Iragarkia

17. ALDIZKARIA - 2010eko otsailaren 8a

1. NAFARROAKO FORU KOMUNITATEA

1.5. ESTATUTUAK ETA LAN HITZARMEN KOLEKTIBOAK

20/2010 EBAZPENA, urtarrilaren 13koa, Arriskuen Prebentziorako eta Lanaren zuzendari nagusiak emana, Iruñeko "Baigorri Argitaletxe, S.A." enpresaren lan hitzarmen kolektiboaren testua erregistratu, gorde eta Nafarroako Aldizkari Ofizialean argitaratzea erabakitzen duena (espediente zenbakia: 58/2009).

Departamentu honetan 2009ko abenduaren 23an sartu da "Baigorri Argitaletxe, S.A.'' enpresaren lan hitzarmen kolektiboaren testua, 33 artikuluz eta eranskin batez (2009ko lansarien taula) osatua, enpresaren ordezkaritzak eta langileen ordezkariak (L.A.B.) 2009ko abenduaren 1ean izenpetu eta onetsia.

Estatuaren lan arloko eginkizunak Nafarroako Foru Komunitateari eskualdatzeko apirilaren 11ko 937/1986 Errege Dekretuan ezarritakoari jarraikiz, Berrikuntza, Enpresa eta Enplegu Departamentuak du lan hitzarmen kolektiboak erregistratu, gorde eta argitaratzeko eskumena. Eginkizun horiek martxoaren 24ko 1/1995 Legegintzako Errege Dekretuaren 90. artikuluan daude ezarrita. Horiek horrela, kontuan hartu da Lan hitzarmen kolektiboen erregistro eta gordailuei buruzko maiatzaren 22ko 1040/1981 Errege Dekretuan ezarritakoa.

Adierazitakoarekin bat eta Nafarroako Foru Komunitateko Administrazioari buruzko abenduaren 3ko 15/2004 Foru Legearen 22.1. artikuluak ematen dizkidan eskudantziak erabiliz,

EBATZI DUT:

1. Iruñeko "Baigorri Argitaletxe, S.A." enpresaren lan hitzarmen kolektiboa erregistratzea (kodea: 3108532) Lan Hitzarmen eta Akordio Kolektiboak Erregistratu eta Gordetzeko Bulegoan horretarako bereziki prestaturik dagoen liburuan, eta bertako administrazio unitatean testua eta dokumentazioa gordetzea.

2. Ebazpen hau Negoziazio Batzordeari jakinaraztea, eta adieraztea ebazpenak ez duela administrazio bidea amaitzen eta honen aurka gora jotzeko errekurtsoa jartzen ahal dela, Berrikuntza, Enpresa eta Enpleguko kontseilariari zuzendua, jakinarazi eta biharamunetik hilabeteko epean.

3. Ebazpen hau Nafarroako Aldizkari Ofizialean argitaratzea, orok jakin dezan.

Iruñean, 2010eko urtarrilaren 13an.-Arriskuen Prebentziorako eta Lanaren zuzendari nagusia, Imelda Lorea Echavarren.

BAIGORRI ARGITALETXE S.A.REN LAN-HITZARMENA

1. artikulua. Hitzarmena aplikatzen den eremua. Hitzarmen honetan jasotzen diren xedapenak Baigorri Argitaletxea S.A. enpresaren lantoki guztietan, dagoeneko badirenetan eta Hitzarmen honek iraungo duen bitartean sortuko direnetan, aplikatuko dira. Beti ere lantoki hauetako legezko ordezkariek bere negoziazioetan parte hartu badute. Era berean, Hitzarmen honek enpresan burutzen diren lan guztiei, egunkaria argitaratzearekin zerikusi zuzena izan ala ez, eragingo die.

2. artikulua. Hitzarmen honek Baigorri Argitaletxea S.A.ko langile guztiei, behin betiko kontratua dutenei zein bestelako kontratua dutenei, eragingo die, hitzarmen hau onartu duten edo berarekin bat egin duten lan zentroetan.

3. artikulua. Hitzarmen honek hiru urtetarako balioa izango du 2009. urteko urtarrilaren 1ean sartuko da indarrean, eta 2011. urteko abenduaren 31 arteko balioa izango du, beraz, Hitzarmenean bertan bestelakorik zehazten ez bada behintzat. Besterik aipatzen den kasuetan, ez da kontuan hartuko zein egunetan argitaratu zen ofizialki.

4. artikulua. Luzapena eta salaketa. Hitzarmen hau salatzea parte hartzen duten bi aldeetako edozeinen esku dago. Horretarako, eta gutxienez epea amaitu baino hilabete lehenago, idatzi bat aurkeztu beharko zaio beste aldeari eta lan-autoritateari horren berri eman beharko zaio. Horrela egin ezean, Hitzarmenaren balioa beste urtebetez luzatuko dela ulertu ahal izango da. Kasu honetan, bi aldeetako ordezkariek ordainketa kontzeptuei edo soldataren igoerari buruz negoziatu beharko dute urte horretako lehen hiruhilabetekoan.

