1. NAFARROAKO FORU KOMUNITATEA
1.1. XEDAPEN OROKORRAK
1.1.3. Foru Aginduak
178/2010 FORU AGINDUA, abenduaren 14koa, Ekonomia eta Ogasuneko kontseilariak emana, J-50 eredua, zozketen, tonbolen, apustuen eta ausazko konbinazioen gaineko zerga tasaren aitorpen-likidazioari buruzkoa, onesten duena apustuen modalitatean.
Estatuaren eta Nafarroako Foru Komunitatearen arteko Hitzarmen Ekonomikoaren 40. artikuluan xedatzen denez, zozketen, tonbolen, apustuen eta ausazko konbinazioen gaineko zerga tasa Foru Komunitateak ordainaraziko du horretarako baimena Nafarroan eman behar denean. Halaber, ezartzen da jokoaren gaineko zergen kasuan (horretarako baimena Nafarroan eman behar denean) Estatuak zergapeko egitateari eta subjektu pasiboari dagokienez unean-unean ezartzen duen araudi bera aplikatuko duela Nafarroako Foru Komunitateak.
J-50 eredua, zozketen, tonbolen, apustuen eta ausazko konbinazioen gaineko zerga tasaren aitorpen-likidazioari buruzkoa, apustuen modalitatean, bide telematikoa erabiliz aurkeztuko da nahitaez, Interneten bidez. Horretarako, Nafarroako Zerga Ogasunaren web orrian, dagokion atalean, dagoen inprimakia beteko da, foru agindu honetan ezarritako baldintza orokorrekin eta prozedurarekin bat.
Tributuei buruzko abenduaren 14ko 13/2000 Foru Lege Orokorraren zazpigarren xedapen gehigarrian baimena ematen zaio Ekonomia eta Ogasuneko kontseilariari foru agindu bidez erregula dezan zergadunek eta entitateek zein kasutan eta baldintzatan aurkezten ahal dituzten baliabide elektronikoak, informatikoak eta telematikoak erabiliz aitorpenak, jakinarazpenak, aitorpen-likidazioak, autolikidazioak edo tributuen arloko araudiak eskatutako beste agiri guztiak.
Horrenbestez, eta Tributuei buruzko abenduaren 14ko 13/2000 Foru Lege Orokorraren 6. artikuluan jasotako eskudantziarekin bat,
AGINDU DUT:
1. artikulua. J-50 eredua, zozketen, tonbolen, apustuen eta ausazko konbinazioen gaineko zerga tasaren aitorpen-likidazioari buruzkoa, onestea apustuen modalitatean.
J-50 eredua, zozketen, tonbolen, apustuen eta ausazko konbinazioen gaineko zerga tasaren aitorpen-likidazioari buruzkoa, onesten da apustuen modalitatean, eta bide telematikoa erabiliz aurkeztuko da, Interneten bidez.
2. artikulua. J-50 eredua aurkeztera behartuta daudenak.
J-50 eredua aurkeztera behartuta daude apustu bidezko jokoan aritzeko baimen administratiboen titular diren pertsona fisiko edo juridikoak nahiz entitateak. Baimen administratiborik izan ezean, apustu bidezko jokoak egin edo horiek antolatzen dituzten pertsona fisikoak, juridikoak edo entitateak behartuta egonen dira J-50 eredua aurkeztera.
3. artikulua. Aurkezteko epea.
J-50 ereduaren aurkezpena eta sarrera hiru hilean behin eginen da, hiruhileko natural bakoitza amaitu eta hurrengo lehen hogei egunetan, salbu bigarren eta laugarren hiruhilekoen aitorpenen kasuetan, abuztuaren 5era eta urtarrilaren 31ra bitarte aurkeztu ahal izanen baitira, hurrenez hurren.
4. artikulua. J-50 ereduari dagozkion aitorpenen Internet bidezko aurkezpen telematikoa egiteko baldintza orokorrak.
1. J-50 ereduari dagozkion aitorpenen aurkezpen telematikoa baldintza hauei jarraikiz eginen da:
a) Aitortzaileak identifikazio fiskaleko zenbakia (IFZ) eduki behar du.
b) Aitortzaileak ziurtagiri elektronikoa eduki beharko du, Nafarroako Zerga Ogasunak onartua, Nafarroako Zerga Ogasunaren esparruan baliabide elektroniko, informatiko eta telematikoen (EIT) erabilera arautzen duen uztailaren 17ko 50/2006 Foru Dekretuan ezarrita dagoenari jarraikiz.
Baimenduta dauden ziurtagiri elektronikoak eta ziurtapen zerbitzuak ematen dituztenen zerrenda Interneteko http://www.hacienda.navarra.es helbidetik abiatuta kontsulta daiteke.
c) Aitorpenak, jakinarazpenak eta zerga arloko beste agiri batzuk hirugarren pertsonen izenean telematika bidez aurkezteko eta tributu zorren ordainketa telematika bidez tramitatzeko kanpo-lankidetzarako akordioa onesten duen Ekonomia eta Ogasuneko kontseilariaren ekainaren 29ko 130/2009 Foru Aginduan xedatutakoarekin bat, aurkezleak, aitorpenak hirugarrenen izenean egiteko baimendutako pertsona edo entitate bat baldin bada, Nafarroako Zerga Ogasunak onartutako ziurtagiri elektronikoa, aurreko b) letran aipatzen dena, eduki beharko du.
d) J-50 ereduaren aurkezpen telematikoa egiteko, aitortzaileak edo, hala bada, baimendutako aurkezleak Nafarroako Atarian eskuragarri dagoen inprimakia erabili beharko dut.
e) Aitortzaileak aurkezpen telematikoa egiteko eskatzen diren arau teknikoak bete beharko ditu. Arau horiek Nafarroako Zerga Ogasunaren web orrian daude ikusgai: http://www.hacienda.navarra.es.
2. Telematika bidez igortzen diren aitorpenetan akats formalak atzematen direnean, sistemak berak emanen dio horren berri aitortzaileari akatsak azaltzeko mezuen bitartez, behar den zuzenketa egin dezan.
5. artikulua. J-50 ereduari dagozkion aitorpenen Internet bidezko aurkezpen telematikoa egiteko prozedura.
Aitorpenen Internet bidezko aurkezpen telematikoa egiteko, prozedura hau erabiliko da:
1. Nafarroako Ataritik, Ogasunarekiko izapideen atalean sartu.
2. Egin nahi den aitorpenaren eredua hautatu, eta aitorpena aurkeztu ahal izateko datu guztiak bete.
3. Aitorpena bidali. Aitorpena bete ondoren, "bidali" aukera erabili, eta sistemak aitorpena baliozkotuko du.
Azken xedapen bakarra.-Indarra hartzea.
Foru agindu honek Nafarroako Aldizkari Ofizialean argitaratu eta biharamunean hartuko du indarra, eta 2010eko laugarren hiruhilekoari dagozkion aitorpenei aplikatuko zaie lehen aldiz.
Iruñean, 2010eko abenduaren 14an.-Ekonomia eta Ogasuneko kontseilaria, Álvaro Miranda Simavilla.
Iragarkiaren kodea: F1020469
