoi diren arriskuen aurrean, eta horiek erabiltzeak berak ez du berez inolako arrisku gehigarririk sorraraziko.

NBEak banatzen direnean, banatzearen ardura duen pertsonak horri buruzko informazioa eman beharko du, nola erabili eta zaindu behar diren jakiteko.

-Amatasunaren babesa. Enpresak konpromisoa hartzen du ahalik eta lasterren egiteko eta emateko haurdunaldiko arriskua dela-eta behar diren agiri eta tramite guztiak.

-Istripuen eta gertakarien ikerketa. Istripuen ikerketaren helburu nagusia istripua zerk sortu duen jakitea da, gertatutakoak ezagutu ondoren. Helburua lorturik, ondorengo helburua izanen da ikasitakoari etekina ateratzea, neurri zuzentzaileak diseinatzeko eta ezartzeko, istripu berdinak edo antzekoak sortzen dituen arrazoia ezabatu eta enpresan prebentzioa hobetzearren.

-Prestakuntza. Enpresan lanean hasten diren pertsonei harrera eskuliburua emanen zaie, Datu Pertsonalak Babesteko Legeari eta Laneko Arriskuei Aurrea Hartzeari buruzko Legeari dagokienez langileak dituen eskubide eta betebehar guztiak biltzen dituena.

-Osasuna zaintzea. Enpresak fundazioko langile guztien osasunaren ebaluazioa eginen du urtero.

Azterketa mediko hori egin nahi ez duen langileak berariaz eta idatziz adierazi beharko du.

37. artikulua.-Jantziak eta oinetakoak.

Enpresak jantziak emanen dizkie kategoria guztietako langileei.

Uniformeak eskuratzen dituzten langileak behartuta daude zentroko baldintza estandarren arabera janztera.

Uniformea norberaren erabilerarako izanen da eta langileak berak zainduko du eta haren ardura izanen du, kontrakorik ituntzen ez bada behintzat.

38. artikulua.-Aldi baterako ezintasuna.

Lanetik kanpoko istripuak eta eritasun arruntak sortutako aldi baterako ezintasunean, enpresak honela osatuko du lansaria:

Urteko bajen lehenbizikoa: 1. egunetik 90.era bitartean, langilearen ordainsariaren (oinarrizko lansaria eta hitzarmenaren plusa) %85.

Hurrengo bajak: 4. egunetik aurrera, oinarrizko lansariaren eta hitzarmenaren plusaren %80raino osatuko da.

Nolanahi ere, urtean izandako baja guztiak zenbatuko dira, osatu beharreko gehieneko egunen kopuruaren ondorioetarako. Egun horiek ez dira inola ere 90 baino gehiago izanen.

Laneko istripuak edo lanbide eritasunak sortutako aldi baterako ezintasunean dauden langileek hileko ordainsari arruntaren %90 jasoko dute egoera horretan dauden bitartean.

VII. TITULUA

Hutsegiteak eta zehapenak

39. artikulua.-Puntualtasun hutsegiteak.

Puntualtasun hutsegitetzat joko da ordua baino 5 minutu beranduago iristea. Benetan lan egin ez den denbora deskontatuko da.

Langilearekin zerikusirik ez duten arrazoiek sortutako atzerapenak justifikatzen ahalko dira eta, beraz, ez dira puntualtasun hutsegitetzat joko.

40. artikulua.-Hutsegite arinak.

a) Hogeita hamar egunean lanera hiru aldiz berandu iristea.

b) Lanera bertaratu ez eta hurrengo hogeita lau orduetan hutsegitearen arrazoiak ez jakinaraztea.

c) Lanetik bidezko arrazoirik gabe alde egitea, nahiz eta denbora gutxirako izan, baldin eta enpresarentzako, erabiltzaileentzako edo lankideentzako kalteak direla-eta, arau-hauste larri edo oso larritzat hartzerik ez badago.

d) Zabarkeriaz jokatzea arauei edo jasotako aginduei dagokienez.

41. artikulua.-Hutsegite larriak.

a) Hogeita hamar egunean lanera hiru alditan baino gehiagotan eta hamar baino gutxiagotan berandu iristea.

b) Hogeita hamar egunean behin lanera ez joatea justifikatu gabe.

c) Zerbitzuari dagokionez, agindutako lanetan behar den arreta ez jartzea eta goragokoen jarraibideei jaramonik ez egitea, enpresaren edo erabiltzaileen kalterako.

d) Jasotako aginduak edo ezarritako arauak ez betetzea, batez ere laneko segurtasun eta higieneko neurriei dagozkienak.

e) Hirurogei egunean hutsegite arin bera behin baino gehiagotan egitea.

42. artikulua.-Hutsegite oso larriak.

a) Urtebeteko epean lanera 20 alditan baino gehiagotan berandu iristea.

b) Hilabete batean, bidezko arrazoirik izan gabe, hirutan lanera ez joatea.

c) Eritasuna edo istripua simulatzea.

d) Hitzezko eta egitezko tratu txarrak ematea erabiltzaileei, goragokoei edo lankideei.

e) Lanetik alde egitea edo zabarkeria larriz aritzea, enpresari kalte larriak egiten bazaizkio edo erabiltzaileei egiten ahal zaizkienean.

f) Agindutako kudeaketetan iruzurra, leialtasunik eza edo konfiantza-abusua erakustea, eta enpresari nahiz hirugarrenei lapurtzea, ebastea edo jokabide horren konplize gisa aritzea, enpresan berean zerbitzua ematerakoan.

g) Agintekeria.

h) Aginduak era nabarmenean ez betetzea.

i) Hiruhileko batean hutsegite larriak behin baino gehiagotan egitea.

Aurreko artikuluetako hutsegiteen zerrenda adierazpen gisa eman da.

43. artikulua.-Zehapenak.

Enpresak zehapenak jartzeko ahalmena du. Zehapenak idatziz jakinaraziko zaizkie langileari eta ordezkari sindikalei; gertakariak, hutsegitearen gradua eta ezarritako zehapena adieraziko dira.

Hutsegite larrien edo oso larrien berri langileen ordezkariei emanen zaie, jakinaren gainean egon daitezen.

Enpresak, egindako hutsegiteen larritasuna eta inguruabarrak kontuan hartuta, gehienez zehapen hauek jartzen ahal ditu:

a) Hutsegite arinak: hitzezko edo idatzizko kargu-hartzea.

b) Hutsegite larriak: idatzizko kargu-hartzea. Hamabost egun arteko enplegu-soldaten etenaldia.

c) Hutsegite oso larriak: kaleratu aurreko kargu-hartzea. Hirurogei egun arteko enplegu-soldaten etenaldia. Kaleratzea.

44. artikulua.-Hutsegiteen preskripzioa.

Langileek egindako hutsegite arinak eta larriak hogeita hamar egunen buruan preskribatuko dira, eta oso larriak hirurogeiren buruan, zentroko Zuzendaritza hutsegiteaz jakitun egindako egunetik aitzina.

VIII. TITULUA

Beste xedapen batzuk

Lehenbiziko xedapen gehigarria.-Hitzarmen honetan ezarrita ez dagoenari dagokionez, Langileen Estatutuaren xedapenetan eta Emakumeen eta Gizonen arteko egiazko Berdintasunerako Legean xedatutakoari jarraituko zaio.

Iragarkiaren kodea: F1001341