5. artikulua. Osotasunean onartzea. Hitzarmen honetan adostuko diren eskubide eta betebeharrek osotasun bat osatzen dute, zatiezina, eta, beraz, indarrean dauden legeek soldaten, egun libreen, lanaldiaren edo ordutegien inguruan punturen bat ezeztatuz gero, eta honek bi aldeen arteko oreka hautsiko balu, Hitzarmena baliorik gabe geratuko litzateke, eta berriz aztertu beharko litzateke.

6. artikulua. Lana antolatzea. Lana antolatzea eta bakoitzaren zereginak zein diren zehaztea Zuzendaritzaren lana da. Erredakzioan, lan hau Zuzendariaren esku geratuko da.

Enpresa Batzordeak lana antolatzeko eta banatzeko aholkuak eman eta proposamenak egin ditzake.

Horrenbestez, lana antolatzeari, produkzioa hobetzeari, teknologia berriak erabiltzeari eta trebakuntza programetan parte hartzeari dagozkien kontuetan, enpresak hartutako erabakien berri eman beharko dio Enpresa Batzordeari, eta honen esanak kontuan hartu beharko ditu, Hitzarmen honetan zehazten denez.

7. artikulua. Mailak. Bakoitzaren lanaren araberako mailaketa egiterakoan, Hitzarmen honetan puntu horri eskainitako atalean zehaztutakoaren arabera egingo da. Hala ere, Baigorri Argitaletxea S.A.k ez ditu maila guztiak osatu beharko beharrezkotzat jotzen ez badu.

8. artikulua. Lan aldaketa.

A) Enpresaren barruan lan batetik bestera aldatzeko muga bakarrak lan bakoitzak eskatzen duen ikasketei dagokiona eta bakoitzaren maila profesionalari dagokiona izango dira. Talde profesionalak zehaztuta egon ezean, parekoak diren maila profesionalen artean egin ahal izango dira aldaketak.

B) Lan aldaketa norberaren talde profesionalaren barruan edo maila bereko lanetan egiten ez bada, beharrezkoak diren kasuetan bakarrik egin ahal izango da, eta beharrezkoa den bitartean bakarrik, Langileen Estatutuko 41. artikuluan jasotakoaren arabera. Langileak maila beheragoko zereginak bete beharko dituen kasuetan, aldaketak arrazoituta egon beharko du, ustekabekoa izan behar du, eta aldi batekoa bakarrik izango da. Enpresak egoera honen berri eman beharko die langileen ordezkariei.

C) Zereginak aldatuz gero, ez da langilearen duintasuna gutxietsi behar, eta aldaketa honek ez du kalterik eragin behar bere trebakuntzan. Gainera, soldatari dagokionez, hartu dituen zeregin berriei dagokien soldata jasoko du langileak, baldin eta zeregin horiek ez badira maila beheragokoak. Kasu horretan, bere lehengo soldatari eusteko eskubidea izango du langileak. Horrez gain, lan aldaketa gertatu den kasuetan, enpresak ezin izango du langilea kalera bota zeregin berrietara ez dela egokitzen edo gaitasunik ez duela argudiatuz.

D) Lan aldaketa horren ondorioz langileak goragoko mailako zereginak bete beharko balitu, eta urte berean lau hilabete baino gehiago egingo balitu lan horretan, enpresak mailaz igo beharko du langilea. Hala ere, badira salbuespen batzuk: lan aldaketa hori une jakin bateko gaitasun ezak, amatasun bajak, istripu batek edo baimen edo eszedentzia batek eragin badu, ez da horrelakorik egingo.

E) D apartatuan ez dira sartzen Enpresa Zuzendaritzak izendatuta Erredaktore Buru eta Sekzio Buru funtzioak betetzen ari direnak. Kasu hauetan Erredaktore bezala daukaten kategoria mantenduko dute, eta funtzio hauek betetzen ari diren bitartean Erredaktore Buru eta Sekzio Buruari hitzarmeneko tauletan jasota dauden eta dagozkien soldata jasoko dute.

Funtzio hauek egitea uzten dutenean, bakoitzak bere kategoriari dagozkion funtzioak betetzen jarraituko du eta hitzarmeneko tauletan jasotako kategoriaren araberako soldata jasoko du.

9. artikulua. Leku-aldaketa. Langileari lantokia herriz aldatu aurretik, honen eta enpresaren artean negoziatu beharko da. Bien artean akordiorik lortuko ez balitz, honela jokatu beharko da:

A) Langileari ezin izango zaio lantokia aldatu horretarako bizilekua aldatzea beharrezkoa izango den kasuetan, baldin eta produktibitate edo antolaketa arazorik ez balego eta Langileen Estatutuko 40. artikuluak dioen prozedura beteaz.

B) Langileak bi aukera izango ditu kasu honetan: leku-aldaketa onartu eta horren ordainetan konpentsazio bat jasotzea, edo, adostutako indemnizazioa jaso ondoren, kontratua amaitutzat ematea, kontratua arrazoi teknologiko zein ekonomikoengatik eten balitz bezala. Konpentsazioa jasotzekotan, langilearen zein honen kontura bizi diren senideen gastuak hartuko dira kontuan, eta bi aldeek adostu beharko dute konpentsazioaren zenbatekoa.

Bestalde, lantoki berrian lanean hasteko gutxienez hogeita hamar egun izango ditu langileak.

C) Antolaketa, produkzio edo teknika arrazoiak direla eta edo enpresaren jarduerari dagozkion kontratazioak direla eta, enpresak aldi baterako, gehienez ere urtebeterako, mugiarazi ahal izango ditu langileak bizi diren herritik beste herri batera. Horrelakoetan, soldataz gain dietak eta bidaien gastuak ordaindu beharko dizkio enpresak langileari. Lekualdatze hori hiru hilabete baino gehiago luzatzen bada, langileak kanpoan egiten dituen hiru hilabeteko lau lanegun hartu ahal izango ditu bere etxean egoteko. Bidaia egiteko behar dituen orduak edo egunak ez dira hiru horien barruan sartuko, eta, gainera, bidaiaren gastuak enpresak ordaindu beharko ditu. Langileak, bidezko arrazoiengatik, leku-aldaketa horri uko egingo balio, legeak agintzen duena egin beharko da.

10. artikulua. Aldi bateko gaitasun eza. Haurra izateagatik, istripuren bat izateagatik edo gaixotasunagatik aldi batez lan egiteko gai ez den langileak soldata osoa jasoko du. Horretarako, enpresak mediku azterketa bat eginarazi diezaioke gaixoari, eta mediku honek esandakoa izango da aintzat hartuko dena. Ordezkaritza sindikala jakitun delarik.

11. artikulua. Lanaldia. Hitzarmen honek eragiten dien langile guztien lan astea hogeita hamasei ordukoa izango da.

12. artikulua. 2007. urtetik aurrera langile bakoitzak astean bi jai egun egingo ditu, urteko oporraldian izan ezik.

Igande eta jai-egunetan lan egin behar duenak hitzarmen honetan zehazten den plus bat jasoko du.

Atseden egunak ezin dira pilatu, eta ezin dira opor egunekin elkartu. Atseden eguna berez jai den egun batekin bat etorriz gero, beste egun bat hartu ahal izango da.

Igande eta jai-egunetan lan egin beharra egokituz gero, lehen aipaturiko plusa kobratzeaz gain, beste egun bat hartu ahal izango da.

Egun libre hauek zehazterakoan, langileen interesak zein lanean sortzen diren beharrak hartu beharko dira kontuan. Enpresak ezingo ditu hauek aldatu, produkzioa bermatzeko ez bada, eta, hala izatekotan ere, Enpresa Batzordeari honen berri eman beharko dio.

13. artikulua. Lan-ordutegia eta lan-egutegia. Enpresak urte hasieran lan egutegia eta lan ordutegia osatu beharko ditu sail bakoitzarentzat. Horretarako, Enpresa Batzordearekin batera egin beharko du lan.

Enpresaren beharrek eraginda aldaketarik egin behar izanez gero, Langileen Estatutuko 41. artikuluan jasotakoari kalterik egin gabe, garaiz jakinarazi beharko zaio langileari, eta aurrez Enpresa Batzordearekin hitz egin beharko da.

Kasu guztietan, lanegun baten bukaeraren eta hurrengoaren hasieraren artean gutxienez hamabi orduko tartea egongo da.

Kazetari-lanaren berezitasunak direla eta, eta egunean egunekoa amaitzea beharrezkoa dela ikusita, norberaren lana izango da egun horretako zeregin guztiak bukatzea, alegia, erredaktore batek egun batean normalean egiten dituen lanak bukatuta uztea. Laneguna zeregin guztiak egindakoan, Gara egunkariari zein bere osagarriei dagozkien lan guztiak egindakoan, amaituko da, beraz.

14. artikulua. Kontratazioa. Langileak kontratatzea, edozein sailetakoak direla ere, enpresako Zuzendaritzaren esku egongo da. Zuzendaritzak kanpotik langileren bat kontratatu aurretik, Enpresa Batzordeari jakinarazi behar dio bete gabeko postuak daudela, ahal denean behintzat. Enpresa Batzordeak lanpostu horren inguruan proposamenik balu, enpresak postu hori bertako langileekin betetzeko aukera aztertuko luke, une bakoitzean zehaztuko diren irizpideen arabera.

Enpresak, indarrean dagoen legeak agintzen duenez, egiten dituen kontratuen berri eman beharko dio Enpresa Batzordeari.

Baigorri Argitaletxea S.A.k Aldi Baterako Laneko Enpresetatik datorren langilerik ez kontratatzeko konpromisoa hartzen du.

15. artikulua. Lanbide heziketa. Enpresak unibertsitateekin, eskola teknikoekin eta Lanbide Heziketako zentroekin egin ditzakeen hitzarmenak alde batera utzita, zuzendaritzak langileak trebatzea bultzatuko du, horretarako langile bakoitza bere arloan eguneratzeko edo gaitzeko proposamenak aurkeztuz.

Beraz, enpresak langileei eskainiko die:

A) Lanbide heziketarako ikastaroetara joan ahal izateko lan ordutegia aldatzeko aukera.

B) Lanerako trebatzeko denbora, baimenak eman eta lanpostua gordez.

C) Interesaturik legokeenak aurrez jakinarazi beharko dio enpresako Zuzendaritzari, trebatzeko beharrezkoak dituen laguntzak bidera daitezen.

16. artikulua. Oporrak. Urteko oporrak, urtebetean lan egiteagatik emango direnak, hogeita hamar egun arrunt edo 26 lanegunetakoak izango dira. Larunbatak lanegunak izango dira. Gainera, gutxienez hamabost egun jarraian hartu beharko dira. Oporrak, ahal izanez gero, ekainean, uztailean, abuztuan edo irailean hartu beharko dira. Puntu honetan ere kontuan hartu beharko dira langileen eta enpresaren arteko hitzarmenak.

Oporretako hilabete horretako soldata hileko soldataren parekoa izango da: oinarrizko soldata jasoko da, beraz.

Enpresa honetan lanean hasten den urte berean oporrak egiteko eskubidea izango du langileak, betiere lan egin dituen egunekin proportzioan.

Oporrak diruz ordainduko dira behin betiko baja, aldi baterako baja, eta eszedentzia edo lanpostua gordeta aldi baterako baimena izango den kasuetan, Langileen Estatutuko 38. artikuluko 3. atalean jasotakoari kalte egin gabe.

Langile bakoitzaren opor egunak apirilaren 30a baino lehen zehaztu beharko dira.

Bestalde abenduaren 24 eta 31 jai egun izango dira langile guztientzat, opor, jai egun edo edozein baimenetatik aparte.

17. artikulua. Baimen bereziak. Langileak, aurrez jakinaraziz gero eta arrazoi hauetakoren bat izanez gero, lanera joateari utzi ahal izango dio soldata osoa jasoz.

A) Ezkondutakoan: langileak hogei egun hartu ahal izango ditu. Hau hamar urtean behin bakarrik egin ahal izango da.

B) Seme-alabaren bat jaiotzen denean: bost egun hartu ahal izango dira.

C) Hurbileko senideren bat, bigarren maila arteko hurbiltasuna duena, larriki gaixotu edo hilko balitz, hiru lanegun hartu ahal izango dira. Harengana joateko langileak 100 km baino gehiago egin beharra izanez gero, bost egun hartu ahal izango ditu.

Erregistro publikoren batean izena emanda dauden egitezko bikoteek eskubide berak izango dituzte, ezkonduta ez badaude ere.

D) Etxe aldaketagatik: egun bat hartu ahal izango da.

E) Betebehar publiko edo pertsonal bat izanez gero, besteak beste botoa ematea, beharrezkoa den denbora hartu ahal izango da. Legeren batean zehaztuta egonez gero, honek esandakoa bete beharko da, hartu ahal izango den denborari eta enpresak ordaindu beharko duenari dagokionez. Betebehar horrek langileari hiru hilabetean lanorduen %20 baino gehiago galdu arazten badio, enpresak langile hori egun indarrean den Langileen Estatutuko 46. Artikuluan araututako eszedentzia egoeran jartzea erabaki dezake.

Zeregin horiek betetzeagatik langileak indemnizazioren bat jasoko balu, diru kopuru hori gutxiago jasoko du soldatatik.

F) Sindikatuko lanak edo langileen ordezkari lanak betetzeko orduan, legeak zehazten duenaren arabera jokatuko da.

G) Azterketak egin behar direla eta, baimen berezia jaso ahal izango da enpresako lanarekin zerikusirik duen tituluren bat eskuratzeko den kasuan. Gainontzekoetan, baimena eskainiko da, baina lanegun hori ez da ordainduko.

H) Norberaren kontuak: Hitzarmen honek eragiten dien langile guztiek dute urtean bi egun hartzeko eskubidea, oporrak eta egun libreak kontuan izan gabe.

I) Hamabi hilabete baino gutxiago dituzten haurren amek, bularra eman behar dietela eta, egunean ordubete hartu ahal izango dute, ordu erdiko bi zatitan banatuta. Amak, hala nahi izanez gero, ordubete gutxiagoko laneguna eskatu ahal izango du. Baimen hau haurraren aitak zein amak hartu ahal izango du biek lana egiten badute.

J) Legeak aginduta zortzi urte baino gutxiagoko haurren bat zaintzea bere gain duen langileak, edo soldata baten truke lanik egiten ez duen gutxitu fisiko edo psikikoren baten ardura duenak laneguna murrizteko eskubidea izango du. Laneguna gutxienez zortzirena eta gehienez erdia murriztuko da, eta soldata egindako lanorduen araberakoa izango da.

K) Lan orduen barruan egin beharreko haurra jaio aurretiazko azterketa eta jaiotze aurreko tekniken preparatzeko behar den hainbat denbora.

18. artikulua. Norberaren gogoz uztea. Langileak hala nahi eta lana uzten badu, enpresak egun berean likidazioa egiteko betebeharra du. Bestalde, langileak lana utzi baino hilabete lehenago emango dio enpresari bere erabakiaren berri.

19. artikulua. Soldata. Hitzarmen honek eragiten dien langileen soldatak oinarrizko lan-sariek eta osagarriek osatuko dituzte. Hala egokituz gero, indemnizazioak eta soldatari ez dagozkion konpentsazioak jasotzeko eskubidea ere izango du langileak.

20. artikulua. Ordainketa modua. Soldataren barruan, honako kontzeptu hauek sartzen dira:

1.-Oinarrizko soldata.

2.-Osagarriak:

2.1. Hilabeterokoak.

a) Jai egun eta igandeetako plusa.

2.2. Hilabeterokoak ez direnak.

a) Udako paga.

b) Urte amaierako paga.

21. artikulua. Oinarrizko soldata. Oinarrizko soldata bakoitzaren maila profesionalaren arabera langile bakoitzak jasotzen duen diru-saria da, egoera pertsonalen, lanpostuaren, kantitatearen edo kalitatearen eta bestelako arrazoi baten ondorioz jasotzen diren plusak alde batera utzita.

Maila profesional bakoitzaren diru-saria Hitzarmen honekin batera doan eranskineko koadroetan agertzen da.

22. artikulua. Igandetan eta jai egunetan lan egiteagatiko plusa. Igandetan lan egiten duten langileek maila bakoitzari dagokion eta eranskinean zehazten den plus bat jasoko dute.

Plus honek ez du ezeztatzen Hitzarmen honetako hamargarren artikuluan jasotzen den asteko atseden eguna hartzeko eskubidea.

Zuzendariak, Zuzendariordeek, Erredakzioburuek eta Sailburuek ez dute plus hau kobratuko.

23. artikulua. Pagak. Langileek, soldataren zati bat balira bezalaxe, honako paga hauek jasotzeko eskubidea dute.

Udako paga: ekaineko nominarekin batera jasoko dute eta hilabeteroko soldataren parekoa izango da: hau da, oinarrizko soldata.

Urte amaierako paga: abenduaren 20a baino lehen jasoko da, eta udakoaren berdina izango da.

Urtean zehar lana utzi edo lanean hasten denari, egin dituen lanegunekin proportzioan ordainduko zaio paga. Erabaki honek langile ebentualei, interinoei zein behin-behineko kontratua dutenei eragingo die.

24. artikulua. Kilometrajea. Enpresak hala onartuta langileak bere eginbeharretarako bere autoa erabili beharko balu, kilometroko 0,25 euro ordainduko dizkio enpresak.

25. artikulua. Ordaintzeko modua. Nomina hilabetero banatuko da, orain arte egin den bezalaxe.

26. artikulua. Faltak. Laneko disziplinaren aurka eginiko faltak hiru mailatakoak izan daitezke: arinak, larriak eta oso larriak. Ondoren datorren zerrendan agertzen ez diren faltak hauekiko antzekotasunean oinarrituz sailkatuko dira.

Falta arinak dira:

A) Lanera sartzeko ordutegia zehaztuta dagoen kasuetan, hilabetean hiru aldiz berandu iristea, bost minutu eta ordu erdi artean.

B) Lanera faltatuz gero, baja garaiz ez bidaltzea, arrazoituta ez dagoen kasuetan.

C) Arrazoirik gabe lana bertan behera uztea, denbora gutxian bada ere. Gainera, horren ondorioz enpresari kalteak eragin edo bere lankideek lan-istripuren bat sufrituko balute, falta larria edo oso larria izan daiteke.

D) Materiala behar bezala ez zaintzea.

E) Lankideekiko zein kanpoko jendearekiko harremanetan zuzen eta egoki ez jokatzea.

Falta larriak dira:

A) Hilabetean hiru aldiz baino gehiago iristea lanera berandu. Lankideari txanda egin behar zaion kasuan, behin berandu iristea nahikoa izango da falta larria izateko.

B) Hilabetean bi aldiz, inolako azalpenik eman gabe, lanera ez joatea.

C) Gaixo dagoen edo istripua izan duen itxura egitea.

D) Nagusiei kasurik ez egitea. Honek lan disziplinan eragingo balu, edo enpresari kalteak eragingo balizkio, falta oso larria izan liteke.

E) Lan funtzionamenduari eragiten dion utzikeria.

F) Arduragabekeria. Honek lan-istripuren bat, berari edo lankideren bati, edo instalazioetan matxuraren bat eragingo balu, falta oso larria izan liteke.

G) Falta arinak hilabeteren buruan behin eta berriz egitea, falta berak izan ez arren.

H) Sei hilabeteren buruan hamar aldiz edo urtebeteren buruan hogei aldiz iristea berandu lanera, arrazoirik gabe.

Falta oso larriak dira:

A) Baimenik gabe, eta lanorduetan, norberaren beste lan batzuk egitea enpresan; lanorduz kanpo bada ere, enpresaren materiala erabiltzea norberaren lanak egiteko; eta, azkenik, indarrean dagoen araudiari muzin eginez, beste enpresa batentzat egitea lan.

B) Iruzur egitea, desleial jokatzea, gehiegizko konfiantza izatea eta lapurtzea, enpresari zein lankideei, eta enpresan bertan zein enpresatik kanpo, lanorduetan.

C) Enpresaren materiala eta instalazioak desagertarazi, matxuratu edo hondatzea.

D) Enpresatik kanpo egina bada ere, langileak lapurreta salaketa bat izatea, edo konfiantza eza eragiten duen beste ekintzaren bat burutzea.

E) Enpresaren eskutitzak edo ezkutuko agiriak irakurri edo ezkutuko informazioa kaleratzea.

F) Tratu txarrak edo errespetu falta, nagusiei, lankideei zein mendekoei.

Ustez gehiegizko autoritatea jasan duen langileak Zuzendaritzari eman beharko dio horren berri, honek kontu hori argitzeko beharrezko tramiteak egin ditzan eta kasuak horrela eskatu ezkero behar diren neurriak hartzeko.

G) Arduragabekeriagatik istripu larriak eragitea.

H) Ardura duten postuetan egonik, lana bertan behera uztea.

I) Eguneroko lanean, hala nahi izanda, gero eta etekin gutxiago ateratzea.

J) Sei hilabeteren buruan falta larriak behin eta berriz egitea, errepikatzen dena falta bera izan ez arren.

Zigorrak. Ezarri ahal izango diren zigorrik handienak, falta zenbateraino larria den kontuan hartuta, honako hauek dira.

Falta arinak badira: idatzizko ohartarazpena.

Falta larriak badira: Bi egunetik hamarrera bitartean lan egiteari utzi eta ez kobratzea. Horretarako, honen arrazoiak idatziz jaso beharko dituzte, bai langileak eta bai enpresa batzordeak.

Falta oso larriak badira: Hamaika egunetik hogeita hamar egunera bitartean lan egiteari utzi eta ez kobratzea. Gainera, langileak hala nahi ez badu ere, enpresak lantokiz alda dezake, eta bai kalera bota ere. Horretarako espedientea tramitatu, eta langileari berari entzungo zaio, langileak bere deskargurako frogak aurkeztu ahalko ditu. Ordezkaritza Sindikalarekin ere hitz egin beharko du enpresak, hiru egun baino lehen, bere iritzia eman dezan.

Falten zigor izaera galtzea. Falta arinek hamar egunen ondoren galduko dute beren zigor izaera, larriek hogei egunen ondoren eta oso larriek enpresak honen berri izan zuenetik hirurogei egun pasa ondoren. Falta egin eta sei hilabetera galduko du zigor izaera, beranduenez.

Desleialtasuna edo gehiegizko konfiantza egon den kasuetan, falta egin eta hemezortzi hilabetera galduko da zigor-izaera.

27. artikulua. Istripu-aseguruak. Mutua patronalaren bidez edo Gizarte Segurantzaren bidez derrigorrez kontratatu behar diren aseguruez gain, lan istripuen zein lan gaixotasunen arrisku-estaldura dira aseguruok, enpresaren zuzendaritzak beste aseguru-poliza bat sinatuko du enpresako langile guztientzat. Aseguru-poliza honek, edozein motatako istripuen ondorioz heriotza edo lanerako gaitasun eza agertzen den kasuetan, 36.061 eurotako diru-laguntza ahalbidetuko du. Langile batek enpresa honetan lan egiteari uzten dion unetik, aseguru honek ez du baliorik izango beretzat.

28. artikulua. Osasun azterketa. Urtero osasun azterketa burutuko du enpresan hala nahi duen langileak. Ondoren, azterketa hauen emaitzen kopia bat emango zaio langileari berari.

29. artikulua. Batzorde parekidea. Batzorde parekide bat sortuko da Hitzarmen honetan zehaztutako arau guztiak betetzen diren ala ez aztertzeko, betiere indarrean dagoen legeak edo lan autoritateak dioenari kasu eginez. Batzorde honen lana izango da Hitzarmena interpretatu eta aplikatzearen ondorioz sor daitezkeen zalantzak argitzea. Hitzarmena baliagarria izan dadin beharrezkoa dena egingo du, baita zelatatu ere.

Hartzen dituen erabakiak kontzentsuatuak izango dira.

Lau kidek osatuko dute batzorde hau, horietatik bi enpresaren ordezkari gisa joango dira, eta beste biak langileen ordezkari gisa.

Langileen ordezkaritza lan zentro bakoitzeko kide edo ordezkari batez handitu daiteke, eztabaidatu behar den arazoak edo gai ordenak horrela eskatzen duela erabakitzen badute langileen ordezkariek.

Alde bakoitzak iruditzen zaizkion aholku emaileen laguntza jasoko ahalko du, aztertu behar den arazo edo gaiaren arabera.

Batzordeak Idazkari bat izendatuko du, honek bileren eta hartutako erabakien akta jasoko du.

Hitzarmen osoari dagokion batzorde horren berezko zereginak honako hauek izango dira:

A) Hitzarmena interpretatzea.

B) Hitzartutakoa betetzen dela ziurtatzea.

C) Bi aldeen arteko arazoetan adostasuna lortzea.

D) Batzorde horrek derrigorrez bete beharko ditu eginbehar horiek, baina horrek ez du esan nahi enpresak zein langileek autoritateak edo legeak agintzen duena erabili ez dezaketenik.

e) Batzordean kideren bat faltako balitz, alde bakoitzak aukeratutako beste pertsona batek hartuko du bere lekua. Langileren bat falta izatekotan, Enpresa Batzordeko norbaitek hartuko luke lan hori.

Batzordea bil dadin eskatzeko, bi aldeetako batek Idazkariari idatziz egingo dio eskaria eta eskaria egin eta 72 ordu baino lehen bilduko da batzordea. Batzordeko ordezkariak aukeratu eta zein izango diren Hitzarmena Herrialdeko Aldizkari Ofizialean argitaratu eta hogei eguneko epea amaitu baino lehen jakinarazi beharko zaio beste aldeari.

Batzordeak hartutako erabakien berri emateko, bilera egunetik aurrera bost eguneko epea izango du batzordeak. Erabakiak ahobatez onartuko dira, eta interesatuari erabakiaren berri ematerakoan, bileraren aktaren kopia emango zaio.

30. artikulua. Mailak. Hitzarmen honetan jasotzen diren maila guztiek ez dute zertan beteta egon, baldin eta enpresak beharrezkotzat jotzen ez baditu.

Hitzarmena indarrean dagoen bitartean bertan bereizten diren mailak zehaztea edo berrikustea beharrezkotzat joko balitz, enpresaren eta Enpresa Batzordearen artean negoziatuko da.

31. artikulua. Sailkapena. Hitzarmen honetan sartuta dauden langileak arlo hauetan banatuko ditugu:

1.-Erredakzioa.

2.-Administrazioa eta gestioa.

3.-Arlo teknikoa.

1.-Erredakzioa. Arlo honetan honako hauek sartzen dira:

a) Zuzendaria.

b) Zuzendariordea.

c) Erredakzio burua.

d) Sailburua.

e) 1. Erredaktorea.

f) 2. Erredaktorea.

g) 3. Erredaktorea.

h) 4. Erredaktorea.

i) 5. Erredaktorea.

j) Erredaktorea praktiketan.

k) 6. Erredaktorea.

l) 1. Erredaktore laguntzailea.

m) 2. Erredaktore laguntzailea.

2.-Administrazioa eta gestioa. Arlo honetan honako hauek sartzen dira:

a) Sailburua.

b) Administrazioko Lehenengo mailako ofiziala.

c) Administrazioko bigarren mailako ofiziala.

d) Administrari laguntzaileak.

e) Telefonistak.

3.-Arlo teknikoa. Arlo honetan honako hauek sartzen dira:

a) Zerbitzu teknikoaren arduraduna.

b) Lehen mailako teknikaria.

c) Bigarren mailako teknikaria.

d) Hirugarren mailako teknikaria.

32. artikulua. Bakoitzaren zereginak.

1. Erredakzioko langileak. Erredakzioko langileak dira beharrezko ezagupenak izan eta egunkaria sortzeko lan egiten dutenak, bai idazten eta bai alde grafikoan. Hauei laguntzen dietenak ere hemen sartzen dira.

Erredakzioko langileen artean maila ezberdinak bereizten dira:

a) Erredakzio buruak: Sail batean edo gehiagotan edukiak eta lan grafikoa gainbegiratu eta koordinatzen dituztenak dira.

b) Sailburuak: Sail bat edo gehiago antolatzen dituzten kazetariak dira. Erredakzioburuari lagundu, eta, hau egon ezean, haren lanak bete behar dituzte.

c) 3. Erredaktorea batez ere lan intelektuala egiten duen kazetaria da, idatzian zein alde grafikoari dagokionean. Informazio arlo bat du bere gain, eta bere lana informazioa editatzeko prest dagoenean amaitzen da.

d) Zuzendaritzak 1. Erredaktorea izendatu ahal izango du bere taldeko funtzioez gain, sailburuaren ez ohiko ausentzia tarteko denean edo laguntza emateko bere ardura globala hartzen duena.

e) Zuzendaritzak 2. Erredaktorea izendatu ahal izango du bere taldeko funtzioen barnean esperientzia eta kualifikazio profesionala duena, lanaren antolakuntzaren beharrak eraginda.

f) 4., 5., 6. Erredaktoreak eta praktiketakoa, 1., 2., 3. Erredaktore zein nagusiei, batez ere zeregin literario eta grafikoan, laguntzen dieten kazetariak dira. Beren lana informazioa editatzeko prest dagoenean amaitzen da.

g) Erredaktore laguntzaileak lagungarri diren lan teknikoak burutzen dituzten erredakzioko langileak dira.

2. Administrazioa eta gestioa. Arlo honetan sartzen dira gestio administratiboarekin eta ekonomikoarekin zerikusia duten lanak egiten dituztenak.

a) Sailburuak. Saila antolatu eta ardurak bere gain hartzen dituztenak dira. Sail horretan lan egiten duten langileei agintzeko gai dira.

b) Lehen mailako ofizialak. Iniziatiba izan eta ardurak bere gain hartzen dituzten langileak dira. Ez da beharrezkoa beren mende langileak izatea. Beren lana goragoko mailako norbaiten agindupean betetzen dute.

c) Bigarren mailako ofizialak. Ardura gutxiago dituzte eta Sailburuaren eta lehen mailako ofizialen mende daude.

d) Administrari laguntzaileak: administrazio lan osagarriak betetzen dituztenak dira.

e) Telefonistak: telefono-zentralaz arduratu eta administrari lan osagarri batzuk betetzen dituztenak dira.

3. Teknikariak. Enpresaren sistema informatikoaz, honen mantenimenduaz, aplikazio berriak sortzeaz eta sistema horien erabiltzaileei laguntzeaz arduratzen dira. Halaber, enpresan dauden makinen eta instalazioen (inprimagailuak, ordenagailuak, aire egokitua eta abar) mantenimenduaz arduratzen dira. Sor daitezkeen informatika arazoak konpontzea ere beraien lana da.

33. artikulua. Hitzarmen honetan arautu ez diren zehaztasunei buruzko erabakiak hartzeko, indarrean dagoen Langileen Estatutua, Sindikatu Askatasunaren Lege Organikoa eta bestelako xedapen orokorrak hartuko dira kontuan. Gainera, enpresan errotuta dauden ohiturak ere aintzat hartzekoak izango dira.

2009. URTERAKO TAULA

2010: Taulak erredaktore buru, sekzio buru, erredaktore 1, erredaktore 2 eta aurreko urteko kpi aren arabera gaurkotuko dira; ; erredaktore 3 eta beheragoko mailak aurreko urteko kpi gehi bataz besteko %1,5 ko igoerarekin gaurkotuko dira kategori hauen masa salariala kontutan hartuta.

2011: Taulak erredaktore buru, sekzio buru, erredaktore 1, erredaktore 2 mailetan aurreko urteko kpi aren arabera gaurkotuko dira; erredaktore 3 eta beheragoko mailak aurreko urteko kpi gehi bataz besteko %1,5 ko igoerarekin gaurkotuko dira kategori hauen masa salariala kontutan hartuta.

Iragarkiaren kodea: F1001217